No tin awa pa laba. E loke tur hende ku un tiki noshon di gobernashon por a spera, a bira realidat. A aplasá e fecha riba kua e kambionan estatal pa Kòrsou i St. Maarten mester drenta na vigor i ku esei, e saneamentu di debe eksterno di Kòrsou tambe. Di un forma masha “Nanzi”, Ulanda a kore firma e akuerdo di SEI (Inisiativa Sosial Ekonómiko) ku gobièrnu di Antia, pa no laga señora Emily de Jongh-Elhage man bashí. No te a primintí pueblo ku e kambionan estatal lo nifiká “bienestar” pa pueblo. Echo ta keda si, ku e pipitanan di pinda ku señora de Jongh-Elhage a haña ku SEI ta ñaña kompará ku e 5 mil mion florin ku eksonerashon di e debe di Kòrsou lo a trese. Mi ta duda ku señora de Jongh-Elhage por logra muchu bienestar pa pueblo ku 180 mion florin.

Polítikonan, spesialmente esnan pro “slotverklaring”, tin masha hopi di bai splika pueblo. A pinta pueblo serunan di oro, riunan di honing i dicha eterno na momentu ku Kòrsou haña su Status Outónomo den Reino i Ulanda guli nos debe di míles di mion di florin. Niun hende tabatin e kordura di bai splika pueblo ku ta trata aki di un proseso kompliká, ku sigur no ta realisabel den 1-2-3. Djis chèk Aruba. Ku un pueblo pará manera 1 blòki tras di e ideal di separashon for di Kòrsou mes a dura mas ku 20 aña promé ku nan Status Aparte a bira un realidat.

Ku e proseso pa Kòrsou i St. Maarten haña un Status Outónomo den Reino ta 10 biaha mas kompliká ku e Status Aparte di Aruba, ta un echo. Mas ainda pa esnan responsabel pa kanalisá e proseso aki usa tur medio na nan alkanse pa splika, bolbe splika i sigui splika pueblo na plaka chikí kon e proseso ta hinká den otro i kiko ta e espektativanan. Nèt loke nan niun a hasi!

Mi kurason a dal un salto di legria, ora ku mi a lesa den korant ku Bestuurscollege di Kòrsou a disidí pa lanta un komishon ku lo karga e nòmber di e gran i inolvidabel outor i benefaktor, Boeli van Leeuwen. Mas legria a drenta mi alma ora mi ta tuma nota di e enkargo di e komishon ku a haña, esta pa determiná kriterionan ku mester sirbi komo base pa otorgá un premio “Boeli van Leeuwen” na personanan den komunidat ku hasi nan mes meritorio pa tal premio.

Mi tin un sugerensia. En bes di hasi e premio aki unu literario, por fabor hasié unu periodístiko. Mi ta kere ku Boeli van Leeuwen lo keda masha kontentu si e sa ku ta usa su nòmber i su espíritu literario pa premiá personanan ku destaká den mundu periodístiko.

Boeli lo ta kontentu si e sa ku lo premiá e periodista ku durante aña a destaká pa su ophetividat; pa su rèspèt pa e kódigo profeshonal di periodismo; pa su sentido di investigashon na nòmber di esnan ku no ta kapas pa hasi esaki nan mes; pa su defensa den prinsipionan demokrátiko; pa su estilo prosaiko di skibi i hopi importante, pa su uso respetuoso i leal di nos idioma PAPIAMENTU!

Boeli ta progenitor di un di mihó periodistanan ku Kòrsou a konosé, Anna van Leeuwen. Un periodista ku a destaká su mes pa su sentido investigativo i su afan pa, apesar di ta krítiko, semper pone ophetividat dilanti. Mi mes a konosé Boeli semper komo un persona ku a stimulámi pa ta kritiko den mi trabou komo periodista. “Puntra, puntra i sigui puntra, te ora ku “e bèrdat” di e asuntu sali na kla” tabata su mantra. “I ora “e bèrdat” ei revelá su mes, skibié ku ophetividat i hustisia”.

