ORANJESTAD- Diadomingo atardi a tuma lugar na e monumento conmemorativo na Adriaan Lacle Boulevard un ceremonia protocolar caminda a recorda esnan cu a muri den Segunda Guera Mundial.
Na e ‘dodenherdenking’ aki a hiba palabra Minister President sr. Nelson Oduber, kende den su discurso a recorda tur esnan balente cu a duna nan bida pa awe nos ta bibando den tur libertad den Reino Hulandes.
Fuera di e desfile militar tabata tin tambe ponemento di krans door di diferente instancia oficial y gubernamental, ex-schutternan y un grupo di joven cu a duna muestra di honor y respet na esnan cu sacrifica nan bida pa nos libertad.

ORANJESTAD- PEDAGOGIA 2000 kier a recorda tur e studiantenan cu e programa ‘GUIA DI ESTUDIO” ta yegando su fase final pa loke ta e aña escolar 2007 – 2008.
Nos ta drentando den e ultimo ocho (8) simannan di e aña escolar, caminda cu e studiante tin cu traha hopi serio y duro pa por termina e aña escolar aki cu exito.
PEDAGOGIA 2000 ta ofrece e oportunidad, e espacio, e facilidad y e organisacion pa un studiante, den tur trankilidad, den un ambiente agradable y positivo y bao guia di un profesional, por cumpli cu tur su tareanan di scol. E tareanan di scol ta varia y ta encera entre otro: *traha huiswerk, *studia y prepara pa e diferente formanan di un test (overhoring, project, samenvatting, spreekbeurt, proefwerk, C.P., S.O. etc.), *traha cu un lista di e fechanan cu tin test, *traha riba un projecto, *lesa buki, *haya ayudo y “overhoring” individual, *participa na training y haya tips “con pa studia” , “con pa prepara pa un test” etc.
E programa “GUIA DI ESTUDIO” ta tuma lugar di dialuna pa diabierna. Riba dialuna y diaranson tin ayudo individual of den grupo chikito pa N & T, natuurkunde, scheikunde, biologie y wiskunde. Riba diamars y diahuebs tin ayudo apart riba tereno di rekenen pa e grupo di 5de y 6de klas.
Dor di circunstancia tin algun lugar habri.
Mayornan, si bo ta haya cu bo yui mester di ayudo y sosten pa e bai over of slaag pa su examen, ya cu su rapport of S.O.-kaart no ta mucho bon, yama PEDAGOGIA 2000 y inscrib’e mas rapido cu ta posibel pa e participa na “GUIA DI ESTUDIO”.

ORANJESTAD- Ayera a cuminsa reunionnan di Presidium entre e Presidentenan di e comisionnan encarga cu Contactonan Interparlamentario entre Reino y Suriname di Hulanda, Antias y Aruba y e presidentenan di Parlamentonan.
Na dicho reunionnan ta participando di parti di Hulanda sr. Willibrord van Beek(presidente di e comision Antiano y Arubano na Hulanda (NAAZ), sra. M.Y Linthorst (vice Presidente) y Helene de Gier. Di parti di Antias sr. Pedro Atacho (presidente di Parlamento di Antias), sr. Glenn Sulvaran (presidente di e comision) y griffier Desi-Lai Promes y di parti di Aruba sra. Mervin Wyatt-Ras (presidente di Parlamento), sr. Adi Thijsen(presidente di comision) y griffier Jacqueline Bastien-Sherman.
Agenda principal ta continuacion di e reunionnan di Tripartite na juni. Esaki debi na e hecho cu e reunion di biaha pasa cu lo a tuma lugar na Curacao no a continua. Dor di expresionnan negativo di parlamentario Hero Brinkman den direccion di nos pueblonan como sifuera nos ta biba den un boevennest a haci cu Parlamento di Antias a aproba un mocion pa prohibi entrada di Brinkman den parlamento Antiano.
Awor durante e reunionnan di presidium lo mira con e reunionnan aki lo por continua.
Alavez lo fiha e agenda pa e reunion cu si tur cos bai bon lo tuma lugar na juni venidero na Hulanda.
Banda di e reunionnan di ayera, tambe un delegacion a efectua un bishita na Gobernador di Antias, sr. Frits Goedgedrag

