ORANJESTAD- Diadomingo mainta 8 di juni lo tin un concierto di e coro Mélange, bao guia di Maybelline Arends-Croes y di e conocido guitarista Ivan Jansen cu su cuarteto.
E concierto aki ta bao di auspicio di Circulo Arubano Pro Arte y ta tuma lugar na Holiday Inn Hotel, las Palmas Ballroom, cuminsando pa 11’or di mainta.
Mélange ta un coro di adulto cu a ser lanta na Augustus 1994. E miembronan di coro a scohe e nomber Mélange como cu a uni dos coro existente, esta Fuga y Cristal, pa forma e grupo Mélange.
E coro ta canta regularmente durante celebracion eucaristico na Misa den weekend y tambe pa Pasco di Nacemento, Pasco grandi y otro dianan di fiesta di iglesia tambe. Últimamente nan a canta un Misa completo, tanto pa e apertura di e celebracion di e Aña di Hubileo di obispado di Antiyas/Aruba, como pa e celebracion principal na Aruba riba 4 di mei ultimo.
Ademas nan ta canta na actividadnan social y cultural. Mélange a yega di saca un cd ‘religioso’ titula”Duna Amor” cu canticanan di bon mensahe (inspirational songs), tambe algun single cu grabacionnan pa Pasco of otro temporada di aña.
E guitarista Arubiano Ivan Jansen, ta hopi conoci pa su diferente conciertonan, tanto clasico como di jazz y tambe pa e bunita cd-nan cu el a yega di saca, esta Con Alma I, Con Alma II y Versatility. Ultimamente el a saca un cd nobo titula ’Jazz at the Links’ riba cual e ta toca cu su cuarteto.
E cuarteto ta consisti di Ivan na guitara; Franklin Granadillo, trompet; Roy Croes na baho y Richard Holmond na bateria. E cuarteto aki di cual mayoria di e musiconan a sigui nan estudio na e prestigioso Berklee College of Music na Boston, ta toca na “Windows on Aruba” na Divi Links.

ORANJESTAD - A base di peticion den nos comunidad unda cu aña pasa e Grupo “Love & Light” a organisa un seminario The Secret Meets Aruba, unda cu un sala yen yen a presencia e DVD y tambe haya oportunidad pa descuti y haci pregunta na e panelistanan cu ta personanan conoci den nos comunidad, cu ta haci uso di e intrumento y flisofia di the secret. Grupo L& L ta organizando diaranson 18 di Juni proximo un seminario titula E ley di atraccion den accion “ cuminsando pa 7.30 or di anochi na cas di Cultura.
The secret ta un DVD cu a bira sumamente famoso full rond di mundo pa su contenido asina profundo. Grupo Love and Light tambe kier comparti e journey (e biahe ) y e proceso pa asina comparti cu comunidad tur e beneficio, sabiduría y conocemento di un ley cu ta asina formidabel y cu nos kier brinda e oportunidad pa e yega na conocemento di tur cu tin interes pe.
Love and Light ta consisti di personanan cu ta haci meditacion, visualisacion, practica spiritualidad cu e meta final di: comparti positivismo cu otro, nos comunidad y tambe traha na cambio positivo di mentalidad pa asina atrae bienestar, salud, abundancia den tur sentido di palabra pa Aruba.
HISTORIA CORTICO
Pa hopi tempo e secreto a wordo descubri, scondi y e la wordo suprimi, pero por medio di e pelicula aki e ta wordo revela.
Un cantidad di personan excepcional a jega di descubri e secreto aki caba y a usa esaki y nan a bira personanan conoci y grandi. Algun di nan ta: Plato, Leonardo Da Vinci, Hugo, Beethoven, Lincoln, Edison, Einstein, Marther Luther King y Ghandi.