ORANJESTAD- Parlamentarionan di Aruba, Antias y Hulanda den cuadro di reunionnan di Tripartite a bishita e clinica Jellinek Mentrum. Na e clinica aki cu ta consisti di un cantidad di facilidad ta duna ayudo tanto curativo como policlinico y ambulante na adictonan di alcohol, droga y tambe adicto na wega di machine/placa.
Aki nan a ricibi informacion dor di sra. Wencke de Wildt, manager di Curatieve Verslavingszorg di JellinekMentrum, Joke Bollebakker, hefe di Policlinica psychiatrico di e clinica hubenil di JellinekMentrum. Alavez nan a haya informacion for di sra Petra van Dam miembro di conseho di directiva.
Pa loke ta trata wega di placa/machine pkor bisa cu tin diferente criteria segun clasificacion di DSM IV TR pa defini dicho adiccion, entre otro continuamente pensa ariba gamble, mester di mas y mas placa pa gamble, bira inkieto ora tin cu stop, caba biaha bai bek pa gana loke a perde, intentonan pa cambia no ta logra, relacionnan of trabou ta bai atras of te hasta ta perde esakinan, gamblel pa huy for di problema of pa alivia sentimento negativo, ganja pa skonde cu ta gamble etc.
Na Hulanda tin 40.000 adictonan na gambling, di cual 6000 so ta den tratamento. Mayoria ta hende homber y conhuntamente ta bai otro problema psychosocial manera p.e. depresion, ansha, ADHD,actitud antisocial,otro adiccionnan y sensibel pa recompensa. Locual ta haci adiccion mas liher ta cu ora ta trata machine e recompensa ta mas liher, un par di seconde.
Aki a mustra ariba mecanismonan neuro-biologico. Unda cu dor di falta di actividad di dopamina den e celebro un persona ta stimula esaki dor di substancia of dor di un actividad cu ta recompensa dopamina. Dus esaki por dor di gamble pero tambe dor di uzo di alcohol, droga etc. Consecuencianan ta danjo neurologico como social. Tratamento ta dor di ayudo psychologico, terapia cognitivo di comportacion. Ayudo ta pues integral, cu combinacion di tecnicanan. Alavez tin un programa di ayudo propio ariba website www.jellinek.nl.

ORANJESTAD- Alto Inspector di Polis, Richel M, Mattheeuw, lo bandona servicio di Cuerpo Policial dia awe 18 di juni 2008, despues di a traha 39 aña y 7 luna na e cuerpo aki.
Mattheeuw a cuminza su carera den Cuerpo Policial di Antias, trahando na Corsow na aña 1968 y na aña 1971 el a haya su traslado pa Aruba.
Ora cu Cuerpo Policial di Aruba a los for di esun di Antias cu Status Aparte na 1986, Mettheeuw a dicidi di permanece den servicio di e cuerpo di Aruba y a dicidi di asumi e reto nobo y el a ocupa varios posicion den KPA, caminda na 2003 el a keda nombra como “Commandant van district 3” na San Nicolas, cual funcion el a keda ocupa te cu su retiro awe.
Pa 39 aña y 7 luna den servicio di polis, Mattheeuw a ser gradici pa su dedicacion y seriedad cu cual el a ehecuta su funcion tur e añanan cu a pasa.
For di man di Alto Comisario di Polis, Peter de Witte, Mattheeuw a wordo gradici y felicita y el a ricibi varios regalo for di Cuerpo y el a wordo acompaña pa su esposa na e ocasion aki.

Entrenador Richard Peet y Jill van de Kerkhof di e compania di awa Hulandes OASEN

ORANJESTAD- W.E.B. Aruba N.V. tin e placer di a fungi como anfitrion di un training special den cuadro di Plataforma di Awa Antia y Aruba (WNNA).
E entrenamento aki a wordo facilita dor di e entrenador Sr. Richard Peet y Sra. Jill van de Kerkhof di e compania Hulandes: OASEN. Tambe den cuadro di nos valornan nucleo pa crece hunto den conocemento y nos empeño pa comparti enseñansa cu nos cliente, nos a invita personal di Hygienische Dienst, Hotel Riu Palace Aruba, Marriot Resort & Stellaris Casino y un colega di N.V. GEBE di St. Maarten.
Dia 3 di juni ultimo, ing. Erwin Boekhoudt y Sr. Richard Peet a bishita diferente cliente di W.E.B. Aruba N.V., entre otro Hotel, Hospital y Cas di Anciano.
Dia 4 di juni, e entrenamento extenso di e teoria di awa a cuminsa. E enfoke di e entrenamento tabata riba bacteria den awa y e parti di inventarisa e risico y e raportahe. Esakinan sigur ta hopi importante pa haci den cuadro di duna bon servicio pa cu cliente. Den e contenido di entrenamento a inclui excursion na diferente lugar y tambe tarea cu por aplica di biaha den practica. E intencion ta pa pone den practica loke a wordo siña den e dianan concerni.
Na final di e entrenamento a tene un examen pa asina valida loke a wordo siña y practica durante e dianan anterior.
Por ultimo cada persona/grupo a haya un "praktijkopdracht" unda ta haya e tempo necesario pa bay den practica y haci un "risico-inventarisatie" pa un cliente. P’esey lo tin 2 dia den september ora Sr. Richard Peet regresa Aruba, pa repasa y revisa e "praktijkopdrachten" cu e participante.

