Ehecutivonan di industria hotelero ta reuni pa adresa retonan nos dilanti

ORANJESTAD – Gerentenan general di Aruba su top resortnan a topa recientemente durante Aruba Hotel and Tourism Association (AHATA) su reunion di kwartal di gerente general, teni den e ballroom di Hyatt Regency.
Punto principal riba agenda tabata e retonan enfrentando nos isla su industria turistico, como tambe e cambionan di clima economico, unda ta considera accion pa formula un reaccion apropia pa tuma.
“Nos ta den e proceso di brainstorm y forma e comisionnan apropia pa asina ta proactivo dilanti di desaroyonan,” ta remarca Presidente y CEO di AHATA Rob Smith.
“Dor di trece hunto e gerentenan general nos por haci uzo di nan amplio conocemento y experiencia, pa asina yega na solucionnan creativo pa issuesnan manera prijs nan explosivo di petroleo crudo, como tambe e cambionan proponi den maneho laboral y structura di belasting. Tur esakinan lo tin impacto riba nos industria economico di mas importante, esta turismo.”
Tin varios comision cla caba, esakinan ta inclui, mercadeo, medio ambiente, casino y labor, cualnan awor ta uni cu e recien forma comision di energia y e task force revitalisa di airlift. Miembronan di comision lo busca solucion practico den disminui gastonan di utilidad, como tambe atrae airlift nobo pa nos isla.
Apesar di retonan global, e futuro pa Aruba su turismo, por lo general, ta positivo. Cu Aruba gosando di e lealtad di un segmento grandi di doño di timeshare, su posicion como un destinacion di corto buelo (for di tanto norte- como sur-america) y acceso na 13 portal principal (airlift).

ORANJESTAD- Entrante 11 di juni 2008 e prijsnan di benta di productonan petrolero lo cambia. Esaki ta conta pa gasolin, gasoil y kerosin.
Minister di Finansas y Asunto Economico ta informa cu a surgi un cambio den prijs di productonan petrolero entrante 11 di juni 2008. E prijs di benta pa comercio por menor ta como lo siguiente:

Gasolin : 256,7 cent pa liter ( aumento di 16,2 cent )
Gasoil : 251,3 cent pa liter ( aumento di 20,3 cent )
Kerosin : 245,3 cent pa liter ( aumento di 19,9 cent )

E reduccion ariba tarifanan di accijns pa absorba e aumento di prijs over di e periodo di mei 2007 ta keda manteni.

ORANJESTAD– Un di e oradornan di e siposium di FESCA di siman pasa tabata sr. Klaas Tuinstra, cu ta consehero di Het Wetenschapelijk Instituut van het CDA (WI). Banda di e posicion aki den WI, e ta tambe consehero di Prome Minister Hulandes Jan Peter Balkenende y Minister Ab Klink.
Su discurso tabata enfoca ariba e trabounan di FESCA, e estudio titula “Desaroyo Economico di Aruba” y e necesidad di un partido politico pa tin un instituto manera FESCA y ideologia en general.
Sr. Tuinstra a cuminsa introduciendo e publico ariba e diferente fenomenonan di politica cu ta lantando cabes den den politica rond di mundo. Esakinan ta: Populismo, Cientalismo y Paternalismo. “Ningun di e fenomenonan negativo aki por tin algun beneficio pa un pais,” segun sr. Tuinstra y contrario na e fenomenonan aki, “ta existi corientenan politico cu kier mara e poder di e estado na e bienestar publico di e pais.” E consehero di WI ta sigui splica cu, “e ideologia politico ta duna e bienestar publico un color”. “E idea di un estado di derecho democratico ta,” segun Klaas Tuinstra, “cu partidonan politico ta duna bienestar publico e color cu ta pas na e ideologia politico”. Pesey mes conse partidonan cu ta bin di e banda liberal (rechts), Cristian Democratico (Center) y social democrata (links).
Hopi cos aki na Aruba (y rond di mundo) por wordo mira for di un punto di bista ideologico. Otronan ta hasi uso di entre otro populismo pa jega na poder, pero na final di dia ta faya den duna e pueblo loke e pueblo realmente mester.

