ORANJESTAD - Ministerio di Salubridad Publico, Medio Ambiente, Asuntonan Administrativo y di Stranhero ta informa lo siguiente:
E maneho encuanto bandanan di afo ta stipula cu ora di cambio di artista, fecha y/o lugar y no tin motibo hustifica, lo revoca e permiso preliminario, y lo habri e posibilidad back pa entrega di peticionnan nobo.
Di acuerdo cu e maneho aki a revoca e permiso preliminario duna pa 7 di juni 2008.
En bista di esaki, lo habri e posibilidad atrobe pa entrega di peticionnan nobo pa e weekendnan di dia 6 y 13 di juni 2008.
Mirando cu e tempo ta cortico, e condicion di 40 dia di anticipacion, NO ta aplicabel y SÍ ta keda e punta di salida en principio “first in, first out”.
Ministerio di Salud Publico, Medio Ambiente, Asuntonan Administrativo y di Stranhero kier a enfatisa cu ora ta hasi propaganda pa concierto y/o fiesta sin cu tin e permisonan necesario, no ta importa na unda, sea den stadion, club of hotel, e riesgonan ta corre pa esnan cu ta hasi esaki.
Pues pa tur artista cu bin di afo pa actua aki na Aruba mester di un permiso

Riba fecha 29 di juni venidero, Dia di Veteranonan di Guera 

ORANJESTAD - Recientemente a ser lanta un comision di ex militarnan Arubano cu e nomber “Reencuentro Ex Militarnan”. E comision aki ta consisti di señores J. Schwengle, R. Santana y R. Rodríguez. E meta di e comision aki tabata pa organisa un caminata pa tur e ex militarnan di Aruba cu a cumpli cu nan servicio militar obligatorio na Marinierskazerne Savaneta.
E comision a tene su promer reunion dia 15 di mei ultimo na Centro di Bario Brazil. Durante di e reunion aki a ser dicidi cu pa fin di juni venidero lo bai organisa un caminata. Diahuebs 22 di mei ultimo e comision a tene su sigiente reunion cu ex militarnan presente na club di Douane “D.O.S.V.A.” na Dakota. Aki lo sigi un raportahe di locual a ser trata durante e reunion aki.
E comision a introduci señor Orlando Quandt (C.E.M.A.) cu tabata hefe di e militarnan Arubano. Na su turno señor Quandt a informa esnan presente di e intencion pa tene un marcha riba dia 29 di juni venidero. Riba e fecha aki na Hulanda tambe ta ser celebra e dia di veteranonan di guera.
Tambe el a duna informacion tocante e plannan pa futuro encuentro di ex militarnan y di un cuerpo di voluntario na Aruba. Ela informa tambe cu su organisacion lo colabora cu e comision cu a bin cu e iniciativa pa organisa algo pa tur e ex militarnan.
Na final di e reunion señor Jacobo Henriquez a informa esnan presente encuanto su intencion pa bin cu un club pa ex militarnan Arubano. Durante di e reunion aki a ser proponi pa tene un marcha di ex militarnan cu a sirbi e pais Aruba desde promer cu segunda guera mundial. E marcha aki lo cuminsa na parke Wilhelmina y lo termina na Plaza G.F. (Betico) Croes. Durante e marcha lo haci ofrendanan floral na e diferente monumentonan di e veteranonan di guera na bida of cu a fayece.

ORANJESTAD - E Conseho di Consulta (Raad van Advies) recientemente a tuma despedida di su miembro mr. E.D.C. (Benki) Fowler.
Señor Fowler ta tuma su retiro debi cu el a yega e edad di setenta aña, e edad maximo pa ta miembro di e Conseho di Consulta.
Na ocasion di e despedida aki, Gobernador señor Fredis Refunjol a ricibi un delegacion di e Conseheo di Consulta na su oficina. Señor Fowler tabata miembro di e organo importante aki for di 22 di januari 2006 te cu 11 di mei 2008 y durante e periodo menciona el a duna un contribucion valioso na e comunidad Arubano pa medio di su conocimento, experencia y vision.
Conseho di Consulta ta un organo halto institui a base di e consitucion di Aruba. E Conseho tin cinco miembro, incluyendo e presidente y e organo ta duna conseho na gobierno y parlamento tocante conceptonan di ley.
E delegacion di e Conseho cu a bishita Gobernador Refunjol tabata consisti di e presidente adhunto mr. J.R. (Ronny Tchong), secretario mr. Hellen van der Wal y miembro mr. Benki Fowler. Informacion y potret suministra dor di Servicio Informativo di Gobierno.