ORANJESTAD – Ta visto caba pa un y tur e campaña di Mike Eman y su partido AVP pa kita nos autonomia, esta nos Status Aparte y integra Aruba completamente den Europa, unda AVP cu RED di e ex-religioso Rudy Lampe kier hinca nos den UPG, asina den su comunicado di prensa partido MEP ta bisa.
Bo mester mira henter e wega di Mike Eman - orchestra pa e mente maligno Mito Croes – como un strategia pa cu ayudo di e Hulandesnan di CDA poco poco hinca Aruba completamente bao di Hulanda y integra nos pais den Europa. E unico meta di Mike Eman y AVP ta pa Aruba perde completamente su autonomia. No lubida cu mas cu 2/3 parti di e votadornan Hulandes a rechaza categoricamente e Constitucion Europeo, mescos cu esaki ta e caso na Francia.
Hasta e tratado di Lissabon cu a bin como alternativa pa e constitucion Europeo a ser rechaza siman pasa na Irlanda. Pakico? Pasobra e pueblonan tin miedo di ta bay keda mucho leu for di gobernacion y esaki no ta e democracia participativo cu nan ta boga pe.
Mike Eman cu Mito Croes y tambe Rudy Lampe no sa mas con nan mester yuda CDA den nan plan diabolico pa kita Aruba su autonomia. E buscamento pa nos vota pa Parlamento Europeo, unda na Hulanda ni 40% di e votadornan ta bay vota p’esaki, ta un comienso di un proceso strategico di AVP y RED pa nos integra den Europa.
Mike Eman cu Mito Croes kier cu e acto di alto traicion aki – despues di e cadena di esclavitud na 1948 - hinca un puñal den lomba di nos cu a percura pa e Status Aparte tan anhela.
Mira con ya Rudy Lampe cu pa Dios mes a bira lomba ta pidi Hulanda pa kita nos Procurador General y Gobernador y pone un pa e 5 islanan di Antiyas y Aruba hunto. Aki poco dia Mike Eman kier pa e Hulandesnan na Hulanda vota den eleccion na Aruba pa yudele despues di 60 aña di existencia di su partido AVP pa porfin gana un eleccion. Mike Eman, Mito Croes y Rudy Lampe, para straight y stop di hunga wega cu nos autonomia.

ORANJESTAD- Tin un dicho na Ingles cu ta bisa ‘what goes around, comes around’. E dicho aki ta aplicabel riba e situacion di detencion dialuna ultimo di e abogado di Sindicatonan den Union (SDA), sr. Duineveld.
Nos tur por corda ainda cuanto instigacion y agitacion tabata tin dos luna pasa bao di e miembronan di Cuerpo Policial y tambe bao di tur e huelgistanan na momento cu a tuma lugar e supuesto caso di ‘hit and run’ na e rotonde di Paradera y di cual nan tabata acusa e abogado sr. Hendrik Croes di dje.
Na e ocasion ey fiscal mayor sr. Hans Mos a declara cu no por yega asina asina y detene sr. Hendrik Croes, ya cu e no ta ‘zomaar iemand’ y sr. Croes ta un persona cu na varios ocasion a sirbi comunidad Arubano y Antiyano como Minister di Husticia.
Cu e declaracion aki so no tabata tin mester mas, ya cu e huelgistanan pa simannan largo a uza e frase ‘niet zomaar iemand’ durante nan accionnan. Nos tur por corda ainda tur e pancartanan, flanelnan y declaracionnan caminda tabata teima riba e frase aki, esta di ‘niet zomaar iemand’.
Kico nos ta mira awor? Dialuna ultimo a detene e propio abogado di Sindicatonan den Accion y di e huelgistanan, esta sr. Duineveld caminda a haci ‘huiszoeking’ na su cas y tambe su oficina a wordo listra.
Den e relato di prensa di Ministerio Publico ta para tambe cu ‘documentonan, papelnan y computernan a wordo confisca’. Sinembargo aki e rabo di porco ta krul, na momento cu Ministerio Publico ta declara cu ‘relaciona cu e hecho cu abogado Duineveld ta abogado, e Decano di Ordo di Abogadonan tabata presente na e dos huiszoekingnan’.

