ORANJESTAD- Durante un atardi masha ameno riba Dia di Obrero na Curacao na cas di Hildegard Pang-Hintz, kende tambe ta forma parti di directiva Asociacion Aruba Dushi Tera, sra. Judith Martha como representante di UNOCA, a haci entrega di e buki "Companashi" di sr. E. Rosenstand, na sra. Hildegard como aprecio cu e tambe tabata un di e "muchanan di Companashi".
Durante e encuentro aki hopi recuerdonan a wordo entercambia como cu sra Judith tambe tabata di "Companashi". Asociacion Aruba Dushi Tera a keda masha contento cu e gesto haci pa UNOCA na un di su miembronan di directiva. Pa culminacion di e atardi aki sr Mauricio Wever a sorprende tur presente cu un cocktail di coecoei inventá pa su persona mes.

ORANJESTAD- Na 2005 Europa a organisa e prome dia grandi pa concientisa hende di e malesa aki cu yama "stroke"of atake cerebral!Un gran cantidad di hospital y instancia cu ta cuida e patientnan a organisa un of otro actividad den forma di workshops y/of anochinan di informacion tocante e malesa stroke cerebral.Nan a hacie den forma di control di presion,colesterol y sucu den sanger!
Despues di e prome intento mas hospital y demas centronan di salud a mustra hopi interes pa nan tambe organisa actividadnan riba e dia importante aki cu ta dia 10 di mei!!E "stroke awareness day"
Aki na Aruba CVA Aruba cu ta e fundacion cu a lanta pa e patientnan cu a sufri un atake cerebral pero tambe pa nan cuidadornan,tambe ta organisa un actividad pa traha riba concientisacion di e pueblo.E malesa aki ta aumentando den forma drastico na Aruba tambe!
Nos tin un tremendo "funwalk" riba dia 10 di mei saliendo pa 17.00 for di ex-Hotel Bushiri y caba bek na e lugar aki.CVa lo haya coperacion di Idefre pa cu e ruta y e distancia cu ta 5 kilometer.
Nos ta desea di mira mas tanto famia bin cana cu patientnan cu lo por cu e distancia y cu no tin otro impedimento.Nos ta pidi un contribucion di fls.5 pa nos recauda fondo pa un projecto grandi den luna di juni!Por insribi y cumpra kaarchi na tur miembro di CVA Aruba pero por inscribi di antemano via telefonnan:5824987 Idefre,5853325 Ronny y 5677004 Hellen.
Dia di e funwalk por inscribi tambe for di 16.00 prome cu salida!
Nos lo tin asistencia di e grupo di Aruban Medical Assistance tambe cu lo cana hunto cu nos!

Aruba Scholarship Foundation orguyosamente ta anuncia:

ORANJESTAD- Aruba Scholarship a ricibi e grata noticia cu Dianne Vrolijk, un di su becadonan, a gradua Summa Cum Laude di Seminole Community College na Oviedo, Florida. Dianne a logra di completa su dos añanan na Seminole cu GPA perfecto di 4.0.
Dianne a gradua na aña 2001 di HAVO na Colegio Arubano. Pa yuda su famia y pa spar pa sigui studia, Dianne a traha 5 aña prome cu el a aplica pa un beca di Aruba Scholarship Foundation. Aruba Scholaship Foundation tabatin problema cu Dianne su aplicacion pasobra e tabata un studiante cu berdaderamente tabatin mester di mas ayudo cu nos por a duna.
Danki Dios, Valero Scholarship Foundation tambe a yuda Dianne y awe Aruba por ta orguyoso di un jiu cu a saca cara na Florida di un manera excepcional.
Dianne a aplica pa sigui su educacion na University of Central Florida. Cu su logro na Seminole nos ta sigur cu e lo wordo acepta. Di nos parti, nos ta recomenda Dianne pa participa den e Latin America/Caribbean (LAC) Scholarship program loke ta bay reduci su gastonan di educacion cu mas di 14 mil dollar pa aña. Dianne su Major ta Business Administration.
Dianne ta jiu di Thomas y Marjorie Vrolijk di Piedra Plat 87. Dianne ta e prome miembro di su famia cu a bay studia na un college. Aruba Scholarship Foundation ta felicita Dianne y su mayornan pa e tremendo logro aki y nos ta desea Dianne hopi exito na UCF. Nos ta contento y orguyoso di por sigui contribui na realizacion di su soñonan.

