Representa Aruba, cumpli cu reglanan, manda bo peticion y e lo wordo trata cu mucho gusto


ORANJESTAD - Fundacion Lotto pa Deporte a tuma nota den medionan di comunicacion di un entrevista cu Giovanni Arends. Na prome lugar Lotto pa Deporte ta felicita Sr. Arends cu e logro di a titula campeon Europeo di body builders na Romania. Loke si mester enfatisa ta e hecho cu Giovani Arends a representa Hulanda den e competencia aki y no Aruba. Ta pa e motibo aki mes cu Fundacion Lotto pa Deporte ta rechaza categoricamente ponencianan y criticanan di Giovanni Arends, kende a bisa cu Lotto ni Comision di Subsidio a yude.
Fundacion Lotto pa Deporte ta informa cu tanto Lotto como Comision di Subsidio tin nan proceduranan estableci cualnan ta determina con y kende por bini na remarke pa haya ayudo. Un y tur cu ta cumpli cu e reglanan estableci lo bini na remarke facilmente pa haya ayudo.
Lotto ni Comision di Subsido ni Gobierno di Aruba no ta responabel pa atletanan cu ta representa Hulanda of cualkier otro pais. Mas leu Lotto mester enfatisa cu ora a toca himno na Romania, ta himno Hulandes, Wilhemus a wordo toca y no nos himno di Aruba dushi tera. Pa finalisa Lotto pa Deporte ta aclarea cu no ta asina sin mas, sin motibonan hustifica por bin critica un fundacion cu a mustra claramente con bon e ta trahando na bienestar di deporte Arubano.
Shon, cumpli cu nos reglanan stipula, representa Aruba ( y no Hulanda) y lo tin gran probabilidad cu Lotto of Comicion di Subsidio lo brinda ayudo.

 
Mucha cu hopi gana di scucha storia a ricibi e lesado cu man habri

ORANJESTAD - E siman di 2 pa 6 di juni tabata e prome siman di e proyecto di lesamento na cas : Bon nochi, drumi dushi.
E lesadonan a prepara nan mes bon pa haci e bishitanan segun nan lista. Prome cu e bishita di lesamento mayoria a bishita e famia pa cera conoci.Tin famia cu no por a warda riba e bishita di lesamento mes y ya durante e bishita di orientacion tabata entusiasma pa e lesado conta storia.
Tur caminda cu esaki tabata posibel e lesado a complace tambe cu e famia, den mayoria di caso e lesado a orienta su mes prome si y a delibira cu e mayor y e mucha tocante e contamento di storia riba e dos dianan planea.
No ta e lesadonan so a prepara, nan a yega haya stul’i zoya den huki poni, cusinchi riba flur den sala, cama drecha, patio cu stul den grupo poni, famia cla ta warda pa scucha storia.
Mucha cu hopi gana di scucha storia y hopi cu gana di conta nan mes tambe a ricibi e lesado cu man habri. Tin asta un lesado cu a haña un buket di bon bini di un mucha homber chikito. Tin varios mayor cu a gusta e meta di e proyecto y a duna nan nomber pa participa como lesado den luna di october, cu lo ta e di dos periodo pa aña 2008.
Tin mayor cu a ofrece pa nan yiu, cu ta gusta lesa, compaña e lesado un par di biaha como mascota y comparti e placer di lesamento cu otro mucha.
Despues di a pasa dor di algun dificultad cu number di telefon, cu tin biaha no tabata cuadra of a cambia y algun adres un poco leu pa bishita, e lesadonan tabata satisfecho cu con e proyecto a cana den e prome siman.

