WILLEMSTAD – Den e kondishon aki e edifisio kaminda ántes tabatin Sundance tabata awe mainta. E edifisio mester bai sede pa konstrukshon di un proyekto grandi di hotèl ku lo kubri parti grandi e área di Koredor. (Foto: Norwin Josepa)

WILLEMSTAD, - Partidonan di koalishon no a logra forma kuorem pa e reunion públiko di ayera tardi, di manera ku gezaghebber a posponé e reunion en kuestion. No ta masha kla kiko ta bai pasa, mirando e nesesidat urgente pa atendé e proposishon di lei ku regla institushon di e Kolegio pa Supervishon Finansiero.
Ayera mèrdia 2’or Konseho Insular mester a reuní públikamente pa diskutí e asuntu aki.
Ta trata di e proposishon di lei ku ta regla funshonamentu di e Kolegio pa Supervishon Finansiero ku den futuro mester supervisá maneho finansiero riba e islanan. E lei, den forma di un “Algemene Maatregel van Rijksbestuur” mester pasa pa e proseso sigui kana ku Ulanda ta kuminsá ku saneamentu di debe nashonal di Antia.
Partidonan di oposishon ta totalmente kontra e intenshon aki. Manera LA PRENSA a informá anteriormente kaba, durante un konferensia di prensa e siman aki, partidonan di oposishon agrupá den Aliansa Patriótiko a manifestá nan rechaso pa e medida. E medida aki lo nifiká ku nos ta bai atras den nos outonomia, segun e partidonan ta argumentá.
Oposishon ta haña ku ta Ulanda ta bai haña tur kos di disidí. Segun lider di MAN Charles Cooper a bisa, e ta haña ku e konstelashon di e Kolegio pa Supervishon Finansiero so ta bisa tur kos kaba: e representashon di Ulanda ta dominante, el a bisa.
Errol Cova a papia palabra kla: un gobièrnu ku no por goberná, ku no por atendé problemanan di un pais i ku ta dispuesto di aseptá ku un otro ta yam’é inkapas, no por aseptá un medida asina’ki. Un gobièrnu asina mester bai kas, el a bisa.

WILLEMSTAD, - Direktiva di Fundashon Kas Popular finalmente no a pone miembronan di gerensia enkargá ku maneho finansiero di FKP, Henry Jourdain, riba non aktif. Loke si direktiva di FKP a pidi Jourdain ta un kantidat di informashon riba e maneho finansiero ku el a bin ta hiba último tempu, pa laga un eksperto finansiero kontrolá esaki.
Esei básikamente tabata resultado dje reunion ku a tuma lugá ayera entre direktiva di FKP – presidí pa diputado Anthony Godett – i Jourdain.
E reunion di ayera a parse mas tantu riba un anti klímaks di loke a bin ta sosodé último tempu.
Pa basta dia kaba diputado Godett den su kalidat di presidente di direktiva di FKP a bin ta manifestá su malkontentu ku funshonamentu di Fundashon Kas Popular.
FKP no ta trahando i produsiendo kas pa pueblo manera nos a spera di nan, asina e mandatario a bisa na diferente okashon den pasado. Banda di esei, tabatin e situashon kaminda a kuminsá ku vários proyekto, pero kaminda e kontratista a bati bankrut i e proyekto a keda na mitar. Esei ta e kaso na Rooi Santu, pero ta e kaso tambe na Johan van Walbeeckplein, kaminda diputado Godett kier a hasi un “regalu di San Nikolas” ku 14 famia, pero te awe e 14 kasnan no ta kla.
Banda di esaki a bin komo kulminashon un biahe ku Henry Jourdain a hasi pa Ulanda resientemente, huntu ku un otro kolega di dje, pa partisipá na un konferensia di akountent na Ulanda, sin ku nan tabatin aprobashon previo di direktiva di FKP.
Tur e kosnan a kondusí ku dado momentu diputado Godett a bisa públikamente ku gerensia di FKP no ta gosa di su konfiansa mas.

