ORANJESTAD- Aruba Scholarship Foundation lo tin beca disponibel pa aña scolar 2008 -2009. Tur studiante cu a gradua of cu ta graduando di VWO, HAVO, MAVO, EPI, etc., y ta pensa di sigui studia na un instituto di educacion superior, pero no na Hulanda, por pasa mas pronto posibel na Biblioteca Nacional na Madurostraat pa busca formularionan pa haci aplicacion pa un beca.
Por pidi formulario via email na clydeharms@setarnet.aw pero aplicacionnan NO por wordo someti pa email ni pa fax.
Pa di dos aña studiantenan cu kier sigui studia na Universidad di Aruba tambe por bin na consideracion. Studiantenan cu actualmente ta recibiendo beca di e ASF tambe mester aplica di nobo e aña aki!
Tur formulario mester wordo entrega na Sr. Hans Schnog, Toyota, Camacuri of na Sr. Clyde Harms, Jupiterstraat 6, Oranjestad.
En general, e aplicacionnan ta word considera a base di dos criteria:
1. E studiante mester comproba cu e mester di ayudo financiero.
2. E mester a demostra seriedad y capacidad den su estudio.
En cuanto necesidad financiero, cada candidato lo wordu considera riba su mes merito. Varios factor lo wordu tuma den cuenta. Por ehempel, cuanto e estudio ta bay costa; kiko ta e entrada realmente disponibel di e famia; cuanto jiu tin den famia; ki otro compromiso financiero e famia tin; disponibilidad di fondonan di otro fuente entre otro, prestamo di gobierno y otro factornan cu por ta gastonan extraordinario pa e famia.
E Foundation tambe ta tuma en cuenta kiko e candidato mes a haci pa yuda su situacion financiero.

ORANJESTAD - Fundacion Exposicion Herencia di Sclavitud ta desea di informa henter pueblo di Aruba cu Diadomingo awor, dia 4 di Mei e Exposicion di Herencia di Sclavitud lo ta habri desde 10:00 di mainta te cu 14:00. Pa dun’e un toke extra, diferente escritora local lo conta storianan di Compa Nanzi. Akinan ta sigui e programa di e dia ey:
10:00 porta ta habri
10:30 Señora Desiree Correa lo conta storia
11:30 Señora Olga Zaandam-Buckley lo conta storia
13:30 Señora Munye Oduber-Winklaar lo conta storia
14:00 Fin di Diadomingo cu Compa Nanzi

Asina ta, nos ta spera un y tur, grandi y chiquito pa bin pasa un paar di ora agradabel na Archivo Nacional di Aruba. Bin pasa wak e exposicion di Herencia di Sclavitud y alavez scucha storianan conta pa nos mes un escritoranan local.
Alaves nos ta desea di informa henter comunidad di Aruba cu e exposicion di Herencia di Sclavitud lo sigui te 1 di juli 2008 na Archivo Nacional Aruba, situa na Sabana Blanco 60 (ex edificio di WIMCO). Orario di e exposicion ta di Dialuna pa Diabierna di 8:00 – 16:30.
Tur prome diadomingo di luna e lo ta habri di 10:00 – 14:00. Entrada ta Awg. 3,- pa persona. Muchanan te cu 12 aña ta drenta gratis. Tur mucha/studiante cu bishita e exposicion den cuadro di su scol ta drenta gratis.
Un suplica ta bai na tur scol of grupo grandi pa contact fundacion, na number di telefon 583-4880, di antemano pa haci un cita, asina por controla e fluho di persona mas mihor.
Durante di e temporada cu e exposicion ta tumando lugar, lo ta bai tin diferente actividad na diferente otro lugar na Aruba.