WILLEMSTAD – E komersiantenan venesolano ku ta bende fruta i bèrdura na e Marshe Flotante, ta bati alarma relashoná ku nan situashon higiéniko. Ya ta basta tempu kaba ku nan ta sin awa i nan ta premirá situashonnan no higiéniko si no bin un solushon.
Te ku algun tempu pasá e komersiantenan akí tabata hasi uso di un kranchi di awa ku Aqualectra a pone na e sitio. Debí ku tabatin vershonnan di ladronisia di awa ta sirkulá, Aqualectra a stòp e suministrashon di awa, ku parse tabata pòrnada. E vershonnan di ladronisia tabata indiká ku e komersiantenan lo tabata yena awa i bai bende na Venezuela. E komersiantenan sinembargo ta desmentí esaki kategórikamente. Entretantu nan situashon higiéniko si ta kore peliger. Diariamente nan mester di awa pa baña i laba nan pañanan. Tambe nan mester di awa pa tene nan barkunan limpi i tambe laba e produktonan ku nan ta bende tur dia. Na e momentunan akí nan tin ku kumpra awa pa por kumpli ku nan nesesidatnan.
LA PRENSA a komprondé ku Aqualectra a splika e komersiantenan ku un di nan mester pone e meter di awa riba su nòmber pa asina Aqualectra por konektá awa pa nan meskos ku ta hasi pa tur otro hende na Kòrsou. Parse ku niun di e komersiantenan no tabata dispuesto na pone e meter di awa riba su nòmber. Konsekuentemente nan ta sin awa aktualmente.
LA PRENSA a komprondé tambe ku debí ku e komersiantenan ta paga pa por mara na e sitio, awa i koriente mester ta inkluí den e asina yamá ‘liggeld’. Esaki sinembargo no ta e kaso. No tabata posibel ainda pa haña un komentario di parti di CPA, pa averiguá si enbèrdat awa i koriente mester ta inkluí den e ‘liggeld’.

BERNA, Suiza – Ulanda, ku un tim yen di suplentenan a gana Rumania 2-0 djamars, un resultado ku a kai di bon pa Italia avansá huntu ku e “leon oraño” pa kuart final di e Eurokopa 2008.
Klaas-Jan Huntelaar, e delantero ku a drenta na lugá di Ruud van Nistelrooy, a kita kualke duda di ku Ulanda a bai laga su mes ser derotá pa e no mester enfrentá Italia o Fransia den semifinal ora el a anotá e promé gol na di 54 minüt. Robin van Persie a seya e kuenta ku e di dos gol na di 87 minüt.
Ulanda ku a sigurá e promé puesto den Grupo C despues dje dos promé fecha, a sera ku 9 punto.
Italia, ku a gana Fransia 2-0 na Zurich, tambe a avansá ku 4 punto. Rumania i Fransia por a paketá nan maleta pa regresá kas.
Den su wega mas trasendental den ocho aña, Rumania tabata un ekipo ku miedu i sin ambishon. E no a ataká ku poder i a dependé demasiado di algun akshon di klase di su delantero Adrian Mutu.
Italiano- i fransesnan a sende bela pa un viktoria di e ulandesnan, ya ku kualke otro resultado lo a nifiká eliminashon di e dos finalistanan di e último Kopa Mundial.
Ku tur kos i un tim formá ku 9 suplente, e muchanan dirigí pa Marco van Basten a mustra nan mes firme, ounke sin ta e mashin ku sin pordon a gana Italia 3-0 i Fransia 4-1 riba e dos fechanan promé.
Rumania, di un manera ku no por splika, a laga Ulanda hunga e bala i nan a hala atras komo sifuera nan lo keda kontentu ku un empate.