ORANJESTAD - Ora cu nos kier logra algo den bida nos tur tin cu planea pasobra nos no tin e recursonan financiero pa haci tur loke nos ta desea di haci den nos bida. Aruba como isla tambe tin cu haci esaki.
Dor di esaki desde januari di e aña aki e proceso Nos Aruba 2025 a cuminsa pa determina e vision pa Aruba te cu aña 2025 cual ta aporta na un desaroyo di Aruba duradero. Den un forma participativo cu participacion di sector di gobierno, priva, organizacionan no gubernamental y comunidad en general lo formula un vision pa Aruba te cu aña 2025.
Un di e resultado di e proceso aki ta pa traha un plan nacional integral strategico pa Aruba. E methodologia cu ta wordo usa ta uno participativo y cu ta enfatisa e parti positivo di bida, e ta analiza kico ta bay bon.
E método aki ta wordo usa door di haci preguntanan positivo na diferente miembronan den e comunidad.
Como parti di e proceso aki 54 persona di diferente sector y disciplina a ricibi training pa por guía e proceso aki. Puntonan interesante di e training aki ta pa nos wak cua ta e posibel forsanan mundial, internacional, regional y na Aruba cu tin influencia riba desaroyo duradero, esta riba e tereno social, tecnologia, economia, medio ambiente y politica.
Ademas, kico ta e consecuencianan di e forsanan aki ariba Aruba su futuro. Por ehemplo, un forsa global cua tin influencia riba nos economia ta e prijs di petróleo.
E prijs di petróleo ta determina e prijs di gasolin. Tambe e balor di e dollar Americano tin influencia riba nos economía ya cu e economía di Aruba ta depende di un gran parti di e turismo Americano cu ta paga cu dollar na Aruba.

ORANJESTAD – Parlamentario Zulay van Poppel-Marquez ta señala cu diasabra 24 di mei ultimo tabata Dia Internacional den e lucha contra Obesidad, y ta bon pa nos tambe reflexiona riba nos condicion di salud pa cu e fenomeno di obesidad.
Diferente raport entre otro rapport STEPS Aruba 2006 cual ta un compilacion di datos entre Departamento di Salubridad Publico y Central Bureau Statistiek ta indica cu gran parti di nos poblacion tin sobrepeso. Por ehemle pa e ser masculino rapport STEPS ta indica cu un promedio di 17,2% di personanan entre 25 y 64 aña tin un peso normal.
Pa sernan femenino ta indica pa e mesun categoria aki cu 27,1% tin un peso normal. Hunto e promedio ta sali 22,8% di nos poblacion tin un peso normal.
Esaki kiermen cu solamente un di cada cuatro persona so tin un peso normal; e tres otronan tin sobrepeso.
Tin diferente factor ta causa e sobrepeso, entre otro comemento di mas of robes y poco movecion. Segun Zulay rapport STEPS ta indica tambe cu e consumo di fruta y berdura durante un siman ta 4 dia y pa consumo di berdura ta 5,5 dia.
Pa yuda den esaki Minister Swaen a indica cu ta bai amplia e canasta basico cu fruta y berdura frozen y den blikki. Fruta y berdura fresco ta algo pa futuro y ta trahando riba e ampliacion di e canasta basico cu fruta y berdura fresco.
Nos comunidad por mira e trabaonan di Minister di Labor y Cultura unda a construi Centronan multifunctional na Parkietenbos y na Yara, un Centro deportivo Frans Figaroa na Nord y e Parke Curason na Yaburibari cual ta bon concuri desde su inauguracion. Departamento di Salud Publico periodicamente ta publica informacion pa comunidad tene cuenta cu su peso. Awor ta keda na nos pa hasi uso di e facilidadnan.

