ORANJESTAD- Den luna di Mei, Aruba Lions a celebra dia di Mama na KIA cu e presonan di e parti femenino. Esaki pa di 5 aña consecutivo y den cooperación estrecho cu e personal di KIA y hunto cu e grupo di Amigos de Colombia, cu pa e ultimo 3 aña a bin ta asisti cu e parti di entretenimento.
E idea a nace durante un conversación cu KIA encuanto un posibel donacion cu Aruba Lions kier a hasi na KIA 5 aña pasa. Aruba Lions ta pensa cu aunque cu e personanan aki a comete un error den nan bida, nan merece di ser recorda durante un dia asina importante y precisamente esaki ta e intencion pa brinda e detenidonan algun ora den un ambiente di gozo y reflexion hunto cu nan yuinan.
E actividad di dia di Mama ta conta tambe cu e cooperación di Sr. Etty Toppenberg cu pa 5 aña caba tin e parti musical na su encargo cu ta hopi aprecia pa esnan presente. Tur aña ta percura pa trece un persona pa e parti spiritual y di reflexion, cual e aña aki tabata na encargo di Sra. Belquis Moreau.
E atardi tambe tabata jena cu entrenimento manera menciona di Sr. Etty Toppenberg, poesia y obranan prepara pa e yuinan pa nan mama y weganan pa esnan presente. Na final tur presente ta hanja un regalo di e Famia Leonistico.
Na luna di Juni a toca turno na e parti masculino di KIA, den caso specifico esnan cu tin yuinan residencia na Aruba. Den cooperación estrecho cu Amigos di Colombia, Dia di Tata ta ser celebra hunto cu e presonan y nan yuinan.
E aña aki e Consul di Colombia, Sr. Ricardo Sifuentes hunto cu su distinguida esposa a forma parti di e comitiva, hunto cu e Presidente di Aruba Lions Club, Sr. Giovanni Kock, Lionessnan Suzy Kock y Minerva Vrolijk. Sra. Belquis Moreau a percura pa e parti di reflexion y motivación hunto cu Sra. Sharon Alexander, di Moreau Facilitations.

ORANJESTAD- Departamento di Asunto Social (D.A.S.), en especial team di districto di Sta. Cruz ta haci un yamada na habitantenan pa bira miembro di comision di bario di Sta. Cruz.
E comision di bario tin como meta pa organisa actividadnan educativo, deportivo y recreativo den e bario. Ademas e comision di bario ta yuda na mehora y motiva e comunicacion entre habitantenan.
Pa logra esaki ta importante pa tin personanan motiva, energitico y cu curazon pa e desaroyo di nan bario cu ta dispuesto pa duna un parti di nan tempo na e comunidad.
Un di e tareanan di D.A.S. ta pa stimula y fortifica e red social.
E comision di bario por conta cu e sosten y guia di D.A.S. Ta sali for di e punto di bista cu habitantenan pa medio di un comision di bario ta traha na un mehoracion den nan bida y ta haci esaki door di traha cu otro.
Cooperacion entre habitantenan ta crea relacionnan positivo y harmonioso. Un comision di bario por fungi tambe como punto di coordinacion pa logra metanan pa e bario, por ehemplo ora ta trata di limpiesa y vandalismo den un bario.
Esnan interesa pa forma parti di e comision di bario di Sta. Cruz por tuma contacto cu Sra. Julie Merencia, trahador comunitario di Team di Districto di Sta. Cruz na telefon: 5851474

ORANJESTAD- Diahuebs mainta Minister President sr. Nelson Oduber a ricibi bishita di e Consul di Republica di Filipinas staciona na Caracas, Venezuela, esta sr. Anthony Achilles Mandap.
Meta di e bishita aki ta pa estrecha e lazonan di hermandad y amistad entre Filipinas y Aruba. A sigui despues cu intercambio di recuerdo caminda e Consul a haci entrega di un bunita cuadra di un aguila Filipino na sr. Oduber.
Durante di e bishita aki tambe tabata presente e consul di Filipinas na Aruba, esta sra. Ami Henriquez-Mendez


Diadomingo awor di 5’or pa 10’or
Celebracion di Dia di Tata na Cede Libertador Betico Croes

ORANJESTAD- Diadomingo awor, esta riba Dia di Tata, partido Movimiento Electoral di Pueblo (MEP) lo bay tin un bunita celebracion di e dia aki na Cede Libertador Betico Croes (Tata di pais Aruba) cu lo cuminsa pa 5’or di atardi y terminando pa 10’or di anochi.
Lo bay tin entretenimiento di un banda musical y caha di orgel. Alavez lo bay scoge e Tata 2008 di partido MEP y lo bay tin varios premio pa tur e tatanan presente, e.o. un premio pa e tata cu ta baila e mihor wals.
Asina ta un y tur, henter familia ta invita pa pasa un rato ameno den seno di e familia grandi di MEP.