ORANJESTAD- Recientemente Union Caribe a bira dealer nobo di SETAR na unda cu nan lo bende producto y servicionan di SETAR.
Sr. Roberto Gracia Gerente General di Union Caribe a expresa di ta sumamente contento cu e aliansa cu SETAR.
Union Caribe N.V. ta un compania di money transfer cu a wordo estableci dia 20 di Juli 1997 y ta manda placa pa mas di 30 pais. Tambe nan tin call centers y venta di tarhetanan di telefon.
Cu seis filialnan rond di e isla, dos na Corsou y muy pronto na St. Maarten. Nan oficina ta habri di Dialuna pa Diasabra di 8:00 di mainta pa 9:30 di anochi.

ORANJESTAD- No ta prome ni di dos....sino ta di cuater aña consecutivo cu Aruba Bank ta organisando un caminata special pa su clientenan y pa henter e pueblo di Aruba. Esaki como parti di nan compromiso serio cu e comunidad Arubano pa cu deporte, pa eventonan social y claro, pa organisa eventonan positivo na unda famia, amigonan, coleganan y conocirnan por entretene nan mes na un forma sano y saludabel.
Ta miles di hende tur aña ta cana hunto den e caminata aki di algun dia. Ta pesey mes e aña aki Aruba Bank a uni forza cu Subway, specialmente pa motibo cu ambos tin e mesun filosofia di comemento y biba saludabel.
Aruba Bank ta convenci cu e tipo di eventonan asina ta pas cu nan banco, pasobra e ta demostra e compromiso, e atencion special y e vision di e banco pa e pueblo di Aruba. E caminata tey pa concientisa e pueblo di Aruba pa biba saludabel y pa minimalisa e problema di obesidad.
E caminata di e aña aki lo tuma lugar entre dia 1 pa 4 di Juli 2008. Tur e caminatanan ta start na e mesun ora, esta 6or y mei di atardi, pero tur dia tin un otro ruta. E prome dia por ehempel, esta dia prome di Juli, lo sali pa 6or y mei di atardi for di Idefre, dia 2 di juli lo sali for di Aruba Raquet Club na Rooi Santo, dia 3 di Juli lo start na veld di Winston na Santa Cruz mientras cu riba e di 4 y ultimo dia lo sali for di Centro di Bario Ayo.
E rutanan sinembargo ta diferente cada dia, pasobra e prome dia, esta dia 1 di juli lo cana un total di 5km saliendo for di Idefre direccion DA Drogist, Belgiestraat, Ban Ban Bar & Restaurant, Bubali, Fantastic Garden, Caya Soeur Meltia, Caya Soeur Dionysia, Schotlandstraat, Frankrijkstraat y pa caba atrobe na Idefre.

WILLEMSTAD - Despues di hopi siman di preparashon, Liga Hubenil di Basketbòl Kòrsou ta kla pa kuminsá ku su Torneo di Basketbòl, djabièrnè awor 13 di yüni na SDK.
Manera ta konosí, ekiponan lokal di Basketbòl ku divishonnan hubenil a uni pa lanta e liga aki ku e propósito pa duna hóbennan lokal e oportunidat pa hunga Basketbòl, loke ta nan gran deseo.
E intenshon ta pa durante próksimo lunanan te ku fin di aña e torneo amistoso aki pasa dor di vários bario di Kòrsou, komo un Tour di Basketbòl, ku e meta pa popularisá e deporte den bario i atraé mas hóben pa hunga basket.
Ekiponan ku a duna nan palabra di partisipashon ta: Royal Hoops, Seru Fortuna Brothers, Olympic, B&M sisters i Lettermen BBC.
E fin di siman aki lo kuminsá ku e torneo aki, djabièrnè atardi pa 6:30pm, mitar di 7 den sala di deporte di SDK.
Pa 7’or ofisialmente lo tin e apertura ku desfile di ekiponan i sak’é di e promé bala.
Djasabra 14 di yüni lo tin wega kuminsando 3’or di atardi pa 7’or den SDK .
Entrada ta grátis i tur hende ta bon biní.