WILLEMSTAD – STU no a presentá awe mainta 10’or na Bestuurscollege pa un reunion ku Gobièrnu. Despues ku nan a anunsiá ku Gobièrnu no konosé nan adrès, mail i number di telefòn, ya ku ta via medionan di komunikashon i respondi di boka nan a tende ku Gobièrnu ke sinta na mesa ku nan, Gobièrnu a invitá nan ayera ofisialmente pa un reunion awe mainta.
E invitashon di BC pa STU reuní awe mainta, a bin despues ku e miembronan di e direktiva a lanta bai for di un reunion anteriormente ku BC. Despues di e suseso akí Gobièrnu a bisa na diferente okashon ku portanan ta keda habrí pa STU pa sigui negoshá ku Gobièrnu. Sin embargo STU no a reakshoná riba esaki i a bisa ku Gobièrnu no tin e desensia pa atendé ku nan mes nèchi ku nan si ta hasi. STU ta remarká ku Gobièrnu a hasi menshon di e echo ku tin espasio pa kòmbersá, pero no ta menshoná ni dia ni ora. Konsekuentemente Gobièrnu a invitá STU ayera nochi pa nan ta presente awe mainta 10’or na BC pa un reunion. STU sin embargo no a aseptá e invitashon pasó nan a komprondé ku e puntonan ku Gobièrnu no a bai di akuerdo kuné anteriormente lo no kambia.
Gobièrnu ta keda para ariba ku STU ta un organisashon i no un sindikato. Segun Gobièrnu, e splikashon ku STU a duna enkuanto di nan statutonan i nan fecha di lantamentu ta korekto. STU a lanta ofisialmente na 1994 komo asosashon. Tur sindikato ta un asosashon pero no ta tur asosashon por ta sindikato. Den e kaso akí mester tene kuenta ku e ‘karakter’ di e organisashon. Den kaso di e organisashon STU, ta trata di un fishi liber, un asina yamá ‘vrijberoep’. Esaki ta pone ku nan no por bira un sindikato. E tempu ei enbèrdat Gobernador tabata firma tur e aktonan di lantamentu. Sin embargo STU no a lanta komo sindikato pasó lei ta bisa ku mester tin un relashon di doño di trabou i trahadó pa por papia di un sindikato. I den e kaso di shofùrnan di bùs, nan ta nan mes doño di trabou, pues nan no por ta un sindikato.

NEW YORK – Manera un welek ku a sali for di nada, Usain Bolt awor ta e hòmber mas rápido di mundu.
E velosista hamaikino, kende ni sikiera tabata konsiderá ku su mihó chènsnan tabata den e prueba di 100m, a pone un rekòrt mundial ku un tempu di 9.72 sekònde djasabra den e Gran Premio di New York ora el a superá pa dos dsimo di sekònde e marka di su kompatriota Asaffa Powell.
Bolt a bin ta kore karedanan di 100m komo un “trabou di velosidat” pa e tin un mihó kondishon den su kareda favorito, e 200m, i tambe pa evitá práktika den e prueba di 400m ku ta mas duru. Asina, di repente, algun siman pasá el a logra e di dos mihó tempu ku 9.76 sekònde.
Inkluso ku e resultado ei, el a bisa ku e tin duda enkuanto si e lo por kambia e 400m pa 100m den e Weganan Olímpiko di Beijing.
“No ta konta pa bo tin e rekòrt mundial si mi no tin e medaya olímpiko”, Bolt a trese dilanti.
Ora el a ranka for di e blòk di salida, el a ranka su figura – el a ser registrá ku 1,93m (seis pia i 4 inch), pero e ta parse mas serka di 1,95 (6-5) i den kualke kaso e ta konsiderá demasiado haltu pa e prueba atlétiko di mas velosidat.
E ora ei, el a habri un espasio di tempu grandi kontra Tyson Gay na kasi mitar dje kareda i despues el a yega e final promé ku e prinsipal velosidat merikano.
“Di bèrdat mi no tabata buska un rekòrt mundial, pero e tabat’ei i m’a gan’é”, Bolt a bisa kende ta bini di Kingston.

WILLEMSTAD – Awe mainta un biaha mas shofùrnan di bus a drenta akshon. Nan a akudí na Pòst 5 i Pòst 6 pa pone forsa pa loke ta nan eksigenshanan pa papia ku gobièrnu riba e impase ku tin aktualmente. Nan a haña sosten di e sindikato PWFC ku a anunsiá ku lo eskalá e akshonnan. (foto: Haydel Goilo)

NEW YORK, Merka, - E aktris Tatum O’Neal, di 44 aña, i ganadó di un premio Oscar, ayera a arest’é na New York, pa a kumpra crack di kokaina.
E echo aki ta keda añadí na e bida polémiko ku e aktris aki ta hibando.
Den “Paper Life”, su outobiografia, publiká na 2004, e aktris a bisa ku el a sufri abusunan seksual di parti di amigu di su tata. Ryan O’Neal.
Di igual forma, den e páginanan, el a sigurá ku e tabata víktima di abusunan físiko i emoshonal di parti di su tata, ku e ta atribuí na uso di droga.
Den su bida sentimental tampoko a bai’é bon.
Ademas di ta e promé frei di Michael Jackson, Tatum tabata kasá ku tenista John McEnroe.
Nan a divorsiá na 1992 i nan tin 3 yu.
Den último añanan, e tabata alehá for di pantaya grandi i e ta’tin ku konfirmá ku algun ròl pa seri di televishon.

