Segundo fase di Dump lo mira su finalisacion na maart 2009!

Segun Gobierno di MEP

ORANJESTAD- Un biaha mas comunidad Arubano por a experencia e curashi y determinacion di Gabinete Oduber na momento cu a surgi un retraso den implementacion di e segundo fase di e proyeco di Dump na Parkietenbos.
Hecho ta cu simannan largo nos mester a scucha acusacionann baho y vil di politiconan di AVP y RED, entre otro Benny Sevinger y Rudy Lampe, cu nunca a yega di haci algo drechi pa e pais aki y kendenan den nan frustracion y desesperacion a cuminsa tira cu lodo den direccion di nos Minister di Salubridad drs. Booshi Wever, alegando cu posibelmente corupcion a wordo practica den e bunita proyecto aki.
Manera ta bon conoci caba den tur proyecto grandi cu wordo ehecuta lo por surgi cualkier retraso y pa cu e proyecto di Dump esaki no ta un excepcion.
Den e caso aki Minister Wever a asumi su responsabilidad como e minister encarga, a percura pa trece tur e partidonan envolvi hunto, esta FDA, Bouldin & Lawson y Albo Aruba, a sinta na mesa den forma profesional y a logra un resultado sumamente positivo pa loke ta continuacion di e proyecto aki.
Awe tin un acuerdo solido firma, caminda cu e proyecto di e segundo fase di Dump lo continua cu su construccion e siman aki mes y cu poder di Dios esaki lo termina definitivamente dia 17 di maart 2009.
Aki a keda demonstra un biaha mas cu unda tin bon boluntad, integridad y honestidad semper tin solucion pa tur problema cu ocuri den cualkier proyecto.
Ta bon conoci caba pa e comunidad Arubano cu tur proyecto cu a wordo inicia door di Gabinete Oduber den e ultimo 7 añanan, esakinan tur a wordo finalisa cabalmente. Alavez henter comunidad por mira claramente unda tur nan placa di belasting a bay.

Cu Sinbad, Brandon T.Jackson, Erykah Badu, Sean Kingston, Wyclef Jean, Ledisi y Paige Bryan

ORANJESTAD- Pa solamente awe na Arawak Garden entre 6:30 – 10:00 p.m. organisadornan di e Soul Beach Music Festival ta duna Aruba e ultimo oportunidad pa por cumpra e ticket di entrada na Afls. 55,= p/p pa anochi.
Mientras cu diamars en adelante e ticketnan aki lo bira $ 65,= p/p pa anochi. y ta recomenda tur esnan cu no a provecha ainda di e prijs especial aki pa hasi esaki pa nan no keda afor di e gran fiesta di e fin di siman aki cu lo bai ta grandi den Aruba Entertainment Center cuminsando pa 7 or di anochi. No perde e oportunidad di presencia tur e artista grandi di e aña aki manera:
Sinbad, Brandon T.Jackson, Erykah Badu, Sean Kingston, Wyclef Jean, Ledisi y Paige Bryan y cu nan ariba diabierna anochi nos banda local lo ainda lo mester ser anuncia diamars 21 di mei asina ta sigui manda bo SMS pa bo banda preferi.
E calendario di evento di Soul Beach Music Festival cu lo cuminsa diahuebs 22 di mei te cu 26 di mei, por bisa cu preparacionnan ta bayendo fullswing y e expectativa a crece y por spera hopi bishitante di Estados Unidos cu lo viaja especialmente pa Aruba cu e tour di Soul Beach pa asina atende e festival y disfruta di nos dushi isla.
Tur e bishitantenan como local lo por goza di un calendario di evento cu ta encera “beach parties”, “comedy night”, “concerts” y “after concert parties” na Havana Beah Club.
Diferente di e aña nan anterior e evento lo tuma lugar e aña aki den Aruba Entertainment Center y ta garantiza di presenta e mesun saus y hip pa entretene tur fanatico di Soul, R&B, Hip Hop y Zuk.

