ORANJESTAD – Recientemente a celebra entrega di e premio prestigioso di Papiamento, ‘Cadushi di Cristal’, na señor Mario Dijkhoff, conocido linguista Arubiano.
Pa motibo di su salud, e evento aki a tuma luga na Hospital Horacio Oduber den presencia di su famia y algun colega y amigo. Tabatin un programa alegre den cua diferente persona a hiba palabra y e hurado di Premio Cadushi di Cristal a duna su relato cu e motivacion pa otorga e premio 2008 na señor Mario Dijkhoff. E biaha aki e ‘Cadushi di Cristal’ ta un obra di arte di nos artista plastico Ciro Abath: un breba crioyo di glas traha cu un tecnica masha special riba un pia di marmer.
E organisacion pa otorga e premio ‘Cadushi di Cristal’ tabata den man di un comision chikito, consistiendo di Des Croes y Irais Sankatsing-Nava di Biblioteca Nacional Aruba y Joyce Pereira.
Aki ta sigui e relato di hurado cu ta splica e motibonan dicon Mario Dijkhoff a bini na remarca pa e premio di 2008. Mario Dijkhoff, centro di nos atencion awe relaciona cu ‘Cadushi di Cristal’, tur hende presente, famia, amigo y colega di Mario, e laureadonan di ‘Cadushi di Cristal’, un caluroso bon bini.
Nos a bini hunto awe pa celebra un evento masha special, cu desde 1997 ta tuma luga cada dos aña: Otorgamento di e premio ‘Cadushi di Cristal’. Grupo Pa Promove Papiamento (GP3), un comision interdepartamental di gobierno di Aruba, a introduci e premio importante aki ‘Cadushi di Cristal’ na aña 1997 cu a keda proclama como aña di Papiamento.

ORANJESTAD- Un Caluroso Pabien na tur nos studiantenan cu a gradua. Nos ta yegando na fin di un otro aña escolar y manera semper tur hende ta wardando riba e resultadonan final di e studiantenan den examenklas.
Den nomber di Gobierno di Aruba, como minister cu ta encarga cu enseñansa, mi ta felicita tur hoben cu a logra pasa nan examen cu exito.
Pabien na boso tur cu a gradua.
Na esnan cu tin herexamen, mi ta deseanan hopi forsa y perseverancia
pa studia duro ainda pe oportunidad extra aki, pa asina boso logra ainda boso diploma.
Na tur e studiantenan cu no a logra pasa nan examen cu exito e aña aki, mi deseo ta pa otro aña escolar nan hasi un esfuerso mas grandi, nan studia mas duro pa nan por logra esaki otro aña escolar.
Pabien na e mayornan, na nan famia y na nan scol.
Naturalmente esnan cu a gradua lo hasi un escohencia pa nan futuro.
Tin studiantenan cu ta scohe pa studia na Aruba, Hulanda, Merka of den region. Otronan lo scohe pa drenta e sector laboral. Locual boso scohe awe ta determina boso futuro y e futuro di nos pais. Mi ta desea tur e studiantenan cu a gradua exito cu nan escohencia pa futuro.

Becado di Aruba Scholarship Foundation

ORANJESTAD- Contrario na e studiantenan Arubiano cu ta gradua di Valencia of Seminole Community College cu por conta cu paisanonan cu tambe ta asisti na e scolnan ey, pa dos aña Denyse Fingal tabata e unico Arubiano na e prestigioso Johnson & Whales University. Denyse Fingal probablemente ta e prome y unico studiante femenino di Aruba pa gradua cu un Associate Degree den Culinary Arts di e famoso Universidad aki. Su GPA final ta 3.03. Huntu cu su diploma Denyse a ricibi di Johnson & Whales e tradicional Silver Medal di American Culinary Federation.

Denyse a gradua di EPI Hospitality na aña 2006. Cu beca di Caribbean Hospitality Association di Puerto Rico y ayudo financiero di Aruba Scholarship Foundation, Denyse a logra su prome diploma na Johnson & Whales. E ta sigi na e mes Universidad pa obtene su Bachelors den Culinary Arts aki na dos aña. Denyse ta spera di bira e prome “Lady Executive Chef Arubiano”. E ta spera tambe di por yuda EPI como chef.