Tratando na haci un balansa di welga
Jiunan a wordo perhudica severamente

ORANJESTAD- Gobierno di MEP ta mustra den un comunicado di prensa, cu den e balansa cu gobierno di MEP a haci relaciona cu e welga di trahadornan publico, ta uno negativo pa loke ta trata educacion aki na Aruba.
“Awor cu tin un grupo di maestro liga cu AVP, RED y MPA a huelga mas cu 5 siman largo lagando nos yiunan sin por a haña les, a yega e momento pa traha un balanza. Cu nos enseñansa tabata tin resultadonan cu ta laga di desea tabata conoci caba, unda anualmente un gran cantidad di mucha ta keda sinta, no ta slaag, ta kita for di school etc., unda tur e placa cu gobierno y e mayornan a hinca aden practicamente a bay perdi.
No solamente e dolornan cu e ta trece cu ne pa e alumnonan, pero tambe e influencia cu esaki tin ariba futuro di e mucha, cu ora e fracasa na caminda e ta mira su futuro tambe na peliger y logicamente hopi biaha e ta bay reacciona negativamente ariba e comunidad. E consecuencia ta cu e joven aki lo por bira un persona problematico pa su hendenan y su vecindario.
Nos por bisa cu un profesion pa bira maestro ta un vocacion di Dios, di hendenan cu hopi amor pa e muchanan, pasenshi, tolerancia y dedicacion pa educa muchanan pa nan por ser bon ciudadano mañan. Si bo mira cuanto placa gobierno cu placa di e pagador di belasting – a base di prioridadnan - ta hinca den enseñanza, nos mester admiti cu e ta hopi pero no suficiente ainda.
Nos mester admiti cu e amor pa nos muchanan a mengua hopi desde cu frère- y soeurnan a bay for di Aruba y nos a cuminsa Arubanisa nos enseñanza cu tur e consecuencianan pa dominio di e idioma Hulandes na nos schoolnan, cu ta di yora mes y ta un estorbo grandi, mirando e resultadonan pober.

WILLEMSTAD - Presidente di Parlamento Antiano a keda sumamente asombrá pa e posishon di miembro di VVD i presidente di komishon pa Asuntunan Antiano i Arubano Willibrod Van Beek, kende no ta kere ku ta nesesario pa bini ku reglanan di kondukta pa e kontakto interparlamentario den Reino. Van Beek ta kere ku esaki ta kontra ekspreshon liber di opinion.
E posishon aki ta sumamente straño konsiderando ku tur parlamentonan den Reino, esta di Antia, Aruba i Ulanda mes ya pa dékadanan ta apliká reglamentu di Òrdu pa ku kondukta, asina el a duna di konosé na LA PRENSA. Si t’asina, anto Tweede Kamer mes a violá su mes reglanan. Ekspreshon liber tambe tin su límitenan i si su koleganan ulandes no bai di akuerdo pa bini regla, lo no tin mas konsulta di Parlamentonan den Reino, asina Atacho a enfatisá. Si no tin regla ta bini libertinahe, un situashon insivilisá i no por pèrmití esaki entre parlamentarionan den Reino.
Pedro Atacho i su koleganan antiano i arubano kier pa bini reglanan di kondukta pa e reino interparlamentario. Esaki despues di un insidente inapropiá na luna di yanüari kaminda e miembro di PVV Hero Brinkman a yama polítikonan un nèshi di korupto i a ninga di pidi despensa. Konsekuentemente a prohibié entrada den edifisio di Parlamento.
Atacho no ta kere ku si e reunionnan para, esaki lo tin konsekuensia pa relashonnan den reino i sigur no pa proseso di struktura estatal, ya ku esaki mester keda atendé ku teritorionan insular, kaminda Gobièrnu Sentral tin un ròl di fasilitador. Si e reunion para ta lamentabel, pero lo no tolerá e kondukta aki mas.

