E reunion lo ta dialuna awor 9 mei 2008

ORANJESTAD - Manera ta tradicion, dia 24 di juni proximo ta celebra, dia di San Juan (Dera Gay) y aki na Aruba ta celebra esaki na un forma grandi.
E dia aki ta bay acompaña pa hopi celebracion, festividad y actividad den tur bario rond Aruba.
E aña aki Departamento di Cultura Aruba (DCA) ta na encargo di coordinacion y promocion di e fiesta cultural aki. Manera ta un custumber caba e aña aki tambe lo tin e programa escolar na unda mucha di scol preparatorio y scol basico ta haya informacion y alabes ta participa activamente na wega y baile di Dera Gay.
Siguiendo cu e exito di mantencion di e tradicion aki y cu bista pa sigui engrandece nos cultura DCA ta tuma iniciativa un biaha mas pa cende e chispa di e celebracion di e Fiesta di Dera Gay di e aña aki cu ta aña di cultura, reuniendo cu e organisadonan.
Ta pa e motibo aki ta invita tur dirigente di organisacion, instancia y Centro di Bario, pa e prome reunion riba dialuna awo, dia 9 di juni pa 7’or di anochi na Departamento di Cultura, situa na J.E. Irausquinplein 2-A.
Hunto nos lo elabora riba e plannan pa e celebracion di e aña aki y planea e forma con DCA lo por contribui y duna sosten den organisacion di e fiesta den cada bario.
Pa mas informacion por tuma contacto cu Sr. Robert Maduro na telefonnr. 582-2185 of pasa personalmente na DCA, situa banda di misa na Playa.

ORANJESTAD – Diamars ultimo cooperativa UNICO a tene su prome presentacion na Club San Martin, Sta. Cruz.
E interes tabata grandi entre e publiconan presente kendenan a haya informacion amplio riba e cooperativa aki. Nan a recibi statuto, balornan y principionan di coperativismo, y formulario di inscripcion.
Cooperativa UNICO ta considera necesario pa cada ken cu ta afilia na e cooperativa ta bon conciente di e balor di cooperacion y tambe cu e aporte di e miembro ta fortalece e cooperativa. Pesei cooperativa UNICO ta organisa e tipo di presentacion aki pa asina pa fortalece e spiritu di cooperativismo riba nos isla.
AFILIACION
Afilia na UNICO ta costa afl. 25,00 pa inscripcion (pa cubri gasto di administracion, tarheta etc.) y esaki ta wordo cobra UN SOLO BIAHA. E miembro mester tin por lo menos un accion di afl. 100,00 den e cooperativa.
Depende di su forsa lo e por tin mas accion segun su consideracion y lo por paga e suma aki den 10 termino. E suma di accion SEMPER ta keda pertenece na e miembro y na momento cu e dicidi pa retira lo e recibi esaki cu eventual dividendo cu e por tin derecho riba dje.
Cooperativa UNICO ta tene cuenta cu experencianan di cooperativa tanto na Aruba como mundialmente y a formula su estatutonan teniendo cuenta cu esaki.

ORANJESTAD- Recientemente JCI Aruba a organisa un fabuloso seminario tocante “Protocol y Etiquette” presenta pa e conosido ex Chief of Protocol di Aruba Sr. Atan Lee. E seminario aki a tuma luga na Casa Del Mar y na final tur participante por a disfruta di un brindis social.
Durante e atardi e participantenan a ricibi hopi tips di canamento, bistimento, comemento y hopi mas. Hopi importante ta con Mr. Atan Lee a cuminsa e atardi cu un charla tocante con pa stima bo mes. Por a mira na e carananan di e participantenan con contento y satisfecho nan tabata cu e seminario.
JCI Aruba ta satesfecho di por a contribui na e comunidad di Aruba cu e seminario tan pedi di Protocol y Etiquette.
Di parti directiva di JCI Aruba nos kier a gradici Sr. Atan Lee pa acepta pa presenta e seminario aki na e publico di Aruba.
JCI Aruba ta forma parti di e organisacion international JCI (Junior Chamber International) cu ta consisti di jovennan profecional den nan 20 y 30 aña. E meta principal ta pa crea lidernan profecional den comunidad y na mesmomento contribui na un cambio positivo.
Pa logra e meta aki JCI Aruba ta ofrece su miembronan progamanan aliña den areanan di Individual, Business, International y Hermandad. Manera nos slogan ta bisa BE BETTER. E organisacion ta duna jovennan profecional tur e instrumentonan pa ta miho persona den tur aspecto di nan trabou, bida personal y tambe pa comunidad.

