ORANJESTAD- Manera tur e ultimo 6 aña, Diahuebs awor dia 12 di Juni, e comunidad Filipino aki na Aruba lo festeha nan di 110 aña di Independencia.
Nos ta masha orguyuso y hopi agradicido na e gobierno y tur e otro autoridadnan di Aruba cu ta reconoce y ta acompaña nos tur aña cu e celebracion aki.
Mester bisa cu fuera di nos pais ta algun parti den otro pais nan ta celebra e dia aki cu su parti protocolario manera nos ta hacie na Aruba. Y nos comunidad Filipino akinan y nos gobierno na Manila bou di e liderazo di nos Presidente Sra. Gloria Macapagal Arroyo ta hopi agradicido pa esaki. Pesey tambe tur aña ta bin un representante di nos Embahada na Caracas.
Sra. Ami O. Henriquez – Mendez, Consul Honorario di Filipinas na Aruba ta tuma e ocacion aki tambe pa gradici tur cu a yuda nan Embahador Sr. Ronald Allarey di un manera of otro, ya cu lastima a termina su tempo na Caracas y cu lo bay un otro pais pa representa nos pais como nan Embahador.
Na e momento nan aki a caba di yega Caracas nan Consul General Sr. Jose Ampeso y Consul Sr. Anthony Mandap. Pa e comunidad Filipino na Aruba ta un honor cu Sr. Mandap lo bin especial pa acompanja nan, y tambe haci su bishita nan oficial na e autoridad di Aruba. Consul Mandap tawata presente na Aruba hunto cu e Labor Attache di Washington Sra. Florenda Herrera riba invitacion di Consul Honorario di Filipinas na Aruba pa nan bini y pa sinta cu nos autoridadnan manera Departamento di Labor, DIMAS y tambe otro companianan cu tin hopi Filipino como su trahadornan.
Sra. Henriquez – Mendez kier invita tur su paisanonan y Aruba en general pa acompaña nan diahuebes awor 12 di Juni pa 10 di mainta na Wilhelmina Park pa e parti protocolario y despues di e parti oficial aki tuma un brindis na Fort Zoutman, unda tambe e grupo di Nurse nan lo duna un bunita presentacion di nos cultura Filipino.

ORANJESTAD- Comision di Energia di RED (E-com) ta señala cu pa un comunidad sigi funciona cu e gastonan halto di awa y coriente ta necesario pa bin cu un plan di austeridad pa uso di energia pa Aruba.
E subida drastico di prijs di crudo, cu lo sigi subi, lo bai exigi hopi di nos comunidad chiquito cu ta depende 100% di e crudo. Accionan cu mester tuma lugar riba corto y medio plazo ta e.o.:
* conseha y concientisa nos comunidad pa spaar riba awa y coriente e.o door di spotnan na radio, television, foldernan y guia profesional;
* WEB N.V mester baha su gastonan halto di su maneho en general;
* Decentralisacion di producion di energia e.o., hotel grandi cu ta usa mas cu 2 MegaWatt, mester por bira Energy Selfsupporter, nan por genera nan mes energia via nan Build-in Powerhouses cu tei, cu low of mid pressure steam generator turbine, of cu Energia Alternativa segun nan escogencia;
* decentralisacion di Energia den forma Sectorial (Barionan) si nos tuma cu un cas na Aruba ta usa un average di coriente di 750 KiloWatt pa luna, por instala Turbina di Biento cu un capacidad di 1.5 MegaWatt cu ta duna coriente na 1442 cas den e barrio of un Turbine di Biento di 2 MegaWatt cu ta duna coriente na 2404 cas den e barrio;
Cu e medidanan aki, tin e posibilidad pa baha e produccion di coriente y otro gastonan halto di WEB n.v., y cu lo por baha e prijs di e awa y coriente pa comunidad.
E accionan aki tambe tin como consecuencia cu ta reduci e uso di derivatonan di crudo caro, esta fueloil, cu segun pronosticonan mundial lo duplica di prijs den e lunanan cu ta nos dilanti. A largo plazo mester yega na un combinacion di produccion di Energia Electrico cu ta encera tanto Energia Alternativa, como e red di Motornan nobo di WEB n.v. cu ta funciona cu fuel-oil, of ta busca forma pa acopla riba e red di Energia Regional Latino Americano di Electricidad, por ehempel via cabel di coriente for di un red Latino Americano, desde Venezuela.

