WILLEMSTAD – E asesinato kruel ku a tuma lugá den fin di siman di e doño di Restaurant La Rousse, Pim Timmermans, den Penstraat a nifiká un malpropaganda enorme pa Kòrsou, entre otro na Ulanda, e merkado turístiko mas importante di nos isla. Miéntras ku Kòrsou ta benefisiando di oumentu drástiko di turismo for di Ulanda, e informashon aki ta bin na mal momentu pa imágen di nos isla. Kombiná ku e kobertura ku e hazañanan di Hero Brinkman ta hañando, por papia di un siman skur pa Kòrsou na Ulanda. E korant mas grandi di Ulanda ta papia den su edishon di awe di un “slachtpartij” den e kaso aki bou di e kabes “Nederlandse horecabaas afgeslacht”. E artíkulo ta kompañá pa pòrtrèt di pareha Timmermans, e anochi di e asesinato i tambe un pòrtrèt di e restorant. “Curaçao is in de greep van de angst”, asina e korant ta bisa referiendo na hechu ku den pasado e tipo di asesinatonan aki tabata tuma lugá den e sirkuito di trafikashon di droga. Awor aki e asesinonan a pone nan bista riba komersiantenan ku ta traha duru pa gana nan pan di kada dia. E korant ta referí na morto di e komersiante Daryanani ku a haña morto tres siman pasá den su negoshi. E popular kantante ulandes Lee Towers ku ta un amigu di kas di famia Timmermans ta bisa ku loke ta pasando ta un kos ku ta krea hopi ansha. “Ta un kos ku por pasa tur hende”, asina Towers ta bisa. E kasá di Pim, sra. Marjolein Timmermans, a duna detayenan di loke a pasa djadumingu anochi. El a bisa ku na momentu ku Pim a sera e negoshi, tres hòmber a bula for di skuridat den kurá i nan a kuminsá tira. E ayudante Johnny a logra kore i a skapa di e balanan no opstante ku el a kai durante su kareda. “Un di e atakantenan a bin riba nos i nos no por a bai niun kaminda. E tabatin un maskarada bistí i su kueru tabata kla. Mi a grit’é pa nos hasi nada pero el a lòs tres tiru ku a alkansá kurpa di Pim. Mi a purba di tene Pim riba su kurpa pero esei no a logra komo ku e tabata masha pisa. El a wak mi i despues el a sak den otro. Mi no tabata sinti su pulso mas i mi tabata sa ku e no lo sobrebibí”, asina Marjolein a bisa.
WILLEMSTAD -- Frakshon di PAR den Parlamento pa medio di Prensa a tuma nota ku na mas ku dos okashon den un tèrmino kòrtiku kuido di nos suidadanonan na nos hospital nashonal no por a keda garantisá. Si den pasado resien esaki tabata e kaso na e departamento di kuido intensivo, awor ta resultá ku esaki ta konta tambe pa e departamento di “eerste hulp” (Poli), pa kual algun enfermera preokupá a aserká nos frakshon. Apesar ku frakshon di PAR den Parlamento na mas ku un okashon a papia ku diferente stake-holders, nos frakshon ta konstatá ku ainda partidonan no a logra tuma akshonnan konkreto ku por garantisá e kuidonan ku na opinion ta netamente esnan ku ta mas delikado i na unda bida di hende ta kore peliger. “Nos frakshon ta di opinion ku apesar ku tin dos instituto di kuido mas chikitu, bou di ningun sirkunstansia por ta asina ku nos Hospital prinsipal no por garantisá e kuido mínimo ku kualkier instituto di kuido mester por duna”, asina miembro di Staten pa e partido Jacqueline Spencer a bisa. Frakshon di PAR ta kere ku partidonan mester sigui dialogá, pero ku gobièrnu mester tuma e pasonan nesesario na unda huntu ku gerensia di Hospital ta yega na un plan agudo ku ta garantisá kuido di urgensia na Poli i kuido intensivo den intensive care. “Realidat ta ku mester bini un Hospital nobo. Pero miéntras e Hospital nobo aki no ta un realidat, gobièrnu ta keda responsabel pa garantisá kuido di un i tur. Alabes nos frakshon ta spera ku na un manera responsabel partidonan lo sòru pa tin sufisiente personal kualifiká pa duna e kuido nesesario. Nos frakshon ta keda para riba e punto ku mester kana dos trayekto, unu ku ta e trayekto agudo ku ta solushoná e problemanan interno pa garantisá e kuidonan ku awor tin problema i e di dos trayekto ta pa bini ku un “hospital akadémiko” nobo ku por garantisá un kuido riba e nivel ku e pueblo aki meresé. Alabes lo mester drecha e kondishonnan sosial pa por atraé enfermeranan spesialisá ku kier traha den kuido intensivo. Frakshon di PAR den un tèrmino relativamente kòrtiku lo bolbe tuma e inisiativa pa den un reunion di komishon sentral papia ku e diferente stake-holdersnan i “Raad v. Volksgezondheid” pa yega na un klaridat definitivo riba e asuntu aki. Terminando nos ta supliká tur stake-holders pa diskutí e tema aki na mesa i no pa medio di medionan di komunikashon, asina sra. Spencer ta bisa.
