Diabierna venidero 30 di mei 2008

Ban briya den 50 aña cu nos Misa Savaneta

ORANJESTAD - Parokia Sagrado Curazon di Hesus na Savaneta ta celebra Fiesta di su Patrono riba diabierna 30 di mei 2008. En preparacion pa esaki tin un nobena di 21 di mei te cu 29 mei, cuminsando pa 6:15 atardi y sigui pa Santa Misa. Diadomingo e Nobena ta cuminsa pa 4:45 atardi y sigui pa e Santa Misa di 5:30.
Tur dia tin un diferente koor pa anima y e celebracion ta na encargo di diferente grupo den Parokia. Pa e fiesta lo tin un Procesion cu ta sali di cas di famia Shone Arends den Bruynewijk y lo termina cu un celebracion solemne den Misa di Savaneta.
Ta invita Parokianonan y henter Aruba pa partisipa na e celebracionnan aki, en especial muchanan cu a caba di hasi nan promer Santa Comunion pa compaña den e procesion den nan bistir di fiesta.
ACCION DI DONACION
Pa duna oportunidad na henter Aruba pa contribui na e drechamento di nos Misa, lo tin benta di e ticketnan di Accion pa Donacion den tur districto di Aruba. E schedule ta lo siguiente, pendiente aprobacion di autoridadnan concerni.
* Oranjestad: diasabra 31 di mei 2008 banda di e supermercadonan grandi;
* Santa Cruz: diasabra 7 di juni 2008 dilanti di Centro Deportivo Betico Croes;
* Savaneta: diasabra 21 di juni 2008 dilanti di Domino’s Pizza;
* San Nicolaas: diasabra 28 juni 2008 dilanti di Misa Santa Theresita;
* Oranjestad: diasabra 5 juli 2008 dialnti di Talk of the Town y ex J.F. Kennedy School;
* Pos Chiquito: diasabra 19 juli 2008 riba parkinglot di Rei hing Supermarket;

 
Ta trata construccion di 50 vivienda pa famia na Palisiaweg

ORANJESTAD - Diaranson 21 Mei 2008 Minister drs. Marisol Lopez-Tromp a reuni cu Erik Beijer kende ta Managing Director di DIGH (Dutch International Guarantees for Housing).
DIGH ta un fundacion Hulandes cu ta duna financiamento pagabel pa proyectonan di vivienda dirigi riba gruponan di entrada abao den paisnan di desaroyo y paisnan den transision. DIGH ta envolvi den proyectonan rond di mundo y ta particularmente activo den tres region: Zuid Afrika, Europa Central y Oriental, Surinam y Antiyanan Hulandes. Te 2007 DIGH a duna aproximadamente €25.000.000 capital di prestamo pa proyectonan di vivienda rond mundo.
E meta di e reunion di Minister drs. Marisol Lopez-Tromp conhuntamente cu FCCA y DIGH tabata pa papia tocante financiamento di un proyecto di vivienda na Palisiaweg. Aki ta trata construccion di 50 vivienda pa famia na Aruba.
E reunion a bay hopi bon y pronto Minister drs. Marisol Lopez-Tromp lo anuncia mas informacion tocante e proyecto di vivienda nobo aki.
Ministerio di Enseñansa, Asunto Social y Infrastructura

ORANJESTAD - Recientemente Kiwanis Circle K club di Universidad di Aruba a instala su directiva pa 2008-2009 y alavez a instala 4 miembro nobo.
Durante e anochi aki tambe e presidente saliente Carol Bruyning a otorga diferente reconocimiento pa e board saliente. Ademas a wordo presenta e anochi aki diferente premionan cu e club a gana durante e district convention na Jamaica.
Un danki ta bay na Setar, Deloitte, RBTT, Elmar, Leysner & de Cuba y Valero cu pa medio di nan donacion a haci posibel pa e club manda representantenan afo pa e district convention.
E premionan cu a wordo ricibi ta: ‘Membership growth’ cual a wordo otorga pa e cantidad di miembro, ‘Club Cheer’ , ‘Early birds’ cual ta wordo entrega pa e club cu a paga na tempo y tambe e premio pa mihor website y como tambe pa e iniciativa di e proyecto di ‘Sixth cents’ pa yuda e menos afortuna na Africa cu awa limpi pa medio di UNICEF. Finalmente, un danki na e pueblo di Aruba cu a sostene e club durante nan actividadnan.
E BOARD NOBO
E board nobo cu a wordo instala ta lo siguiente:
Presidente: Monique L. Ras.
Vice Presidente: Carlos Lopez
Secretaria: Jeansy Martina
Tesorero: Marilynn Dirksen
Director Club Meeting:Roselyn de Cuba
Director encarga cu parti educativo:Marilyn Croes
Director recaudacion di fondo:Ghislaine Koeiman
Director Membership, Recruiting & Retaining: Joselle Farro
Director Public Relations:Lay Hing Yee
Director Youth & Community: Carol Bruyning
Webmaster: Andre Kelly

