ORANJESTAD – Parlamentario Zulay van Poppel-Marquez ta señala cu diasabra 24 di mei ultimo tabata Dia Internacional den e lucha contra Obesidad, y ta bon pa nos tambe reflexiona riba nos condicion di salud pa cu e fenomeno di obesidad.
Diferente raport entre otro rapport STEPS Aruba 2006 cual ta un compilacion di datos entre Departamento di Salubridad Publico y Central Bureau Statistiek ta indica cu gran parti di nos poblacion tin sobrepeso. Por ehemle pa e ser masculino rapport STEPS ta indica cu un promedio di 17,2% di personanan entre 25 y 64 aña tin un peso normal.
Pa sernan femenino ta indica pa e mesun categoria aki cu 27,1% tin un peso normal. Hunto e promedio ta sali 22,8% di nos poblacion tin un peso normal.
Esaki kiermen cu solamente un di cada cuatro persona so tin un peso normal; e tres otronan tin sobrepeso.
Tin diferente factor ta causa e sobrepeso, entre otro comemento di mas of robes y poco movecion. Segun Zulay rapport STEPS ta indica tambe cu e consumo di fruta y berdura durante un siman ta 4 dia y pa consumo di berdura ta 5,5 dia.
Pa yuda den esaki Minister Swaen a indica cu ta bai amplia e canasta basico cu fruta y berdura frozen y den blikki. Fruta y berdura fresco ta algo pa futuro y ta trahando riba e ampliacion di e canasta basico cu fruta y berdura fresco.
Nos comunidad por mira e trabaonan di Minister di Labor y Cultura unda a construi Centronan multifunctional na Parkietenbos y na Yara, un Centro deportivo Frans Figaroa na Nord y e Parke Curason na Yaburibari cual ta bon concuri desde su inauguracion. Departamento di Salud Publico periodicamente ta publica informacion pa comunidad tene cuenta cu su peso. Awor ta keda na nos pa hasi uso di e facilidadnan.

ORANJESTAD - Un otro Youth Explosion ta den porta y Ministerio di Hoben Catolico di Aruba ta den preparacion completo pa e di 16 conferencia. E aña aki esaki lo tuma lugar dianan: 27, 28 y 29 di Juni 2008, na Colegio E.P.I. na oranjestad y lo tin como tema: Cristo Nos Speransa.
Si nos mira e situacion na mundo actual caminda tur parti tin crisis financiero, material y particularmente moral, nos ta sigur cu Cristo Hesus ta nos unico speransa. E ta nos consuelo, e baranca fuerte na kende nos tin cu ankra duro. Ta Cristo Hesus so por ta nos speransa na momento di crisis den nos bida. Specialmente pa nos hobennan, speransa den Cristo ta necesario, pa nan por hisa cara y wak futuro sin miedo. Esaki ta momento pa nan confia totalmente den e amor y gracia di Dios, pa medio di Cristo Hesus nos Salbador.
Aña pasa nos a celebra e di 15 conferencia na grandi, cu participacion di diferente paisnan, pero e aña aki nos ke tene un Youth Explosion mas chikito caminda nos lo tin lugar pa solamente 250 participante. Pa trece e ambiente di Youth Explosion, Ministerio di Hoben Catolico di Aruba lo tin un anochi di Alabansa, caminda nos ta invita tur esnan cu a participa na un of mas conferencia e añanan anterior, pa bini hunto y gosa den e presencia di Dios, den e “style” cu Youth Explosion so tin.
Esaki ta tuma lugar diabierna 30 di mei 2008, di 7:30 – 10:00 p.m. na Centro di Bario Tanki Leendert. Durante e anochi aki Ministerio di Alabansa y Adoracion, bou direccion di Gregory Goedgedrag lo anima tur presente cu canticanan di Alabansa. Tambe lo comparti e Palabra di Dios. Ademas durante e anochi aki tambe nos lo tin benta di e ticketnan di Youth Explosion. Mirando e cantidad limita, nos ta encurasha tur hoben entre 13 pa 25 aña cu ke participa, pa nan cumpra nan karchi na tempo pa nan no keda afor. Tambe lo tin snacks, soft y juice na benta pa asina recauda fondo pa e conferencia.