Aruba Reef Care tin otro accion di limpiesa Juli 5 y 6, 2008

ORANJESTAD- Siman cu a pasa e hobennan di Parlamento Hubenil a ricibi un presentacion di Aruba Reef Care Project for di Sr. Castro Perez, representante di ATA. E invitacion a bin en relacion cu dia Internacional di Medio Ambiente, cual tabata Diahuebs ultimo. E hobennan a haya un descripcion di kico ta e obhetivo, mision y vision di Aruba Reef Care Project.
Durante e presentacion a pone enfasis ariba e importancia di proteccion y preservacion di e medio ambiente marino.
E hobennan a ricibi splicacion amplio di kico ta encera bida marino. A papia ariba e importancia di un structura pa maneha di nos lama y beachnan. Tambe e hobennan por a haya informacion ariba e posibel daño of menasa cu por wordu causa na nos bida marino, den e caso aki ehempelnan a wordo duna y cu por ta entre otro: daño natural, accidental, sobre desaroyo, desperdicio industrial, etc.
Esey nan ta algun desarollo cu por efecta negativamente e calidad di nos rif nan, mangrove, beach y lama rond di Aruba.
E hobennan di Parlamento Hubenil a wordo informa cu e aña aki Aruba Reef Care Project ta cumpli 15 aña di existencia y dia 5 y 6 di Juli, 2008 Aruba Reef Care ta organisa otro grandioso accion di limpiesa. A haci uso di e oportunidad pa invita e hoben di Parlamento Hubenil pa participa na e accion limpiesa y contribui positivamente na nos medio ambiente.
E hoben di Parlamento Hubenil a wordo informa ariba e posibilidad cu tin pa adopta un beach of area. ATA y Aruba Reef Care Project ta spera cu e hobennan di Parlamento Hubenil tuma e decision pa adopta un beach.

ORANJESTAD- Fraccion di RED a ricibi un documento cu ta papia pa su mes, caminda a ricibi un copia di un concepto di Landsbesluit h.a.m. cu Gobierno di Aruba kier decreta cu ta mustra claramente cu Gobierno no tin e boluntad politico pa ehecuta e Rapport Fowler.
E rapport aki a bin cu recomendacionnan pa trese cambio den e sistema di pensioen di minister y parlamentarionan, cambio den e ‘overbruggingstoelage’, pues elimina privilegionan inhustifica cu politiconan a crea pa nan mes. Wel, gobierno di Aruba a duna di conoce cu nan no ta bai kita e privilegionan aki.
Asina cu Pader Lampe a drenta Parlamento el a a haci pregunta na Prome Minister, sr. Nelson Oduber, cu for di 2000, Gobierno y Parlamento a bai di acuerdo pa implementa e Rapport Fowler, y cu despues di 5 aña nada no a sosode y si e por informa RED den ki etapa e trahamento di leynan corespondiente ta.
“E pregunta mi a hasi por escrito dia 7 di november 2005. Nunca mi a haya contesta. Te awor den mi postbus mi a haya un contesta indirecto, ya cu e Memorie van Toelichting di e Landsbesluit h.a.m. cu ta den sali ta bisa: “Alhoewel de kwestie een hoge prioriteit heeft bij de regering, kan vooralsnog geen termijn worden gegeven waarbinnen de wettelijke implementatie van de aanbevelingen van de Commissie Fowler zijn beslag zal kunnen krijgen, zodat het thans niet zinvol is om een einddatum te noemen voor onderhavige bijzondere ambtelijke pensioengrondslag”.
Despues di 8 aña, Gobierno ta bisa cu ainda e no sa ki dia lo implementa Rapport Fowler, es decir gobierno no tin boluntad pa ehecuta dicho rapport. Gabinete Oduber kier sigi djodjo cu e privilegionan cu politiconan a crea pa nan mes despues cu Aruba a haya su status aparte.

WILLEMSTAD - Direktiva di Aspafico ta rekordá tur miembro i no miembro i kabayistanan di Kòrsou riba e inskripshon ku ta tuma lugá awe nochi mitar di 8 na Kriadero el Hijo de David na Seru Loraweg pa e kompetensia ku ta tuma lugá dia 28 i 29 di yüni próksimo na e mesun sitio aki.
Direktiva ta urgí tur hende pa inskribí kabai i tambe e mayor i entrenadónan por inskribí e hóbennan ku ta bai kompetí pa Chalan i Amazona pasobra ta un dia di inskripshon so tin.
No ta tuma inskripshon despues di e fecha ei.
Direktiva a tuma desishon pa e kompetensia aki por sigui nan mester haña por lo ménos 60 kabai inskribí sino e kompetensia lo keda anulá te otro fecha.
Esaki teniendo na kuenta e gastunan haltu ku tin pa organisá un kompetensia di e magnitut aki.
Nos ke ta responsabel ku sèn di e organisashon p’esei nos ta urgí tur hende pa tuma bon nota di e anunsio aki i inskribí sufisiente kabai pa asina e kompetensia por tuma lugá.
E wes ku lo husga e kompetensia aki riba petishon di miembronan ta Gerardo Esteves di Repúblika Dominikana.
Tambe direktiva di Aspafico ta rekordá tur miembro i kabayista riba e kabalgata pa Dia di Tata ku ta tuma lugá djadumingu awor 15 di yüni saliendo 2 or di mèrdia for di Isla Verde i terminá Rancho 20 de Noviembre na Sabana Hundu.
Ta urgí tur hende pa tei na tempu pa por sali na tempu i asina terminá na un ora kristian.