ORANJESTAD – Ehecutando e vision comun pa logra desaroyo sostenibel pa Aruba su turismo, Presidente y CEO di AHATA, Rob Smith a pone den mocion varios paso positivo nobo pa promove miho e destinacion di Aruba.
Entre esakinan ta resalta, boga pa causanan cu mester adresa pa miembrecia di AHATA manera labor, cost-of-doing business y desaroyo di producto, como tambe ofrece sosten y servicionan adicional pa miembronan di AHATA. Den e proceso aki, e asociacion a adkiri talento nobo pa logra amplia su metanan.
Aruba Hotel and Tourism Association (AHATA) ta orguyoso di anuncia e nombracion di mas recien di Doreen Boekhoudt-Kralick como su Director of Membership, PR and Communications.
Desde prome di mei ultimo, Doreen a asumi e responsabilidadnan pa realisa proyecto, oportunidad promocional y iniciativa pa resolve problema pa companianan miembro, como tambe esfuersonan pa engrandece relacion cu publico.
Prome cu el a uni na e team di AHATA, Doreen a opera su propio compania di mercadeo, trahando cu un variedad di compania como tambe directamente cu e industria di hospitalidad, principalmente e propiedadnan di timeshare.
Doreen su conocemento di Aruba su producto turistico a ser rafina durante su carera na Aruba – en total 15 aña – trahando anteriormente cu ATA, encabesando su News Bureau, y consistentemente produciendo cantidad di articulo tematico y noticiero tocante Aruba pa un variedad di publicacion.

WILLEMSTAD - Dos wikènt tras di otro Federashon Biyar Kòrsou a tene aktividatnan pa su miembronan.
E promé tabata Bola 9 su promé tour i e di dos tabata e promé tour Straight Pool.
E promé aktividat a konta ku partisipashon di 54 hungadó, tabata un evento kargá ku sorpresa.
FeBiKo un bes mas ta elogiá ku e nivel di e deporte di Biyar ta sigui subi i hopi ta e biyardistanan ku ta dedikando mas tempu pa drecha nan nivel i konosé e disiplina mihó. Durante di e torneo aki hopi tabata e grandinan ku a haña sorpresa di nan bida na momentu ku nan no a logra ni pasa e di dos ròndu di buèlta di ganadó. Siendo ku e hungadónan aki manera un Johnny Helmund, Michael Arvelo, David Prins i Bryan Landskind ta hungadónan ku ta haña un puesto privilegiá den e torneo, no a logra di gana di nan kontrikantenan ku riba papel mester tabata hungadónan ku nivel muchu mas ménos ku nan.
Dos hungadó a dominá e torneo aki for di den prinsipio ku ta nos Kampion Hubenil Anthony Wever i Roberto “Tiko” Freitas.
Ámbos hungadó a keda den buèlta di ganadó te na final kaminda den un bon partido Tico Freitas ta manda e kampion hubenil den buèlta di pèrdèdó. Pero e kampion hubenil Anthony Wever mustrando su madures ta kita su kontrikante kual ta Bryan Farah den buèlta di pèrdèdó for di kaminda pa bin topa ku e wega di revancha kontra di Tico Freitas. Den un gran demostrashon di grandesa e kampion hubenil Anthony Wever i awor kisas rumbo pa ta kampion di federashon ta pasa relativamente fásil riba su kontrikante pa titulá Kampion di e Promé Tour di Bola 9.