ORANJESTAD- Si bo ta un cliente di cualkier servicio di SETAR anto bo por wordo sorpresa tur fin di luna mescos cu e cliente Steve Gibbs di bario di Hooiberg cu a haya e chens hunto cu un otro persona di su famia pa haci e compra di luna den un tempo record y completamente gratis.
E sorteo special aki SETAR a introduci como parti di un di e premionan sorpresa pa tur e clientenan cu a sostene e compania nacional SETAR N.V. y cu den e forma aki ta bisa danki bek.
Na momento cu e cliente gana e sorteo, e ta wordo yama y ta haci un cita cu ne na un di e supermercadonan na Aruba. Aki e cliente ta haya net 1 minuut pa e core pone tur articulo cu e ta desea den e garoshi.
E sorteo aki ta un bes pa luna y e cliente ta topa e representantenan di SETAR na e supermercado acorda na unda e por yena su garoshi rapidamente cu tur loke e tin mester. E maximo na e total di productonan cu ta bai den e garoshi ta Awg. 1000.
Diasabra ultimo, sr. Steve Gibbs hunto cu un miembro di su famia a haci nan careda den e supermercado di Ling & Sons na unda nan a yena un garoshi yen yen di cuminda y otro articulonan di cas.
Riba e foto: Momento cu nan ta bata core y nan a keda tur cansa, pero nan a bai cas cu hopi mercancia y cuminda.

ORANJESTAD– Comision Abuso di Mucha ta consisti di profesionalnan di diferente departamento (gubernamental y no gubernamental) cu ta traha cu mucha pa referi na e topico di muchanan cu ta keda nan so na cas.
Un fenomeno cu dia pa dia ta bira mas visibel den media di comunicacion, ta trata di muchanan cu ta cana nan so ariba caya, of di mayornan cu a laga nan yiu su so na cas, etc...
Tambe via diferente instancia cu ta duna ayudo na mucha – y via hoben nos ta haya informacion cu tin varios mucha cu ta keda nan so na cas. Nan ta keda cas sin supervicion di un mayor o adulto. Tin ora hasta nan ta haya e responsabilidad di wak pa e otro rumanan cu ta menor di edad. Hopi hoben dor cu ya nan ta un tiki grandi, mayornan of esnan cu tin cuido di nan ta pensa cu no ta necesario pa laga nan bou di supervicion na cas. Esaki ta duna nan oportunidad pa bin cu amigo/a na cas cu por tin mal influencia ariba nan. Tambe un persona adulto por haci abuso di e confiansa cu e ta haya. Esaki por tin consequencia drastico pa e propio bida di e hoben y di su mayornan. Por ehempel tin hoben hayando yiu. Despues di uno nan ta sigi haya mas yiu, tin ora cu diferente partner. Esaki por tin impacto ariba e desaroyo general di mucha.
Un par di aña pasa SER (Social Economische Raad) a haci un analisis y a sali na cla cu hopi mucha ta wordo neglisha, esaki por ta fisicamente y emocionalmente. Esey kier meen cu den casonan asina no tin cuido, ni atencion pa necesidad basico y tin hopi falta di atencion, cariño y amor.
E realidad ta tambe cu hopi mayornan, wela y famia cercano tin cu traha. Pues mayornan o esnan cu tin cuido di mucha ta sinta cu e dilema cu tin ora nan no por haci otro, cu laga nan yuinan nan so na cas. Ta realidad cu tin un lista di espera pa Trai Merdia, cu tin mayor cu no tin e placa pa paga un cuido particular. Ta realidad cu tin hopi mayornan soltero, cu nan so tin cu carga responsabilidad financiero. Nan so tin cu percura pa e formacion y educacion pa nan yiu.

WILLEMSTAD – No opstante esfuersonan di e organisashon Amigu di Tera pa konsientisá komunidat, tòg te ainda tin hende ku no ta realisá ku nos mester kuida nos medio ambiente. Diariamente por nota kon habitantenan ta kap palunan grandi den nan kurá. Doñonan di e kurá kaminda e palu akí tabata krese di forma formidabel, a disidí djasabra último ku nan ta kap e palu. Den promé instante a parse manera nan a kap un gran parti i laga sobrá keda. Sinembargo un dia despues a resultá ku e palu a desaparesé kompletamente. E palu tabata grandi i tabata brinda hopi sombra. Riba promé bista no tabatin indikashon ku algu tabata falt’é. Ta p’esei ta di spera ku tabatin un bon motibu pa eliminá e palu, i ku no ta pa motibu di molèster kousá pa blachinan ku ta kai, a yega na e desishon pa elimin’é. Solamente si ta komehein òf otro malesa ku a afektá e palu tabata e motibu pa kap e, esaki ta aseptabel. Si akaso e palu tabata bon di salú, e desishon ta sumamente reprochabel. Fui!