ORANJESTAD- Renobacion di Biblioteca Nacional San Nicolas ta bayendo bon y DOW ta premira cu finalisacionnnan di e trabaonan lo ta keda cla pa memey di Juli 2008.
Gastonan di e reparacion, mantencion y renobacion aki a suma mas cu AWG 300.000,-
E trabaonan di mantencion na edificio di Bibilioteca Nacional na San Nicolas ta encera entre otro: instalacion di porta y bentanan nobo, reparacion di e pleisterwerk, drechamento di e dak, instalacion di un trapi di emergencia (brandtrap), cambio di plafond y adaptacion y renobacion di e ductonan di airconditioning pa evita cu sushi, pluma y insectonan etc. causa door di paloma y otro parhanan drenta den e sistema di airconditioning y den e edificio.
Ora cu e trabaonan di renobacion keda finalisa, e biblioteca ta bay keda hopi bunita cu instalacion nobo nobo di tubonan di airco.
Minister drs. Marisol Lopez-Tromp ta pidi pueblo di San Nicolas especialmente nos hoben studiantenan pa tene un poco di pasenshi mas te ora cu e edificio keda cla.

ORANJESTAD- Comision Waste- Rec, esta “Waste – management & Recycling Environmental Committee” ta organisa un otro limpiesa diasabra 31 di mei benidero.
E biaha aki pa deshaci di sushi di cura y sushi grandi, e asina jama ‘grof vuil’ (mata, stoof, wasmashin, frigidaire, colchon, cama, zinc etc).
Esaki pa e bario Esso Heigths, Nijhoffstraat, Weg Kust Batterij, Kust Battereij y de Vuyst.
E limpiesa den e diferente bario no ta posibel sin partipacion di e habitante di e diferente bario, hende grande y mucha. Tambe no tabata posibel sin yudansa di e sigiente companianan Mourik NV y Serlimar cu a pone baki disponible y ‘tipping fee’ pa hiba e desperdicio pa dump.
Otro instancia manera AHATA y Valero Volunteer Committee pa nan yudansa tecnico y cu material. Y sin falta esnan cu a percura pa cuminda, bebida y cuki pa tur trahado, esta B 55, supermercado Double Happy, AHATA, All Drive Car Rental y Valero Volunteer Committee. Tambe e Polis di Bario, Sr. Kenneth Phillips cu a duna indicacion na unda pa pone e bakinan.
Nos mision ta pa e habitantenan sinti nan mes responsabel pa limpiesa di nan bario y cu orguyo bisa: Nos bario ta keda limpi – limpi, paden y pafo di nos cura. Di bo tambe? Waste-Rec lo sigui lucha pa promove bario sano y limpi cu e tema: “Promove un comunidad sano y limpi”, pa medio di Maneho di Desperdicio y Reciclahe, lo cual ta parti di e solucion pa proteha y preserva nos medio ambiente.
Pa mas informacion por tuma contacto cu Sandra Wilson, na 5844694 / 5606033, Gloria Richardson na 5846965 / 7342150, Shirley Illidge – Hilman na 7302612 of Theresita de Graaf na 7486844.

WILLEMSTAD – E di dos dia di akshon di shofùrnan di bùs a kuminsá relativamente trankil. Polis no mester a intervení den tráfiko, ya ku e shofùrnan no a blòkia niun kaminda. Entretantu e sindikato PWFC a anunsiá, ku nan ta sostené e akshonnan di STU.
Awe mainta tur kaminda kayanan tabata liber pa tráfiko. Na niun krusada no tabatin shofùrnan di bùs ku a blòkia kaminda. Mainta tempran un loader mester a kita un seru di tera ku deskonosínan a basha meimei di kaminda na un krusada na Montaña. Mas lat mainta, polis mester a sera e área rondó di e pòmp di gasolin na Colon, despues ku a drenta un anunsio di bòm. E efektivonan di e tim di aresto ku ta di trein pa lokalisá eksplosivo, a listra den e área pero no a lokalisá nada. Ayera polis a laga shofùrnan ku si kier a traha, usa Colon pa baha nan pasaheronan.
LA PRENSA a komprondé ku ayera nochi tur pòmp di gasolin tabatin vigilansia èkstra, despues ku tabatin rumornan ta sirkulá ku lo a bai sea destruí òf blòkia un òf mas pòmp di gasolin. Sin embargo no tabatin niun suseso di tal índole. E insidente di ayera tardi na Betèsda, kaminda polis lo a lastra un shofùr di bùs riba kaya i lag’é dal su kabes, a resultá di no ta korekto. For di imágennan di filmashon por a mira ku e shofùr di bùs no a dal su kabes. E investigashon ta kanando pa konkluí esaki ofisialmente.