WILLEMSTAD - Den e fin di siman tras di lomba djabièrnè i djasabra 6 i 7 di yüni respektivamente tabatin aki na Kòrsou den stadion Ergilio Hato, e Dutch Caribbean Championship 2008,, ku atletanan di Kòrsou, Aruba, Boneiru, Sürnam, Venezuela i Trinidad.
Tabatin vários resultado bon pa atletanan di Kòrsou.
Den e kareda di 100m pa mucha muhé entre 14-16 aña, Shamila Daal di Kòrsou a resultá e ganadó ku tempu di 12.59 sekònde. Den e kategoria di 17+ Shurnal Henriette di Kòrsou tambe a gana ku tempu di 12.21 sekònde.
Den mucha hòmber 14-16 aña Christopher Garia di Kòrsou a marka tempu di 11.01 sekònde riba 100m.
Den e kategoria 17-19 aña, ta Curtis Kock a resultá e gana dor ku tempu 10.80 sekònde.
Den e kategoria di 20+, Keston Bledman di Trinidat a marka 10.37 sekònde i su kompatriota Rondell Sorrillo a marka tempu di 10.62 sekònde pa keda na di dos lugá.
Shamilia Daal a gana tambe den bulamentu leu, markando un distansia di 5.38.
Den 400m pa mucha muhé 14-16 aña, Lieshaya Dalnoot di Kòrsou a marka tempu di 56.40 sekònde pa yega promé i Vanessa Philbert di Kòrsou ku tempu di 59.32 a yega na di dos lugá.
Den mucha hòmber 14-16 aña riba 400m Daniel Manuel di Kòrsou a marka tempu di 50.65.
Den e kategoria di 17 aña plùs, Luis Luna di Venezuela a marka tempu di 47.03 sekònde.

ARIES: Bo ta libra di preshonnan familiar, responsabilidatnan ku no ta pertenesé na bo i di sakrifisionan inútil. No teme ku kambionan i riska dal paso. 04,33,09.

TAURO: Pone bo mundu sentimental na òrdu. Kambia bo aktitut mental i mundu ku ta rondonábu ta kambia. Tuma inisiativa den tur aspektonan. 40,06,12.

GEMINIS: Bo suerte ta kambia awor, den kosnan nobo, distinto. Tur lokual ku ta arte, spiritualidat i tambe plaka ta nifiká bendishon pa bo. 07,13,02.

KANSER: Evitá kansansio físiko, mental i emoshonal. Buska e punto medio den tur kos pa establesé e balansa ku tantu bo tin mester. 01,46,22.

LEO: Bo karera o profeshon ta kobra bida nobo. Bo ta eksperimentá awor ku algu diferente, distinto. Tur reto ta atraébu manera nunka ántes. 20,08,15.

VIRGO: Ser mas selektivo den tur lokual ku bo ta disidí. Envolví bo mes den pasatempunan manera skirbí, toka algun instrumènt musikal, balia o kanta. 06,10,43.

LIBRA: No pone èkstra límite den nada i muchu ménos stima. Ora nan humiábu, nan ta despresiábu i ora bo ta ponebu riba un pedestal, nan ta balorábu. 09,30,01.

SKORPION: Porfin bo ta libra di un atadura, adikshon o problemanan sentimental. Bo ta komprondé ku bo ta pèrdiendo tempu ku esun ku no ta kumbiníbu. 22,09,16.