WISCONSIN, Merka, - Áwaseru a lastra bai ku 4 kas i ta menasá dikenan na Wisconsin miéntras ekiponan di militar a uni na operashonnan desesperá pa pone sakunan di santu ku por kontené e riunan di Indiana.
Di otro banda, kosta ost di Merka ta registrando temperaturanan ku ta yegando máksimo di siglo.
E gobernador di Wisconsin, Jim Doyle, a deklará estado di emergensia pa 30 kondado.
E gobernador di Iowa, Chet Culver, a bisa ku kasi un terser di 99 kondado di su estado tin mester di yudansa federal.
E riunan di vários parti di sentro wèst nan nivel a oumentá debí n’e áwaseru fuerte di fin di siman.
Na Wisconsin, un dike di Lago Delton a faya i e awa a basha den e serkano riu Wisconsin.
E lago di 99 hèktar kasi a bira bashí i a lastra bai ku 4 kas.
“Tabata horibel! No por a hasi nèt nada! E volúmen di awa tabata asina grandi ku niun hende por a hasi nada!”, un atministradó di villa di Lago Delton, a bisa.
Miéntras sentro wèst ta luchando kontra inundashonnan, parti ost ta den un souna.
Ayera a emití alèrtanan di kalor ekstremo fo’i Carolina te Connecticut.

Foto: Wisconsin inundashon 1006

Un bista kon Wisconsin a keda bou di awa.

Foto: Wisconsin nubia 1006

Un formashon di nubia ta move riba Wisconsin.

ARIES: E loke ku ta bon ku ta yega pa bo, probechá i apresi’é. Utilisá loke ku bo tin pa bo sigui dilanti, no desperdisiá e oportunidatnan, sperando otro mihó. 07,22,46.

TAURO: Un hende riba e dia di awe, ta hasíbu un oferta hopi benefisioso, bo mester skucha i studi’é bon, ya ku e por duna bon resultadonan pa bo. 21,11,08.

GEMINIS: Bo ta sintibu den kòntròl di bo aktonan i di bo bida. Ya bo no tin ku konta ku e fabor di otronan pa hasi loke di bèrdat bo ta buska pa logra. 01,17,33.

KANSER: Bo ta den e mihó momentu pa deshasí di hábitonan i bisionan malu ku solamente ta trese enfermedatnan i problemanan. 05,20,18.

LEO: Ya bo tin un vishon mas kla na unda bo ta dirigí bo mes i kon spera ku bo asuntunan general ta kana. Rekobrá e kòntròl den hopi aspektonan di bo bida. 13,06,41.

VIRGO; Bo enkanto ta lagábu konosé i impreshoná personanan klave i di poder. Bo ta buskando alternativanan i oportunidatnan nobo den hopi fasetanan di bo bida. 08,45,02.

LIBRA: Lo ta hopi difísil laga bo deseonan un banda pa bo hasi demandanan di los demas. E dia aki lo ta posesivo i un tantu boluntarioso. 33,01,25.

SKORPION: Bo kas i bo salú ta di maravia. Splika mihó tur loke ta relashoná ku bo salú. Bo finansa ta den e mihó racha di bo bida. 13,04,16.

SAGITARIO: Ta e momentu pa dibertibu i probechá di bo tempu, hasiendo loke mas bo ta gusta. Bo ta meresé un vakashon i bo ta rondoná di personanan hóben. 10,04,23.

WILLEMSTAD - E lei ku gobièrnu ke introdusí pa regla supervishon finansiero pa Kòrsou i Antia ta un lei di vital importansia. Nos ta papiando aki di un lei di Reino i pa bon kana e proseso di un lei asin’aki, bo mester tin por lo ménos e konsehonan nesesario, manera esun di Raad van Advies. Anto te asina leu ku nos por a averiguá, ni sikiera a pidi e konseho aki ainda, asina Charles Cooper lider di MAN a denunsiá.
Parlamentu di Antia ta reuní djaweps awor, riba petishon di partidonan di koalishon pa fiha posishon di Staten riba e lei ku mester regla funshonamentu di e Kolegio pa Supervishon Finansiero. Awor aki ta den rekta final ku aprobashon di e lei aki. Unabes e lei ta na lugá, Ulanda por kuminsá ehersé kòntròl riba maneho finansiero di Kòrsou, St. Maarten i Antia.
Esaki alabes ta kondishon pa kuminsá ku e proseso di saneamentu di debe di nos pais.
Di akuerdo ku Gobièrnu Sentral den su karta pa parlamentu, ta e intenshon pa trata e proposishon di lei aki den Konseho di Minister di Reino dia 12 di yüli benidero.
E lider di MAN a bisa, ku e no ta komprondé pakiko tin asina tantu purá pa pasa e lei aki. Nos ta papiando aki di un lei ku tin konsekuensianan grandi pa pais, anto un lei asin’aki bo mester studi’é bon promé i bo mester tin tur e konsehonan relevante riba mesa promé, el a bisa.
Charles Cooper ta konsiderá e forma ku a atendé e asuntu te ku awor, kontra lei, inkorekto i kontra prosedura ku normalmente ta mantené den tipo di kasonan asin’aki.