BOGOTA, Colombia, - E temporada di áwaseru na Colombia a kousa 27 morto, un kantidat no determiná di herido i tin 100.000 damnifikado, outoridatnan a bisa ayera.
E pió estragonan a okurí na departamentonan di Antioquía (nortwèst), Tolima (sentro) i Nariño (fronteriso ku Ecuador), Minister di Protekshon Sosial, Diego Palacio, a afirmá.
Otro departamentonan afektá pa e inundashonnan ta Valle de Cauca (sùitwèst), Arauca (fronteriso ku Venezuela) i Meta (sentro).
E damnifikadonan a oumentá i bira 100.000. Na kuminsamentu di siman a konta 80.000 damnifikado n’e pais suramerikano aki.
Palacio a pidi alkaldenan di 155 munisipio mas afektá p’e áwaserunan, pa nan mantené alèrta pa desbordamentu di riunan pa motibu di e áwaseru, ku lo bai dura, segun ekspertonan, un par di luna mas komo mínimo.
E funshonario a pidi atministrashonnan lokal i departamental evakuá e habitantenan for di e zonanan den riesgo.
Na lokalidat di La Gabarra, situá pegá ku frontera ku Venezuela, outoridatnan ta buskando sinku persona pèrdí despues di un lòsmentu di lodo ku a lastra bai ku nan kas i a kousa 11 herido.
E habitantenan a bandoná lokalidatnan di e zonanan situá pegá ku riu Magdalena pa temor pa desbordamentu i inundashonnan.
E riu Magdalena ta e riu prinsipal di Colombia, ku ta rekoré di nort pa sùit.
Minister di Protekshon Sosial a bisa ku na lokalidat di La Dorada e inundashonnan a destruí kultivonan i a lastra bai ku krio di animal.

WILLEMSTAD – Tilin ta kontribuí ku inisiativanan positivo den komunidat i ta sostené CuraRiders den nan deporte di Siklismo brindando nan unifòrm patrosiná pa Tilin.
Tilin ta sumamente orguyoso di por aportá di e forma aki na e deporte di Siklismo.
Resientemente CuraRiders a partisipá den e kompetensia di baiskel i Tilin ta orguyoso ku CuraRiders a sa di konkistá e premio máksimo.
Tilin ta kere firme den CuraRiders i lo sigui di aserká nan desaroyo i logronan pa asina sigui sostené nan.

WILLEMSTAD - Despues ku a logra pone tur piskadó na altura di e desaroyo dje último reunion ku Marina Real, e piskadónan a duna nan representante mandato pa proponé un kompromiso ku Marina. Tabata un kaminda basta largu pa por a lokalisá tur e piskadónan pa splika nan detayadamente kon a bai ku e reunion ku Marina Real. Asina, e bosero Erwin Koense, a bisa LA PRENSA.
Algun dia pasá un delegashon di e piskadónan a reuní pa di dos biaha ku e alto representante di Marina, riba e problemanan ku e piskadónan ta topa, komo konsekuensia di e ehersisionan di tiramentu di Marina Real na Wacawa i besindario.
Erwin Koense, e bosero di e piskadónan malkontentu a bisa LA PRENSA, ku entretantu e piskadónan a duna algun remarke, riba resultado di e reunion. “N’e momentu aki, nos no por revelá kiko e proposishon ta. Ni tampoko no por duna publisidat na e posishon di Marina, ni esun di e piskadónan”. Asina Koense a remarká. “E proposishon di e piskadónan ta serka e komandante di Marina Real, kende tin e tarea pa analis’é”. Segun Koense, e piskadónan a asumí un posishon di espera pendiente pa yega na un solushon pa e problema aki.
E bosero dje piskadónan a remarká ku no ta trata aki di un problema ku ta fásil pa solushoná. “Ta trata di un situashon hopi delikado ku piskadónan ta konfrontá”. E entrenamentunan di Marina Real, for di tera dirigí riba laman i tambe for di tera pa tera mes, ta okashoná hopi problema pa nan, Koense a indiká.