WILLEMSTAD – Ayera nochi tabatin un enkuentro spesial pa duna pabien na Ester Mayer ku a kumpli 50 aña. Ester ta biba na Ulanda i ta pensando pa regresá Kòrsou. Den pasado Ester tabata un figura masha popular den radiodifushon. Ester a traha na Radio Hoyer i Radio Kòrsou FM ku masha bon sintonia. Algun aña pasá Ester a bai Ulanda ku e determinashon pa sigui progresá. LA PRENSA a komprondé ku esei a logra pa gran parti. Awendia Ester ta dediká hopi tempu na aspektonan spiritual i ta kanta tambe, loke el a demostrá ayera ku gran entusiasmo. Un grupo grandi di famia, amigu i konosí a asistí na e aktividat ayera pa selebrá e momentu ku Ester a mira Sara. Hopi di esnan presente a rekòrdá e dushi momentunan di ántes ku Ester. Di parti di LA PRENSA ta bai un palabra di pabien na Ester ku e deseo di éksito pa futuro!
WILLEMSTAD -- Direktiva di Sentro di Bario Montaña ta organisá den kuadro di su siklo un charla tokante nir. E charla lo ta mañan djaweps 19 yüni 2008 pa 7’or pa 9.30. E charla, ku tin komo título “Prevení ta mihó ku Spula” i ta na enkargo di Dr. Y. Schoop dòkter di kas i tambe representante di Nierstichting. Riba e anochi aki lo bai tin un hóben ku lo duna testimonio di e malesa aki. Sentro di Bario Montaña ke yuda konsientisá mas, di sigur nos habitante di Montaña i bisindario, e importansia pa sa ki balioso nos nirnan ta pa nos kurpa i pakiko i dikon nos tin kuida nan. Entrada ta kompletamente grátis. Ta sugerí un i tur pa bini tempran pa no keda afó pasobra kantidat ta limitá. Di e forma aki Sentro di Bario Montaña ta kere di duna kontenido real na balor di ban prevení malesa pa nos tur por ta felis. Si tin kualke informashon, pregunta tuma kontakto ku Sentro di Bario Montaña na telefòn 767-1600 entre 8’or pa 11 òf atardi 5’or pa 8’or.
WILLEMSTAD -- No a konstatá iregularidat den e preisnan ku Gobièrnu di Kòrsou a fiha pa Curoil i Aqualectra. Esei a sali na kla despues di un bishita ku kontroladornan di Servisio di Asuntunan Ekonómiko (DEZ) a hasi resientemente na e dos kompanianan pa kumpli ku e kontròl riba produkto i servisio pa kua Gobièrnu ta stipulá tarifanan máksimo. Durante di e bishita na Aqualectra NV, funshonarionan di DEZ a kontrolá fakturanan di awa i koriente durante di e periodo di yanüari 2008 te ku mei 2008. A hasi uso di e dekreto di Bestuurscollege ku ta kontené e preisnan stipulá (pa Gobièrnu Insular). Esaki ta pa a kontrolá ku si Aqualectra NV ta usa e tarifanan di awa i di koriente korekto. Durante di e kòntròl, e tarifanan pa diferente grupo di konsumidó manera entre otro usadó di paga tinu, usuarionan ku tin konekshon fiho (pòst pago), hòspital i fabrikanan lokal a keda kontrolá. Na Curoil NV a hasi un investigashon riba e fakturanan di gasolin regular, super (Mogas 92, Mogas 95) i gasoil over di e periodo di yanüari 2008 te ku aprel 2008. Aki a kompará si e preis real ku Curoil NV ta paga PDVSA pa kompra di gasolin i gasoil ta kuadra ku e preisnan konforme “Gulf Platts”. Solamente e preisnan di gasolin i gasoil a keda kontrolá, debí ku ta esakinan ta esnan ku for di prinsipio di aña 2008 te ku awor a keda adaptá na algun okashon. Basá riba e kòntròlnan ku a keda ehekutá, Gobièrnu Insular di Teritorio di Kòrsou ta informá komunidat ku Servisio pa Asuntunan Ekonómiko no a konstatá ningun iregularidat ni na Curoil NV ni na Aqualectra NV.