WILLEMSTAD - Den kuadro di e proyekto di informashon i konsientisashon tokante prostat i kanser di prostat di Prinses Wilhelmina Fonds, siman pasá diferente kas di Kòrsou por a risibí un foyeto ku informashon i splikashon tokante e tópiko prostat i kanser na prostat. E foyeto aki a keda repartí dor di Nieuwe Post N.A. i e intenshon ta, pa tur hende hòmber tuma nota di esaki. Kanser di Prostat ta un malesa ku ta afektá hende hòmber i ta importante pa tur hende hòmber riba 40 aña laga kontrolá nan prostat. Den e foyeto aki tin deskribí kiko ta un prostat i na unda e ta situá den e kurpa humano. Tambe e ta indiká algun di e síntomanan, ku un persona por sintí ora e tin problema ku prostat. Esakinan ta entre otro nesesidat pa oriná frekuentemente, prinsipalmente den oranan di anochi, difikultat pa uriná manera doló ora di uriná i urina no ke sali. Otro problema por ta un sensashon ku su blas semper ta yen i tambe sanger den urina. E teksto di foyeto ta den kuater idioma, esta papiamentu, hulandes, ingles i spañó. Na momentu ku un persona eksperensiá un òf mas di e síntomanan menshoná, ta bon pa e konsultá su dòkter di kas pa laga kontrolá su prostat.
Kanser na prostat ta un malesa silensioso, ku no ta duna muchu síntoma. Ta p’esei, den kuadro di prevenshon, ta sumamente importante pa un persona siña konosé su kurpa i paga tinu riba e señalnan ku su kurpa mes ta duna. Si bo sinti algun kambio straño no normal manera esnan deskribí ariba, laga hasi e kòntròlnan rutinario serka bo dòkter di kas. Kanser na Prostat por keda tratá basta diagnostiká esaki na tempu.

NEW YORK – E iPhone nobo ku hopi hende ta papiando di dje awor aki, lo bai ta disponibel promé ku All-Star Game i lo bai tin un karakterístika impreshonante, ademas di e manera konsekutivo i di “corporate e-mail” ku e 3G lo tin tambe Beisbòl ariba.
Major League Baseball Advanced Media a diseñá un aplikashon ku yama MLB At Bat, eksklusivamente pa e iPhone 3G ku a keda introdusí dor di Steve Jobs na Apple’s su WWDC Keynote na San Francisco.
Den un demostrashon a mustra ku un biaha mas e pasatiempo nashonal un biaha mas lo por yega e populashon grandi.
“Ta un bon ehèmpel di e popularidat di Beisbòl”, asina Adam Ritter di MLBAM a bisa.
“Bo ta bai haña video i highlights i bo por mira bo hungadónan faborito di Liga Grandi. Bo ta bai haña kalidat i e ta dos bes mas lihé i lo ta konektá riba wei-fi i ta mustra hopi bunita”, asina Ritter a sigui komentá.
E iPhone aki lo haña e highlightsnan for di MLB.com su Video Alerts infrastruktura momentu despues ku esaki pasa den e parke di Liga Grandi. E lo “bling” konstante pa tur hende ku tin un di e telefònnan aki, ku Apple ta bende kuminsando dia 11 di yüli awor pa 199 dollar pa esun 8GB i 299 dollar pa esun di 18 GB.
Apple ta planiá pa ofresé e telefòn aki den mas ku 70 pais mas lat e aña aki. E lo sali awor aki den 21 pais, ku ta ademas di Merka, inkluyendo Inglatera, Canada, Australia, Finlandia, Fransia, Alemania, Hapon i Suesia.