WILLEMSTAD - Shofùrnan di bùs ta bastante indigná pa e hecho, ku miéntras ku e tarifanan pa e diferente destinashonnan na Kòrsou no ta kompletamente kla ainda, Servisio pa Asuntunan Ekonómiko (DEZ) a laga su funshonarionan kuminsá kontrolá kiko kada shofùr ta kobrando pasaheronan. E kòntròl aki a bai den kombinashon ku funshonarionan di Departamentu di Transporte Públiko.
Esei a sosodé ayera den oranan di mainta na e parada di bùs tantu na Otrobanda (Paris) komo na Punda.
E shofùrnan a haña nan ku e funshonarionan di DEZ riba nan, anto sin por a komprondé ta kiko ta pasando, asina Andres Everitz, bosero di e direktiva di Sindikato Transporte Uní, STU a indiká.
El a bisa, ku for di oranan di mainta miembronan di e sindikato a kuminsá ta yam’é, reklamando e hecho ku tin kòntròl ta tumando lugá siendo ku e asuntu no ta kompletamente reglá.
Segun Everitz, no ta awor aki, pero pa algun dia kaba e sindikato ta mustrando ku mester kaba di regla e asuntu di tarifa. Despues di e último reunion ku e sindikato tabatin ku Bestuurscollege kaminda a palabrá ku e tarifanan nobo lo drenta na vigor, tabatin konfushon kaba ta kua tarifa mester mantené final di kuenta.
E lista no tabata kompleto, ademas e no tabata koherente, segun Everitz.
“For di basta dia kaba nos ta mustrando gobièrnu ku a bin diferente bario nobo na Kòrsou, pa kua nunka promé a fiha tarifa. Loke ta pasa ta e ora ei, ku e shofùr ta kalkulá e mes kiko ta hustu pa e kobra riba e rutanan ei.

WILLEMSTAD - Nos mester hasi muchu mas esfuerso pa produsí nos mes kuminda. Produsí e kosnan ku ta krese i duna resultado riba nos suela. Ku e oumento di preis di kuminda awendia, nos no tin otro eskoho.
Esei ta loke diputado Anthony Godett a rekomendá den su disertashon na okashon di entrega di e haf di piskadó den su forma nobo na piskadó di Rif.
E haf di piskadó aki, awor por konta ku un laman mas profundo, loke ta fasilitá piskadónan move mas fásil ku nan boto. Piskadónan no mester warda riba naturalesa pa wak si nivel di awa ta haltu, pa subi laman òf yega tera.
Promé ku e trabounan, e laman tabatin un profundidat di apénas 1 meter i algu. Esei tabata pone, ku ora laman su nivel ta abou, botonan no por a sali, miéntras ku si e boto ta afó piskando, e no por drenta haf mesora. Despues di e trabounan, e haf awor tin un profundidat di algu mas ku 2 meter.
Diputado Anthony Godett a mustra riba e importansia di sektor di peskeria. El a referí tambe na e hecho, ku e mes tabata hasi uso di e haf tempu di su hubentut.
Ta trata aki di un proyekto ku a kosta 292 mil florin, finansiá pa USONA. E proyekto aki ta forma parti di un proyekto total bou di e nòmber “Drechamentu di Hafnan di Piskadó”.
Banda di e haf di piskadó na Rif, tin den kuadro di e proyekto grandi aki drechamentu di e haf di piskadó na Kurá Buriku, kaminda a konstruí un pir pa un kantidat di boto di piskadó por mara, miéntras ku un di tres proyektonan ta drechamentu di e pir na Mari Pampun.