ORANJESTAD- Diahuebs mainta Minister President sr. Nelson Oduber a ricibi bishita di sr. Henry Fingal, kende a cumpli 25 aña den servicio di Gobierno. Actualmente sr. Fingal ta fungi como fotografo na Servicio Informativo di Gobierno (BUVO).
Na e ocasion aki Minister President a duna su palabranan di felicitacion y gradicimento na sr. Fingal y a desea su persona hopi aña mas di servicio.
Presente tabata tambe su señora y su dos yiunan.

WILLEMSTAD – Awe mainta a bira konosí, ku Paul van Bladel lo no ta disponibel pa un periodo adishonal komo dekano di Fakultat Soshal-ekonómiko di Universidat Nashonal di Antia. E lo keda asosiá na UNA komo dosente.
Van Bladel a konfirmá pa LA PRENSA awe mainta, ku su tèrmino a vense i ku e lo no pone su mes disponibel pa un periodo adishonal.
E motibu ku el a menshoná, ta e relashon entre Universidat di Antia i CURISSES, un entidat independiente ku ta funshoná na UNA, pero ku tin mas i mas interogatorio riba su ròl. Ta konosí ku e Rector-Magnificus aktual sra. Jeanne de Bruijne ke hasi CURISSES parti integral di UNA.
Van Bladel a splika, ku nunka UNA a bisa di kon e eksaktamente nan tin problema ku funshonamentu di CURISSES. “Nan ta kreando e persepshon, ku CURISSES ta un organisashon straño. Tambe UNA tin problema ku nan no por ehersé mas poder riba CURISSES ku nan ta deseá”.
Segun Van Bladel, e Hunta di Supervishon a skohe banda di Rector i CURISSES ta pensa diferente riba e desaroyo aki.
Van Bladel a bisa, ku CURISSES a hasi trabou na UNA i a entregá mas ku 40 studiante di nivel haltu ku awe ta profeshonalnan distinguí. E direktiva di CURISSES ta bai deliberá riba e desaroyonan i próksimamente lo bin ku un punto di bista spesífiko pa loke ta tumando lugá.

WILLEMSTAD – Tur hende ku a pasa eksamen pa reibeweis for di aña 2002 te ku awe, a pasa e eksamen akí segun leinan i bòrchinan ku no ta konta mas. For di aña 2000 gobièrnu a adaptá e lei di tráfiko di 1957 i a aprobá e lei nobo ku na 2002 a drenta ofisialmente na vigor. Sin embargo no a adaptá e eksamen di reibeweis. E parti teóriko te ku awe ta segun e lei di 1957.
E situashon akí ta tantu konfuso komo peligroso. E parti konfuso ta presentá ora esun ku ke tuma lès di kore, ke subi kaya ku su instruktor. E pèrsona akí a siña su parti teóriko i a slag pa su eksamen teóriko segun e lei bieu di 1957. Pero riba kaya e ta topa ku bòrchinan i reglanan ku e no konosé, pasó nan no ta inkluí den e eksamen di teoria. Por ehèmpel un di e kosnan ku a kambia den e lei nobo ta e preferensia ku peatonnan a haña den tráfiko. Den e lei nobo tin reglá ku un outomobilista ku ke lora na man drechi mester para pa un peaton ku ke krusa kaya. Un outomobilista ku yega na un pasashi zebra (zebrapad) mester para pa un peaton ku ke krusa. E pèrsona ku a slag pa su eksamen teóriko no a haña esaki durante di su eksamen. Konsekuentemente si e subi kaya pa tuma lès, e no sa ku e peaton tin preferensia. Esaki ku tur konsekuensia pa e peaton. Den e kaso akí ta su instruktor lo tin ku bis’é ku e mester para pa un peaton krusa. Pero e no a siña esaki, pasó e no ta menshoná den e preparashon pa e eksamen di teoria.