WILLEMSTAD - Plataforma Kòrsou na Trabou! ta buska hende ku ke traha den sektor di konstrukshon, hospitalidat, supermerkado, òf kompanianan di seguridat. Ta buska hende pa traha riba tur nivel, di trahadó i vakman, te na e nivel di middle-management i staf.
Personanan ku un diploma òf eksperensia den e tipo di trabou lo haña preferensia pa partisipá.
Buskadónan di trabou den konstrukshon, hospitalidat, supermerkado òf seguridat ta haña oportunidat pa solisitá riba vakaturanan durante e Job Fair ku ta tuma lugá djasabra 28 di yüni den Plaza Hotel. E partisipantenan ta obligá pa registrá delantá si nan ke partisipá na e Job Fair. Hóbennan ku a sali for di skol ku un diploma, i buskadónan di trabou ku eksperensia por tuma kontakto via telefòn ku DWI (Dienst Werk en Inkomen) telefòn 734-1814 (sra. Carolina) òf 734-1812 (sr. Nahr), òf 734-1862 (sra. Valentina). Via email tambe por registrá: info.dwi@curacao-gov.an òf por pasa na un di e ofisinanan di Ban Bario Bèk.
Organisashon di e Job Fair ta sosodé den koperashon estrecho ku Dienst Werk en Inkomen, Chata, AAV i Servisio pa Enseñansa (SAE). Miembronan di AAV i CHATA, asosashon di supermerkado i algun kompania di seguridat a haña e petishon pa entregá nan vakaturanan. Kuantu kupo di trabou ta disponibel no ta konosí ainda. Aña pasá ta tin alrededor di 100 vakatura i mas ku 250 kandidato a presentá durante Job Fair.

WILLEMSTAD - Djamars 17 di yüni 2008 no ménos ku tres abogado di e kantor di abogado VanEps Kunneman VanDoorne, ku ofisina na Kòrsou i Aruba, a huramentá dilanti di Korte di Hustisia di Antia Hulandes i Aruba.
Michiel Gorsira for di promé di mei a bolbe komo partner na e ofisina, despues di a biba dies aña na Hulanda. E ta spesialisá den derecho empresarial, derecho relashoná ku kasonan di bankarota, derecho di seguro, derecho di responsabilidat i pleitamentu di kaso den Korte.
Miriam den Boogert di 1999-2008 tabata den servisio di Intermark B.V. i Novagraaf Nederland B.V. den funshon di poderadó di marka. Aktualmente e ta aktivo den e práktika di derecho di marka di VanEps Kunneman VanDoorne.
Dorien Knegt a terminá su estudio di lei na Universidat di Amsterdam na 2007 i aktualmente e ta traha den e práktika di derecho general di VanEps Kunneman VanDoorne.
Ku e ekstenshon aki e kantor di VanEps Kunneman VanDoorne ta spera di por brinda su klientenan un servisio aun mas mihó.
Riba e pòrtrèt d.r.p.d. Miriam den Boogert, Dorien Knegt i Michiel Gorsira.

WILLEMSTAD - E aña aki atrobe Biblioteka Públiko ta organisá diferente aktividat en konekshon ku fakansiplan den luna di yüli. E fakansiplan ta kuminsá 7 di yüli i lo terminá 26 di yüli.
Lo tin diferente aktividat rondó di e tema “e mondi tropikal” pa muchanan di 4 pa 8 aña i di 9 pa 13 aña. Di teater di pòpchi, kuenta, pintamentu di kara, sine i wega di bingo ku premionan atraktivo. Bo a pèrdè e mainta di e mundu fasinante di abeha ku Tio Roy Lai? Den luna di yüli Biblioteka Públiko ta bini ku n’e atrobe. Pasa den sekshon hubenil i tuma e kalènder di aktividat òf wak riba nos wepsait www.bibliotekapubliko.an pa mas informashon.
Gustosamente Biblioteka Públiko ke invitá tambe tur lider di gruponan di fakansiplan na un atardi di informashon djamars awor 24 di yüni di 6’or pa 7’or den ouditorio, kaminda nos lo splika kiko ta e aktividatnan ku Biblioteka tin di ofresé. Alabes tin e oportunidat pa inskribí Bo(so) grupo mesora. Biblioteka Públiko ta apresiá si Bo(so) por konfirmá Bo(so) presensia via telefòn 434 5226 òf via mail marvita2@yahoo.com.