ORANJESTAD- E lectura cu Fundacion Digna Lacle Herrera, e organisacion pa formacion politici di partido AVP, a tene tocante di e e efectonan di BBO, inflacion y solucionnan pa alivia peso di medidanan cu gobierno a introduci desde 2001, tabata un exito atrobe. Drs. Arjen Albertsz, experto economico y conocedo di economia y finansa publico di Aruba, a duna un splicacion di e introduccion di BBO y e efectonan negativo cu e tabata tin.
Di impuesto directo pa indirecto
E escogencia pa cambia nos sistema di impuesto di uno directo pa uno indirecto riba su mes ta algo bon. E ta crea un base mas grandi pa haya impuesto y e ta mas husto. Cobramento di impuesto directo manera impuesto riba salario (loonbelasting) y riba ganashi (winstbelasting) ta desincurasha esun cu ta traha pa gana su entrada. Un sistema di impuesto indirecto, por ehempel riba consumo y benta, ta percura pa tur hende paga belasting segun loke e usa, cumpra of bende. Di e forma aki tambe esnan cu awor aki no ta paga impuesto di entrada of ganashi, no por scapa, pasobra nan tambe ta usa of cumpra cos pa come, traha, construi, etc. Un otro efecto cu tin cu un sistema di impuesto riba consumo y benta, ta cu contrario na impuesto rina importacion (invoerrechten) tambe ta cobra impuesto riba servicionan. Invoerrechten ta impuesto riba producto so.
BBO ta e pio sistema cu tin
Di e splicacion duna door di sr. Albertsz a resulta bon cla cu di e sistemanan cu tin rond di mundo pa cobra impuesto riba consumo y servicio, gobierno di Aruba a scohe e sun mas malo. Esta e BBO cu ta impone un impuesto riba cada momento cu un producto wordo importa of bendi. Esaki ta causa un efecto acumulativo y pa colmo henter e acumulacion di impuesto aki ta wordo pasa pa e consumido cu ta e ultimo den e rij di cumprador. Un otro efecto ta cu ora a introduci e BBO, gobierno no a elimina e impuesto riba importacion (invoerechten). Door di e combinacion di BBO y impuesto riba importacion di productonan (y no riba servicionan), Bo a haya cu productonan ta someti na dobel impuesto: invoerrechten y BBO. Esaki ta inhusto compara cu servicionan. Tambe apesar di cu gobierno a haci como sifuera e ta duna bek na pueblo e placa di impuesto cu e lo cobra cu BBO dor di baha por ehempel e tarifa di impuesto riba salario (loonbelasting / inkomstenbelasting) y riba ganashi (winstbelasting), den realidad gobierno a cobra y haya mas entraga cu ela duna pueblo bek.

ORANJESTAD- Diadomingo awor tin un celebracion grandi na Plaza Betico Croes na ocasión di 50 aniversario di nos Diocesis. Nos a manda un mensahe di felicitacion na Mons. Secco, obispo di Willemstad. Y nos ta invita henter e pueblo di Aruba pa acudi masalmente diadomingo awor na e celebracion di diadomingo cu ta cuminza for di 5’or di atardi cu diferente actitividad na Plaza Betico Croes.
Pueblo di Aruba ta hopi agradecido cu danki na nos Diocesis nos a y ta sigui risibi e Evangelio. Nos cu ta den politica por sinja hopi di e tradicion spiritual cu nos Diocesis ta representa.
E ta sinja nos cu un bon politico ta traha pa e bienestar general y no pa su propio interes. E ta sinja nos cu un bon politico ta scucha semper su pueblo. Un bon politico no tin miedo di defende e berdad.
Un bon politico ta respeta su promesa electoral. Un bon politico tin credibilidad pasobra loke e bisa e ta hasi. Tur esaki ta e herencia spiritual cu nos Diocesis ta duna e mundo di politica.
Mi ta condena e expresionnan haci dor di nos Prome Minister en contra di Iglesia Catolica. Mi contrincantenan mester critica mi trabao como politico pero nan no mester critica Iglesia Catolica. Manera Mons. Secco a pone bon cla den un comunicado: mi no ta representa mas Iglesia Catolica. Iglesia Catolica como institucion ta un cos, mi trabao den politica ta otro cos. Mi a sinti algun tempo atrás cu mi por sirbi mi pais miho como politico. Mi mes a pidi dispensacion di mi funcion sacerdotal pa no confundi un cos cu otro. Mi a pidi dispensacion pa sirbi for di e ambito politico como un simpel cristian. Pa lealtad na Iglesia Catolico, pa mi amor pa Iglesia Catolica, mi no kier a confundi e dos papelnan aki. Iglesia Catolica no por ta mara na un opcion politico. Mi mes a pidi Mons. Secco pa mi no celebra misa den tempo di campanja electoral. Mi a laga mi posicion di clero pa sirbi mi pais como simpel cristian, den respet pa tur otro religion y iglesia y pa tur esnan cu no tin religion.