NEW YORK – Gruponan ku ta opservá finansa i tambe parlamentarionan di e siudat di New York ta rabiá pa motibu ku New York Yankees a pidi e siudat 350 mion dollar mas pa nan por kaba nan stadion nobo. E grupo i e parlamentarionan a bisa ku esaki lo kaba tur nan plaka ku nan tin pa traha parkenan pa públiko i tambe drecha transporte.
Tres miembro di e asamblea di New York City a keda yamá pa eksaminá un proposishon finansiero pa sostené un di e organisashon deportivo mas riku ku tin.
“E timnan deportivo aki ta kompanianan privá ku ta parse adikto pa hinka nan mannan tur ora den e kaha di plaka di gobièrnu”, asina Hakeem Jeffries un miembro di e asamblea a bisa.
E siudat a saka 941 mion dollar na bono kaba ku nan a yuda pa traha e stadion di 1.3 bion dollar na e otro banda di kaya di esun aktual.
Ofisialnan di siudat ta lobi serka Washington pa purba di kambia un regla di IRS pa yuda Yankees haña e 350 mion dollar ku nan tin mester. Nan ta bisa ku un kambio asina por yuda otro proyektonan di stadionnan grandi i no solamente Yankee Stadium.
E presidente di Yankee Randy Levine ta bisa ku nan ta buskando mas fondo. Yankees no tin nada mas pa pone.
E plan di Yankees ta pa e stadion ta kla pa apertura e di temporada 2009 ounke ku nan haña fondo si òf no.

NEW YORK – Hasta ora ku New York Mets gana un wega, Willie Randolph ta pèrdè.
Djarason Randolph a realisá dos desishon ku direktiva di Mets ta skrutiná.
E desishon pa duna Randolph su retiro ta den man di e gerente general di Mets, Omar Minaya i su status ta segun fuentenan “day-to-day”.
Mets a skohe di mantené Randolph durante di un reunion dia 26 di mei último ora ku el a reuní ku Minaya i Jeff i Fred Wilpon doñonan di Mets.
For di e dia ei Mets tin rèkòrt di 8-8 i e tim a pèrdè sinku wega konsekutivo promé ku nan a bin gana e wega di djarason 5-3 den di 13 ining riba un “walk off two-run homerun” di Carlos Beltran.
DBacks a bin empatá e wega despues ku Mets a kuminsá e nobeno ining ku skor di 3-0 ariba riba un honron di tres kareda di Mark Reynolds na man di e closer Billy Wagner ku dos out.
Esaki tabata un di e desishonnan ku nan ta akusá Randolph di dje.
El a pèrmití e habridó Mike Pelfrey pa habri nobeno ining despues ku e tabata tin 110 lansamentu tirá den e wega. Despues ku Stephen Drew a habri e entrada konektando di hit, el a bin trese su closer Billy Wagner.
For di komienso di aña 2007, Wagner a habri un ining na 84 okashon i na solamente shete okashon el a drenta meimei di un ining.
El a salba 44 wega den 50 oportunidat ora ku e kuminsá un ining di akuerdo ku STATS Inc. Su efektividat den e situashonnan ei ta 2.05 i el a pèrmití seis honron den 88 ining.

WILLEMSTAD – Dia di Tata djadumingu 15 di yüni pa 8’or di anochi, bala ta bai kore den stadion Ergilio Hato, ora tatanan di Bon Futuro ta bai enfrentá otro.
Tatanan Veterano kontra di Tatanan hóben, esaki pa di tres aña konsekutivo.
Na 2006, Tatanan hóben a gana di Tatanan Veterano ku skor di 2-1.
Na 2007 Tatanan Veterano a gana ku skor di 1-0 ku gol di L. Maria.
Na 2008 no lo bai mira ta ken l gana.
Bin mira hungadónan manera Inchi Piternella, Farley Noor, Empi Gosepa, Andy Celestina, Guanpe, Tang Christina i hopi mas
Bin wak pa bo gosa.
E dia aki ta dediká na Tata di Bon Futuro 2008, sr. Lennox “Nono” Calmes.
E spònser pa e partido aki ta Digicel.

WILLEMSTAD – E dianan aki ta dia di tenshon pa esnan ku a pasa eksamen ku por terminá den dos kos so: alegria òf tristesa. Ayera mayoria hóben a tende si nan a logra e aña aki. Algun di nan a haña sa ku nan mester pasa un re-eksamen. Otronan mester bai pasa un aña mas. No tabata posibel haña sa kuantu mucha a pasa den eksamen na HAVO/VWO komo ku tin e maneho pa duna e sifra final, ku ta inkluí e re-eksamennan ku ta tuma lugá otro siman. Di tur manera esnan ku a slag kaba tabatin sufisientemente motibu pa selebrá ku shampaña (nos ta spera no-alkohóliko) na un di e skolnan sekundario. Riba e pòtrèt por mira e ambiente ku tabatin na MIL. Den nos edishon di mañan nos tin mas informashon i pòtrèt riba e logro importante aki.