WILLEMSTAD -- Djadumingu awor, 22 di yüni fundashon Sinta Ros lo tin un dia di informashon tokante di kanser di Pechu. E fundashon ku a lanta aña pasá pa duna hendenan muhé informashon i guia pa ku Kanser di Pechu, su meta pa e dia aki ta pa sigui konsientisá hende muhé tokante detekshon tempran di kanser na pechu.
Oradornan riba e dia aki lo ta Drs. D. Scheper i Drs. J. Capello. Ademas lo tin presentashon di un dietista, fisioterapista, sikólogo, testimonio di un sobrebibiente di kanser na pechu, i demostrashon di prótesis. Tambe lo tin presentashon kon pa lusi i sinti bon ora bo tin kanser. Por saboriá platonan vegetariano i djus di fruta di Kòrsou.
Bin ku bo famia, amiga i bisiña. E dia informativo aki lo tuma lugá na Hòfi Rust & Burg riba djadumingu 22 di yüni di 10:00 or di mainta te 3:00 or di atardi i entrada ta kompletamente grátis. Tur presentashon lo ta na papiamentu!
Pa mas informashon por tuma kontakto ku Angeline de Ron na telefòn 511-3992 òf via di e-mail: angeline@sintaros.com òf ku Martha Gillen na 527-8956 òf via e-mail na martha@sintaros.com.

WILLEMSTAD / DEN HAAG – Outomobilistanan ku selebrá i bebe alkohòl kada bia ku Hulanda gana un partido, ta drenta nan vehíkulo bebé i stür bai kas. Akí na Kòrsou polis no ta tene ningun kòntròl di tráfiko, ounke ta konosí ku ta hopi bebementu di alkohòl tin durante i despues di e weganan.
E grupo grandi di fanátiko di e tim di futbòl hulandes, ku aktualmente ta na Suisa, ta partisipá na un kampaña kontra alkohòl tras di stür. E kampaña ta pa evitá ku esnan ku bebe ta stür despues di e partidonan. Pa hasi e kampaña atraktivo, Ministerie van Verkeer en Waterstaat i Veilig Verkeer Nederland a introdusí e ‘BlaasBobgame’. Riba e kampamentu di e hulandesnan na Interlaken, dos tim di futbòl ku ta konsistí di hulandesnan konosí, a hunga e promé partido. Bou di presensia di hopi fanátiko di e tim di Hulanda i bou di e lema ‘Laga Bob supla’, e kampaña a inisiá. E meta di e kampaña ta pa pone énfasis ku promé ku e partido kuminsá i e fiesta sigui, mester palabrá ku otro ken ta bira Bob. Esaki ta pone ku durante kòntròlnan di tráfiko despues di e weganan di futbòl, e Bob por supla sin problema.
E ‘BlaasBobgame’ akí aktualmente ta presente tambe tur kaminda na Hulanda durante partidonan di futbòl. No opstante e kolonia grandi di hulandes Oropeo ku ta biba na Kòrsou, niun organisashon no a tuma ningun medida di prevenshon pa avisá kontra e peligernan di stür bou di influensia di alkohòl. Afortunadamente nada partikular no a pasa te na e momentunan akí. Pero si tuma na konsiderashon e maneho nobo di gobièrnu pa un tráfiko sigur duradero, kaminda prevenshon ta e punto di lansa, ta remarkabel ku ni gobièrnu ni polis, ni niun otro organisashon ku ta propagá tráfiko sigur, a lansa un kampaña.

WILLEMSTAD / ORANJESTAD – Ministerio Públiko di Aruba ta kuminsá kobra tur but djaluna awor. Esun ku no kumpli ku e pago tin ku bai sinta su kastigu supsidiario den KIA.
Pa medio di un komunikado Ministerio Públiko a informá komunidat arubano di e kampaña. E entidat a splika ku ta su tarea pa ehekutá sentensianan di wes. Den kaso ku un persona keda sin paga su but, e tin ku kumpli ku e dianan den prizòn ku wes a menshoná den su sentensia.
Ministerio Públiko a urgí públiko pa paga e multanan ku tin pendiente mas lihé posibel, ya ku djaluna awor e akshonnan ta kuminsá. Segun Ministerio Públiko di Aruba, e akshon di kobramentu di but lo no ta pa un periodo so, sino lo dura henter aña.