WILLEMSTAD – Ekonomia di Kòrsou ta floresiendo. Esei ta e konklushon ku por saka for di e seshon di informashon ku tabatin ayera na Banko Sentral di Antia kaminda Ofisina Sentral di Statistik (CBS) a duna informashon na invitadonan a base di e enkuesta riba koyuntura i e investigashon riba forsa laboral. Direktor di CBS, Francis Vierbergen a bisa ku konfiansa den ekonomia i futuro di Kòrsou a krese den aña 2007. Por lo ménos 73 % di empresa a rekonosé ku nan tin konfiansa den futuro di e isla. Tin tambe e persepshon ku klima di invershon a drecha. Investigashonnan di CBS ta mustra ku kasi 40% ta di opinion ku nos klima di invershon ta bon, miéntras ku sigur 50 % ta di opinion ku nos klima di invershon ta basta bon. Un porsentahe di empresario (kasi 10%) a indiká ku nan ta haña e klima di invershon malu. Por sierto ku e porsentahe aki ta bahando. Resultadonan empresarial tambe a mehorá. Mas empresa (71%) a bolbe indiká ku nan a logra un resultado positivo (ganashi bruto) den 2007. E investigashon riba forsa laboral di CBS a mustra un oumento di den kantidat di hende ku ta traha di 52.000 den 2006 pa kasi 54.000 den 2007. Tin den kasi tur ramo di trabou tin un oumento pero prinsipalmente den dunamentu di servisio komersial, konstrukshon i den horeca. Pa loke ta trata 2007, inflashon tabata 3,0%. E oumento di preis di 3% ta okashoná na promé lugá pa oumento di preisnan di kuminda, di material di konstrukshon i di koriente. Ekonomia di Kòrsou a krese den aña 2007 realmente ku 3,5%. E kontribushon mas grandi na e oumento a bini di aktividatnan den trabounan relashoná ku turismo, espesialmente den horeca, konstrukshon i komersio. Mirando gastamentunan por bisa ku ta espesialmente invershonnan (8%) i gastamentu konsumptivo (8%) a kontribuí na e kresementu aki. Di otro banda tabatin un bahada di e saldo di eksportashon i di importashon. E kresementu ekonómiko di Kòrsou ta ménos fuerte kompará ku kresementu riba otro islanan. Na St. Maarten i na Boneiru tabatin un kresementu di respektivamente 4,5 i 5%.