WILLEMSTAD – Ku un rèli di sinku kareda den kabes di kuarto ining, Sta. Maria Pirates/Chippie ta mantené nan invikto i ta sigui ku nan asalto riba picheonan di e timnan kontrali, ora ku ayera nan a logra un viktoria grandi di 13-2 riba Wild Cats/Fatum.
Te ainda tur e tres viktorianan di e ekipo Pirata, kampion di 2007, ta ku skornan grandi i nan ta pasa mesora tambe na kabes di e tabla di posishon.
E Piratanan ta anotá dos kareda den promé, sinku den di kuater, unu den di sinku, dos den di seis i tres den di shete ining pa totalisá 13 kareda.
Cats ta anotá unu den di kuater i unu den di sinku pa nan dos karedanan.
Revilien Elisabeth, èks picher di Cats a tira seis ining i Johannes Gregorius Sr. a tira un ining.
Devenie Henriquez a habri pa Cats i a bin haña relevo di Bryan Kook i di Omar Valies.
Vernon Isabella despues di dos aña a hunga beisbòl atrobe den AA i a anotá un kareda.
Pa Sta. Maria: 13 kareda, 19 hit, 1 eror. Revilien Elisabeth ta gana i Lorvin Louisa/Rydell Isabella/Ardley Jansen, tur di 5-3. Lorvin Louisa a konektá di honron.
Pa Wild Cats: 2 kareda, 9 hit, 4 eror. Devenie Henriquez a pèrdè i Shuremy Fornerino di 2-2.
E kampionato ta kontinuá djasabra ku Blue Hawks/Aqualectra kontra di Sta. Rosa Indians/Ennia.
Djadumingu no tin wega programá ya ku ta Dia di Tata.

Skina di Sorti, awe djabièrnè 13 di yüni di 2008, ta kuminsá ku deseá tur hende un bon dia. Mi a tuma nota di e dokumento ku parlamentario pa PVV, den Tweede Kamer, Hero Brinkman, a emití enkuanto di supuesto aktonan mafioso denter di polítika antiano. E kos di mas atenshon ta e trampa ku el a pone pa “de politiek” antiano. Deliberadamente (mi no por interpretá e manera ku sierto hendenan ta menshoná den e dokumento di otro forma) Hero Brinkman a hasi menshon di algun polítiko ku no ta korupto i no a mete nan mes ku hendenan korupto.
****
Ku esei e ta fèrwagt un reakshon for di “de politiek” antiano ku ta krea e foro pa e bòrda rondó di esnan ku indudablemente si ta korupto, ta rondoná nan mes ku hendenan mafioso i tin un influensia inapropiá riba gobernashon. E miembro di frakshon di PVV den Tweede Kamer ta proba ku komo parlamentario e ta keda nada mas ku èks reshèrshi. Komo prosès verbal e dokumento ta defisiente, pero komo instrumento polítiko e ta keda mortal. E “timing” di e publikashon (na momentu di bishita di parlamentario i gobernante antiano) tambe ta indikashon di e malisia polítiko tras di e akshonamentu di Hero Brinkman di PVV.
****
Mi a tuma nota tambe di e manera ku entre otro promé minister Emily de Jongh-Elhage i presidente di Parlamento Pedro Atacho a reakshoná riba e akshon di e miembro di frakshon di PVV den Tweede Kamer, Hero Brinkman. Ámbos tin rason ku e kos ta un porkeria. Pero nan mester komprondé, ku ta un zèt polítiko pa hiba nan den defensiva. E reakshon apropiá tabata di ta ménos sensitivo i bisa simplemente ku na Antia tin kasonan di korupshon ku a keda atendé pa nos Ministerio Públiko, meskos ku esun ulandes ta atendé ku di nan.

WILLEMSTAD - Sentro di Revalidashon, parti di SGR-Groep, a organisá un reunion pa inisio di e proyekto Kadena di Kuido CVA Kòrsou. E reunion a tuma lugá na establesimentu di SGR-Groep na Salsbachweg. Meta di e proyekto aki ta, pa realisá mehorashon supstansial den kuido di pashènt ku a bira víktima di un atake serebral òf CVA (Cerebro Vasculair Accident). No ta trata solamente di e kuido den kada un di e instansianan envolví, pero tambe di e koperashon entre e partidonan ku huntu ta for-ma e ‘kadena di kuido’ pa pashèntnan ku CVA.
Entre e partisipantenan tabatin no solamente trahadónan di SGR su Sentro di Revalidashon, pero tambe representante di SEHOS, Wit Gele Kruis i Verpleeghuis Bethesda. Den kurso di e proyekto e dòkternan di kas i spesialis-ta neurólogo tambe lo wòr-du envolví. Pasobra kuido pa pashèntnan ku a bira víktima di un atake serebral (CVA) ta envolví vários instansia, manera hospitalnan, spesialista, verpleeghuis i instansia pa kuido na kas. Hustamentu mirando e kantidat di partidonan envolví, ta un desafio pa traha huntu di un manera efisiente, interkambiá Informashon tokante e pashènt, limitá durashon di estadia den hospital etcetera. Inisiativanan lokal ku a kuminsá anteriormente pa mehorá kuido den e kadena aki, no a brinda e resultado sperá.
Na Ulanda entre 2001 i 2008 a kuminsá na total 32 proyekto di Kadena di Kui-do CVA, resultando den mehorashonnan grandi den e kuido. Un investigashon, titulá Edisse (Evaluation Dutch Integrated Stroke Service Experiments), na efektividat di kadenan CVA, a demonstrá resulta-do hopi positivo. Kadenan CVA no solamente ta brinda resultado mihó den salú di tur pashèntnan ku CVA, pero ta kosta ménos plaka, mehorando e kalidat di e kuido, oumentando ademas e plaser di e traha-dónan den nan trabou. Durashon di e estadia den hospital tambe a prueba di a bira mas kòrtiku, komo resultado di mehoransa logístika den e kadena.