WILLEMSTAD – “Nos mester ban bèk na base”, asina pader Amado Römer a duna di konosé na okashon di Dia di Obrero.
Globalisashon ta pone ku tur kos regional i nashonal ta bira someté na loke ta globalisashon. El a pone ku ekonomia (petroli) ta bira problema pa henter mundu, pasobra nos tur ta mara na dje. Obreronan ku semper tabata afiliá ta pèrdè forsa. Henter e trènt ta ku papia di sèn, pero esaki no ta lo mas importante, asina pader Römer a enfatisá. Aki pa motibu di sèn nos a pèrdè e tiki di ekonomia ku nos tabatin ora Shell a bini i agrikultura a kai. E nifikashon di Dia di Obrero ta bisa ku nos ban bèk na loke trabou ta realmente, esta ku trabou ta mesun importante ku sèn. Awendia henter mundu trabou ta pèrdiendo forsa, pasobra hende no ta organisá nan mes manera ántes. Si trahadónan huntu no uni, no por forma un moketa pa e lucha. Lidernan tambe ta pasando den mesun kos poniendo atenshon na kosnan di ménos importansia. Influensia di credit union tambe a bai pèrdí. Sindikatonan no ta keda skuchá pa gobièrnu. Tin kos hopi mas importante ku ta famia, e persona. Ta inkreibel ku trahadónan di DCA ainda no por keda kla despues di 8 aña no a haña nan plaka, asina pader Römer a remarká riba un notisia di siman pasá. Ken a sali bai defendé e hendenan aki. Nan derechi ku nan tin esei ta importante. P’esei mester bai base bèk, ta bisa ku e hende ta sentral, pero esaki ta laga di deseá.

WILLEMSTAD - Den kuadro di selebrashon riba Dia di Obrero, gobernador di Antia, Frits Goedgedrag, a para ketu na e vishon riba un sosiedat hustu ku ta tema sentral di Beibel.
No t'asina ku Beibel i otro bukinan santu ta kontené un apelashon na nos pa pone den práktika hustisia, solidaridat i kompashon ku hende?
Konstruí un sosiedat hustu no ta kos ku bo ta hasi bo so. Esei ta rekerí sosten sosial i koperashon. Tambe - i kisas na promé lugá - di e partnernan sosial. Ta p'esei mi ta bolbe boga - mi a yega di hasié kaba na otro okashon - pa invertí den diálogo sosial, asina gobernador a enfatisá durante su diskurso. E ta esensial pa un desaroyo stabil i duradero di e pais aki. No ta trata den e kaso ei di progreso material so, pero tambe di aspektonan di bienestar sosial i un ambiente di bida di bon kalidat. Anto no ta trata aki solamente di e trahadó, ma di esnan sosialmente vulnerabel: esnan sin trabou, esnan enfermo, hende grandi-, hóbennan, etc.
Nos sosiedat ta para na bispu di kambionan sosial inmenso. E restrukturashon estatal proyektá por sierto tin konsekuensianan finansiero importante i pa e motibu ei tambe konsekuensianan sosial-ekonómiko. Awor aki i den e situashon nobo ei tambe e partnernan tin un tarea importante. E ora ei e representantenan di trahadónan i dunadónan di trabou mester traha den bon entendimentu na restrukturashon di e relashonnan sosial-ekonómiko. Denter di un diálogo sosial bon desaroyá e situashon nobo ei ta ofresé oportunidat- i perspektivanan pa tur nivel di nos komunidat.