Aruba por comparti experiencia di Israel cu energia alternativa

ORANJESTAD - Lider di AVP, mr. Mike Eman y parlamentario Mike de Meza den presencia di funcionario di Departamento di Relacionnan Exterior, drs. Paul Croes, a sostene un dialogo importante cu e Embahador di Israel estaciona na Caracas, Venezuela riba e aplicacion di energia alternativa na Israel.
Embahador di Israel, Shlomo Cohen, tabata di bishita na Aruba den coneccion cu un celebracion special na Aruba pa e di 60 aniversario di e nacion Israel.
Israel ta hunga un papel importante den e desaroyo di energia alternativa. Di vehiculo electrico pa energía solar Israel ta un pionero riba tereno di technologia nobo.
Israel ta tumando un delantera den una serie de tereno di energia alternativa destina pa reduci emision di CO2 y pa impulsa e uso di energia renovable.
Israel ta un di e promer paisnan den promove activamente uso di vehiculo electronico di cero emision y pa prepara e infrastructura pa e mercadeo masivo di tipo di vehiculonan asina.
Israel y Estados Unidos a inicia un programa di investigacion conjunto riba energia alternativa.
E proyecto conjunto americano-israeli di investigacion energetica lo inverti 20 miyon dollar pa anja den investigacion na Israel pa sigui desaroya y cultiva fuentenan di energia renovable y alternativa.
E empresanan di investigacion conjunto lo concentra riba energia solar, biomasa, eolica, geotermica, biento y den tecnologia avanza di bateria y eficiencia di energia.
Como cu partido AVP a traha un Plan Energia y ta desaroyando e concepto di aplicacion di energia alternativa na Aruba, e partido ta mira tambe un oportunidad pa Aruba den e hemisferio aki por ta un centro di investigacion y di desaroyo di energia alternativa, specialmente riba e tereno di solo y biento. Mescos cu Merca ta financia e plan di research y desaroyo aki na Israel partido AVP ta mira cu Union Europeo por ta interesa pa financia un desaroyo asina na Aruba.

Skina di Sorti, awe djamars 27 di mei di 2008, ta kuminsá ku deseá un i tur un bon dia. Sentimentunan patriótiko ta provoká e tendensia pa reakshoná kontra di spesialmente estranhero ku emití un apresiashon negativo enkuanto nos kalidat di gobernashon i práktika polítiko. Miembronan di Tweede Kamer, tin e tendensia di asumí un tono ku ta provoká resistensia, pero ku tur sinseridat, ta bira masha difísil pa ignorá e base sólido di bèrdat ku nan apresiashon ta kontené.
****
Si bo wak ta kual situashon tabata tin na inisio di un periodo di gobernashon, kual tabata e instrumentonan ku esnan di turno tabatin na nan disposishon i bo tuma nota ta kual akshonamentu polítiko tabatin, bo tambe no por keda sin puntra bo mes “waar waren ze in Gods naam mee bezig”? Esensia di problemanan ta supordiná na kosnan ku ta pasa den márgen. Kosnan serio mes no ta keda agendá òf ta opheto na wega, miéntras asuntunan di poko relevansia ta gosa di atenshon.
****
Kosnan fundamental ta keda disidí den grupito en bes di wòrdu atendé ku e transparensia nesesario. En bes di krea i mantené “draagvlak”, ta hasi kos argumentando ku elekshon a duna apoderashon pa tuma desishon. Ta biba den e kultura di engaño elektoral, kaminda ta primintí un par kos (en bes di presentá un vishon di maneho) i despues ta hasi lokual ta kumbiní esnan ku despues di elekshon a sera un kombenio polítiko pa goberná.