Hunta di Supervishon Brasami lo drenta ku fòrsa den Brasami!

WILLEMSTAD – Sekretario di Estado pa salubridat, Joan Smart-Berkel, lo duna Hunta di Supervishon di Brasami instrukshon pa drenta ku fòrsa den e konflikto di direktiva di e fundashon i direktor di Brasami. Den un enkuentro ku lo tuma lugá awe tardi sekretario di estado Joan Smart-Berkel lo duna instrukshon na Hunta di Supervishon di Brasami pa buska informashon di e konflikto i pa raportá esaki na Konseho di Minister.
E hunta di supervishon konsistiendo di PG, Ministerio Públiko, Klínika Capriles i Departamentu di Salubridat lo reuní pa atendé e informashonnan ku ta aparesé den medionan di komunikashon. Den e instrukshon e hunta di supervishon mester atendé e asuntu aki i mira ku ta kumpliendo ku loke Brasami ta para p’e. No ta e intenshon pa bai tras di medionan di komunikashon, pero pa buska mas informashon, tabata deklarashon di Smart-Berkel na LA PRENSA.
“E notisianan ta di lamentá, pero mi no por bai tras di loke ta den prensa, motibu ku awor hunta di supervishon mester buska informashon pa konseho di minister”, sekretario di estado Joan Smart-Berkel ta enfatisá.
Sra. Smart-Berkel a sigui bisa ku apesar di a papia ku presidente di direktiva di e fundashon di Brasami, sra. Noraida Klaber, ku a bisa ku ta algu otro ta investigando, mester di mas informashon pa konseho di minister. No tin un klaridat di e tipo di investigashon ku ta tumando lugá, pero e echo ku ta bisa ku tin un miembro di direktiva ku ta adikto na droga ta algu serio ku mester klarifiká. Sekretario di estado Smart-Berkel ta di mesun opinion ku e asuntu aki ya ta muchu serio i ta boga pa hunta di supervishon drenta ku fòrsa den e polémika aki i buska informashon pa otro siman informá konseho di minister.

WILLEMSTAD – Leinan sivil di nos paisnan ta bisa, ku asina un persona hasi deklarashonnan ku por ta ofensivo pa un otro persona i asta por kondusí na daña su bon nòmber i integridat, ta algu kastigabel pa lei. I aparte ku e persona en kuestion por hasi un keho na Ministerio Públiko a base di e asina yamá “Lastersmaadschrift” pa ofensa ku ta hasi ku e por kuminsá ku un proseso sivil pa obligá esun kulpabel na difamashon pa rektifiká públikamente e loke a keda tresé dilanti.
Esaki tabata e promé deklarashonnan di abogado Gelmer Pieter na LA PRENSA.
Den un entrevista telefóniko ku abogado Pieter, el a splika LA PRENSA, ku na momentu ku tin un deklarashon ofensivo i e keda publiká, e ta bira aun mas kondenabel, na momentu ku e kontenido no ta basa riba realidat, asta ku den sierto kasonan kaminda e kontenido lo por tin algu di bèrdat den dje. Abogado Pieter ta sigui informá LA PRENSA, ku un wes imparsial lo tin ku husga, ku si tabata nesesario pa a publiká e relato en kuestion ku mas ainda e wes lo bai husga ku e intenshon pa publiká e relato tabata unu ofensivo pa e persona ku hasi e demanda.
Abogado Gelmer Pieter ta indiká, ku den kaso di Hero Brinkman lo bai tin indudablemente diferente reakshon kontra di su publikashonnan i ku e chèns ta grandi den un òf mas di e personanan ku aparesé riba e lista di Brinkman lo hib’é korte. Esaki sigur na momentu ku Brinkman ninga di rektifiká e deklarashon ofensivo hasí. Mas aleu mester mira, ku for di e punto di bista basá di loke a keda publiká, di tin tur indikashon ku Brinkman a aktua konforme di informashon digital ku a yega na su persona.