ORANJESTAD- Ya ta bon conoci cu e placa di pueblo cu gobierno ta hinca den nos enseñanza y e super bon pago na e maestronan cual ta e di 3 mihor na mundo, no ta dunando nos e resultado cu nos ta desea.
E tiramento di culpa ariba e alumnonan ta un disco raya cu ta ser usa como pretexto pa defende un grupo grandi cu no ta interesa kico ta pasa cu nos muchanan. Si bo analisa e resultadonan na school basico, MAVO, HAVO, VWO, EPB, EPI etc., e ta di yora ora nos mira cu den mas cu 54 aña di e Statuut di Reino cu tin nos hunto, ainda ni 2% di henter nos comunidad no ta academico y ni 6% tin siquiera un HAVO-diploma di un paar di vak pa gradua den dje.
Con por ta posibel cu pueblo tin cu keda pomp placa den enseñanza pa paga entre otro maestronan, anto nos tin un resultado asina malo? E amor cu mester sali di e educador a desemboca den materialismo total.
Despues cu un grupo di maestronan materialista a huelga 5 pa 6 siman pa placa, unda tin un grupo si cu ta stima nan profesion y a keda traha tur dia, awor cu e muchanan mester prepara nan mes pa e fase final di e aña escolar pa bay over pa un otro klas of gradua, a resulta cu e huelga iresponsable lo bay tin su influencia dramatico ariba nos muchanan. Hopi di nan lo no haña e oportunidad mas pa recupera y lo perde un aña of lo no gradua. E gastonan pa gobierno, e pagador di belasting y e mayornan lo ta hopi grandi, principalmente un aña hopi dificil mundialmente.
Nos ta di opinion cu mester pone esnan cu a organiza e huelga, e maestronan cu a huelga 5 pa 6 siman largo personalmente responsable pa e mal resultadonan cu sigur ta na caminda. Mester start un proceso di prueba pa determina si por cobra nan e gastonan, pasobra ta nan deliberadamente a perhudica nos yiunan.

Presidente di Parlamento:
Dianan 21, 22 y 23 di mei

ORANJESTAD- E siman aki, esta dia 21, 22 y 23 di mei lo tuma lugar na At. Maarten, reunionnan di Bipartite entre Antias y Aruba.
Pa e occasion aki un delegacion di Parlamento ta sali pa St. Maarten unda desde mayan dia 20 lo tuma lugar diferente bishitanan di trabou. Lo bishita e oficina di gobernacion den construccion, :the St. Maarten Business Association y “the chamber of Commerce of St. Maarten . Tambe lo bishita un proyecto di agricultura di “the St. Maarten Agricultural Enterprises”.

Diaranzon lo start sali cu e reunion entre e delegacionnan. E delegacion aki ta ser encabeza pa Presidente di Parlamento drs. Mervin Wyatt Ras y sr. adi Thijsen cu ta presidente di e commission CIPRES (Contracto Interparlamentario cu Reino y Surnam).
E apertura lo tuma lugar dor di discursonan di e Presidentenan di Antias y di Aruba sigui pa tratamento di puntonan di agenda.
Dicho puntonan di agenda ta lo siguente.
1. Palabracionnan
2. Tratado di comercio entre Reino y Republica di China, entre otro trafico di persona
3. Evaluacion di e areglo di cooperacion Antias y Aruba
4. Structura nobo di consulta interparlamentario pa relacionnan den Reino /deficit democratico
5. Rapport di European Commission for Racism and Intolerance y Open Justice
6. Intencion di maneho hulandes encuanto declaracion di ta persona indesea dentro di Reino
7. Ensenaza di Plan di Delta cu presentacion di ministro di Ensenanza y Cultura Antiano, sra. Omaira Leeflang y dia di REino