ORANJESTAD- Minister drs. Marisol Lopez-Tromp a haci apertura di e preparacion pa 12 “tanchi” pa grupo di Traimerdia. Traimerdia ta encarga cu e cuido di mucha di enseñansa preparatorio y primario despues di scol. Traimerdia ta ofrece cuido y guia na muchanan aki y ta contribui na e desaroyo di mucha.
Den total ta existi 6 centro di cuido despues di scol, reparti riba henter e isla y incorpora den cierto scol basico. Bo ta haya centronan di Traimerdia na Scol Basico Washington na Noord cu lo amplia cu 3 grupo, Colegio San Hose na Santa Cruz cu lo amplia cu 1 grupo, Maria Goretti na Paradera cu lo amplia cu 2 grupo, Paulus Scol na San Nicolas cu lo amplia cu 3 grupo, Fransiscus College na Madiki cu lo amplia cu 1 grupo y Conrado Coronel na Mahuma cu lo amplia cu 2 grupo.
Cada centro tin un lider, un guia di huiswerk y un cantidad di guia di grupo. Cada guia di grupo ta duna guia na un grupo di maximo 24 mucha.
Manera anuncia anteriormente Minister drs. Marisol Lopez-Tromp pa 2008 ta duna prioridad na expansion di Traimerdia. P’esey di acuerdo cu plannan stipula pa aña 2008 ta ampliando Traimerdia cu 12 grupo y den cuadro di e expansion aki Traimerdia a selecciona, despues di un procedura habri di solicitud, 12 guia nobo di grupo. Tin lugar awor pa 300 mucha nobo na Traimerdia.
Minister drs. Marisol Lopez-Tromp ta sostene e trabaonan di Traimerdia pues esaki ta cuadra den su maneho social educativo pa hisa calidad di bida pa tur hende na Aruba y tambe hisa calidad di enseñansa.
Mientras cu mayornan ta traha, e guianan aki na Traimerdia ta cuida, guia y sostene nos yiunan den nan desaroyo y cu nan huiswerk.

Gobierno di MEP ta sigui cuestiona accion policial

Pero Minister di Husticia no ta actua

ORANJESTAD- E ultimo caso di tiroteo entre polisnan y un persona cu desde 2004-2005 tur instituto cu tin di haber cu husticia ya caba a ser poni na altura di su presencia ariba e isla aki y su posibel envolvimento den organisacionnan paramilitar y relacionnan criminal cu FARC ta wordo cuestiona den e comunidad Arubano, ya cu tur hende ta puntra nan mes, ta kico a ser haci cu tur e informnacionnan ey. Si no ta pa e control di number di auto, awe ainda un persona asina peligroso ta cana y biba mei mei di nos cu tur e consecuencianan cu esaki por tin. Con esaki ta posibel? Esaki ta ora cu institutonan no ta haci caso di informacionnan valioso y di cual nan mester por haci trabao mesora di dje. Institutonan importante tin mas tempo pa practica politica partidista cu nan trabao mes!
Con por ta posibel cu varios aña pasa tabata tin informacion di e persona sumamente peligroso aki, anto ningun dia pueblo inocente por a mira potret di e persona aki na television ni den corant of ariba poster pa tur hende por yuda rondi’e.
Si bo mira con balente y tof polisnan tabata pa cera trafico dilanti Aeropuerto, sera 4 siman dilanti Bestuurskantoor, bolter baki di mata dilanti oficina di gobierno, yuda carga e bakinan pa blokea tur entrada y salida di Bestuurskantoor, kima tire, bebe gallonnan di whiskey dilanti Bestuurskantoor, drenta y ocupa un paar di dia ilegalmente nos Parlamento, core parada ilegal uzando auto y gasolin di gobierno, hunga pa polis di trafico na short y t-shirt etc. Di con polisnan no ta actua contra e verdadero criminalnan, bendedornan di droga, labadornan di placa, bendedornan di arma, hendenan cu ta cumpra entre otro joyasnan horta, material di construccion etc.? Di con e ora ey si nan mannan ta mara?