WILLEMSTAD – Minister di Asuntunan Konstitushonal, Roland Duncan ta kere, ku e transferensia di tareanan i responsabilidatnan pa teritorionan insular por keda finalisá hopi promé ku yanüari 2010.
Durante e Konsulta Polítiko di siman pasá a konkluí, ku tur partner lo sigui traha duru riba e proseso di kambio konstitushonal i lo aserká Raad van State pa duna un konseho kon por enkaminá e proseso mas mihó i hasi esaki mas kòrtiku. E desishon aki ta nifiká tambe ku Gobièrnu Sentral no mester di tin ningun tarea mas pa yanüari 2010.
Duncan a rekonosé, ku Gobièrnu Sentral mester ta opsoleto ku eksepshon di e asuntunan ku e islanan yega na un akuerdo riba dje pa nan sigui hasi konhuntamente manera entre otro Korte i polis.
Duncan ta minister awor pa mas ku dos aña i tin un poko mas ku un aña i mei pa kompletá e proseso di transferensia di tareanan i responsabilidat. El a indiká, ku awor e por traha mas konkreto riba e proseso, pa motibu di e konsensonan ku a keda lográ siman pasá.
Minister Duncan a bisa, ku pa e último dos añanan el a tuma inventario i prepará e papeleo nesesario. Awor e lo kuminsá formulá proposishonnan konkreto kon pa kontinuá.
Ounke ku ainda e ta keda konfrontá ku un aktitut di ‘business as usual’, Duncan ta kere, ku e por konkluí e proseso di transferensia di tarea i responsabilidat pronto.
E tin planiá pa reuní ku e komishon di desmantelashon i e Ofisina di Asuntunan Konstitushonal pa studia e konklushonnan di e reunion di siman pasá pa determiná maneho i strategianan ministerial.

WILLEMSTAD – Den e fin di siman tras di lomba taba tin “Dutch Caribbean Tournament 2008, entre Kòrsou i Aruba aki na Kòrsou.
Tabatin weganan di kategoria te ku 18 aña i te ku 12 aña di tantu mucha hòmber komo mucha muhé.
E resultadonan tabata lo siguiente:
Mucha muhé te ku 18 aña komo tim:
1. Kòrsou ku su tim konsistiendo di: Christine Dania, Lydia Pieternella, Geannavieve Jacobus.
2. Aruba konsistiendo di: Charlotte i Charlenne Loopstok i Marisol Montero
Mucha hòmber te ku 18 aña komo tim:
1. Kòrsou ku su tim konsistiendo di: Michael Dalnoot i Michael van Baren
2. Aruba ku su tim konsistiendo di: Alejandro i Leonardo Dirksen
Mucha hòmber te ku 12 aña komo tim:
1. Aruba ku su tim konsistiendo di: Mike Montero i Elgin Nicolaas Jr.
2. Kòrsou ku su tim di: Jose Alberto Arias Lugo i Rachid Cijntje.
E resultadonan Individual:
Mucha muhé te ku 18 aña:
1. Christine Dania di Kòrsou
2. Lydia Pieternella di Kòrsou.
Mucha hòmber te ku 18 aña:
1. Jourick Monte di Kòrsou
2. Michael Dalnoot di Kòrsou
Mucha hòmber te ku 12 aña:
1. Mike Montero di Aruba
2. Elgin Nicolaas di Aruba.
Un pabien na tur e ganadónan di Dutch Caribbean Tournament 2008.

WILLEMSTAD – Curacaose Dambon ta informá ku nan ta bai kuminsá ku nan kampionato di Dam Individual Senior 2008.
E kampionato ta kuminsá riba djaweps 29 di mei pa 19:30pm den e edifisio di SSK na Schouwburgweg 44, banda di Centro Pro Arte.
E weganan di e kampionato ta wòrdu hungá ku anotashon di wega ku un tempu di 2 ora pa 50 movida pa banda i mas mei ora pa terminá e wega.
E weganan lo tuma lugá riba djamars i djaweps kuminsando mitar di ocho di anochi.
E kampionato aki ta klasifikatorio, terser lugá pa e Kampionato Pan-Amerikano 2008.
Pa mas informashon por yama sekretario di Curaçaose Dambond sr. Hensley Rondei na telefòn 522-3877.

