ORANJESTAD- Den un Piedra Plant Entertainment Center yen, a tuma lugar ayera nochi e seccion final di e Aruba Model Search 2008.
Na final di e anochi, a keda determina cu Kaylan Cooper a bira e Female Model 2008 di AMS mientras cu Adrian Cardozo a keda eligi como e Male Model 2008.
Na prome instante a eligi e cinco finalistanan den e categoria di e damanan caminda e cinconan a bira Michelle Gesterkamp, Sabrine Setrochemiro, Patty Stephens, Kaylan Cooper y Marielle Tromp mientras cu den e cabayeronan e cinco finalistanan a resulta di ta Edwin Bouwers, Allan Brown, Adrian Cardozo, Edward Eman y Pierre Casser.
Finalmente e panel di huradonan di Aruba Model Search a opta pa eligi Kaylan Cooper y Adrian Cardozo como e ganadornan di e famoso evento aki, cu ta goza di gran interes serca e hobennan.

ORANJESTAD- Diadomingo marduga dos tipo a cana yega na e garoshi di bende hotdog y hamburger den De La Sallestraat, y a dicidi di pidi cuminda y a come na e sitio mes.
Ora cu nan a caba di yena nan bariga, un di e tiponan a dicidi di saca un cuchiu for di saco di carson y a cuminza amenaza e doño di e garoshi pa e entrega e tas cu placa aden.
Tabata dos tipo di habla spaño y caminda a sigui un lucha formal ya cu e doño no kier a entrega e placa cu el a traha duro p’e e anochi aki.
Sinembargo e tiponan a resulta di ta mucho fuerte pa e homber y a logra di ranca e tas cu placa, cruza caminda y desaparece den e mondi dilanti di e lugar, cu ta net dilanti di Welcome Snack.
Mesora a bati alarma y polis a yega na e sitio y a inicia un buskeda den e vecinderio y polisnan a logra di pone man riba un di e antisocialnan aki, kende a wordo reconoci pa tanto e victima como otro testigonan cu tabata na e lugar.
El a keda deteni y encarcela y por spera cu e otro topo tambe lo wordo deteni pa polis.
Ultimo tempo ta masha hopi di e casonan aki a bin ta tumando lugar, esta cu antisocialnan ta buscando un entrada y ta bai over na horta cualkier lugar pa nan por haya algo di placa pa nan cosnan.

ORANJESTAD- RCA a sorprende y Britannia a defrauda, asina por conclui e prome wega di e final di division di Honor, cu a inicia diasabra anochi.
RCA cu dos gol di e hoben Jean Luc Bergen ta bin supera Britannia cu anotacion di 2-1 y asina pica dilanti den e serie final aki.
Un wega cu tabata bastante fuerte fisicamente y cu a conduci na dos expulsion, uno di parti di Britannia cu a mira Juwana keda expulsa mientras cu Maurice Escalona tambe a bandona e partido cu dos carchi geel.
RCA a pica dilanti pa medio di Bergen den e parti inicial di e partido pero cu gol di Juwana Britannia ta empata e partido na 1-1 y den di dos parti tabata Bergen kende un biaha mas ta anota pa duna RCA e triunfo importante aki.
Britannia no a hunga e futbol cu a spera di dje, caminda e ekipo a mustra lento riba tereno, cu poco variedad y poco creatividad.
RCA a domina e medio campo y no a permiti Britannia crece den e sector aki y eynan e exito grandi a sinta pa e ekipo tricolor.
Un publico grandi a presencia e prome wega di e final aki y diabierna venidero lo tin e di dos partido caminda RCA tin mester di solamente un empate pa corona su mes como campeon di futbol di division di Honor.

ORANJESTAD- RCA a sorprende y Britannia a defrauda, asina por conclui e prome wega di e final di division di Honor, cu a inicia diasabra anochi.
RCA cu dos gol di e hoben Jean Luc Bergen ta bin supera Britannia cu anotacion di 2-1 y asina pica dilanti den e serie final aki.
Un wega cu tabata bastante fuerte fisicamente y cu a conduci na dos expulsion, uno di parti di Britannia cu a mira Juwana keda expulsa mientras cu Maurice Escalona tambe a bandona e partido cu dos carchi geel.
RCA a pica dilanti pa medio di Bergen den e parti inicial di e partido pero cu gol di Juwana Britannia ta empata e partido na 1-1 y den di dos parti tabata Bergen kende un biaha mas ta anota pa duna RCA e triunfo importante aki.
Britannia no a hunga e futbol cu a spera di dje, caminda e ekipo a mustra lento riba tereno, cu poco variedad y poco creatividad.
RCA a domina e medio campo y no a permiti Britannia crece den e sector aki y eynan e exito grandi a sinta pa e ekipo tricolor.
Un publico grandi a presencia e prome wega di e final aki y diabierna venidero lo tin e di dos partido caminda RCA tin mester di solamente un empate pa corona su mes como campeon di futbol di division di Honor.