Kòrsou

Akí na Kòrsou tambe tin un gran kantidat di but ku no ta pagá. Sinembargo te ainda no tabatin un akshon dirigí pa kobra nan. Algun aña pasá Ministerio Públiko a monta un akshon riba Fokkerweg, kaminda a kontrolá ken tabatin un but ku mester a paga ainda. Na e okashon ei a bai ku diferente fiskal i atministradónan di O.M. i a detené algun hende ku tabatin but ku nan mester a paga. Na e sitio mes nan por a regla e pago, miéntras esnan ku no tabatin sufisiente sèn huntu ku nan, por a yama nan famia pa trese sèn pa nan. Tabatin hende ku no a logra paga e but na e momentu ei i mester a bai warda di polis pendiente pa sera e sèn di e but.
Despues di e akshon dirigí akí di algun aña pasá, nunka mas Ministerio Públiko no a ripití esaki.

WILLEMSTAD – Kuerpo Polisial ta pidi tur hende pa yuda identifiká algun pertenensia ku personal di e Tim di Atrako a haña den besindario di Oosterbeekstraat kaminda un atrako a tuma lugá djarason último.
Ta trata di 1 pèchi, 2 renchi di orea di briante, i trùi i 1 machete. Polis ta sospechá ku e artíkulonan akí ta pertenesé na e atrakadó ku a tira e dama empleado di e kantor di number. Polis ta pidi tur hende ku rekonosé algu di e pertinensianan akí pa yama 433.1501, 4331502, 433.1516/17/18/19/20 òf 108.

WILLEMSTAD – Mas i mas área di konservashon ta bou di preshon pa desaroyo, prinsipalmente den ambiente turístiko. Te ainda no tin klaridat por ehèmpel ki status lo bai duna Ostpùnt. Te awe e kaso no a konkluí. Resientemente tabatin menshon di e kaso na Jeremi ku tambe ta kai bou di protekshon di EOP. LA PRENSA tin entendí ku tin mas área ku ta bou di preshon pa motibu ku desaroyadónan ta buskando e áreanan ku ta mas atraktivo i por lo general tur e áreanan aki ta protehá den kuadro di EOP. Te mas leu ku gobièrnu ke bai ta un modelo den kua e desaroyadónan di e proyekto ta tene kuenta ku e balansa natural ku mester tin den e área aki. E siman aki a sali un aviso di DROV, firmá pa su hefe Reinout Karsdorp, ku mester bai trese kambionan den e plan di desaroyo di Kòrsou (EOP) pa loke ta trata e área di Jan Thiel. Kardsorp a anunsiá ku kuminsando e siman aki te dia 2 di yüli awor por tuma nota di e kambionan relashoná ku destinashon di e área di Jan Thiel ku e idea pa hasi e área unu di Turismo. Esnan ku no ta di akuerdo por entregá un opheshon na Bestuurscollege.
Amigu di Tera a bai wak e plannan i ta den desakuerdo ku nan. Esmas, e organisashon ta atvertí pa e desaroyonan. Segun presidente di e organisashon, Yvette Raveneau, gobièrnu ke regalá Jan Thiel Bay Destination Resort un parti di área di naturalesa di Jan Thiel pa konstrukshon di hotèl. “Ta trata di un área entre binnenwater di Jan Thiel i kosta, un di e poko áreanan di nos isla ku ofisialmente a keda deklará área di naturalesa (Conserveringsgebied). Por mira e kambio i por desaprobá tal desishon (apelá) na DROV te ku 2 di yüli. Tin mas ku bastante tereno nominá pa desaroyo di turismo, pero gobièrnu, huntu ku un par di desaroyadó no konosé límite i kuesta loke kuesta ke kaba ku naturalesa di Kòrsou ku ta pertenesé na un i tur. Esaki, poko poko ta sosodé ku henter e área di Jan Thiel. Dos aña pasá e diputado di planifikashon a sigurá nos ku e proyekto di Hyatt lo no kousa daño na naturalesa. Awe nos por mira ku e proyekto ta hasiendo daño, entre otro kitando palunan di mangel na Spaanse Water. Ta mentira gobièrnu ta plama òf t’asina ku representando nos komunidat e no tin grep riba desaroyadónan? Talbes ta tur dos ta e kaso? Ta asina’ki ta fortalesé un desaroyadó di proyekto i hasié bai asina leu di eksihí un tereno ku pa lei ta destiná pa naturalesa”, asina sra. Raveneau a puntra.