Di dos tanda di kompetensia ‘di Lèter pa Palabra’ un éksito total


WILLEMSTAD - Den fin di siman tras di lomba, a tuma lugá e di dos tanda pa loke ta e kompetensia ‘di Lèter pa Palabra’. Alumnonan ku a pasa dor di e promé tanda a bini huntu den ouditorio di Selikor na Parera, pa asina dilanti di un kuerpo di hurado deletrá mas mihó posibel i logra yega final di e kompetensia aki.
Den e promé tanda di partisipashon, kada skol a skohe un máksimo di 6 partisipante ku por deletrá mihó di nan skol den nos idioma Papiamentu, 2 den kada kategoria. Djasabra i djadumingu último e kompetensia a bai riba nivel regional. Patrosinadònan Banco di Caribe, Selikor, Fundashon Kòrsou Limpi i Bunita i NRG por mira atras na un eksitoso di dos tanda.
E proyekto di ‘di Lèter pa Palabra’ ta basá riba e konsepto mundialmente konosí komo “Spelling bee contest’ na papiamentu; un ‘kòntèst di ortografia’. Ta interesante hasi menshon ku organisadónan a prepará e evento aki di tal forma, ku e muchanan partisipante a haña tur oportunidat pa konsentrá durante di e kompetensia den e ouditorio, miéntras ku famia i amigunan di skol por a sigui e kompetensia parti abou den kantina airekondishoná riba dos flatscreen. Aki a hasta prepará popcorn i limonada pa e muchanan.
E tim organisadó ta preparando den grandi kaba pa tanda tres, esaki lo ta e kompetensia final ku lo tuma lugá 8 di yüni próksimo. Riba kombinashon di foto por apresiá nos muchanan den konsentrashon profundo durante di e kompetensia ‘di Lèter pa Palabra’, tambe por mira kon mayornan i amigunan di skol tabata apoyá nan partisipante den e kantina di Selikor. Pabien na tur partisipante ku a klasifiká pa e tanda final!

AMSTERDAM/WILLEMSTAD - Mas i mas outomobilista ku tin un vehíkulo di diesel, ta usando zeta dushi den nan tanki. Tin ta us’é den kombinashon ku diesel, tin ta us’é puru. Konsekuensia ta, ku zeta dushi ta bendiendo manera pan kayente!
E motibu ta mas ku lógiko: dia pa dia ta birando mas difísil pa kumpra kombustibel normal pa un vehíkulo. Un komparashon: diesel awor aki ta kosta 1.30 euro pa liter, miéntras ku e zeta dushi menshoná ta apénas 79 sèn pa liter.
Segun medionan di prensa ta informá na Ulanda, komo konsekuensia di e hecho ku preis di diesel a subi drástikamente den e aña ku a pasa, zeta dushi a bira un alternativa interesante.
Ofisialmente esaki no tin mag, pasobra no mester lubidá ku di kada liter di kombustibel ku e outomobilista kumpra, un parti ta bai pa gobièrnu den forma di akseins. Pero den práktika, no tin kòntròl tòg si un hende ta kumpra diesel i kombiná esaki ku otro kos.
Un ehèmpel: un hende ku un outo Mercedes Benz bieu ku ke bai Bordeaux pa fakansi, ta spar 65 euro. Un bon boká den e tempu djawor aki, segun e korant De Pers.
Un outomobilista a bisa ku a kost’é tres kuart’ i ora pa e por a basha tur e bòternan di zeta dushi den su tanki. Pero si mi wak kuantu sèn mi ta spar, mi ta kere ku e ta bale la pena, asina el a bisa.
Hecho ta, ku tin sierto kondishonnan pa e outo por funshoná asin’aki.
Pa kuminsá, e vehíkulo mester tin un motor ku un pòmp di zeta fuerte, pasobra e zeta ta mas diki ku e diesel.