CARACAS, Venezuela, - E presidente di Venezuela, Hugo Chávez, ayera a anunsiá ku lo anulá e polémiko “Lei di Inteligensia i Kontrainteligensia” ku el a proklamá dos siman pasá generando un fuerte polémika entre su gobièrnu i gruponan di derechonan humano.
“Mi ta konsiderá ku ta mihó. Lo anulá e lei pa traha un otro lei. Un dekreto hopi simpel mester sali den Gaceta (Ofisial) mañan mainta pa mas tarda”, presidente Chávez a anunsiá for di Palasio presidensial Miraflores den un akto ku trahadónan di e resien nashonalisá Siderúrgica del Orinoco.
Ta trata di Lei di Inteligensia i Kontrainteligensia ku, segun e krítikonan, ta obligá e venezolanonan suministrá informashon n’e Estado.
P’esei a boutisá e lei aki komo “Lei Sapu”.
Na Venezuela ta katalogisá sapu, komo esun ku ta hasi redu. Nan sa bisa na Venezuela -el que “sapea”-.
“Aki a kometé erornan. Ta manera ora ami proponé e reforma, a pone, mi no sa kuantu artíkulo mas i kada hende ta bini ku un idea. I si bo no lesa lèter pa lèter, artíkulo pa artíkulo, kosnan por kompliká”, Chávez a afirmá.
E mandatario a proklamá e teksto na kabamentu di luna di mei dentro di “Ley Habilitante” ku ta dun’é podernan legislativo spesial.
Pero dos siman promé tantu e presidente komo su kolaboradónan a defendé e bondatnan “anti gòlpista” i “anti imperialista” di e lei, frente e oposishon ku a denunsiá e inkonstitushonalidat.

WILLEMSTAD - E aña eskolar koriente ta yegando na su fin i den sierto kaso ta bira tempu pa mayornan kumpra unifòrm nobo pa nan yunan. Den pasado tabatin basta problema i diskushon riba e fenómeno aki. Diputado di Enseñansa, Marilyn Alcalá-Wallé, den deklarashon ku el a hasi, a indiká un biaha mas, ku pa loke ta trata unifòrm di skol, gobièrnu a hasi un palabrashon ku tur e skolnan inkluso i direktivanan di skol, ku e komishon di mayor i den kaso ku tin ‘leerlingen-raad’, e tim tur ta bin huntu pa disidí riba e asuntu di unifòrm. Di e forma ei, ta determiná kua tipo di unifòrm ta bai usa i tambe ta na unda nan ta kumpra e unifòrm.
Den pasado esaki tabata un di e reklamonan grandi unda ku mayornan a reklamá ku nan ta wòrdu konfrontá ku unifòrmnan ku ta hopi karu. Un otro keho di e mayornan tabata ku ta limitá nan na kumpra unifòrm otro kaminda i alabes nan a bisa ku nan no tabatin ningun influensia riba e preis.
Den e situashon nobo, gobièrnu a tuma e desishon ku no ta permití ningun skol di skohe unifòrm riba su mes. Esaki méster tuma lugá en koperashon ku e mayornan. Na skolnan ku ta disponé di un konseho di alumno ta yega konhuntamente na e desishon kiko mester bestèl i na unda. Ademas, gobièrnu a disidí ku ningun tim di skol no por obligá mayornan pa kumpra un kantidat di unifòrm. ‘Ta e mayor mes ta disidí riba e kantidat di unifòrm ku e ta kumpra’, asina e diputado a splika, indikando ku naturalmente skol ta keda ku e posibilidat pa hasi sugerensia enkuanto e kantidat di unifòrm ku tin mester, pero sin mar’é na un obligashon.