WILLEMSTAD – Awe nochi den stadion Ergilio Hato lo tin un wega di fogeo pa tantu e selekshon di Antia komo esun di Venezuela.
T’asina ku e selekshon di Venezuela djabièrnè último a sabi di gana di e selekshon di Brazil ku lo bai partisipá na Weganan Olímpiko ku skor di 2-0. Esaki sigur a subi nan ánimo pa por bai enfrentá Uruguay dia 14 di yüni awor den e eliminatorionan pa Mundial 2010.
E selekshon di Antia a praktiká ayera i tabatin algun leshon chikí.
Robin Nelisse manera nos tur sa, lo no t’aki i lo no hunga den e wega di dia 15 di yüni awor na Haiti pa motibu di e sufri un leshon na un ènkel ku su ekipo nobo di Oustria.
Despues di hunga aki e selekshon di Venezuela lo pasa nan pais un ratu, ya ku nan mester sigui di biahe pa Uruguay pa hunga djasabra 14 di yüni.
Djasabra sr. Leen Looyen a biaha pa Honduras pa mira e selekshon di Haiti den akshon kontra di e selekshon di Honduras.
Honduras a gana e wega 3-1, pero Haiti no a mustra un ekipo fásil mester traha duru pa gan’é.
Pues tur kos ta kla pa e wega di awe nochi.
E asistensia mester bira grandi pa sostené e selekshon di Antia kontra di Venezuela i ademas ta un gran oportunidat pa mira e selekshon di Venezuela den akshon ya ku nan futbòl a bai dilanti ku pasonan gigantesko.
Entrada pa awe nochi ta fl. 15,-. Un pakete pa e wega di awe nochi i di dia 18 kontra di Honduras ta kosta fl. 20,-. Mucha i 60+ ta kosta fl. 10,-.
VIP pa awe nochi ta kosta fl. 100,- i pa dos wega fl.150,-.

WILLEMSTAD – Breakpoint Pool Café na Granbeeuw tabata esenario di otro Tour Bola 8, e di dos edishon di Federashon di Biyar Kòrsou, ku a konta ku partisipashon di 52 hungadó den e evento aki di e total di 14 aktividat individual pa aña 2008.
Den e Tour 1 tabata e kargadó di e título di Kampion di Kòrsou den e disiplina ariba menshoná, Raymond Magdalena, ku a bai ku e título den e promé evento.
For di djaweps 29 di mei te ku djaluna último e torneo, pa hopi tabata un viktoria i pa otro un desepshon. Kuater hungadó a dominá den e buèlta ganador.
Den e parti ariba di e skema Johnny Hellmund i Anthony Wever tabata na kabes i den e parti abou Rafael Flores i Salim Kuzi.
Den e pelea pa e stul kayente Hellmund ta gana di Wever 6-4 i Flores tambe ta gana di Kuzi ku igual skor.
Hellmund i Flores ta enfrentá otro i finalmente e promé ta bai okupá e stul kayente ganadó 7-2.
Raymond Magdalena den su di dos partido ta keda mandá buèlta di pèrdèdó pa David Prins ku skor di 6-4.
Na e momentu aki ta inisiá e ruta largu ku opstákulo ku ta hiba Magdalena na su último partido.
Dos biaha e mester a duna su mihó wega pa superá tantu Jeffrey Nieuwenhuyzen i Salim Kuzi ganando nan 5-4.
Ku shete viktioria tras di otro esaki ta hib’é final.
Empatá na puesto number 5 ta keda Anthony Wever i Salim Kuzi. David Prins ta keda na e di kuater lugá i Rafael Flores ku tabatin un bon aktuashon den e torneo ta keda na e di tres lugá.