WILLEMSTAD - E Selekshon Nashonal di futbòl ta kla pa sali djasabra próksimo mainta 9’or rumbo pa Haiti.
E selekshon, despues di e partido di fogeo kontra Venezuela, a sigui entrená i traha riba su preparashon pa Haiti.
Djadumingu 15 di yüni próksimo e momentu di bèrdat ta yega ora ku e selekshon antiano subi tereno di stadion Sylvio Cator den Port-au-Prince na Haiti pa enfrentá e selekshon di Haiti 3’or di atardi.
Nos estreanan ta konvensí ku nan lo pone un base firma na Port-au-Prince pa por bin bèk kas pa seya e pase pa e siguiente buèlta rumbo pa Mundial 2010 na Sur Afrika. Den esaki e estreanan di e Selekshon Nashonal di futbòl ta konta ku sosten di su públiko na kas ora nan regresá i enfrentá Haiti e siguiente djadumingu dia 22 di yüni.
NAVU i patrosinadónan di e selekshon antiano esta Fundashon Bon Intenshon, Maduro & Curiel’s Bank i Ennia un biaha mas ke invitá un i tur pa ban sostené nos selekshon nashonal di futbòl den e reto aki.
E Selekshon Nashonal ku ta sali pa Haiti ta kla
E streanan, selekshoná pa enfrentá Haiti dor di e direktor tékniko, Leen Looyen, ku ta subi avion djasabra próksimo rumbo pa Haiti ta: 1. Wencho Farrell (Turkiyemspor) 2. Lennox Mauris (Turkiyemspor) 3. Angelo Martha (Willem II) 4.Tyrone Loran (NAC) (kapitan) 5. Djuric Winklaar (AFC Quick 1890) 6. Angelo Zimmerman (BV Veendam) 7. Revy Rosalia (Top Oss) 8. Anton Jongsma (FC Zwolle) 9. Leon Kantelberg VVV Venlo) 10. Orlando Smeekes (GA Eagles) 11. Shelton Martis (West Bromwich Albion) 12. Giovanni Franken (RVVH) 13. Eugene Martha (Jong Colombia) 14. Angelo Cijntje (BV Veendam) 15. Dyron Daal (Club de Fútbol Fuenlabrada, Spaña) 16. Benjamin Martha (RBC) 17. Raymond Homoet (Volendam), 18 Sendley Bito (Arsenal- Kiev), 19. Shanon Carmelia (Centro Barder) i 20. Rocky Siberie (SV Straelen.)

KING
Abraham
Mihó konosí komo Rafi
A laga atras su yunan Terrence King i Luisa Sanches, Jersica i Arnold Rooi-King, ñetunan Kayla i Jaden Rooi, ruman James King. Akto di entiero ta djaluna 16 di yüni 4or for di misa Janwe pa santana Janwe. Bishita 1or-3.30or. Promé ku entiero tin un s.s. di misa.

DE LANOI
Wilfred Modesto
Mihó konosí komo Fefe di Jong Holland
A laga atras su kasá Hilda de Lanoi-Brete, yunan Nelson de Lanoi, Erno Kinket, Fanny Maduro, Siomara Labordes, Marina Aniseta. Akto di entiero ta djasabra 14 yüni for di El Consolador pa santana Roodeweg. Bishita 9or. Promé ku entiero tin un respòns 11or den sala Celeste.

JONKHOUT
Julio E (71 aña)
A laga atras su yu Anaïs Jonkhout i famia, ruman Gracita i Ibi Yrausquin-Jonkhout, primunan Arleen Yrausquin, Jennifer Chang-Yrausquin tur ku nan famia. Akto di entiero a tuma lugá djaweps 12 di yüni den silensio.

STEELE
Dafodil Elizabeth
Mihó konosí komo Tolita
A laga atras su yu Karen i Dennis Francis, rumannan Venus, Bertie, Basford Latham, James Steele, Hugh Charles. Akto di entiero ta djasabra 14 yüni. Bishita 1or na Barret Methodist Church na A. De Veerstraat. 3or tin un sirbishi i despues pa santana Janwe.

BALENTIEN
Orlando Lorgio
Mihó konosí komo Lando, Punoe òf Tio
A laga atras su kasá Marléne Balentien-Klooster, mama Rudia Maduro, tata Amador Balentien, rumannan Ruthsella i Chal Corasol, Sharine, Norman, Junlij, Armand Balentien, Erland Balentien i Esmeralda, Geerman Balentien i Giovanca, Renij Muller, Urnie Muller, Angela Luyando, Ruamnnan Canister tur ku nan famia, wela Noni de Windt. Akto di entiero ta djasabra 14 yüni for di misa Kwartier pa santana Gr. Kwartier. Bishita 1or. Promé ku entiero tin un s.s. di misa 4or.