WILLEMSTAD - Lider di frakshon di Forsa Kòrsou den parlamentu antiano mr. Nelson Navarro ta para tras di proposishon di lei pa oumentá sueldo mínimo ku 15 porshento.
“Nos ta kere ku un oumento di 15 porshento ta na su lugá”, asina Navarro a komentá riba e diskushon ku a surgi rondó di e materia aki.
Parlamentu di Antia, resientemente a trata e tema aki den un reunion di Komishon Sentral. Básikamente tin tres proposishon riba mesa: e promé di parlamentario Faroe Metry ku a haña 18 miembro su tras, esta e proposishon pa oumentá sueldo mínimo ku 15 porshento, e proposishon di minister Elvis Tjin Asjoe ku ta na fabor di un oumento di 18 porshento, miéntras ku entretantu Banko Sentral di Antia, tambe a proponé un oumento di solamente 8 porshento. Banko Sentral a basa su mes riba argumentunan ekonómiko, indikando ku ta esei ekonomia di nos pais por karga awor aki.
Den e reunion di parlamentu, a lanta e impreshon ku un mayoria frakshon ta na fabor di e último aki, esta e proposishon di Banko Sentral di Antia, pero a surgi un diskushon den e dianan ku a sigui i tin duda atrobe kiko kada frakshon ta para p’e.
Tal manera nos a informá ayera kaba, esun ku a tuma inisiativa pa bin ku e proyekto di lei aki, parlamentario mr. Faroe Metry ya a indiká ku na momentu di vota, e lo vota na fabor di su propio proposishon di lei pa un oumento di 15 porshento.
Nelson Navarro a bisa, ku for di durante e reunion di Komishon Sentral di parlamento, su frakshon a ekspresá su mes na fabor di un oumento di 15 porshento di sueldo mínimo i ku e ta para tras di parlamentario Metry.

WILLEMSTAD - Un kantidat di mas ku 550 persona a partisipá djasabra último na e simposio ku Fundashon Prinses Wilhelmina Fonds a organisá tokante Kanser na Prostat. Un públiko grandi, a duna oido na e invitashon di Prinses Wilhelmina Fonds. Práktikamente e sala di New Song na Muizenberg tabata yen yen. Un kos bunita di esaki tabata tambe, ku mas di 80 porshento di e presentenan na e simposio tabata hende hòmber. Esaki ta demostrá ku tin un nesesidat, un interes i preokupashon serka nos hende hòmbernan pa nan informá nan mes tokante e malesa di kanser na prostat. Alabes por konkluí tambe, ku tin un nesesidat i interes grandi serka nos komunidat general pa haña informashon, prinsipalmente ora ta trata informashon kon biba mas salú i kon pa alsa nos kalidat di bida. E simposio aki ta forma parti integral di e kampaña di informashon i konsientisashon “Luna Blou” di Prinses Wilhelmina Fonds, ku lo kore den henter luna di yüni. Prinses Wilhelmina Fonds a indiká, ku nan lo sigui organisá e tipo di simposionan manera esaki, ya komo ku dje forma aki nan por yega mas direkto i estrecho den kontakto ku nos komunidat.
Durante e simposio, un kantidat di 11 oradó, tur spesialista den nan ramo, a papia tokante diferente aspekto di prostat, kanser na prostat i tambe riba e tratamentunan ku ta eksistí. Por lo general por bisa, ku e públiko a keda sumamente enkantá i satisfecho ku e informashon ku nan a risibí. Na final di e simposio, tres persona a duna nan testimonio i eksperensia ku e malesa di kanser. Esaki a haña un apresio i akohida hopi grandi serka e públiko. Prinsipalmente e konseho i yamada ku e tres personanan aki a hasi na nan koleganan maskulino, pa nan laga kontrolá nan prostat. E punto aki a ser tumá hopi na serio dor di tur presente. Ku e presentashon di e tres pashèntnan di kanser di prostat, por bisa ku nos ta den bon kaminda pa kibra ku e “taboe” ku tin riba e tópiko di prostat i kanser na prostat den komunidat.

WILLEMSTAD – Djadumingu den ouditorio di Selikor tabatin e final di e kompetensia ‘di Lèter pa Palabra’. Un total di 25 skol i 64 partisipante a kompetí den e di tres i último ronda. Na final di e kompetensia a saka e 3 alumnonan ku por deletrá mas mihó, kada unu den nan kategoria di edat.
E promé kategoria tabatin partisipantenan entre 6 pa 8 aña, Yevgeny Stephens di Skol Imanuel a keda komo último den su kategoria. Pa e di dos kategoria ku tabatin partisipantenan di 9 pa 11 aña a keda Katherine Cabrera ku a representá PL Brionschool komo último den su kategoria. Na final di e anochi a keda Giomaris Barbara último entre e partisipantenan di 12 pa 14 aña ku a deletrá e palabra korekto representando Kolegio Don Sarto.
Mester bisa ku kada kategoria tabata unu maratóniko. Kada un di e 64 finalistanan a sa di hiba un bon bataya. Den kada kategoria e partisipantenan a bai no ménos ku 15 ronda di deletrá. Konklushon ta ku e trabou di e huradonan no tabata nada fásil pa eliminá e partisipantenan ku a bini ku yen entusiasmo pa kompetí.
Inisiadónan di e proyekto ‘di Lèter pa Palabra’ Selikor, Banco di Caribe, Fundashon Kòrsou Limpi Bunita i NRG ta felisitá tur e 64 partisipantenan pa e kurashi ku nan tabatin pa para dilanti un kuerpo di hurado i deletrá den nos dushi idioma papiamentu. Nan a sa di hasi un tremendo trabou i a sa di demostrá nan talento i abilidatnan pa trese un produkto di kalidat. Na tur e skolnan ku a partisipá i tambe na e mayornan ku a guia e partisipantenan, pabien i sigui ku e bon trabou.

