WILLEMSTAD – Ken a mandami? E pregunta aki ta parse ku e picher rubiano Sidney Ponson ta hasiendo riba e foto aki. E pregunta ei ta na su lugá konsiderando e desaroyonan di ultimo 24 ora! Ayera nochi a bira konosí ku Texas Rangers ku a pasa man riba su kurason i a tuma e talentoso picher rubiano den servisio, a disidí pa deshasí di Ponson. Gerensia ta papia di kosnan ku a tuma lugá ku no ta aseptabel. Nos tin mas detaye di e desishon sorprendente aki ku ta tópiko di kòmbersashon na Merka den nos edishon di awe. (foto AP)

WILLEMSTAD, - Parlamento ulandes mester siña hasi su hùiswèrk mihó. Kore saka konklushon sin buska drechi tampoko ta digno di un parlamentario pa hasi, asina minister di Finansa drs. Ersilia de Lannooy a reakshoná riba e posishon ku vários parlamentario ulandes a asumí riba maneho fiskal na Antia.
Tal manera nos a informá kaba na kuminsamentu di e siman aki, e maneho di kobra belasting na Antia tabata tópiko di diskushon den Parlamento ulandes. Partikularmente partido sosialista di Ulanda a kuestioná i kritiká e asuntu aki severamente.
Si tur hende kumpli ku nan obligashon pa paga belasting konforme lei, anto Antia lo weta kon el a solushoná tur su problemanan finansiero, Ronald van Raak di Socialistische Partij (SP) den Parlamento ulandes a bisa na e okashon ei.
Loke ta iritando e parlamentarionan mas i mas ta e hecho ku Ulanda a komprometé su mes pa eliminá e debe nashonal di Antia te na e montante di 2 mil mion euro, ku ta alrededor di 5 mil mion florin antiano.
Hopi parlamentario tin problema ku e hecho ku ta e pagadó di belasting ulandes mester bai skupi e plaka aki.
El a bisa ku el a komprondé ku tin hopi hende pero tambe hopi kompania ku no ta kumpliendo ku nan deber di kontribuí ku kaha di Gobièrnu, pagando belasting manera mester ta.
Paul Comenencia, minister plenipotensiario di Antia na Ulanda, tabata presente durante e debate aki, pa duna informashon, manera e mes a bisa, riba e situashon fiskal di Antia i el a desmentí den forma kategóriko ku por konsiderá Antia komo un paraiso fiskal, manera kada be ta bin dilanti den mundu polítiko ulandes.

WILLEMSTAD, - E haf di piskadó na Rif, awor por konta ku un laman mas profundo, loke ta fasilitá aksesibilidat pa piskadónan. Piskadónan no mester warda riba nada, pa subi laman òf yega tera. Ta un bèrgwensa si, ku piskadónan mester a warda 55 aña pa a yuda nan, asina diputado enkargá ku entre otro Agrikultura, Krio di Bestia i Peskeria a bisa ayera tardi, na okashon di entrega di e proyekto.
Pasando ku un boto dor di un sinta oraño na entrada di e haf, e diputado ofisialmente a hasi entrega di e haf menshoná.
Victor Supriana, un piskadó di un trayektorio largu, a gradisí e mandatario pa e trabou ku e ta konsiderá di vital importansia pa futuro di piskadónan na Rif.
Promé ku e trabounan, e laman tabatin un profundidat di apénas 1 meter i algu. Esei tabata pone ku ora laman su nivel ta abou, botonan no por sali miéntras ku si e boto ta afó piskando, e no por drenta haf mesora. Despues di e trabounan, e haf awor tin un profundidat algu mas ku 2 meter.
Ta trata aki di un proyekto ku a kosta 292 mil florin i ku a ser finansiá pa USONA. E proyekto aki ta forma parti di un proyekto total bou di e nòmber “Drechamentu di Hafnan di Piskadó”, asina Pablo Burgos, funshonario di LVV enkargá ku e proyekto aki, a anunsiá.
E proyekto tabatin su difikultatnan kuné, asina Burgos a rekonosé. El a bisa ku no opstante esaki, LVV ta kontentu ku a logra finalisá e trabou na benefisio di piskadónan.
Banda di e haf di piskadó na Rif, tin den kuadro di e proyekto grandi aki drechamentu di e haf di piskadó na Kura Buriku i drechamentu di e pir na Mari Pampun.
Diputado Anthony Godett a mustra ku Gobièrnu di Kòrsou ta yudando sektor di piskamentu mas tantu posibel.
“Ya kaba den e periodo ku mi ta diputado, nos a hasi vários kos, entre otro e slipway na Playa Kanoa, e slipway na otro hafnan di piskadó i vários kos mas”, el a bisa.
Godett a bisa finalmente, ku Gobièrnu ta konsiderá tambe importante pa traha riba unifikashon di piskadónan na Kòrsou.
“Nos lo sòru pa pueblo di Kòrsou haña loke e meresé i loke e tin derechi riba dje”, el a añadí.