ORANJESTAD- Ayera durante oranan di mainta tempran SERLIMAR a cuminsa cu otro accion di limpiesa den e bario di Village. Esaki ta debi cu hopi desperdicio a keda acumula den e bario menciona, cual no ta agradabel y higienico pa henter e vecindario.
E causa di e situacion aki ta diverso. Entre otro, tin di menciona e problematica di chollers. Tambe, segun bisiñanan, ta e propio habitantenan ta mal uza e pida tereno publico pa deshaci di tur tipo di cos.
Describiendo e situacion, tabata increibel pa mira cuanto desperdicio ta wordo tira den e bario aki; sea canto di caminda, cerca di cura di cas y ariba terenonan publico.
Un apelacion ta bai na cada habitante di Village pa deshaci di nan desperdicio na e manera corecto y adecuado: den un container pa e desperdicio semanal y pa desperdicio cu ta consisti di obhetonan grandi, mester hiba esakinan Landfill Parkietenbos of jama SERLIMAR pa mas informacion.
Sea cauteloso kende bo ta encarga pa deposita bo desperdicio na Landfill Parkietenbos, mirando cu hopi biaha esakinan ta wordo deposita riba e terenonan habri den e propio bario y no na Landfill Parkietenbos. Esaki no ta conta pa Village so pero pa otro zonanan residencial tambe.
No obstante, tambe tin desaroyonan positivo ta tumando lugar. Asina por menciona cu tin bon cooperacion entre SERLIMAR, Polis di Barrio, Polis Ambiental y tur otro instancianan cu ta traha pa yega na un solucion, aunke cu hopi biaha esaki ta dificil y ta parce imposibel. Pa e motibo aki tambe, nada no ta envano, mirando cu e trabaonan aki ta alivia e habitantenan en cuestion.

E problema medio ambiental ta un problema nacional
Awe Dia Internacional di Medio Ambiente

ORANJESTAD- Awe dia 5 Juni 2008, Dia International di Medio Ambiente comite “Mi Futuro” di Parlamento Hubenil kier pa comunidad para un rato. Kico medio ambiente kiermen pabo? Con importante e ta pabo? Ki influencia abo tin ariba nos medio ambiente y ki influencia medio ambiente tin ariba abo?
Hopi biaha nos no ta mira medio ambiente como un topico cu mester wordo papia mas dor di nos gobernantenan of dor di paisnan grandi manera Merca. Nos tur ta conciente di problemanan medio ambiental rond di mundo.
Nos por papia bon tocante “gobal warming” y con paisnan grandi ta bezig hasi nos mundo mas peor. Pero un pregunta importante nos tur ta lubida, esta: Ami tambe ta contribui na e problema medio ambiental?
Cuanto biaha nos ta core den auto y pasobra nos no por laga sushi den auto nos ta tirele door di bentana? Cuanto biaha nos ta bai beach y pasobra no tin suficiente bari, nos ta laga e sushi djis tira abou? Cuanto biaha nos ta cana cu un hoben, un mucha of cu bo yiu y ela caba cu su juice y ba bise “djis tire abou”.
Pa cuanto tempo mas nos ta bai sigui trata nos Aruba asina. Kico nos ta bezig ta laga tras? E otro generacion tambe lo por desfruta di e beachnan blanco? Nan lo por desfruta di e bunitesa di nos mondinan of nan lo desfruta di mata dorna cu saco di plastiek di tur color?
E problema medio ambiental ta un problema nacional cu cada pais tin cu zorg cu nan ta traha pa mehora. Sigur tin pais cu tin cu traha mas cu otro pero ta keda na cada persona pa zorg cu nan ta duna e topico aki su importancia. Corda e desaroyo di awe ta e Aruba y mundo di mayan.