WILLEMSTAD - Despues di un par di luna di preparashon i finalmente e tandanan di kompetensia, e proyekto ‘di Lèter pa Palabra’ a konosé su ganadónan. ‘ Di Lèter pa Palabra’ ta basá riba e konsepto mundialmente konosí komo “Spelling Bee contest’ na papiamentu; un ‘kòntèst di ortografia’. Aki ta na unda ku e muchanan a haña oportunidat di siña e palabranan di antemano i asina pasa dor di diferente fase di preparashon pa despues partisipá den e tandanan di kompetensia regional i finalmente pa djadumingu último den kual tres skol a resultá e ganadónan apsoluto di e kòntèst di ortografia. Ta trata di Skol Imanuel den kategoria 1, Skol PL Brionschool den kategoria 2 i Kolegio Don Sarto den kategoria 3.
Patrosinadònan Banco di Caribe, Selikor, Fundashon Kòrsou Limpi i Bunita i NRG por mira atras na un eksitoso proyekto. “ For di un prinsipio nos di Banco di Caribe a kere den e proyekto aki, no únikamente pasobra e ta kuadra den nos liña di maneho dediká na komunidat i en partikularmente e hóbennan, pero tambe pa e echo ku e ta yuda na oumentá e balor di nos idioma materno. Banko di Caribe ke felisitá; Yevgeny Stephens, kategoria 1- Katherine Cabrera, kategoria 2 i Giomairis Barbara den kategoria 3 ku a resultá e ganadónan di ‘di Lèter pa Palabra’. Nos ta premirá un temporada 2009 aún mas eksitante. “Nos ta konvensé ku e proyekto a logra su meta, esta di motivá nos futuro generashon pa uso optimal di nos idioma papiamentu”, asina sra. Marielle Dorand-Lebacks representante di merkadeo Banco di Caribe a komentá.

WILLEMSTAD - Algun aña pasá e idea pa lanta un Internet Exchange na Kòrsou a wòrdu lansá. Trámitenan hasi durante aña nan nunka a konkretisá den algu faktibel. Dos luna pasá, bou di presidensia di minister di Tráfiko i Telekomunikashon Ir. Maurice Adriaens i koperashon di diputado Anthony Godett di infrastruktura, mayoria di e provedornan di Internèt na Antia a bini huntu pa firma un dokumento mustrando nan intenshon pa traha huntu riba e materia aki. Djabièrnè último finalmente esaki a wòrdu konkretisá ku lantamentu di Caribbean Internet Exchange. “Esaki ta otro fase den afan di e Gobièrnu aktual pa sigui mehorá kalidat di Internèt i hasié mas aksesibel pa komunidat kompleto”, minister Adriaens a bisa.
Direktornan di UTS, Digicel, Scarlet, Mio, Telbo a hasi akto di presensia na notario Alexander i firma e dokumento pa funda e entidat hurídiko ku ta bai operashonalisá e Internet Exchange. Caribbean Internet Exchange lo haña su base na Kòrsou, pero intenshon ta pa ekspandé su área di operá. Durante e selebrashon, diputado Anthony Godett a yama kada unu di e direktornan danki pa nan liderato i vishon demostrá ku a hasi posibel ku den un temporada korto por a lanta e Internet Exchange.
Mandamentu di e-mail ta algu ku hopi ta hasi diariamente i e kantidat ta subiendo enorme. Hopi di e-mail nan ta sali Kòrsou bai e sentral na Miami i bini bèk Kòrsou. Pa hasi e konekshon aki posibel, kabelnan ku kapasidat grandi ta nesesario. Konsekuentemente esaki ta buta ku mester kumpra hopi kapasidat riba e kabelnan aki lokual ta kostoso. Asina preis di Internèt ta keda haltu. Ku establesementu di un Internet Exchange na Kòrsou, e-mail nan aki no mester di bai Miami mas. Esaki ta buta ku e kapasidat riba e kabel por ta ménos òf wòrdu usá si pa hasi otro kos nan riba Internèt. E benefisio aki mester resultá den probecho pa nos tur ku ta hasi uso di Internèt. Tambe ta ampliamente konosí, mira e-commerce park, ku teknologia ta krea kupo di trabou ku ántes nos lo no a pensa riba dje. Pa un Internet Exchange esaki no ta otro i tambe lo krea kuponan di trabou.

