ORANJESTAD- Tur dia ATV ta lansa un pregunta di SETAR durante e transmisionnan di e weganan di futbol di Eurocup 2008.
E televidente por manda e contesta na e number 1515 via e telefonnan di SETAR y nan por gana premionan hopi atractivo.
Por ehempel e prome dia cu e Eurocup 2008 a cuminsa, diasabra dia 7 di Juni a lansa e pregunta: Cua pais a gana Euro na 1960 y e contesta Sr. Shon Pe Krozendijk a gana y ela ricibi e suma di Afl 50,= na yamada gratis como premio.
E ganadornan te cua awor ta : Sr. Stanley Lejuez, Sr Mark Tromp, Sr. Anthony Alvarez, Sr. Otto Davelaar y Sr. Sammy Hamawi. Un pabien ta bai pa tur e ganadornan y ta motiva un y tur pa participa y gana cu e contesta riba e preguntanan di dia di SETAR.
Durante di e transmission di weganan di Eurocup 2008 e animador Cadochi Kock lo lansa un pregunta di dia di SETAR y e televidentenan amante di futbol ta participa pa gana cu SETAR. Manda e contesta tur dia na 1515 cu Telefon di SETAR.
Recientemente Sr. Otto Davelaar, amante di Futbol a ricibi su regalo for di man di sra. Suzy Maduro, Corporate Communcations Manager di SETAR durante e transmission “live” for di e establecimento Whitey’s na unda cu tur hende tabata come Johnny cake y roti.
Riba e foto: Sr. Otto Davelaar cu su regalo y e ambiente na Whitey’s.

ORANJESTAD- SETAR ta continua cu su ofertanan special tur fin di siman pa henter e temporada di celebracion di nan 5 aniversario di nan compania como NV . E “Weekend Specials” e fin di siman aki ta toca turno na e servicio di 3G cu telefonnan Zing. E prijs pa yamadanan cu video ta bira 25 cen pa minuut desde diabierna 7’or di anochi te cu diadomingo 7’or di anochi. Henter weekend bo por yama bo amigonan y wak unda nan ta trip.
Bo por experimenta y den e mundo di tercera generacion y combersa y mira bo amistadnan alabes via e servicio di videocalling cu tur e telefonnan ZING ready di SETAR.

Tambe Dialuna awor dia 16 di juni 2008, ATV lo ta ‘en bibo’ for di SETAR SEROE BLANCO cu e transmision di e partido entre Austria y Alemania 12:00 pm y tambe e wega di futbol entre Poland y Croatia 2:45 pm.
Aki SETAR lo tin ofertanan special cu nan lo ta promoviendo durante e oranan menciona.
E pregunta di dia y e mandamento di e contesta via SMS pa clientennan di SETAR unicamente pa 1515 pa gana premionan fabuloso!
Lo tin diferente Marketing Gimmicks cu lo puntra of pidi durante di e transmission y lo reparti regalonan pa cliente of fanaticada cu ta wak futbol
10% di descuento cu compra di celular, carchie prepaga (te na max 3), DSL of cualkier otro articulo cu por cumpra p.e. modem ta haya unicamente na Teleshop Seroe Blanco 10% di descuento
Lo bai tin un ambiente deportivo y cu sorpresanan agradabel pa e clientenan.
SETAR ta extende un invitacion di awor pa e clientenan pasa edificio na Seroe Blanco y forma parti di e keintura di futbol Eurocup 2008!

ORANJESTAD- Awe 14 Juni, Dia Mundial di Donante di Sanger, ta un oportunidad special pa duna un caluroso danki na tur e donantenan di Stichting Bloedbank Aruba cu ta duna e precioso regalo di bida!
Miyones di hende den mundo henter ta debe nan bida na hendenan cu nunca nan lo conoce cu a duna nan sanger sin ningun interes personal; simplemente pasobra nan ta kere den comparti algo cu nan tin den abundancia cu un ser humano cu, quizas, na e momento ei tin hopi falta di dje.
Un acto humanitario cu no conoce color,religión of sexo.
Na tur e heroenan silencioso aki di tur dia, un pabien y un danki atrobe pa boso bunita trabow pa nos comunidad arubano.

ORANJESTAD- Pago di cobranza di awa na etempo durante ultimo 3 aña no a conoce cambio. Mescos ta valido pa prome 3 luna di 2008.
E consumidor den gran mayoria ta paga awa na tempo.
A base di un peticion di un corant na W.E.B. Aruba N.V. a bay mira nos cifranan pa cu pagamento na tempo di cobransanan di awa.
Ta resulta cu durante e ultimo tres añanan e consumidor ta paga su cobransa di awa na tempo. Esnan cu no ta paga na tempo ta rond di 10% di e total.
Pa loke ta e prome 3 luna di 2008 nos ta mira e mesun percentahenan caminda cu 10% di e total di consumidor no ta paga nan cobransa di awa na tempo.
Pero mester bisa aserca tambe cu dentro di un luna e consumidor cu no a paga ta bin paga su cobransa di awa. Un minimo di solamente 1% no ta logra esaki.
Pues e bon custumber di paga awa na tempo ta keda vigente aki na Aruba. W.E.B. Aruba N.V. ta sumamente satisfecho cu e consumidor ta mira e importancia pa paga awa na tempo y asina evita cu eventualmente lo por bin sera kranchi na cas y pone un aviso pa notifica cu mester habri e kranchi bek y pasa paga e cobransa di awa atrasa.