WILLEMSTAD – Ounke ku ni Freewinds, ni esnan ku a transportá e asbèst for di riba e barku, a mèldu esaki na Selikor, no mester ekskluí ku e asbèst di e barku ta derá na Malpais. E direktor di Selikor, Wesley Kook, pa e motibunan akí no por konfirmá si enbèrdat e asbèst ta derá na Malpais. E ta bisa sin embargo, ku no mester ekskluí esaki.
Kook a splika, ku normalmente ora ta atendé ku asbèst, mester tuma medidanan di prekoushon for di ora ku kuminsá ku e trabounan. “Mester sòru pa e material no kibra i forma stòf ku ta bai den aire. E asbèst mester keda intakto pa evitá peliger pa salú di hende. Na momentu ku un transportadó di shushi yega landfill ku asbèst, e mester mèldu ku e tin e material huntu kuné. Mes ora e personal di landfill ta tuma e medidanan di prekoushon i ta indiká e shofùr kaminda e tin ku laga e material. Na landfill ta koba un buraku spesial i ta tapa e asbèst ku tera. Por muhé tambe promé i hink’é den plèstik promé ku tap’é ku tera.”
Kook a bisa tambe, ku e úniko manera adekuá pa deshasí di asbèst ta via ‘landfilling’. Sin embargo e kompania ku posiblemente a transportá e material no a mèldu na Selikor ku e tabatin asbèst den su karga di shushi. Kook a bisa, ku si esaki a sosodé, nan lo por a tene kuenta kuné. “Niun hende no a mèldu nos esaki, pues nos no sa si asbèst a bai Malpais. Mi tin ku bisa ku te na e momentunan aki no tabatin indikashon tampoko ku tin asbèst prosedente di Freewinds. Nos no ta puntra nunka na Landfill for di unda e shushi ta bin. Ta esun ku ta trese e sushi mester bisa esaki. Loke si nos ta registrá, ta ken a trese shushi.”

Skina di Sorti, awe djamars 6 di mei di 2008, ta kuminsá ku deseá un i tur un bon dia. Hopi hende ta yega den un posishon, kaminda nan por influensia direkshon, dinámika i dimenshon di maneho, pero al final di kuenta no ta yega mas leu ku ahustenan marginal di sea sekuensia, dimenshon òf momentu ku kosnan ta sosodé. Pa saka un pais for di un situashon den retaguardia i pon’é den un posishon kompetitivo, kambio di direkshon ta un “must”. Ku paisnan ta kai for di posishon kompetitivo pa unu den retaguardia por lo general tin mas di haber ku falta di liderazgo ku e tin di haber ku influensia aheno.
****
Den paisnan supdesaroyá, e peso den e aspirashonnan (ambishon sano) ta mas riba poder komo ophetivo riba su mes ku riba poder komo instrumento pa apliká influensia riba direkshon di maneho. E investigadó sientífiko David C McClelland, a skirbi un buki hopi interesante riba e materia aki titulá “The Achieving Society”. Den paisnan avansá e aspirashon pa realisá kos (“need for achievement”) serka esnan ku ta den direkshon ta dominá.
****
Serka nan no tin ophetivo apsoluto, pero mas bien un mishon kontinuo di mehorashon di bo mes. Ta p’esei tambe nan no ta yega i despues sak den anominato, pero una bes nan a yega, nan ta sea sigui progresá òf mantené nan mes komo kompetidor. Esnan ku ta mira poder komo ophetivo riba su mes, ta hasi lokual ta nesesario pa gana i mantené poder. E mayoria sigur den posishon polítiko ta mas bien “crowd pleasers” ku nan ta liderá.