WILLEMSTAD - E kompania venezolano di petrolio PDVSA a skor abou riba tereno di transparensia. Esaki di akuerdo ku e relato 2008 Report on Revenue Transparency of Oil and Gas Companies ku a evaluá 42 kompanianan prinsipal nashonal i internashonal di gas i petrolio operando den 21 pais, basá riba transparensia di nan relatonan, partikularmente pagonan hasí na gobièrnu. Awendia 60% di hendenan mas pober di mundu ta biba den paisnan riku na rekursonan natural. Mayoria konstitushonnan ta duna siudadanonan poder apsoluto di e pais su rekursonan natural. Sinembargo, mayoria dato di loke kompanianan ta paga pa eksplotá e rekursonan aki i kon ta gasta e plaka aki no ta keda publiká pa públiko skrutina. E resultadonan di e relato ta bisa, ku mayoria kompania evaluá no ta duna sufisiente informashon riba pagonan kaminda nan ta operá.
Un kantidat limitá di kompania ta duna informashon di pagonan, demostrando ku esaki ta posibel. Orígen di e relato ta sinta den movementu global pa kombatí ‘maldishon di rekurso’ 1. Petrolio i gas ta generá hopi rikesa, pero si esaki keda manehá defisientemente e ganashinan por mina kresementu ekonómiko, krea insentivonan pa aktividatnan di hür, trese korupshon den sektornan públiko i privá i hasta konflikto. E pobresa, instabilidat i regla di lei defisiente no ta solamente malu pa hendenan lokal, pero tambe por daña reputashon di e kompania i generá ménos ganashi pa invershonistanan.
Por lo general no por bisa ku PDVSA ta transparente. E relato ta bisa, ku Venezuela ta un eksepshon den paisnan rondó di dje kaminda datonan di kompanianan di estado si ta keda publiká. Kousa di esaki ta falta di regulashon. Venezuela mester amplia su disponibilidat pa duna informashon. Ta importante pa PDVSA duna informashon ku por keda investigá públikamente.

WILLEMSTAD - Den e wikènt di 2, 3 i 4 di mei 2008 Sedreko den koperashon ku Curaçao Chess Players Foundation a organisá pa promé biaha un “All Star Tournament” pa ahedresistanan den Sentro di Bario Janwe.
E “All Star Tournament” ta un torneo di sinku buèlta segun e sistema Suisa ku lo wòrdu organisá un biaha pa aña.
E interes pa e torneo di Ahedres aki tabata grandi no solamente aki na Curaçao, pero tambe na Boneiru i prinsipalmente Aruba ku tabata bon representá.
E kantidat di partisipantenan tabata haltu tantu den e Grupo Hubenil komo den e Grupo Habrí, lokual sigur a kontribuí na e éksito di e torneo.
Den e Grupo Habrí e bataya tabata hopi fuerte, debí ku mas ku binti partisipante a inskribí i wesu durunan a bin prepará pa bati kabes.
E aktual kampion di Ahedres di Antias, Jimmy Izijk a resultá ganadó apsoluto den e Grupo Habrí, pero ku un bentaha di apénas mei punto di diferensia.
Den Grupo Hubenil tabata Poulo Meyer ku a resultá e ganadó. Poulo Meyer ta un hóben prometedor di apénas 9 aña ku a gana tantu den Kategoria di 6 pa 9 aña komo tambe den grupo di Grupo Hubenil Overall.
E torneo aki sigur tabata un bon preparashon pa e International Chess Festival 2008 ku lo tuma lugá den luna di yüli próksimo.
Un danki spesial ta bai na e spònsernan Sedreko, Coca Cola i DAE ku a koperá ku Curaçao Chess Players Foundation pa hasi e “All Star Tournament” posibel.

WILLEMSTAD- A drenta e luna kaminda Kòrsou lo keda galadorná ku un bankete di torneo di futbòl.
Dianan 21 i 24 di mei awor e di dos edishon di Chippie Polar Cup ta bai tuma lugá den Stadion Ergilio Hato.
Lo tin partisipashon di 4 ekipo fuerte kualnan ta F.C. Groningen, Selekshon di Sürnam, Flamengo Esporte Clube di Brazil i e selekshon Antiano.
Despues di e tremendo dia kaminda hopi hende a probechá di e ganga pa kumpra nan karchi bou di dak pa 25 florin, awor tur preis ta original atrobe. Esta awor tin karchinan di 30 florin i karchinan patras di gol ku ta kosta 20 florin. Bou di dak enfrente di Tribuna di Onor ta kosta 30 florin pa persona. P’e sekshon di VIP e karchinan lòs pa kada dia lo kosta 150 florin, miéntras ku pakete pa tantu 21 komo 24 di mei ta solamente 250 florin. Den kaso di e karchinan di VIP esakinan lo ta optenibel solamente via di sra. Mijanou Bolivar na number di telefon 5691969.
Karchinan pa e tremendo kuadrangular aki ta optenibel na Boekhandel Mensing Caminada, Beep Beep Rio Canario, Beep Beep Brievengat, Koko Loko Punda, Koko Loko Brievengat, Tik Tak, SDK, Kusters Trading, Albert Heijn Supermarket, Wereld Stage i 4th of July Snack na Barber.
E selekshon di Antia Ulandes ku lo subi tereno dia 21 di mei awor 9’or di anochi primeramente kontra e selekshon di Sürnam ta lo sigiente: Danie Trinidad (Boneiru), Rellove Janga (Boneiru), Joshua Bicentini (Cur), Everon Espacia (Cur), Stallone Isenia (Cur), Sorantly Tomsjansen (Cur), Rivelino de Lecca (Cur), Curtly Hooi (Cur), Ashan Bernardus (Cur), Kenneth Kunst (Cur), Jair Keller (Cur), Shayron Bernardus (Cur), Reangelo Rodriquez (Cur), Sannon Carmelia (Cur), Eugene Martha (Cur), Marcello Pisas (Cur), Wencho Farrell (Hul), Djuric Ascencion (Hul), Rocky Silberie (Hul), Richal Leito (Hul), Benjamin Martha (Hul), Ingomar Valentijn (Hul) i Lennox Mauris (Hul).