EL CAIRO – Osama bin Laden djadumingu a kritiká e lidernan arabir pa “sakrifiká” e palestinonan, den un mensahe, den kua e lider di e ret al-Qaida a pidi e milisianonan musulman di Egipto pa yuda kibra e blokeo na e Zona di Gaza.
Bin Laden a yama e lidernan arabir “agentenan di e krusadanan” i “lobonan” den e mensahe di oudio. El a bisa ku e siudadanonan di e paisnan ariba ta rebañonan di karnénan ku a ser poné den mannan di lobonan pa kuida nan.
“Kada dia e rebaño ta deseá pa e lobonan stòp di hasi nan nan víktima”, el a deklará.
“E reinan i lidernan (arabir) ei a sakrifiká Palestina i Al-Aksa pa mantené nan koronanan. Pero nos lo no libra nos mes di e responsabilidat aki”, bin Laden a deklará riba un film di oudio ku a aparesé riba un página di Internèt kaminda milisianonan di al-Qaida a presentá nan deklarashonnan.
E meskita di Al-Aksa na e siudat antiguo di Jerusalèm ta un di e lugánan mas sagrado pa e musulmannan.
E teip nobo di oudio a keda difundi dos dia despues ku e último mensahe di oudio di bin Laden, durante e di 60 aniversario di fundashon di Israel. Den e vershon ei el a komprometé su mes di sigui su lucha kontra e estado hudiu.
E lidernan di al-Qaida, ku mas frekuensia ta e konflikto arabir-israelí den un kampaña di informashon pa haña mas simpatisantenan. Israel a atvertí un kresiente aktividat di al-Qaida riba teritorionan palestino, apesar di ku ta poko probabel ku e ret teroristanan tabatin un ròl importante den e zona te awor.

SHARM EL-SHEIK, Egipto, - E presidente palestino Mahmud Abbas a bisa djadumingu ku nan ta furioso pa resiente deklarashonnan di e presidente merikano George W. Bush den parlamento israelí, ku a ser konsiderá den mundu arabir komo partidarionan na e estado di Israel.
Abbas a bisa ku el a ekspresá su desepshon na Bush ora nan a reuní den e Foro Ekonómiko Mundial riba Medio Oriente, un reunion di komo 1.500 estrategonan polítiko i lidernan empresarial den e balneario egipsio di Sharm El-Sheik.
E diskurso di Bush djaweps pa e di 60 aniversario di Israel, a kousa un ola di protesta den prensa arabir.
“Den prinsipio, e diskurso di Bush den Knesset a hasi nos furioso i nos no ta kontentu”, Abbas a bisa periodistanan djadumingu pafó di e konferensha.
“Esaki ta nos posishon i nos tin hopi deklarashonnan (enkuanto e diskurso) i ami frankamente, klaramente i transparentemente a pidié pa e posishon merikano ta balansá”, Abbas a bisa. E lider di Outoridat palestino a sena ku Bush djasabra anochi, pero no ta konosí ki ora el a papia kuné riba e diskurso.
Komentaristanan a indiká ku e diskurso a mustra un respaldo sólido pa Israel na mes momento ku apénas e ta menshoná e aspirashonnan palestino.
“E diskurso di Bush – inspirá pa e Torah, ta kousa kuestionamentu riba e ròl di Merka na medio Oriente”, Mursi Atallah, direktor di e korant ofisial egipsio Al-Ahram a bisa djasabra. “E úniko kos ku Bush ke ta pa kalma Israel”.

EUGENE, Oregon, Merka – Despues di a kaba su atakenan kontra e virtual kandidato republikano John McCain, Barak Obama ta disponé pa reklamá di un forma simbóliko e nominashon presidensial demokrat despues di e buèlta di primarianan di djamars próksimo.
Ku e próksimo primarionan na Oregon i Kentucky, Obamo lo tin ménos di 100 delegado pa e yega e total di 2.026 pa sigurá e nominashon demokrat despues di su lucha interno k e senador pa New York, Hillary Rodham Clinton.
Durante fin di siman Obama a tene su kampaña na Oregon, kaminda e enkuestanan ta indiká ku e tin un bentaha kómodo, miéntras ku Clinton tin chènsnan ekselente na Kentucky. E eks promé dama tin plan di realisá kampaña na Kentucky te djamars.
Den wega tin 51 delegado na Kentucky i 52 na Oregon.
Djasabra, na Oregon, Obama a debolbé e debate ku el a kuminsá djabièrnè ku McCain riba polítika eksterior. Tantu presidente George Bush komo McCain a bisa ku e demokratnan no ta konfiabel ora ta trata di lucha kontra e teroristanan.
Na Roseburg, oregon, Obama a bisa ku un 1.400 asistente na un akto di respaldo na su kandidatura ku McCain lo limitá su mes na sigui un polítika frakasá ku Bush a kuminsá.
“Si boso ta kere ku nos tabatin un gran polítika eksterior na Merka durante e último ocho añanan, e ora ei boso mester vota pa John McCain, ni pa ami”, Obama a trese dilanti. “Riba esaki e debate ta konsistí”, el a agregá. “Esaki ta e opshon den e elekshonnan aki. Boso ta deseá mas di esakinan, o boso ke un kambio?”

