ORANJESTAD - Recientemente Kiwanis Builders Club di Juliana School conhuntamente cu un comishon di Hendenan Preocupa na Santa Cruz a organisa un bunita initiativa pa conscientisa Aruba riba e problematica di droga y violencia.
Hopi tabata e personanan cu a acudi na e caminata silencioso Silent Walk, pa reflexiona riba e gravedad di e problema di droga, y con leu esaki ta drentando den nos hogarnan na Aruba.
Kiwanis Builders Club ta un organisacion consistiendo di hobennan entre 12 y 16 aña die edad, bayendo Juliana School y ta wordo gesponser dor di Kiwanis Club of Palm Beach. E conseheronan apunta dor di Kiwanis ta trata na guia e hobennan den diferente actividadnan sano, educativo y cu metanan caricativo.
E Silent Walk, Awareness Against Drugs, a sali for di veld di Warawara y a termina na veld di Winston, caminda e comishon di Santa Cruz a uni diferente iglesianan den oracion. Tur persona cu a participa a ricibi un shirt cu e slogan Silent Walk na inicio di e caminata.
E intencion y e peticion tabata pa trata na organisa mas di e tipo di iniciativa asina, pa asina conscientisa henter Aruba, mayornan, autoridad, gobierno, dirigentenan deportivo y otronan riba e problema real y efecto negativo cu droga tin pa nos comunidad.
Builders Club kier a gradici tur esnan cu a participa y tambe na Sra. Graciela Werleman (Comishon hendenan preocupa) pa nan apoyo. Tambe un palabra di gradicimento na Magic 96.5 FM, Top 95 FM y Canal 90 pa e sosten duna na e proyecto.
Otro organisacionnan manera Banco di Caribe, Total Cleaning y sin lubida Kiwanis Club of Palm Beach tambe a aporta positivamente pa hasi e actividad aki posibel.

Prijs di Crudo halto ta keda asota e producion Energetico Mundial.

ORANJESTAD- Riba Mercado International nos por sigi e desaroyo di prijs di crudo cu tin su influencia riba nos Isla chiquito. E influencia aki ta wordu sinti directamente den prijs halto di productonan di uso diario.
Comision di Energia y Desaroyo Sostenibel, E-com, ta mustra con e prijs di crudo international ta fluctua diariamente. Esaki ta wordu monitorisa kada ora riba nos web-site.
Crude Olie
$121.75 0.09
0.07%
21:57 PM EDT - 2008.05.06











Pronosticando cu e prijs di Crudo lo bai sigi subi y conhuntamente e prijs di fueloil y mara na esaki prijs di awa y coriente, Comision di Energia y Desaroyo Sostenibel di RED, E-com, ta presenta un folder pa “spaar y paga menos na coriente”.
Den e folder aki tin diferente tipsnan practico cu lo tin su balornan pa spaar riba e uso di coriente na cas.
Cu esaki nos kier participa y consientisa nos comunidad, con pa spaar y paga menos na coriente.

ORANJESTAD – Riba dia di La Reina a tuma lugar e famoso boulevard loop cu un biaha mas tabata un exito total.
E boluntarionan di Valero tambe tabata presente pa asina yuda e organisadornan di e boulevard loop. Un grupo di 22 voluntario a parti awa y fruta pa e participantenan. Tambe nan a para na diferente post riba e ruta pa guia tur particpante mustrando nan unda pa bai.
E boluntarionan a traha hunto cu e organisadornan, polis y miembronan di Scouts of Aruba.
Cu e proyecto aki e voluntarionan di Valero a genera un total di 70 ora di trabou voluntario. Voluntarionan masha danki pa boso dedicacion!