SANTA CRUZ, Bolivia, - E region di Santa Cruz, ku ta konsentrá 30% di produkshon boliviano, mañan lo bai urna pa aprobá su statuto di Gobièrnu outónomo, un forma di konstitushon lokal, ku ta konfrontando Presidente di Bolivia Evo Morales, kende ta konsiderá e konsulta ilegal.
Bou di inisiativa di su lidernan polítiko i empresarial, opositornan fuerte di Presidente Morales, mas o ménos 935.000 cruceño mañan lo disidí si nan ta aprobá un statuto di outonomia di tendensia liberal.
E statuto aki ta duna outoridatnan departamental fakultatnan den materianan ekonómiko i polítiko, inkluyendo formashon di un kuerpo di polis propio, i ta laga pa e Estado solamente funshonnan di defensa i relashonnan eksterior.
Otro sinku region di e pais goberná pa opositornan i kendenan ta konfrontando proyekto di refundashon konstitushonal ku Morales ta impulsá, tambe ta di akuerdo ku e afan outonomista na Bolivia.
Enkuestanan e siman aki a revelá ku aprobashon di e statutonan ta entre 70 i 75% pa un votashon ku Gobièrnu tabata ke impidí i ku awor ta trata minimisá dor di kalifik’é solamente komo un konsulta.
Sekretario general di “Organización di Estados Americanos” (OEA), José Miguel Insulza, ayera a atvertí ku e konflikto entre Gobièrnu i algun departamento lo por kondusí na divishon di e pais.
“Niun hende ta tribi di bisa esaki, pero asina ta!”, Insulza a afirmá na Konseho Permanente di OEA, reuní pa analisá e kaso.

BEIJING - Tur e stadion nan mahestuoso miles di mion dollar invertí pa transformá Beijing den un suidat moderno a keda na di dos lugá pa motibu di e protestanan na fabor di Tibet. Un relevo di antorcha kaótiko rònt mundu i e indignashon di e chinesnan pa ku oksidente ya ku nan magno evento a wòrdu trapá.
Faltando 100 dia pa inougurashon, mantené polítiko leu for di Weganan Olímpiko ta parse un kousa pèrdí.
Un aña pasá, e eks presidente di KOI, Juan Antonio Samaranch a bisa, ku e weganan di Beijing lo ta esun di mas mihó den historia. Su susesor, Jacques Rogge, a lamentá ku e weganan ta den un krísis.
Esaki no ta promé biaha ku polítika ta interferí ku Weganan Olímpiko, pero e aña aki a resultá esnan ku mas konflikto for di e bòikòtnan di dékada 80.
"Outoridatnan chines tin nan mannan yen ku un problema serio di relashonnan públiko," asina un eksperto a bisa.
E dianan aki tin un ambiente negativo na Beijing. Un ola di disturbio luna pasá na Tibet a provoká manifestashonnan anti China na London, Paris, San Fransisco i otro suidatnan unda e antorcha olímpiko a hasi su rekorido.
E trayekto tabata mas bien un farse pa e kantidat di kambio na último ora di e ruta ku invitashon spesial pa evitá protestanan.
E bèrdat ta, ku polítika a hasi su mes presente for di momentu ku China a risibí sede shete aña pasá.

MANCHESTER - E kampion di Europa e aña aki lo ta un ekipo ingles sea ta Manchester United òf Chelsea. E diabelnan kòrá a avansá pa e final djamars ku un viktoria di 1-0 riba Barcelona di Frank Rijkaard. E úniko gol di wega a wòrdu anotá pa Paul Scholes. E promé wega entre e dos ekiponan aki a finalisá den un empate sin gol.
Den e wega di ayera entre Liverpool i Chelsea, e ganadó a resultá Chelsea ku skor di 3-2 den tempu èkstra.
Manchester i Chelsea lo disputá e título dia 21 di mei na Mosku. Esaki ta e di tres biaha den nan historia ku Manchester United a klasifiká pa e final di Liga di Kampion i promé biaha for di 1999 ora ku nan a bira kampion ku un viktoria di 2-1 riba Bayern Munich. Na 1968 tambe Manchester a gana e kopa kontra di Benfika.
Pa Chelsea esaki ta pa promé biaha ku nan ta hunga den e final di Liga di Kampion den nan historia.
"Loke ta importante ta ku nos ta den final i no ta importá kon nos a hunga," asina e tékniko di Manchester United, Ferguson a bisa. "Nos tabatin mester di un gran aktuashon i nos a logra. Nos por a anotá tres pa kuater gol. Scholes, a anotá na di 14 minüt di wega.
Pa Barcelona esaki por nifiká un fin di un era, ya ku e kopa aki tabata e último trofeo ku e ekipo tabata aspirá pe ainda pa e temporada aki.
Un ekipo ku figuranan manera Lionel Messi, Samuel Eto'o i Deco ta tèrminá e temporada aki ku man bashí i hopi ta kere ku e tékniko ulandes, Frank Rijkaard lo no regresá pa próksimo temporada. E mes a deskartá e posibilidat di renunsiá.