SAGITARIO: Esnan kasá di e signo aki ta enfrentá na realidatnan ku ántes nan ta ninga di aseptá. Bo poko amigunan ta sigui na bo banda dunando apoyo. 19,05,36.

WILLEMSTAD/DEN HAAG - Parlamentu ulandes lo no duna su koperashon pa investigá korupshon na Antia. Un mayoria den Tweede Kamer a rechasá e petishon di partido Partij voor de Vrijheid pa un enkuesta parlamentario riba e asuntu aki.
Partidonan di koalishon CDA i PvdA, huntu ku partidonan di oposishon GroenLinks i VVD a indiká ku nan no ta sinti nesesidat p’esei.
“Si konstatá ku tin kasonan di korupshon na Antia, anto simplemente mester hasi denunsia di esaki. Un enkuesta parlamentario komo un paso meimei ta parse mi algu innesesario,” asina miembro di frakshon di CDA Bas Jan van Bochove a bisa.
Parlamentario John Leerdam di PvdA ku ta oriundo di Antia tambe a bisa ku e no ta sinti nada pa esaki. Segun Leerdam, no tin nada nobo ku a bin dilanti. “Niks nieuws onder de zon” ta loke el a bisa.
E tambe ta haña ku si tin kasonan kaminda por papia di korupshon, anto hustisia na Antia mester pèrsigui esnan kulpabel.
Leerdam a enfatisá ku e no ta sera su wowonan pa realidat, pero di otro banda mester bisa ku den último añanan a hasi hopi pa kombatí korupshon na Antia.
PVV ke kuminsá e investigashon parlamentario aki, a base di un kantidat di 170 kaso di korupshon ku e ta bisa ku su miembro Hero Brinkman konstatá na Antia.
Si otro frakshonnan den parlamentu ulandes no koperá ku e investigashon, anto esei ta nifiká ku nan tambe ta kulpabel na e situashon di korupshon na Antia, segun e frakshon di PVV.
Partido VVD a bisa ku e ta haña un enkuesta parlamentario asin’aki un bon kos, pero e ta haña ku esei ta algu ku Antia mes mester hasi.

WILLEMSTAD - Gobièrnu a tuma e desishon ku e ta destruí e nombramentu di Gerrit Schotte komo hefe di Facilitaire Zaken na servisio DROV. Esei ta loke abogado di gobièrnu a partisipá ayera durante tratamentu di e kaso den korte.
Ku esaki por bisa ku a yega un fin tambe na e disputa riba e kaso aki.
Despues ku el a baha komo kolaboradó di diputado (Charles Cooper, red) na 2007, e Bestuurscollege di e tempu ei a nombra Schotte den e funshon ya menshoná na DROV, un desishon ku a okashoná bastante desgustu, malkontentu pero tambe indignashon serka empleadonan di DROV.
E indignashon ta mas grandi ainda, si konsiderá ku ya kaba tabatin un funshonario na DROV mes, Sharine Mongen ku tabatin e promesa ku ora e persona aktual baha ku penshun, ku e lo haña e funshon ei.
Ku nombramentu di Schotte, e menasa tabat’ei ku e lo haña e funshon ei mas, motibu tambe ku el a entamá e kaso den korte.
Mester bisa, ku e kaso a dura un eternidat. Tabatin diferente seshon kaminda wes a purba haña un solushon pafó di korte, pero no a logra den esaki. Inkluso t’asina ku durante kuminsamentu di e kaso den korte, sierto momentu e abogado di gobièrnu a insistí ku no tin un nombramentu di Schotte na DROV, un anunsio ku a okashoná hopi strañesa serka tur hende. Pero, e abogado despues mester a revoká e ponensia aki, ora a sali na kla ku debidamente ta eksistí un dekreto ku ta regla nombramentu di Schotte.
Ayera abogado di gobièrnu a anunsiá ku Bestuurscollege un dia promé a tuma e desishon ku ta revoká e nombramentu di Gerrit Schotte na DROV. Esaki ta nifiká, ku a habri kaminda atrobe pa Sharine Mongen por haña e puesto di hefe di Facilitaire Zaken.