WILLEMSTAD - Diputado Mike Willem ta insistí ku gobièrnu di Kòrsou no a disidí ainda ta ken lo haña e tarea di kordiná ehekushon di e trayekto Inisiativa Sosial Ekonómiko. Loke tin riba mesa ta simplemente un proposishon, e diputado a deklará.
Willem, di e forma aki a reakshoná riba e ola di krítika ku a surgi rondó di otorgamentu di trabou aki na e kompania di konsultent Deloitte & Touche.
LA PRENSA a relatá e desaroyo aki ekstensamente riba portada di su edishon di ayera. Na e momentu aki tin un dokumento den sirkulashon, den kua gobièrnu ta proponé pa laga e kompania di konsultent hasi e trabou aki. E “omslag” aki tin solamente un firma te ainda, esun di Mike Willem. Ku firma di 4 diputado, mas esun di Gezaghèber i esun di sekretario di teritorio insular di Kòrsou, e desishon ta bira ofisial.
Pero no ta asina leu ainda, di akuerdo ku e propio diputado, ku ta papia di un proposishon ku tin riba mesa. Den e dokumento por sierto diputado Willem ta proponé Bestuurscollege pa bai di akuerdo ku e proposishon, básikamente pa dos motibu. Di un banda, asina e argumento ta ku Deloitte & Touche a kana e trayekto di prepará SEI ku gobièrnu for di kuminsamentu i ademas tin e faktor tempu ku ta pèrta. Diputado Willem a hasi e petishon aki na nòmber di diputado Zita Jesus-Leito, ku no tabata na Kòrsou e momentu ei.
Anteriormente, na momentu ku a kaba di firma e protokòl pa ehekushon di SEI, diputado Zita Jesus-Leito a bisa, ku e ta lamentá komentarionan ku a surgi rondó di e trayekto aki. Ni sikiera nos a disidí ainda ken ta bai haña e trabou, ku ya kaba tin komentario negativo, asina el a bisa na e okashon ei.

WILLEMSTAD – Den e tres añanan benidero, 750 mil turista ulandes ta deseá di pasa fakansi na Kòrsou. Esaki ta di akuerdo ku resultado di un investigashon amplio ku e ofisina di investigashon ulandes, NIPO a hasi riba instrukshon di Ofisina di Turismo di Kòrsou.
Entre otro e resultado positivo aki a wòrdu tratá durante di e último konferensha ‘Curaçao Challenge’ ku a tuma lugá na Kòrsou. E mas resiente Curaçao Challenge, a trata espesífikamente e merkado ulandes.
Brenda Benjamin, direktor di Merkadeo di Ofisina di Turismo, a splika LA PRENSA ku pa medio di e Curaçao Challenge, Ofisina di Turismo por a determiná, komo ku tin un merkado kresiente, ku aña pasá a trese shen mil pasahero for di Ulanda.
“Tabatin e nesesidat na promé lugá determiná e potensial di e merkado, i haña sa kuantu mas nos por sigui krese i kiko mester hasi pa sigui krese, den kaso ku e posibilidatnan ta eksistí”.
NIPO
Ta p’esei Ofisina di Turismo, a enkargá NIPO pa hasi un investigashon, ku a indiká tambe e potensial di e merkado ulandes.
Durante di e Curaçao Challenge, unda ku a asistí entre otro representantenan di KLM, Arkefly, Martin Air i algun operador grandi di tour di Ulanda i counterpartnan lokal, a diskutí riba kiko ta e retonan ku Kòrsou tin awor aki pa habri e potensial riba término kòrtiku i largu.

Kon grandi mas nos por bira

No tin awa pa laba. E loke tur hende ku un tiki noshon di gobernashon por a spera, a bira realidat. A aplasá e fecha riba kua e kambionan estatal pa Kòrsou i St. Maarten mester drenta na vigor i ku esei, e saneamentu di debe eksterno di Kòrsou tambe. Di un forma masha “Nanzi”, Ulanda a kore firma e akuerdo di SEI (Inisiativa Sosial Ekonómiko) ku gobièrnu di Antia, pa no laga señora Emily de Jongh-Elhage man bashí. No te a primintí pueblo ku e kambionan estatal lo nifiká “bienestar” pa pueblo. Echo ta keda si, ku e pipitanan di pinda ku señora de Jongh-Elhage a haña ku SEI ta ñaña kompará ku e 5 mil mion florin ku eksonerashon di e debe di Kòrsou lo a trese. Mi ta duda ku señora de Jongh-Elhage por logra muchu bienestar pa pueblo ku 180 mion florin.

Polítikonan, spesialmente esnan pro “slotverklaring”, tin masha hopi di bai splika pueblo. A pinta pueblo serunan di oro, riunan di honing i dicha eterno na momentu ku Kòrsou haña su Status Outónomo den Reino i Ulanda guli nos debe di míles di mion di florin. Niun hende tabatin e kordura di bai splika pueblo ku ta trata aki di un proseso kompliká, ku sigur no ta realisabel den 1-2-3. Djis chèk Aruba. Ku un pueblo pará manera 1 blòki tras di e ideal di separashon for di Kòrsou mes a dura mas ku 20 aña promé ku nan Status Aparte a bira un realidat.