ORANJESTAD- Biblioteca Nacional Aruba ta bai diferente bario durante e proximo simannan pa busca mas tanto buki posibel.
Facilitando asina e clientenan cu pa un of otro motibo no por a entrega nan buki na tempo y no por yega biblioteca facil.
Juni ta stipula pa ta un periodo boetevrij na biblioteca tanto na Playa como na San Nicolas. Na juni te cu dia 11 di juli por entrega buki sin paga boete.
Bibliobus den bario
Si tin buki na cas ainda di Biblioteca cu no a entrega na e fecha stipula por entrega esakinan sea na biblioteca mes of den Bibliobus.
Esaki lo ta den diferente bario pa busca e bukinan entre dia 21 di juni cu dia 5 di juli venidero. Ki dia y ki ora?
Diasabra 21 Juni: Santa Cruz (Centro Deportivo Betico Croes )
Dialuna 23 Juni: Savaneta (Misa Sagrado Curazon)
Diaranson 25 Juni: Noord (Centro Deportivo Frans Figaroa)
Diahuebs 26 Juni: Pos Chiquito (Kukwisa School)
Dialuna 30 Juni: Brazil (St. Michael School)
Diamars 01 Juli: Dakota (Centro di Bario)
Diaranson 02 Juli: Tanki Leendert (Kapel Monte Calvario)
Diahuebs 03 Juli: O’stad (Postkantoor)
Diabierna 04 Juli: Paradera (Rotonde Aruba Bank)
Diasabra 05 Juli: San Nicolas (Santa Theresita plein)
Orario: Dialuna pa Diabierna: 5.00—8.00 p.m., Diasabra : 9.00 a.m.- 4.00 p.m. (Diasabranan lo tin actividad special pa e muchanan).
Biblioteca tin hopi buki cu ta na cas cerca usuarionan y cu no ta wordo entrega bek. Aki ta trata buki di mucha y adulto. Por fabor coopera cu biblioteca pa haya e bukinan aki bek.
Tira un bista den cashi y controla si tin buki cu kisas un miembro di famia a yega di presta y no a hiba bek. Di antemano Biblioteca Nacional Aruba ta yama danki pa e cooperacion.

WILLEMSTAD – Kòrsou mester di un lei ku ta regulá kapmentu di palu. Esaki ta e úniko manera pa evitá ku palunan balioso pa nos naturalesa i medio ambiente ta bai pèrdí. E atvertensia akí ta bin di Amigu di Tera ku a bolbe konstatá kapmentu di palu kantu di kaminda na San Sebastian.
E último kaso akí di kapmentu di palu kantu di kaminda, a kosta palunan bunita di Sia i Shimaruku ku tabatin hopi edat kaba. Amigu di Tera ta lamentá esaki i ta bisa ku aparentemente no ta planifiká trabounan kantu di kaminda na drechi, promé ku kuminsá koba pa pone kabel òf tubu. LA PRENSA a kòmbersá ku Lloyd Narain i el a splika ku tur kontratista mester pidi un pèrmit pa koba promé ku nan kuminsá ku nan trabounan. “Sin embargo si D.O.W., ku ta otorgá e pèrmit, no pone stipulá ku kontratista mester tene kuenta ku e vegetashon, e kontratista por bisa ku e no a haña niun informashon di gobièrnu ku ta prohibí kapmentu di palunan riba e parti kaminda mester a koba. Segun mi no tin un lei tampoko ku ta bisa ku D.O.W. mester pone e kondishonnan den e pèrmit pa koba ku e kontratista ta haña.”
Narain a splika ku ora ta trata tereno di gobièrnu no tin mag di mishi ku nada. Pero tòg no tin kòntròl di D.O.W. ta tuma lugá. “Tin un progreso slo na Kòrsou kaminda tin kontratista ku ta drecha tur kos ora nan kaba di koba, pero lástimamente nan no ta tene kuenta ku naturalesa. Mi a yega di yama un kontratista ku tabata trahando den un área na Kòrsou, ora ma nota ku e trahadónan tabata benta e sobrá di material di konstrukshon den un pida abismo. E abismo tabata un área di konservashon i un pida naturalesa masha bunita. Ma bisa e shèf di e kontratista pa e instruí e trahadónan, loke el a garantisá mi di lo hasi. Tòg nan a keda basha tur e sobrá di e material di konstrukshon den e abismo konservá. I niun hende ta responsabel pa esaki.”