WILLEMSTAD - Lo no tin elekshon na 2010, simplemente pasobra e pais ku yama Antia, no ta eksistí mas, asina promé minister antiano Emily de Jongh-Elhage a deklará durante enkuentro ku prensa ayera.
E reakshon aki di De Jongh-Elhage a bin despues ku lider di MAN Charles Cooper a lansa krítika fuerte riba e asuntu aki. Cooper a bisa ku ta inaseptabel ku gobièrnu por disidí riba su mes, ku no tin elekshon na aña 2010, tal manera lei ta stipulá.
Si gobièrnu no tene elekshon, MAN lo denunsiá esaki I MAN lo konsiderá pa bai korte, asina Cooper a atvertí.
Segun Charles Cooper, partidonan di koalishon no tin kurashi pa pone maneho di gobièrnu dilanti pueblo den un elekshon liber pa asina pueblo disidí si e ta haña gobernashon di último añanan aseptabel òf no.
Promé minister di Antia ayera a rechasá e ponensia aki.
El a mustra ku durante e enkuentro polítiko ku a tuma lugá na mei último, partidonan a yega na sierto palabrashon. A konkluí ku 15 di desèmber 2008 no ta alkansabel mas. Pero un di e desishonnan a tuma ta, ku e konseptonan di lei ku ta regla desmantelashon di Antia mester ta kla – mas tantu posibel – pa dia 15 di desèmber awor.
“E meta ta pa durante 2009 traspasá mas tantu tarea i outoridat posibel pa e teritorionan insular. Nos ta papiando di entidatnan nobo ku lo haña e tareanan ku awor aki Gobièrnu Sentral tin. Ki sentido tin pa bai tene elekshon pa parlamentu i pa un gobièrnu nobo, si no tin trabou mas pa e gobièrnu aki hasi?” De Jongh-Elhage a puntra.

WILLEMSTAD - “E lei pa regla supervishon finansiero no ta un lei di Reino (Rijkswet) manera nos tin kustumber di atendé. De fakto, gobièrnu no tin obligashon di manda esaki ni pa Konseho Insular, ni pa Staten. Pero komo ku nos a palabra esei den reunion ku Ulanda, mi ta hasié tòg,” asina lider di gobièrnu antiano Emily de Jongh-Elhage a deklará.
Awe parlamentu antiano mester atendé e asuntu aki.
Tantu frakshon di MAN i frakshon di Forsa Kòrsou, tin masha problema ku e forma ku a atendé tratamentu di e lei aki.
Nan ta mustra ku e lei ku gobièrnu ke introdusí pa regla supervishon finansiero pa Kòrsou i Antia ta un lei di vital importansia.
“Nos ta papiando aki di un lei importante i pa bo kana e proseso di un lei asin’aki, bo mester tin por lo ménos e konsehonan nesesario, manera esun di Raad van Advies. Anto te asina leu ku nos por a averiguá, ni sikiera a pidi e konseho aki ainda,” asina Eunice Eisden, miembro di MAN a denunsiá.
E reunion di awe ta riba petishon di partidonan di koalishon pa fiha posishon di Staten riba e lei ku mester regla funshonamentu di e Kolegio pa Supervishon Finansiero. Awor aki ta den rekta final ku aprobashon di e lei aki. Unabes e lei ta na lugá, Ulanda por kuminsá ehersé kòntròl riba maneho finansiero di Kòrsou, St. Maarten i Antia.
Esaki alabes ta kondishon pa kuminsá ku e proseso di saneamentu di debe di nos pais.
Di akuerdo ku Gobièrnu Sentral den su karta pa parlamentu, ta e intenshon pa trata e proposishon di lei aki den Konseho di Minister di Reino dia 11 di yüli benidero.