Denyse ta jiu di Kenneth y Yolanda Fingal di Kibaima 15 na Santa Cruz. Aruba Scholarship Foundation ta felicita Denyse y su mayornan cu e importante logro di e aña aki y ta desea Denyse hopi exito den añanan cu ta bini. Nos ta orguyoso di por a yuda Denyse e prome dos añanan y nos ta spera di por sigi yud’e logra su Bachelors Degree tambe.

Desde cu Aruba Scholarship Foundation (ASF) a wordo funda 20 aña pasa nos a yuda mas di 120 studiante Arubiano realisa nan soño di studia den exterior. Durante aña scolar 2007 – 2008 ASF a duna mas di 50 mil dollar di asistencia financiero na 13 studiante na universidad y colegionan na Merca, Canada y aki na Aruba mes . Tambe, mas di 30 studiante a participa den e Latin America/Caribbean Scholarship (LAC) program na University of Central Florida cu ASF ta administra pa studiantenan Arubiano. Studiantenan Arubiano den e programa aki ta wordo considera residente di Florida ora di paga tuition. Esaki ta spar cada un mas di 14 mil dollar pa aña!

Sinembargo nunca e ta papia di e disaster cu su gobierno a laga atras!

ORANJESTAD- Hopi hende ya caba a fada di e letania di AVP bao guia di Mike Eman. Mientras cu tur pais na mundo ta preocupa pa e aumento drastico di prijs di petroleo cu actualmente ta 138 dollar pa bari (na 2001 esaki tabata apenas 17 dollar pa bari!) y alavez tin hopi preocupacion pa e prijs di cuminda, scarcedad di alimento, aumento drastico di tur producto, servicio etc. na Aruba, nos tin un quasi charlatan politico Mike Eman cu ta critica tur dia gobierno pasobra tur e aumentonan aki ta pa ‘culpa’ di Gabinete Oduber.
E promer observacion cu ta ser haci ta cu Mike Eman y su ruman Henny Eman a goberna di 1986 pa 1988 y di 1994 pa 2001 tempo cu bari di petroleo tabata 17 dollar pa bari y nunca nan a haci nada ni na tarifa di awa, corda di coriente of prijs di gasolin.
Alcontrario ora cu Coastal mester a cuminsa paga belasting, den forma ilegal y contra ley AVP a duna nan 2 tax-holiday di nobo y uno aserca pa un otro delay coker.
Hopi hende ta puntra nan mes cu si ta bobo of corupto Gabinete Eman tabata pa haci e baina aki, pero mirando con sabi e Emannan ta pretende di ta, nos ta sigur cu tabata corupcion riba nivel halto.
Hasta ta ser bisa cu e placa a bay parcialmente ariba cuenta na nan banco cu nan a pasa FCCA pa Af. 1,00 y e resto a ser entrega contante y sonante na Cas di partido. Algo manera tempo di Spartaco Ghini cu tabata entrega partido AVP chequenan tur siman di 50 mil dollar via nan accountant cu ta un tal Marachiolli.
Si bo mira tur dia con paisnan grandi ta sufri cu prijs di petroleo, unda na Merca banconan, real estate, institutonan financiero ta kibra tur dia, bolsanan di balor den problema, anto aki na Aruba nos tin un genio cu yama Mike Eman cu tin solucion pa tur problema.