WILLEMSTAD - Riba e kanchanan di Tènnis na CSC na Damacor tabatin e último dos simannan e torneo anual aki ku e rekòrt nobo di partisipante.
E partisipantenan a inskribí den e kategorianan di hende hòmber i hende muhé den nivel A, B-1, B-2 i C.
Mas o ménos 200 wega a wòrdu hungá en total i mayoria di nan hopi interesante.
Djabièrnè tin e semi finalnan i djasabra atardi e finalnan mes.
For di 6’or di atardi e weganan final ta kuminsá.
E finalnan lo wòrdu hungá den “Best of Three Sets”, pero e último sèt ta hunga en bes di un sèt normal. Un “Super Tiebreak” en bes di yega 7 punto mester yega 10 punto, e regla aki ta unu ku ta wòrdu usá internashonalmente kaba den weganan di Doubles, pues a disidí pa introdusié aki na Kòrsou tambe awor.
Un par di e parehanan ku a yega final kaba ta:
Heren A:
Jayson Engelhard/Jonathan Matos de Leon kontra di Rasid Winklaar/Emil Huizing.
Dames B1:
Miyolou Sleur/Mallory Engelhard kontra di e ganadónan di e semi finalistanan. Nicole Weber/Adreina de Andrade kontra Monique Russel/Quirine Guato.
Hopi interesante e finalnan aki lo ta riba kanchanan di CSC na Damacor djasabra atardi for di 6’or.
CSC ke gradisí e spònser Ascend Motors representante di Volkswagen pa a spònser e Torneo di Tènis bunita aki pa dies aña largu.

BERNA, Suiza – Ulanda a kobra un víktima mas ku no tabata den e plannan ora el a golia Fransia 4-1 i mesora el a drenta kuart final di Eurokopa 2008.
E delanteronan Dirk Kuy, Robin van Persie, Arjen Robben i Wesley Sneijder a hinka e golnan na di 9, 59, 72 i 90 minüt den stadion Suisse den wega di Grupo C.
Thierry Henry a deskontá pa Fransia na di 71 minüt.
Ulanda ku den su debut a bati e kampion mundial Italia 3-0, a yega seis punto i a pasa pa e siguiente buèlta kaminda e tin ku topa e no. 2 di Grupo D (kaminda tin Spaña, Suesia, Gresia i Rusia).
Rumania ku mainta a tabla 1-1 ku Italia ta na di dos puesto ku 2 punto.
Grupo C ta sigui djamars 17 ku Fransia vs Italia i Ulanda vs Rumania.
Fransia ku Italia kada un tin un punto.
E último bia ku Les Bleus a keda for di kompetensia den promé rònt tabata na 1992, bou di direkshon di Michel Platini.
Ora ku e tim oraño tabata akomodando su mes for di un tiru di skina, Kuyt a pasa dilanti Florent Malouda i a hinka ku kabes.
Ulanda a usa e mesun fórmula ku el a apliká kontra Italia: toka e bala promé, hunga bala sigur i un kuarteto – Kuyt, Wesley Sneijder, Rafael van der Vaart i e goliadó Ruud van Nistelrooy – ku por ta mortal si duna nan espasio.
Un biaha mas ku su goliadó históriko Thierry Henry, rekuperá di un leshon di múskulo ku no a permitié hunga den e empate 0-0 kontra Rumania, Fransia a kambia su sistema pa unu mas flèksibel 4-2-3-1, ku kua su treiner Raymond Domenech parse a skucha e súplikanan di si hungadónan pa un wega mas ofensivo i no asina pragmátiko.

WASHINGTON, Merka, - E periodista merikano, Tim Russert, a muri ayera di un atake di kurason n’e edat di 58 aña, miéntras e tabata prepará e programa “Meet the Press” inisiá komo animadó di e programa aki fo’i 1991 na NBC, e televishon a anunsiá.
Russert a kòlèps i muri ayera tardi, miéntras e tabata trahando den su ofisina na Washington, e veterano lokutor di NBC, Tom Brokaw, a bisa.
“E tabata un di e mihó periodistanan polítiko i un di e mihó analistanan di su époka”, Brokaw a agregá.
Russert aktualmente tabata hefe di koresponsalia di NBC na Washington, i un di e periodistanan polítiko mas konosí na Merka.
Segun semanario Time, Russert tabata un di 100 persona mas influyente di mundu.
Morto di e animadó estrea di NBC a kai mané bòm pa tur lider polítiko prinsipal merikano.
E presidente di Merka George W. Bush a bisa ku Russert tabata “un institushon den mundu di informashon i polítika”.
E kandidato presidensial republikano John McCain a deklará ku Russert tabata simplemente un tipo formidabel, i su atversario demókrata Barack Obama a sigurá ku no tin mihó entrevistadó na televishon.
“Meet the Press” ta e programa periodístiko di djadumingu di mayó rating di televishon na Merka, transmití for di 1947, siendo e programa mas antiguo di televishon di e pais aki.