HANNOVER – Siman pasá e tim di futbòl di robòt di Technische Universiteit Eindhoven a titulá kampion di Europa na Hannover, Alemania. E tim a hunga bou di nòmber Tech United Eindhoven den e final di German Open na Hannover kontra di CoPS di Stuttgart, Alemania i e partido a keda empatá 1-1. Pero e tim Tech United Eindhoven a bin gana na pinalti.
E kampionato RoboCup German ta e kampionato ofisial di Europa pa robòtnan ku ta hunga futbòl. E organisashon di rònt mundu RoboCup ta sostené e “robotica-research” dor di organisá weganan di futbòl di robòt. Timnan di seis robòt ta hunga kontra di otro. E mashinnan ta outomátiko i nan no ta keda manehá. Nan mes ta reakshoná riba e situashonnan.
“Den e seri di pinalti e kiper di nos a sabi di detené kuater pinalti”, asina e lider di e tim Merry a bisa. Den e seri di pinalti kada tim mester a tira sinku pinalti. “E alemannan a sali i faya kuater”, asina Merry a bisa. Tech United a sali anotá e promé dos pinaltinan.
Ta di promé bes ku un tim di futbòl di robòt di Ulanda a titulá kampion di Europa.
Aña pasá Tech United a terminá na di tres lugá.
E aña aki den e wega di semi final, e tim di Tech United a bin gana di e kampion mundial Brainstormer Tribots ku skor di 2-1.
Na yüli e kampionato mundial lo tuma lugá den e siudat di China, Suzhou.

WILLEMSTAD – Manera ta konosí, Banko Sentral di Antia tin na su enkargo ehekushon di e maneho di divisa, ku ta enserá prinsipalmente regulashon di pagonan den estranheria i tambe entradanan di pago for di eksterior.
E transakshonnan aki ta forma un fuente importante di informashon pa Banko Sentral na momentu di formulashon di e balansa di pago pa Antia. Esaki ta sosodé tur kuartal.
E balansa di pago ta un reflekshon di transakshonnan ku ta tuma lugá entre Antia i sobrá di mundu durante sierto periodo. E balansa di pago ta wòrdu usá pa entre otro analisá e desaroyonan ekonómiko den nos pais i ta un base importante pa yuda definí e maneho monetario di Banko Sentral ku ta dirigí riba mantenshon di un valuta stabil entre florin antiano i dollar merikano.
Pa e motibu aki ta importante pa tin informashon riba transakshonnan, ku pa gran mayoria ta wòrdu risibí for di bankonan lokal, ta mas eksakto posibel.
Pa promové esaki mas tantu, Banko Sentral a base di nan tarea stipulá den Artíkulo 8 di ‘Landsverordening Deviezenverkeer’, a disidí lo siguiente. “Entrante luna di aprel 2008 tur suidadano ku ta hasi un pago òf ta risibí pago di no suidadanonan pa medio di un banko lokal, mester hasi un deskripshon kla di e karakter di e transakshon si esaki ta di 150 mil florin òf mas. Si bo banko lokal konstatá ku e deskripshon duná ta inkompleto òf falta informashon, e ora ei abo ta obligá pa duna e informashon mas korekto,” asina e komunikado di Banko Sentral ta finalisá bisando.

WILLEMSTAD - Un Driekamp a disidí ta ken lo a bai kas ku e kopa Lulu Salas.
E biaha aki Juraida de Leça ta dominá e hóben Christine Dania i ta gana ku e skor di 3-1.
Veteranonan.
Durante di e weganan den e dos pulnan di kuater Lucien Alberg i Onnie Wong mester a para pa motibu di leshon.
E kuater ganadónan di e pulnan a duna semi finalnan hopi interesante.
Erwin Sophia ta gana di Eric Adamus ku 3-2 despues di tabata atras 2-0.
E otro semi final entre Hubert Burleson i Ton Wakelkamp a dura hopi largu. Na final tabata Hubert Burleson ku bunita tòpspinnan ta gana ku skornan 2-11, 11-6, 11-8, 10-12 I 12-10.
E final entre Erwin Sophia en Hubert Burleson tambe a bai den sinku sèt.
Erwin Sophia despues di tabata dos sèt atras ta igualá e skor ku un bon defensa.
Den e delaster sèt sinembargo Erwin Sophia no por evitá ku un “Johnson” hungando hopi sigur atrobe ta skirbi e torneo riba su nòmber ku e skor di 13-11.
Torneonan den mei ta:
Djabièrnè 9 mei Torneo Hubenil
Djamars 20 mei Torneo di Veterano
Djamars 27 mei Torneo di Dòbel, tur kategoria por partisipá.