Ku e proseso pa Kòrsou i St. Maarten haña un Status Outónomo den Reino ta 10 biaha mas kompliká ku e Status Aparte di Aruba, ta un echo. Mas ainda pa esnan responsabel pa kanalisá e proseso aki usa tur medio na nan alkanse pa splika, bolbe splika i sigui splika pueblo na plaka chikí kon e proseso ta hinká den otro i kiko ta e espektativanan. Nèt loke nan niun a hasi!

WILLEMSTAD – Polis no ta alkansando e kantidat di 1000 prosèsverbal pa luna ku Ministerio Públiko ta propagá. Durante e promé sinku lunanan di e aña akí, polisnan a parti un kantidat di 3770 prosèsverbal, loke ta un promedio di 750 pa luna. E 3770 prosèsverbalnan akí ta representá un montante di 282.750 florin, saliendo for di e averahe di 75 florin pa but/ transakshon.
Na ougùstùs 2006 Ministerio Públiko a informá den un relato ku nan a publiká, ku e no ta sinta ketu i ku e ta sigui ku akshon di kòntròl den tráfiko i di parti 1000 prosèsverbal pa luna. Mas aleu Ministerio Públiko a informá na e okashon ei ku, saliendo for di e averahe di 75 florin pa but/transakshon pa kada prosèsverbal, ta yega na un kalkulashon di un montante di alrededor di 900 mil florin ku mester a kobra den 2006. Sin embargo, kasi 3 aña despues polis ta trahando un promedio di 750 prosèsverbal pa luna i no ta konosí kuantu di e prosèsverbalnan Ministerio Públiko ta kobrando.
E kantidat di prosèsverbalnan trahá e aña akí, segun e relatonan ku polis mes ta manda, a suma un total di 3770. Fin di luna awor 2008 ta konta 150 dia, loke ta nifiká ku polis a parti un promedio di apénas 25 prosèsverbal pa dia. Esaki sigur ta un indikashon dikon no ta alkansando e 1000 prosèsverbalnan pa luna ku Ministerio Públiko a menshoná. E echo ku polis no ta alkansando e kantidat, ta remarkabel si mira kuantu infrakshon di tráfiko tin tur dia. Den práktika polis por traha sigur 1000 prosèsverbal pa dia, pa pasamentu den lus kòrá so! LA PRENSA a informá anteriormente kaba di un konteo ku SOAB a hasi na 2002 i ku a resultá den un promedio di 90 outo ku a pasa den lus kòrá den 1 ora na un lus di tráfiko. Kòrsou tin 48 lus di tráfiko.

WILLEMSTAD – Djaluna 26 di mei Federashon Lokal di Sòftbòl, CSB, ku ta regi e deporte di Sòftbòl na Kòrsou, a eligí un direktiva nobo den su reunion anual konforme statutonan di e federashon.
Den un reunion ku un kontenido balioso i super positivo, Clovis Lodewijks, presidente saliente, a keda eligí ku voto total komo e promé Presidente Honorario di e deporte di Sòftbòl.
Clovis tur tempu tabata alma i kurpa di e deporte di Sòftbòl i meresidamente el a keda skohé komo Presidente Honorario i ta pendiente e seremonia di instalashon komo tal, esta komo e Promé Presidente Honorario di Sòftbòl.
Den e mesun reunion ku voto unánime, Richard Constancia a keda eligí komo e presidente nobo di Federashon Lokal di Sòftbòl.
Richard Constancia pa dos aña kaba a bin ta dirigí e federashon i e deporte di Sòftbòl komo vise presidente i den reunion general djaluna 26 di mei, sala kompleto ku voto total, a eligí sr. Constancia komo e presidente nobo di Sòftbòl afishoná di Kòrsou.
Otro miembronan nobo di direktiva di CSB ta:
Patricia Saturnino ku a keda eligí komo e tesorero nobo di e federashon.
Rudsel “Gijs” Gijsbertha, John Jamanika i Milady Pereira a keda eligí komo komisarionan nobo den e direktiva di CSB i tur ku votonan personal den forma total.
Instalashon i presentashon di e direktiva nobo di CSB na e famia i fanátikonan di Sòftbòl lo ta djadumingu awor den un ambiente total di Sòftbòl relashoná ku Klousura ofisial di Sòftbòl Little League. Lo presentá i instalá e direktiva nobo di CSB den un ambiente públiko ku animashon di “GIO Fuertísimo”.