WILLEMSTAD / DEN HAAG – Meskos ku na Ulanda, ayera tabatin hopi ambiente na Kòrsou relashoná ku e enkuentro di futbòl Ulanda/Fransia ku e ekipo ulandes a gana den forma konvinsente. Ulanda a klasifiká den loke a haña e nòmber “Grupo di Morto” pa e siguiente buèlta. Mayoria establesimentu den horeca ta hasiendo bon negoshi ku e weganan aki. P’esei hopi di nan ta pidiendo pa Ulanda sigui avansá te na final, loke ta un bon posibilidat. E próksimo wega di Ulanda lo ta djamars awor. Riba e pòrtrèt por mira kon fanátikonan ulandes a kolma sentro di Bern ayera. Nos tin mas detaye di e enkuentro di ayera den nos edishon di awe. (Foto: AP)

Skina di Sorti, awe djasabra 14 di yüni di 2008, ta kuminsá ku deseá tur hende un bon dia. Un hende ku ta akshoná den direkshon di un meta, regularmente ta puntra su mes unda e ta den kuadro di e avanse ku e ke realisá na kaminda pa su meta. Un oportunista ta akshoná segun e situashon di momentu i ta wak e benefisio di momentu. Un reakshonario, de facto ta un persona defensivo ku ta akshoná pa konservá lokual e tin. Un konformista tin ménos ambishon ainda. E ta adaptá na e situashon di momentu.
****
Komo pais, nos no ta progresá komo ku e akshonamentu ta mustra reakshonario, hopi oportunista i ante retonan konformista. E disposishon mental pa realmente alsa nivel ta ousente. Strategia ta un kestion di trasa kaminda pa alkansá un meta. Historia den asuntu di strategia tin ménos relevansia kompará ku e meta i ophetivonan. E úniko relevansia ku historia tin ta sinta den e lèsnan ku tin di saka. Pero si bo no tin momentunan di evaluashon, bo no ta siña nada.
****
Presente su relevansia ta komo punto di salida i spesífikamente e balor ku e rekursonan di momento tin pa konbertí nan den instrumento pa alkansá meta i ophetivonan. Pero si bo no ta analisá bo situashon ku futuro den mente, bo no sa kual ta e balor di lokual bo tin. E situashon finansiero di pais ta pushando dirigentenan den sierto direkshon i pa falta di un propio plan stratégiko, rekursonan propio no ta wòrdu mira den kuadro di e papel ku nan lo por hunga.

ROMA, Italia, - Komo kastigu, pasobra el a keda embarasá di un deskonosí, un dama italiano ku ta sufri di enfermedat mental, pa motibu di su famia a pasa kasi 18 aña será den kamber di su kas, i den kondishonnan higiéniko-sanitario “hopi prekario”, polisnan italiano a bisa despues di a libra e dama.
Polisnan militarisá di Santa María de Capua Vetere, situá sùitwèst di Italia, ubiká pegá ku Nápoles, a libra María Mónaco, di 47 aña, kende a presentá problemanan sikológiko, p’esei a intern’é na un hospital di Nápoles.
Fuentenan di polis a señalá ku nan a haña sa di e kaso via un yamada anónimo, loke a kondusí na aresto di e mama, di 80 aña, i dos ruman di e dama, agrikultornan di 40 i 44 aña, akusá di sekuestro i maltrato familiar, agensia di notisia Ansa a informá.
María Mónaco a duna lus na yu hòmber (di un deskonosí) na desèmber 1990, segun komunikado di outoridatnan.
Segun bisiñanan, e yu hòmber tin 17 aña i ta studia na un skol lokal i ta biba ku un famia.
Polisnan ta investigando si e enfermedat mental a kuminsá promé òf despues di periodo di koutiverio.