VIENA – Outoridatnan oustriako a bisa ku un muhé hóben kende tabata sufri di problema di kurason a muri den un dje arianan di fanátiko di Viena, durante e derota di Austria 1-0 kontra Alemania djaluna.
Funshonarionan a bisa djamars ku el a muri ora tabata transport’é pa hospital. Al pareser el a sak den otro un 15 minüt promé ku e wega a kuminsá.
Outoridatnan no a identifiká e víktima, pero el a bisa ku e tabata di nashonalidat oustriako i ku e tabatin 20 aña.
A bisa ku lo hasi outopsia pa chèk e motibu eksakto di su morto, pero nan a konfirmá ku e tabata sufri problema di kurason.
E ta e di dos morto di un simpatisante den loke ta bai e torneo. E otro kaso, un simpatisante kroata tambe di 20 aña, a muri pa e mesun motibu na Klagenfurt dia 11 di yüni promé ku e wega kontra Alemania.
Tur dos morto a sosodé den e “Fan Zone”, manera nan ta yama e arianan destiná pa e fanátikonan ku ta sigui e weganan di e torneo riba pantaya grandi.
Di otro banda polis di Viena a informá ku a arestá 23 fanátiko rebelde, 21 oustriako, un aleman i otro polako, pero no a raportá insidentenan mas grandi.

Skina di Sorti, awe djarason 18 di yüni di 2008, ta kuminsá ku deseá tur hende un bon dia. Un futbolista ku ta kore kabes abou no tin bista riba e vèlt i no ta mira unda su kompañeronan ta posishoná. Na momentu ku un hungadó asina haña e bala, e tin e tendensia di keda kore, skak i hala fini te ora ku sea e pèrdè e bala òf tuma nota di un kompañero na kual e ta hunga e bala. E konsekuensia ta ku bon oportunidat di kontinuashon di wega di su ekipo ta keda desperdisia.

Koalishon ta mustrando e mesun karakterístika ku e hungadó ku ta kore kabes abou. Nan no ta mira nada otro ku e lokual nan ke hasi i konsekuentemente ta pèrdè hopi oportunidat pa drecha kos. Enbes di drecha kos, nan ta hinka nan mes mas i mas den problema. No por mira òf no ke mira ku ta atentando kontra di integridat di nos sistema di gobernashon demokrátiko.

E referèndem na Irlanda, kaminda e irlandesnan a rechasá e akuerdo pa un konstitushon pa e union oropeo, ta un kaso ku mester pone nos dirigentenan polítiko para ketu un ratu i pensa ta kiko nan ta hasiendo den e proseso estatal. E proseso pa yega na un konstitushon pa e union oropeo, a kompliká i ta den un direkshon ku ta mas despótiko ku e ta representá un proseso demokrátiko (ni konvenshonal ni moderno, esta esun partisipativo).

Na di promé lugá mi ke opservá ku e problemanan a surgi pa un falta di transparensia i komunikashon ku e respektivo pueblonan riba kiko ta pasando. E partisipashon sumamente pober di e respektivo pueblonan na e referèndem, ta un refleho di e distansia ku e komunidatnan ta sinti for di lokual ta pasando na i nivel di direkshon di e supra organisashon oropeo. Mas ku práktika polítiko lokal e komunidatnan ta wòrdu aserka te ora ku tin sea un elekshon òf referèndem.

WILLEMSTAD –Djaluna awor Hunta di Supervishon di Brasami lo intervení den e problemátiko ku tin entre direktiva di fundashon i gerensia. Den kòmbersashon telefóniko ku sekretario di estado Joan Smart-Berkel ta informá ku mester warda algun dia mas, komo kiera ku ta djaluna awor lo tin intervenshon di e problema di Brasami. Despues di a sinta na mesa a risibí algun informashon i ku mester pèrkurá pa un fase di intervenshon den e problema aki.
E Hunta di Supervishon ku ta konsistí di Ministerio Públiko, Prokurador general, direktor di Capriles i direktor di departamentu di salubridat mester atendé ku direktiva di e fundashon i meskos ku e gerensia di Brasami. Segun sekretario di estado e no por bisa nada ainda di loke a tuma lugá te na e altura aki, pero ta durante di e intervenshon lo tin desishonnan ku mester kai. E problema di Brasami ta un tiki kompliká ainda, debí ku tin vários informashon ku ta hasi ku mester di un investigashon mas profundo di e instituto aki. Sekretario di Estado ta kere ku mester warda otro siman promé ku por divulgá kualke informashon rondó di problemanan ku tin den