HARARE – E lider opositor Morgan Tsvangirai a ser librá djarason despues di nuebe ora di detenshon entre indikashonnan perverso di ku Gobièrnu ta hasi kòntròl mas fuerte riba Zimbabwe promé ku e di dos buèlta di elekshon presidensial e luna aki.
E bosero di Tsvangirai, George Sibotshiwe, a informá ku e dirigente opositor a ser akusá di un delitu di òrdu públiko “pa e akusashon falsu di a atraé gran kantidat di personanan”. E deklarashon di e bosero a ser publiká den un komunikado di e partido opositor Movimiento para el Cambio Democrático.
Tsvangirai mester a firma un deklarashon ofisial di polis promé ku el a ser librá huntu ku 14 otro dirigente di su partido. E grupo a keda detené na e warda di polis di Lupane, na nort di e siudat di Bulawayo. Un dje outonan di seguridat a keda konfiská.
“Esaki ta otro akto fo’i sla i desesperá di e régimen ilegítimo pa defendé i para boluntat dje pueblo di Zimbabwe”, e partido a bisa.
Tsvangirai, kende a regresá Zimbabwe 12 dia pasá apesar di menasanan kontra su bida, ta enfrentá e presidente Robert Mugabe djabièrnè 27 den e di dos rònt di elekshon pa presidente.
Polis a detené e grupo durante un akto di e kampaña di elekshon na diferente parti na nort di Bulawayo, e partido a bisa. Den e grupo tabatin e vise presidente partidista Thokozane Kuppe i e presidente di konseho Lovemore Moyo.

RAMALA, Cisjordania – E presidente palestino Mahmoud Abbas a proponé djarason pa reanudá kòmbersashon ku e grupo ekstremista islámiko Hamas, despues di lunanan den kua el a ninga di kòmbersá ku e gobernantenan di e Fraña di Gaza, eksigiendo ku promé nan mester entregá kòntròl di e teritorio.
Hamas a tuma kòntròl di Gaza un aña pasá, despues di a derotá e forsanan di Abbas di a ekspulsá nan di e region den un operashon militar ku a sorprendé mundu arabir.
Abbas a bisa djarason anochi den un diskurso na televishon na e palestinonan ku tin mester di “un diálogo nashonal pa implementá un inisiativa yemení... i pone fin na e divishon interno ku ta daña nos pueblo i nos kousa”.
Na Gaza, Taher Nunu, bosero di Hamas, a duna bonbiní na e proposishon di diálogo i a bisa ku ta trata “di un paso positivo”.
Abbas a bisa ku e kòmbersashonnan tin éksito “lo e yama elekshon nobo legislativo i presidensial”. Abbas a gana e elekshon pa remplasá Yasser Arafat, kende a muri na 2004, pero Hamas a bari su partido Fatá den elekshon di Parlamento na yanüari 2006.
Durante aña pasá, Abbas a insistí ku e ta pensa di papia ku Hamas solamente si e entregá kòntròl di Gaza. Sin embargo, parse el a kambia di idea pa dos motibu: e kòmbersashonnan di pais ku Israel a pega, kada bia ta mas kla ku e no por logra niun akuerdo tanten Hamas ta kontrolá Gaza.

CARACAS – E partido di Gobièrnu Partido Socialista Unido de Venezuela (PSUV) ta dispuesto na promové un kambio di konstitushon pa presidente Hugo Chávez por opta pa e re-elekshon na 2012, asina un bosero di e organisashon a deklará.
E dirigente William Lara a bisa prensa djamars ku despues di e elekshonnan regional di novèmber, PSUV lo asumí “ku fòrsa total e kambio di konstitushon pa konsultá e pueblo venezolano, na su momento, e posibilidat di ku presidente Hugo Chávez por ta kandidato pa presidente na 2012”.
E posibilidat di re-elekshon di Chávez, kua su di dos periodo di mandato ta kaba na komienso di 2013, a ser rechasá den e referèndem ku tabatin na dezèmber 2007 pa un kambio di lei ku lo kontené tambe e fihamentu di un sistema sosialista.
E vise kansier pa Amérika Latina, Francisco Arias Cárdenas, a pidi e miembronan di PSUV i e eventual gobernadornan di e partido di Gobièrnu ku por keda eligí na novèmber awor pa “tin komo promé liña, komo promé akshon, pa promové e kambio” pa logra e re-elekshon di Chávez.
Arias Cardenás, kende tambe ta fungi komo dirigente di PSUV, a indiká, den un entrevista na televishon di estado, ku e kedamentu di Chávez na poder despues di 2012 “lo pèrmití pa e revolushon stabilisá”.
“Ta realmente nesesario pa e pais, e ta nesesario pa e momento den kua nos ta biba”, el a agregá.