MERKA, - Elekshonnan primario di India i Nort Carolina a kuminsá awe, kualnan ta klave pa e senador di Illinous, Barack Obama.
Sentronan di votashon ta habrí i ekiponan di tantu Barack Obama komo Hillary Clinton ta siguiendo e proseso ku gran ekspektativa.
E gran opstákulo ku Obama tin ku superá ta e skandal Wright.
Segun sondeonan publiká algun ora promé ku a habri e urnanan awe, e deklarashonnan di Obama su eks pastor Jeremiah Wright lo por a afekt’é mas di loke ta spera den un prinsipio.
“Wright ta manera un fantasma pa e kandidato. Aki na Indiana a tuma nota kon Obama tabata mantené su mes na defensiva i e dinamismo tabata diferente. Kasi e no ta’tin tempu pa mustra e kara positivo di su kampaña”, Mattew Tully a splika, kende ta analista polítiko di Indianapolis Star.
E aspirante presidensial demókrata Barack Obama lo midié den e elekshonnan primario di Nort Carolina i Indiana awe, den dos votashon ku lo yuda determiná si e lo sobrebibí e mala racha den su karera pa Kas Blanku i si finalmente e por vense Hillary Clinton.
Estrateganan demókrata ta kere ku e senador pa Illinois a superá e pió luna di su kampaña di e mihó manera ku por spera, dor di e atenshon ku e retórika rasial di su eks pastor a provoká i tambe Obama su propio komentarionan riba e merikanonan di pueblonan chikitu, di kendenan el a kalifiká komo hendenan renkoroso i aferá na armanan i religion.

WILLEMSTAD - E promé piedra pa Plenchi Mgr. Henriquez a keda poné pa diputado Humphrey Davelaar i pastor Raúl den presensia di invitadonan ayera. E plenchi dilanti di misa di Montagne lo karga nòmber di e religioso aki pa rekòrdá di su bon trabou ku el a desplegá den e parokia di Montagne. Misa di Montagne mes a pasa bou di remodelashon i awor ta toka parti e Plenchi. Diferente patrosinio manera Refineria Kòrsou ta un di e gran sostenedónan di e proyekto aki. Riba e foto por mira diputado Humphrey Davelaar, pastor Raúl i tambe direktor di Refineria Kòrsou, Herbert Mensche, durante e ponementu di e promé piedra.

Lo realisá trabounan investigativo na Venezuela:

WILLEMSTAD – Errol Cova a keda nombrá konsultor di sekretario general di Edukashon Internashonal (Education International) pa realisá trabounan investigativo den Latino Amérika i Karibe. E nombramentu aki ta unu haltu den kua Cova lo bai realisá investigashonnan riba tereno di enseñansa den e paisnan ariba menshoná. Den kòmbersashon ku Cova a bin dilanti ku e ta konsiderá e nombramentu importante i ku apesar ku ta trata di un nombramentu internashonal, e lo no bai biba den eksterior. Esaki ta nifiká ku den futuro Cova lo bai ta hopi den eksterior pa realisá e trabounan ku e ta wòrdu yamá pa hasi. Cova ta duna di konosé ku for di òktober su persona a keda aserká p’e federashon, miéntras ku e negosiashonnan tabata tuma lugá i na yanüari último tur kos a bira realidat. E nombramentu a drenta na vigor dia 1 di mei último.
Cova nunka a kibra ku kontaktonan den eksterior, pero a mantené esaki ku a bin konkluí na e nombramentu aki. E federashon aki ta un organisashon ku ta konta ku 30 mion miembro rònt mundu, atrabes di 394 organisashon di edukashon den 171 pais rònt mundu. E federashon aki su sede ta na Bruselas i nan kantor regional ta na San José, Costa Rica. Cova ta deklará ku e lo bai ubiká su mes den un kantor na Kòrsou ku lo haña sosten di e kantor internashonal i lo biaha pa realisá e trabounan den eksterior. E promé enkargo ta konosé ku mester hasi un investigashon na Venezuela i mester determiná den 1 luna di tempu kua ta e otro pais ku mester keda investigá.