SAN SALVADOR - E direktor tékniko di e selekshon di El Salvador, e mèksikano, Carlos De Los Cobos ta spera ku pronto nashonalisashon di e futbolista hondureño, William Reyes ta keda kla, ya e por hunga den e eliminatorio di Concacaf pa Mundial 2010 kontra di Panamá.
"William Reyes ta un hungadó ku sa kiko e ke i e portanan di e selekshon ta habrí pe," asina Cobos a bisa di Reyes ku e siman aki a kuminsá e proseso di naturalisashon.
Reyes ta enkantá ku e posibilidat di hunga pa e selekshon di El Salvador. Reyes ta e máksimo goliadó di e torneo lokal ku 10 gol.
El a solisitá pa e federashon di futbòl aselerá e proseso pa por hunga kontra di Panamá dia 15 i 22 di yüni.
"Mi ta kontentu di tin kasi tur papel. Ya mi tin ocho aña ta biba akinan i mi ta spera di por aportá mas na e futbòl nashonal.
De Los Cobos tin komo ophetivo pa laga El Salvador klasifiká pa di tres okashon pa un mundial di futbòl despues di Mexico 1970 i Spaña 1982.

LONDRES - Zenit di St. Petersburg, un ekipo ku poko historia, a logra yega final di Kopa UEFA ku un viktoria humiyante di 4-0 riba Bayern Munich.
Den final Zenit lo topa ku e ekipo eskoses, Rangers ku a avansá pa final ganando Fiorentina 4-2 den pinalti. E final lo ta 14 di mei.
Bayern tabata e gran faborito pa bai ku e título ku nan a gana tambe na 1996. E ekipo aleman tin kuater korona di Liga di Kampion, pero e biaha aki a bin topa nan superior den Zenit. Tabata e despedida tambe di e gran arkero aleman, Oliver Kahn ku ta retirá despues di e temporada aki.
Rangers solamente a gana un título europeo i esei ta e Rekopa di 1972.
Zenit ta apénas e di dos ekipo ruso pa ta yega un final di Kopa UEFA, ya ku CSKA Moscú a bira kampion na 2005.

WILLEMSTAD - Presidente di Sentral di Sindikatonan di Kòrsou SSK, alabes presidente di Plataforma Sindikal Alcides Cova a boga pa parlamentu di Antia pasa vários lei laboral ku tin añanan largu drumi den lachi i ku ta na benefisio di e klase trahadó.
“Nos ke hasi un yamamentu urgente riba parlamentu di Antia pa pasa e leinan aki di manera ku trahadónan no mester bira víktima kada biaha di nobo di práktikanan di mala fe di doñonan di trabou”, asina Cova a bisa den su diskurso na okashon di selebrashon di Dia di Obrero dia 1 di mei último.
Kontrali na añanan anterior, e biaha aki e santu sakrifisio di misa ku semper ta tuma lugá promé ku e marcha di trahadó, no a tuma lugá parti mainta, pero 5’or di atardi i no na Sta. Famia, pero Basílika Sta. Ana.
Cova, den un splikashon pa esaki a bisa, ku eksperensia a mustra ku e trahadó den hopi kaso no ta masha inkliná pa sali kas mainta tempran pa asistí na un konmemorashon asin’aki.
Mester bisa, ku e marcha ku tradishonalmente a bin ta sali for di misa di Sta. Famia pa bai direkshon di e busto di Felix Chacuto, último añanan aki en bèrdat tabata basta marginá: no tabatin masha trahadó ku a mustra nan kara riba e mainta ei.
Bo ta tende tur sorto di argumento, manera ta un dia liber pa sosegá, ta un dia pa pasa ku famia i asta tin ta konsiderá ku ta un dia pa festehá mas tantu posibel.
Ta pa e motibu ei nos a kambia e orario, segun Cova a splika.