WASHINGTON, Merka, - E kandidato demókrata pa presidensia di Merka, Barack Obama, a aseptá renunsia di e hefe di ekipo di tres persona nombrá siman pasá pa buska e “running-mate” (vise presidente) ku lo kompañ’é den su karera pa Kas Blanku.
E nòmber di Jim Johnson, eks presidente di e empresa hipotekario semi-estatal Fannie Mae, den último simannan a aparesé involukrá den un skandal, relashoná ku algun préstamo dudoso ku el a risibí di e empresa Countrywide Financial.
Jim Johnson, kende tambe a dirigí e búskeda di vise presidente pa e senador demókrata John Kerry den e elekshonnan ku el a pèrdè na 2004, a disidí bandoná su puesto, pa evitá ku e polémika den kua e ta involukrá lo por afektá e mishon ku e senador pretu a asign’é.
“Jim no tabata ke distraé atenshon den e importante tarea di buska informashon riba mi kandidato pa vise presidente, i p’esei el a tuma e desishon di retirá, i mi a asept’é”, un komunikado emití pa ofisina elektoral di Obama na Chicago a bisa.
Clinton ta sperando kontesta
Miéntras tantu, ainda hopi hende ta puntra si Hillary Clinton lo bai forma parti di e asina yamá “Dream ticket” huntu ku Obama.
Esaki ta algu ku a keda spekulá ku fòrsa den filanan demókrata, despues ku e dama senador pa New York a aseptá su derota den e elekshonnan primario i a ofresé su mes pa okupá e kargo di number dos di Obama.

WILLEMSTAD – Vereniging Protestant Christelijk Onderwijs (VPCO) a lansa un alarma grandi ayera, indikando ku mas ku 300 mucha lo sali perhudiká pasobra nan no por sigui enseñansa HAVO/VWO den e próksimo aña eskolar. E organisashon a tene un konferensha di prensa ayera pa señalá vários aspekto ku no ta bayendo den bon direkshon pa ku e maneho di enseñansa di e gobièrnu.
Segun direktiva di VPCO, danki na e maneho di Gobièrnu di Kòrsou kada aña tin un gran kantidat di mucha di kua ta kita nan derecho di bai un skol HAVO/VWO. Te ku awor tin únikamente lugá pa 18% di e mihó studiantenan di grupo 8 na e skolnan HAVO/ VWO eksistente. For di dia ku e Deltaplan a keda firmá e punto di salida ta, ku tur mucha di grupo 8 na skolnan básiko i di fundeshi tin derechi di pasa pa HAVO/VWO basta nan tin un rapòrt ku un promedio di 7. Esaki ta 25% pa 30% di e kantidat total di alumnonan. E kresementu aki di kasi 300 mucha ku tin derecho pa haña nan formashon na un skol HAVO/VWO, no por keda akapará pa skolnan eksistente. “Pues ta nos yunan ta bira víktima di e situashon aki.”
Vereniging Protestant Christelijk Onderwijs (VPCO) a señalá e kresementu aki pa añanan largu i ta bringa for di 1997 pa supsidio di un propio HAVO/VWO. Gobièrnu di Kòrsou no ke finansiá esaki ni ke rekonosé. Esaki no opstante e echo ku esaki práktikamente no tin konsekuensia finansiero adishonal pa presupuesto di gobièrnu. Pió ainda e kostonan promedio di un studiante na un HAVO/VWO, konforme e norma pa kubri di sistema “V&V “, ta mas abou ku pa un studiante ku ta sigui enseñansa pa fishi. Kasi 60% di VPCO su alumnonan ta sigui pa HAVO/VWO. Ku esaki VPCO ta entregá e porsentahe mas haltu di alumnonan na skolnan HAVO/VWO pero no mag di ofresé su propio edukashon HAVO/VWO.

WILLEMSTAD - Resientemente Maduro & Curiel's Bank i Sentro pa Guia Edukashonal a hasi entrega di chèk na ganadónan di kompetensia eskolar “Lesa pa otro skucha”.
Riba foto por mira e tres ganadónan di e kompetensia eskolar “Lesa pa otro skucha” organisá pa Sentro pa Guia Edukashonal i patrosiná pa Maduro & Curiel’s Bank den kuadro di Lito su proyekto “Kuida Bo skol i stima Bo skol”. Di robes pa drechi nos por mira Gino Valeriaan (MCB), Rheandra Groenberg di Johan van Walbeeckschool (ganadó di e kompetensia) ku e chèk di 5.000 florin pa su skol huntu ku su Kabes di skol yùfrou Rochelle Sanches-Koffie, Lee-Ann Martes di Sta Rosa de Lima School (di dos lugá) ku e chèk di 3.500 florin pa su skol huntu ku yùfrou Carene van Wilgen, Lis Marina Felix Pita di Kolegio Iris Bruyning (di tres lugá) ku e chèk di 2.500 florin i su yùfrou Judeska Wallé ku un check di 1.000 florin komo e skol ku e mihó “yèll” i sra. Solange Olaria (Sentro pa Guia Edukashonal).