CARACAS, Venezuela, - E Presidente venezolano, Hugo Chávez, ayera a pidi e lider nobo di “Fuerzas Armadas Revolucionarias de Colombia” (FARC), Alfonso Cano, pa libra di manera unilateral tur rehen di e grupo den selva komo promé paso pa logra pas n’e pais aki.
E mandatario, kende a risibí señalamentunan ripití pa apoyá FARC, riba petishon di Bogotá aña pasá a intermediá pa logra un interkambio humanitario ku lo pèrmití liberashon di mas o ménos 50 persona sekuestrá pa motibunan polítiko den man di e gueria iskierdista, pa mas ku shen milisiano presu.
“Mi ta kere ku a yega e ora pa FARC libra tur rehen ku ta den seru. Esaki lo ta un gran gesto, humanitario, ku kambio di nada, asina ami a plantia awor ku tin un hefe nobo”, Chávez a bisa durante su programa semanal di radio i televishon “Aló Presidente” for di Santa Ana de Coro, Venezuela, dor di referí na Alfonso Cano, kende a bira lider di FARC despues di morto di Manuel Marulanda, okurí 26 di mart último.
E lider venezolano a ekspresá ku “esei kisas tabata loke mi kier a bisa Marulanda”, i el a lamentá di no por a logra aprobashon di Colombia pa reuní kuné.
“Awor mi ke bisa Cano: libra tur hende! Tin hendenan muhé, ansianonan, hendenan malu, sòldánan kendenan tin asta 10 aña einan. A yega e ora, Cano, asina ami ta kere. E guera di guerianan a pasa pa historia!”, Chávez a sentensiá.

WILLEMSTAD - Promé minister di Antia a manda un karta pa presidente di Staten, dia 29 di mei último. Den e karta ei e Promé Minister ta pidi pa Parlamento pa duna su opinion riba un dekreto gubernamental di Reino, pa loke ta trata e supervishon finansiero. Ta e intenshon pa e Konseho di Minister di Reino, trata e proposishon dia 11 di yüli, pa wak si nan ta disidí pa mand’é pa Raad van Staete, pa haña konseho. Promé ku esei, Parlamento Antiano, meskos ku e konsehonan insular di Kòrsou i Sint Maarten lo mester duna un opinion riba e konsepto ku ta riba mesa. Despues ku Parlamento a risibí e karta, presidente di Parlamento, Pedro Atacho a tuma nota tambe di un karta fechá dia 2 di yüni di e frakshonnan di PAR, National Alliance, Frente Obrero, Partido Nashonal di Pueblo i WIPM. E partidonan aki ta pidi un reunion públiko riba e dekreto gubernamental aki. Ta p’esei Parlamento ta konvoká un reunion públiko konforme e petishon.
E reunion ta tuma lugá djaweps awor mitar di tres, di manera ku Parlamento por duna su posishon, enkuanto dekreto gubernamental di Reino riba supervishon finansiero.

WILLEMSTAD - “Ami lo vota na fabor di e 15 porshento, ora e proposishon di lei aki drenta parlamentu di Antia. Mi ta sigui kere ku un oumento di 15 porshento ta hustu i na su lugá aworakí,”asina parlamentario mr. Faroe Metry, motor tras di e oumento di sueldo mínimo a deklará.
KU esaki, Faroe Metry a ripití e posishon ku el a asumí for di kuminsamentu – i ku LA PRENSA a relatá ekstensamente kaba – ku e no ta kita for di su punto di bista ku esnan ku ta gana sueldo mínimo meresé un oumento di por lo ménos 15 porshento.
Metry a hasi e deklarashonnan aki, despues di e diskushonnan ku a surgi rondó di e tema aki, ku kasi-kasi a bira kontroversial.
Parlamentu di Antia, resientemente a trata e tema aki den un reunion di Komishon Sentral.
Básikamente tin tres proposishon riba mesa: e promé di parlamentario Faroe Metry ku a haña 18 miembro su tras, e proposishon di minister Elvis Tjin Asjoe ku ta na fabor di un oumento di 18 porshento, miéntras ku entretantu Banko Sentral di Antia, tambe a proponé un oumento, pero ménos fuerte, di 8 porshentu. Banko Sentral a basa su mes riba argumentunan ekonómiko, indikando ku ta esei ekonomia di nos pais por karga awor aki.
Den e reunion di parlamentu, a lanta e impreshon ku un mayoria frakshon ta na fabor di e último aki, esta e proposishon di Banko Sentral di Antia.
Pero a surgi un diskushon den e dianan ku a sigui i tin duda atrobe kiko kada frakshon ta para p’e.