WILLEMSTAD - Fundashon Baseball Team Trai Seru ta anunsiá ku e aña aki atrobe ta bai tuma lugá e torneo intemashonal di beisbòl Little League Crème de la Crème.
E torneo aki a inisiá 7 aña pasá ku e meta pa duna e hóbennan di ku no por a partisipá na e kampionatonan regional i mundial e chèns pa partisipá tòg internashonalmente.
E ocho mihó timnan di tur tres liga di Kòrsou, ku ta 3 di Pariba, 2 di Willemstad i 3 di Pabou, lo enfrentá otro promé p'asina esunnan ku klasifiká por partisipá den e parti internashonal.
E torneo lo tuma lugá den Cerrilio Chirino Ballpark mirando e tremendo akohida di aña pasá.
Pa organisá e torneo aki Fundashon Baseball Team Trai Seru a instalá un komishon ku ta konsistí di e siguiente personanan:
1. Glenn Sulvaran Presidente
2. Rolando Chirino Vise presidente
3. Ronny Lauffer Sekretario
4. Tyrone Gijsbertha Tesorero
5. Anthony Guillermo 2e Sekretario
6. Shelwyn Selasia 2e Tesorero
7. Carlos Ruiter Komisario
8. Lionel De Freitas Komisario
9. Oswin Lint Komisario
10. Carlos Evertsz Komisario
11. Luis Da Silva Komisario/PR
Señores Pim Fangman, Gustavo “Taffy” de Jongh i tambe Urny Floran lo ta e konseheronan.
Di parti di e organisashon i komishon nos ta konta ku sosten di pueblo en general pa ku e torneo Internashonal Crème de la Crème 2008 por bira un éksito manera añanan anterior.

ROMA – E ekipo di Inter a kai kontra di Milan ayera 2-1 i asina laga un oportunidat pasa nan pa titulá kampion di Liga Italiano i ku awor ta mas pèrtá despues di e goliada di 3-0 di Roma riba Sampdoria.
Golnan di Filippo Inzaghi i e brazilero Kaká a duna Milan e viktoria i awor ta posishoná nan mes na e di kuater puesto. Un lugá importante, ya ku e ekipo aki ta klasifiká pa hunga den Liga di Kampionnan.
Roma a redusí e bentaha di Inter na tres punto ku nan viktoria riba Sampdoria.
Inter tabatin mester di solamente un viktoria pa logra nan di tres título siguí i e di 16 di nan historia. Roma komo e úniko siguidó tenas a laga suspenso den e kampionato ku lo keda definí awor te riba e último fecha di e aktual kampionato. Ainda falta dos wega mas pa hunga.
Si a kaso e dos ekiponan keda empatá, Inter ta bira kampion, komokiera ku nan a gana e promé wega 4-1 i despues empatá 1-1.
Otro resultadonan: Juventus a pèrdè 1-0 kontra Siena. Palermo a vense Lazio 2-1. Livorno a pèrdè 3-2 kontra Atalanta; Empoli (33) a pèrdè 1-0 ku Udinese i Parma (34) a gana 1-0 di Genoa. Reggina a derotá Catania 2-1 i Torino a gana ku mes skor di Napoli.

E tékniko di Inter Roberto Mancini desapuntá den wega di su ekipo ayera


Hungadónan di Roma ta selebrá ayera.

ARIES: Bo bida sentimental ta tuma awor un gira nobo. Bo a krese den eksperensianan di bida i lo ta hopi difísil pa nan bolbe gañabu. 27,10,08.