WILLEMSTAD – Awe nochi lo tin e tradishonal entrega di sertifikado na Universidat Nashonal di Antia. Rector Magnificus dr. Jeanne de Bruijne a bisa ku 165 studiante lo haña nan sertifikado awe den diferente ramo. Di fakultat hurídiko 23 lo haña nan sertifikado, Fakultat General 35, Fakultat Soshal-ekonómiko 32, Fakultat Tékniko 36 i Curises 39. E aktividat ta kuminsá awe tardi mitar di 7 i ta pa invitadonan.
Miéntras tantu a surgi un diskushon pisá entre UNA di un banda i Curises di otro banda. UNA ta deseá pa entrante e aña akadémiko nobo tur aktividat di Curises pasa pa UNA. Konseho di Supervishon di UNA a tuma un desishon den e sentido aki dia 26 di mei último. UNA a disidí ku e no ta mira espasio mas pa koperá ku Curises, awor ku Curises kier kambia su struktura di tal manera ku UNA no tin ningun outoridat mas den Curises.
Konsekuentemente UNA ta haña ku e no por laga Curises sigui duna sertifikado di UNA.
Ayera a trata di haña e partidonan na mesa, pero esei no a logra. UNA a pidi Curises pa reakshoná pa mas tardá dia 27 di yüni awor riba su proposishon pa pone e kursonan di Curises bou di kapa di UNA.

WILLEMSTAD – Kòrsou no por pèrmití mal publisidat ku kasonan di kriminalidat. Asina presidente di CHATA Jeannette Bonet a bisa ayera na un enkuentro ku prensa kaminda a duna informashon riba e desaroyonan turístiko. Sra. Bonet a bisa ku seguridat ta un preokupashon mayó pa sektor di turismo. Ta ku masha tristesa e sektor a tuma nota di asesinato di e doño di restorant Pim Timmermans. “Kòrsou no por pèrmití mal publisidat riba seguridat ku ta prioridat number 1 di nos bishitantenan. Pa aña sektor di turismo ta pagando miónes di florin na seguridat privá pa asina kompletá e trabounan di sektor públiko. Nos ta hasi un petishon na outoridatnan pa nan sigui ku atenshon na aspektonan di seguridat riba nos isla”, asina sra. Bonet a bisa.
Durante e enkuentro ku prensa ayera miembronan di direktiva di CHATA a duna informashon riba desaroyo di turismo. Sifranan ta demostrá ku e kresementu ta sigui ku fòrsa, anke tin diferente reto. Un di nan ta e fondonan pa merkadeo ku gobièrnu kier kòrta na CTB. Un otro punto ku mester di atenshon ta introdukshon di un belasting spesial pa buelonan for di Ulanda di 45 euro pa tur destinashon den eksterior, inkluyendo Kòrsou. A pidi Ulanda rekonsiderá e desishon, asina Billy Jonckheer a bisa. Segun Jonckheer, e medida aki lo no tin impakto riba turismo so pero tambe riba tráfiko ètniko sosial entre Ulanda i Antia i vise vèrsa.
Un enkuesta den merkado ulandes a demostrá ku Kòrsou ta sigui ta e merkado mas prinsipal pa destinashonnan leu di turismo. Un enkuesta di e kompania NIPO a demostrá ku ainda tin chèns pa mas kresementu den e próksimo añanan. E enkuesta a determiná ku mas o ménos 750 mil hende ta konsiderando pa bishitá Kòrsou den próksimo 3 aña.