WILLEMSTAD - Pa Servisio pa Obra Públiko, DOW, semper ta un plaser pa duna homenahe na su empleadonan ku ta kumpli hopi aña den servisio. Resientemente esei tabata e kaso, na momento ku señor Otsmar Josepa a kumpli trinta aña den servisio di DOW.
Señor Josepa a drenta servisio komo Technisch Opzichter.
Durante añanan ku a pasa el a progresá i aktualmente e ta okupá e puesto di “Hoofdopzichter” na e departamentu di Civiele Techniek na DOW.
Señor Josepa ta un trahadó ehemplar, puntual, perfekshonista, un persona dediká na su trabou i ta gusta kompartí su eksperensia ku su demas koleganan.
Un felisitashon kordial na señor Josepa sperando ku DOW por sigui konta pa un tempu largu mas di su sosten i eksperensia.

WILLEMSTAD - Fakultat Sosial Ekonómiko di Universidat Nashonal di Antia (UNA) a koperá na e investigashon pa promoshon di Arnoud van der Maas ku a defendé su tésis dia 9 di mei na Rotterdam School of Management, ku ta liá na Erasmus Universiteit. E tésis ta titulá: Strategy Implementation in a Small Island Context: An Integrative Framework i tabatin Kòrsou komo region di investigashon.
Den e investigashon ta kontestá e pregunta kua faktornan ta influensiá e éksito si òf no di implementashon di plannan stratégiko den e konteksto no Wèst.
Dr. Ing. Gilbert Cijntje RI, lektor na Fakultat Sosial Ekonómiko di UNA, tabata e ko-promotor i Roy Evers, direktor di Curaçao Institute for Social and Economic Studies (Curises), tabata e inisiadó.
“Den último 10 añanan nunka no a sosodé ku UNA a fungi komo ko-promotor na un disertashon”, asina Cijntje ta bisa. “E tabata un reto i un honor grandi pa partisipá na un proyekto asin’aki. ” E promotor mes tabata prof.dr. H.G. van Dissel.
E investigashon ta inovativo, pa motibu ku ya kaba a hasi hopi investigashon na formulashon di plannan stratégiko, pero no na implementashon di e plannan aki i e eventual éksito òf fayo. Lokual tambe ta úniko ta, ku e investigashon a tuma lugá den e konteksto no-Wèst, manera paisnan den desaroyo ekonómiko i ekonomianan chikitu. Por último, e investigashon tabata partikular, pasobra e ta multi disiplinario i ta deskribí diferente área di management, pero tambe estudionan riba tereno di desaroyo i islanan.

 

WILLEMSTAD - Dia 16 di mei último Curaçao Airport Partners tabatin un dia spesial di apresio p’e empleadonan ku a destaká durante di aña 2007 komo ku nan no a mèldu malu den henter e aña.
Entre esnan ku a selebrá e echo aki tabatin algun empleado ku no a mèldu malu durante 14, 22 i hasta 26 aña. Na tur tabatin 48 empleado ku a haña e rekonosementu kompará ku 44 den e aña anterior.
Komo muestra di apresio pa esnan ku a wòrdu honrá, Curaçao Airport Partners a selebrá e okashon aki ku un happy hour i tambe kada un a risibí un opsekio.
Gerensia di CAP a bisa, ku e ta apresiá masha tantu ku tin empleadonan asina dediká i ku ta asina saludabel. El a bisa ku kompará ku e aña anterior e grupo a oumentá i ta spera ku lo e oumentá aun mas na aña 2008.