WILLEMSTAD – Awe mèrdia poko poko hende a kuminsá aglomerá na pòmpnan di gasolin despues ku a drenta informashon ku e sindikato PWFC ta konsiderando pa laga shofùrnan ku ta entregá kombustibel drenta den akshon. No tabatin konfirmashon sinembargo di e vershon komo ku direktiva tabata den e reunion na e momentu ei. For di awe mainta PWFC a deklará su mes solidario ku e akshon di STU i a pidi pa un solushon negoshá entre e partidonan.

Skina di Sorti, awe djabièrnè 30 di mei di 2008, ta kuminsá ku deseá tur hende un bon dia. Despues di 39 aña di e susesonan di 30 di mei 1969, no por hasi nada otro ku di konstatá ku militansia outéntiko ta morto i ku buitrenan ta keda komo for di lokual a keda di e eksploshon sosial ku a tuma lugá na 1969. Militansia intelektual i obreril, pa kousanan legítimo i un gobernashon “regentesk”, ku algun mandatario eksponiendo un arogansia di poder provokativo, tabata elementonan determinante.
****
Lokual ta tipifiká un buitere ta ku e ta kome su barika yen for di kadaver, pues e ta festehá di sobrá di otronan. Despues di 39 aña, te hasta e miedu ku aki aya a keda kologá pa ripitishon di un 30 di mei, no ta bai yuda esnan ku a kosechá benefisio polítiko for di mitonan ku pa benefisio propio nan a krea rondó di e susesonan i personahenan históriko di 30 di mei 1969. En bes di choke (“collesion”) entre filosofianan i òf ideologia opuesto awe nos tin un sorto konspirashon polítiko (“collusion”) kaminda “botsende bestuursculturen” tin otro den un brasamentu mortal.
****
Konspirashon (“samenspannen”) por lo general tin konsekuensianan ku pa un òf mas partisipante no tabata den e plan, pero ku nan mester a aseptá komo riesgo pa logra lokual segun nan ta metanan superior. Kaminda integridat ta fuerte, “het doel heiligt de middelen” no ta haña stul pa sinta te pa por yega na un situashon kaminda táktikanan vil ta bira regla en bes di e eksepshon ku a kontemplá.

 

WILLEMSTAD – E organisashon ulandes, ‘Vogelbescherming Nederland’ a anunsiá ayera ku nan lo bai yuda protehá paranan den Karibe. Ku un suma di 120 mil euro (330 mil florin) ku nan a rekoudá bou di nan miembronan, e organisashon lo sostené e organisashon lokal di protekshon di naturalesa tantu na Antia komo na Aruba.
DCNA (Dutch Caribbean Nature Alliance) lo bai hasi uso di e sèn aki pa ehekutá algun proyekto pa protehá e fauna di paranan i pa duna mas informashon.
Segun e organisashon, hopi ta e paranan partikular den Karibe ku ta keda menasá pa desaroyonan ekonómiko pa rekreashon, turismo i konstrukshon i intensifikashon den agrikultura i peska. “Na Antia i Aruba tambe e atenshon pa protekshon di para ta hopi limitá. Tur e organisashonnan di protekshon di naturalesa ku ta uni den DCNA kier trese un kambio den esaki.”
E organisashon ulandes ta mustra riba e hecho ku e islanan no ta disponé di sèn pa mantené e naturalesa i p’esei nan a rekoudá fondo bou di nan miembronan. Ku e suma di 120 mil euro a aktividatnan di protekshon di para ta haña un tremendo sosten.
E área di Karibe ta importante pa mas ku 550 sorto di para. “E islanan den Karibe den nos Reino ta di interes pa paranan di kosta i tambe paranan tropikal.” Nan ta menshoná entre otro, granaatkolibrie. E islanan konosé tambe paranan ku ta aparesé eksklusivamente riba kada isla.
Vogelbescherming Nederland ta sali pa protekshon di para i tambe nan fauna. No solamente na Ulanda pero mundialmente. Ya pa algun aña kaba nan ta enbolbí den protekshon di naturalesa den e parti di Reino aki.