A para bira un kustumber fastioso den paisnan di reino unda ta papia papiamentu pa ‘cueste lo que cueste’, buska manera pa baha e gobièrnu na mando. No ta importá di ki forma esei sosodé. E por ta traishon polítiko, interesnan di gremio òf di persona i manera nos por mira último tempu, via di akshon sindikal òf di un grupo di trahadónan. Ku tipo di akshonnan asina ta duna resultado, ta un pregunta grandi. Echo ta, ku pa dianan largu, komunidat, ku otro palabra, hendenan inosente, ta esnan ku ta sufri. Pa no papia mes di ekonomia di e isla.

Un par di siman atras, Aruba tabata na bùrt. Pa 7 siman un grupo grandi di empleado públiko a subi kaya pa demandá gobièrnu un kompensashon pa subida di kosto di bida. For di kuminsamentu tabata bisto pa esun ku dos dede di sintí ku e ’sindikatonan den akshon’, manera nan a yama nan mes, no tabatin un strategia deliniá pa logra nan meta. Esnan ku a sigui djaserka e lucha sindikal di Kámara Sindikal/SSK di 1991 na Kòrsou pa “gelijktrekking” i indeksashon di salario, lucha ku si tabatin strategia i táktika super bon deliniá, mesora a konkluí ku tabatin otro kos tras di e supuesto lucha aki. I Bingo! Despues di shete siman di akshon i wèlga, a yega na un akuerdo suavemente bisá ‘kuestionabel’ ku gobièrnu. Resultado final tabata, ku esnan ku a wèlga a pèrdè (na salario) muchu mas tantu welgando, ku e loke finalmente nan a haña. Konklushon final: e wèlga tabata mas intento, totalmente frakasá mester bisa, di oposishon pa via e akshonnan sindikal, baha e gobièrnu ku ta sintando.

BEICHUAN, China – China lo rindi homenahe durante tres dia pa e miles di personanan ku a muri den un poderoso temblor, na momento den kua a mengua e speransa di reskatá sobrebibientenan i e esfuersonan ta konsentrá an mes riba evitá hambresa i enfermedatnan.
Gobièrnu a anunsiá djadumingu tres dia di luto nashonal kuminsando djaluna i a pidi e 1.300 mion habitantenan di e pais pa nan rindi homenahe di tres minüt di silensio pa e víktimanan di e temblor.
Ora a kuminsá e di dos siman di e movementu di tera, e speransa di haña hende ku bida ta masha chikitu kada bes, apesar di e notabel relato di reskate entre milnan di personanan derá.
“Pronto lo ta demasiado lat” pa haña hende ku bida, Koji Fujiya a bisa, sup hefe di un ekipo di reskate hapones ku ta traha na Beichuan, un pueblo ku a keda redusí na ruinanan.
Su ekipo a saka 10 kadaver djadumingu for di un skol sekundario na e lugá ei.
Tabatin algun historia di reskate ainda despues di ku e temblor di magnitut 7,9 a sakudí sentro di e pais, pero e atenshon di e esfuersonan den e zona di desaster parse ta konsentrá su mes den rekuperá kadavernan di edifisionan ku a kai aden, tanten ku gobièrnu ta konfirmá ku e sifra di morto a subi na 32.476.

ARIES: Despues di a sufri den amor, tin bon amistat, pero no entregá bo kurason pa e momentu aki. Konsedé bo tempu, kuida di bo espasio. 19,05.36.

TAURO: Tur kosnan ku a pasa, dera nan awor i habri amornan nobo i trabounan nobo. Talentonan manera arte, músika, baile, ta manifestá ku mayor forsa. 08,29,06.

GEMINIS: Sali di angustia, di pena i di ataduranan perhudikal. Bula awor ku alanan propio. Beyesa, kultura i e kontakto ku estranheronan ta trese hopi bon suerte. 11,40,15.

KANSER: Pone tur idea ku ta krusa dor di bo mente den akshon. Iluminá bo kaminda ku bo lus, bo inteligensia, bo karisma. 18,03,30.