WILLEMSTAD- E bienestar di animalnan na Antia, mester wòrdu poné riba e agènda ku ta regla e proseso di restrukturashon estatal. Esei ta opinion di e Fundashon Yudansa pa Animal di Venezuela-Ulanda. Den deklarashonnan ku Mark Vos, presidente di e fundashon aki a hasi, el a splika ku e proseso di restrukturashon estatal na Antia ta tumando lugá, pero ainda tin un punto ku mester wòrdu poné riba agènda. I mester bin un kambio den esei, ku ta e bienestar di bestianan.
Fundashon Dierenhulp Venezuela-Ulanda, ta aktivo ku bienestar di animalnan den vários pais latinoamerikano entre kua Antia. E Fundashon tin krítika riba entre otro e forma di mata kachónan di kaya na Boneiru i Kòrsou. Entre otro, pasobra ta mata e kachónan, sin vèrdof nan promé.
Riba e pregunta hasí na Marc Vos, presidente di Dierenhulp Venezuela, dikon e fundashon ta mete ku bienestar di bestia na Antia, el a indiká, ku e ta mete ku e situashon den e sentido ku nan ta wak bestianan su bienestar. ‘I nos ta deseá pa e asuntu aki wòrdu poné riba un agènda.
Segun Vos, e diskushonnan ta tuma lugá, pero no ta dedikando atenshon na e tópiko di bienestar di animal. Refiriendo na loke ta bai robes, Vos a menshoná mèldingnan for di entre otro Antia, ku tin di haber ku situashon di e bestianan. Segun Vos, na Boneiru e por a tuma nota personalmente di un situashon, unda ku ta hasi uso di insidente, pa mesora tuma medidanan drástiko, pa mata bestianan den kunuku.

ARIES: Bo ta hopi buská awendia, hopi solisitá pa mundu hinter. Bo ta tuma inisiativa den tur kos i den bo enkanto tan úniko i spesial. 04,07,02.

TAURO: Bo kuriosidat ta hibabu na eksplorá riba terenonan deskonosí. Buska, puntra, orientá. Konsentrá bo energia den loke bo ta deseá di logra. 02,18,05.

GEMINIS: Kuida bo mes di intriga ku por trese problemanan den bo relashonnan sentimental. Mantené e vianan di komunikashon habrí ku bo pareha. 20,07,30.

KANSER: Hasi bon uso di bo tempu liber i lo desperdisiá ku personanan ku no ta aportá nada positivo i mira e enkuentro di e lokual ku bo ta sperando. 05,11,45.

LEO: Enbolbí bo mes durante dia den e aktividatnan unda bo por pone den akshon bo briante ideanan. Vense e insertidumbre i e miedu na frakaso. 18,22,46.

VIRGO: Hopi kuidou ku ken bo ta komentá bo asuntunan privá, ya ku tur kos skondí ta sali na kla. Deskartá tur kos na largu plaso. 03,16,05.

LIBRA: Buska e punto den bo relashonnan sentimental. Aportá mas di bo poniendo mayor atenshon pa stima ku tur bo alma, ku tur bo kurason. 30,08,19.

SKORPION: Dera e miedu i e inseguridat di keda bo so, ya ku esei no ta bo naturalesa. Pone na kla tur loke bo a laga pendiente ku relashon na bo trabou. 04,50,08.

SAGITARIO: Sali na konkista den amor si es ku bo no tin kompania. Bo ta hopi kla den loke bo ta bisa. Tuma desishonnan ku ántes ta resultábu difísil. 22,18,39.

WILLEMSTAD - Gobièrnu di Kòrsou awor tin un bon instrumento den su man pa aktua kontra e fenómeno di mashin di plaka riba nos isla. Ta esei nos tabata warda, asina gezaghèber di Kòrsou mr. Lisa Dindial a reakshoná bisando, despues di e sentensia di wes mr. Wattel den e kaso djaluna último.
Korte finalmente a dikta sentensia den e kaso ku gezaghèber di Kòrsou ta bringando pa basta dia kaba pa haña klaridat si e por aktua i kon, e por aktua.
E mashinnan di plaka ta formando un problema serio den komunidat ya pa basta aña kaba. E mashinnan di plaka aki por lo general ta stashoná na sea snèk, tienda òf toko kaminda tur hende tin akseso pa hunga plaka. Segun sifranan ofisial, hungamentu di plaka ta un problema serio den nos komunidat. E adikshon aki ta hinkando hopi famia den problema.
Gezaghèber a kuminsá aktua, konfiskando e mashinnan di plaka ku e topa na kualke establesimentu, pero mester a para e akshon aki despues ku a resultá ku no tin un base legal pa hasi esei.
E asosashon di doño di mashin di plaka ASOMA a reakshoná, menasando di hiba gobièrnu Korte. E doño di mashinnan di plaka a bin ku diferente argumento ku a pone henter e proseso tarda. E último argumento tabata ku e doñonan di snèk i toko (por lo general chines) ku mester a aparesé den Korte, no tabata komprondé otro idioma ku no ta chines.
ASOMA tabata konsiderá ku si e mashinnan di plaka ta ilegal, anto no mester a pèrmití nan entrada niun ora so riba nos isla. ASOMA, sostené pa mr. Marius Römer a bisa ku por a importá e mashinnan sin problema i ku asta a paga impuesto riba nan.