Durante gobernacion di AVP
Segun Gobierno di MEP

ORANJESTAD- Den e ultimo dianan aki constantemente nos por tende di politiconan frustra di AVP ta critica y cuestiona e asunto di Dump na Parkietenbos y en especial pa loke ta e di dos fase di e proyecto aki, esta e ‘Solid Waste Management Facility’. E mesun criticanan destructivo aki partido AVP a lansa durante ehecucion di e promer fase di e proyecto di Dump. Sinembargo den tur e letania di entre otro Benny Kilowatt di AVP nunca nos di MEP por a tende su opinion pa loke ta resultado di e promer fase di e proyecto aki.
Hecho ta cu durante henter e 10 aña di gobernacion di AVP, esta di 1986 pa 1988 y di 1994 pa 2001 nunca nan a yega di haci algo drechi pa sana e situacion ahigienico y insaludabel cu tabata reina na e Dump aki y cu pa decadanan largo tabata un fuente di maleza y sushedad hamas visto den historia di e pais aki..
Mester a warda te na momento cu Gabinete Oduber III na final di 2001 a tuma rienda di e pais aki pa nos por a mira algo sumamente positivo sosode den e area aki.
E gobierno actual bao di Minister drs. Booshi Wever a percura pa paga e candela riba e Dump na Parkietenbos y cual candela pa decadanan largo a manda humanan venenoso den henter e area aki. Ta danki na e maneho dinamico di e gobierno actual awe e barionan di Parkietenbos, Kas di Paloma y Buena Vista no conoce sushedad, contaminacion di tera y aire, presencia di muskita vies, djaca y cacalaca matroos mas. Tur esaki no ta wordo treci padilanti door di e politico di Pabao, cu nunca a corda riba e habitantenan den e area di Parkietenbos, ya cu su pensamento solamente tabata bay na con ta pone lijm riba meter di coriente y p’asina den forma flagrante horta coriente di Elmar. Un otro ehempel cu nos por duna di e dinamismo pa loke ta e maneho di medio ambiente ta loke tur a sosode na Jaburibari. Durante gobernacion di AVP un dump ilegal a wordo crea na Jaburibari y tur e habitantenan den e area aki a sinti inmediatamente e efectonan devastador di e dump aki. Un biaha mas ta danki na Gabinete Oduber cu awe e sitio di e dump aki a wordo converti den un Parke deportivo y recreativo sumamente bunita y luhoso y cual joya di parke a haya admiracion di henter comunidad Arubano y tambe di esnan di Cas Real.

WILLEMSTAD – Un káos enorme den tráfiko, tabata resultado di trabounan di rekonstrukshon di vangreel riba brùg Juliana ayera tardi. E trabounan akí, kombiná ku e trabounan di rekonstrukshon di kaminda na Rio Canario, a sòru pa filanan largu na diferente parti di Kòrsou.
Pa algun tempu kaba algun parti di e vangreel riba brùg Juliana a kai riba kaminda debí na aksidentenan di outo. LA PRENSA mes a mustra riba e urgensia pa drecha e vangreelnan. Ayera D.O.W. a mobilisá un kontratista ku a kuminsá ku e trabounan di reparashon. E trabounan a kuminsá den oranan lat di mainta. i a dura te sigur 12’or di mèrdia. Sin embargo e empleadonan di e kontratista a bai lùnch mèrdia, lagando un situashon hopi peligroso na e sitio. Por a nota partinan skèrpi di vangreel ku no tabatin ni sikiera pion pa alertá outomobilistanan. Pa 2’or di mèrdia no tabatin niun empleado di e kontratista na e sitio. Na momentu ku nan a reanudá trabou, ya nan a pèrdè hopi tempu kostoso ku nan por a usa pa kaba e trabou promé ku 5’or di atardi. Entretantu filanan largu a forma for di altura di Amstel Brouwerij te riba brùg Juliana.
Ta bin aserka ku e trabounan di rekonstrukshon di kaminda na Rio Canario, a pone ku masha dia hopi outomobilista ta skohe pa pasa rònt Schottegat via brùg Juliana. Ayera tur e outomobilistanan akí a keda pegá. Miéntras tantu tráfiko a pega riba Gosieweg for di altura di Radio Krioyo te na Kraamkliniek.