ARIES: Un periodo di kresementu o renovashon na nivel personal ta kuminsá pa bo awor. Ta bon pa bo konosé bo mes komo individuo i deseo di logra den bida. 04,36,20.

TAURO: Bo bida spiritual ta wòrdu toká. Bo ta mas uní den esnan ku mester di ayudo i ofresé bo mes sin kondishon. Na bo banda no ta falta ken ta sirbi di maestro. 08,41,27.

GEMINIS: Aktividatnan den grupo spesialmente esnan ku ta relashoná ku bo trabou, amistatnan, lo ta di gran ayudo na momento ku bo mester di nan. 36,19,07.

KANSER: Hasi tur lo posibel pa logra un lugá di prestigio i e energia ku bo ke tin. Hasi tur lo posibel pa bo mehorá tur kos ku ta rondó di bo. 10,30,22.

LEO: A presentá hopi oportunidatnan pa biaha, tambe e posishon di por eduká o siña otro personanan ku tin deseo di siña. 49,18,06.

VIRGO: Suerte ta benefisiá awor di e bon fortuna di otro personanan. Ta tempu di uni forsa pa hasi negoshi en konhunto. Si bo mester pidi fiansa na banko, hasié awor. 33.

LIBRA: Matrimonio i union ta favoresébu grandemente i pa bo kasa o uníbu sentimentalmente ku un hende. Si bo mester ayudo profeshonal, no duda di hasié. 18,09,01.

SKORPION: Tur loke kontribuí na bo kresementu o desaroyo personal ta bria awor. Bo kas tin un splendor riba dje e dianan aki. 45,21,31.

SAGITARIO: Tur bo relashonnan ta sufri un kambio. Ta e momentu ekselente pa desaroyá kualkier kos artístiko ku bo tin. 30,05,24.

WILLEMSTAD – “Ku aprobashon di e proposishon di lei pa introdusí e Kolegio pa Supervishon Finansiero (Cft), Kòrsou a pone un paso mas de direkshon pa kuminsamentu ku saneamentu di debe”. Esei, di akuerdo ku diputado di Finansa di Kòrsou Mike Willem.
Despues di hopi krítika, hopi konmoshon rondó di e trayekto aki, Bestuurscollege siman pasá a bai di akuerdo ku e kondishonnan den e Algemene Maatregel van Rijksbestuur pa instituí e kolegio menshoná.
E Algemene Maatregel van Rijksbestuur, ku ta regla supervishon finansiero tantu pa pais Antia, Kòrsou komo St. Maarten, lo ser tratá djarason awor den Komishon Sentral di Konseho Insular.
Ku e trayekto aki, gobièrnu di Kòrsou a pone un paso konkreto mas pa realisá e struktura finansiero temporal nobo pa Kòrsou ku lo keda vigente te ora Kòrsou haña su status di pais outónomo den Reino. Esaki ta enserá konkretamente ku ta instituí e Kolegio pa Supervishon Finansiero, College financieel toezicht.
Ta konosí, ku un dje problemanan mas grandi ku Antia, spesífikamente Kòrsou ta konfrontando awor aki ta e debe nashonal.
E úniko solushon viabel awor aki pa e debe aki, ku entretantu ta algu mas ku 5 mil mion florin, ta e proposishon di Ulanda pa tuma un parti supstansial di e debe aki pa su responsabilidat. Pero kondishon ku Ulanda a pone ta, ku Ulanda ke tin kòntròl riba maneho i situashon finansiero di e islanan.
Asina mes, tin krítika fuerte tantu den parlamentu ulandes komo pafó di parlamentu ku ta sèn di e pagadó di belasting ulandes ta bai kubri e défisit na Antia, algu ku hopi ulandes no ta masha di akuerdo kuné.