CIUDAD DE PANAMÁ, - E hefe di polis uniformá chileño a muri ayera huntu ku otro 10 persona, ora e helikòpter den kua nan tabata biaha a dal kontra un edifisio di un zona residensial di Ciudad de Panamá, kaminda e tabata di bishita, funshonarionan a bisa.
Kansieria chileño a konfirmá na Reuters ku e hefe di Carabineros di Chile, e general José Alejandro Bernales, di 59 aña, i na mando di polis fo’i novèmber 2005, a fayesé den e aksidente ku a parti e helikòpter na dos, i e edifisio di haltura abou a pega na kandela.
E esposa di Bernales, dos komandante, e dama di un di nan i un kapitan tambe a fayesé den e aksidente, di akuerdo ku Ministerio di Interior di Chile.
Den e helikòpter ademas tabata biaha 6 panameño, di kendenan solamente un di nan a sobrebibí e aksidente.
“Gobièrnu profundamente ta lamentá morto di un destaká ofisial i ta ekspresá su mas sentido kondolensia na Carabineros di Chile p’e pèrdida trágiko aki”, Minister di Interior chileño, Edmundo Pérez Yoma, a bisa.
“Nos a pèrdè un amigu”, el a agregá den deklarashonnan na Prensa na Santiago.
E chileñonan tabata na Ciudad de Panamá pa partisipá na konferensia riba kombate kontra terorismo, alkalde di e kapital, Juan Carlos Navarro, a bisa Reuters.
Servisionan di emergensia di Panamá a bisa ku lo por tin mas morto i un koresponsal di Reuters na e esena a mira pidanan di kurpa humano riba kaya huntu ku e edifisio kaminda tin un tienda i ofisinanan.

WILLEMSTAD – NAOC i NAAU ayera a saka un komunikado tokante di e kaso di Geronimo Goeloe, un atleta ku ta miembro di e kuarteto di relevo 4x100m.
For di kuminsamentu di aña, e tim antiano di relevo a sigui un programa di topsport, kaminda e meta tabata pa kualifiká pa Weganan Olímpiko na China na 2008.
A base di un pre-selekshon di diferente atleta a partisipá na diferente kompetensianan internashonal.
E programa di preparashon a wòrdu trahá, teniendo kuenta ku tur reglanan internashonal ku ta na vigor.
Un parti di e programanan ta konsistí di kòntròl di doping, supstansianan prohibí regular pa tur e atletanan. Den kuadro di esaki a tèst riba 25 di aprel tres atleta di e tim un dia promé ku e kompetensia di relevo di “Penn Relays” na Philadelphia.
Djaluna anochi 26 di mei último, NAOC a risibí e resultado ofisial, kaminda un di e atletanan a wòrdu di tèst positivo. Ta trata di Geronimo Goeloe, ku tin algun aña kaba bibá na Puerto Rico komo studiante.
NAOC i NAAU, a kana e prosedura ofisial, kaminda a notifiká e atleta i a splik’é kiko ta su derechonan.
Un di su derechonan ta pa e hasi un otro tèst, kontra-ekspertise, ku e mònster di urina, B mònster, ku a wòrdu kolektá mesun fecha.
Goeloe a indiká, ku teniendo kuenta ku tur su derechonan ku e no ta bai hasi uso di esei, pa motibu ku en bèrdat el a usa e supstansia pa trata un leshon.

PIETERNELLA
Mr. drs. Lorenzo Guillermo
Mihó konosí komo Lou òf Piet
A laga atras su yunan Lorenzo i Joanis Pieternella, Carlin i Alan Boswell-Pieternella, Alexander Pieternella, Arjuna Pieternella, ñetunan Taylor Pieternella, Shekinah Glory-Boswell, eks partner Ivette Vivas-Hellburg. Akto di entiero ta djamars 3 yüni for di El señorial pa santana Veeris. Bishita 12or-3.30or. Promé ku entiero tin un sirbishi na El Señorial.

LOMP
Elvio Lourensio
A laga atras su yunan Edelbert Lomp i Jessica Jandroep, Armand i Evangleine Lomp, Reginaldo i Marisela Lomp, Margaretha Job-Lomp i Wilbert Job, Silvin i Joan Lomp. Akto di entiero ta djaluna 2 di yüni. Bishita 11or -3.20or na El Señorial i pa 3.30or pa santana Soto. Promé ku entiero tin un s.s. di misa.