WILLEMSTAD - Kòrsou ta dispuesto pa koperá ku representashon independiente di Sint Maarten na Ulanda despues ku realisá e struktura estatal nobo. Antillenhuis den pasado a manda un dokumento ku algun pensamentu i proposishon pa Gobièrnu Sentral i tambe e islanan, prinsipalmente Kòrsou i Sint Maarten, enkuanto e futuro struktura di Kas di Antia, despues di restrukturashon estatal. Banda di esei, aña pasá Antillenhuis a sondeá e interes di e islanan mes. Den deklarashonnan ku el a hasi, minister Plenipotensiario, di Antia na Ulanda, Paul Comenencia, a konfirmá ku tin indikashon ku ta biba un preferensha prinsipalmente serka Sint Maarten, pa tin un representashon separá, ku posibilidat sí pa koperá riba sierto tereno ku Kòrsou. Esei outomátikamente lo nifiká ku Kòrsou tambe lo mester tin un representashon propio, segun e splikashon di e minister Comenencia.
Pa loke ta trata e proposishon ku Kas di Antia a hasi aña pasá ougùstùs, segun Comenencia, por menshoná ku a trata en realidat di algun senario, ku a ilustrá pa Kòrsou i Sint Maarten i indiká kiko lo ta e konsekuensia, bentaha i desbentahanan den kaso ku mantené e situashon aktual. Òf si instituí representashonnan separá òf traha ku un kombinashon, unda ku kada isla tin su propio representante, pero ku tantu posibel, nan ta hasi uso di fasilidatnan komun. Esei por nifiká, ku e islanan ta hasi uso di e mesun edifisio na Ulanda i tambe di servisionan di un resepshonista komun i tambe situashonnan unda ku ta usa profeshonalnan pa evaluá proposishon i tuma konseho, tokante desaroyonan, hasi uso di un grupo di profeshonal. E meta lo ta finalmente, segun Comenencia, pa e gastunan resultá mas ekonómiko.

Anaheim – Awor ku Los Angeles Angels a haña All-Star Game pa 2010, Dodgers tambe tin wowo pa trese e evento aki bèk Los Angeles pa 2013 òf asina ku e renobashonnan grandi terminá na Dodger Stadium.
“E kos aki ta hopi leu, pero loke mi gusta mira pa pasa ta pa nos kompletá nos proyekto ku un All Star Game”, asina e doño Frank McCourt a bisa MLB.com ayera.
“Mi ta kere ku lo ta un gran regalo pa nos fanátikonan. Tene na mente ku mas fanátiko a bin mira Dodgers hunga ku kualkier otro deporte den historia. E esaki ta loke un All Star Game ta un rekompensa pa e fanatikada”.
E All Star Game di 2010 ta e di kuater ku ta ser hungá den e área di Los Angeles i e di seis den Sur di California.
Dodgers no a tene un All Star Game for di 1980, e úniko biaha ku esaki a tuma lugá den Dodger Stadium.
Komishonado Bud Selig a bisa reporteronan durante di un konferensha di prensa na Angel Stadium, ku e no tabatin niun diskushon ku McCourt i ku e kier regla e wega di All Star promé pa añanan 2011 i 2012.
Selig a bisa: ”Mi tin un lista largu di timnan di Liga Nashonal ku kier e wega aki”.
“Mi mester tin un 15 pa 20 aplikashon awor aki i mayoria di nan lo kier tuma kualkier aña ku por”, asina Selig a bisa. “E kos aki ta asombroso i ta hasi mi trabou muchu mas difísil. Kada bes ku mi duna un siudat un All Star Game mi ta risibí masha hopi yamada”.