Foto; Tatum O’Neal 0206

Tatum O’Neal

WILLEMSTAD - Pa konkluí e promé tanda di su bishita aki na Kòrsou sr. Elias Sosa djasabra mèrdia a hasi entrega di un kaha di bala di tòp kalidat (MLB) na e selekshon di beisbòl di Kòrsou.
Un gesto ku a wòrdu altamente apresiá pa tantu dirigente komo e peloteronan.
Sr. Sosa ta konsiderá su bishita aki na Kòrsou den tur sentido di palabra komo positivo i eksitoso.
“E ofensiva a impreshonámi mas ku e picheo. Mi ta di opinion ku mester traha mas ku e picheo”, asina Sosa a bisa.
Sr. Sosa ku ta direktor di e programa di desaroyo den Latino Amérika pa MLB (Major League Baseball), a bisa ku nan ta dispuesto den koperashon ku gobièrnu di Kòrsou pa instalá un Akademia di Beisbòl aki na Kòrsou.
Un akademia den kual instruktornan profeshonal lo aportá ku nan konosementu i eksperensia na desaroyá e talentonan ku tin riba e isla aki.
Tur esaki pa medio di un programa bon organisá. Mas aleu sr. Sosa ta interesá pa regresá òf manda instruktornan pa yuda ku e muchanan ku a kaba di kuminsá den e deporte. “Beisbòl ta parti di boso kultura loke ta hopi importante. Sinseramente mi no a spera di enkontrá un beisbòl asina desaroyá i ku un infrastruktura asina tremendo. Kòrsou ta un paraiso......un isla pintoresko. Danki di a dunami e oportunidat pa kompartí mi konosementu ku boso”, tabata palabranan di despedida di Sosa.
Sosa durante e kombersashon tabatin bon palabra pa e forma habrí, ku atenshon i respetuoso di e peloteronan lokal, risibiendo su guia i instrukshonnan.

Skina di Sorti, awe djaluna 2 di yüni di 2008 ta deseá tur hende un bon siman. Miéntras ta hunga weganan polítiko infantil, nubianan sosial pisá i skur ta formando riba Kòrsou. Na momentu ku klasenan sosial tradishonal ta desintegrá i ta manifestá gueranan interno, dirigentenan (sigur esnan ku bon fakultat pa rasoná) mester komprondé ku e situashon ta leu for di normal.
****
Si nos definí e presensia di klasenan sosial tradishonal komo un situashon promedio, bo esfuerso mester ta di minimalisá e klasenan sosial mas abou i amplia esnan mas ariba. Usando índisenan konvenshonal por bisa ku lo bo ke un entrada pa kabes haltu kombiná ku un repartishon riba un grupo mas grandi posibel di e entrada.
****
Na momentu ku e repartishon di entrada den un pais ta malu (konsentrashon di rikesa serka un grupo chikitu), e tenshon entre e klasenan sosial tradishonal ta grandi. Na momentu ku e tenshon denter di klasenan sosial tradishonal ta grandi (desintegrashon di e respektivo gruponan), bo ta bai den direkshon di destabilidat di un komunidat. E selebre sosiólogo i ekonomista Hayek ta papia di tendensia di moveshon for di en bes na un estado di ekilibrio.
****
Den paisnan supdesaroyá, esnan mas grave ta esnan den lokual nan ta yama e region sup-Sahara, e tendensia aki ta na su nivel mas grave i ta manifestá su mes den gueranan interno duradero kaminda nèt esnan ku mester ta unifiká ta bringa otro den e forma mas barbáriko posibel. Serka nos semehante situashon no t’ei, pero e fasenan primario ta manifestando nan mes. Si kita e poko di vèrnis ku ta kubri hopi di e partisipantenan na e konfliktonan di momentu, no ta muchu difísil pa imaginá bo mes semblansa ku lokual ta pasando na algun pais afrikano.