WILLEMSTAD – Fundashon Ban Sembra Pas (BSP) tambe a tuma nota di e dos último kasonan di asesinato na Kòrsou, kaminda den ménos ku un luna un komersiante den Punda i un komersiante den Penstraat a pèrdè nan bida. E dos mortonan akí ta motibu pa e fundashon lansa e idea pa bin ku un Órgano Komunitario Kontra Violensia. Segun presidente di e fundashon, Gilbert de Windt, e tristesa i sentido di inseguridat ku e asesinatonan aki i tur otro asesinato ta kousa, no solamente pa e sernan kerí di e víktimanan, pero tambe den komunidat, ta profundo. “E echo ku gobièrnu so no por garantisá optimalmente seguridat di suidadanonan, ta hasi e situashon mas preokupante ainda, pasobra kada suidadano i bishitante di Kòrsou ta kore tur dia un riesgo real di bira víktima di krímen i violensia.” Mas aleu e fundashon ta bisa ku ta p’esei mes komunidat no mag di keda indiferente, lagando víktimanan i nan sernan kerí so den nan pena, miéntras ku e malechornan si ta fiesta i gosa di nan aktonan kondenabel. “BSP ta urgí pa mas pronto ku ta posibel sektornan gubernamental, empresarial, sindikal, religioso, prensa, NGO-nan, organisashonnan di bario i otro gruponan sosial-kultural bini huntu pa papia riba lantamentu di un “Órgano Komunitario Permanente Kontra Violensia”, ku mester tin komo meta prinsipal formulá i ehekutá akshonnan komunitario kargá pa tur sektor di komunidat pa kombatí i prevení tur tipo di violensia na Kòrsou. Den pasado tabatin diferente intento riba inisiativa di gobièrnu pa yega na un órgano komunitario pa atendé ku e problema di kriminalidat, ku tin Kòrsou hopi aña kaba den su gara. Tur e intentonan aki a resultá sinembargo den hopi skuma i tiki chukulati i tur a kaba finalmente na aros ku koko, sin niun hende tende nada mas di nan.
WILLEMSTAD – E periodo pa registrá kachónan pitbull ta sera dia 30 di yüni próksimo, despues ku anteriormente a prolongá e periodo akí na dos okashon kaba. Tur doño di un kachó pitbull mester laga implantá un chep den kueru di e kachó i sterilis’e. E medida akí ta pa poko poko eliminá e rasa di kachó pitbull. Dor di sterilisá tur pitbull segun e lei nobo, gobièrnu ke pa reprodukshon di e kachónan akí stòp i asina e rasa ta ekstinguí. Pitbullnan ku tin ku haña yu denter di poko no mester sterilisá ainda, i ta haña un periodo di dispensashon te ora e yunan kaba di nase. Pa kachónan chikí ku a kaba di nase resientemente tambe ta konta un periodo di dispensashon te ku ora nan hasi 6 luna. For di awor si por laga implantá e chep serka e kachónan ku no tin 6 luna ainda. Nan no mester sterilisá awor akí. Banda di e medidanan di sterilisá i implantá chep den kueru di e kachó, e doño mester pidi un pèrmit definitivo pa por tin e kachó. E mester sòru pa semper ora e sali ku su kachó, esaki tin un bosá bistí. Tambe e kachó mester ta mará na un kadena ku no ta mas largu 1.50 meter. Na kas kaminda e kachó ta, tambe e doño mester tuma medidanan di prekoushon. E kurá mester ta di tal manera será ku e kachó no par sali. Tampoko e kachó mester por bula e kurá. Finalmente mester tin un anunsio poné na e porta di kurá ku ta avisá ku tin un kachó pitbull den e kurá.
WILLEMSTAD - Ku un grupo di 33 persona e grupo di Easy Riders Kòrsou a bai hasi un trep di mas ku 1500 km na California riba motosaikel. E trep di 7 dia a kuminsá ku un bustour dor di San Francisco. Easy Riders Kòrsou a hür 25 motor via e organisashon Eagle Riders na San Francisco. Bou di guia di miembronan di direktiva Ad Hamerslag y Jan-Peter Klijn e grupo a sali ku un routebeschrijving detayá. E biahe a kuminsá via Pacific Highway pa Monterey, despues pasa via San Luis Obispo, dor di Kings Canyon Park i Seqouia Park kaminda e palunan di mas grandi ta i terminá na Visalia. Siguiente dia a pasa via National Park Yosemite (dor di sneu i watervallen) pa Oakhurst i terminá na Modesto. Via e vineyardsnan di Napa Valley i Sonoma a terminá na San Francisco. E kompania di motosaikel nunka promé a haña un grupo grandi manera esaki i ku ni un desgrasia no a pasa. Esaki ta pa ilustrá e disiplina di Easy Riders Kòrsou. Pa otro aña ya kaba e organisadónan tin pensa pa hasi u trep asina aki atrobe. Probablemente ta bira Colorado. Riba e fotonan por mira e miembronan di Easy Riders ku a biaha pa California.