WILLEMSTAD – Un tata i su yu chikí a stek awe mardugá den nan kas, dor di huma kousá pa un kandela. E tragedia a tuma lugá den kareda di 4’or den Totolikaweg na Cas Cora. E tata tabatin 40 aña i e yuchi 3. Siman pasá dia 30 di aprel tambe un dama a muri ora su kas a pega na kandela.
Na momentu ku e kas a pega kandela awe mardugá, den promé instante, tantu e mama e tata i un beibi di apénas 1 aña a logra sali for di e kas. Pero na momentu ku e tata a nota ku e yu hòmber chikí a keda den e kas, el a opta pa bai bèk paden pa buska su yu. Tin indikashon ku e plachinan di geps ku kua e interior di e kas ta konstruí, a kousa un konsentrashon inmenso di huma ku a stek e víktimanan. Segun informashonnan ku LA PRENSA a kompilá, e víktimanan no tabatin hopi kemadura. Esaki en todo kaso por ta indikashon, ku en bèrdat nan a muri dor ku e huma a stek nan. Na momentu ku e tata a bai bèk paden, e vlamnan no tabata dje intenso ei. Pero ora e kier a sali esaki for di e mesun ruta esaki a resultá imposibel. Intentonan pa sali for di bentana di e kamber no a logra, ya ku e bentana tabata sigurá ku hèkwèrk.
LA PRENSA a komprondé, ku awe mardugá ora e agensia funeraria a yega na e sitio pa bai ku e restunan mortal, esaki no por a tuma lugá. Parse ku dor di e inmenso kayente, e efektivonan di TOD no por a drenta den e kas pa tuma nota di e promé detayenan ku ta importante pa sobrá di e investigashon. Konsekuentemente no por a bai ku e víktimanan tampoko, ya komo ku ta nesesario pa TOD hasi su investigashon ku e víktimanan na e sitio. Mas lat mainta ora esaki a tuma lugá, e agensia funeraria a bin bèk pa buska e restunan mortal di e tata i su yu. Mes ora a hiba nan krematorio pa e proseso di despedida por a tuma lugá.

NEW YORK – Alex Rodriguez a bai for di dje durante di nasementu di su promé yu muhé.
“Un verpleegster tabatin un paña friu na su kabes, un otro tabata koge su preshon i mi mama tabata frega su lomba i e tabata for di dje riba un sofa. Ami tabata dunando lus”, asina Cynthia Rodriguez, kasá di Alex a bisa den e programa YESterdays ku lo pasa na YES Network awe nochi.
“Realmente mi no tabata paga muchu tinu na dje, ya ku mi tabata bezig ku e dòkter i verpleegsternan ku tabata huntu ku mi”, asina Cynthia a bisa. “E tabata keña, miéntras ku ami tabata pusha i tabata puntr’é: “Dushi, bo ta bon? Dushi, bo ta halando rosea? Bo ta oké?”
Natasha Rodriguez a nase dia 24 di novèmber 2004.
“Mes tòf ku e ta mustra i ta slap ora ku e mester bai dòkter”, asina Cynthia a bisa di akuerdo ku pidanan ku nan a saka ayera for di e programa di YES.”Meimei di anochi mi a lant’é for di soño, i a bis’é ku e mester bai hospital. E promé kos ku el a bisa ta, ku si e mester yama mi mama. Algun ora despues el a yama mi mama”.
Siman pasá Alex a biaha for di New York pa Miami i a yega 10 minüt despues ku su yu muhé Ella Alexander Rodriguez a nase dia 21 di aprel.
Alex a sera konosí ku Cynthia den un gym na Miami.
“Mi a sigui su pasonan durante di un luna largu. Mi tabata kier a mira su rutina, ki ora e ta yega kon konsistente e ta. E tabata manera un mashin e tabata yega for di trabou subi “treadmill” i despues hasi su ehersisionan di buikspier. Despues di tres siman i mei mi a haña sufisiente kurashi i a puntr’é si mi por hasi ehersisionan di buikspier huntu kuné”.