WILLEMSTAD, - E kompania Aqualectra ta bai traha mas serio riba e posibilidatnan ku e tin pa produsí energia alternativo. Asina lo bai invertí mas tantu den e parke di mulina di bientu pa asina ekspandé e kapasidat, Anthon Casperson, direktor interino di Aqualectra, a anunsiá.
Casperson a bisa esaki, den kuadro di e oumento konstante ku Kòrsou a bin ta konosé di preis di energia.
Ta konosí ku Aqualectra a hasi un petishon pa oumentá koriente ku 18.9 porshentu miéntras ku awa esei mester bira 7.5 porshentu.
Entretantu t’asina ku for di siman pasá, e oumento di koriente di 18.9 porshentu a drenta na vigor. E oumento di awa si ainda ta pendiente. Nos a komprondé ku Gobièrnu ke mas informashon di parti di Servisio pa Asuntunan Ekonómiko pa asina por tuma un desishon final, segun Casperson a aklará.
“E situashon aki no ta den nos man: e oumento inkreibel di preis di krudo riba merkado mundial ta pone ku simplemente nos no tin eskoho”, Casperson a ripití.
El a mustra ku loke si Aqualectra por hasi, ta di traha mas intensivo riba proyektonan pa generá energia alternativo. Lo buska forma pa produsí koriente na un manera mas efisiente, el a bisa.
Asina por ehèmpel a disidí kaba ku ta bai invertí mas tantu den e parke di mulina di bientu tantu na Playa Kanoa komo na Tera Kòrá.
Loke Aqualectra tin aworakí na kapasidat ku e parke di mulina di bientu ta 12 megawòt. Esaki ta representá 6 porshentu di loke komunidat di Kòrsou ta usa.

WILLEMSTAD, - Un total di 75 persona a inskribí pa e simposio ku ta tuma lugá dia 12 di yüni awor, un simposio ku e meta pa sinkronisá pensamentu i akshon riba tereno di maneho di adikshon.
Esei ta loke sekretario di estado enkargá ku salú públiko Joan Smart-Berkel a anunsiá ayera.
Gobièrnu Sentral ke yega na un solo maneho di adikshon aki na Antia. Aworakí esei ta diferente riba kada isla di Antia. Ku e meta aki, Gobièrnu ta organisá e konferensha pa asina pone tur nanishi den mesun direkshon, segun Smart-Berkel.
E problema di adikshon ta un kos serio den nos pais, asina e mandatario a mustra den deklarashonnan formulá algun siman pasá. Aworakí tin komo 150 adikto na droga ku mester haña tratamentu.
Brasami, e sentro ofisial di Gobièrnu, ku ta dediká su mes na tratamentu di esnan ku ta adikto na droga, no por akapará e personanan aki. Manera ta ampliamente konosí, no tin espasio – ni tampoko e medionan finansiero – disponibel pa por atendé ku nan tur.
E sentro Brasami aki na Kòrsou a enfrentá problema finansiero durante un periodo prolongá algun tempu pasá. Joan Smart-Berkel a bisa ku el a logra establesé un departamentu pa hende muhé den Brasami pa atendé ku drogadikto. Pero mi no ke sigui ekspandé esei sin mas, pero ke hink’é den kuadro di un pida maneho, el a bisa. E mandatario di tur manera ke atendé e tipo di kosnan aki den un pakete.

WILLEMSTAD, - Outoridatnan na Islariba a konfiská no ménos ku 480 kilo di kokaina, den un boto den awanan di St. Maarten. Wardakosta di Antia i Aruba a detené 3 miembro di tripulashon ku tabata na bordo di e barku.
T’asina ku Wardakosta, durante un kòntròl rutinario a deskubrí rasgonan di droga na bordo di e barku en kuestion.
Na e momentu ei a konsiderá nesesario pa dirigí e boto pa waf, pa asina por hasi un mihó kòntròl.
Durante e kòntròl profundo aki, den koperashon ku Imigrashon di St. Maarten i tambe outoridatnan di St. Maarten franses, a bin haña no ménos ku 21 bulto konteniendo 480 kilo di kokaina.
Manera indiká kaba a detené e 3 miembronan di tripulashon i a kuminsá mesora ku un investigashon profundo di e kaso aki.
Mester bisa ku último tempu outoridatnan ta kapturando lotenan grandi di kokaina. No mas ku algun dia pasá, a konfiská tambe un lote di 350 kilo di kokaina. Ku konfiskashon di lotenan grandi di droga asina’ki, negoshi di narkotrafikashon ta haña un sla formal.