WILLEMSTAD – Rònt mundu awe a pone atenshon riba e manera ku e ser humano mes ta impakto su medio ambiente. Na Kòrsou tambe a dediká atenshon na Dia Internashonal di Medio Ambiente ku diferente entrevista, spich i komentario. Mundu ta pasando den problemanan serio i si nos tur huntu no aktua, nos lo hasi nos klima di biba dia pa dia mas difísil. Riba e portrèt por mira un piskadó na Playa del Chivo na Cuba tirando su reda awe mainta ku e pregunta kuantu tempu mas lo tin piska te pa e por tira reda. (Foto Javier Galeano/AP)

Skina di Sorti, awe djaweps 5 di yüni di 2008, ta kuminsá ku deseá tur hende un bon dia. Si tabata tin kestion di sigui un sierto filosofia di bida i òf biba un sorto di ideologia, diferente asuntu lo no a yega kaminda nan a yega, esta den un situashon di deskonfiansa i káos. Den nos práktika polítiko, e mayoria no sa mes kiko ta ideologia, ni filosofia i konsekuentemente ta entrega nan mes na “randgebeuren” ku ta stroba prosesonan sosial di desaroyá den un bon direkshon.

Akshon ku base den ideologia i filosofia ta mará na sierto konsistensha, koherensia i lógika. Konosementu i situashon di momentu ta kondusí na sierto tipo di akshon. E mesun tipo di echonan ta kondusí na e mesun akshon (konsistensha). Ora ta trata di hende ku no ta biba un ideologia i no tin un filosofia di bida, sirkunstansia di bida personal kombiná ku su tendensianan natural (struktura di personalidat) ta determiná su akshon.

Si tabata tin bibamentu di ideologia den FOL, lider polítiko di FOL, diputado Anthony Godett lo no ta konfrontando asina tantu problema ku sindikalismo (no ta ku shafer di bus i FKP so). Un partido di tendensia sosialista i fundá riba lucha pa e klase obreril, por diferensia den manera di akshoná pero no por ta den konflikto ku sindikalismo. Ku hende no ta biba un ideologia, e probabilidat di inkonsistensha i koherensia ta abou. Su posishonamentu ta dependé di e situashon personal i spesífikamente di e prioridatnan ku e individuo tin.

WILLEMSTAD - Manera ta konosí e siman benidero lo ta di bishita na Kòrsou un representashon femenino di sòftbòl fastpitch for di Estádos Unídos.
Pa di tres aña konsekutivo Kòrsou ta hañando bishita di un delegashon di sòftbòl mucha muhé for di Estádos Unídos.
E bishitantenan ku ta alumnonan di Universidatnan na Estádos Unídos ta probechá nan estadia na Kòrsou pa hunga sòftbòl i tambe tuma poko fakansi.
Ta e intenshon pa e bishitantenan hunga aki na Kòrsou henter otro siman.
Tur wega ta tuma lugá na Sabana Ballpark.
Liga Soraida Juliana i CSB despues di djaluna ora ku mira e representashon di Estádos Unídos den akshon lo saka un programa di wega kompletu.
Tur selekshon ku ta partisipá tin e posibilidat si nan ta haña nesesario pa reforsá ku e hungadónan ku nan ta haña nesesario.
Pa loke ta e 3 promé fechanan:
Djaluna 9 di yüni Sabana Ballpark:
Pa 7’or:
Selekshon Big League-U.S.A.
Djamars 10 di yüni Sabana Ballpark:
Pa 7or:
Selekshon Big League-U.S.A.
Djarason 11 di yüni Sabana Ballpark:
Selekshon Senior League reforsá-U.S.A.