NEW YORK – E Sindikato di Hungadónan di Beisbòl di Liga Grandi a ekspresá su preokupashon na e ofisina di komishonado pa e falta di oferta pa Barry Bonds i a pidi informashon adishonal tokante e merkado di agente liber durante di offseason.
E sindikato no a bai asina leu di bisa ku lo tin seramentu di kabes di e ekiponan pa no firma Bonds di 43 aña despues ku Giants a disidí di no dun’é un oferta i el a bira agente liber.
“Nos tin nos preokupashonnan general i pa algun hungadó en partikular”, asina Michael Weiner, abogado di e sindikato a bisa.
Weiner a bisa ku e úniko hungadó spesífiko ku e sindikato a trese dilanti na e ofisina di komishonado tabata Bonds, kende repetidamente a bisa ku e kier hunga su di 23 temporada den Liga Grandi.
“Mi no a risibí niun oferta pa Barry for di despues ku el a bira agente liber”, asina su agente Jeff Borris a bisa.

NEW YORK – Bo kier bai mira All-Star Game na Yankee Stadium? Prepará bo saku hopi bon, anto esaki si bo logra haña un karchi.
Un karchi pa e di 79 Klásiko di Verano dia 15 di yüli awor ta esun mas bou ta kosta 150 dollar i esaki ta yega te 725 dollar. Un subida drástiko for di e wega di aña pasá ku tabata kosta entre 75 dollar pa 285 dollar. Anto bo mester kumpra un mínimo di dos karchi.
E último bes ku tabatin un All-Star Game na New York na 1977, e karchinan tabata kosta 10-15 dollar pa box i asientonan reservá.
Pero no preokupá pa e preisnan haltu aki. Chènsnan pa haña un karchi ta mes chikí ku Roger Clemens bolbe firma ku Yankees.
Yankees i Beisbòl di Liga grandi a anunsiá ayera e aktividatnan ku ta di skèdjel i informashon riba karchinan na Yankee Stadium den un seremonia ku a keda asistí pa Derek Jeter, Yogi Berra, Alkalde Michael Bloomberg i Hal Steinbrenner.
Bloomberg a risibí un kamiseta di All Star Game.
“Ora ku niun hende no ta mira, mi ta bai dera esaki den Fenway Park”, asina Bloomberg a hasi un “joke”, loke ta un referensia ku un kamiseta ku resientemente nan a dera na konstrukshon di e Yankee Stadium nobo.
Karchinan pa públiko en general lo ta na benta solamente via di un rifa riba “online”. Fanátikonan por registrá awor pa un chèns pa kumpra dos karchi via MLB.com òf Yankees.com te ku 10’or di anochi dia 15 di yüni. E sorteo via “online” lo tuma lugá e siguiente dia. E karchinan lo keda bendé dia 23 di yüni.

Skina di Sorti, awe djarason 7 di mei di 2008, ta kuminsá ku deseá tur hende un bon dia. Ku un hende ta terko, no nesesariamente ta malu. Pero na momentu ku e terkedat ta bai kompañá ku ningamentu di realidat (e konosido fase di “denial”), e persona ta konvertí su mes den un peliger pa su alrededor. Bo ta haña un situashon kaminda defendementu di un posishon tuma ta bira un ophetivo apsoluto. Den nos realidat polítiko, bo ta topa hopi hende ku ta den e situashon menshoná.
****
No tin otro manera pa splika e situashon di kosnan inefektivo ku ta sosodé den nos práktika polítiko. Tantu den seno di koalishon komo den seno di oposishon tin akshonamentu ku bo por katalogá komo manifestashon di e realidat sosio polítiko, pero ku pa lokual ta e papel ku polítika tin di hunga den mehoramentu di kondishon general di bida den pais, simplemente un desperdisio di rekurso.
****
Entre esnan ku ta praktikando polítika, tin diferente hende ku un preparashon ku ta laga espasio pa espektativa di un aserkamentu metódiko di kualke asuntu. Tòg un grupo ku dia pa dia ta bira mas grandi, entre kual hopi hende ku simpatia pa diferente dje polítikonan, ta puntra nan mes ta pasikiko tin di bai urna.
****
Lokual ta wòrdu definí komo “electoral fraud” (engaño di elektorado dor di krea un persepshon durante di kampaña ku despues bo no ta kumpli kuné), entre otro a sosodé ku formashon dje aktual konstelashon gubernamental. Asina ku “botsende bestuursculturen” ta bira aliado, integridat polítiko ta bini bou di preshon fuerte. Mi a skirbi na algun okashon ku den Bestuurscollege di Kòrsou tin masha hopi okashon di un gobièrnu ku ta papia ku dos lenga.