WILLEMSTAD – Un biaha mas poseshon di arma di kandela ilegal a kobra su preis. Di e 10 víktimanan di asesinato e aña akí, 7 di nan a muri a konsekuensia di heridanan kousá pa arma di kandela. No opstante e problema serio di sirkulashon di arma di kandela ilegal, e esfuersonan di polis i Ministerio Públiko pa atendé ku e problema akí, no ta reflehá den kòntròlnan dirigí.
Aña pasá tabatin 20 kaso di asesinato na Kòrsou. Den 10 di e kasonan, arma di kandela a kousa morto di e víktima. Banda di esei tabatin un gran kantidat di kaso di tiroteo. E aña akí, apénas seis luna ta bai, ya a registrá 7 morto kousá dor di arma di kandela. Sin embargo e akshonnan dirigí, di parti di polis i Ministerio Públiko, pa kontra arestá e problema di poseshon di arma di kandela ilegal, no ta den balansa ku e intensidat di e kasonan kaminda tin uso di arma di kandela. Ounke mester bisa ku polis ta konfiská regularmente akí i aya un arma di kandela. Kasi no ta pasa un siman ku polis a konfiská un arma di kandela durante kòntròl riba kaya.
Sinembargo te ainda falta un kampaña dirigí pa desarmá Kòrsou. Den e Relato Anual ku Ministerio Públiko a publiká resientemente, e ta menshoná den apénas 15 frase, ku kombatimentu di poseshon ilegal di arma di kandela tin su atenshon enfátiko. Mas aleu e ta menshoná ku un di e medionan importante den e guera kontra arma di kandela ta e asina yamá akshonnan di listramentu preventivo. Aña pasá a tene diferente di e akshonnan akí den entre otro e barionan: Skalo/Fleur de Marie/Zwaan, Brievengat, Rooi Santu, Seru Papaya, Otrobanda, durante marchanan di karnaval i aktividatnan den Festival Center. O.M. ta bisa aserka ku e akshonnan akí a tuma lugá ounke no tabatin sufisiente kapasidat polisial.

WILLEMSTAD - Un idea fásil a bira un kos masha notabel. Na Radulphuscollege un di e hóbennan a komponé un piesa, despues el a tok’é i diferente mucha a kuminsá pinta riba tono di e músika. E resultado: algun kuadro interesante. Ayera tabatin e apertura na Riffort Village di e eksibishon aki. Nos tin mas detaye riba nos último página di awe. (Foto: Rudney Vrutaal)

WILLEMSTAD – “Mi ta kondená tur informashon ku tin un grupo di miembro ku ta planiá pa baha direktiva di Sitek”, tabata palabranan di Marbella Felipa den deklarashon na LA PRENSA. Segun Marbella Felipa ta duna di konosé ku e ta hasiendo e tarea ku direktiva di Sitek a mustra ku mester tuma lugá di buska firma pa yega na un reunion plenario di Sitek. Felipa ta sigui enfatisá ku e manera ku direktiva a pidi i ta hasiendo dor di kana di skol pa skol pa por logra e kantidat di firma pa por yega na e reunion aki. Su yamada tabata pa tur e miembronan ku tin Sitek na pechu por apoyá e lucha pa un petishon pa un reunion.
Esnan ku ta deseá pa tin kontakto por a hasi esaki via di e-mail marbellafelipa@hotmail.com. E sosten di firma mester kondusí pa direktiva por yama un reunion general pa un debate demokrátiko interno pa trata funshonamentu di Sitek. Marbella Felipa ta indiká ku e siman aki el a kuminsá ku paseo pa buska apoyo di firma i pa asina por logra e reunion di Sitek. Felipa ta spera ku e por logra esaki mas lihé posibel pa despues por mira ki dia e reunion aki lo por tuma lugá.

WILLEMSTAD – Si mira e puntonan di bista di oposishon bon ta parse manera kos ku nan no kier un proseso di saneamentu di debe. “Al kontrali, tur kos ta indiká ku e loke nan ke ta pa nos keda choka ku e debe kuantioso ku nos tin. Un debe ku ta limitá gobièrnu kada dia mas i mas pa kumpli ku e loke e ta deseá asina tantu pa e komunidat aki, ku ta un mihó nivel di bida en general. Nan no tin argumentu”, asina diputado di finansa Mike Willem a duna di konosé relashoná ku e diskushonnan riba konsepto di supervishon finansiero.
Diputado Willem ta bisa ku oposishon den su afan pa logra ku nos no ta logra ku Hulanda ta tuma over nos debe, ta bin ku tur sorto di preteksto i maniobra. Esun di mas resien ta siman pasá durante di tratamentu di di lei ku ta regla supervishon finansiero. Na tal okashon oposishon a argumentá ku nan no por trata un lei ku no tin konsehonan, i tambe ku e lei ta en pugna di ERNA, i Statuut. I nan a menasá ku si nan no haña e konsehonan al respekto, ku nan lo bandoná reunion. Esaki a sosodé tambe. Algu ku tabata di spera, ya ku esaki a para bira un kustumber kaba. No tin nada mas antidemokrátiko, ku e akto aki, asina e diputado ta bisa.
E mandatario ta splika ku e argumentunan di oposishon no tin niun sorto di balides, pa e siguiente motibunan:
1. E lei ta un lei di reino, ku de fakto no tin ni mester di bai Parlamento. Pues e úniko órgano di konseho ku tin un ròl di hunga, ta Raad van State.
2. No opstante e loke ta menshoná bou di punto 1, partidonan durante di e proseso di struktura estatal, a palabrá ku parlamentonan, tantu sentral komo insular, ta haña oportunidat pa duna nan pensamentu riba leinan di konsenso. Esaki a sosodé tambe, mediante e reunion di komishon sentral di siman pasá, i e reunion públiko di djaweps próksimo.