WILLEMSTAD - Despues di Victor Monk ku a bringa su kaso ku éksito den Korte, awor ta sra. Barrientos, funshonario di Bureau Ziektekostenvoorzieningen ku a disidí di hiba BZV Korte, pa eksigí pa restablesé den su funshon na e fundashon.
Esaki lo bira tambe e di dos kaso kontra e fundashon durante último lunanan, un fundashon ku ta meimei di un proseso di reorganisashon.
E kaso di Victor Monk ya ta konosí. Despues ku e konsultent di mr. Dennis Evertsz a drenta BZV ku e enkargo pa reorganisá e entidat aki i den e kuadro ei, a pone tres funshonario riba non aktif. Ta trata di Monk, Sanders i Barrientos. Victor Monk, ku no tin e nombramentu ofisial komo direktor, pero kende tabata fungi pa basta tempu kaba komo direktor interino, no a aseptá e desishon aki i a bai Korte ku su kaso.
Korte algun siman pasá a duna Monk rason: BZV a ser instruí pa tuma Monk bèk den servisio den forma inmediato, loke a sosodé tambe.
Direktiva di BZV sinembargo a disidí ku nan ta apelá e sentensia aki. E kaso di apelashon mester bin dilanti ainda.
E kaso di sra. Barrientos ta algu diferente. Ta trata di e funshonario ku tabata fungi komo dòkter i kende tabata evaluá e kasonan di klientenan ku mester bai eksterior pa haña kuido médiko mas spesialisá.
A resultá ku e señora aki no ta disponé di e papelnan nesesario pa fungi komo tal. E deskubrimentu aki a tuma lugá promé ku e konsultent a drenta BZV. E tempu ei a ofresé e señora un otro funshon i a adaptá su salario.

WILLEMSTAD - Mi no a haña niun argumento bálido ainda, di kon no por kambia e lei riba impuesto di ganashi. Lo mi papia e asuntu aki ku presidente di International Financial Group, asina sekretario di Estado Alex Rosaria a konfirmá e siman aki.
Pa basta dia kaba tin un diskushon andando riba e asuntu aki. Antia mester adaptá su lei riba impuesto di ganashi, den kuadro di reglanan internashonal ku ta vigente awor aki.
Na Kòrsou tin dos grupo ku ta representá sektor finansiero internashonal, ku ta Curaçao International Financial Association (CIFA) i International Financial Group (IFG). Si di un banda CIFA a indiká ku e no tin niun problema ku e kambio ku gobièrnu ta proponé pa e lei di impuesto internashonal, IFG di su parti no ta di akuerdo ku esaki.
Sekretario di Estado, Alex Rosaria a bisa ku te ainda sinembargo, e no a tende un argumento bálido pakiko no por mishi ku e lei riba impuesto di ganashi.
El a anunsiá ku próksimamente e lo ta na Ulanda pa un bishita di trabou i e lo probechá papia ku presidente di IFG riba e asuntu aki.

WILLEMSTAD – “Parlamentario Dwigno Puriel di frakshon di MAN den Staten ke sa ta kiko ta pasando internamente na Meldpunt Ongebruikelijke Transacties, MOT. E informashon ku nos frakshon a haña ta indiká ku lo tin problemanan interno ku ta afektando funshonamentu tambe di e entidat aki”, asina Puriel a splika.
MOT ta e sentro kaminda entidatnan finansiero por mèldu kualke transakshon straño i/òf dudoso ku nan haña nan konfrontá kuné. Si ántes MOT tabata dirigí spesífikamente riba banko i entidatnan finansiero so, awendia a keda probá ku transakshonnan dudoso por tuma lugá na kualke establesimentu komersial.
Esei mes ta motibu ku resientemente minister di Finansa a anunsiá ku ta intenshon di inkorporá mas establesimentu komersial den e lei aki. Un di e entidatnan ku – pa straño ku e por zona – no tabata kai bou di e lei aki ta kasinonan. Ta intenshon pa hinka nan tambe den e lei ku ta reglamentá funshonamentu di MOT.
MOT aktualmente ta bou di direkshon di Kenneth Dambruck.
Segun Dwigno Puriel, último tempu tabatin basta publikashon ku a duna e impreshon ku ke krea un imágen hopi positivo di MOT. Di otro banda, asina el a señalá, por a tende otro sonidonan ta sali, anto di hendenan ku ta hopi pega ku e organisashon.
Nos ke sa kiko ta kiko i p’esei nos ke un reunion ku komishon fiho di Finansa di parlamentu antiano, ta loke Puriel ta skibi den su karta.
Puriel ta mustra ku ta importante pa Staten ta na altura tur momentu kiko ta pasando den un entidat importante asin’aki.