EUSTACIA
Vaneza Anamarie (30 aña)
A laga atras su mayornan Ezikiel Eustacia, Ivette Eustacia-Schmidt, yu Aaliyah Vaes, partner Jo Vaes, ruman Urvin Eustacia, welanan Cecilia Salome, Mathilda Schmidt. Akto di entiero ta djarason 4 yüni saliendo for di El Consolador pa santana Sta. Maria. Bishita 1or-15.30or. promé ku entiero tin un s.s. di misa 4or na misa Buena Vista.

RIJKE
Marco Morcilio
Mihó konosí komo Cio òf Chi di Skalo (80 aña)
A laga atras su kasá Lelia Rijke-Sasso, yunan Noraima i Ludson Domacassé, Mariselle Rijke i Orlando Alexander, ñetunan Johnson i Marco Domacassé. Akto di entiero ta djadumingu 1 yüni for di El Consolador pa santana Sta. Maria. Promé ku entiero tin un s.s. di misa 4or na misa Sta. Maria.

Lorito ta yama tur hende un felis djabièrnè. Awe tabata un poko mas trankil, ke men nos no mester a bula djaki pa aya. Riba kaminda tambe kosnan tabata mustra mas trankil. Ban wak kon ta sigui! Manera Lorito a bisa ayera, kon ku bo bolt’é, kon ku bo bir’é, finalmente mester yega na un akuerdo.
*********
Lorito a komprondé, ku e sindikato PWFC ku ta representá trahadó na 13 kompania, lo kier pasa e akshon tambe pa e shofùrnan na Curoil. Ora nos a bai pensa bon, a resultá ku esei riba su mes no ta straño. Loke ta pasa ta, ku presidente di PWFC Elvis de Andrade tabata riba lista di PLKP pa e último elekshon. E promé riba lista ta Errol Cova ku ta konsehando STU. E sòm ta masha fásil! Ademas un hende a yama bisa nos ta kiko e trahadónan di CUROIL ta bai wèlga pa hasi? Nan ta esnan ku tin e mihó cao na Kòrsou!
*********
Ketu bai basta komentario riba e hechu ku PLKP no por keda kla ku un lider nobo. Nos a relatá kaba ku e mesun partido a bisa, ku tin 6 kandidato. Si bo tin 6 kandidato i tur 6 retirá si tin un problema masha serio. Awe Dori Maco tin un karikatura kampion riba e proseso di liderato den PLKP! Hopi bon!
*********
Nos a komprondé, ku Charles no solamente a gana 4 sifra i ku e lo kumpra un outo nobo. Pero Lorito a mira un hende riba laman i ora nos a bai wak bon, lugá tabata Charles. Charles a kumpra un boto tambe i unu di 17 pia. Lorito no a haña invitashon ainda pa bai nabegá ku Charles, pero nos tin sigur ku e invitashon ta na kaminda. Anto un bon konseho na Charles: buska un manera ku peso i mesora lo bo mustra mas hóben!

WILLEMSTAD – “Nos mester kuminsá prepará awe pa mañan nos por sobrebibí. Bèl a bati, ban bòltu tera!” E sei tabata e mensahe ku eks-promé minister Don Martina tabatin e siman aki relashoná ku e krísis di energia i di kuminda ku a bati na nos porta. Martina ta presidente di Fundashon TAS Bándabou. TAS ta para pa Tera, Awa, Simia.
Martina a splika prensa ku nos pueblo ta konfrontando múltiple difikultatnan pa motibu di e krísis energétiko i e krísis di alimentashon ku a toka porta di nos tur. “Fresku ta den nos memoria kon tabata reina skarsedat di diferente produkto di primera nesesidat na fin di aña pasá i prinsipio di e aña aki. Dramátikamente nos pueblo a keda konfrontá ku e grado grandi di vulnerabilidat di ta dependiente di importashon pa su kuminda di tur dia. E krísis reinante ta tantu un problema di preisnan eksorbitante haltu komo un problema di skarsedat i kompañá ku kostonan haltu di energia”, asina e eks-mandatario oriundo di Bándabou a bisa.
Martina a bisa ku den e rapòrt ‘Rising food prices’ di aprel 2008, Banko Mundial ta pronostiká ku preisnan lo sigui subi te ku aña 2015 i ku paisnan ku ta dependiente di importashon di nan kuminda i di kombustibel lo ta esnan ku lo ta víktima si riba nivel di gobernashon nashonal i internashonal no tuma e medidanan apropiá, na tempu i kompleto. Pero di otro banda tantu Banko Mundial komo FAO ta rekomendá pa konsiderá e krísis reinante di alimentashon komo un oportunidat pa duna agrikultura prioridat haltu. Mester tuma e pasonan nesesario, tantu riba nivel internashonal, regional, nashonal, lokal komo riba nivel doméstiko, pa garantisá ku e pueblo di ménos rekurso tambe por sigui alimentá su mes i su yunan na un manera responsabel i salú.