WILLEMSTAD - Konforme regla nan di organisashon i atministrashon di Gobièrnu Sentral, Minister di Tráfiko i Telekomunikashon Ir. Maurice Adriaens a risibí e relato anual di aña 2007 di Direktorado di Nabegashon i Marítimo. E direktorado aki ta esun promé den e ministerio di tráfiko i telekomunikashon ku a hasi entrega di nan relato anual.
Entrega di e relato anual 2007 na minister Adriaens a tuma lugá dor di sr. Martina i sra. Devere. E relato ta duna informashon kon entre otro e sumanan presupuestá a wòrdu uzá i e maneho hibá durante 2007.
Konforme e relato, edukashon di personal i tambe reforsamentu dje atministrashon marítimo tabata e dos elementonan na kua atenshon a wòrdu duná den 2007.

WILLEMSTAD – Diferente mayor a reakshoná masha furioso riba e eksigensia di gobièrnu di Kòrsou ku muchanan no por bai ku fakansi promé ku skol sera dia 27 di yüni awor. Si tin mayor ta insistí ku nan yunan por bai ku fakansi, nan por pidi un dispensashon na Servisio di Asuntunan di Enseñansa (SAE). SAE a haña diferente petishon kaba den e último dianan pa un dispensashon. E aña aki ainda ta un poko fleksibel ku aplikashon di e regla aki pero einan mes por mira ku el a krea inkomodidat pa diferente famia ku ke bai ku fakansi for di awor. Imigrashon a haña òrdu pa no laga niun mucha pasa ku ta entre 4 i 18 aña a ménos ku tin motibu bálido òf un dispensashon.
Algun mayor a alegá ku miéntras ku gobièrnu ta bisa ku muchanan entre 4 i 18 aña mester ta na skol, ya kaba algun skol a sera. Un di nan ta por ehèmpel International School ku ya kaba a sera. Mayornan awor ta na kareda pa haña dispensashon pa nan sali ku nan yunan for di Kòrsou. Na otro skolnan tambe tin e situashon partikular ku ya kaba diferente klas a sera despues di e proefwerknan final. Mayornan di e muchanan aki tampoko por bai ku fakansi si nan no haña dispensashon. Di otro banda sinembargo gobièrnu no a sòru pa e skolnan keda habrí te dia 27 di yüni awor. Basta reklamá nos a haña riba e situashon ku a presentá i ku a pone diferente mayor na kareda. Algun di nan ya kaba a hasi e gastunan korespondiente i awor mester kana e kaminda pa bai skol buska firma i bai SAE pa haña un dispensashon.

WILLEMSTAD – E kompania di telefòn lokal UTS a informá awe, ku e no a haña indikashon di sabotahe na e kompania, relashoná ku e black-out ku tabatin siman pasá. Sinembargo, tres empleado di e kompania ta riba “non aktief” pendiente di e investigashon aki. E black-out di telefòn a kue tur hende di sorpresa djarason siman pasá i a okashoná un daño grandi pa ekonomia di Kòrsou. Mesora e kompania a anunsiá un investigashon tékniko independiente meimei di vershonnan insistente ku por ta trata aki di un kaso di sabotahe.
E kompania a informá awe mainta ofisialmente, ku investigashonnan ta kanando relashoná ku e problema ku a surgi den e sistema di koriente na Sentral di Steenrijk siman pasá, 4 di yüni, kual a kousa interupshon den vários servisio di UTS. “Na momentu ku e problema aki a surgi, UTS mesora a konsentrá pa resolvé e problema mas pronto posibel. Seguidamente investigashonnan a start pa sa e kousa di e problema aki. UTS a pone tres empleado ku ta direktamente responsabel pa sistema di koriente riba ‘non aktief’ pa nan mes protekshon i tambe p’asina e investigashonnan aki por kana di un manera ophetivo.
UTS ta hasiendo uso di un kompania independiente pa hasi e investigashonnan aki. Esaki ta andando, pero ainda no tin un resultado konkreto. Sí por bisa, ku te na e momentunan aki no tin ningun indikashon ku ta trata di un sabotahe”, asina e kompania ta bisa.
E kompania a sigurá, ku e lo suministrá mas informashon tokante e investigashon, na momentu ku esaki bira disponibel.