LEO: Pensa i meditá ántes di papia o hasi algu ku por perhudiká un hende. E órden, e armonia ta balansá den e situashonnan difísil di bida ta lagabu superá bo mes. 04,39,12.

VIRGO: Hasi kaso na e konsehonan di esnan ku ta kompartí ku bo diariamente. Bo ta eksigiendo demasiado. Bo deseonan lo ta bo karta pa logra e éksito. 25,10,16.

LIBRA: Un persona tin hopi influensia riba bo. E tormenta ku a kansabu den lo finansiero ya a pasa i ta lagabu fuerte pará finansieramente. 44,23,11.

SKORPION: Pone mayor atenshon na bo plan o proyektonan di e dia di awe, ya ku tur disiplina ta yudabu grandemente pa trese armonia den bo bida. 19,21,08.

SAGITARIO: Duna awor lo mihó di bo, pero sin ku nan ta abusá di bo bon kurason. Klarifiká bo problemanan di bo famia serkano ku ta depremíbu pa añanan. 05,22,09.

WILLEMSTAD – “Antia definitivamente no ta un paraiso fiskal. Nos ke pa saka e mito aki pa semper for di mundu”, asina sekretario di Estado di Antia pa asuntunan fiskal mr. Alex Rosaria a enfatisá den entrevista ku Radio Nederland Wereldomroep.
Rosaria, kende ta na Ulanda e dianan aki en konekshon ku un biahe di trabou, a papia ku representantenan di Komishon Oropeo pa 4 pais oropeo kita nòmber di Antia for di e lista pretu ku ta akusá paisnan di ta evitá pagamentu di belasting den forma adekuá i di ta forma un paraiso fiskal. E paisnan aki ta Polonia, Grecia, Italia i Portugal.
“Ketu bai”, segun Rosaria, “ta eksistí e persepshon ku Antia ta konstituí un paraiso fiskal i lo ta kompetí na un manera inhustu kontra otro paisnan ku kua e tin bon relashon. Antia a bin ta bringa fuertemente kontra e impreshon aki pa basta dia kaba. Esei mes ta un dje motibunan di kon Antia ta serando kombenio fiskal ku mas tantu pais na mundu”, di akuerdo ku Alex Rosaria.
Resientemente e parlamentario di frakshon di SP Ronald van Raak a hasi un denunsia den e direkshon aki. “Kompanianan grandi ku ta gana hopi plaka na Antia, mester realisá ku nan mester kontribuí na pais. Nan no por sigui gana tur plaka di mundu, miéntras ku situashon sosial na Antia ta motibu di hopi prekupashon”, Van Raak, bosero pa Antia di Socialistische Partij a anunsiá.
Van Raak a denunsiá loke el a kalifiká komo eksistensia di un paraiso fiskal ku ketu bai ta eksistí na Antia. “Mi a komprondé ku tin mas di 300 kompania grandi ku ta ganando hopi plaka den e pais aki, pero ku no ta dunando nada bek na pais.

WILLEMSTAD - Nos ta bolbe bisa: si tabatin un maneho di energia bon deliniá, awe pais Kòrsou lo ta pasando den e krísis di energia meskos ku tur otro pais, pero en todo kaso sin e difikultatnan ku e ta konfrontando awor aki, tabata e promé reakshon di sekretario di e asosashon di doñonan di pòmp di gasolin di Kòrsou COPDA, Norman Perry.
Mester bisa ku no ta promé biaha ku e asosashon ta bogando pa nos isla yega na un maneho di energia pa asina enfrentá e diferente problemanan riba tereno energétiko.
Perry a splika ku den un maneho asin’aki, ta determiná e kuadro den kua ta disidí kon ta atendé ku sierto situashonnan ku por presentá. Esei ta un forma responsabel pa hasi kos, segun el a duna di konosé.
Norman Perry a mustra ku no ta awor aki, ela bin ta splika ku tin alternativanan pa konsiderá ku por nifiká un alivio pa e oumento drástiko di preis di energia na mundu.
No ta kos nobo: nos a yega di menshoná e kosnan aki diferente biaha den pasado kaba i asta tin proposishon ku otronan tambe a yega di trese dilanti, el a bisa.
Perry a referí aki na e posibilidat pa pasa un kabel supmarino entre Venezuela i nos isla. Esei lo pèrmití nos haña energia na un preis hopi mas abou.
Un di dos posibilidat ta pa nos pais bira miembro di Petrocaribe. Segun Norman Perry, kontrali na loke hopi ta pretendé, esta ku un dil asin’aki lo hinka nos den un debe grandi, tin hopi benefisio pa Kòrsou for di un asosashon asin’aki.