PASADENA, Merka, - Un vehíkulo orbital a kapta imágen di su ruman muhé Phoenix bahando djadumingu último atrabes di shelu marsiano n’e lugá di yegada, un polo di e planeta kòrá, pa buska i evaluá kondishonnan di bida, asina esnan enkargá ku e mishon di NASA a bisa ayera.
Phoenix a bira e promé nave ku a alkansá region polar di Mars.
E sientífikonan ta planiando usa Phoenix pa koba bou di loke ta spera ta un kapa poko profundo di suela pa saka muestranan di eis.
E ekspertonan ta buskando pa deskubrí si e awa algun bia tabata líkido, loke ta kere ta nesesario pa surgimentu di bida.

Foto: Phoenix 2705

Imágen emití pa NASA i University of Arizona ta mustra un pida di “Phoenix Mars Lander”, despues ku el a aterisá na planeta Mars djadumingu último.

Lorito ta yama tur hende un felis djamars. Nos ta trata di skibi awe ku un zonidu konstante riba nos kabes. Un hende a subi dak i ta nèt riba nos kabes. Si e Lorito keda na mitar awe bo sa ta di kon!
*********
Den e trabou di prensa ta masha importante ku ta komentá asuntunan, pero den un konteksto korekto. LA PRENSA a publiká ampliamente ayera tokante e kontroversial intento di destaho públiko ku ke òf ta hasiendo den e kaso di SEI. Nos ta bisa “intento”, komo ku ainda e kaso no a kristalisá. Tur dokumento ta mustra ku e intenshon tabat’ei. Si e ta sigui, ta un di dos pregunta.
*********
Nos pregunta ta esaki: kon un partido ku ta para pa bon gobernashon i transparensia por pèrmití ku algu asina aki ta tuma lugá? Pa nos, ta parse ku e partido a pèrdè su konteksto di funshoná, si un mandatario por pensa di pasa un “fastball” (tambe na nòmber di un otro mandatario) i kere ku hende mester guli e kos aki. Por bin bisa kuantu ku ke awor aki ku no a tuma desishon ainda, pero e mero hecho ku e intento tabat’ei sigur ta masha kuestionabel.
*********
Nos a skucha un komentarista awe mainta ku a bisa, ku un hende mes mester por disidí si e ta skohe un fèrfdó pa 20 mil florin òf un pa 15 mil florin. Nos ta kere ku tur rèspèt pa su punto di bista ku el a pèrdè e punto. E punto no ta sa kuantu bo ta gasta komo hende privá. Esei ta bo asuntu! Ora ta asuntunan kolektivo (di gobièrnu i ku ta toka e pagadó di belasting) tin un otro aserkamentu. Ta plaka di pueblo! Ademas ta for di presupuesto di Kòrsou ta bai pag’é!

WILLEMSTAD/OSS – Polis ulandes di e munisipio Brabant-Noord, ta bai slùip e 50 outomobilistanan di mas asosial den e region. Esaki despues di un prueba eksitoso, kaminda na un manera hopi iritante, durante algun luna, a sigui e 10 outomobilistanan di mas asosial di e pueblesito Oss.
‘Verkeershufters’ nan ta yama nan; outomobilistanan ku ta kore riba e vianan spesial pa bùs, i ku ta pasa den lus kòrá, kore riba asera, kore duru den kayanan habitá, ta pega kasi kontra bùmper di e vehíkulo nan dilanti òf ta kore outo ounke a kita nan reibeweis for di nan. E hefe di e distrikto, Roel Willekens, ta haña ku mester saka e outomobilistanan akí for di anonimidat. “Niun hende no ta registrá loke e outomobilistanan akí ta hasi. Kada un infrakshon ku nan kometé ta riba su mes. Ora gara nan, nan ta paga nan but pero nan komportashon peligroso ta keda meskos. E idea ta pa tene nan na bista.”
Riba petishon di Willekens, e büró sentral di hustisia ku ta kobra but a manda un lista ku 22 mil nòmber di habitantenan di Oss, ku den 2006 a haña un but. Al rededor di 73 outomobilista a haña 10 òf mas but. Esnan ku tabata manehá un outo di hür a keda for di bista.
E brigadir di polis Edwin Verberekt, a pensa un sistema di punto pa e infrakshonnan. Kore 20 bia 4 kilometer pa ora mas duru ku ta pèrmití, ta den su bista ménos serio ku kore 3 bia 80 kilometer pa ora mas duru ku ta pèrmití. E loke nan a yama e ‘hufterindeks van Verberkt’ a kondusí na un tòp 10 di residivista. Bou di nan tabatin 6 hende hòmber i un hende muhé ku un karchi di kastigu. Nan huntu a haña 250 but na 2006. E 10 residivistanan a haña un karta den kua a informá nan ku nan lo bai haña èkstra atenshon.