Prof. dr. Lorito ta yama tur hende un felis djamars. Nos ta aki awe pendiente di futbòl, futbòl i mas futbòl. Den e dianan aki bo por hasi nos masha krepchi si nèt na momentu di futbòl bo yama nos pa algu otro. Lorito tambe ta un animal ku por bira bon krepchi!
****
Nos a hera kai for di nos stul ora nos a tende Komandante papia riba status di gobièrnu. Kere nos ku nos ta haña Komandante un masha bon orador. E tin bon argumentu tambe anke dia e tabata den gobièrnu e no a usa nan pa benefisio di tur gremio i su partido. Pero nos pregunta ta esaki: kon un hende ku pueblo a rechasá asina kategóriko por pidi nada? Ku kua outoridat moral ta papiando? Ta djis dos pregunta!
****
Nos a tende Erwin ku tabata riba lista di PLKP papia kon Komandante a desapuntá. Nan tabata sumamente bon amigu. Awor e mes un Erwin a realisá ku loke Komandante tabata prediká no tabata loke e tabata spera. Tòg ta pa bon pa despues di tantu aña realisá esei i esmas, aseptá esei!
****
Asuntu di kritiká e partido di futbòl na ulandes tambe ta algu ku ta leu buská. Lesa bon ku Lorito tampoko no ta masha di akuerdo ku e manera ku ta transmití na ulandes, pero e kompania a hañ’é ku sierto kondishon pa por a haña señal. E por a hasi dos kos: aseptá e kondishonnan òf no haña pèrmit pa pasa e weganan. Kua di nan Komandante (ku si tin blackbox) lo a preferá? Trata di splika esei na e míles di hende ku ta TV so nan tin!

WILLEMSTAD – Awe un delegashonnan di Antia Ulandes i di Canada a sinta na mesa pa kuminsá ku e promé dia di negoshashon pa yega na un tratado fiskal. E negosiashonnan aki a keda palabrá aña pasá na ougùstùs durante di un bishita di Sr. Rosaria na Canada. Sr. Alex Rosaria, ta satisfecho ku e pasonan ku nos pais ta tuma pa amplia su ret di tratadonan fiskal. “Nos mester realisá ku ta importante pa nos pais habri bentana i porta pa mundu. Miéntras ku ántes muchu nos a fiha nos atenshon den un direkshon so, awor nos ta span nos alanan pa hinter mundu, pero ku nos pianan fuertemente ankrá den nos region,” e mandatario a deklará.
Canada ta e di tres pais ku kua nos ta sinta negoshá e aña aki. Ya nos a negoshá ku Sürnam i Emiratonan Árabe Uní. Despues di Canada lo sinta e aña aki ku Jamaica, Barbados i Mexico. Tambe tin plannan pa sinta ku Colombia i posiblemente ku Ecuador.
Negosiashonnan ku Canada lo tin un durashon di tres dia i nan ta tuma lugá aki na Kòrsou. Canada ta un merkado grandi i sumamente importante pa nos pais. Ta asina ku Canada huntu ku Merka i Mexico ta forma parti di e bloke komersial NAFTA (North American Free Trade Agreement). Mas ku 70% di komersio (importashon i eksportashon) di Antia Ulandes ta keda hasí ku NAFTA, asina Gobièrnu di Antia a informá.