MOSKU, Rusia, - E vensedó di e elekshonnan presidensial ruso di 2 di mart último, Dmitry Medvedev, di 42 aña, awe a asumí komo Hefe nobo di e Estado durante un seremonia sòlèm na Gran Palasio di Kremlin di Mosku, dilanti 2.000 invitado.
Televishon ruso a transmití e seremonia bibu i direkto.
Ku e kambio di poder na Kremlin, e Gobièrnu ruso outomátikamente a renunsiá.
E antesesor di Medvedev, Vladimir Putin, di 55 aña, mañan djaweps lo keda eligí komo Promé Minister nobo.
Putin, di kende e Konstitushon ruso a strob’é ehersé un terser mandato presidensial konsekutivo, tin sigurá su elekshon komo Hefe di Gobièrnu na Duma, ya ku e aktual eks Presidente ta dirigí e partido Rusia Uní, ku ta konta ku un mayoria di dos terser den Kámara abou di Parlamento ruso.
Putin i Medvedev ta pretendé goberná Rusia konhuntamente den próksimo añanan, ounke ainda no ta kla kon lo repartí e poder.
E ekspertonan ta kere ku Medvedev lo pèrmití Putin sigui dirigí destino di e Federashon Ruso.
Putin i Medvedev a traha huntu durante mas ku dies aña i nan a konosé otro ora ámbos a okupá kargonan den Gobièrnu di Sint Petersburg.
Medvedev, kende a presentá durante e kampaña presidensial komo un polítiko liberal, a gana e elekshonnan di 2 di mart último ku 70,28 porshento di e votonan.
Medvedev awe a bira e di tres Presidente di Rusia for di fin di Union Soviétiko, despues di Boris Yeltsin i Vladimir Putin.

WILLEMSTAD – Ayera a tuma lugá na Fundashon Adelanto Rooi Santu entrega di e Buki di Bario. Manera ta konosí Sentro pa Konosementu Sosial a start ku un proyekto piloto pa yega na un Buki di Bario. E buki aki mester yuda elevá konsenshi históriko inkluso hasi e suidadano alèrta di situashonnan den bario ku e ta biba aden. Inkluso yega na formulashon di meta i vishon. A produsí tres buki pa e zonanan di Berg Altena, Otrabanda i Rooi Santu.
Pa e okashon aki tabata presente diputado di Asuntu Sosial, Humphrey Davelaar. Pa e diputado ayera tabata un dia spesial, un dia históriko-sosial, kaminda Sentro pa Konosementu Sosial, ku ta kai bou di su responsabilidat, a kompilá e promé resultadonan di Profil di Bario. E resultadonan sistemátiko i sientífiko, ta keda presentá den forma di un buki. Ku e datonan aki tur aktor den un bario por bai traha na un manera dirigí i profeshonal riba e situashon di bida den bario.
Profil di Bario ta un forma efektivo i efisiente pa atendé ku forsanan i nesesidatnan di bario i pa trata na mehorá aserkamentu, duna struktura básiko i traha na unidat den barionan.
“Komo Diputado enkargá ku e kartera sosial, huntu ku habitantenan di kada bario, nos mester purba trese seguridat, trankilidat i alivio den e ambiente sosial di bario,” asina Davelaat a trese padilanti.
Dor di e profil di bario Gobièrnu ta sigurá ku tin informashon di barionan riba nos dushi isla Kòrsou, asina ta purba konsientisá tur hende riba situashon di bida den bario i ku kada hende por biba un bida dushi, digno i di kalidat den su bario.