Negosiashon kontrakt entre Stadsvernieuwing i Global Metals den fase final:

WILLEMSTAD – Sentro di siudat lo haña tantu meter di parker komo kámara di seguridat, na momentu ku e kontrakt keda firmá entre Stadsvernieuwing i Global Metals. Na e momentunan aki e último detayenan ta keda konkretisá pa e kontrakt pa maneho di parker den Punda i Otrabanda keda finalisá. Teniendo na kuenta ku Willemstad ta riba e lista di monumentonan Históriko di UNESCO, mester yega na un proyekto ku lo mantené e posishon di Willemstad. Informashonnan ku LA PRENSA a risibí ku Global Metals ku a haña e derechi pa tin maneho di parker i seguridat den sentro di siudat ta hasi, ku lo bai tin uso di e teknologia mas moderno den asuntu di parker i seguridat den sentro di siudat.
Primeramente mester kuminsá na splika ku e parti di parker lo no tin e tipo di meternan kustumbrá, pero lo bai na krea manera Oropa ku tin e toren di parker ku ta mara na alrededor di 12 vehíkulo. Konsiderando ku ta trata di sentro di siudat, mester tene kuenta ku e forma ku ta bai introdusí e ekiponan aki, mester ta kuadra ku e standart internashonal. Global Metals lo bai traha den koperashon ku J Mackay, ku ta un kompania establesé na Canada. E kompania aki tin añanan di eksperensia riba e tereno aki.
J MacKay tin mas di 50 mil meter di parker den sentro di siudat di New York, ademas di 30 mil na e parti West. Tambe e kompania aki a haña masha atenshon den un resiente programa di televishon den Discovery. Ya kaba ta kálkulo ku tin alrededor di 1400 lugá di parker den sentro di siudat. E meternan lo keda repartí den Punda i Otrabanda.

WILLEMSTAD – Ekspertonan ta analisando e diferente faktornan, pa evitá ku informashon inkorekto riba importashon. For di un enkuentro ku minister di Finansa i diputado di Ekonomia i Finansa den konsulta ku ekspertonan a bin dilanti pa un mihó resúmen, en bes di informashon ku no ta kuadra. Den kombersashon ku minister Ersilia de Lannooy a splika LA PRENSA, ku e enkuentro a bai den bon direkshon i ku tabata un momentu pa laga ekspertonan duna nan punto di bista pa mihó informashon. Tin diferente informashon ku no ta kuadra i ku esaki ta presentá ku e oportunidat pa krea mihó informashon na bienestar di e komunidat.
Vários diskushon a keda hibá, den kua a trata e asuntu di importashon, tambe e skakel ku nesesariamente no mester ta un preokupashon. Den pasado tabatin mas importashon ta tuma lugá, pero awendia e diferente supermerkadonan mes ta importá ku no mester tin skakelmentu pa e parti di OB. Aktualmente tin investigashonnan ta tumando lugá bou di e ekspertonan, pa di e manera ei bolbe duna mas informashon amplio pa mira ku e faktornan ku tin influensia riba ekonomia ta den bon direkshon. Fecha pa e próksimo enkuentro no ta konosí, segun minister De Lannooy ta enfatisá.