WILLEMSTAD – E miembro di gerensia di Curaçao Ports Authority Richard Lopez Ramirez a bira e promé miembro di sosiedat di Kòrsou ku a eksigí un rektifikashon di e parlamentario ulandes Hero Brinkman. Si Brinkman no hasi esei, e lo kuminsá un kaso den Korte, asina e bufete di abogado di Lopez Ramirez, Pieter & Wilsoe, a manda bisa e parlamentario di Partij voor de Vrijheid ayera.
Lopez Ramirez tabata menshoná riba e lista di korupshon “De Antillen...Maffia binnen het Koninkrijk” ku Brinkman a publiká siman pasá. E kaso di e gerente di CPA ku Brinkman ta publiká ta klarifiká kaba, inkluso den Korte di Antia. Den e kaso na Antia, wes a prohibí Jules Eisden den huisio sumario pa sigui menshoná e kaso aki siendo ku e no ta korekto. Eisden ta un krítiko fuerte di CPA i su gerensia.
Den e karta di abogado pa Brinkman ta sali na kla ku Lopez-Ramirez no ta aseptá e akusashon i a eksigí un rektifikashon inmediato.
Den e informe publiká siman pasá bou di number 79 ta skibi e teksto aki: “Lopez Ramirez was tegelijk directeur van de Havenautoriteit en Commissaris van een stuwadoorsbedrijf tijdens onderhandelingen over een nieuwe havenconcessie”. Segun e karta di e ofisina di abogado pa Brinkman, e pasashi aki ta kontené akusashonnan falsu i sin base ku tin komo meta pa daña imágen di su kliente, sigur si e pasashi aki ta menshoná den konteksto di un nota di korupshon ku Brinkman mes a bisa ku e dokumento ta. “Bo mester ta konsiente ku bo a hinka nòmber di nos kliente den un lus masha negativo pa no papia mes di e manera ku a shòk órden establesé ku e publikashon sin base i ilegal aki”, asina e karta ta sigui bisa.

WILLEMSTAD / ORANJESTAD – Outoridatnan di Aruba a manda informá polis di Kòrsou i Boneiru di un kurpa sin bida di un hòmber ku a spula na kosta di e isla. Polis di Aruba a lokalisá e kurpa djaluna último, despues ku turistanan ku tabata kana na altura di Boca Wariruri a mira e kurpa sin bida den laman.
Mes ora a avisá tur outoridat kompetente i huntu ku kuerpo di bombero a saka e restunan mortal for di laman. A konstatá mes ora ku e kurpa tabatin algun dia kaba den laman, ya ku piská a kuminsá kome na un di e pianan. Polis di Aruba no por a identifiká e defuntu i a disidí na manda puntra si na Kòrsou òf Boneiru tin un hòmber pèrdí. Un aspekto remarkabel na kurpa di e víktima ta un tatuahe den forma di un skòrpion.
Na Aruba nan no ta ekskluí ku por ta trata tambe di un persona ilegal ku kier a trata na landa i yega tera.

WILLEMSTAD – ‘Kada individuo na Kòrsou sa kiko e mes por duna i kiko e por hasi pa asina ei Kòrsou ta bon pa su habitantenan’. Esei ta pensamentu di Fundashon Konsiente, kual organisashon a lanta resientemente pa sostené konsientisashon, dunando informashon nesesario na komunidat. E grupo di siudadano preokupá ku a uni pa lanta Fundashon Konsiente ta konsiderá ku komo ku tin masha hopi desaroyo ta tumando lugá i no tin informashon sufisiente pa esnan ku no nesesariamente tin akseso na informashon, lo mester duna un man na benefisio di nos komunidat.
“Sin importá kual rumbo nos pais tuma ta nesesario pa nos tur produsí pa asina ekonomia bai bon. Sinembargo tin rason pa preokupá pa e manera ku nos mes hendenan ta atendé ku trabou i servisio individual konektá ku trabou. Den un pais manera di nos kaminda ku e úniko materia prima ta hende, ta nesesario pa nos hendenan sa esaki i ku tur hende ta bon pa por laga ekonomia kana. Sinembargo no ta posibel pa stimulá ekonomia ku hendenan ku no ta konsiente di kiko ta trabou”, asina presidente di Fundashon Konsiente, Reyna Joe, a splika.
El a kontinuá bisando ku por opservá espesialmente serka hóbennan ku no ta sigui studia, ku hopi di nan ta bai traha, pero no ta ekipá ku e konosementu básiko fuerte pa por karga ekonomia di nos pais. “Kombiná esaki ku un falta di aktitut korekto pa ku trabou i e konosementu ku mester tin por komprondé ku mester duna atenshon konsiente na hóbennan ku awor ta drenta fòrsa laboral”, asina ta pensamentu di e fundashon.