WILLEMSTAD -- Apesar ku Henry Jones, tata di e antiano mihó pagá den deporte, semper el a keda ku su pianan riba tera. Humilde i trankil. Semper e tin tempu pa kòmbersá ku tur hende prinsipalmente si ta trata di beisbòl.
Un pregunta ku hopi ta hasi a haña kontesta siman pasá durante di kòmbersashon ku Orlando Nicolina.
Kual ta e tres logronan òf hazañanan di kual e ta mas orguyoso di e karera di Andruw?
“Na promé lugá di a establesé su mes den Liga Grandi, number dos di a kibra e rekòrt di tur tempu di “The Big Man”, Mickey Mantle.
Opviamente referiendo na Jones su honron na 1996 den ‘World Series’ ku a kibra rekòrt di Mickey Mantle komo e pelotero mas hóben pa konektá di honron den un Seri Mundial. Mantle a konektá ku 20 aña di edat na 1952 kontra e picher Billy Loes, miéntras ku Andruw a konektá ku 19 aña kontra Andy Pettitte.
“Number tres, Andy su promé Wega di Strea den Liga Grandi.
Normalmente mi tin hopi kòntròl riba mi emoshonnan, pero na momentu ku mi hisa kara mira e bandera di Kòrsou den e multitut ei........awa ta yena mi wowo”, asina Jones tata, a splika.
Pa loke ta e operashon ku tin A.J. aktualmente riba DL, el a bisa ku tabata unu di diesinku minüt i tur kos a bai bon.
“Ku poder di Dios, Andy lo ta oké pa loke ta su aktuashon tambe. Nan ta kere hopi den dje aya na Los Angeles”, asina e èks centerfielder di Royal Scorpions a finalisá bisando.

WILLEMSTAD - Djadumingu, 8 di yüni 2008 lo bai tin e final di e kompetensha ‘di Lèter pa Palabra’ i un total di 25 skol i 64 partisipante lo kompetí den e di tres i último ronda. Na final di e kompetensia lo saka e 3 alumnonan ku por deletrá mas mihó, kada unu den nan kategoria di edat.
Na e promé ronda, ku a keda organisá pa e skolnan mes, tabatin un averahe di 50 partisipante na kada skol ku a kompetí. For di e partisipantenan aki kada skol a saka 6 finalista pa representá e skol den e di dos ronda, ku tabata un ronda regional, kaminda skolnan di e diferente barionan a kompetí kontra di otro. Un total di 158 partisipante a kompetí den e di dos tanda i for di esakinan 64 finalista a klasifiká pa bai e final. E 64 finalistanan ta repartí den tres kategoria di edat i den kada kategoria tin un máksimo di 21 partisipante. E grupo aki lo bai deletrá den nos dushi idioma papiamentu.
E kompetensia ‘di Leter pa Palabra’ ta algu úniko pa Kòrsou ya ku ta promé bes ku un tipo di kompetensia asin’aki ta keda organisá. E kompetensia tin komo punto di salida sentido di patriotismo. Sentido di patriotismo di un pais ta manifestá su mes tambe den e uso korekto di su idioma, den nos kaso papiamentu. Banda di e hecho ku nos muchanan ta haña mas konosementu, apresio i balor pa nos idioma papiamentu e ta krea un plataforma nobo di kompetensia sano entre skolnan. Resultado di esaki ta ku bo por mira bon kla e interes serka nos muchanan pa siña papia i skirbi papiamentu korektamente.

WILLEMSTAD - E siman aki tabatin un delegashon di Kadaster Hulanda di bishita na Kòrsou pa duna konseho tékniko i hurídiko na Kadaster di Kòrsou kon pa hasi e proseso di kadastrering pa e isla aki.
Den e struktura aktual tin un registro di plantashi ku ta data di e periodo promé ku a kuminsá registrá propiedat na 1868. For di e periodo ei te awor Kadaster a konosé 4 sistema mas pa registrá propiedat. Te aña 1940 a traha rooibrief despues a traha meetbrief.
Tambe tin sierto partinan di Kòrsou ku a wòrdu registrá den un sistema kadastral bieu i otro áreanan den kadastral nobo. Ku e proyekto aki Kadaster ta bai integrá tur e 5 sistemanan aki den un solo sistema kadastral. Esaki lo nifiká ku tur parsela na Kòrsou lo bai haña un identifikashon nobo.
E proyekto aki lo resolvé defisiensia di e diferente sistemanan aktual i permití Kadaster mantené un registrashon di un forma mas efisiente.
Riba e foto d.r.p.d. ing. L. Mathilda (manager Kadastrale Metingen), sr. K. van der Hoek (Kadaster Hulanda), sr. K. Welter (Kadaster Hulanda), ir. G. de Palm (direktor Kadaster Kòrsou).