WILLEMSTAD - Kòrsou por bien lubidá e asuntu di preis preferenshal pa petroli. Presidente di Venezuela a yega di bisa ku miéntras tin un base militar merikano na Kòrsou, no tin kuestion di preis preferenshal. Ta kiko Kòrsou ke, krudo barata pa traha kombustibel pa mañan bombardiá mi mes kuné? Loke nos mester a hasi ta probechá di e oferta ku Cuba a hasi nos.
Esei ta alegashon di miembro di Konseho Insular Nelson Pierre den su intervenshon durante e reunion públiko pa atendé e krísis energétiko ku ta afektando nos pais tambe seriamente.
Partidonan di oposishon – ku ta esnan ku a pidi e reunion – tabata ke sa kiko gobièrnu ta bai hasi pa aliviá pueblo di e oumento konstante ku nos pais a bin ta konosé di preis di energia.
“E problema”, asina kasi tur miembro di Konseho Insular a menshoná, “ta un problema ku karakter internashonal, pero mester tin medida ku por tuma pa en todo kaso trese alivio riba término kòrtiku pa komunidat. E reunion tabatin komo tema sentral e oumento di preis di energia den nos pais”.
Den su disertashon, Nelson Pierre a mustra, ku preis di petroli ta vulnerabel na e kosnan ku kisas ménos hende ta pensa. El a referí na desaroyonan ku ta tumando lugá na Venezuela, Ecuador, Paraguay, Bolivia, Argentina i Brazil pa ilustrá kon sensitivo preis di petroli ta riba merkado mundial.
Un di e kosnan ku a bin dilanti durante e reunion tabata e trabou ku e Komishon di Energia a hasi. Manera tabata konosí kaba, hopi ta konsiderá ku e rekomendashonnan ku e komishon a produsí no ta representá un alternativa berdadero.

WILLEMSTAD – “Kòrsou mester kuminsá pensa seriamente pa kana su kaminda di kambio estatal, los for di St. Maarten.
Si unabes St. Maarten ta parse di no ke aseptá kondishonnan ku Ulanda ta imponiendo den kuadro di e supervishon finansiero, nos ta pèrdiendo tempu balioso”. Esei, tantu diputado di Struktura Estatal Zita Jesus-Leito i diputado di Finansa Mike Willem a enfatisá.
E trayekto estatal manera ya ta ampliamente konosí, no ta kanando segun deseo di hopi hende. E trabounan ku mester hasi ta hopi, pero aparte di esei, tin hende ta preokupá pa e rumbo ku e desaroyo ta bai.
Kòrsou i St. Maarten, tur dos islanan ku den futuro lo haña e status di pais outónomo den Reino, lo bai traha huntu riba diferente tereno.
No ta tur hende, ta mes kontentu ku e desaroyo aki.
Por a tende ku sierto insistensia, ku e desaroyo aki, impulsá pa un gran parti pa Ulanda, lo kondená e dos islanan aki atrobe na otro, siendo ku ta hustamente mas outonomia Kòrsou ta deseá.
Un di e áreanan ku Kòrsou i St. Maarten lo mester bai traha huntu, ta e idea di un solo banko sentral pa tur dos isla.
Mester bisa, ku no tabatin masha progreso den e deliberashonnan te ku awor entre St. Maarten i Kòrsou, loke por sierto a pone diputado di Struktura Estatal Sarah Wescot-Williams kuestioná tambe e futuro koperashon aki. St. Maarten asta ta dispuesto kaba pa bai riba su mes, adoptando dollar komo su moneda di pago ofishal.
“Si den e dianan benidero nos no logra haña otro, mi tambe ta kere ku e mihó kos ta pa nos sigui kana riba nos mes, pa nos por finalisá nos trabounan”, di akuerdo ku diputado Zita Jesus-Leito.