JERUSALEM, Israel, - E gobièrnu israelí a aseptá un tregua ku organisashon radikal islámiko Hamas na Fraña di Gaza, ku ta kuminsá mañan mainta, funshonarionan di Defensa i medionan di komunikashon di Israel a bisa. Egipto i Hamas a anunsiá e akuerdo ayera, pero Israel a posponé su konfirmashon di e akuerdo. Gilad, un funshonario di Defensa israelí, a biaha bai Cairo pa hiba negosiashonnan ku mediadornan di Egipto durante ayera nochi, pa pone tokenan final n’e akuerdo. A tuma e desishon awe den oranan di mardugá, despues di regreso di Gilad for di Cairo. E tregua ta programá pa kuminsá mañan mainta, fuentenan palestino a informá. Hamas, ku for di dos aña pasá ta kontrolá Fraña di Gaza, a bisa anteriormente ku a akordá un tregua ku Israel. Un alto representante di Hamas a bisa ku e ta konfia ku tur grupo militante dentro di Fraña di Gaza sa di respetá e akuerdo, ku a keda lográ danki na intermediashon di Egipto. For di Jerusalem, alto funshonarionan israelí a konfirmá ku nan ta spera ku e tregua ta drenta na vigor mañan djaweps, pero nan a atvertí ku nan ta spera mira si esaki ta algu serio. E funshonarionan israelí a indiká ku a imponé tres kondishon: - tregua total di hostilidatnan - fin di kontrabanda di arma for di Egipto pa Gaza - i akshonnan pa liberashon di e sòldá israelí Gilad Shalit, kapturá pa e militantenan radikal dos aña pasá.
WILLEMSTAD - Pa awe tardi mitar di tres, un grupo grandi di komersiante tantu den Punda komo den Otrobanda, a konvoka un manifestashon silensioso, komo protesta kontra e asesinato kruel di Paul “Pim” Timmermans, doño di e restorant La Rousse den Penstraat, asesinato ku a tuma lugá na kuminsamentu di e siman aki. E kaso aki a okashoná un ola di rechaso i un repudio total pa e manera ku el a tuma lugá. Gezaghebber a anunsiá ku ta kondusiendo un investigashon profundo den e kaso aki pa purba pone man mas lihé posibel riba outornan di e delito aki. Te ainda sinembargo, no opstante vários tep, outoridatnan no a logra determiná ta ken a hasi nan mes kulpabel na e krímen aki. Nos masha tempu pasa a deskubrí e kurpa sin bida tambe di e komersiante Daryanani den sentro di siudat kaminda e tabatin su negoshi. Ounke esei no ta determiná ku eksaktitut ainda, tin indikashon basta kla ku aki tambe ta trata di un krímen. Notabel ta ku gezaghebber mr. Lisa Dindial a indiká ku e no ta kere ku por papia di un tendensha kaminda kriminalnan ta enfoká riba sektor empresarial. Komersiantenan di otro banda, sita prekupá pa e situashon aki. Den un aviso di un página kompleto ku nan a saka den korant ayera, e komersiantenan aki ta ekspresá nan repudio pa e asesinato kobarde, manera nan a yam’é, riba Pim Timmermans. Ku Pim Timmermans, nos a pèrdè un figura notabel den mundu empresarial. “Laga nos sigui traha riba un isla kaminda un kos asin’aki no ta bira kos di tur dia,” asina e aviso ta indiká mas aleu. E manifestashon di protesta ta programa pa awe mèrdia mitar di tres pa 3’or dilanti di La Rousse den Penstraat.