WILLEMSTAD – International School of Curaçao (ISC) e siman aki a anunsiá, ku en konekshon ku e di 40 aniversario di e skol, a otorgá Ulysses Lashley e promé beka. El a wòrdu skohe pa motibu di su tremendo resultadonan den su estudio i tambe pa su aktitut positivo pa ku enseñansa. Ulysses Lashley lo kuminsá ku su estudio na ICS na ougùstùs 2008 i e komunidat di ICS ta kontentu ku e tambe ta uni su mes na nan famia.
E programa nobo aki, di establesé e fondo pa un beka di estudio, ta ofresé e promé beka pa un studiante di entre grado 7 pa 12, aki na Kòrsou ku por a demostrá kredensialnan akadémiko bon i ta den un nesesidat finansiero.
ISC ta ofresé un estudio basá riba e estilo merikano i ku un kuríkulo internashonal na ingles pa studiantenan di entre 3 pa 19 aña di edat. E skol ta akreditá pa ‘Southern Association of Colleges and Schools (SACS) i ta ofresé ‘International Baccalaureate Diploma Program.’ ISC aya ta ofresiendo nan servisionan pa Kòrsou i komunidat internashonal pa e último 40 añanan.
Aktualmente e skol tin 500 studiante for di lushi te 12 grado. “Nos studiantenan ta gradua i ta wòrdu aseptá na algun di e mihó universidatnan na Merka, Canada i Europa.”
Riba e foto por mira momentu ku e direktora di ICS, Dr. Margie Elhage ta hasi entrega di e beka na Ulysses Lashley den kompania di su famianan.

WILLEMSTAD – Marbella Felipa lo no konsiderá e reunion general di Sitek di awe nochi komo esun ku e ta deseá pa atendé e funshonamentu di Sitek últimamente. Segun Marbella Felipa den kòmbersashon ku LA PRENSA ta mustra ku mirando riba e funshonamentu den kua tin reklamonan di eks miembro i miembronan ku ta haña ku kosnan no ta kanando bon. Riba esaki a disidí pa manda un karta pa direktiva di Sitek ku e petishon pa un reunion general ekstraordinario di Sitek pa por atendé un ke otro.
Felipa ta sigui mustra ku e no a tuma desishon pa sali for di Sitek, pero pa mas bien buska e forma pa trata e asuntu aki den un reunion plenario. Despues di su karta el a risibí komo kontesta den un forma di reproche ku e mester buska un kantidat di firma pa por tin un reunion di Sitek. I tambe ku direktiva ta mustra ku porfin ku e mes lo asistí na un reunion, di kua no ta alkaso. E karta di Sitek ta bisa ku nan lo bai trata su petishon huntu ku e puntonan di agènda awe nochi loke sigur Marbella Felipa lo no aseptá. E reunion di awe nochi a keda yamá djamars último i ku lo bai tin masha poko miembro presente debí na e forma ku esaki a wòrdu anunsiá.
Marbella Felipa ta dispuesto pa kana i rekolektá firma pa e reunion plenario ku e ta deseá di mira di Sitek pa atendé funshonamentu di e sindikato. For di esaki sigur mester bai na logra e reunion ku mester atendé futuro di Sitek, ya ku tin hopi ta bisa ku e sindikato no ta funshoná manera e tabata den pasado. “Ami mes lo tei awe nochi, apesar ku mi no ta konsiderá e reunion aki komo esun pidí via di e karta entregá na direktiva di Sitek”, segun Marbella Felipa ta duna di konosé.