WILLEMSTAD – “FMA ta papia hopi kos i ainda mi no por mira nada ku nan ta hasi. Leslie Roosberg ta papia di plaka so, enbes di duna un bista di e maneho i koperashon pa yega na kalidat”, tabata deklarashon di sekretario di estado Joan Smart-Berkel den un entrevista ku LA PRENSA. Relashoná ku deklarashon hasí den e edishon di djaluna di Roosberg, direktor di Fundashon pa Maneho di Adikshon (FMA) den direkshon di sekretario di estado Joan Smart-Berkel ta resultá ku e simposio tabata intenshoná pa investigá e kalidat di kuido ku tin bou di adikshon riba tur isla. Segun sra. Smart-Berkel, plaka ta yuda, pero mester separá kada kos promé ku purba brua kos. Smart-Berkel ta deklará ku e tarea di gobièrnu sentral ta pa atendé ku e kalidat di kuido i no e parti finansiero.
Enbèrdat e no a haña e oportunidat pa bishitá e instansia na Kòrsou manera a tuma lugá riba tur e otro islanan, pero si e tabata deseá pa enbes ku Leslie Roosberg di FMA papia di plaka, papia riba tambe riba e parti ku nan tin bou di nan responsabilidat. E intenshon di e simposio tabata pa trese tur hende huntu, di manera ku por a atendé ku e kalidat di kuido di adikshon. Mirando tambe ku Hulanda ke duna plaka pa esaki, mester tin un plan di trabou pa medio di investigashon realisá di tur instansia.
Kontinuamente tin kartanan ta drenta serka sekretario di estado i a disidí pa organisá e simposio di djaweps siman pasá. Tur hende ta papia di integrashon pa tin mas koperashon pa traha huntu i esaki tabata meta di e simposio. Sekretario di estado ta kere ku traha huntu ta pèrkurá pa un mihó kalidat di trabou. Den kaso di FMA ku ta un instituto nombrá pa gobièrnu insular ku mester atendé ku e parti di maneho i ehekushon meskos tambe mester wak e kalidat di kuido riba e isla Kòrsou. Sekretario di estado Smart-Berkel ta deklará ku lo ta bon pa e por keda informá di e tarea di FMA, ya ku Roosberg no a papia di kuido, pero mas tantu kon ta haña plaka. Smart-Berkel ta konsiente ku plaka ta yuda, pero asta ora bo ta bai un banko bo mester tin kosnan riba papel pa mustra ku por responsabilisá bo mes pa yega na e plaka deseá.

WILLEMSTAD – E manera agresivo ku ta promoviendo e sorteo mionario di 3 di yüli próksimo ta pa evitá ku e premio ta keda aden. Direktor di Landslotterij ta deseá pa despues di e fecha ariba menshoná por otorgá un persona e 1 mion florin aki. Den kombersashon ku direktor di Loteria Nashonal, Humphrey Genaro, e ta splika ku e sorteo aki ta purba di bende mas tantu bièchi di manera ku ta hasi ku tin ménos chèns pa e premio keda aden. Kontrali na otro sorteonan ta purbando pa e sorteo aki por kibra tur rekòrt di manera ku 1 mion florin lo por keda kompartí den e komunidat.
Genaro ta amplia riba e slogan di sorteo mionario di 3 di yüli próksimo den kua ta bin dilanti ku Loteria Nashonal ke kompartí ku pueblo i su klientenan. E forma ku e sorteo aki ta keda hinka den e pueblo mester trese benefisio aden, ya ku ta e úniko sorteo na Kòrsou ku ta promové na e manera aki i ku e plaka di ganashi ta bai bèk den komunidat. Loteria Nashonal den e sorteo benidero ta kere ku esaki lo bira un sorteo ku despues nan lo por bisa ku tabata esun eksitoso pa e resultado di benta. E espektativa ta grandi i ta sigui konfia ku por logra un sorteo bon bendí riba tur e islanan di Antia i Aruba.
E filosofia di Loteria Nashonal ta kompartí no solamente pa medio di e premionan pero tambe ganashi, p’esei ta bon pa pueblo kumpra na tempu i buska e number di preferensia ku nan ta deseá. Tur esnan ku ta interesá den un number por pidi un rebendedó buska esaki i ku di e manera ei nan por tin nan number preferí.