WILLEMSTAD – Deurwaarder a presentá na boka di trabou resientemente di diferente suidadano, pero pa algu ku ta nobo: beslag riba salario pa forsa pago di but. Prokurador-General di Antia Dick Piar a konfirmá ku Ministerio Públiko a kuminsá ku e trayekto aki pa asina fòrsa e suidadano kumpli ku su obligashon.
Awor aki t’asina ku ora un hende haña un but, e por paga esei mesora. Pero den e kaso ku e warda e kaso bai Korte i Korte duna un veredikto ku bira definitivo, e hende mester paga. Ta resultá ku no opstante esei tin hende no por òf no kier paga. Nan ta haña diferente aanmaning i tòg nan no ta kumpli. Semper ta posibel yega na un areglo di pago, pero tin hende ta pèrsistí den nan aktitut pa no paga. “Den e kasonan ekstremo, nos ta manda deurwaarder na nan boka di trabou”, asina Piar a bisa. Si e hende no ta trahando òf si e hende ta malu, por yega na situashonnan kaminda por eksonerá e hende di pago te ora su situashon mehorá.
Riba e pregunta di kon a skohe pa e sistema rígido aki, Prokurador-General a bisa ku a kuminsá ku e trayekto aki pa evitá ku mas i mas hende ta bai prizòn. Awor aki ora un hende sin paga su but, e por bai pariba pa e kantidat di dia ku e but a kosta. Pa kada 25 florin, un hende tin ku bai sinta un dia. Ku e kantidat di but ku ta partiendo, ta lógiko kere ku por bai sera tur hende.
Pa loke ta trata e kobransa di but, Prokurador-General a bisa ku den 2006 a kobra 737.851,62 florin i na 2007 461.537,31 florin. Den e promé tres lunanan di e aña aki a kobra 104.586,38 florin di but. Ta bon pa bisa ku e kantidat di but kobrá den un aña no ta but di e aña so, pero parti di dje ta di un òf mas aña promé.

Lorito ta yama tur hende un felis djasabra. Por poko Lorito no tabatei awe. Na momentu ku Lorito tabata bula banda di La Orchila, nos a mira un kos ku yen di huma ta bula bin den nos direkshon. Promé ku nos por a tuma akshon, un misil a pasa serka banda di nos. Lorito su wowo a keda pika di huma. Despues Lorito a tende ku ta Chávez ta train ku misil.
****
Lorito a spanta i nos a yama Fòrti. Na Fòrti nan no tabata hisa telefòn. Ora porfin nos a haña un hende outorisá na telefòn, el a bisa nos masha kla: “Nos no tin komentario!” Lorito a bis’é bon kla ku e próksimo biaha nos lo vota pa Hillary, pasobra alomenos e tei pa hisa telefòn 3’or di mardugá. Te awor aki skibiendo, Lorito tin masha spantu den su kurpa!
****
Lorito a yama Duana tambe pa nan chèk tur buelo for di Venezuela masha bon. Nos no kier pa djis aki nos tende ku tin Kalashnikov i hasta misil a drenta aki. Ora un pais ta importá hopi arma, parti di e arma ta bai pèrdè serka e bisiñanan. Nos mester ta masha alèrta!
****
Un bonbiní na e selekshon di Venezuela ku a bin aki pa un wega di fogeo. Nos ta spera ku nan no a bin ku niun misil. Si ta ku misil nan a bin pa tereno di wega di bala, anto nos tin sufisiente eksperto pa neutralisá nan den nos selekshon.
****
Awe Kampionato Oropeo di Futbòl ta kuminsá i nos ta masha ansioso pa mira algun bon partido. Ayera nos a mira un pènel na NOS-Journaal ku a pronostiká ku Ulanda lo bira kampion. Lorito a tuma nota ku ya kaba tin sierto tenshon den e selekshon di Ulanda. Parse ku Robben a drenta muchu fuerte riba Schneider den training i a kos a kue un buèlta mahos. Maske kon Van Basten a trata di kontestá e preguntanan masha diplomátiko, no a saka nada for di dje! Lorito a puntra (kòrda ta puntra nos ta puntra) ku si tabata un hungadó di koló a hasi esei, si e kos tabata diferente!