WILLEMSTAD – “Bèrdat ta ku tin diferente motibu pa e krísis den e unidat di Kuido Intensivo di Hospital St. Elisabeth. Pero un dje motibunan prinsipal ta e hecho ku no por haña personal kalifiká ku mester pa traha den e sekshon aki”, asina direktor médiko di SEHOS dr. Douglas Pinedo a bisa relashoná ku e situashon kritiko ku tin atrobe den e hospital mas grandi di Antia.
Un biaha mas mester a tuma akshon relámpago, ora a resultá ku tin mas hende pa drenta e unidat di Kuido Intensivo ku tabatin lugá pa nan. Konsekuensia tabata ku diputado di Salubridat Públiko mester a duna instrukshon pa BZV regla pa manda dos pashènt Colombia pa tratamentu spesialisá.
Banda di esei mester a hasi un apelashon riba klínika Taams pa asistí den dunamentu di kuido pa asina aliviá e situashon na SEHOS.
Mester bisa ku no ta promé biaha e ku e kos aki ta sosodé: algun luna pasá SEHOS tabata den e mesun situashon, te ku mester a hasi un apelashon riba partikularmente outomobilistanan pa kore ku mas koutela pa evitá aksidente ku por resultá den tratamentu di Kuido Intensivo.
E problema ta falta di kama pa por atendé tur pashènt ku mester di kuido intensivo. Unidat di Kuido Intensivo awor aki tin 7 kama, pero esei mester ta mas tantu.
“E problema sinembargo no ta ampliashon sin mas ku mas tantu kama. Esei por naturalmente, pero kuido intensivo ta enserá ku mester tin hende kalifiká pa por duna e kuido aki. Anto esei nos no tin,” asina dr. Douglas Pinedo a deklará.

WILLEMSTAD – “E kòntròl ehersé djaluna último riba bùsnan chikí tabata destiná na promé lugá pa wak si bùsnan ta kumpli ku lei i tin un lista di tarifa kologá na un kaminda visibel pa tur pasahero”.
Esei ta reakshon di diputado di Asuntunan Ekonómiko Eugène Rhuggenaath, riba loke a sosodé i ku a okashoná bastante desgustu serka shofùrnan di bus.
E shofùrnan di bùs aki tabata bastante indigná pa e hecho ku miéntras, segun nan, e tarifanan pa e diferente destinashonnan na Kòrsou no ta kompletamente kla ainda, Servisio pa Asuntunan Ekonómiko (DEZ) a laga su funshonarionan kuminsá kontrolá kiko kada shofùr ta kobrando pasaheronan. E kontrol aki a bai den kombinashon ku funshonarionan di Departamentu di Transporte Públiko.
“E shofùrnan a haña nan ku funshonarionan di DEZ riba nan, anto sin por a komprondé ta kiko ta pasando”, asina Andres Everitz, bosero di e direktiva di Sindikato Transporte Uni, STU a indiká.
Segun Everitz, no ta awor aki, pero pa algun dia kaba e sindikato ta mustrando ku mester kaba di regla e asuntu di tarifa. Despues di e último reunion ku e sindikato tabatin ku Bestuurscollege kaminda a palabra ku e tarifanan nobo lo drenta na vigor, tabatin konfushon kaba ta kua tarifa mester mantené final di kuenta.
Ta parse nos ku gobièrnu ta atakando shofùr di bùs personalmente, komo si fuera gobièrnu tin algu kontra nos komo shofùr di bùs, el a bisa.