Prof. dr. Lorito ta yama tur hende un felis djabièrnè. Awa a kai un tiki spanta nos, pasobra nos alanan no tabata masha prepará pa áwaseru anto riba un djabièrnè.
****
Ayera ya kaba Lorito a spanta na momentu ku nos zeta di brek a kaba. Esei a pone ku nos no por a brek den laira. Lorito di edat ta subi ata zeta di brek tambe ta baha!
****
Un saludo pa Don Elis. Awe mainta nos a papia ku Elis i el a bisa nos ku el a kuminsá sinti e efektonan di bira grandi. No ta wega, asina el a bisa nos. E kos mas remarkabel ta ku Elis su kapasidat mental tei kompleto. Ora bo tend’é na telefòn, e ta zona asina hóben i vital. Elis tin un lugá apart den nos kurason!
****
Por sierto ku Elis a haña un Zilveren Anjer. Nos a bai wak ayera si e mes a bai tuma su distinshon prestigioso for di La Reina ku ta entregá e premio na nòmber di su tata defuntu, pero Elis no tabat’ei. Elis a bisa ku e ta muchu grandi pa hasi un buelo di 9 ora. A palabrá ku dia 5 di sèptèmber awor e lo haña su premio na Kòrsou. Kòrda riba e invitashon pa Lorito!
****
Un pabien na Joel ku a kumpli aña e siman aki. Joel a haña un regalu ku e no a spera sintá den outo di polis. Lorito ta kere ku outoridat mester atendé tur kaso, pero a keda un poko straño ku den e situashon ku nos ta (ku un asesinato i un intento di asesinato ku arma) ku ta saka tantu polis pa e tipo di kòntròlnan aki. Nos a bisa kaba: nos prioridatnan ta robes.

WILLEMSTAD - E Asosashon di Desalinashon di Caribe, (CaribDA), a keda ofisialmente instalá riba 5 di yüni 2008 aki na Kòrsou.
Aqualectra responsabel pa produkshon i distribushon di awa i koriente tabata anfitrion di e evento aki.
E seremonia di apertura a konta ku diskurso di entre otro señores Humphrey Gouverneur, presidente di CaribDA i Randy Truby, Tesorero di International Desalination Association, IDA.
Señor Randy Truby a traspasá un mensahe personal di sosten i felisitashon di señora Lisa Henthorne, Presidente di IDA.
Apertura ofisial di e konferensia tabata na enkargo di gobernador di Antia, Su Ekselensia Mr. Frits Goedgedrag.
E programa di e konferensia ku a inkluí diferente oradó den e sektor di industria di produkshon di awa a keda altamente apresiá pa e partisipantenan. Señor James Stewart a duna un relato intensivo i interesante di e eksperensia di 80 aña ku e sistema “thermal desalting” komo esun di “membrane desalting”. El a enfatisá ku diferente inovashon den desalinashon a ser lográ den Caribe i e region a hiba e liderazgo teknológiko riba e tereno aki.
Tur partisipante a risibí na final di e Konferensia un buki konmemorativo di 144 página konteniendo e prosedura i proseso di 80 aña di desalinashon.
Tambe tabatin un ekshibishon kaminda 13 empresa a ekshibí nan produkto i servisionan relashoná ku e industria di desaliná awa. E spònsernan prinsipal tabata Aqualectra, Doosan, Veolia i General Electric.

WILLEMSTAD –Proyekto di 350 kamber di hotèl di Alfredo Lowenstein a keda aprobá unánimamente den reunion di Konseho Insular ayera mainta. E hotèl aki lo bai ta na altura di Zaquito for di kaminda tabata Sundance kontra e área di Piscadera. E proyekto aki lo bai kubri e altura di Koredor kaminda tin hopi hende ta praktiká e deporte di kanamentu.
Den kòmbersashon ku diputado Anthony Godett a konfirmá e loke algun siman pasá LA PRENSA a trese den publisidat di e hotèl di 350 kamber. E proyekto aki a nase na momentu ku e kompania ku na 1995 tabatin palabrashon ku gobièrnu pa desaroyá e área, pero ku hustamente riba e dia pa pasa e akta, e kompania Caribbean Apartment Services (CAS) a bati bankarota.
RBTT ku tabata e banko manera nan ta bisa ‘hypotheekhouder’ a aserká e kadena di Alfredo Lowenstein pa mira si tin interes den e área aki. Di e manera aki kòmbersashon entre gobièrnu i grupo Lowenstein a kuminsá i ku a trata su proyekto den Komishon Sentral. I ta abase di informashonnan den Komishon Sentral miembronan di Konseho Insular a bai di akuerdo ku e proyekto di Lowenstein.
Mester a tuma desishon pa kita e debe ku CAS tabatin riba e erfpacht di 7 mion florin i pasa e tereno aki pa Grupo Lowenstein pa desaroyá dos hotèl pa un total di 350 kamber. E proyekto aki lo mester kumpli ku 350 kupo di trabou, di kua 70% mester ta trahadó lokal, 20% trahadónan stranhero ku ta residensiá na Kòrsou i ku tin 5 aña di interupshon. E 10% ta pèrmití stranheronan pa okupá puestonan den gerensia.