WILLEMSTAD – Djamars na e ofisina prinsipal di FATUM tabatin entrega di premionan di e Fatum Olympic Triathlon ku a tuma lugá djadumingu último.
Den e kategoria Individual, Peter van der Horst, ku su number M4049, di 43 aña a bira e ganadó overall despues ku el a marka tempunan di 2:34:32 pa landamentu, 32:19, riba baiskel i 47:59 korementu na pia.
Na di dos lugá a sali Simon De Kerpel, ku Alexander Robert na di tres lugá, Gerritjan van den Dam na di kuater i Andre Nottelman a sali na e di sinku lugá.
Den e sekshon femenino, den e sekshon di 20-29 aña Lies Debaere a sali na promé lugá ku tempu di 3:11:34, pa landamentu 45:11 pa korementu di baiskel 1:27:27 pa korementu na pia 58:57.
Tabatin mas kategoria. Den e kategoria di 40-49 aña Inge van der Horst tabatin tempunan di 2:55:10, 37:37, 1:26:58, i 50:35.
Den e Kategoria komo Tim.
E Tim di Kooyman Techniek, konisistiendo di Hycinth, Bakker i Randhy Cuevas ku a totalisá 81 aña, a marka tempu di 25:30 pa landamentu, 1:05:56 riba baiskel i 39:09 korementu na pia i a sali na e promé lugá den e kategoria aki.
E tim di Kooyman Techniek Nec konsistiendo di Winklaar, Linders i Mathilda a bin sali na di dos lugá.
Rust en Weinig, konsistiendo di Kluyver, Dorego i Couperus a sali na di tres lugá.
Balamo, konsistiendo di Bade, Keesen i Morris a bin sali di kuater.
HWS, konsistiendo di Cijntje, De Jongh i Trinidad a sali na di sinku lugá.

WILLEMSTAD – A drenta informashon ku e atleta ku ta miembro di e Tim di Relevo di Antia, Geronimo Goeloe, ku a partisipá den e Kareda di Ponce mas na komienso di e luna aki, a tèst positivo na steroids despues di un tèst ku nan a hiba despues di kareda.
Ku esaki tambe e soño di Antia pa partisipá na Weganan Olímpiko na Beijing ku e tim di relevo aki a bai pèrdí.
LA PRENSA a drenta den kontakto ku sr. Remco Tevreden di NAOC pa un komentario, pero el a bisa nos ku ta sr. Rudsel Martina ta e bosero.
Nos a trata di drenta den kontakto ku sr. Martina, pero su telefon no tabata alkansabel.

ARIES: A nase un aktitut nobo den bo. Ya bo no tin ku pasa tantu trabou pa optené loke bo mester, si ta mas fásil di alkansá, sin tantu inkombiniente. 07,21,25.

TAURO: Tin hopi gastu imprevisto, pa kousa di bo famia o reparashonnan. Pasenshi, bo sa di utilisá rekursonan i bo tin e tempu pa rekuperá. 31,05,10.

GEMINIS: Risibí notisianan i informashon ku ta hasibu mira e kosnan mas klaramente i bo por hasi mihó kuantu bo futuro ta referí. 15,26,08.

KANSER: Bo responsabilidatnan ta hopi i tirá den diferente direkshonnan. Bo no por komplasé tur hende, pero bo enkanto sosial ta hopi favoresé. 07,30,18.

LEO: Bo magnetismo personal ta fuerte i bo ta laga nota esei den bo grupo sosial i di amigunan. Bo finansa ta grasia na bo konfiansa. 05,30,11.

VIRGO: Loke ta parse un tragedia, pa bo ta un bendishon. Nada di lo negativo ta saká for di bo pas. No laga e gritunan asustábu. 44,17,09.

LIBRA: Bo ta poniendo bo esfuerso den algu ku ta interesábu hopi. Bo ta haña opstákulonan i personanan ku ta hasi bo kaminda un tantu difísil. 19,23,04.

SKORPION: Hopi kambionan den bo bida i esei ta trese pa konsekuensia mas trabou i tenshon. No deskuidá. Ta momentu di saka di bo bida tur lokual ku no ta dunando resultado.

SAGITARIO: Bo ta un tantu agresivo ku bo tin ku vigilá bo temperamentu. Ta momentu di pone den akshon bo plannan. 01,03,14.