WILLEMSTAD/ ORANJESTAD - Studiantenan di entre otro Aruba ta man na kabes. Balor di euro a krese di tal manera último añanan, ku nan debe di estudio a bira asina haltu, ku el a bira práktikamente impagabel. E situashon a bira di tal forma, ku gobièrnu di Aruba a kai den e asuntu aki.
Mester bisa ku básikamente e mesun situashon ta konta tambe pa studiantenan di e islanan di Antia.
Awor aki tin sentenares di studiante arubiano ku ta den problema finansiero grave pa motibu ku nan debe a bira práktikamente 3 biaha mas tantu ku e tabata na kuminsamentu.
Aruba ta usa florin komo moneda. Euro awor aki ta práktikamente tres biaha mas tantu ku e moneda rubiano. Ta bin aserka ku florin, ku ta mará na dollar merikano, ta bal hopi ménos ku algun aña pasá.
Partido AVP a pidi minister di Enseñansa di Ulanda Ronald Plasterk pa buska un solushon pa e problema aki.
Partido AVP a bisa ku e ke weta un solushon pa e problema promé ku e aña eskolar nobo kuminsá.
Igual ku Kòrsou, tur aña Aruba ta manda komo 300 studiante Ulanda pa sigui ku nan estudio avansá.

WILLEMSTAD – Ayera tardi e kompania nashonal di aviashon Iinsel Air a tene un konferensha di prensa, den kual nan a papia di último desaroyonan pa e empresa aki. Durante e promé lunanan di 2008 Insel Air International B.V. (InselAir) a konsentrá su mes riba e skema presente di e kompania. E vuelonan a keda operá ku dos avion, un turboprop di e type Embraer Bandeirante ku 17 lugá, kua ta bula riba rutanan serkano i e di dos avion, ku ta un jet di e tipo MD-83 ku 167 stul ku ta bula den e region di Karibe.
E konsentrashon aki a pone ku den e promé tres lunanan di e aña aki e kantidat di pasaheronan a oumentá i nan ‘on time performance’ tabata riba 90 porshentu. E kresementu di pasaheronan pa Kòrsou den e promé 3 lunanan di 2008 en komparashon ku e mes un periodo di 2007, ta di 3000 pasahero. 2000 di nan tabata pasaheronan di Insel Air ku ta akapará un 70 porshentu di e kresementu aki pa Kòrsou. Pa stimulá mas kresementu Insel Air a dòbel su flota i awor Insel Air ta poseé 2 avion di turboprop i dos avion MD-83 i esaki ta hasi posibel pa subi e frekuensia riba sierto destinashonnan i kuminsá ku rutanan nobo.
For di dia 15 di yüni lo oumentá e frekuensia diario pa Aruba na maksimalmente 7 buelo pa dia. E frekuensia pa Boneiru lo bai di 2 biaha pa siman pa 3 biaha pa dia. Barquisimeto lo ta 3 biaha pa siman komo un destinashon nobo pa e Embraer Bandeirante.
Tambe riba e rutanan di e MD-83 lo subi e frekuensia. Paramaribo lo ta 3 biaha pa siman i St. Maarten lo haña buelonan tur dia. Santo Domingo lo bira 3 biaha pa siman i Valencia tambe lo bira diario.