WILLEMSTAD - Frakshon di partido MAN ta preokupá pa loke el a yama un fenómeno kresiente kaminda ta pone personanan importante di un organisashon riba non aktif. Den mayoria kaso ta trata di miembronan di gerensia di un organisashon. Nos ke sa ta kiko ta pasando, asina Eugene Cleopa a puntra den un karta ku el a manda pa Bestuurscollege di Kòrsou.
Cleopa a splika, ku último tempu a bira masha normal ku ta pone gerensia riba non aktif.
“Lòs for di loke por a sosodé, nos ta haña e situashon aki un kos hopi serio, pasobra e ta tumando lugá riba gran eskala,” Cleopa a bisa.
El a mustra ku esaki ya kaba a sosodé na BZV, e ta menasá di sosodé na FKP, el a sosodé na Brasami, el a sosodé den kuerpo polisial i diferente otro kaminda mas.
Nos ke sa di gobièrnu, kiko realmente ta pasando, e konsehal a bisa. El a bisa ku ta komo si fuera ta un krísis tin den pais.
Un kaso di hopi resien ta esun di tayer sosial na Sta. Martha, kaminda a pone dos miembro di gerensia riba non aktif.
Siman pasá Konseho Insular a hasi un bishita di trabou na e tayer pa haña mas informashon riba funshonamentu di e instituto. E miembronan sinembargo no a logra den nan meta, pasobra e persona presente a indiká, ku e no tin outorisashon pa pèrmití e miembronan di Konseho Insular subi tereno.
Pa Eugene Cleopa, esaki ta un kos inkonsebibel.
El a bisa, ku el a konstatá ku no tin guia optimal.
“Nos ta hopi preokupá, pasobra aki ta trata di un instituto ku ta dediká su energia i esfuerso na un grupo vulnerabel den nos komunidat, ku ta e grupo di personanan desabilitá. Pa hopi aña kaba e tayer aki a bin ta hasi bon trabou. Nos ke sa kiko ta pasando,” Cleopa a bisa.

WILLEMSTAD - Frakshon di Partido Niun Paso Atras i Partido Forsa Kòrsou den Konseho Insular a pidi un reunion públiko di Konseho Insular, pasobra nan ke sa kiko ta bai pasa ku Bureau Ziektekostenvoorzieningen (BZV) awor ku e kontrakt ku e kompania di eks konsehal mr. Dennis Evertsz ta kabando. Kiko ta bai pasa: ta prolongá e kontrakt, kiko ta hasi? asina e dos partidonan aki ta puntra den un karta ku nan a manda siman pasá pa Bestuurscollege.
Na desèmber aña pasá, Bestuurscollege, riba proposishon di diputado enkargá ku BZV Humphrey Davelaar a firma un kombenio ku Dennis & Co. pa hasi un evaluashon di funshonamentu di BZV i bin ku rekomendashon kon por mehorá e instituto.
BZV ta enkargá ku ehekushon di kuido médiko pa teritorio insular di Kòrsou den sentido ku e ta e instansia ku entre otro ta paga kuentanan médiko di tur ámtenar i ta duna rekomendashon ora mester manda un pashènt eksterior pa tratamentu médiko mas avansá.
E proseso di saneamentu aki a kondusí na basta malkontentu entre gobièrnu i personal di e instituto, prinsipalmente dia a tuma e desishon di pone Victor Monk, ku tabata fungi komo direktor, riba non aktif.
E trahadónan a konsiderá ku no tabatin niun motibu pa esaki, pió ainda, nan tabata konsiderá ku Monk tabata hasiendo un bon trabou.
Monk mes tambe tabatin mesun opinion i a entamá un kaso den korte pa kita su posishon di non aktif i pon’é bèk na trabou, un kaso ku el a gana tambe. Gobièrnu a apelá e veredikto i próksimamente mester atendé esaki den korte di apelashon.

WILLEMSTAD - En selebrashon di Jong Holland su di 89 aña di eksistensia dia 15 di yüli awor nan lo tin un fundraising dinner na e okashon ei. Jong Holland ta e ekipo di futbòl di mas bieu den e hemisferio west aki.
Na e okashon aki lo tin e persona Hans Lesterhuis, ku ta vise presidente di Koninklijke Nationale Voetbal Bond, KNVB ku lo hiba palabra.
E tema lo ta: ”Similarties in building a national soccer team and building a Nation”. Esaki lo tuma lugá na ulandes.
E dinner lo tuma lugá dia 15 di yüli próksimo di 18:00-21:00pm den Auditorium & Atrum. Trahe ta “business casual”.
Meta di e anochi aki ta pa haña fondo pa por lanta un Divishon Hubenil pa Jong Holland.