WILLEMSTAD – E prohibishon pa kria kachó pitbull na Ulanda ta kaduká. Ku e medida akí ta stòp di mata kachónan pitbull, manera ta hasiendo for di aña 1993. Esaki ta loke minister Gerda Verburg enkargá ku Agrikultura, Naturalesa i Kalidat di Kuminda a informá.
E Areglo Kachónan Agresivo a drenta na vigor na Ulanda, despues ku 3 mucha a muri a konsekuensia di mordé di pitbull. E areglo a hasi posibel, ku por a konfiská tur kachó pitbull i mata nan. Sinembargo e kantidat di insidentenan ku kachó pitbull no a baha for di dia ku a introdusí e medida. Esaki ta konklushon di e komishon Van Sluijs ku a evaluá e efektonan di e medida. A resultá ku e kantidat di kachó pitbull ku ta envolví den kasonan di mordementu ta mas haltu ku serka otro rasanan, pero ku ta trata di un grupo chikí di tur e pitbullnan ku tin na Ulanda. Konsekuentemente esaki no ta hustifiká e matamentu di e kachónan akí. Van Sluijs ta mira mas den dunamentu di informashon na doñonan di pitbull.
Pa e motibu akí Verburg a anunsiá, ku ta bini reglanan nobo na lugá di esun aktual. E regla aktual ta prohibí pa kria kachó pitbull i laga nan pari. E regla nobo no ta basa su mes riba aspekto i rasa, pero ta laga komportashon agresivo di e kachó disidí. Tur kachó agresivo ku ta midi 35 centimeter for di skouder mester pasa un tèst di agresividat serka un eksperto. Si resultá ku karakter di e kachó ta agresivo di un manera apnormal, por laga mat’é ainda. Pero pa hasi esaki mester laga traha un tèst nobo, ya ku e métodonan aktual pa tèst no por pronostiká bon agreshon serka kachónan.

WILLEMSTAD – E tim di vigilansia di Bon Futuro un bia mas a lokalisá un kantidat di droga destiná pa prezunan den e instituto. E droga tabata paketá den forma di bala i skondé pafó di e tereno. Dos detenido tabata trata na piska e droga for di pafó di e waya di prizòn.
Tabata djaluna atardi den transkurso di 2’or, ku e efektivonan di vigilansia a nota dos detenido kantu di waya parti paden di prizòn. Nan tabata aktua di un forma sospechoso i mes ora a alertá personal di seguridat ku a yega rápidamente i a detené e dos personanan. Un di nan tabata bon skondí bou di un tapol kant’i waya i tabata kòrtando e waya. E otro detenido tabatin un artefakto, ku kua e tabata purba piska e balanan di droga. Nan tabatin un grandura di un bala di sòftbòl, i un tabata kontené mariwana i vlui i dos otro tabata kontené mariwana.
E detenidonan tabata hasiendo nan labornan rutinario den e área, pero a trata di burla un biaha mas di e personal bou di ora di trabou. Sinembargo sin éksito. Gerente di Bon Futuro a informá ku e detenidonan ta keda será pendiente e medidanan disiplinario ku lo tuma kontra nan. Gerensia di prison ta asentuá tambe ku hopi ta esnan ku ta pidi pa nan traha, debí ku ta awor proyektonan di trabou a kuminsá kana den prizòn. Na mes momentu otro detenidonan ku ta haña chèns pa traha ta hasi mal uzo di e oportunidat i ta trata na trese kosnan ilegal den prizòn.