WILLEMSTAD – E aña aki e Kareda di Schottegat ta selebrá 30 aña.
Djadumingu awor e kareda ta sali for Stadhuis Punda tantu pa koredó komo esnan ku ta kana mitar di seis di mainta en punto.
Road Runners Club Kòrsou i e spònser prinsipal di e kareda Girobank ta sumamente kontentu paso e aña aki Schottegatloop ta konta ku un kantidat rekòrt di inskripshon.
Un total di 700 deportista, fanátiko òf afisionado a inskribí pa e kareda rònt di Schottegat. Esaki ta un logro impreshonante.
Girobank huntu ku otro spònsernan Z-86, ASKA, Centrale Hypotheek Bank, Windward Insurance Solutions, Fruku i Fundashon Sedreko a regalá tur partisipante ku a inskribí un bunita kamiseta spesial pa e deporte di Atletismo.
E kamiseta aki ta di 100% polyester i ta esnan ku profeshonalnan di e deporte aki ta usa.
Por registrá for di 5or di mainta.
E parti di 12 kilometer pa e kanadónan ta sali for di Schouwburgweg pa mitar di shete mainta i registrashon ta for di 6’or di mainta.
Final di e kareda di Schottegat pa tur dos distansia ta na stadion Johnny Vrutaal na Rif.
Komo ku 30 aña ta un logro hopi grandi e aña aki tur partisipante ta risibí tambe un sertifikado di partisipashon.
E sertifikado aki tin nan tempu ofisial riba dje i lo ser mandá na kas ku servisio postal.
Tur dato di e partisipante mester ta kompleto i korekto asina por manda e sertifikado di partisipashon ofisial aki direktamente na kas.

WILLEMSTAD – E pago di debenan atrasá di Antia i di e teritorionan insular lo monta na un suma di 559.4 mion. Di tur a partnernan, St. Maarten ta responsabel pa e gran parti di e debe retrasá aki ku kasi 183.2 mion ku ta bon pa 34% di e debe total.
E parti di Gobièrnu Sentral a keda kalkulá na 151.4 mion, Kòrsou 148.9 mion, Boneiru, 55.3 mion, St. Eustatius 15.1 mion i Saba na 5.5 mion.
E pago di debenan atrasá den realidat lo ta muchu mas haltu, ya ku e sifranan aki ta basa riba kalkulashonnan hasí te ku 31 di desèmber 2005. E debenan atrasá aki pa gran mayoria ta pa Fondo di Penshun General APNA.
Gobièrnu Sentral tambe debe SVB, pero e debenan atrasá aki no a wòrdu inkorporá den e kalkulashon di e debe total. E punto di salida di Gobièrnu ulandes ta ku SVB, BAB, UNA tur ta pertenesé na e sektor di kual si Gobièrnu Antiano tin debe na nan, ta debe di gobièrnu na su mes.
Minister di Finansa ya a indiká, ku Gobièrnu Sentral debe SVB 337 mion. Sinembargo, si Gobièrnu Sentral dividí e debe entre tur e islanan, Gobièrnu di Ulanda lo paga pa esaki, ya ku esaki lo ta un debe atrasá di e teritorionan insular na SVB.
Relashoná ku e kanselashon di debe, Ulanda a primintí di kumpli ku tur e debenan ku no a kumpli kuné. E akuerdo aki ta, ku 31 di desèmber 2005, lo ta e último fecha. Tur debe atrasá ku keda akumulá despues di e fecha aki, lo no wòrdu pagá pa Ulanda. Ta pa e motibu aki a kalkulá e debe te na un máksimo di 560 mion.

WILLEMSTAD – Echo ku a prohibí pa papia riba aspekto finansiero den simposio di integrashon di trabounan riba tereno di adikshon, esaki lo por difikultá idea di sekretario di Estado pa mehoransa. Esaki i hopi otro faktornan di eksperensia ku a keda poné un banda lo bira e motibu ku lo no logra.
Indiskutiblemente Fundashon pa Maneho di Adikshon (FMA) ta apoyá e inisiativa di Sekretario di Estado Joan Smart-Berkel pa apoyá e proseso di integrashon di trabou pa adikshon i prevenshon di adikshon riba islanan di Antia. Den kombersashon ku direktor di FMA, drs. Leslie Roosberg ta splika di ta kontentu ku sra. Smart-Berkel ta sali na vanguardia pa un proseso di transishon di lanta respektivamente e paisnan nobo bai traha huntu den un forma ordená ku mihó kuido pa adikto.
XXXFMA di eksperensia a siña traha huntu ku otro sektornan esaki a bira indespensabel.XXX Echo ta ku pa 12 aña largu Gobièrnu Sentral den niun forma a apoya aktividatnan riba prevenshon di adikshon i kiudo di adikshon. Segun drs. Roosberg ku Gobiernu Sentral a perkura pa duna supsidio pa Brasami durante último 11 aña pero lo demas no tabata tin niun kontribushon respektivo pa e teritorionan insular di Antia.
Minister Dick den su palabranan di apertura di e simposisio ku a tuma luga djaweps último a bisa bon klá ku minister Stanley Inderson tabata e último minister ku mas o menos 12 aña pasa a mustra interes pa e trabou aki i ta e úniko minister ku a pone fondonan disponibel pa aporta desaroyo di kiudo di adikshon. Entretrantu ya ta 12 aña ku a pasa ku teritorio di Kòrsou representa pa GGD a duna FMA e mandato i fondonan nesesario pa konstriu loke awe ta para na Kòrsou. Huntu ku Klinika Capriles i Brasami awe na Kòrsou por papia di un kiudo ku a konose mehoransa kompara ku 10 aña pasa. Esaki ta nifika un adelanto riba e tereno aki, segun drs. Roosberg ta sigui relata na LA PRENSA.