WILLEMSTAD - 75 porshentu di mucha di skol ku a pasa eksamen di tráfiko e aña aki, a pas’é ku éksito. 51 di nan no tabatin eror, asina Asosashon Tráfiko Sigur a informá.
Dia 3 yüni último, klasnan 5 di skolnan básiko di Antia a pasa e di 57 eksamen di tráfiko organisá pa Asosashon Tráfiko Sigur Kòrsou i patronisá pa buki di spar Lito di MCB. A.T.S.K. ta sumamente orguyoso ku pa 57 aña konsekutivo e eksamen di tráfiko a keda organisá. Pa loke ta trata e aña eskolar ku ta finalisando aki, ku yudansa di Lito, A.T.S.K. tambe a laga traha un divi divi edukativo di tráfiko pa sostené e lèsnan di teoria ku ta keda duná den nos parke di tráfiko.
Atraves di e 57 añanan ku a pasa, hopi persona aki na Kòrsou i tambe den eksterior por mira bèk ku masha satisfakshon riba nan bishita na nos parke di tráfiko ku a kulminá ku un eksamen por eskrito.
A.T.S.K. ku orguyo ta partisipá, ku ya kaba a registrá mas ku 130.000 diploma di tráfiko otorgá.
A.T.S.K. ta konsiente ku te ainda tin diferente adulto ku tin e diploma aki bon wardá den nan kashi.
Pa loke trata Kòrsou, un kantidat di 53 skol ku ta representá 2433 alumno a pasa e eksamen. Di e kantidat aki, 1825 alumno ku ta 75 % a logra pasa e eksamen ku éksito di kua 51 alumno tabatin 0 eror.
E skolnan ku a duna un bon prestashon ta:
*Vigdis Jonckheer Mensing College ku un promedio di eror di 1.57

Sinusta a informá di e último desaroyonan den transporte públiko

WILLEMSTAD - E sindikato Sinusta ku ta representá Taksistanan aki na Kòrsou djasabra último a tene un reunion ku tabata hopi bon bishitá. Durante di e reunion aki nan a duna informashon na e taksistanan di e último desaroyonan ku tin den transporte públiko. Manera ya ta konosí ku gobièrnu ta trahando duru pa awor si kambia e manera ku transporte públiko ta regla den nos pais. Den esei gobièrnu a bin ku un plan ku ta trese kambionan drástiko den e manera ku tantu taksi i bus ta funshoná na Kòrsou.
Sinusta un organisashon responsabel a sinta ku gobièrnu pa huntu buska solushon pa e diferente problemanan ku ta afektá nos transporte públiko. E Sindikato a palabrá ku gobièrnu ku lo lanta un komishon kaminda tin representante di gobièrnu i di e sindikato di taksistanan i nan dos huntu lo nombra un persona ku lo presidí e komishon ku mester yuda buska solushonnan pa tur esnan envolví.
Mas aleu Sinusta a palabrá ku gobièrnu ku tur loke sali for di trabou di e komishon ta keda akordá tantu pa gobièrnu komo pa e Sindikato. Taksitanan por a hasi pregunta di e palabrashonnan ku tabatin ku gobièrnu i pronto tur esnan ku tabata presente lo haña un kopia di e plan ku gobièrnu tin pa kambia transporte públiko.

WILLEMSTAD - Djabièrnè 6 di yüni último, Direktiva di Skolnan Katóliko a selebrá ku 120 empleado, ku huntu a kumpli 2890 aña den servisio di Direktiva di Skolnan Katóliko. Na misa di Seru di Orashon a gradisí Señor pa tur e añanan bunita. Despues di e santu sakrifisio di misa e hubilarionan, den kompania di nan famia a haña un rekuerdo di parti di Direktiva di Skolnan Katóliko. Na nòmber di bestür di Direktiva di Skolnan Katóliko, profesor Ashley Duits a gradisi tur hubilario pa e bunita añanan ku nan a duna nos hubentut.
Despues di e parti ofisial, den un forma masha ameno a klousurá e bunita anochi akí.
E pòtrèt ta mustra nos e grupo ku a selebrá 35 aña den servisio di Direktiva di Skolnan Katóliko.