WILLEMSTAD – E mihó regalo pa Dia di Mama lo resultá den Blackberry Pink 8120 i ku Digicel ta introdusí. Manera ya kaba a bira un kustumber, Digicel ta ofresé su kampaña pa selebrá di Dia di Mama. E aña aki e kompania di telekomunikashon mas grandi den Karibe, ku e ret mas grandi i mihó ta selebrá dia di mama dor di sigui amplia su portafolio di telefonnan selular. Digicel ta kere, ku nos mamanan meresé únikamente e mihó!
Pa e mama ehekutivo Digicel ta introdusí e Blackberry Pink 8120 smartphone. Na kada kompra di un Blackberry Pink 8120, ‘mama’ ta risibí 50% riba su suskripshon mensual durante di e promé 4 lunanan i tambe un bòn di regalu na balor di 50 florin pa ‘mama’ malkriá nan mes ku un bunita regalu di perfumeria PENHA pa Kòrsou òf Perfume Palace na Boneiru.
E Blackberry Pink 8120, ta kompletamente ekipá ku un Quad Band ku ta pèrkurá pa e Blackberry Pink 8120 ta usabel rònt mundu, tambe e tin GPRS i WiFi ku ta hasi ku por ‘surf’ riba Internèt na unda ku un ‘Internèt hot spot’ ta disponibel. Ademas di esaki e Blackberry Pink 8120 tin bluetooth un USB port, un kámara plùs su video ‘build in’ i 12 luna di garantia.
E oferta pa selebrashon di Dia di Mama di Digicel ta bálido for di dia 5 di mei te ku 11 di mei i tanten ku tin na stòk. Preis di selular ta basá riba un kontrakt di 2 aña for di 160 florin pa luna, i e pakete ta inkluí 200 minüt, 75 sms grátis i tambe data. Otro preis mensual ta aplikabel pa Boneiru.

WILLEMSTAD - Den kuadro di E programa Talentonan bou di U-15, NAVU a organisá djadumingu último un Dia di Talento.
E seis regionnan di Kòrsou a kompetí otro 8 kontra 8.
E Dia di Talento a kuminsá for di 9or di mainta i a kontinuá te ku 12or kaminda diferente entrenadónan a selektá e 18 mihó talentonan di e dia.
E último partido tabata entre e mihó 16 hungadónan ku a kompetí kontra di otro kaminda Leen Looyen, e direktor tékniko di NAVU tambe tabata presente.
Di e 16 hungadónan, a selektá kuater hungadó talentoso ku lo ser guiá pa eventual un oportunidat di desaroyo di nan talento den un trayekto di talento na Ulanda den futuro.

YANGON, Myanmar, - Mas ku 22.000 persona a muri i 41.000 hende ainda ta pèrdí komo resultado di e siklon violento ku a devastá delta di Irrawaddy na Myanmar (Birmania), outoridatnan a bisa awe, kendenan a atvertí ku sifra di víktima por sigui oumentá.
Sifra di morto kousá pa e devastador siklon Nargis na Myanmar no ta stòp di oumentá.
Awor, outoridatnan a informá ku tin 22.464 morto.
E último relato ofisial transmití pa televishon estatal birmano riba e tragedia ta añadí ku tin mas o ménos 41.000 persona pèrdí.
Aktualmente organisashonnan humanitario ta tratando di gana akseso n’e pais pa desplegá un operashon di gran eskala.
E promé lote di yudansa a yega prosedente di pais bisiña Tailandia.
Promé, Minister di Asuntunan di Eksterior, Nyan Win, a bisa na televishon estatal ku solamente na siudat di Bogalay 10.000 persona a muri ora a anunsiá e promé rekuento detayá di e pió siklon ku a sakudí Asia fo’i aña 1991, ora 143.000 persona a pèrdè nan bida na Bangladesh.
Minister di Asuntunan Eksterior di Tailandia, Noppadol Pattama, a bisa despues di un reunion ku Embahador di Myanmar na Bangkok ku a inform’é ku mas o ménos 30.000 persona ainda ta pèrdí despues di e tormenta devastador di djabièrnè último.
“E pèrdidanan ta muchu mas grandi di loke nos a antisipá”, Noppadol a deklará despues ku Embahador Ye Win a ninga papia ku periodistanan.