EVERTSZ
Juan Miguel Gregorio
A laga atras Lucina da Costa Gomez-Matheeuws, yunan Dennis Earl i Rosalba Evertsz-Bonifacio, Kenneth Paul i Annie Evertsz-Achthoven i nan yunan, rumannan Ana Maria Evertsz, Domingo i Angelica Evertsz-Saleh, Zelma Evertsz-Thielman, Amelia Monsanto-Evertsz. Akto di entiero ta djadumingu 4 mei 9or-11or na Krematorio, den seno familiar.

MARTIS-FELOMINA
Sotera
Mihó konosí komo Cancan
A laga atras su yunan Aida, Beatrix, Milva Felomina, Veronica Zimmerman. Akto di entiero ta wòrdu anunsiá despues

ARVELO
Elvira Serafina
Mihó konosí komo Bila
A laga atras su ruman Idelgo Arvelo, subrino(a)nan Sandra, Sharon, Philip, John, Carol, Marylla Granville-Kirchner, Caresse Victoria-Kirchner, Nydia Hato Arvelo i demas subrino(a)nan. Akto di entiero ta djaluna 5 mei for di El Señorial pa santana Roodeweg. Bishita 12or.

DELIMA-CASIMIRI
Mathilda Ursulita (96 aña)
Mihó konosí komo Ula
A laga atras su ruman Rogelia Leverock-Fraai, primu Luis Enrique Fraai, sua Pedro Maduro, subrino(a)nan Nilva Pengel, Luisaminta Roosburg-Kip, Julieta Samson-Fraai, Edward, Ottmar, Clayver Fraai i rumannan, Hedwiges, Franklin, Edna Casimiri i rumannan i demas subrino(a)nan. Akto di entiero ta djaluna 5 di mei 4or for di Bottelier pa santana Bottelier. Bishita 1or. Promé ku entiero tin un seremonia 3.30or.

MATHILDA-WLATER
Maria Josefa
Mihó konosí komo Ia
A laga atras su yunan Meredith Mathilda i Herman Cornet, Ruthmila Mathilda, Glenda i Etienne Doran-mathilda, Humphry i Emi Mathilda-Valdez, Marièla Mathilda, ñetu/yu Suejen i Mitchel Espacia-Martina. Akto di entiero ta djamars 6 di mei for di El Tributo pa santana Bottelier. Bishita 12.30or. 3.30or tin un sirbishi di despedida.

WILLEMSTAD - Teatro Luna Blou a firma awe mainta un kontrato ku Stichting Antilliaanse Medefinancieringsorganisatie (AMFO) pa finansiamentu di ehekushon di e ‘Proyekto edukashon kultural 2008’, pa e suma di 260.734 florin. Ku e suma aki e fundashon por traha durante un aña largu na formashon i edukashon di hóbennan na Kòrsou, pa medio di arte i teatro. E proyekto aki ta keda realisá den koperashon ku tayer di teatro hubenil Luna Yen di La Tentashon.
E hóbennan ku ta partisipá na e proyekto aki ta siña produsí obranan di teatro. Na final di e periodo, nan ta produsí seis obra teatral ku nan mes lo presentá na públiko.

WILLEMSTAD – Sigur e International Food Festival mas grandi di historia ta loke e organisadónan por ta kontentu, tantu na partisipashon komo bishitantenan. Ku un asistensia rèkòrt di bishitante a hasi ku e aña aki sin duda e organisadónan di International Food Festival 2008 por ta orguyoso di dje. For di simannan adelantá ya ta konosí ku un interes grandi tabata biba bou di partisipantenan ku a reservá nan stèntnan, pa di e manera ei por a hasi ku e dianan di fiesta tabata dianan kolorido. Un variedat grandi di platonan nashonal a keda presentá huntu ku demostrashon di produktonan pa bende. Tambe espektákulo di moda i espektákulonan musikal konhuntamente ku weganan pa mucha ta loke International Food Festival 2008 a presentá. E kombinashon di fotonan ta ilustrá e ambiente ku a keda formá na Rust en Burgh.