WILLEMSTAD – E falta di kama den Kuido Intensivo ta hasi ku no tin sufisiente aparato pa kuido di emergensia disponibel na St. Elisabeth Hospital. Ayera un biaha mas tabata un di e dianan sumamente drùk pa e departamentu di promé asistensia (Poli) di SEHOS. Un kantidat di pashènt mester a keda atendé, te ku no tabatin espasio pa akomodá e pashèntnan ku tabata yega na Poli pa tratamentu di emergensia. Inkluso tabatin kasonan ku mester a keda trasladá pa Kuido Intensivo, pero ku pa motibu ku no tabatin kama i aparatonan nesesario, mester a laga tur e pashèntnan aki drumi den un sala pegá ku Poli pa por vigilá nan situashon.
For di siman pasá un biaha mas tabata den notisia e falta di kama riba departamentu di Kuido Intensivo i den mesun rosea tambe e falta di empleadonan kapasitá a bin den notisia. Direktor den un entrevista previo den medionan di komunikashon a konfirmá e situashon ku a surgi un biaha mas ku no tin espasio den Kuido Intensivo i ku mester sigui manda pashèntnan pa eksterior. Pa SEHOS por konosé ekspanshon di e departamentu aki, mester bai tin mas empleadonan kapasitá pa e departamentu, komokiera ku e ta eksigí pa tin personanan ku un preparashon di un grado mas haltu den enfermeria.
Ayera e situashon di vários kaso ku a presentá, den kua tabatin kasonan di emergensia ku mester tabatin kuido intensivo, no por a pasa e pashènt pa e departamentu aki. Awor mas ku nunka mester kaba di konkluí e proyekto pa un hospital nobo ku tin un kuido intensivo ku mas espasio.

KOEIMAN
Girigorie Papa
Mihó konosí komo Janchi di 90AC
A laga atras su yunan Judith, Oswin, Ronald, Enid, Marjorie, jeritza, Edsel, Shirley Koeiman, Noris Lourens-Koeiman, Sherine de Windt-Koeiman. Akto di entiero ta djaluna 16 di yüni 4or for di El Señorial pa Memorial Park. Promé ku entiero tin un respòns na el señorial.

WEDERFOORT
Sixto Fileto
Mihó konosí komo Shon òf Rooky
A laga atras su mama Irma Wederfoort-Martis, yunan Leonardo i Jenny Wederfoort-Francisca, Lizanne Alberto, Ruviensy Wederfoort, Sarjetty Sarfatty. Akto di entiero ta djamars 17 yüni na Ulanda.

SIMON
Hady (71 aña)
Mihó konosí komo Eddie
A laga atras Geraldine Simon-Römer, yunan Hady i Sonja Simon-Franco, Gino i Sharon Simon-Lobato, Francois Michel i Cindy Simon-Circkens. Akto di entiero ta djamars 17 yüni for di 9or na misa Janwe. 11or tin un s.s. di misa i despues pa santana hòfi Bottelier

KING
Abraham
Mihó konosí komo Rafi
A laga atras su yunan Terrence King i Luisa Sanches, Jersica i Arnold Rooi-King, ñetunan Kayla i Jaden Rooi, ruman James King. Akto di entiero ta djaluna 16 di yüni 4or for di misa Janwe pa santana Janwe. Bishita 1or-3.30or. Promé ku entiero tin un s.s. di misa.

DE LANOI
Wilfred Modesto
Mihó konosí komo Fefe di Jong Holland
A laga atras su kasá Hilda de Lanoi-Brete, yunan Nelson de Lanoi, Erno Kinket, Fanny Maduro, Siomara Labordes, Marina Aniseta. Akto di entiero ta djasabra 14 yüni for di El Consolador pa santana Roodeweg. Bishita 9or. Promé ku entiero tin un respòns 11or den sala Celeste.

JONKHOUT
Julio E (71 aña)
A laga atras su yu Anaïs Jonkhout i famia, ruman Gracita i Ibi Yrausquin-Jonkhout, primunan Arleen Yrausquin, Jennifer Chang-Yrausquin tur ku nan famia. Akto di entiero a tuma lugá djaweps 12 di yüni den silensio.

STEELE
Dafodil Elizabeth
Mihó konosí komo Tolita
A laga atras su yu Karen i Dennis Francis, rumannan Venus, Bertie, Basford Latham, James Steele, Hugh Charles. Akto di entiero ta djasabra 14 yüni. Bishita 1or na Barret Methodist Church na A. De Veerstraat. 3or tin un sirbishi i despues pa santana Janwe.