WILLEMSTAD – No ta un sekreto ku mayoria di produkto aki na Kòrsou mester keda importá for di eksterior. Último tempu, Kòrsou a sinti efekto di tantu e krísis den energia komo krísis di alimentashon rònt mundu. Tur esaki tabatin efekto riba preisnan aki na Kòrsou.
Preis di gasolin ta sigui subi i tin subida di awa i koriente ta kologá riba pueblo di Kòrsou, pero e realidat ta, ku esaki ta un problema mundial. No mas ku siman pasá por a tuma nota, ku na St. Maarten a anunsiá ku preis di pan blanku a subi ku 50 sèn. Esaki ta djis un ehèmpel di hopi ku tin eifó komo konsekuensia di e krísis mundial aki.
Awor ta saliendo na kla, ku gastunan di transporte di barku ta subiendo drástikamente i ku tur su konsekuensianan tambe pa Kòrsou ku ta dependé asina tantu di importashon.
Den un rapòrt ku a keda publiká siman pasá pa CIBC World Markets, un banko di invershon mundialmente rekonosé, nan a kalkulá ku pa kada oumento di un dollar pa bari di krudo, ta nifiká ku tin 1% di oumento den gastunan di transporte.
Mirando e gastu di transportá material prima i produktonan final, distansia pa e merkado ta bai kuminsá bira un faktor importante den tumamentu di desishon kompanianan di transporte marítimo, segun e rapòrt.
“Den un mundu ku preis di petroli riba 100 dollar, distansia ta kosta plaka,” asina e ekonomista prinsipal di CIBC, Jeff Rubin a bisa. Esaki sigur ta un preokupashon pa Kòrsou, ya ku mayoria di importashon for di eksterior ta bin for di Europa, Asia i Merka, tur distansianan ta basta leu.

CHETUMAL, Mexico – E mèksikano Oscar larios a sufri mas de la kuenta, pero el a kaba ta nòkout e kolombiano Feider Viloria den di sinku pa gana e korona interino pluma di Konseho Mundial djasabra.
Larios a bòltu e situashon i a para un sorprendente kolombiano Viloria, kende despues di a sali for di su “kueru di karné” i a bai guera, a kaba ta kai pa nòkout den komienso di kinto rònt.
Larios, favorito pa gana e pelea pa su trayekto largu, a sufri muchu mas di loke a spera, pues el a ser superá sigur den tres di e promé kuater rònt kompleto, pero el a kaba ta presentá e sorpresa riba e kolombiano na komienso di kinto rònt, kaminda el a nòkout e na di 24.
Den e di sinku rònt ei, despues di a hinka e “kafetero” den kabuya, a dal na diferente okashon den kara pa poné bèk den mal kondishon.
Mirando esaki, e rèfri Curtis Trasher, den loke a parse un intervenshon un poko purá (promé ku tempu), a para e akshonnan i, despues di a duda, a bolbe mira Viloria, despues di kua el a deklará e nòkout tékniko.
Sekòndenan promé ku e di sinku rònt a star, e tres wesnan, kendenan no a ser identifiká a duna karchi 37-39 (Viloria), 39-37 (Larios) i 38-38).
For di komienso dje pelea, tur dos a sali pa duna un espektákulo, ounke Viloria, te na komienso di kuarto rònt a saka mihó resultado, ku base di su mayor velosidat i táktika di wanta Chololo ku tenementu ora el a drenta distansia kòrtiku.

MIAMI, Florida, - Ayera 1 di yüni, e temporada di orkan di 2008 a kuminsá na Atlántiko.
Segun pronóstikonan di meteorólogonan di Sentro Nashonal di Orkan di Miami (CNH) posiblemente lo bai tin formashon di entre 6 pa 9 orkan (siklon) i entre 12 pa 16 tormenta tropikal, ku por kousa dañonan grave si nan mishi ku tera.
Durante e temporada siklóniko ta bai desaroyá 14 tormenta tropikal ku nòmber, di kua 6 lo bira orkan.
E temporada di orkan ta inisiá ofisialmente 1 di yüni i ta finalisá 30 di novèmber.
Gerry Bell, un di e ekspertonan den orkan di NOAA, a splika ku presensia di afektonan di “La Niña”, fenómeno klimátiko na zona ecuatorial di Pasífiko, ku ta hasi influensia riba formashon di orkan den Atlántiko, esaki ta un di e faktornan prinsipal den temporada 2008.
Un otro faktor ta “multi-dekada tropikal”, e kombinashon di kondishonnan atmosfériko ku e osean, ku ta produsí oumento den e aktividat siklóniko for di aña 1995.
For di dia ku tin rèkòrt di orkan, a opservá ku ta eksistí dékadanan durante kua tin hopi aktividat i otronan ku e aktividat ta abou di lo normal.
Esaki ta okurí kada 10 pa 20 aña.