WILLEMSTAD – E kompania di aviashon merikano, Continental Airlines a anunsiá, ku nan lo bai redusí nan tarifanan drástikamente pa buelonan entre New York i Kòrsou. Un pasashi di ida i buèlta lo kosta 378 dollar.
Esaki ta bin nèt na momentu ku Gobièrnu merikano ta bai manda e cheknan di rebaho di impuesto tan antisipá pa suidadanonan merikano, pa asina stimulá nan ekonomia.
Ku e preis aki pasaheronan lo skapa 100 dollar riba e buelo di sinku ora pa kada pasashi.
Aparte di esaki tin un oferta ku turistanan merikano por risibí 140 dollar komo krédito pa gasta aki na Kòrsou na restorantnan i otro aktividatnan na hotèlnan. Sinku hotèl aki na Kòrsou ta ofresiendo e oferta aki si turistanan buk un vakashon di shete anochi promé ku 17 di ougùstùs.

WILLEMSTAD - RBTT ta ranka sali ku e di shete Torneo di Tènis Hubenil na Curaçao Sport Club (CSC) djabièrnè 16 di mei awor.
Tur hóben ku ke partisipá por bin inskribí djabièrnè 9 di mei for di 6‘or te ku 8‘or di anochi na CSC.
Durante di e torneo akí deportistanan, tantu mucha muhé komo mucha hòmber, lo kompetí den e kategorianan di 10 te 18 aña.
Djabièrnè dia 16 di mei 5’or di atardi, tur partisipantenan por bin buska nan T-shirt i skèdjel di wega.
E weganan ta kuminsá djabièrnè dia 16 di mei i lo sigui den wikènt.
E ganadónan lo hunga kontra otro den e wikènt di 23 di mei pa 25 di mei kaminda e weganan final lo wòrdu hungá.
Aña pasá un total di 110 hóben a partisipá i e aña aki e organisashon ta spera mas hóben lo partisipá.
E torneo akí konosé, banda di e buèlta di ganadó, un buèlta di konsolashon.
E buèlta akí ta duna e pèrdèdónan un chèns pa bai kas ku un premio.
Ku e Youth Tennis Tournament RBTT ta demostrá ku e ta sigui inbertí den e hubentut lokal.
RBTT Bank ta invitá henter pueblo di Kòrsou i tur fanátiko di Tènis pa bin apoyá e muchanan durante di e torneo akí.

WILLEMSTAD – Plataforma KoHeHe ta boga pa logra un hubentut sano mester kontrarestá pobresa den su totalidat. Ku esaki Plataforma KoHeHe ta indiká ku e hóben ku konfiansa propio, e hóben ku ta tuma inisiativa pa yuda otro, pa yuda nan mes, ku ta ekspresá nan ideanan liber. Un ku stima naturalesa i ta konsiente di balor pa ku naturalesa ku ta dispuesto na yuda kuida e naturalesa.
Plataforma KoHeHe ta pidi pa ban promové kuido, amor i responsabilidat bou di e hubentut ku yudansa di naturalesa. Un Kòrsou ku hendenan ku ta orguyoso di nan lugá i ku ta yuda mantené naturalesa rondó di nan. Asina por krese un Kòrsou mas saludabel i dushi. Kòrsou su desaroyo ekonómiko mester kana huntu ku kuido di naturalesa. Plataforma KoHeHe ta kere ku a pèrdè hopi mondi, seru, ets. Ku mas kreatividat i inteligensia mester por logra skohe un tipo di desaroyo kaminda ta tene kuenta ku naturalesa i tòg krea aktividatnan ekonómiko.
Plataforma KoHeHe ta kere ku tipo di aktividat ku no ta afektá airu, tera, laman i kosta mester enfoká riba aktividatnan ekonómiko ku ta basa riba hende bon formá i eduká. Pa un desaroyo ekonómiko i desaroyo sosial duradero edukashon ku ta prioridat. Plataforma KoHeHe ta konsiente ku muchanan den pobresa pa ku alimentashon difísilmente por keda eduká. Pa e motibu aki Plataforma KoHeHe ta siña muchanan kon pa produsí nan mes kuminda.
Traha den kunuku (plantashon) i siña muchanan kon pa sembra simia pa por kosechá fruta i berdura despues. Asina aki por promové kuido, amor i responsabilidat bou di e muchanan ku yudansa di plantashon di berdura i fruta. Si muchanan tin e tres balornan aki dominá, despues ku nan ta hóben/adulto, nan lo ta hòmber i muhénan ku ta kuida nan mes i otro hende. Tin amor pa nan mes i otronan tambe nan lo ta hòmbernan i muhénan responsabel pa asina nan gana konfiansa di otro hendenan rondó di nan.