BALENTIEN
Orlando Lorgio
Mihó konosí komo Lando, Punoe òf Tio
A laga atras su kasá Marléne Balentien-Klooster, mama Rudia Maduro, tata Amador Balentien, rumannan Ruthsella i Chal Corasol, Sharine, Norman, Junlij, Armand Balentien, Erland Balentien i Esmeralda, Geerman Balentien i Giovanca, Renij Muller, Urnie Muller, Angela Luyando, Ruamnnan Canister tur ku nan famia, wela Noni de Windt. Akto di entiero ta djasabra 14 yüni for di misa Kwartier pa santana Gr. Kwartier. Bishita 1or. Promé ku entiero tin un s.s. di misa 4or.

CORNELIS
Elisabeth Ahata
Mihó konosí komo Ada
A laga atras su yu Lesly Arnhem, rumannan Benilia Evertsz, Cornis Cornelis, Teresita Casimiri, Alfredo Reinita, Danilo Josefa. Akto di entiero ta djadumingu 15 yüni for di El Consolador pa santana Sta. Maria. Bishita 1or. Promé ku entiero tin un s.s. di misa na misa Buena Vista 4or.

BROWN-FERGUS
Mary Susannah
Mihó konosí komo M
A laga atras su yunan Rose-Clair, Esther, Elvina, Eshlyn Brown, Florence Haime-Brown, ruman Aeron Allen. Akto di entiero ta djasabra 14 yüni for di El Tributo pa santana Sta. Maria. Bishita 1or. 3.30or tin un sirbishi.

PAULINA
Giselle Sharida (43 aña)
A laga atras su mama Dolores Mingelina Paulina-Rama, yunan Jeannique i Christopher Adoptie, rumannan Roxanne i Iring Walter, Maritza Paulina, Yahaira i Erick Polinius, Josenne i Gachi Belefanti, Sharine i Daddy Nicholas, Aymara Paulina, Naika i Jimbo Kock. Kremashon ta djaluna 16 yüni na Ulanda.

LAUFFER
Pierre Antoine Jr. (62 aña)
A laga atras su kasá Roos Lauffer-de Windt, yunan Orfeo i Demitrios, rumannan Pauline, Jeanette, Paul, Jean, Louise, Louis, Josephine, David, Charles, Gustave Editha Jourdain-Albertus. Kremashon ta tuma lugá djaluna 16 yüni na Ulanda.

ANGELICA
Teodoor Leonso
Mihó konosí komo Tata di Toko Suffisant
A laga atras su kasá Anastasia Angelica-Marten, yunan Latalia Angelica, Hubert Angelica i Edsel Angelica, Tirso, Ruthmmila, Eddy, Sharmila Angelica. Akto di entiero ta djadumingu 15 yüni for di El Consolador pa Parke El Consolador. Bishita 1or. Promé ku entiero tin un respòns 3.30or na El Consolador.

PIETERSZ
Herbert Salomon Junior (repentino)
Mihó konosí komo Bobbel
A laga atras su mama Diana Pietersz-Koeiman, kasá Victoria Pietersz-Singan, ruman Hamilton Royer. Kremashon ta djamars 17 yüni na Inglatera.

KOSTER
Arlyson Leo (42 aña)
Mihó konosí komo Papito, Gordo, Ali òf tio Keshi
A laga atras su tata Evaristo Koster, mama Ligia Koster-Hanst, rumannan Aishel i Maurits Camelia-Koster, Claudette Koster. Akto di entiero ta djasabra 14 yüni na Morada Santa Bottelier. Bishita 1or-5or. Promé ku entiero tin un sirbishi.

LUCAS
Maikel Herenio
Akto di entiero ta wòrdu anunsiá despues

JEANDOR
Edgardo Luciano (repentino)
Mihó konosí komo Gachi di Salsa Snack
Akto di entiero ta wòrdu anunsiá despues

MARTISZOON
Irving Jacinto
Mihó konosí komo Selsio
Akto di entiero ta wòrdu anunsiá despues

LA PRENSA ta manda kondolensia na famianan

Lorito ta yama tur hende un felis djasabra. Hopi hende a drumi trankil i dushi sabiendo ku nan tim (Ulanda) a klasifiká ayera. Bon ambiente tur kaminda i tur hende a komportá. Ulanda awor aki klaramente ta un di e faboritonan pa gana. Tabatin aglomerashon di hende na diferente sitio kaminda e forma ambiente, anto riba un djabièrnè atardi.
*********
Lorito mes a kapta algun eksperto ku a sinta wak wega huntu den The Trader serka Toni. Bo mes sa, semper e ambiente serka Toni ta maravioso, pasobra Toni mes ta bin sinta serka i e ta sòru pa tur kos kana bon. Riba un di e pòtrètnan bo ta mira Tony ta splika un hende tambe kon e strategia di wega ta. Tony no ta eksperto di organisashon di evento i catering so, pero e ta hopi di futbòl tambe.