Foto: Orkan 2008

Mavje, SIN Onderschrift

Kuantu hende muhé mas?
Kuantu hende muhé mas mester keda desabilitá òf mester pèrdè nan bida pa nos konsiensia komun lanta den komunidat ku algu mester pasa pa loke ta paramentu di abusunan doméstiko kontra di hende muhé?
Òf mester sigui skohe pa keda ketu, tur hende kómplise, hungando santu, miéntras ku hende muhénan individual ta sufri, turesten ku nan yunan ta keda mal programá ku ehèmpel di kon no mester atendé ku otro den bida.

E kasonan di abusu kontra di hende muhé ku ta bira konosí no ta mashá. Simplemente pasobra e hende muhé víktima sin ku e sa mes, lo ta sostené e hòmber ku ta humiliá, ofendé i maltrat’é, den un esfuerso straño pa no pèrdè kara.
No mester di sikiater pa bin splika ku e hende hòmber ku ta maltratá un hende muhé, sea físikamente, emoshonalmente òf mentalmente ta un abusadó!
Ku e ta un hende ku mester di tratamentu. I ku e ta hasiendo algu di kua ku e sa ku no por, ku ta un akto kriminal, kastigabel.
E sa, pasobra ta e ta rabia ora ku e hende muhé buska yudansa ku e meresé.
Un hòmber abusadó a skohe pa defendé su mes papiando malu di su kasá ku e mes ta víktimisá. El a kana konta masha hopi kos di e hende muhé. ‘Ku ta paso su kasá no ta trat’é bon’, ‘ku su kasá no sa kon trata é, ku ta su esposo’. I ku e hende muhé ta faya so. Turesten e hòmber abusadó no ta konta niun hende ku su kasá, mester traha pasobra e, hòmber abusadó, no tin sufisiente entrada pa kria su famia. Tampoko e ta konta ku el a kuminsá un relashon pafó di su matrimonio ku un otro hende muhé, kende na e momentu aki ta sperando un yu di dje.

WILLEMSTAD – Den 2008 tin basta enfoke tambe riba mehorá e resultado di e kompanianan di UTS den otro merkadonan. Na e momentunan aki e merkado di Sint Maarten ta esun ku ta kana bon i ta trese resultadonan positivo. Pa Hulanda i St. Kitts esaki ta bira un aña determinante. Desèmber 2007 a introdusí merkado Surinameño ku e kompania di telekomunikashon Uniqa. E kompania su resultadonan den 2008 ta premirá un resultado na fin di aña ku ta parse prometedor.
“Futuro di nos kompania ta mustra prometedor, maske kada dia nos ta enfrentá mas i mas kompetensia. Nos gerensia ta determiná pa bai e mia èkstra pa mantené un operashon rendabel i un futuro kaminda desaroyo ta garantisá. Nada di loke nos a logra no tabata posibel si nos no por a konta ku nos klientenan, koperashon di nos profeshonalnan den kompania, komprenshon di nos sindikato i konfiansa di nos Hunta di Komisario”, sr. Paul de Geus, direktor di UTS, a bisa.