TAURO: Kosnan nobo, diferente ta al órden di dia. Ta tempu di manifestá bo kreatividat. Bo tin awor e poder di kambia bo bida i sigui dilanti sin mira atras. 13,50,47.

GEMINIS: Ekspresá ku e bèrdat, no gaña. Pone, di una bes, e punto final na un konflikto familiar, bisando e bèrdat, ounke lo e molestiá i duelbu. 02,11,16.

KANSER: Konsehonan ku bo ta ofresé otro, lo ta di gran ayudo. Pa mas chikitu ku e por ta, lo e ta un manera di kontribuí pa hasi di e mundu aki unu mihó. 05,33,12.

LEO: No sakrifiká e lokual ku tantu bo ke pa kosnan material. Buska e tesoronan i riska na tuma desishonnan. Tuma na kuenta ku bo akshonnan ta afektá e personanan rondó di bo. 39.

VIRGO: Proyekto i plannan ta kobra forsa pa bo por realisá nan awor. Matrimonio, union, kompromisonan. Hasi nan sin miedu. 16,06,09.

LIBRA: Tene hopi kuidou e dianan aki. Lo relashoná ku trabou, estudio o negoshi ta faborabel pa bo. Probechá tur oportunidat pa progresá. 20,33,07.

SKORPION: Bo bon sentido di humor ta durante dia. Un persona ku ta pertenesé na bo pasado, tin ku atmití e bèrdat i aseptá ku su tempu a terminá. 31,05,43.

SAGITARIO: Bo komunikashon ta bon, us’é na bo fabor. Bo tin lus bèrdè pa tuma inisiativa den asuntunan di amor. No laga e oportunidat pasa ku tantu bo a buska. 39,04,25.

WILLEMSTAD - Miéntras ku Staten mañan atardi lo reuní internamente riba e asuntu aki, miembro di parlamentu Faroe Metry no ta niun tiki kontentu ku e lei ku Komishon Sentral di parlamentu antiano a trata i aseptá algun dia pasá den kuadro di esfuersonan pa kombatí aktonan di terorismo i finansiamentu di aktividatnan terorista.
Algun dia pasá, Staten a diskutí i aprobá e proposishon di lei aki den reunion di Komishon Sentral i awor ta preparando pa e bai reunion públiko.
Di akuerdo ku gobièrnu, tin nesesidat urgente pa trata i aprobá e lei aki promé ku mei 2008. Ta trata di un lei ku ta regla kombatí aktividatnan di terorismo, kombatí finansiamentu di aktividatnan di terorismo, kombatí partisipashon na aktividatnan terorismo i tambe labamentu di plaka ku tin di aber ku terorismo.
Si Antia no aprobá e lei aki, Antia ta kore e riesgo ku su organisashon Meldpunt Ongebruikelijke Transacties (MOT) di ser ekspulsá for di e asina yamá Egmond Groep.
“Ta ki mishi nos mete den e kos aki? Nos ta biba den un region ku semper a ser kalifiká komo un region di pas. Ami ta kuminsá kere, ku nos mester kumpli ku e petishon ku nos a haña, djis pa tene stupi di otro limpi,” tabata konklushon di miembro di frakshon di Partido Nashonal den Staten mr. Faroe Metry.
Metry tabata un di esnan ku a hiba palabra durante tratamentu di e proyekto di lei aki den parlamentu. E parlamentario a mustra, ku e tin su pensamentu riba e proposishon di lei aki.

WILLEMSTAD – “Teritorio insular di Kòrsou tin su presupuesto nobo pa 2008: e presupuesto aki, adaptá despues di último desaroyonan awor ta mustra un défisit di 103 mion florin. Pa kubri e défisit aki, lo mester introdusí di un banda medidanan pa redusí gastu i oumentá entrada, miéntras ku di otro banda lo mester weta kiko por hasi riba merkado finansiero lokal. Hecho ta ku kada ken mester duna nan aporte”, asina diputado di Finansa Mike Willem a enfatisá.
Konseho Insular, fin di aña pasá a trata i aprobá kaba presupuesto pa e aña koriente. E presupuesto ei tabata basa di un banda riba e promesa di Ulanda ku e ta karga un parti supstansial di e défisit di e aña aki – ku Kòrsou mes a kalkulá na 103 mion florin – miéntras ku a keda un défisit mas di 66 mion florin, ku teritorio insular di Kòrsou mes, mester a weta kon e ta finansiá esaki.
Den e kuadro ei diputado Mike Willem a anunsiá, ku den e promé kuartal di aña 2008, e lo presentá un plan pa indiká kon ta bai kubri e défisit di 66 mion aki (e asina yamá “dekkingsplan”).
E plan aki sinembargo a tuma mas tempu ku gobièrnu mes a pensa, loke tabata motibu tambe pa partidonan di oposishon hala atenshon di Bestuurscollege ku Konseho Insular ketu bai ta wardando riba e plan aki. Partikularmente e miembro di frakshon di Forsa Kòrsou Gregory Damoen a lansa krítika riba gobièrnu pa e desaroyo aki.