KAPRIKORNIO: Renovashonnan den bo kas ta lagabu spera i invertí algun plaka den dje. Problema o proyektonan ku famia ta intensifiká. 41,15,26.

WILLEMSTAD – “Dia 15 di desèmber 2008 lo yega na e promé palabrashon kon ta bai desmantelá Antia den práktika. Un di e kosnan ku gobièrnu lo bai traha duru riba dje ta e legislashon ku mester ta kla – por lo ménos e promé diseño – relashoná ku e puntonan akordá durante e enkuentro polítiko di siman pasá”, asina promé minister di Antia Emily de Jongh-Elhage a anunsiá ayera, durante e enkuentro semanal ku prensa.
Ulanda, Antia, Kòrsou i St. Maarten a bai di akuerdo pa aserká Raad van State pa weta den ki forma por aselerá e proseso pa desmantelá Antia. Un kos ku a sali bon kla dilanti ta e hecho ku 15 di desèmber 2008 definitivamente ta for di mesa, e no ta un fecha realístiko mas. Ekspertonan a konkluí, ku si mantené un planifikashon hopi rígido, di mas tempran ku por finalisá e proseso ta 2011. Ekspertonan ta kere ku 2012 ta mas realista.
Esei tabata tambe resultado di e reunion maratóniko ku a tuma lugá djaweps último. E deliberashonnan a kana difísil. Lòs for di esei, e posishon fuerte ku St. Maarten a tuma a pone kos tarda un poko mas. A palabrá ku ta pidi Raad van State bin ku proposishon kon pone e proseso kana mas lihé, pero alabes, kiko por hasi pa evitá ku elekshon di Staten, ku ta programá pa 2010, mester tuma lugá tòg. Esei, si no logra finalisá e proseso pa yanüari 2010.

WILLEMSTAD - Ku 11 voto di e miembronan di koalishon na fabor i 6 di e miembronan di oposishon ku a vota kontra, Konseho Insular ayera nochi tempran a bai di akuerdo ku e presupuesto supletorio di Kòrsou pa 2008.
E presupuesto ta mustra un défisit di 67.9 mion florin, ku ta algu mas ku e 66 mion ku gobièrnu mes a antisipá anteriormente.
Manera ta konosí, gobièrnu di Kòrsou a primintí Konseho Insular fin di aña pasá, ku nan lo risibí e presupuesto supletorio na yanüari último.
Diferente desaroyo a pone sinembargo, ku esei no a resultá posibel.
Es mas: a bin aserka e desaroyo kaminda Ulanda lo no kontribuí mas pa kubri un parti di e défisit na e montante di 103 mion florin, loke ta hasi nesesario pa gobièrnu subi merkado di kapital atrobe pa fia e montante aki.
Durante tratamentu di e proyekto di lei ayera, diputado di Finansa Mike Willem a splika, ku e presupuesto ta sali for di loke el a yama e “worst case scenario”. Esaki ta nifiká, ku ta sali for di punto di bista, ku e 103 mion florin ku Ulanda a primintí den promé instansia, ku e lo kontribuí kuné, awor lo bin pa kuenta di Kòrsou mes.
Esei ta nifiká, ku ta Kòrsou mester weta kon e ta solushoná esaki.
Na di dos lugá, segun e diputado, ta sali for di punto di bista, ku lo bende Rif Resort na òktober awor.
Gobièrnu lo hasi tur loke ta den su alkanse di su parti pa sòru pa benta di e hotèl aki produsí mas tantu posibel.