WILLEMSTAD – Pa motibu di preis abou di gasoil a krea un merkado shinishi. Curoil no solamente ta finansiando e merkado lokal, pero tambe e islanan den besindario. Konsiderando ku preis di gasoil ta asina abou aki na Kòrsou, esaki ta hasi ku esnan ku tin yatenan ta bin aki i yena nan tanki. “Tin yatenan ku ta bin ku nèt e kantidat ku nan tin mester, di manera ku nan por yega Kòrsou i yena nan yate ku gasoil na un preis abou ku Kòrsou tin pa ofresé.”
Direktor di Curoil Gensley Capella ta manifestá ku esaki ta e situashon ku a krea pa motibu di preis abou di gasoil. “Sa tin fin di siman ku yatenan ta pasa Kòrsou pa yena tanki pa sigui nan ruta, esaki pa probechá di e preis abou riba gasoil.”
Tambe ta konosí, ku ta yena gasoil den trùk partikular i bai bende ku otro instansianan na otro preis. Tur esaki ta loke Curoil ta na altura di dje i ku mester bin un medida pa evitá tur e kontratempu ku e kompania aki ta pasando aden.

WILLEMSTAD – Si no bin un desishon di gobièrnu riba oumento di preis di gasoil, gasolin i fuel awe, por spera ku Curoil lo aktua, pa asina evitá ku e kompania aki ta sigui enfrentá situashon delikado. E mas di 100 mion florin di pèrdida ta hasi, ku no por evitá un oumento drástiko di preis di kombustibel riba merkado lokal. Ta konosí, ku for di 2004 kaba Curoil su preis riba kombustibel no ta esun real di merkado, ya ku atraves di e añanan, preis ta sigui subi, miéntras ku e adaptashon no ta fiha riba e diferensia real pa yega na e preis ku e mester ta.
Den kombersashon ku direktor di Curoil, Gensley Capella a splika LA PRENSA, ku no por antisipá nada ainda, ya ta warda riba e desishon ku mester tuma lugá awe, den kua BC mester anunsiá kua ta e rekomendashon di DEZ pa un oumento nobo. Echo ku ta pèrdiendo 7 mion florin pa luna i ku a akumulá mas di 100 mion florin ta hasi e kompania Curoil delikado. Capella ta puntra kua negoshante ku kumpra un produkto ku bende esaki mas barata ku e ta kosta, lo por sobrebibí. Esaki ta nifiká, ku Curoil tampoko lo por logra ku esaki.
Capella ta mustra, ku e status di diferensia entre e preis real di gasoil ta 70 sèn i gasolin ta 40 sèn. Esaki ta nifiká, ku Curoil ta bendiendo gasoil ku 70 sèn mas barata i gasolin 40 sèn mas barata. Curoil a bin ta bende strukturalmente bou di preis for di 2004 i ku tin konsekuensia awe. Capella ta duna di konosé, ku na televishon awe mainta a komprondé, ku gobièrnu lo tuma desishon riba preis, despues ku ayera tabatin diferente informashon adishonal duná na BC. Den un sekshon di informashon adishonal, tantu Curoil komo Aqualectra i otro ekspertonan a mustra nan punto di bista na gobièrnu.

WILLEMSTAD - Un liña nobo di produktonan Princess a keda presentá ayera nochi den Omundo. Durante e presentashon aki e liña nobo di artefaktonan doméstiko di koló pretu ku ta masha bunita. Princess un tradishon den artíkulo doméstiko establesé for di 1944. E empresa a krese enormemente i a bira konosí mundialmente. Princess tin distribuidor den mas di 75 pais. Princess ta konosí pa eventonan ku e ta patrosiná tantu riba tereno di kultura/músika, komo deporte i beyesa. Ayera nochi e liña nobo a keda presentá bou di “Piano Black Party” den kua artefaktonan nobo masha bunita a keda lansá riba merkado lokal.