WILLEMSTAD – Renobashon di e kompleho fúnebre di El Tributo ta yegando su fase final i por spera ku den luna di yüli ya por hasi uso di e fasilidat nobo aki. Un fasilidat ku lo bai ofresé e klientenan mas servisio i ku pakete amplio di posibilidatnan. E parti di infrastruktura na e momentu aki ta haña e atenshon, ya ku ta krea un ambiente di plantashon pa un teras fresku, kontrali na e kalor ku unu lo por tabata sinti den pasado.
Den kòmbersashon ku gerente di El Tributo, Haidel Haile, ta splika LA PRENSA di ta kontentu pa e forma ku e trabounan a avansá i ta spera ku den yüli próksimo lo por selebrá apertura di e kompleho kompletamente renobá.
Segun Haile ta konta, e proyekto aki inisialmente a mustra di ta mei mion florin, pero debí na kambionan ku a presentá esaki ya ta riba 1 mion florin na gastunan. E sala ku a keda renobá ta ku intenshon pa hasi e servisio ku El Tributo lo bai duna den futuro muchu mas agradabel pa e famianan i tur esnan ku lo bishitá.
Haile ta konta ku e sala aki lo keda bon ekipá ku e sistemanan mas moderno di sonido, meskos tambe posibilidat pa pasa video òf reportahe fotográfiko di e defuntu durante risibimentu di kondolensia.
E sala ku a keda renobá no a keda ampliá, pero si a bira mas kómodo ku tur loke tin mester pa duna e servisio ku a primintí na e klientenan. E kambionan radikal ta ku sigur lo no ta un sala ku niun di e kompetidónan tin di loke mester ta awendia. Banda di esaki sin duda lo introdusí algun produkto nobo, di kua lo keda menshoná despues. E interior a konosé un ‘facelift’ kompleto pa duna e hospitalidat den e pensamentu nobo ku El Tributo tin. No opstante ku ta entiero, mester krea un ambiente agradabel pa sirbi e famianan mas mihó i e bishitantenan tambe mester sinti nan mes bon.

Skina di Sorti, awe djabièrnè 20 di yüni di 2008, ta kuminsá ku deseá tur hende un bon dia. Si bo wak e akshonamentu polítiko di tantu partidonan ku ta den oposishon komo esnan ku ta forma parti di koalishon den kuadro di lokual mi a denominá komo mehoramentu di nan posishon ante e blòknan di influensia den polítika lokal (1.elektorado, 2.fasilitadornan, 3.mobilisadornan no polítiko, 4.rivalnan polítiko i 5.potensial partidonan nobo), e falta di direkshon for di e respektivo partidonan ta resaltá.
E sentido di e aliansa di partidonan di oposishon (ku eksepshon di DP), por ehèmpel mester ta basa riba un desviashon den rasonamentu. Kual ta e benefisio ku por ehèmpel un MAN ta kere di haña for di PS i NPA? Kaminda tin poko sosten di masa i pa kolmo e tendensia ta unu di kaida di sosten, e benefisio por ta di parti di PS i NPA i no di MAN i FK. Kiko un lider polítiko manera mr Nelson Navarro (artikulá i respetuoso) tin di gana for di lidernan ku ta profilá ku agreshon verbal kontra oponente i no polítiko?
Kiko un partido manera MAN, ku ta disponé di kompetensia gubernamental, eksperiensha polítiko, kapasidat profeshonal i kuenka di votador tradishonal, tin di gana for di partidonan ku virtualmente nada di “bestuurlijk kader”, ku pa definishon ta wòrdu identifiká komo opositor enbes di un alternativa di gobernashon? E riesgonan pa tantu FK komo MAN ta abundante miéntras ku e motibu pa kual a kombiná forsa físiko (mobilisashon kontra di e proseso estatal) no tin sosten di e masa.