WILLEMSTAD – “Duna shofùrnan di bùs supsidio, lo nifiká de fakto supsidiá sektor privá. Anto filosofia di gobièrnu ta, ku e no ta supsidiá empresa privá pasobra ta negoshi nan ta hasi”.
Na palabra diputado di Asuntunan Ekonómiko Eugène Rhuggenaath, relashoná ku e problemanan ku ta manifestando den sektor di transporte públiko.
Shofùrnan di bùs ta konsiderá, ku nan ta esnan ku ta sufri mas tantu posibel di e oumento di preis di kombustibel. Ta un hecho konosí ku mayoria bùs awendia ta kore riba diesel, anto ta un hecho ku ta hustamente diesel ta esun ku ta bai subi mas tantu. Diesel a subi ku 20 sèn, e lo bolbe subi ku 20 sèn luna di yüni, miéntras ku den yüli tin otro impakto, ku un oumento di 30 sèn.
“Hustamente esei ta e problema”, segun bosero di e sindikato di shofùrnan di bus STU Andres Everitz, “pasobra e oumento lo nifiká, ku básikamente ta pa kombustibel so bùsnan lo mester kore”.
Komo tal, un dje proposishonnan tabata pa gobièrnu duna un supsidio den forma di un montante pa dia pa kada shofùr.
E sifranan ku ta riba mesa awor aki ta ku un montante di entre 25 pa 40 florin pa dia pa kada shofùr di bùs.
Pa gobièrnu esaki sinembargo ta un kos imposibel.
Un supsidio na kada shofùr di bùs di entre 25 pa 40 florin pa luna lo nifiká pa gobièrnu un montante di entre 3.7 pa 4.5 mion florin pa aña. Ta un peso ku gobièrnu di Kòrsou no por karga awor aki, konsiderando tambe e défisit ku ya kaba ta hopi haltu riba presupuesto di 2008.

WILLEMSTAD – “Presupuesto 2008 mester a bira e base pa bienestar di e pueblo aki. E pregunta ta: unda e bienestar a keda? Kua bienestar nos ta papiando di dje? Esun kaminda gobièrnu ta rekòrdá tur hende ku nan mester karga nan propio responsabilidat? Anto lubidando ku den e mesun grupo aki tin por ehèmpel hendenan desabilitá”?
Na palabra, miembro di frakshon di Forsa Kòrsou, Gregory Damoen, durante tratamentu di e presupuesto supletorio di teritorio insular di Kòrsou pa 2008.
Damoen a kuestioná severamente e hecho, ku a planifiká e reunion pa kuminsá 5or ayera tardi.
“Kiko ta e idea, pa e bai kaba anochi lat, kisas den mardugá?” Damoen a puntra.
Aparentemente a hasi palabrashon ku ta kumpli. Ta pasobra a palabra ku dia 1 di yüni ta kuminsá ku ehekushon di e Inisiativa Sosial Ekonómiko SEI? Òf ta pasobra tin e mesun montante ku ke duna un konsultent pa ehekutá SEI den e presupuesto? E kos aki ta kuminda pa Kontrolaria General, Damoen a remarká.
“Den pasado mi a yega di boga kaba pa ora tin tipo di proyektonan asin’aki, pa laga Kontrolaria General kontrolá durante e proseso.
Ta e tipo di práktika ku ta tumando lugá awor aki, ta duna e ulandesnan, esnan ku mester yuda nos, chèns di akusá nos di tur sorto di kos,” di akuerdo ku Damoen.
E miembro di Forsa Kòrsou den Konseho Insular a sigui bisa, ku durante tratamentu di e presupuesto normal 2008 na kabamentu di aña pasá, gobièrnu a informá Konseho Insular di e importansia pa aprobá e presupuesto. A informá Konseho Insular den un karta ofisial firma pa Gezaghèber, ku na luna di yanüari e lo haña e presupuesto supletorio.