WILLEMSTAD / MILAAN/ LEEUWARDEN – Baranan di protekshon (vangrail) den paisnan di Union Oropeo, ta bai bira mas seif pa koredónan di motosaikel. Nan mester ta trahá di tal sistema ku nan no por amputá man òf pia di koredónan di motosaikel ku aksidentá. Esaki hopi bia ta e kaso debí na e rantnan skèrpi di e baranan di seguridat.
E baranan akí ta trahá solamente pa tene vehíkulonan motorisá riba kaminda. E komishon di U.O. pa eksigensianan standardisá a disidí pa amplia e eksigensianan di baranan di seguridat. E grupo di akshon di koredónan di motosaikel hulandes, MAG, a reakshoná eufóriko. E grupo di akshon ta protestando pa hopi tempu kaba kontra baranan di seguridat. “Tin un kaminda largu ainda pa kana promé ku adaptá e eksigensianan, pero e promé pasonan ku no por hala aden bèk ta poné i esaki ta bal un fiesta pa nos”, e presidente di MAG, Nico Perk, a deklará. Perk ta representá e federashon Oropeo di koredónan di motosaikel FEMA durante e enkuentro di U.O.
Segun MAG Hulanda ta kana algun aña kaba dilanti ku propio mehorashon. Un di nan ta loke nan ta yama ‘ondergeleiding’. Práktikamente no tin tampoko loke nan ta yama ‘eiersnijders’: esakinan ta vangrailnan ku ta konsistí solamente di un kabel skèrpi.

WILLEMSTAD – E büró ku ta sòru pa trabou temporal pa èks detenidonan, 2nd Chance Uitzendbureau, a kumpli 1 aña di eksistensia dia 15 di yüni último. E servisio ta propiedat di e èks detenido Michelangelo ‘Lo’ Martines. Martines mes a yega di sinta un kastigu di 8 aña pa droga.
Den un komunikado e direktor ta bisa ku nan a demostrá ku nan tin derechi di eksistensia. Ya nan a yuda hopi hende ku tabatin mester di un di dos chèns den bida na un trabou. Martines mes a bisa ku durante e periodo ku e tabata será, el a mira kon hóbennan tabata bandoná prizòn ku e mihó intenshonnan i ku promesanan ku nunka mas nan lo bolbe bèk. Pa su sorpresa e tabata mira denter di poko tempu kon e hóbennan tabata drenta Bon Futuro bèk.
Esaki tabata motibu pa el a hasi un investigashon i a konkluí fásilmente ku e èks detenidonan no tabata haña un chèns serka dunadónan di trabou. Di e manera akí for di den prizòn Martines a kuminsá ku e trámitenan pa habri su servisio pa trabou temporal pa èks detenidonan. Ounke Martines ta pone énfasis ku su servisio no ta pa èks detenidonan so, sino pa tur hende. Ta tur hende meresé un di dos chèns den bida, segun Martines.
Entretantu algun mil inskripshon di hende ku ta buska trabou i hopi dunadó di trabou a mira benefisio den e proyekto. E dunadónan di trabou akí no solamente a haña un bon trahadó, pero tambe nan a kita un potensial residivista for di riba kaya, Martines ta skibi den su komunikado. E empresa a duna tambe diferente kurso di motivashon den koperashon ku fundashon Evertsz Willems (MCB) i SNAYDP.