WILLEMSTAD - Durante 4 dia Teatro Luna Blou ta presentá 5 hende muhé, kada un riba nan mes un personalidat! Irene Van Grieken (Beberin), Manoushka Zeegelaar–Breeveld, Doctor Paula Kibbelaar, Paulette Smit i Lia Bolte. Kada un ku un presentashon ku bo no por pèrdè! Por kumpra karchi lòs pa kada funshon o pakete adelantá na teatro Luna Blou i na Mensing Caminada.
Den e siman aki, dediká spesialmente na hende muhé Teatro Luna Blou ta kargá ku presentashonnan variá manera teatro, músika, pelíkula, ban topa, purba biña charla i hopi mas i kada un na enkargo di hende muhénan ku kada un di nan ta un dinamit riba su mes.
E festival ta habri djarason 11 di yüni 19:30 ku presentashon di Paulette Smit i Lia Bolte ku “Zakken” bou di direkshon di John Leerdam. Pein ku Lala ta pusha na un manera humorístiko pa yega na fondo di e problema eterno entre hòmber i muhé. Paulette a presentá último aki na Kòrsou den Changá.
Despues di e presentashon aki lo tin tambe pa 9or di anochi un pelíkula for di Sürnam “ yamá ‘Hori Yu Srefi” – Keda bo mes. Un pelíkula di e konosido Surinameño Pin de La Parra. Un produsí ku poko medio pero ku gran resultado ku ta trata e e bida di Sür Magdalena ku a bolbe su tera natal ku e meta pa konvensé su kreyentenan Katóliko pa ta mas tolerante ku kreyentenan di otro religion. E ta pone énfasis ku ningun religion tin e derecho di deklará ku ta nan so tin e derecho eksklusivo riba e bèrdat.

WILLEMSTAD/ AMSTERDAM – Munisipio Amsterdam tin ku karga responsabilidat pa morto di un dama ku a muri dor di un situashon peligroso den tráfiko. E munisipio no a hasi sufisiente pa evitá un situashon peligroso ku a kousa e aksidente. Esaki ta loke e ombudsman di e munisipio a konkluí.
E dama a muri bispu di aña nobo ora e vehíkulo ku e tabata aden a kai den awa. Den e lunanan promé ku e aksidente 5 otro persona a kai den awa na e mesun sitio. Alkalde di Amsterdam Job Cohen a duna òrdu pa hasi e investigashon. Cohen ta konsiderá e resultado komo èkstra ordinario doloroso pa e munisipio. “E ta un rapòrt duru. E ta tambe un kos hororoso si bo pensa ki impakto e aksidente akí tabatin riba e famianan”, Cohen a bisa. No ta konosí kiko ta bai hasi ku e konklushonnan den e rapòrt. Cohen a bisa, ku e ke studia e rapòrt i ku promé ku reseso e lo bin ku un reakshon.
Famianan di e defuntu i famianan di e otro pasaheronan ku tabata den e vehíkulo, ta pensando pa entregá un keho na Ministerio Públiko pa negligensia, segun nan abogado. E abogado a bisa ku el a warda te ora e rapòrt sali promé ku entregá e keho na Ministerio Públiko.

Kòrsou
Akí na Kòrsou tambe a yega di sosodé aksidente di tráfiko dor ku gobièrnu no a tuma sufisiente medida di seguridat. Algun aña pasá 4 turista for di Ulanda a muri na e krusada na altura di Marchena Hardware na Herst. E turistanan a sali for di e parke di abestrus i tabata koriendo den direkshon di kaminda grandi. Ora nan a yega na e krusada nan a sigui kore sin nota ku nan no tabatin preferensia. Un dòmtrùk a dal violentamente den nan outo i tur kuater a muri. Algun siman despues D.O.W. a pone bòrchi di tráfiko i reflektor riba kaminda, pa indiká ku mester para na e krusada.

WILLEMSTAD/ AMSTERDAM – Doñonan di kachó pitbull na Ulanda ta kontentu ku a anulá e lei pa likidá e rasa di kachó akí. For di 1993 tabata prohibí pa kria i pari pitbull. Tabata konfiská tur pitbull i mata nan. Un doño di pitbull a splika ku un pitbull ta spil di su doño.
Entrante e siman akí tur doño di pitbull por kria nan kachó sin preokupashon. Si ántes tabata konfiská e kachónan akí i mata nan, awor un tèst lo mester dedusí si e kachó ta peligroso. E èks presidente di e klup di pitbull, Jan Dirk van Ginneke, tin un pitbull di tres aña. Segun e doño e kachó semper a kana liber riba kaya. E kachó Tut ta kriá ku amor i p’esei e ta kore bai serka tur hende i waya su rabu. “Un pitbull ta spil di su doño. Manera e doño ta e ta trata su kachó. Konsekuentemente e kachó ta haña karakter di su doño. Si ta un hende brutu i agresivo, e kachó tambe ta lanta brutu i agresivo”, van Ginneke a splika.
E lei di 1993 a drenta na vigor despues ku pitbull a morde tres mucha i a mata nan. For di e momentu ei a drenta na vigor un lei ku a prohibí pa un hende tin un pitbull. Den e añanan ku a pasa a konfiská mas ku 2000 pitbull. Aña pasá a konfiská 526 di e kachónan akí. Mayoria di nan a haña un angua mortal. Na e momentunan akí tin 180 di e kachónan akí konfiská. Si resultá ku nan no ta ag5resivo, nan mester bai bèk pa nan doñonan.