 STOCKHOLM, SUECIA - Un konferensia internashonal di un dia pa evaluá situashon global na Irak a kuminsá awe na Stockholm na Suesia, un foro di Nashonnan Uní, ku intervenshon di Promé Minister sueko Fredrik Reinfeldt.
“Nos ta kla pa apoyá Gobièrnu di Irak i tur irakí den búskeda di un pais soberano, demokrátiko, uní i próspero”, Reinfeldt a deklará na apertura di e reunion.
Un sentenar di delegashon, ku presensia di Promé Minister irakí Nouri al-Maliki, Sekretario General di Nashonnan Uní, Ban Ki-moon, i Sekretaria di Estado di Merka Condoleezza Rice, ta partisipá na e konferensia aki riba Kontrato Internashonal di Ophetivonan pa Irak (ICI).
E plan aki ku ta buskando reforsá seguridat i mehorá ekonomia irakí adoptá na Sharm el-Sheikh na Egipto 3 di mei 2007 den un konferensia internashonal, durante kua alto responsabelnan di mas ku 60 pais i organisashonnan a primintí anulá mas o ménos 30.000 mion dollar di debe.
“E trabou no a terminá ainda, asina ta ku komunidat internashonal mester respaldá Irak den su esfuerso pa avansá”, Rice a bisa.
Promé Minister di Irak Nouri al-Maliki a bisa ku e tarea di rekonstruí su pais tabata mas difísil ku kontrarestá terorismo, i el a manifestá su speransa ku otro nashonnan lo ofresé yudansa pa alivio di e debe eksterno irakí.
Ayera, e mayó bloke musulman sunita a suspendé kòmbersashonnan pa reinkorporá Gobièrnu irakí, enkabesá pa chiitanan.

WILLEMSTAD – Dia 31 di mei próksimo lo tuma lugá un konsierto di Gòspel pa rekoudá fondo pa e kampaña Salba Darfur. E kampaña aki ta keda respaldá pa Krus Kòrá Kòrsou.
Manera ta konosí, na Darfur, un region den e pais Sudan (Afrika) pa vários aña kaba tin un matansa ta tuma lugá kontra di e poblashon no-árabe. Ya kaba mas o ménos 400,000 hende a keda matá, miéntras ku mas ku 2 mion a bandoná nan kas pa evitá ku nan ta pèrdè nan bida. E dos mion refugiadonan aki mester di kaminda pa biba, kuminda, awa i remedi.
Spesial pa rekoudá fondo pa e refugiadonan i hisa nos konsientisashon pa lokual ta pasa ku nos rumannan na Afrika, e konosido artista Shannon Gonzalez ta presentá un tremendo konsierto Gòspel titulá “It’s All About the People” ku lo tuma lugá djasabra 31 di mei na Sentro Hesu Kristu e Kontesta ku ta keda na Kaya Nueva Esparta z/n na Muizenberg. E konsierto aki ta kuminsá 7:30 di anochi i karchi ta kosta solamente Naf 10,-. Den e pre-show lo aktua entre otro Zamar, Grupo Fuego, Rinnah Esprit, Excel Arts Academy i Grupo Avivamiento y Fuego. Tur fondo rekoudá lo bai pa e kuentanan spesial ku Krus Kòrá a habri na fabor di Darfur.
Bin gosa di un bon konsierto i ademas kontribuí na nos rumannan ku ta sufriendo di un tremendo inhustisia.

 WILLEMSTAD - Ayera 28 di mei e aktual direktiva di ASOGAS a hasi nan promé bishita ofisial na Gerensia di Curoil. ASOGAS dia 5 di mei último a keda lantá komo asosashon pa doñonan di pòmp di gasolin.
E asosashon aki a lanta for di den seno di algun doño di pòmp di gasolin kendenan n’e momentunan ei no tabata asosiá ni partisipá aktivamente na ningun asosiashon di operadónan di pòmp.
E meta prinsipal di ASOGAS ta pa salbaguardiá interesnan di tur operadó di pòmp di gasolin den e sentido di mas amplio ku ta posibel. Di e forma aki ASOGAS lo krea perspektivanan nobo pa su miembronan.
Miembronan ku na salida ta forma parti di ASOGAS ta doñonan di pòmpnan di gasolin: Emmastad, Parera, Frederik, Scheidelaar, Buena Vista, Gibi Djaoen, St. Helena, De Ruyterkade i Gasora.
E direktiva kual lo presidí e asosashon ta konsistí di sr. Huber Raper komo presidente, sr. Roberto Servage komo sekretario i sra. Joan Spong-Scheidelaar komo tesorero.