WILLEMSTAD/ ORANJESTAD - Ministerio Públiko na Aruba a disidí ku e ta bai hasi uso tambe di klarividente pa yuda solushoná e kaso di e damita merikano ku a disparsé, Natalee Holloway.
Te ku awor tin mas di 10 klarividente ku a mèldu kendenan ta pretendé ku nan sa kon el a disparsé i na unda Natalee Holloway ta awor aki.
“Un di nan a bisa, ku e sa sigur ku Natalee Holloway ta na bida ainda i ku e ta bibando awor aki na Venezuela. Un otro ta bisa ku e tin sigur ku e damita ta derá na e parti ost di Aruba. Nos ta investigá tur tep ku nos haña, inkluso esnan ku bini di klarividente,” asina Hans Mos, fiskal mayó na Aruba kende ta enkargá ku e kaso aki a deklará.
Natalee Holloway a disparsé misteriosamente dia 30 di mei 2005 na Aruba, despues ku el a bishitá e isla aki den kuadro di selebrashon di finalisashon di su estudio. E último hende ku supuestamente lo tabata den su kompania tabata Joran van der Sloot.
Joran van der Sloot sinembargo a keda deklará insistentemente ku e no sa nada di desaparishon di Holloway i ku el a bai laga e damita riba playa kaminda nan tabata.
Reportadamente Van der Sloot lo a mata òf a sòru pa kurpa sin bida di Natalee Holloway disparsé. Tabatin vershonnan insistente ku un amigu di dje ku tin un boto a yud’é pa benta e kurpa na laman ganchu.
No opstante un búskeda sin presedente den istoria di Aruba, kaminda Ulanda, Merka i otro paisnan a duna nan yudansa, no opstante ku a gasta miónes di plaka – últimamente ku un barku sonar spesial di investigashon merikano – no tabatin niun resultado. No a haña niun pista di e damita aki.

DEN HAAG/ WILLEMSTAD - Komishon “Stop de Vernedering op Schiphol” ta preparando un marcha di protesta kontra e kòntròl 100 porshento na aeropuerto di Ulanda Schiphol.
“E forma denigrante, humiyante i ofensivo ku ta atendé ku stranheronan, partikularmente ku karibensenan durante e kòntròl aki ta inaseptabel”, asina Glenn Codfried, un surinameño a deklará.
Outoridatnan ulandes, mediante vários informe ofisial último lunanan ta insistí ku e kantidat di keho a baha, pero pasaheronan ku mester pasa den e kòntròl aki ta bisando nèt kontrali.
“E situashon a bira solamente mas serio i e kantidat di keho a oumentá”, asina Codfried a konfirmá.
Codfried a relatá e eksperensia di un persona ku nan a detené na Schiphol. A wanta e persona aki durante un siman largu.
“Nan a mishi ku mi den tur sorto di manera. Nan a trata mi komo un kachó. E kaso aki ta hopi tristu i tabatin konsekuensia serio pa mi salú, pasobra awor aki mi ta sufri di preshon haltu. Anto un otro konsekuensia di esei ta, ku mi no por haña un trabou fiho,” asina e siudadano a duna di konosé.
El a bisa, ku mester ta bon kla pa tur hende ku no por bagatelisá e kos aki.
Glenn Codfried a bisa, ku último lunanan aki e kantidat di keho a oumentá. Tin hende asta ta bou di e impreshon ku outoridatnan ta birando mas rasista kada bes di nobo. “Konsekuensia ta”, segun Codfried, “ku mas i mas hende ta haña hasta miedu di biaha entre Sürnam i Ulanda. Esaki simplemente no por”, el a agregá.