WILLEMSTAD- “E grado di desesperashon mester ta hopi haltu serka e miembro di frakshon di NPA den Konseho Insular, sr. Aldebert Rooijer, pa e bai asina leu di kalifiká nos frakshon di farsante i mentiroso”, segun Gisette Seferina di frakshon di PNP, despues ku e la tuma nota resientemente di e komunikado di prensa ku sr. Aldebert Rooijer a publiká tokante e susesonan durante e reunion públiko di djabièrnè último, dia 13 di yüni 2008.
Durante e reunion aki, e di kuater reunion públiko den apénas un siman, Konseho Insular a reuní riba e medidanan ku gobièrnu a keda di tuma pa suavisá e impakto di e subida di preis di awa, koriente, gasolin i kuminda. Tabata un oportunidat mas pa a debatí riba e tópiko aki ku tin nos pueblo bastante preokupá. Pero na final, manera por a antisipá, e reunion a bai resultá den un oportunidat pa oposishon purba di pasa koalishon algun “zèp” den forma di moshonnan tendensioso o superfluo, probechando asina di e echo ku koalishon no tabata konta ku presensia di tur su miembronan na e reunion.
E promé di tres moshon ku a keda presentá pa oposishon tabata pa sostené e proposishon di sr. Faroe Metry, lider di frakshon di PNP den Parlamentu di Antia, pa oumentá sueldo mínimo ku 15%. Loke segun Seferina a sòru pa e nivel di frustrashon subi te na un máksimo serka sr. Rooijer, ta ora ku lider di frakshon di PNP den Konseho Insular, sra. van der Gen, den su motivashon despues di a konsultá ku e propio sr. Metry, a trese e mensahe pa e partidonan di oposishon den Konseho Insular ku sr. Metry ta laga informá nan ku e no tin mester di nan sosten pa su proposishon di oumento di sueldo mínimo, ya ku e tin amplio sosten di partidonan, inklusive esnan di oposishon den Parlamentu kaba. Segun sra. Seferina, e mensahe ku e lider di frakshon di PNP a trese den sala di Konseho Insular a kai manera un baño di awa friu riba partidonan di oposishon.

WILLEMSTAD - Durante e periodo di 21 di yüni pa 5 di yüli 2008, Prinses Wilhelmina Fonds ta organisá un interesante eksposishon di obra di arte den “Galeria Alma Blou” na Landhuis Habaai. Manera ta konosí, den luna di yüni Prinses Wilhelmina Fonds ta tene su kampaña di informashon i konsientisashon tokante prostat i kanser na prostat, i komo parti di e kampaña, a pidi nos artistanan maskulino pa traha un obra di arte, den kua kada unu ta simbolisá na nan manera e tema di prostat. No ménos ku 33 artista maskulino lokal a akseptá e invitashon di Prinses Wilhelmina Fonds, i pa promé biaha Kòrsou lo por apresiá obranan di arte di 33 di su artistanan maskulino den un solo eksposishon, tur ku nan propio obra, pero ku mesun meta, esta pa yuda den e gran lucha kontra kanser na prostat.
E artistanan ku lo partisipá den e eksposishon ta entre otro Papi Adriana, Edy Baetens, John Basselmans, Herman van Bergen, Steve Bridgewater, Clemens Briels, Frans Brugman, Jose Maria Capricorne, Nelson Carrilho, Richard Doest, Didi Domatilia, Marcel van Duijneveld, Ralph Elisabeth, Jan Gilbert, Robert van Haren, Rien te Hennepe, Junius Isenia, Elis Juliana, Yubi Kirindongo, Erwin Kranenburg, Henk Leue, Ashley Mauricia, Andre Nagtegaal, Arthur Oster, Philip Rademaker, Ced Ride, Ronald “Arti” Schotborg, Wop Sijtsma, Jan Toeter, Carlos Tramm, Anton Vrede i Joes Wanders.
Apertura ofishal di e eksposishon ta djabièrnè awor 20 di yüni pa 7.30’or di anochi. E eksposishon ta keda habrí durante henter e periodo di 21 di yüni pa 5 di yüli 2008 i tur entrada ku e benta generá lo bai destiná na benefisio di Prinses Wilhelmina Fonds.