WILLEMSTAD – “Wiels tin 4 aña ta insultá tur hende i hende su kana lo por yena”, tabata deklarashon di diputado Anthony Godett na LA PRENSA. Ademas hamas diputado Godett lo no manda niun hende pa Helmin Wiels, ya ku ta su desesperashon pa ta den Gobièrnu ta hasi ku e ta purba influensiá e komunidat negativamente, segun e mandatario a duna di konosé awe mainta. Segun diputado Godett enbes di Wiels a kore bai outoridat, e mester a defendé su kurpa, ya ku tur dia e ta menasá. Ayera e mester a para pa loke a bin den su direkshon, segun e dirigente polítiko a bisa.
Diputado Anthony Godett ta pone énfasis ku hamas nan famia ta boga pa violensia, pero e echo ku tin 4 aña ku Helmin Wiels ta insultá i kalumniá no su famia, pero henter e komunidat, mester por yega un dia ku tin un hende ku lo por fada i buska kos pa regla ku Wiels. Mester tene na kuenta ku e forma ku Wiels a bin ta funshoná tur dia ku gritu pa insultá i den su lokushon ta yama tur hende afó a kulminá ayera ku el a haña un bon gòlpi ku a mand’é “tera abou”. Diputado Godett ta kere ku mester tene kuenta ku no pasobra ta su ruman, pero kualke famia ku Wiels ta insultá diariamente lo por sali pa buska manera pa para kos.
Segun diputado Godett e mes no ta atendé ku Helmin Wiels, tampoko ta manda niun hende, pero a disidí pa lag’é, konsiderando ku ta trata di un persona paranoya ku ta gritando tur dia den su desesperashon pa tin parti den Gobièrnu. “Tur dia Wiels ta mal informá pueblo i insultá ken ku e haña ta bon manera nada no a pasa. Ayera el a haña i mester a defendé su kurpa i no kore bai pa hasi denunsia lantando falsu testimonio kontra un otro persona”, tabata deklarashonnan di diputado Anthony Godett na LA PRENSA.

Lorito ta yama tur hende un felis djaweps. Ta masha kos tin di skibi pasobra ta masha kos tin ta pasando!
****
Lorito a bisa bon kla ku medionan mester asumí nan responsabilidat den tempu di krísis. No por t’asina ku un medio ta duna espasio i oportunidat pa instigashon. Aparentemente algun medio no kier komprondé esei i nan ta sigui ku nan aserkamentu di kon ku para keda. Nan ta lubidá ku nan tambe ta parti di un sosiedat i nan tambe ta promové un ansha den nos komunidat!
****
Den e siman aki nos a mira esei un biaha mas. Lorito ta kere firmemente ku un reportero mester sa kon e ta manehá un situashon ku presentá. Bo no por yega pa loko, pone mikrofon i/òf telefòn keriendo ku bo ta hasiendo bo trabou bon. Bo tambe tin ku filtra pasobra fásilmente ta usa bo den e sirkunstansianan aki.
****
Den e situashon di e siman aki tabatin hopi pèrdèdó, poko ganador. Lorito a traha un lista di ámbos. Den e pèrdèdónan tin entre otro: 1. Shofùrnan di bùs mes ku finalmente no a logra masha 2. Aliansa Patriótiko ku a kere un kos pa otro 3. Konsehero Komandante ku no a logra atrobe 4. Muchanan di skol ku a bai hasi eksamen troumatisá 4. Komunidat ku a pasa den dianan di tenshon 5. Diputado Rhuggenaath ku su ekspreshonnan 6. Pasaheronan ku tòg mester bai paga mas tantu 7. Shofùrnan ku no a wèlga i ku mester a kumpra tayer nobo 8. ABC-Busbedrijf ku tambe a sufri daño 9. E señora ku a haña sla na su outo riba Nieuwe Haven 10. Parti di medionan ku a sostené e akshonnan deskabeyá.