WILLEMSTAD – Gerensia di UTS ta konsiderá ku e kompania ta riba pia despues di a registrá un ganashi di 11.6 den 2007. Ta promé bia den historia di UTS ku pa di dos aña siguí nos kompania di telekomunikashon United Telecommunication Services ta logra resultado positivo. Den 2007 e resultado final tabata 11.6 mion florin. Tambe ta di promé biaha ku ta logra aprobashon di Hunta di Komisario promé ku e fecha stipulá den statuto di e kompania. E resultado positivo aki ta danki na konfiansa di nos klientenan i Hunta di komisario di e kompania i trabou duru di nos empleadonan, asina Gerente General di e kompania Paul de Geus a informá awe.
De Geus a bisa ku ta intenshon pa inbertí e resultado positivo den infrastruktura, manera p.e. ret fibra óptiko, ku mester pèrkurá pa nos pueblo por ta garantisá di un infrastruktura optimal pa futuro. E resultado positivo den dos aña siguí, esta 2006 i 2007, ta indikashon ku UTS a logra e turn-around deseá i ta kla pa enfrentá futuro ku konfiansa i determinashon. E resultadonan definitivo di UTS riba 2007 ta pendiente aprobashon di akshonista di e kompania, esta Gobièrnunan.
E resultado final den 2007 ta ménos kompará ku e resultado lográ den 2006. Esaki ounke ku e resultado neto di operashon den 2007 ta mas tantu ku e resultado neto di operashon den 2007 (8.7 mion florin den 2007 kompará ku 5.3 mion florin den 2006). Esaki ta indiká por konsiderá ku UTS a logra stabilisá su posishon kompará ku añanan atras den kua e kompania tabatin pèrdida. E posishon mas favorabel ta bin despues ku basa riba e plan stratégiko a introdusí kambionan signifikativo den infrastruktura, teknologia i kultura di e kompania den 2006.

WILLEMSTAD – Próksimamente dia 12 di yüni lo tin un simposio organisá riba adikshon na Antia Ulandes. E simposio aki lo bai trata diferente tópiko relashoná ku adiskhon riba e islanan antiano. Sekretario di Salubridat Joan Berkel a hasi un invitashon na diferente instansia i personanan di e diferente islanan pa partisipá den e simposio grandi ku ta karga e nòmber di “Integratie in Transitie”. Den su karta di invitashon, e sekretario di Estado ta mustra, ku tin masha poko aserkamentu riba e tópiko aki i ku e ta kere ku ta momentu pa bin huntu i atendé e asuntu aki mas profundo.
A bin dilanti pa yega na un maneho pa tin e repartishon di tarea, pa mas evaluashon i mehorá e struktura i tambe e kalidat di maneho mester por yega huntu pa diskutí saneamentu riba e tópiko importante aki. E simposio aki ta keda organisá ku e pensamentu pa un proseso di transformashon den direkshon, pero tambe den aspektonan práktiko riba nazorg i tambe resosialisashon, prevenshon ku e diferente skakelnan di partisipashon di famia den komunidat. Esaki tambe ta inkluí skolnan.
Ku wowo riba futuro di desaroyonan riba Antia Ulandes den kua diferente entidat independiente ku ta di sumamente importante pa e kuido riba adikshon, ta vigilá for di tur huki di e islanan di Antia i karga e responsabilidat pa e manera ku esaki ta keda ehekutá. Den kuadro di koperashon ku ministerio di hustisia i ministerio di salubridat i desaroyo sosial riba djaweps 12 di yüni, lo bin huntu pa trata e aspektonan aki bou di e tema di “Integratie in Transitie” ku mester amplia riba e forma di organisashon den komunidat i maneho riba adikshon den su fasenan. Meta di e simposio ta, pa yega na mas maneho integral denter di un proseso di responsabilidat desentralisashon den kuido di adikshon.

WILLEMSTAD – E bishita evangelístiko na Ulanda di Norwin Josepa, kada biaha ta bira mas grandi. Resientemente den un bishita di dos siman por a realisá ku mas i mas e antianonan ta mustra e nesesidat spiritual. Durante e bishita di dos siman aki den kua e predikashinan ku a tuma lugá, tabata na vários kongregashonnan inkluso esun di Marantha Ministries na Amsterdam.
Entre e diferente presentashonnan, esun di Marantha Ministries tabata esun di mas reto pa pastor Norwin Josepa, ya ku ta trata di un kongregashon grandi i ku no ta fásilmente pa por prediká einan. Tabata djadumingu 18 di mei den e di dos sirbishi di e Marantha Ministries ku e oportunidat a presentá, sin ku e propio pastor Stanley Hofweis tabata konosé Norwin Josepa. Sinembargo un bon mensahe, ku inkluso pastor Hofweis a konfirmá komo un mensahe poderoso ku a keda tresé dilanti.
Riba e dia di sirbishi aki ku su mes palabranan, pastor Hofweis a duna di konosé na e kongregashon, ku nunka e no ta hasi algu manera a yega di tuma lugá, di por laga un predikado subi altar den e kongregashon i ministrá sin ku e konosé, òf tende e persona aki prediká un dia. E akto aki ta uni di fe i ku e por a konstatá, ku ta trata di un predikadó na kandela. Poniendo su mikrofon abou, a hasi un apelashon na e kongregashon grandi aki, pa duna e predikadó hóben aki un fuerte aplouso. Na final di e dia a hasi un súplika pa ki ora ku pastor Norwin Josepa ta na Ulanda pa pasa Marantha Ministries, ya ku esaki a bira su di dos kas.