WILLEMSTAD - E enkuentro parlamentario entre Ulanda, Antia i Aruba, ayera a trata e proposishon di gobièrnu ulandes pa introdusí un sistema di registrashon di hóbennan antiano na Ulanda, konosí komo VIA, Verwijsindex Antillianen. “Nos a sinti klaramente ku e delegashon ulandes no ta asina entusiasmá ku e idea aki,” asina Pedro Atacho a duna di konosé. Parlementair Overleg Koninkrijksrelaties (POK) ta kontinuando i ayera a trata diferente tema. Un dje puntonan ferfelu ku e delegashon antiano a logra pone tòg riba agènda di POK ta e areglo VIA, Verwijsindex Antillianen, un areglo ku Ulanda ke bin kuné pa registrá tur hóben antiano i rubiano den kuadro di kombatimentu di kriminalidat, un areglo ku Antia ta fuertemente kontra. Parlamentu antiano den pasado a tuma un posishon fuerte unánimamente kontra e intenshon aki, ku hopi ta konsiderá komo un forma diferente pa introdusí un areglo tòg pa ekspulsá hóbennan antiano na Ulanda. Organisashonnan di antiano na Ulanda entretantu a entamá un kaso den korte pa evitá ku e areglo aki ta drenta na vigor. Partidonan a spera ku korte lo a dikta sentensha den e kaso promé ku e enkuentro a kuminsá, pero esei no ta e kaso. Pedro Atacho a bisa ku en todo kaso di Socialistische Partij i di Christen Unie el a haña sosten inkondishonal. E dos frakshonnan aki tambe a konstatá ku aki ta trata di un areglo diskriminatorio, inhustu i inaseptabel, segun Atacho.
WILLEMSTAD - Direktiva di Bureau Ziektekostenvoorzieningen (BZV) a prolongá e kontrakt ku Mr. Dennis Evertsz di Latin Caribbean Counsultants pa sigui ku e trabounan di reorganisashon na BZV ku seis luna mas. Esei a sosodé apénas un dia despues ku Konseho Insular a reuní riba e asuntu aki kaminda un mayoria den Konseho Insular a rechasá e moshon di oposishon pa no prolongá e kontrakt ku Evertsz. “Ami no a bisa niun ora so den e reunion di djaweps último, ku no ta intenshon di prolongá e kontrakt ku Evertsz. Loke mi a señalá ta, ku en todo kaso te na e momentu ei mi no a prolongá niun kontrakt,” asina diputado Humphrey Davelaar a bisa, relashoná ku krítika ku a surgi riba e asuntu aki. Manera ta konosí, ku 9 voto na fabor di oposishon i 10 voto kontra di koalishon, Konseho Insular a rechasá e moshon di partidonan di oposishon pa no prolongá e kontrakt ku e kompania Latin Caribbean Consultants. Oposishon a pidi e reunion di Konseho Insular pa haña sa kon ta pará, awor ku e periodo di seis luna ku e kompania a haña pa reorganisá BZV, ta finalisando. Partidonan Niun Paso Atras, Forsa Korsou, MAN i tambe Pueblo Soberano ta konsiderá ku e situashon di inklaridat a keda eksistí. Gobièrnu no por a bisa nada konkreto kiko ta bai pasa. “Nos a keda mes leu,” asina vários miembro di oposishon a duna di konosé. Loke tabata notabel ta e hecho ku Bestuurscollege a indiká di no a risibí e evaluashon ainda di e trabou ku e konsultent a hasi durante último seis luna. Direktiva di BZV no a reuní ainda riba e asuntu aki, algu ku oposishon a tuma gobièrnu masha na malu.
ORANJESTAD- Comision di Special Olympics Aruba a manda e resultado final di e competencia di 'Evenemento 2008' di Special Olympics Hulanda cu a tuma lugar na Amsterdam. Den e weganan a competi 1800 atleta den 18 diferente deporte, caminda St. Maarten, Suriname y Aruba a competi hunto cu e otro atletanan di e otro provencianan di Hulanda. E 6 atletanan DI Aruba a haci nan máximo esfuerzo y nan a logra trece premiacion pa Aruba. Aruba a logra 5 medaya den e weganan aki y nan ta: 1: Medaya di ora den bowling gana door di Patrick Hill. 2 : Medaya di Silver, 1 gana den bowling pa Edgar Loefstop 3. Medaya di Silver den ping-pong gana pa Cody Arends 2: Medaya di brons gana den Badmington double dor di Eldrick Kock y Ronny Maxwell Otro resultadonan di e atletanan di Aruba ta mustra cu den ping-pong individual Lisanne Mettes a termina na di 6e lugar. Cody Arends a gana 6 wega sigi pa perde 1 wega den final y a keda na 2e dus silver. Alaves e delegacion kier manda palabra di gradicimiento na e sigiente sponsernan cu a hasi e biahe aki posibel cu ta Digicel, Elmar y subsidie commissie. Un danki tambe ta bai na mayor-, famia-, amigo- y conocirnan cu a bin ricibi e delegacion diabierna ultimo na airport.