PARAMARIBO/ WILLEMSTAD - Promé minister di Ulanda Jan Peter Balkenende tambe mester pasa den un kòntròl 100 porshento, ora e yega aeropuerto Zanderij na Sürnam. Lider di e partido Nationale Democratische Partij (NDP) a lansa e gritu aki na bispu di yegada di e promé minister ulandes na e eks kolonia di Ulanda.
Bouterse a hasi e plegaria aki durante un reunion di un reunion di su partido na Paramaribo.
Bouterse ta haña ku a base di e prinsipio di resiprosidat, mester laga tur pasahero ku ta prosedente di Ulanda pasa den e kòntròl 100 porshento, meskos ku yunan di Sürnam ta pasa den e kòntròl aki ora nan yega Schiphol.
“Balkenende tambe. Nos tin e derechi di hasi mesun kos ku e ulandesnan ta hasi na otro banda di oséano,” asina Bouterse a komentá.
E asuntu di kòntròl 100 porshento aki ta keda un problema serio. Desi Bouterse a akusá gobièrnu di presidente Ronald Venetiaan di no tin e kurashi pa aktua. Segun e lider di NDP alabes eks hefe di ehérsito di Sürnam, gobièrnu di su pais mester insistí pa eliminá e kòntròl aki na Schiphol.
Venetiaan huntu ku su kolega pa Asuntunan Eksterior, Lygia Kraag-Keteldijk, a bolbe hala atenshon di Ulanda resientemente ku e asuntu aki ta forma un punto di hopi doló den e relashon entre Ulanda i Sürnam. Nan ta papia di “trato inhumano i humiyante kontra pasaheronan di Sürnam na Schiphol.”
Manera ta konosí, promé minister di Ulanda Jan Peter Balkenende i su kolega pa Asuntunan Eksterior Maxime Verhagen lo bishitá Sürnam dianan 13 i 14 di mei benidero. Promé minister Balkenende tabata na Sürnam kaba na 2005. Na okashon di e bishita ei, el a indiká klaramente ku Ulanda ta duna hopi balor na un relashon kordial i amistoso entre Sürnam i Ulanda.

WILLEMSTAD / EINDHOVEN – E siudat ulandes number 1 riba e lista di kriminalidat ta Eindhoven. Na di dos lugá ta siguí Tilburg i na di tres lugá Arnhem. Esakinan ta resultado di un investigashon hasí dor di e korant AD. E siudat Nieuwkoop ta e lugá di mas sigur pa Ulanda.
E investigashon a dirigí su mes riba tur e 445 munisipionan di Ulanda. E datonan ta prosedente di e 25 kuerponan polisial polisial di Ulanda. E alkalde di Eindhoven, Rob van Gijzel a bisa ku no ta niun tiki agradabel pa finalisá na e promé lugá un bia mas. Segun van Gijzel, e sentimentu di seguridat ta oumentá i tin bahada den e kantidat di delitonan.
E siudatnan den loke nan ta yama ‘randstad’, no ta den e tòp 3 e biaha akí. Rotterdam ta na e di 4 lugá i Amsterdam na e di 8 lugá. Segun e investigashon, e tipo di kriminalidat ku ta tuma lugá mas frekuente a baha. Esakinan tabata entre otro kiebro den outo i kas, ladronisia di outo i motosaikel, ladronisia for di impresanan, skol, garashi i chosa, i ladronisia riba kaya.
Finalmente van Gijzel a bisa ku e kantidat di denunsianan ta oumentando i esaki ta indiká ku e konfiansa den e instansianan gubernamental. Aña pasá tambe e siudat Eindhoven a finalisá na e promé lugá riba e barometer di krímen. E alkalde di e tempu ei a pidi Den Haag pa pone mas plaka disponibel pa kombatí kriminalidat.

WILLEMSTAD – Tin hopi pensamentu enkuanto bistimentu di faha di seguridat. Kasi tur dia polis ta parti un kantidat di prosèsverbal pa outomobilistanan ku ta kibra ku e regla akí. Siudadano i polítiko Rònchi Marlin, durante di su trabou komo polis a mira ku su mes wowo kiko ta e konsekuensianan ora un outomobilista no tin su faha bistí.
“Bistimentu di faha di seguridat ta ko’i makaku. Si asina mes, bistimentu di faha di siguridat ta ko’i makaku i hasimentu di drùk. Esei ta loke masha hopi hende mes ta pensa i papia ketu bai. Ora tin kòntròl di polis bo ta mira nan lihé lihé ta bisti e faha di siguridat pa no haña un but. Ora nan kaba di pasa e kòntròl ta kita kos benta un banda.” Marlin ta papia di eksperensia i e ta reta tur hende pa wak pa nan mes. “Para na un kaminda ku hopi outo ta pasa i nota kuantu hende ta kore sin nan faha di siguridat bistí. Ku un tiki suèltu di 10 outo ku pasa, lo bo por nota ku mas ku mitar ta kore sin faha di siguridat bistí. Hasiendo e trabou ku te ainda mi ta ehersé, m’a yega di saka hende for di outo ku frenta i kabes tur habrí, wowo(nan) saká òf distruí, nanishi destrosá, boka sin djente dilanti, lepnan di kap òf tur destrosá, whip-lash òf den kasonan ekstremo, garganta kibrá i pues morto, pechu tur plamá for di otro, okashoná pa e stürwil, hep kibrá ku hopi bia ta laga e shofùr mankaron dor ku el a skùif bai dilanti dor di e impakto i e pianan ta pega den dash-board, kibra hep parsial òf kompleto, i finalmente kibra tur kos den un klap den e parti ariba i abou di e kurpa i konsekuentemente, e shofùr ta resultá morto.”