WILLEMSTAD - Riba 21 di mei Totolika a tene su Reunion General Anual. Tabatin un bon asistensia di miembronan. Despues ku a bai hopi rápido dor di relatonan, programa di aña i presupuesto, Presidente tabatin algun informashon hopi interesante relashoná ku selebrashon di 35 aña, ku despues lo bini den ekstenso bèk riba nan.
Loke tabata e punto kulminante tabata e kombersashon ku a sigui despues di pousa, tokante alternativanan den bibienda pa e persona ku un desabilidat.
A surgi basta dia un problema grandi riba e tereno aki, komo Fundashon Verriet no tin lugá mas pa aloká e hendenan ku ta riba e lista de espera. Mayornan ta bira grandi òf te fayesé i rumannan ku tin nan mes famia i hopi biaha no tin kas ku hopi espasio, ta haña nan hopi purá.
Komo masha hopi di su miembronan ta aserká Totolika pa un solushon, Totolika a tuma inisiativa pa mira sugerensia i alternativa ku su miembronan mes por trese dilanti.
Un mayor ya a destiná su kas pa e yu ku un desabilidat despues ku e no t’ei mas, pa e por biba bou di guia ku un òf dos otro di e hendenan spesial. Dos famia di kual tur dos mayornan a fayesé, ya a laga e ruman desabilita biba den e kas i huntu ta karga e gastunan di su kuido.
Den e kasonan aki hopi ta dependé di rumannan i nan famia. Supsidio lo mester bini den forma di “persoonsgebonden budget” (presupuesto mará na e persona).
Tempu tabata kòrtiku i a disidí ku dia 8 di yüni lo sigui elaborá riba e tópiko aki. Por sierto un tópiko hopi emoshonal, pa esnan ku a stèns pa nan yu òf ruman riba Fundashon Verriet, ku awor ta resultá ku por lo pronto no tin lugá. Totolika ke hasi tur ku tin pa trese un solushon den e problema agudo aki.

WILLEMSTAD – “Si tin krítika riba polis, ta pasobra polis ta traha. Laga e krítika aki ta un estímulo pa boso sigui hasi boso trabou”. Esei básikamente tabata mensahe di tantu gezaghèber di Kòrsou, mr. Lizanne Dindial komo minister di Hustisia di Antia David Dick ayera tardi.
Ayera, tabatin apertura ofisial di e warda di polis na Montaña.
Mester bisa ku e edifisio nobo – por sierto hopi bunita – a remplasá un edifisio bieu ku tabata den un estado di dekadensia formal.
E warda di polis nobo ya tin algun luna den uso, pero ayera tabatin e apertura ofisial, den presensia di un kantidat grandi di invitado.
Gezaghèber Lisa Dindial a para ketu na último desaroyonan rondó di Kuerpo Polisial.
E promé mandatario di Kòrsou tabatin hopi elogio pa e manera ku minister Dick a logra drecha alohamentu di polis di Montaña. Hopi biaha no ta solamente asuntu di sèn, pero tambe e brio, e kreatividat i e determinashon pa hasi un kos ta importante, el a bisa.
Por sierto ku no ta Montaña so a keda kla: manera ta konosí, e warda di polis bieu na Rio Canario tambe a pasa den un metamorfósis kompleto i awor akí ta brinda alohamentu adekuá na polis den e área aki.
Nos tur sa, ku tin hopi reklamo riba komportashon di polis. Ta un hecho di otro banda ku kaminda hende ta traha, por tin kos ku ta bai ménos bon. Punto ta, ku esaki no mester keda na krítika. Hustamente e krítika aki mester sirbi pa yuda polis mehorá su prestashon, segun e promé mandatario di Kòrsou.