ORANJESTAD- Directiva di Centro di Bario Playa Pabao ta informa muchanan di Playa Pabao y di Aruba engeneral cu e aña aki atrobe lo tin dos siman yen di actividad den nos centro. Nos plan vacacional lo tuma lugar durante e siman di 14 di Juli pa 18 di Juli y di 21 di Juli pa 25 di Juli di 8 ór pa 12 ór. Plan vacacional Playa Pabao 2008 ta pa muchanan enter 4 y 12 aña. Lugarnan cu nos lo bishita ta Community Pool, Cinema y diferente lugar historico riba nos isla. Lo cobra e suma di 60 florin pa dos siman cu ta pa cubri gasto di lugarnan cu lo bishita, bus, seguro, sandwich y juice. Ya caba por inscribi na nos centro tur dia di 8.00 'or pa 11.00 'or y atardi di 3‘or pa 5’or. Ademas di sali cu e muchanan riba diamars y diahuebs muchanan lo participa tambe na weganan recreativo y lo haci un "speurtocht" cu nan den nos bario. Pa mas informacion por tuma contacto na nan nos centro telefon 583-7775.
ORANJESTAD– Na Cas di Aruba a tuma lugar un recepcion na ocacion di e Parlementair Overleg Koninkrijksrelaties (POK) entre parlamentarionan di Hulanda, Antia y Aruba. E recepcion a conta cu bishita di presidente di Eerste Kamer sra. Yvonne Timmermans-Buck, presidente di Tweede Kamer sra. Gerri Verbeet, secretario di Estado pa Relacionnan den Reino sra. Ank Bijleveld-Schouten, Minister Plenipotenciario di Antias r. Paul Comenencia, comandante di Forzanan Arma generaal Peter van Uhm, miembro di Raad van State pa Antia mr. Wim Ellis, miembro pa Raad van State pa Aruba mr. Hubert Maduro, e delegacionnan di diferente parlamentonan, representantenan di organisacionnan Arubano na Hulanda, representantenan di diferente departamentonan gubernamental Hulandes y prensa Hulandes Minister Plenipotenciario di Aruba sr. Frido Croes a yama tur hende bon bini y a bisa di ta honra cu presencia di hopi miembronan di parlamento di Reino na e recepcion. E mandatario a mustra den su discurso ariba e importancia cu e reunionnan aki ta tuma lugar pa discuti ariba topiconan di interes comun c ulo mester desemboca den un mantencion di e lasonan dentro di nos Reino Hulandes Presidente di Parlamento di Aruba sra. Melvin Wyatt-Ras a subraya cu mester sigi traha na realisacion di e mesun meta den Reino. Pesey ta importante cu dos biaha pa aña tin e oportunidad aki den e reunionnan di POK. Sra. Wyatt-Ras a toca e tema di autonomia bisando cu esaki ta hopi importante pa Aruba y cu Aruba lo mantene su Status Aparte, manera palabra den e reunion di Mesa Rondo na 1983. Sinembargo Aruba lo sostene e islanan di Corsow y Sint Maarten den nan esfuerzo pa logra nan Status Aparte y tambe duna tur cooperacion nesesario na e islanan BES, asina sra. Wyatt-Ras a bisa. Segun e presidente di Parlamento di Aruba tin diferencia entre e paisnan den Reino, pero na otro banda tin hopi mas similaridad cu mester prevalece den esfuerzo pa traha na bienestar di Reino Hulandes.