BRIGITHA
Nicanor Gonzalo (99 aña)
Mihó konosí komo Guiermito
A laga atras su yunan Eufrasio i Lenie Brigitha-Vijfschaft, Edna i Frank Virginie-Brigitha, Vilma Brigitha, Swinda i Eddy Regina-Brigitha, Mario i Airin Brigitha-Scoop. Akto di entiero ta djabièrnè 9 di mei 4or for di misa Coromoto pa santana Sta. Maria. Bishita 12or. Promé ku entiero tin un s.s. di misa.

PRINCE
Robert Benjamin (repentino)
Mihó konosí komo Robby
A laga atras su mama Vilma Prince-Martijn, ruman Ralph, Sheila, Giovanni Prince, Zulaika Williams-Prince. Akto di entiero ta djaweps 8 mei for di El Señorial pa santana Roodeweg. Bishita 9or. Promé ku entiero tin un respòns 10.30or na El Señorial.

DA COSTA GOMEZ
Ronald Jose (repentino)
Mihó konosí komo Roni
A laga atras su kasá Malva Da Costa Gomez-Celestijn, yunan Radameh i Cherline Da Costa Gomez-Boutisma, Arelys, Rosillo, Natafny, Ivo Da Costa Gomez, Cúrt i Valeska Da Costa Gomez-Richards, Sherman winklaar, Cathlyn Noor, Milangela St. Jacoba, Wisem St. Jacoba, Wisep i Lian St. Jacoba-Zimmerman, Marilou i Marlon Nicolaas-St. Jacoba, Ronalda Emers. Akto di entiero ta djaweps 8 mei for di El Señorial pa santana Memorial Park. Bishita 9or. 10.30or tin un sirbishi na El Señorial.

GIRIGORI-REINA
Anna Concepcion (87 aña)
Mihó konosí komo Nana òf Nais
A laga atras su yunan Edwin Girigori, Lucio i Hilda Girigori-Emerensia, Marina i Franklin Elisabeth-Girigori, Fransisca i Domingo Perez Gonzolaz-Girigori, Theodorita Girigori, Antonio i Yahaira Girigori-Lauffer, Edmond Girigori. Akto di entiero ta djasabra 10 di mei for di El Señorial pa santana Barber. Bishita 1`or-3or. Promé ku entiero tin un s.s. di misa 4or na misa Barber.

WILLEMSTAD -- Servisio pa desaroyo di Hende Muhé, a organisá su promé treinen pe guiadónan di famia. Esaki ta den kuadro di e trayekto di Quick Wins ‘Guia pa mayornan/ kuidadó di e proyekto kuminda kayente na skol’ esta ‘Un kuminda awe, pa mi ta fuerte mañan’.
Meta dje training tabata pa amplia konosementu riba diferente aspekto di e “intake” pa e famia ku ta haña guia. E kontenido di e programa di guia pa mayornan di e muchanan ku ta risibí kuminda na skol ta pa hasi ku e mayornan/kuidadó: ta motivá i ta responsabel pa alimentashon balansá i salú den nan famia, ta haña e kapasidat pa nan mes prepará kumindanan balansá i saludabel, mester asumí nan responsabilidat komo mayor den nan tarea di edukashon, kuido i alimentashon di nan yunan.
Banda di esaki e guiadónan di famia a haña e oportunidat pa sera konosí mas mihó ku otro i pa konhuntamente nan a traha algun palabrashon ku otro kon nan ta sostené otro den transkurso di e proyekto. Aktualmente tin mas o ménos 640 mucha ku ta partisipá den e proyekto di kuminda kayente na skol i ta e intenshon ku e mayor/kuidadó di e muchanan aki lo haña e guia ariba menshoná. Pa e proyekto aki tin 20 mediadó di famia.
Na e enkuentro aki e diputado di Salubridat i Desaroyo Sosial, señor Humphrey Davelaar a hiba palabra a base su vishon den kuadro di “Fortifikashon di Famia”, kiko e ta nifiká i kon e ta deseá pa tur famia haña e oportunidat di por desaroyá di tal ángulo ku e por para fuerte riba su mes pia.