WILLEMSTAD – Presidente di NabaFe, sr. Armin Konket, ayera a manda un karta pa sr. William Millerson jr. ku ta presidente di NAOC, Komité Olímpiko di Antia Ulandes, tokante di un yamada telefóniko ku sr. George De Lira a hasi na CoPaBe, notifikando esaki ku na e momentunan aki el a bira presidente interino di NaBaFe.
E karta di sr. Konket ta bisa lo siguiente:
Komo presidente di NABAFE mi ta aserkábo ku lo siguiente.
Den transkurso di awe mainta mi a risibí un karta for di COPABE den kua nan ta skirbi di a risibí un yamada telefóniko di señor George de Lira. Sr. de Lira a notifiká COPABE ku na e momentu aki ta su persona ta presidente interino di e Federashon di Beisbòl di Antia i ku ya ami no ta presidente di NABAFE.
Mi ta konstatá ku sr. de Lira un biaha mas ta hasi daño na integridat i kredibilidat di NABAFE. Pió ku esei, e akshonnan aki di sr. de Lira ta hasi daño na integridat i kredibilidat di NAOC tambe. Ya na komienso di e aña aki sr. de Lira a aserká diferente instansia manera COPABE i IBAF dunando informashon ku no tabata basá riba bèrdat. No tin palabra pa ekspresá e desaprobashon i desgusto pa ku e akshon manipulativo aki di sr. de Lira. P’esei mi pregunta na NAOC ta si no tin akshon/paso ku por tuma kontra sr. de Lira.
Manera ta konosí mi a tuma retiru komo presidente di e Federashon di Beisbòl di Kòrsou (FEBEKO) tres dia pasá. Sinembargo, no tin niun relashon direkto entre e funshon di presidente di FEBEKO i esun di presidente di NABAFE. Ta nifiká ku mi renunsia komo presidente di FEBEKO no tin konsekuensia direkto p’ami funshon komo presidente di NABAFE. Ta nifiká sr. de Lira konsientemente i deliberadamente ta suministrá mal informashon na organisashonnan internashonal ku kua NAOC tambe ta mantené kontakto.

DEN HAAG/WILLEMSTAD – Ora bo tende hendenan manera Hero Brinkman papia riba korupshon na Antia, nan ta krea e impreshon komo si fuera ta na Antia so e tipo di kosnan aki ta pasa. Awe LA PRENSA a tuma nota di un kondena ku dos empleado públiko a haña na Ulanda pa korupshon. Un di nan ta traha na e munisipio Vlist i e otro na Uithoorn. Segun e akusashon di Ministerio Públiko, for di 2001 nan tabata tuma soborno di kontratistanan loke a yega na mas ku 150 mil euro. E kontratistanan a remodelá kas di e amtenarnan akí òf a paga nan outo. E amtenar di 50 aña Ties B. a haña un kastigu di 240 ora di trabou komunitario banda di un kastigu di prizòn kondishonal di 1 aña. Ademas lo kita 100 mil euro for di dje a base di e lei di ‘pluk ze’. E amtenaar Johannes R. a haña 200 ora di trabou komunitario, kuater luna kondishonal i un but di 61 mil euro. Por sierto ku e kontratista i su ayudante ku a soborná e amtenarnan akí tambe a haña kastigu komunitario kondishonal. Un otro kontratista a haña un but di 4 mil euro.
E kastigunan ku wes a duna ta mas abou ku O.M. a pidi. O.M. tabata kier a mira henter e grupo bai prizòn.

WILLEMSTAD – Outoridatnan di Salú Públiko di Antia a anunsiá un prohibishon pa importashon di komestibel ku tin etikètnan ku idioma straño. E etikètnan ku ta splika e produktonan mester ta na papiamentu, ulandes, ingles òf spañó, asina Inspekshon di Salú Públiko a informá awe. Otro etikètnan no ta kumpli ku lei antiano.
Pa basta tempu tin un inkomodidat den komunidat relashoná ku importashon di un gran kantidat di produkto djafó den idioma ku niun hende no ta komprondé. Esei ta konta por sierto no solamente pa komestibel pero tambe pa otro produktonan, manera píldora di vitamina òf pa tene peso abou. Inspekshon di Salú Públiko ta bisa ku e tambe a konstatá ku ta inundá merkado di Antia Hulandes últimamente ku komestibel ku no ta kumpli ku e reglanan preskribí den lei di etikèt.
“Regularmente ta konstatá presensia di produktonan ku nan etikèt ta na un otro idioma for di ulandes, papiamentu, ingles òf spañó, miéntras ku lei ta preskribí ku tur indikashon òf splikashon menshoná riba e etikèt mester ta den un di e idiomanan menshoná. Esaki ta pasobra e konsumidó tin e derecho pa haña tur informashon riba kontenido i uso di e komestibel ku e ta kumpra den un idioma ku e por komprondé”, asina Inspekshon di Salú Públiko ta bisa.
Ta resultá ku den último lunanan kòntròl intensivo di Duana i GGD Kòrsou a kondusí na sakamentu for di merkado di vários komestibel, pa motibu ku nan no tabata kumplí ku loke lei ta stipulá. P’esei ta urgí tur importadó, bendedó i rebendedó pa importá i/òf bende solamente produktonan ku nan etikèt ta skibí na ulandes, papiamentu, ingles i/òf spañó. Esaki por evitá situashon i konsekuensia ménos agradabel ku pèrdida finansiero, asina Inspekshon di Salú Públiko ta bisa.