Dr. Lorito ta yama tur hende un felis djabièrnè. Kòrda ku awe ta dia 13 i un djabièrnè. Ademas ta dia di pidi pa bo haña (i duna pa bo haña!) pasobra awe ta Dia di San Antonio (Lele Toni). Awe ta dia ku no ta bende 13 di niun forma! Tin hende ta kere den kos!

(foto lele toni)
*********
Awe ta dia tambe ku ta bai tin hopi ambiente ku futbòl, pasobra Ulanda ta hunga. Lorito kier deseá tur fanátiko di Ulanda, manera Romulo, Kenrick, Paul, Percy i otronan éksito awe. Kòrda ku nos di ta dia 13! Kualke kos nos tin sèrbètè di mondongo! Algun ta di pluma di lora!
*********
E wega a bai rònt. Ivar tambe a saka un relato riba korupshon na Ulanda. Ivar a hasi su esfuerso sigur den e kaso aki i nos ta komprondé, ku e ta disgustá ku su nòmber tambe ta den e rapòrt di Hero. Ivar a bai hopi leu di bisa, ken e ta kere ku ta e informantenan. Awor a keda na e informantenan pa bisa ku no ta nan! Ban mira Brinkmannetje, bisa algu!
*********
Loke sigur ta, ku por lo ménos un di e informantenan tabata kana tur kaminda ku Hero. Es mas, ta e mesun informante ei nan a mira na Ulanda ta kana ku un hòmber bieu i ku e damita a bira bisa su mama: “Mama, e mucha hòmber ei ta den!”. Lorito a relatá e kaso kaba aña pasá!
*********
Lorito a topa yen di hende ku a bisa nos, ku nan a sinti falta di yen di nòmber riba e lista di Hero. Nos di ku nan, no preokupá, nan ta bin ainda. Ademas si nan no bin, Lorito mes lo sòru pa nan bin. Ironia di bida: un hende korupto ta diskutí kon korupto Kòrsou ta! Asina si nos no a mira ainda! Nos a pensa ku e dak lo a bin abou! Manera sa bisa popularmente: Fuera, laga nos yu!

WILLEMSTAD – Nèt promé ku skol sera fin di e luna aki, GGD a duna òrdu awe mainta pa sera Kolegio Dodo Palm na Seru Fortuna. Ta trata di e úniko skol básiko den e área.
Informashonnan ku LA PRENSA a haña ta hasi menshon di e hecho, ku e skol ta bou di un atake di paloma i pieu. Esei a afektá e muchanan ku ta grawatando sin fin, algun di nan ku hasta a saka herida na nan kurpa. E plaga a afektá tambe e maestronan di e skol. Aktualmente tin 200 mucha na e skol aki i 10 maestro.
Segun nos informashonnan, a kuminsá drecha parti di e skol, inkluyendo un dak, pero no a logra deshasí di e palomanan. E problema ta na vigor pa mas ku un luna kaba, pero ainda no tin un solushon. Siman pasá GGD a flit na e sitio, ku e intenshon pa atendé e plaga aki, pero e palomanan a sigui bin bèk i a kousa un plaga serio na e skol. Awe mainta GGD a bolbe bai wak na e skol i e funshonarionan a determiná ku no por wanta e skol habrí. A informá Direktiva di Skolnan Katóliko ku ta responsabel pa e skol di e situashon. Direktiva di Skolnan Katóliko a disponé ku e skol no por keda habrí, sigur awor ku GGD a konstatá, ku sigui duna lès den e kondishonnan aktual ta iresponsabel. Kiko ta bai pasa awor aki, no ta masha kla.
Ounke ku mayoria di e kuríkulo di e skol ta tras di lomba, tin algun mucha ainda ku mester haña klaridat, ki tipo di enseñansa nan lo por sigui den e aña eskolar nobo. Komo ku awe ta djabièrnè, no ta parse probabel ku lo tin un solushon pa djaluna awor. E maestronan di tur manera ya kaba a anunsiá, ku bou di e kondishonnan aktual nan lo no sigui duna lès.