WILLEMSTAD - Parlamentu di Antia ta bai profundisá den e dianan benidero riba Enseñansa di Fundeshi. Ku e meta aki su dilanti, Staten lo reuní ku e diferente partidonan enbolbí pa asina haña un bista mas amplio posibel riba funshonamentu di e tipo di enseñansa aki. Esaki ta den kuadro di e Lei pa Enseñansa Obligatorio ku parlamentu mester trata den un reunion públiko próksimamente.
Parlamentu resientemente a trata e proposishon di lei pa eliminá siklo 3 den Enseñansa di Fundeshi. Vários miembro sinembargo a ekspresá e deseo pa tende di esnan den vèlt kon e sistema di enseñansa aki a bin ta funshoná den práktika.
Esei tabata motibu tambe pa parlamentu tuma e desishon ku ta papia ku mas tantu partner den enseñansa posibel riba e tema aki.
A invitá pa e siman aki e sindikato SITEK, Direktiva di Skolnan Katóliko i tambe Skol Humanista.
Esei lo mester sosodé den e promé dos dianan di e siman aki, esta awe djaluna i mañan djamars.
Por sierto ku parlamentu lo tin un siman di reunion kòrtiku e siman ku a kaba di kuminsá aki. Awe tardi tin un Komishon Sentral ku gerensia di UTS pa papia riba implementashon di ICT den e proseso di desmantelashon di Antia.
Mañan djamars atardi lo tin un reunion públiko den kua parlamentu lo trata e proposishon di lei pa desentralisá inspekshon laboral pa e respektivo islanan.
Di djarason pa djabièrnè awor, Staten lo ta na St. Maarten den kuadro di e konsulta bi partit ku ta tuma lugá ku parlamentu di Aruba. E enkuentro aki lo ta interesante atrobe.

WILLEMSTAD/ SCHIPHOL - Martinair, ku ta ehekutando buelo tambe pa Kòrsou, a pèrdè kasi 69 mion euro aña pasá. Asina e empresa, ku ta pa 50 porshento den man di KLM a anunsiá. Aña 2006 ainda e empresa a hasi un ganashi moderá di 7 mion euro, ku tabata resultado di bon operashon di e parti di transporte di karga.
Ta atribuí e pèrdida kuantioso aki na e proseso di reorganisashon grandi ku e kompania a pasa aden.
Despues di pèrdida konstante, Martinair a disidí ku e ta stòp tur buelo dentro di Oropa. Esei a pone ku e kompania mester a kita 120 hende for di trabou, ademas bende vários avion A 320 di Airbus.
Entretantu t’asina, ku e kompania a stòp tambe tur buelo pa Asia. E empresa tabata mantené konekshon ku Sri Lanka, Oman i tambe Phuket, Tailandia. Martinair a bisa ku e ta dispuesto pa ehekutá buelo a e destinashonnan aki atrobe, solamente si e organisashon di biahe ta dispuesto pa karga tur riesgo finansiero.
Martinair a disidí ku awor e ta bai konsentrá – banda di buelonan di karga – solamente riba buelonan di pasahero pa Canada (Toronto, Vancouver) i region di Karibe, entre kua Kòrsou, Aruba, Cuba, Repúblika Dominikano, Costa Rica i Sürnam. Banda di esei, e lo sigui ku su buelonan diario pa Miami.
Pa loke ta e último aki, Martinair a sera kombenio ku American Airlines pa buelonan di kontinuashon. Pero den e region aki tambe a skrap algun buelo, entre nan Jamaica, Edmonton i Orlando.