WILLEMSTAD - Un di e kosnan ku TAS ta kere ku por traha riba dje ta áwaseru. Anke awa no ta kai henter aña den forma konsistente, tin sufisiente áwaseru ku nos por fangu i reservá pa e periodonan ku no tin áwaseru, asina Don Martina a splika. El a bisa ku áwaseru ta e bendishon di Dios. Disponibilidat di awa, den kantidat sufisiente i di bon kalidat, ta un di e faktornan prinsipal ku ta determiná ku e proyekto ta logra òf ku e ta frakasá. Ta masha remarkabel ku nos ta skucha gritunan pa desaroyá energia di bientu, energia di solo, energia di awa di fondo di laman, pero nos no ta tende kasi nada tokante uso di áwaseru. Anualmente Kòrsou ta keda bendishoná ku un averahe di 500 mm di áwaseru. Si nos logra fangu maske ta 10% di loke ta kai riba nos isla, nos lo por igualá loke Aqualectra ta produsí pa aña. Ta bèrdat ku no ta tur dia, ni tur siman ni tur luna awa ta kai. Pero, e ta kai si, anto 500 mm pa aña. Meskos ku den turismo nos konosé low season i high season, i ku den high season ta generá sufisiente entrada pa sobrebibí den low season, meskos nos por trata áwaseru tambe. Pues nos por kolektá awa durante lunanan ku hopi áwaseru, pa superá e temporada di sekura. U’n ta esaki nos grandinan a hasi den pasado? No ta asina ku den Karibe, te dia djawe, ta fangu áwaseru? Hasta na Hulanda, ku un averahe di 800 mm pa aña, Gobièrnu ta hiba un maneho konsiente pa promové pa fangu áwaseru i ta supsidiá esnan ku instalá fasilidatnan pa fangu áwaseru, asina Martina a bisa.

WILLEMSTAD / CARACAS - E militar mas haltu den herarkia di Venezuela, general Muller Rojas, a bisa awe ku Venezuela no ke Antia. El a hasi su deklarashonnan den e revista Elsevier. “Nos mes tin sufisiente problema kaba pa atendé. 60 aña pasá Ulanda kier a duna nos e islanan pero nos no a aseptá esei. Nos no ke e islanan. Pero loke si tin nos masha preokupá ta ku Merka ta hasiendo maluso di e posishon stratégiko di e islanan”, asina Muller Rojas a bisa den un entrevista amplio ku e revista.

WILLEMSTAD – Informashonnan ku LA PRENSA a haña, ta hasi menshon di e intenshon pa dilanti di Postkantoor den Punda pone un estatua di Wilson “Papa” Godett ku a hunga un ròl asina instrumental dia 30 di mei 1969. Godett a enkabesá e movimentu obreril di e aña ei ku finalmente a kondusí na disturbionan violento den sentro di suidat. Tur aña di nobo ta rekordá e dia aki. E aña aki tambe esei lo ta e kaso awe tardi ku presentashon di orador di orden Ed Gumbs den e seremonia tradishonal di tur aña na Kaya Wilson “Papa” Godett.
Lider polítiko di Frente Obrero i yu di Wilson “Papa’ Godett, Anthony Godett a konfirmá pa LA PRENSA e siman aki, ku Kas di Kultura a proponé un estatua di Godett na e sitio. LA PRENSA a informá djasabra último, ku a kita e fontein i plaka ku Kámara di Komersio a pone na e sitio durante trabounan di remodelashon den Punda. Awor ta resultá ta di kon. Godett a bisa, ku aki no ta papia di un bustu (e parti ariba so), pero di un estatua kompleto. “Ta bon pa bisa, ku no ta nos fundashon (Fundashon Wilson “Papa” Godett) a pidi pa e estatua aki, pero ta un insiativa di Kas di Kultura”, asina Godett a bisa.
Komo diputado Godett a splika ku e asuntu a bin den diskushon den seno di Bestuurscollege ku a disidí pa pidi un konseho di Servisio di Edukashon i Kultura. Te djamars último ainda e konseho no a drenta despues di un luna. Di tur manera ta e intenshon pa anunsiá e estatua awe durante e seremonia. Si tur kos kana manera programá, lo desvelá e estatua dia 30 di mei 2009 na momentu ku konmemorá e di 40 aniversario. Riba e pregunta ken lo bai traha e estatua, Godett a bisa ku tin dos opshon awor aki. Un di nan ta un yu di Kòrsou bibá na Ulanda i e otro ta un kubano.