ILLEMSTAD - Debí ku buelo di American Airlines a keda kanselá e selekshon di Honduras ta yega Kòrsou, djarason 1’or di mèrdia.
E selekshon di Honduras ku selekshon di futbòl nashonal lo enfrentá ta un selekshon ku un historial mundialista i ku a demonstrá di por bira un wesu duru pa nos selekshon. Nan resultadonan resien ta bon indikashon ku ta trata aki di un ekipo ku por faha bon kuné ya asina por proba nos mes ku e selekshon nashonal por hunga riba un nivel haltu. Ta pa e motibu aki nos mester bai sostené e selekshon engrande mirando ku ta netamente e di 12 hungadó, esta e públiko bon entusiasmá, por hasi e diferensha. Esta ku e selekshon nashonal si por vense Honduras.
Den pasado e selekshon nashonal a enfrentá Honduras na shete okashon, na kual Honduras a gana kuater biaha. Selekshon nashonal a tabla na dos okashon i a sa di gana únikamente un biaha di Honduras.
Honduras den enkuentro kontra di Haiti resientemente a sali di porta grandi ku un viktoria di 3-1.
E mesun ekipo aki a tabla ku Venezuela ku markadó di 1-1. Tampoko e selekshon di Honduras aki no a tene mizèrikòrdia ku Puerto Rico den su promé wega pa eliminatorio pa Mundial 2010 i a gana ku skor di 4-0 pa despues empatá 2-2 ku Puerto Rico na Puerto Rico mes.
Honduras ta un ekipo mundialista ku a bai mundial na 1982 i ta rankeá na di 37 lugá riba e ‘ranking’ aktual di FIFA.
E selekshon aki ta sali proksimamente pa Beijing, China pa partisipá na Olimpiada.

Lorito ta yama tur hende un felis djarason. Awe su kurpa ni mente no tabata duna. Tin biaha e dos kosnan aki sa kore huntu i nan ta hasi dia (i bida) hopi difísil.
****
Meimei di tur e kosnan aki ta hopi hende ta haña ku nan kosnan ta esnan mas importante pa atendé, di un klabu di mal kalidat te na supervishon finansiero. Ta djis pa bo haña un idea kon tin biaha un dia ta hinká den otro.
****
Lorito ta prepará pa bai bula awe den Penstraat pa mira e manifestashon di serka. Mas bo pensa riba e kaso, mas asko bo ta haña. P’esei no ta straño ku mas i mas hende den kaya ta pidiendo pa bin ku kastigu di morto. Nos a lesa den De Telegraaf ku e kasá di Pim a bisa ku e persona ku a tira tabata koló kla. Aloménos, esei e por a mira na momentu ku e akto a tuma lugá. Di tur manera, sea e malechornan ta kla òf skur, esei no ta kita nada for di e akto baho aki ku mester haña tur kastigu di lei. Pisá mes mester baha riba esnan ku a kometé e akto aki.
****
Nos sa ku polis ta dedikando atenshon èkstra na e kaso aki no opstante e siguransa ku Gezag a duna ku tur kaso lo haña mesun trato. Lo keda un poko raro si solushoná e kaso aki mesora (manera esun di pastor dos aña pasá poniendo rekurso èkstra) siendo ku diferente otro kaso no ta solushoná ainda. Loke nos kier bisa ta ku mester evitá pa krea e persepshon ku pasobra e kaso ta hañando hopi publisidat, entre otro na Ulanda, ku ta buska un solushon mas pronto posibel pa e kaso aki ku tur rekurso nesesario. Nos ta kompartí e opinion di Gezag ku tur kaso ta un kaso ku mester atendé igualmente!

WILLEMSTAD - E kompania ulandes AFAS ku filial na Hulanda i ku a kaba di habri un ofisina na Kòrsou a komprometé su mes ku selekshon di Antia/Aruba.
Un di e doñonan di e kompania kende ta Ton Van der Veldt ta splika kiko su motibu ta pa aportá ku e selekshon.
Ton van der Veldt ta bisa ku ya pa hopi aña kaba e ta un fanátiko ferviente di e deporte di beisbòl.
E ta bisa ku for di dia ku e a tende ku Antia/Aruba a wòrdu akseptá pa bai Haarlemse Honkbalweek e kier a aportá pa ku selekshon.
E persona ta komentá ku esaki ta un di su promé pasonan pa por invertí di komunidat via di deporte.
E ta bisa ku e ta hopi kontentu di ta un di e kompanianan ku lo hasi posibel pa ku e selekshon por biaha pa Hulanda despues di 14 aña.
E foto ta ilustrá e momentu ku Thakaidzwa Doran di NaBaFe i e direktor Pim Steinmeiijer di AFAS ta yega na e akuerdo pa ku e selekshon di Antia/Aruba.