WILLEMSTAD - Despues di un preparashon di mas di un luna, Liga Hubenil di Basketbòl Kòrsou a kuminsá djabièrnè anochi den sala di SDK.
E entusiasmo tabata grandi bou dje hóbennan ku pa basta tempu tabata spera un torneo pa asina nan kuminsá hunga basket.
Den tribuna mayornan i fanátikonan tabata presente na gran eskala pa mira kon nan yunan lo a hunga.
Na inisio dje programa drùmbènt di DARE a drenta sala kompañá ku e ekiponan partisipante, pa despues e direktor di Liga Hubenil di Basketbòl, sr. Cesar Palacios, hiba palabra pa seguidamente presentá Promé Minister di Antia Ulandes, sra. Emily deJongh-Elhage, ku a duna un bunita mensahe.
Sra. De Jongh-Elhage a elogiá e esfuerso dje organisadónan pa bini ku un idea asina, pa dje manera aki duna muchanan lokal e oportunidat pa praktiká nan deporte faborito.
Hasiendo deporte semper ta pone un bon base pa krea un nashon sano.
Despues dje palabranan aki sra. De Jongh-Elhage a tira e promé bala den renchi pa asina duna inisio ofisial dje promé Liga Hubenil di Basketbòl di Kòrsou.
Manera e organisadónan a bisa fo’i un prinsipio, meta prinsipal dje liga aki ta pa organisá weganan amistoso pa nos muchanan haña e oportunidat pa desaroyá den e deporte i kue eksperensia riba kancha pa un dia den futuro si mester presentá e oportunidat pa partisipá na torneonan internashonal e hóbennan lokal tin sufisiente eksperensia riba kancha pa kompetí.
Ademas e intenshon ta tambe pa bai den diferente bario kaminda tin kancha di Basket pa demostrá kon e muchanan ta hunga Basketbòl i asina lanta interes bou di muchanan pa kuminsá praktiká Basketbòl i lanta hasta un klup den bario.
Tabatin e siguiente resultadonan di e partidonan ku a tuma lugá djabièrnè 13 di yüni:
Den Aspirant
Royal Hoops ta gana di Lettermen 49-22
Den Mini
Royal a gana Lettermen 11-8
Den Damas
B&M Sisters ta gana di Royal Hoops 21-7
Den Kadèt
Lettermen-I fásil riba Royal Hoops 77-25
Djasabra 14 di yüni 2008:
Den Aspirant
Royal ta gana di Lettermen 25-23
Den Kadèt
Lettermen-I fásil riba Lettermen-II 44-21
Den Kadèt
Lettermen-II ta dal Royal 43-23
Den Damas
B&M Sisters ta pasa riba Royal Hoops Damas 25-11
Próksimo fecha
Fin di e siman aki, 20-21 yüni, e Torneo di Liga Hubenil di Basketbòl lo kontinuá den Sala Niels Liberia den Stadion Doe Willems, na Suffisant.
Na kuminsamentu dje torneo no tabatin muchu ekipo kla pa kuminsá, pero ya e siman aki lo tin posibilidat pa dos ekipo mas hasi nan debut den e torneo.
E weganan ta kuminsá djabièrnè 4;30 pa 7;00 pm i djasabra ta di 4;00 pm – 8;00 pm den Sala Niels Liberia na Suffisant.
Un i tur ta bon biní pa bin disfrutá dje weganan i pa apoyá e hóbennan.