WILLEMSTAD – Polisnan na Ulanda ku no slag pa nan eksamen di tiru òf pa un otro prueba, mester entregá nan arma reglamentario. Esaki ta òrdu ku minister Guusje Ter Horst a duna, despues ku a sali na kla ku diferente polis ta kana rònt ku nan arma, miéntras nan no a slag pa tur nan eksamennan.
Segun informashon ku a sali publiká, no ta trata di arma di kandela so, sino tambe di klòp, bui i pepperspray, ku e polisnan lo tin ku entregá tanten ku nan no slag. Tin indikashon ku di un kantidat di 950 polis ku no a slag pa nan eksamen periódiko di tiru, un gran kantidat tòg ta kana rònt ku nan arma di kandela. Tin tambe alrededor di 275 polis ku no a slag pa otro pruebanan i di kua no ta konosí kuantu a keda ku nan armanan. E otro pruebanan ta entre otro instrukshon di violensia, ku ta indiká kon i ki ora tin ku usa bui, pepperspray i klòp.
Minister Ter Horst a eksigí di tur e hefenan di e 25 kuerponan di Ulanda, pa nan tuma e armanan mas lihé posibel. Ta konosí na Ulanda ku serka kasi tur e kuerponan, registrashon di armanan ku polisnan entregá, ta hopi defisiente. Pa e motibu akí no por bisa eksaktamente kuantu polis ta kana rònt sin ta kumpli ku e eksigensianan pa karga arma. E hefenan di e diferente kuerponan ta bisa ku mayoria arma ta entregá, pero nan no ta bon registrá. E problema di atministrashon akí lo ta eksistí hopi aña kaba.
Entretantu tin un kantidat di 1200 polis menshoná, ku lo ta kana rònt ku nan arma ounke ku nan a zak pa nan prueba di tiru. E kantidat di 1200 akí ta menshoná den e sifranan anual di polis di 2007. Un bosero di e Hunta di Alto komisarionan a bisa ku sigur no tin 1200 polis ku no ta kumpli ku e eksigensianan pa tin nan arma. Segun e bosero, e problema ta prinsipalmente e registrashon di e armanan entregá. Sin embargo e alto komisarionan ta komprondé, ku e minister ke pone tur kos na òrdu. Pa e motibu akí tambe e tòp di polis a aseptá e òrdu di e minister. E sifranan di mitar aña di Kuerpo Polisial ku no a sali publiká ainda ta indiká, ku entre tantu tin progreso den e registrashon di armanan entregá.

WILLEMSTAD - Subida di preis di gasolin ta poniendo un preshon riba hinter nos komunidat. E mas ferfelu di e situashon aki ta ku e preis haltu aki di kombustibel ta for di esfera di influensia di tur partido ku ta atendé ku suministro di kombustibel na Kòrsou. Den kaso spesífiko di Curoil mes, e preis haltu di kombustibel a hisa su gastu di kompra di e produkto drástikamente.
Konsiente di e preshon ku e oumento di preis riba merkado ta pone riba nos komunidat, Curoil ta kuminsá ku un kampaña pa konsientisá e komunidat kon usa e produktonan derivá for di petroli di un manera konsiente i asina kontrolá gastu.
Komo antesala di e kampaña, Curoil a kuminsá publiká artíkulonan den korant kompañá di grafik pa kompará preis di gasolin di otro paisnan ku esun di Kòrsou. Awor e kampaña ta kuminsá ku un splikashon simpel pa e konsumidó por komprondé kiko e ta paga p’e ora e yega un pòmp i kumpra gasolin. Meta pa duna e informashon aki ta pa hasi pa e konsumidó e preis di gasolin transparente.
Despues di e informashon transparente aki lo sigui informashon i tepnan di kon, usando su gasolin di un manera konsiente, e konsumidó por manehá su konsumo i konsekuentemente gastu di gasolin. Ku esaki Curoil komo un kompania di e komunidat, ta duna su kontribushon pa nos komunidat por ahustá mas tantu posibel na e preis haltu di gasolin ku nos huntu ku hinter mundu ta konfrontando aktualmente.