Pa reflekshoná riba esensia di katolisismo den enseñansa 

WILLEMSTAD - Mirando importansia pa reflekshoná riba esensia di katolisismo den enseñansa i pa por duna esaki un dimenshon efektivo i efisiente, Mgr. Secco a invitá tur direktiva di skolnan katóliko pa un enkuentro spesial awe djaluna 19 di mei.
E programa di awe ta konsistí di e siguiente partinan: Presentashon di evaluashon di enseñansa katóliko riba diverso isla, diskutí un dokumentu ku prinsipio i puntonan di salida pa enseñansa katóliko i formulashon di proposishonnan pa e próksimo Konferensia Diosesano Mishon 2008-2011.
E prinsipionan tin komo base, ku direktivanan di skolnan katóliko mester ta un reflekshon di edukashon katóliko komo un kolaborashon estrecho entre Obispado, institutonan diosesano, parokia i e pastornan di parokia, e direktiva di skolnan katóliko, e skolnan katóliko, mayornan i nan yunan.
E enkuentro aki ta parti di un aña partikular di 50 aña hubileo di Obispado di Willemstad. Akinan tin e pregunta kon tur isla huntu, sosteniendo otro, por yega na un renobashon profundo, manera e obispunan a puntra den e último Konferensia Episkopal Latino Amérika na Aparecida.
Kon Iglesia por duna skolnan un impulso misionero nobo ku proyektonan ku ta purba na alkansá un formashon integral, ku nan fundeshi den Kristu.
Di Aruba a bini 8 persona, Sint Maarten 4, Saba 1, Sint Eustatius 3, Bonaire 4. Huntu ku esnan presente di Kòrsou ta partisipá en total un kantidat di 32 persona na e konferensha aki.

3er Curaçao Dive Festival atrobe lo deleitá sambuyadónan

WILLEMSTAD - Pa di tres biaha kaba Curaçao Tourist Board (CTB) ta organisá Curaçao Dive Festival. E festival di 2008 ta tuma lugá di 24 pa 31 di mei. E aña aki atrobe e festival ta primintí di bira un goso profundo pa sambuyadónan tantu internashonal komo lokal. E echo ku Kòrsou resientemente a haña un nominashon spesial di Scuba Diving Readers Choice Award komo e sitio di buseo di mas salú na mundu, a kontribuí na subi e interes mas tantu ainda.
Esaki ta netamente pasobra Kòrsou tin tur e karakterístikanan di un paraiso di buseo, manera poko tin na mundu. E nominashon spesial di Scuba Diving pa e ambiente bou di awa di mas puru i e skor di Kòrsou komo un di e mihó islanan den Karibe pa snòrkel kantu di kosta, ta wòrdu usá ku orguyo dor di CTB den su promoshon internashonal. Sambuyadónan di rònt mundu ta apresia Kòrsou, entre otro pa e 60 sitionan di sambuyá registrá, ku 57 sorto di koral, 500 sorto di piská i mas ku 20 operadornan di buseo riba nos isla.
E Curaçao Dive Festival ku ta wòrdu organisá komo konsekuensia di esaki, ta ofresé un siman di goso intenso di Kòrsou su mundu bou di awa na fanátikonan di buseo i otro interesadonan. E programa ta varia tur dia di trepnan di buseo eksótiko den dia i anochi tantu na e parti pariba, pabou i meimei di e isla. Tambe tin tayérnan interesante organisá pa ekspertonan den e mundu di buseo, sine riba bich i happy hour kaminda partisipantenan por topa den en ambiente ameno. Tambe e festival lo haña publisidat internashonal di Scuba Dive Magazine, Dive Photo Guide, Dive Chronicles, The Robertson Treatment, Men’s Journal, Plenty en Maxim.

WILLEMSTAD - Djasabra 24 di mei Renaissance Curaçao Resort & Casino lo organisá un marshe di trabou den Riffort.
E marshe di trabou ta di 10 'or di mainta te 6 'or di atardi.
Durante e marshe di trabou aki tur interesado, tambe esnan ku a entregá un solisitut anteriormente, tin e oportunidat úniko pa sera konosí ku representantenan di Renaissance Curaçao Resort & Casino i hañá informashon tokante di e oportunidatnan di trabou i tambe e benefishinan.
Algun di e áreanan ku lo wòrdu representá durante di e marshe di trabou ta entre otro “Front Office, Reservations, Housekeeping, Kitchen, Engineering, Security, Surveillance, Accounting, Sales & Marketing, Human Resources”i “Casino”.
Durante di e marshe di trabou lo tin entretenimentu i guıa pa mucha.
Tur interesado tin e oportunidat pa solisitá yenando un formulario di aplikashon i tresiendo un pasfoto.
Bin eksperensiá e marshe di trabou di Renaissance Curaçao Resort & Casino djasabra 24 di mei den Riffort na Otrobanda ku lo bira realmente algu úniko!