ORANJESTAD- “Tur cos ta canando segun schema”, asina Sr. Norman Browne beleidsmedewerker di IDEFRE y hefe di deporte escolar a comenta relaciona cu e proyecto ‘Ansary Foundation School Sports Project’. E proyecto aki, dedica na skolnan basico rond Antiyas ta sigui su curso. Recientemente den presencia di alumnonan di Colegio Conrado Coronel a hasi entrega di e materialnan deportivo na e skol manera a keda proyecta den e prome fase di e proyecto. Representantenan di tanto Banco di Caribe y ENNIA a tuma un momentu pa huntu cu IDEFRE y Sr. Janssen di Sport Caribe hasi un entrega simbolico na e skol. Tokante ‘Ansary Foundation School Sports Project’: Ansary Foundation ta un iniciativa di Hushang Ansary, presidente di Parman Capital Group di cual Banco di Caribe, ENNIA y National Investment Bank (NIB) ta forma parti. como muestra di aprecio pa nan participacion den comercio local, Banco di Caribe y ENNIA mediante Ansary Foundation a pone un suma substancial di 228.000 florin*** na disposicion di e islanan di Antiyas y Aruba pa asina yuda e skolnan basico riba e islanan aki cu nan programa di formacion di mucha mediante deporte escolar. E proyecto na Aruba: Manera ta conoci, e proyecto di Ansary pa nos skolnan basico ta sosode den diferente fase. Fase 1 di e proyecto ta dirigi riba e reparticion di e material deportivo. Te cu fin di 2007 a logra reparti y entrega materialnan deportivo na practicamente tur skol basico aki na Aruba. Fase 2 di e proyecto ta ensera restauracion di tereno deportivo na e skolnan basico, den forma di marca veldnan di basket, futbol y volley.
ORANJESTAD- Den entrevista cu Donny Rasmijn candidato di partido AVP el a expresa cu tin un manera pa baha prijs di awa y coriente den un tempo masha cortico mes. Partido AVP a yega di trece hopi biaha pa dilanti cu den un periodo di 6 luna e boilernan di WEB por kima pitch unda cu e pueblo lo haya un alivio grandi riba costo di brandstofclausule. Esaki no ta algo cu WEB no sa pasobra e management di WEB cu tambe a traha den refineria sa cu ta pitch ta wordo kima den refineria pa mas di 50 aña caba. Imagina si refineria tambe tabata kima Fuel No. 6 e lo mester a sera masha hopi tempo caba. Actualmente WEB ta genera un average di 100 MW pa dia unda cu 24 MW ta wordo genera cu tres Recip Engines. Un Recip Engine ta en realidad un generator grandi cu ta kima Fuel No. 6 tambe. E equipo aki no a demostra di por kima otro azeta manera pitch. Por lo tanto esakinan mester sigui kima Fuel No. 6 so. Pero e boilernan cu ta den servicio si por kima pitch pasobra esaki a wordo demostra pa 50 aña caba den e refineria. Awor pakico WEB ta nenga pa usa pitch? Tin diferente manera pa hacie y e manera mas responsable ta pa hacie parcialmente unda cu un percentage ta pitch y lo demas ta Fuel No. 6, Donny Rasmijn ta duna di conoce. E cantidad di placa cu lo wordo gespaar dor di kima pitch hunto cu Fuel No. 6 ta wordo ilustra den e tabel adhunto. %, Pitch %, Fuel 6 $, Spaar %, Spaar 0 100 $ 0.00 0% 10 90 $ 11,720,150.00 8% 20 80 $ 23,440,300.00 15% 30 70 $ 35,160,450.00 23% 40 60 $ 46,880,600.00 31%
WILLEMSTAD – E bebida di energia Shark huntu ku The Golden Boy Casio Promotions i Isacas ta rekòrdá tur e ekiponan ku ta partisipá na e Triángulo Deportivo di Siklismo, Mini Futbòl i Dominó dia 2 di yüli 2008 na Kanga pa un reunion. E reunion ta tuma lugá djaweps awor 19 di yüni 2008 na Kanga 66 ku ta keda na altura di Kangarus i Jacqueline Snack. Pa e ekiponan di Mini Futbòl i Siklismo e reunion ta entre 6’or pa mitar di 8. Pa e ekiponan di Dominó ku ta konsistí di hungadónan ku ta hunga na snack, toko, mini market, e reunion ta kuminsá p 8’or di anochi na e mesun direkshon Kanga 66. Tur hende ta kòrda kon dushi tabata biaha pasá hungando Dominó di sélebre kaminda ku Pipe Cone di amigu Boechi, a titulá kampion. E bebida di energia Shark ta un di e patrosinadònan di e evento aki. Mas den kurso di siman, lo tin mas detaye enkuanto di e evento aki. Pa mas informashon por yama N. Caciano na telefòn 514-4863 òf 674-7713.