WILLEMSTAD – E kontroversial polítiko ulandes, Hero Brinkman (PVV) ta kla ku su lista di kaso i hende korupto na Antia. Brinkman a anunsiá for di algun siman ariba, ku e tin un lista di mas ku 30 hende i kaso di korupshon na Antia. Su anunsio a kousa alarma den sierto sírkulo ku hasta a kuminsá insinuá ku Brinkman a haña e informashonnan for di aki mes.
Aparentemente e ta kla ku e lista i el a reservá un sala pa presentá su relato mañan. Ironia di e kaso ta, ku e ta hasi esei nèt na momentu ku un delegashon parlamentario antiano yega Ulanda. Despues di basta deliberashon riba aktitut di Brinkman a yega na un akuerdo ku e interkambio parlamentario entre Antia, Ulanda i Aruba ta sigui. Na yanüari último a kanselá e deliberashonnan, despues ku Staten di Antia no kier a sinta na mesa ku Brinkman pa motibu di su deklarashonnan kontroversial ku miembronan di parlamentu unánimamente a konsiderá insultante. Tin miedu, ku e mesun situashon por presentá na e momentunan aki i un biaha mas Staten di Antia lo ninga di reuní despues di presentashon di e lista mañan.
Opservadornan ta antisipá, ku Brinkman lo bin ku e mesun nòmber i kasonan ku ta konosí kaba. Ademas, tin informashon ku ta e mesun hendenan ku den pasado a skibi riba “netwerknan” di korupshon na Antia, a pasa e informashon pa Brinkman. E hendenan ku a traha e informashon e tempu ei ta konosí. Ironia ta, ku awendia nan mes ta aktivamente enbolbí den polítika i ta gosando di tur privilegio polítiko.

WILLEMSTAD – Diferente mayor ku for di awor aki ke bai ku fakansi ku nan yunan, a haña un sorpresa den último dianan: imigrashon a manda nan yunan bèk kas pa nan bai kol! Diferente di e mayornan ta masha desapuntá, ounke LA PRENSA mester bisa, ku Gobièrnu a informá debidamente ku lo bai tuma e medida aki. Ounke a informá e desishon lat, a habri espasio pa un tipo di dispensashon pa kua e mayor(nan) mester akudí na Servisio di Asuntunan di Enseñansa (SAE). SAE ta analisá kaso pa kaso i tuma un desishon kiko por hasi.
Minister di Hustisia David Dick a konfirmá awe pa LA PRENSA, ku Imigrashon tin òrdu pa no laga niun mucha di entre 4 pa 18 aña pasa sin ku nan tin un dispensashon pa nan bai ku fakansi for di awor aki. E dia ku tur mucha por bai ku fakansi ta dia 27 di yüni awor ku ta e último dia di skol. E desishon ta relashoná ku implentashon di lei di enseñansa obligatorio.
Un investigashon ku LA PRENSA a hasi a determiná, ku te awor aki mas o ménos 60 mayor a hasi uso di e posibilidat pa nan pidi un dispensashon na outoridatnan konserní. E hecho ku ta hasi un petishon no ta nifiká ku outomátikamente e mayor ta haña dispensashon pa bai fakansi ku su yunan. Nan mester bin ku masha bon argumentu pa esei, asina e persona en kuestion ku a pidi pa no identifik’é a bisa.
E maneho ta awor aki, ku muchanan ku ya kaba a pasa nan eksamen final (VSBO, HAVO i VWO) si ta haña pèrmit pa sali bai fakansi for di awor aki. Muchanan ku a pasa nan Gecoordineerde Proefwerken si mester keda skol te dia 27 di yüni awor.