DOMITILIA
Crecencio Matirno
Mihó konosí komo
Tento
A laga atras su yu Ninoshka Domitilia i Shayron Cijntje, ñetunan Ashanty i Sharismay Cijntje, rumannan Polita Biancheville, Cicilia Pieter, Supriano Domitilia, Sabina i Franklin Simon, Clarina i Haime Chrispina. Akto di entiero ta djabièrnè 9 di mei for di misa Sta. Rosa pa santana Sta. Rosa. Bishita 1or. 3.30or tin un s.s. di misa.

VAN DEN BERG-VAN LIEROP
Edith (87 aña)
A laga atras su yunan Anthony i Lisette, suegra Karen, ñetunan Corné, Lisa i Beau, ruman Doreen. Akto di entiero ta djabièrnè 9 mei. Bishita 9.30or-11or na Bottelier.

ROMANO
Randall Raymond (trágiko)
Mihó konosí komo Juju di Paradeis
A laga atras su mama Evelyn Romano, kasá Caroline Romano-Saturnilia, yu Raviendall Romano, ruman Arnold i Shervin. Akto di entiero ta djasabra 10 di mei for di El Señorial pa santana Sta. Maria. Bishita 1or.

BRIGITHA
Nicanor Gonzalo (99 aña)
Mihó konosí komo Guiermito
A laga atras su yunan Eufrasio i Lenie Brigitha-Vijfschaft, Edna i Frank Virginie-Brigitha, Vilma Brigitha, Swinda i Eddy Regina-Brigitha, Mario i Airin Brigitha-Scoop. Akto di entiero ta djabièrnè 9 di mei 4or for di misa Coromoto pa santana Sta. Maria. Bishita 12or. Promé ku entiero tin un s.s. di misa.

PRINCE
Robert Benjamin (repentino)
Mihó konosí komo Robby
A laga atras su mama Vilma Prince-Martijn, ruman Ralph, Sheila, Giovanni Prince, Zulaika Williams-Prince. Akto di entiero ta djaweps 8 mei for di El Señorial pa santana Roodeweg. Bishita 9or. Promé ku entiero tin un respòns 10.30or na El Señorial.

WILLEMSTAD – E siman aki den un oula kompletamente yen di Rijksuniversiteit di Groningen, prof. dr. Ashley Duits a presentá su “oratie”.
Manera tur hende por ta kòrda aña pasá, Professor Duits a wòrdu nombrá komo Profèsòr na Universidat di Groningen i den e kalidat aki algun biaha pa aña e tin ku duna algun “college” na e universidat aki. Esaki ta riba su mes un distinshon masha spesial, ya ku no fásilmente un persona ku no ta residensiá na Ulanda ta haña e oportunidat aki.
E promé “college” ku un Profèsòr ta duna nos ta yama na ulandes “oratie” i esaki ta algu ku ta tuma lugá ku sierto seremonia i na kual famia i amigunan di e Professor ta asistí.
Oula di universidat di Groningen tabata yen yen di famia, amigunan i kolega dòkter di Ashley Duits, hopi ku a bini for di Kòrsou spesialmente pa presensiá e evento sumamente importante di bida di e yu’i di Kòrsou aki, ku na e edat di 45 aña ya por yama su mes Profèsòr na un di e Universidatnan mas respetá di Ulanda. Entre e presentenan tambe tabatin tantu minister Plenipotensiario, sr. Comenensia komo e remplasante di sr. Comenensia, sra. Mavis Brooks-Solomon, kende a duna Ashley Duits lès na skol básiko.
E tema di e “oratie” di Ashley Duits tabata: “Klinisch Onderwijs: Dimensies van een uniek Kwaliteitsproduct”.
Despues di e parti seremonial tur hende por a pasa duna profèsòr Duits pabien den e oula di Universidat pa mas atardi kontinuá ku e selebrashon ku un sena den Martinikerk. Despues di e sena, profèsòr dr. Robert Rojer, kende awendia ta biba na Venezuela i ku a bini spesialmente pa e aktividat di Ashley Duits Ulanda, a interpretá na un manera masha bunita mes diferente número riba piano.