Lo firma akuerdo e siman aki durante bishita Bijleveld

WILLEMSTAD – Tantu Gobièrnu di Antia komo di Kòrsou a ekspresá alegria i satisfakshon ku Gobièrnu di Reino a bai di akuerdo ku e Insiativa Sosial-Ekonómiko (SEI). Meimei di e turbulensia ku Kòrsou tabata pasando aden, Konseho di Minister di Reino a duna su aprobashon na e proyekto aki djabièrnè último.
E siman aki mes lo tin firmamentu di e dokumentunan ku ta korespondé ku e Insiativa Sosial-Ekonómiko (SEI) ku ta derivá for di e Slotverklaring ku a firma na novèmber 2006. Esei lo tuma lugá durante e bishita di Sekretario di Estado Ank Bijleveld (Asuntunan Interior i Relashonnan den Reino) ku lo hasi un bishita di trabou for di 20 te ku 23 di mei.
E Representashon di Ulanda na Antia a informá, ku e motibu di e bishita ta konsultá polítiko tokante e reforma polítiko den Reino. E programa ta enserá tambe firmamentu di e Inisiativa Sosial Ekonómiko (SEI) pa Kòrsou. E Sekretario di Estado lo hiba konsulta polítiko ku Kòrsou, St. Maarten i pais Antia tokante progreso di e reformanan estatal. Durante e konsulta gubernamental ku a pasa, a sali na kla, ku no ta sigur ku tur kos lo ta kla pa final di 2008. E ora ei a palabrá pa traha un planifikashon nobo i realístiko. Otro puntonan importante riba agènda ta supervishon finansiero pa St. Maarten i Kòrsou i interpretashon mas aleu di e palabrashonnan tokante e futuro Ministerio Públiko.

DEN HAAG/WILLEMSTAD – Durante un enkuentro na Ulanda, minister di Finansa di Antia Ersilia de Lannooy i su konseheronan a tene un reunion ku sekretario di Estado pa Asuntunan Finansiero, Jan Kees de Jager. Na e reunion tabata presente tambe e sekretario di Estado di Antia pa Asuntunan Fiskal, Alex Rosaria.
Den e reunion a atendé diferente aspekto importante manera e negosiashonnan pa un Akuerdo Fiskal den Reino (BRK), e posibilidat pa sosten di Ulanda pa legislashon fiskal i un koperashon mas amplio entre e servisionan di belasting i duana di Antia. E delegashon Antiano a bisa, ku e deliberashonnan a tuma lugá den bon ambiente. Riba término kòrtiku lo tuma un desishon kon lo sigui, asina e delegashon antiano a bisa.
Riba e pòtrètnan, kortesia di Kas di Antia/Pevry Press por mira e minister den kompania di e sekretario di Estado ulandes i bista di e reunion na Den Haag.

WILLEMSTAD – Algun mil hende a akudí den fin di siman na Vlootdagen, organisá pa Marina Real. E dianan aki tabatin komo meta pa tur hende sera konosí di serka ku trabounan di Marina Real. E aktividat a tuma lugá riba Plasa Brion, Áwasa, kaminda militarnan a kambia henter e área den un sitio, kaminda nan por demostrá nan abilidatnan militar. E diferente aktividatnan a atraé hopi públiko for di tur gremio di komunidat.
Un di e aspektonan ku mas a hala atenshon, tabata presensia di dos avion F-16 di Merka ku a duna shou durante di e dianan aki. Públiko, prinsipalmente nos hóbennan por a mira di serka kiko kiko e trabou di un militar ta enserá i kon mester prepará pa bira un militar.
Riba e pòtrètnan por mira algun di e aktividatnan di serka, un kompilashon di pòtrèt ku LA PRENSA a haña for di diferente fuente.