WILLEMSTAD – Uso responsabel di energia ta sentral den konmemorashon di Dia di Medio Ambiente awe na Kòrsou. Diputado Sr. Humphrey Davelaar, enkargá ku e kartera di Salubridat Públiko i Medio Ambiente, a anunsiá ku Gobièrnu ta trahando duru riba un Kòrsou limpi, bunita i bèrdè i tambe riba un medio ambiente sano, kaminda ta trata pa e ambiente ta mas liber posibel di tur sorto di polushon.
Gobièrnu ta sigui traha riba mehorashon i introdukshon di tur e leinan nesesario pa protehá nos medio ambiente. Esakinan ta:
• Kompletá e Lei di Molèster Kòrsou 1994 ku:
Reglanan pa Reportahe di Efektonan pa Medio Ambiente, Reglanan pa Seguridat Finansiero, Unda ta nesesario adaptá e Lei di Molèster
• Introdusí Lei pa Kalidat di Awa, esei ta enserá awa di pos, awa di suela i awa di laman
• Introdusí Lei pa Sonido, unda ta regla nivelnan di sonido pèrmití dor di aktividatnan manera tokamentu di muzik òf aktividatnan industrial
• Introdusí normanan pa kalidat di Medio Ambiente
• Tambe mester introdusí e leinan nesesario pa por protehá nos naturalesa, tantu riba tera komo den laman
Mester bini ku tur e provishonnan nesesario pa garantisá kuido di Medio Ambiente. E provishonnan ta Aparato pa midi polushon di awa i airu.
Aparato pa midi nivel di sonido, i Treinen di personal pa mehorá e servisio na komunidat, etc. Gobièrnu ta trahando pa realisá un Servisio di Medio Ambiente fuerte i kapas pa por karga i ehekutá tur e tareanan ku tin ku kumpli ku n’e. Parti di e tareanan aki ta duna informashon na komunidat i hiba kampaña pa edukashon i konsientisashon di pueblo pa kuida Nos Medio Ambiente.

WILLEMSTAD – E kompania UTS a primintí un investigashon profundo pa evitá ripitishon di e kalamidat ku tabatin ku servisio di telefon ayera. E orígen ketu bai ta un misterio anke a haña sa ku e kalamidat tabatin di aber ku un kabel di koriente den e area di su sentral na Steenrijk, esta un kabel ku ta kore parti paden.
E insidente a kousa daño serio na ekonomia di Kòrsou i por sinti su efekto te na Islariba. E kompania a splika ku ayera mainta den kareda di mitar di 10, klientenan di UTS a eksperensiá interupshon den vários servisio debí na un problema ku koriente ku a surgi na su sentral di Steenrijk. E problema ku koriente aki, tabata unu totalmente imprevisto i ku nunka a yega di sosodé. Relashoná ku esaki tabatin interupshon den servisio di entre otro telefòn fiho, 9221, Internèt ADSL, Chippie pre-pago, sentralnan di telefon di kompanianan, datanetwerk di bankonan, telefòn públiko. UTS ta bisa ku e ta lamentá e suseso aki i ta komprondé ku esaki tabatin un impakto hopi grandi riba su klientenan. Gerensia di UTS ta pidi su mas sinsero diskulpa pa e inkombeniensia ku a surgi durante dia.
Mas aleu e kompania a splika ku UTS su prioridat number unu tabata pa mas pronto posibel resolvé e problema pa sigui brinda tur su klientenan e bon servisio manera semper. Henter e tim tékniko a traha hopi duru durante dia i a hasi nan máksimo esfuerso pa resolvé e problema mas pronto posibel pa asina aliviá e situashon. Despues di mèrdia, un gran kantidat di e servisionan a lanta bèk i pa 7.30 di anochi tur servisio a kuminsá funshoná normal atrobe ku eksepshon di algun servisio pa klientenan komersial.