NOTEN
Ruthsela Maria
Mihó konosí komo Sella
A laga atras su mama Lourdes Noten-Bishop, yunan Nailys, nessa, Wally Noten, ñeta Irona Noten, rumannan Ruthmila Noten, Turley Noten, Richinel Noten i Lupe Melfor. Akto di entiero ta tuma lugá djamars 3 di yüni na Ulanda.

ELEONORA
Irene Simona
Mihó konosí komo Zusje
A laga atras su yunan Sherlyn, Elbert, Norbert Eleonora, Rorenia Kimon-Pinedo, Roritza Pinedo, Irseline Monte-Eleonora. Akto di entiero ta djaweps 5 di yüni for di El Consolador pa santana Sta. Maria. Bishita 1or. Promé ku entiero tin un respòns na El Consolador 3.30or.

DE WINDT-MARTINA
Carmen Josefa (74 aña)
Mihó konosí komo Shonka
A laga atras su yunan Ethline i Edmundo Riley-de Windt, Ruthmila, Nickelson, Rishinel, Marien de Windt, Julian i Nury de Windt-Valorian, Anneliesje i Aquiles Holder-de Windt. Akto di entiero ta djarason 4 yüni for di misa Suffisant pa santana Sta. Rosa. Bishita 1or-4or. Promé ku entiero tin un respòns.

EUSTACIA
Vaneza Anamarie (30 aña)
A laga atras su mayornan Ezikiel i Ivette Eustacia-Schimidt, yu Aaliyah Vaes, partner Jo Vaes, ruman Urvin Eustacia, welanan Cecilia Salome, Mathilda Schmidt. Akto di entiero ta djarason 4 yüni for di El Consolador pa santana Sta. Maria. Bishita 1or-3.30or. Promé ku entiero tin un s.s. di misa 4or na misa Buena Vista.

PIETERNELLA
Mr. drs. Lorenzo Guillermo
Mihó konosí komo Lou òf Piet

Lorito ta yama tur hende un felis siman. Un siman ku nos ta spera ta trese hopi notisia positivo. Lorito ta preokupá ku oumentu di preis di produktonan petrolero i e impakto pa nos komunidat. Nos ta sinti ku no ta teniendo kuenta sufisiente ku e impakto aki pa nos ekonomia i prinsipalmente nos turismo. Tin diferente tema mas ku mester di atenshon, entre otro komportashon di nos hubentut.
****
Den fin di siman no tabata parse ku tabatin ousteridat na Kòrsou. Si bo mira kuantu hende tabata buska ko’i kome, anto lo bo bisa ku kos no ta malu. Na un restorant fast food tabatin asina tantu hende ta warda pa nan haña servisio paden i pafó, ku esei a stroba tráfiko. Kos ta malu bèrdè òf ta nos prioridatnan ta robes?
****
Nos a mira un hende na TV ta bisa ku malu kos a bira te ku e no por paga e tarifa di bùs mas. Un kos ku a resaltá ta ku e tin dos telefòn selular, un den kada man. Lorito ta pensa ku ora kos ta malu pa un hende, e no tin dos selular te pa e tin un den kada man. Ta e hende su prioridat ta robes i e kier baha su krítika i frustrashon riba otronan.
****
Nos a kunsumí den fin di siman ku e kolumna di Gerard Spong ku a sali den AD dia 9 último. Un kolumna sin pia ni kabes. E kos ku mas a konsumí nos tabata e reakshonnan ku tabatin riba e kolumna. Un hende a skibi asina aki. “De slavernij heeft ook positieve dingen opgeleverd. Het bracht de zwarten naar een hogere beschavingsniveau. Anders bleven ze maar bananen eten”. Ya bo sa kon e average ta pensa!