WILLEMSTAD – Eks diputado Ivar Asjes, awendia presidente di Fundashon Kòrsou Tin Speransa (FKTS) ta konvensí, ku ta nos mes hendenan a yuda Hero Brinkman i su partido PVV pa daña nòmber di nos pais. Asjes ta kuestioná tambe, kon bin no ta atendé kasonan di korupshon na Ulanda i ta skonde bou di e loke e ta yama “tapijt di Politiek Den Haag”.
Asjes su nòmber ta menshoná prominente den e informe presentá ayera na Den Haag.
Asjes ta bisa, ku un biaha más Pueblo ta mira kon e parlamentario ulandes, Hero Brinkman, ke trata na mustra nos kon tòf, ofensivo i denigrante e i su partido ta. “Tristu ta, ku tin indikashon fuerte ku ta algun di nos mes hendenan - manera e Konsehal Norbert George - a duna Brinkman informashon pa usa kontra nos País. Tur hende ta kòrda kon sr. George den e programa “Kontakto” di sr. Chacho de Castro na yanüari último a bisa, ku e lo presentá un lista di hendenan lokal ku ta korupto. Ademas, ta bon konosí ku George i Brinkman a reuní den “sekreto” pa despues ku a resultá ku George lo tin ku responsabilisá su mes ante Korte di Hustisia pa insinuashonnan di korupshon lansá kontra di un èks Minister Presidènt di Antia. Ta bon pa tantu George komo Joost Pronk i Jacob Gelt Dekker duna klaridat i splika nos Pueblo si nan a forma parti di Brinkman su kampaña publisitario”, asina Asjes ta bisa.
Mas aleu e ta bisa, ku awor ku Brinkman i sobrá di ‘Politiek Den Haag’ ta habri boka grandi pa reklamá kasonan di korupshon na Antía, ta bon pa Pueblo di Kòrsou mira kiko nan mes kompatriotanan a skibi riba korupshon na Ulanda. Ta realmente tristu, ku Brinkman no a tuma tempu pa tira un bista bou di e konosido ‘tapeit’ di ‘Politiek Den Haag’ promé di traha su nota. Si Brinkman lo a hasi esaki promé, anto nos Pueblo lo por a haña sa kiko tin skibí den e buki “Sinistra. Politieke maffiosi op Haags, provinciaal en gemeentelijk niveau” di e periodista ulandes Peter Siebelt. Brinkman mester ta na altura di eksistensia di e buki aki, pasó ta su mes kolega Fleur Agema ku ta number 2 riba lista di Partido PVV a kontribuí en grande pa realisá e buki aki, kual su título ta papia pa su mes. Ta bon tambe pa Brinkman i sobrá di ‘Politiek Den Haag’ splika más detayá kon e areglo di ún porshento ta funshoná; esta ku kontratistanan na Ulanda ta regalá polítikonan un suma di plaka bou mesa di ún porshento di e kosto total di e proyekto ku nan a haña. Esaki ta djis ún di e tantísimo ehèmpelnan di korupshon ku e periodista ulandes Joep Dohmen ta señalá den su buki “De vriendenrepubliek”. Un publikashon ku ta deskribí ku luho di detaye un sèt di skandal ku a bin ta tuma lugá den e sektor di konstrukshon di kas, edifisionan públiko i kareteranan na ‘Zuid Limburg’, Ulanda. Den e buki aki ta sali na kla, ku no opstante ku e skandalnan aki a shòk komunidat di Ulanda kompleto ta solamente 4 konsehal, 3 alkalde i 2 empleado públiko a keda kondená pa korupshon den Korte di Hustisia. Di e 9 personanan ku a keda kondená, 5 tabata miembro di e partido CDA, 2 di e partido PvdA i 2 di VVD. Sr. Dohmen mes ta haña ku e kantidat di solamente 9 persona no ta realistiko i den mesun rosea ta splika, ku fiskalnan ta man na kabes, pasobra debí na e enorme skarsedat di personal na e Ministerio Públiko di Maastricht nan ta haña nan obligá pa pone hopi kaso di korupshon un banda. Echo ta, ku e relato di e chanchuyonan konstante entre empleado públiko, gobernante i kontratistanan na ‘Zuid Limburg’ ku sr. Dohmen a denominá komo “het corrupte feestcircuit in Palermo aan de Maas” ta papia palabra klá, kon e situashon ta den Brinkman su ‘polderland’. Remarkabel ta, ku den tur esaki no opstante e ola di reakshon i preguntanan ku a lanta rònt Ulanda te awe nunka ‘Politiek Den Haag’ a duna kuenta i rason na komunidat ulandes. Asina Asjes ta sigui menshoná un seri di ehèmpel, pa mustra ku korupshon ta floresé grandemente na Ulanda sin ku ta hasi nada kontra esei. “Esaki ta djis un ñapa di e ola di korupshon ku e nètwèrk polítiko ulandes a kometé. Si Brinkman i sobrá di ‘Politiek Den Haag’ tabata sinsero, nan lo a duna transparensia total i splika e ‘banda di medaya’ ulandes tambe. E ora ei sí Brinkman por blòf, ku el a sigi ehèmpel di su ‘Hero’, defuntu Pim Fortuyn, ku tambe a yega di papia malu di Kòrsou i nos hendenan, asina Asjes ta bisa.