WILLEMSTAD – Djasabra e promé partido ei e Playoff Kaya Kuater a kuminsá.
Hubentud Fortuna, kampion di e temporada regular 2007/2008 a sali riba un atake fuerte kontra di Centro Dominguito, loke a pone ku nan mester a hunga riba kontra-golpe.
E muchanan di Hubentud Fortuna tabata ataka pero sin resultado, loke a pone ku e ekipo di Dominguito sigur den e promé mitar mester a defendé tur ku tin.
Kenneth Kunst i Clifford Braafhart no por a hunga ya ku Kunst tin suspenshon i Braafhart akumulashon di karchi.
E wega ta bai sosegá sin anotashon.
Despues di sosiegu e dos timnan a sali meskos riba otro.
Centro Dominguito a trese un kambio ora ku Rudmar van Eyten a drenta na lugá di Ivandell Meulens. E kambio aki a bin resultá ora ku van Eyten a bin anotá e úniko gol di partido despues ku Asjar Bernardus a kobra un tiru liber ku Van Eyten ta kòp aden.
Despues di e gol aki Centro Dominguito mester a defendé ku alma i kurpa ya ku Hubentud Fortuna a basha un avalancha di atake, pero sin resultado.
Centro Dominguito di e manera aki ta logra nan promé viktoria di playoff.
Ayera e dos ekiponan di Banda Abou, Centro Barer i Undeba a topa otro.
Tabata un partido ku a hunga mas tantu meimei di tereno.
E ekiponan tabata bon riba otro i no tabata pèrmití otro nada.
E weg ta bai sosegá sin anotashon.
Djis despues di sosiegu Jair Keller ta bin haña un oportunidat i ta manda su ekipo Undeba dilanti 1-0.
No muchu despues Centro Barber ta bin haña un pinalti ku Edgar Cassiani ta kobra ku éksito pa empatá e partido 1-1.

WILLEMSTAD – Djaweps dia 1 di mei, Dia di Trabou, tabatin kareda di kabai riba Hipódromo Almirante Luis Brion ku shete kareda.
E kareda mas importante di e fecha aki tabata e Klásiko Dia di trabou riba 1700m, e di seis kareda ku a keda ganá den gran forma pa Grand Saints despues ku el a bini bèk i pasa mid West ku un dado momentu a pasa Grand Saints na kaminda.
Grand Saints ku Oscar Huerta i di stud BC i prepará pa Hensley “Chikí” den Haage, a gana e kopa. Na di dos lugá a terminá Mid West ku Robinson Arias, Touch for Luck ku José Gregorio Valera a sali na di tres lugá i Black Pass ku Elvis Moran na di kuater lugá.
E promé kareda di e atardi a kore riba 1300m pa Kabai Krioyo ku ginete aprendis.
Pinta ku Diego Margaretha ta bin gana e kareda aki den raya. Pinta ta di stud Hermanos Melendez i prepará pa Roger Nivelac. Na di dos lugá Nitro ku Kenyon Bonifacio a sali na di dos lugá i The Ghost ku Juni Bonifacio a sali na di tres luga.
E di dos kareda riba 1300m pa Kopa Vanddis N.V. pa kabainan machu a keda ganá konvinsentemente pa Sekretario ku Robinson Arias. Sekretario ta di stud ISA i prepará pa Edward Margaretha.
Na di dos lugá a sali Handssign ku Alexander Hanst i Melodic Dreams ku Elvis Moran a sali na di tres lugá.
E di tres kareda 1300m pa yewa a resultá den un viktoria pa Balbi Home ku Oscar Huerta ku ta gana fásil. Balbi Home ta di stuk Never Say Never i prepará pa August “Bubu” Muller.