WILLEMSTAD – E barku Freewinds te ainda ta kontaminá. Despues di 6 siman ku outoridatnan di Salubridat Públiko a duna òrdu pa seya e barku kompletamente, e barku ketu bai ta enormemente kontaminá ku asbèst blou. Esaki ta loke tin skibí riba e sitio www.shortnews.com.
Den e artíkulo por lesa, ku for di 1987 lidernan di e religion Scientology, ku ta doño di e barku, tabata notifiká. Na aña 2001, segun e relato, e arkitekto i èks miembro di Scientology Lawrence Woodcraft a bolbe notifiká e lidernan. Nan a skohe pa no tuma medida pa motibu ku nan a kere ku e supstansia asbèst blou, ku por kousa kanser, lo no hasi nan daño.
Mas aleu e artíkulo riba e sitio wèp ta informá, ku na e momentunan akí, grupo élite para militar di Scientology, ‘Sea Org’, ta na e sitio kaminda e barku ta mará, tratando na deshasí di e asbèst blou. Ekspertonan lo a bisa ku e trabou akí lo dura algun luna pa finalisá, si akaso esaki ta posibel mes. Tambe e trabounan lo kosta algun mion dollar.
E último informashonnan ku tabatin, sigur un luna pasá, di parti di DOK kaminda e barku tabata mará, a indiká ku e barku a haña un ‘clearence’ pa bandoná Kòrsou pa motibu ku no tabatin niun menasa mas di kontaminashon. A eliminá gran parti di e asbèst ku tabatin riba e barku, paket’é na forma responsabel i deshasí di dje tambe na forma responsabel. Den un kombersashon ku LA PRENSA tabatin ku direktor di Selikor algun tempu pasá, el a bisa, ku no por ekskluí ku e asbèst ta derá riba e tereno di Malpais. Entretantu tin un rapòrt di Servisio pa Asuntunan Ambiental ku a bai pa diputado Humphrey Davelaar.

 CANASTOTA, New York – Larry Holmes, kende tabata kampion mundial di peso kompletu pa poko mas ku shete aña i a realisá 20 defensa di e título, a drenta Salòn di Fama di Bòkseo.
E 20 defensa ta e di dos reinado mas largu den historia di e kategoria.
Pero djadumingu, e “Asesino di Easton” tabatin mester di un ratu pa e rekuperá su mes promé ku el a aseptá e entrada den e Salòn Internashonal di Fama di Bòkseo huntu ku 11 otro kampion i personalidatnan di rin.
“Despensámi. Mi ta un poko emoshoná. Pakiko nò?”, Holmes a bisa, risibiendo un aplouso largu di un multitut di kasi 11.000 persona.
“Ora bo yega na e punto aki, ora e hendenan sali pa kumindá bo dje forma aki, bo ta haña gana di yora. Di manera ku si mi yora, yora ku mi pasobra mi ta sinti mi mes bon”, e bòksdó a agregá.
Holmes a enkabesá e indukshon (entrada) di 2008, den kua tabatin tambe e kampion wèlter junior Eddie Perkins i e defuntu peso mediano Holman Williams. Nan tres ta den e kategoria di Era Mordenu di e salòn.
E pesonan medio Len Harvey i Frank Klaus, meskos ku e wèlter Harry Lewis a ser honrá ku nan entrada den e kategoria di Tempu Bieu, miéntras ku e peso kompletu irlandes di siglo 19 Dan Donnelly a drenta e e Klase Pionero.
Holmes, kende a laga skol den di shete grado a usa su físiko den e plantanan produktor di stal na ost di Pennsilvania i el a refiná su habilidatnan di bòkseo den e gimnasio di Liga Atlétiko di Polis, tabatin un rekòrt di 69-6 ku 44 viktoria pa nòkout.

MADRID/WILLEMSTAD – Awe mainta Antia i Spaña a firma un tratado fiskal na Madrid. Minister di Finansa Ersilia de Lannooy ku ta na Oropa a firma e tratado na nòmber di Antia, miéntras ku pa Spaña a firma e Sekretario-General di Finansa María Dolores Beato Blanco. Ofisialmente ta bisa, ku a firma e tratado entre Reino Spañó i Reino Ulandes pa loke ta trata Antia. E tratado ta pèrmití interkambio di informashon fiskal ku ta relevante pa belasting. Tambe e tratado ta krea kondishonnan pa detektá i pèrsigui violashonnan fiskal. Meta di e tratado ta pa yega na un base mas hustu i balansá pa kobramentu di belasting na residentenan di Antia i Spaña. Ku realisashon di e tratado aki, Antia lo disparsé for di e lista spañó di pais kaminda no ta kobra belasting. Antia a bringa pa hiba tempu pa kita for di e lista aki.
Minister De Lannooy a pidi outoridatnan spañó pa kuminsá negoshá riba un tratado, pa evitá ku ta paga belasting dòbel na Antia i Spaña. Tambe e mandatario antiano a pidi, pa ekstendé e relashonnan bilateral entre e dos paisnan.
Durante su bishita na Spaña, minister De Lannooy tabata kompañá pa e embahador di reino na Madrid Como van Hellenberg Hubar, direktor di Finansa di Antia Jose Jardim, sra. Darryllin van der Veen di Ofisina di Relashonnan Eksterior (BBB) i sra. Judith Maas di e embahada di reino na Madrid.
Riba e pòtrèt, kortesia di Kas di Antia/Pevry Press por mira e seremonia di awe mainta na Spaña.