WILLEMSTAD - Dia 31 di mei 2008 Konseho di Konsulta di Antia Ulandes (Raad van Advies) ta rekordá e hecho ku 60 aña pasá e Konseho a ser instituí.
Den kuadro di e konmemorashon akí lo tin un eksposishon den Biblioteka Públiko di Kòrsou, situá na A.M. Chumaceiro Bulevar 17, entrante djabièrnè 30 di mei te ku djaweps 12 di yüni próksimo.
Apertura ofisial di e eksposishon lo ta na enkargo di sra. Myrtha Leetz-Cijntje, den su funshon di vise presidente di Konseho di Konsulta, dia 30 di mei pa 4or di atardi.
Durante e eksposishon lo duna informashon, via panel, tokante Konseho di Konsulta mes i tambe tokante e tareanan di e Konseho. Pòtrètnan aktual i históriko lo ilustrá e totalidat.
Lo duna ademas homenahe na defuntu mr. Carlos E. Dip mustrando den un sekuensia kronológiko, riba un panel, su bida i karera for di kua ta resaltá su balor komo eksperto den derecho estatal.
Komo e tema di e konmemorashon di e hubileo di 60 aña ta “Outonomia i Solidaridat”, lo duna informashon riba e tema akí tambe. Lo mustra algun dato i pòtrèt ku tin di haber ku e tópiko den un sekuensia kronológiko. Di e manera ei Konseho di Konsulta ke trata di stimulá un proseso di konsientisashon tokante “Outonomia i Solidaridat”.
Konseho di Konsulta pa medio di karta lo pone e direktivanan di skolnan avansá na Kòrsou i Universidat di Antia Ulandes na altura di e eksposishon i lo pidi nan pa informá nan alumno i studiantenan i stimulá nan pa nan bishitá e eksposishon.

WILLEMSTAD - Empleadonan di e organisashonnan di impuesto a bin huntu resientemente den un seshon pa krea mas e sentido di ta un tim komo parti di esfuersonan pa yega na un organisashon nobo di impuesto pa Kòrsou. E evento, ku tabata produkto di trabou di preparashon realisá pa e empleadonan mes, a resultá un éksito.
Stimulá pa kos di pasa boka prepará bou di guia di grupo di empleadonan mes i presentashonnan di koleganan di e organisashonnan, e empleadonan a tuma tempu pa sera konosí ku koleganan ku talbes no konosé, ku ta traha den otro organisashon di impuesto.
E sentido di operá komo un tim ta importante tambe pa loke ta trata organisashonnan ku ta perkurá pa entrada di gobièrnu. Esaki ta konta sigur si ta na kaminda pa yega na un organisashon nobo di impuesto pa Kòrsou kaminda funshonalidatnan lo wòrdu tresé huntu na bienestar di e servisio na esnan ku ta paga impuesto. E nesesidat aki pa mas funshonamentu komo un tim i e importansia di e trabou ku ta keda realisá pa e organisashon di impuesto a keda enfatisá tambe pa minister di Finansa, sra. Ersilia de Lannooy den su diskurso.
E empleadonan mes a hasi bon uso di e oportunidat pa den un ambiente ameno será mas ku otro. A hasi uso di e oportunidat aki tambe pa duna un apresio na empleadonan den e organisashonnan ku ta duna un aporte èkstra na e esfuersonan pa yega na un organisashon di impuesto nobo pa Kòrsou. Esnan ku a keda pone den lus ta Ingemar Sluis di Landsontvanger, Mereditch Martina di Inspectie, Wilhelmina Ralf di Stichting BAB, Robinson Ricardo di Eilandsontvanger i Edner Rafael di Duana.