WILLEMSTAD – Un total di 6 establesimentu di horeka mester a sera nan porta djasabra anochi, despues ku a resultá durante un kòntròl ku nan papelnan no tabata na òrdu. Na e kòntròl a partisipá 0-Toleransia, S.V.B., B.A.B. i G.G.D.
E kòntròlnan tabata dirigí riba presensia di trahadónan ilegal, pagamentu di primanan sosial, pagamentu di impuesto i higiena. E efektivonan di 0-Toleransia i di S.V.B. a kontrolá e parti di trahadónan ilegal i pagamentu di prima sosial dor di e doñonan di e establesimentunan. Kaminda S.V.B. a konstatá ku e doño tabatin trahadó den servisio sin ku e tabata paga e primanan korespondiente, a sera e establesimentu i bai ku e trahadónan ku no tabatin pèrmit pa traha òf di estadia.
E efektivonan di B.A.B. tabata kontrolá si e establesimentunan tabata paga impuesto riba nan entradanan, miéntras ku G.G.D. tabata kontrolá e parti di higiena. Den diferente di e kushinanan a konstatá situashonnan ku no tabata kumpli ku eksigensianan di G.G.D. A sera e establesimentunan akí tambe.
E kòntròlnan dirigí ku a tuma lugá djasabra anochi ta kontinuá próksimo dianan.

WILLEMSTAD – Hóbennan ku bin den kontakto ku hustisia, den futuro lo por haña un transakshon i partisipashon na un proyekto. Ku introdukshon di e Kódigo Penal nobo lo hasi su entrada e lei di kastigu pa hóben. Den kuadro di esaki a krea e proyekto Sino Fono.
E proyekto Sino Fono ta resultado di preparashonnan di tantu Ministerio Públiko komo Kuerpo Polisial. E preparashonnan akí a tuma lugá na 2007. Huntu ku e kuerpo di polis di Rotterdam ta dunando e proyekto mas kontenido na e momentunan akí. E proyekto Sino Fono ta derivá for di e proyekto ulandes HALT. Hóbennan ulandes ku haña nan mes den kontakto ku hustisia pa promé bia i pa delitonan chikí, den sierto kasonan por skohe pa partisipá na e proyekto pa evitá ku nan ta haña un karchi di kastigu. A tradusí e proyekto akí pa Kòrsou i a yam’é Sino Fono. Sea ta partisipá na e proyekto òf ta haña un kondena i un karchi di kastigu.
Pa yega na un proyekto sólido a kuminsá aña pasá preparashonnan huntu ku Voogdijraad, Ministerio Públiko i polis. Durante e asina yamá ‘casus-overleg’. Durante e seshonnan akí ta studia kasonan penal di hóbennan, sea será òf den libertat. Komo ku e diferente Wijkteamnan no ta disponé di un kordinadó pa hóben, mester envolví e departamentu di ‘Jeugd en Zedenzaken’ durante e preparashonnan. Pa e aña akí lo kontinuá ku e intentonan pa yega na un departamentu di reklaseren pa hóben inkorporá den Voogdijraad.

WILLEMSTAD – Ayera sra. Bernadette Heiligers a publiká su buki di kuenta Flecha durante un presentashon den ouditorio di Biblioteka Nashonal na Skarlo. E buki akí ta kontené 33 di e 160 kuentanan ku el a skirbi i lesa na radio.
Na yanüari 2006 Bernadette Heiligers a kuminsá ku e programa ‘Bida i Balor’ na Radio Hoyer. Esaki ta un programa di mei ora tokante pensamentu i aktitutnan ku por influensiá kalidat di bida. Huntu ku su invitado, e entrevistadó ta buska pa mira si tin relashon entre susesonan den notisia i balornan di bida eksistente òf balornan ku nos a laga bai. Komo mei ora di programa ta pasa mashá lihé, e entrevistadó a kuminsá skirbi kuenta kòrtiku pa fiha riba esensia di e programa. E esensia ta un ingrediente ku na su opinion ta haña muchu poko atenshon den e demanda hustu pa adelanto sosial: nos propio aporte. Te na unda kos ta pasa ku nos, sin ku nos por yuda? Te na unda nos mes ta pone kos sosodé? E kuentanan ta sirbi komo punto di salida pa e entrevista.
Tur kuenta ta fiktisio. Nan ta trata suseso den bida di un grupo di ‘personahe di programa’. Esakinan ta figurá imaginario ku no ta representá ningun hende en partikular, pero ku ta simbolisá aktitutnan humano ku tur hende konosé.
Ku e publikashon akí, e outor ta spera di kumpli ku petishon di oyentenan pa haña e kuentanan por eskrito. Flecha ta optenibel na libreria Mensing’s Caminada i ta kosta 25 florin.
Score: 0.0, Votes: 0