Foto lorito 1 & 2
*********
Tambe nos a mira Doble P ku a kambia su nòmber den e dianan aki. Awor aki e yama baron Percy van Oranje Nassau, manera e mes a bisa. Tambe por mira baronnan Paul i Alexander huntu ku prens Gibi ku ta e úniko ku ta masha haltu den noblesa lokal. Un saludo i suerte den e próksimo fase di e torneo!
*********
Lorito a kunsumí den último dianan ku diferente aviso na papiamentu den diferente kampaña di informashon. Ku un tiki mas esfuerso por evitá erornan i usa bon papiamentu. Prinsipalmente ora ta ulandes ta traha aviso mester wak uso di idioma masha bon! Lorito ta kere ku un kampaña di informashon riba energia ta un bon kos! Pero huntu kuné nos mester hasi bon uso di nos idioma tambe. Ban traha duru pa esei! E esfuerso aki no ta kosta masha!

WILLEMSTAD - E kompania Insel Air ta determiná pa logra un trato hustu pa e kompania si outoridatnan duna kualke insentivo na e kompania merikano American Airlines.
Miembro di Gerensia di Insel Air, Edward Heerenveen, tabata masha kategóriko den e asuntu aki: “Si yuda American Airlines, nos tambe mester haña yudansa”, asina Heerenveen a bisa.
American Airlines a anunsiá ku e lo bai skrap un di su dos buelonan diario pa Kòrsou entrante promé di sèptèmber awor. Den algun seno ta hungando ku e idea pa pidi e kompania keda i hasta eventualmente para garantia pa sierto kantidat di stul òf por ta hasta supsidiá kada buelo. Ta konsiderando e punto aki pa motibu ku e desishon di American Airlines ta nifiká ku lo pèrdè mas ku 5 mil kupo pa luna for di Merka pa Kòrsou.
Den promé instante tabata parse ku por a garantisá e di dos buelo pa dia ku sierto insentivo. LA PRENSA a komprondé ku a menshoná e posibilidat pa garantisá un sierto kantidat di stul riba kada buelo i despues hasta un supsidio pa buelo. E peliger di garantia pa stul i/òf supsidio ta sintá den e hechu ku un kompania no ta hasi masha e ora ei pa merkadea un ruta asina aki komo ku ya kaba e tin su entrada garantisá.
E informashon ku eventualmente lo por duna insentivonan na American Airlines a yega orea di Insel Air tambe. Heerenveen a bisa ku e kompania lokal lo no aseptá esei di ningun manera. “Nos tambe ta sufriendo di e mesun impakto anke nos ta usando hopi kreatividat awor aki. Si duna AA, nos tambe mester haña. Komo kompania di Kòrsou nos ta eksigí e mesun trato”, asina Heerenveen a bisa.

Dia di Tata ta kombiná ku Dia di Salú di Mucha

WILLEMSTAD -- Pa kasualidat e aña aki Dia di Tata ta kai riba e mesun dia ku Dia di Salú di Mucha. Esei ta pone ku Gobièrnu di Kòrsou a kombiná e dos aspektonan aki huntu pa mustra riba ròl di tata den edukashon di yu(nan).
Gobièrnu di Kòrsou ta bisa ku den kuadro di maneho di Salubridat, Diputado Humphrey Davelaar, enkargá ku Salubridat Públiko, ta enfoká riba Prevenshon Integral. P’esei e Dia di Salú Di Mucha, proklamá riba 15 yüni na aña 1994 dor di Gezaghebber di Teritorio Insular di Kòrsou”, riba petishon di Departamentu Salú Hubenil, ta di sumo importansia pa traha riba salú di nos muchanan.
E meta di Departamentu Salú Hubenil (DSH) di Servisio di Salubridat Públiko di Kòrsou ta vigilá i promové salú, kresementu i desaroyo di mucha i hóbennan entre 0 – 19 aña di edat. P’esei DSH ta organisá tur aña durante e temporada aki, aktividat pa duna informashon na públiko en general tokante diferente tópiko di salú i komportashon salú. E tin programanan di prevenshon i instrumentonan spesífiko pa detektá problema di salú, kresementu i desaroyo.
Dia di Tata e aña aki a kai riba dia 15 di yüni 2008, “Dia di Salú di Mucha”. Motibu pa kua Gobièrnu i Departamentu di Salú Hubenil (DSH) ta para ketu riba e importansia di e ròl di tata den edukashon di su yu(nan). Hopi bia nos tin e tendensia di pensa ku edukashon di yu ta tarea prinsipalmente di hende muhé, e.o. mama, wela òf tanta. Pero e envolvimentu di un tata den edukashon di su yu(nan) ta masha importante pa desaroyo i salú di un mucha. Diputado Davelaar ke suprayá den kuadro di fortifikashon di famia pa pone atenshon riba tatanan.