Skina di Sorti, awe djamars 17 di yüni di 2008, ta kuminsá ku deseá un i tur un bon dia. Un ehèmpel di e fasilidat ku kual nos ta aseptá akshon di polítikonan gustá òf popular, ta e manera ku den seno di koalishon ta atendé ku e manera totalmente inkorekto i kontra di reglanan di gobernashon responsabel, ku diputado Eugene Rhugenaath MBA a intervení den e proseso di nombramentu di un direktor na DOK. E problema ku ami tin no ta ken tin ku wòrdu nombra, pero kon e diputado a atendé ku e asuntu.
Den práktika polítika di un sistema di gobernashon demokrátiko, un grandi a siña mi, ku ora ta trata un kestion di prinsipio, esun ku tin problema ku desishon di e mayoria ta saka su konklushon. E ta komuniká su organisashon di antemano ku riba ékis asuntu, e no por uni su mes ku desishon di e mayoria i ku si mester yega na votashon e lo no por sostené e desishon. E partido i e miembro en kestion por yega na un akuerdo ku e por apstené di vota, vota segun su konsenshi i ta akseptá ku e miembro ta saka su konklushon.
Na momentu ku un miembro ta apliká preshon (utilisando entre otro medio públiko) riba e mayoria, kaminda e ta pone su peso polítiko (ku koalishon di apénas 11 asiento), e akshon ta unu ku no ta pas i no tin nada di haber ku akshonamentu di hende di prinsipio. Un minoria ku ta preshoná un mayoria ta lo kontrali di rèspèt pa e prinsipio di un filosofia di gobernashon demokrátiko (e mayoria ta tene kuenta ku e minoria). Pues e posishonamentu polítiko kaba tabata unu inapropia.

WILLEMSTAD - Resientemente gobièrnu venezolano a nombrá kònsùl di Venezuela señora Sonia Jacqueline Alvarado Rossel pa e puesto aki na Kòrsou. Pa tal motibu el a realisá un bishita di kortesia serka gezaghèber mr. Lizanne Dindial.
E kònsùl tabata kompañá pa direktor di e departamentu pa Relashonnan Eksterior di Antia, señor Eduardo (Dito) Mendez de Gouveia. Durante di e bishita e promé mandatario a elaborá ku kònsùl Sonia Jacqueline Alvarado Rossel riba diferente tópiko di interes komun.
Riba e pòtrèt por mira Gezaghèber Dindial huntu ku kònsùl di Venezuela señora Sonia Jacqueline Alvarado Rossel.

WILLEMSTAD - Dia 17 di yüni awor Nieuwe Post Nederlandse Antillen N.V. ta kuminsando un kampaña promoshonal di “Tarifa di Miembresia redusí” pa su servisio di E-ZONE, e servisio di entrega pa klientenan ku ta biba na Antia Hulandes, pa medio di kual nan por risibí pakete, revista i pòst usando nan propio adrès na MIAMI (Merka).
E kampaña aki di seis luna ta spesial pa klientenan nobo ku semper tabatin gana di purba e servisio pero no tabata sigur… Esaki ta nèt e insentivo ku nan tabatin mester pa bira miembro di nos “E-Zone family”.
Miembresia kuminsando 16 di yüni lo kosta solamente: ANG. 100,- i pa nos studiante- i grandinan (60+) lo tin un deskuento ainda mas grandi riba e miembresia. Nan por bira miembro pa e preis rasonabel di ANG. 50,-!
Pero ainda no ta kla, tin mas: Lo no apliká e tres kategorianan di E-ZONE, pues klientenan ku bira miembro aworakí por bestèl tantu merkansia komo revista i klientenan di E-MAGZ por bestèl merkansia sin ningun gastu di miembresia adishonal.
Kambionan rònt mundu a fòrsa kasi tur hende pa hasi ahustenan den nan presupuesto, pues baimentu afó pa hasi kompra a bira ainda ménos alkansabel. Pero birando un miembro di E-ZONE bo por kuminsá bestèl bo merkansia on-line i manda nan pa bo propio adrès na Merka.
Pa por duna un poko alivio na miembronan eksistente ademas di miembronan nobo, for di 16 di yüni Post Nederlandse Antillen N.V lo bai ahustá nan tarifanan di transporte.

WILLEMSTAD - Direktiva di Partido Democraat a partisipá ku for di djarason 11 di yüni 2008 e partido tin un presidente nobo den persona di Sra. Ada Kroon.
Na nòmber di direktiva, miembro i simpatisadónan nan kier a gradisí eks presidente Raymond Bentoera pa su añanan di lucha den fila di e partido i alabes deseá sra. Ada Kroon hopi éksito den su funshon nobo kaminda lo e por konta ku sosten di e famia di Partido Democraat.