ORANJESTAD- Sra. Odette Wanga cliente di SETAR di tanto telefon cellular, di cas como DSL, no por a kere cu e ta bira otro ganador di SETAR cu ta bai haya oportunidad di shop pa un minuut den un supermercado.
Esey ta net loke a sosode diasabra ultimo na unda cu e y su partner Dave Lacle a core duro y den 1 minuut di tempo a yena dos garoshi yen di cuminda y articulonan di cas na SUPERFOOD. Tur esakinan nan a ricibi como regalo di SETAR den cuadro di e celebracion di 5 aña NV.
Si bo ta un cliente di cualkier servicio di SETAR anto bo por wordo sorpresa tur fin di luna mescos cu e cliente Odette Wanga cu a haya e chens hunto cu partner pa haci e compra di luna den un tempo record y completamente gratis.
E sorteo special aki SETAR a introduci como parti di un di e premionan sorpresa pa tur e clientenan cu a sostene e compania nacional SETAR N.V. y cu den e forma aki ta bisa danki bek.
Na momento cu e cliente gana e sorteo, e ta wordo yama y ta haci un cita cu ne na un di e supermercadonan na Aruba. Aki e cliente ta haya net 1 minuut pa e core pone tur articulo cu e ta desea den e garoshi.
E sorteo aki ta un bes pa luna y e cliente ta topa e representantenan di SETAR na e supermercado acorda na unda e por yena su garoshi rapidamente cu tur loke e tin mester. E maximo na e total di productonan cu ta bai den e garoshi ta Awg. 1000.
Odette Wanga cliente di SETAR di e bario di Pos Chiquito a keda sumamente contento cu su premio y a participa yen di animo cu su partner mientras cu otro miembronan di su famia cu a bin supermercado SUPERFOOD pa apoya e pareha ganador tabata den full ambiente di e actividad.

ORANJESTAD- Diabierna mainta Minister President sr. Nelson Oduber a ricibi bishita di un delegacion di Solid Air cu ta un compania di jet priva na Hulanda.
E delegacion tabata encabeza pa su Director sr. Huub van den Hout, hunto cu nan abogado Arlene Ellis-Schipper.
Manera ta conoci pais Aruba tin un Fixed Based Operation (FBO), maneha door di General Universal Aviation. Mirando e hecho cu recientemente Aruba a sera un acuerdo relaciona cu extension di US Customs & Pre clearance, e compania Solid Air a mustra su interes pa bin Aruba cu jetnan chikito y p’asina duna servicio pa e region aki y tambe transporte di pasahero pa Merca.
Gobierno di Aruba a mustra su disponibilidad y interes pa concretisacion di e proyecto aki y si tur cos bay bon, na September proximo e compania aki lo cuminsa cu su operacionnan na Aruba.

A haci entrega di recuerdo na Minister di Turismo y Directora di Oficina di Turismo

ORANJESTAD- En conneccion cu e celebracion di 15 anja di existencia di Aruba Reef Care Project a haci entrega di un recuerdo na Minister di Turismo y Transporte Sr. Edison Briesen y tambe serca Directora di Aruba Tourism Authority Sra. Myrna Jansen. Sr. Castro Perez, organisador y tambe den nomber di comision di ARCP, a expresa su gratitud pa tur e apoyo di Ministro di Turismo y Directora di Oficina di Turismo, pa nan por a sigi cu e trabownan di conscientisa e scolnan y tambe comunidad di Aruba en general.
Alavez a recorda e hecho cu 15 anja pasa Minister Edison Briesen tabata e promer gobernante cu ricibi e promer poster na inicio di e campaña.
Nos ta invita henter e comunidad di Aruba pa participa activamente na Aruba Reef Care Project su accion di limpiesa cu ta planea dia 5 y 6 di Juli, 2008.
Ariba e foto por aprecia di robez pa drechi Sr. Rayon Koolman, Project Coordinator, Sr. Castro Perez, Organisador, y Sr. Edison Briesen, Ministro di Turismo. Ariba otro Sr. Castro Perez ta entrega un recuerdo na Sr. Myrna Jansen, Directora di Oficina di Turismo y tabata den compania di su demas coleganan.

ORANJESTAD- Desde 3 di October te cu dia 24 di October proximo lo tin den Biblioteca Nacional un Exposicion den cuadro di e celebracion di 50 aña Hubileo di Diocesis Willemstad na Aruba.
Pa tal exposicion tin mester di potretnan, articulonan di corant y revista, tur otro material y informacion cu ta expresa momentonan historico den tur Parokia Catolico na Aruba den e periodo 1958 – 2008.
Di tur potret lo wordo saca copia y e original lo wordo entrega bek mesora na su doño. Tur articulo ta wordo numera y e doño ta ricibi un comprobante cu cual e lo ricibi e articulo bek despues di e Exposicion.
E organisacion ta den man di un comision cu ta consisti di Noris van Lis-Donata di parokia di Noord, Gina Berkley-Arends di parokia di Playa y Irais Sankatsing-Nava di Biblioteca Nacional.
E fecha final pa entrega material pa e Exposicion di Hubileo ta dia 1 augustus 2008.
Tur material ta wordo entrega na Biblioteca Nacional na Departamento di Arubiana na un di e siguiente personanan: Irais Sankatsing of Betty Goeloe na telefon 582 1580.
E presidente di e Comision Central di Hubileo, vicario episcopal pastor Daniel Szpila y e vice presidente pastor Santiago ta pidi tur parokianonan na Aruba pa contribui cu material historico na e Exposicion aki. Cada contribucion ta wordo altamente aprecia.

E ta completamente di acuerdo cu ponencianan di AVP pa cu energia alternativo

ORANJESTAD- Miembronan di fraccion di AVP presente na Hulanda pa e reunion tripartidario a probecha e ocasion y a reuni cu e compania Delta cu ta esun cu tabata e encarga cu e proyecto di mulinanan di biento na Corsow.
Parlamentario di AVP Mike de Meza, comentando riba e reunion aki cu su coleganan na Hulanda tabatin, a indica cu esaki ta un muestra mas cu e partido berde ta poniendo tur atencion posibel na e buskeda di diferente opcionnan di energia alternativo pa nos isla.
Segun de Meza e compania Delta a mustra di ta completamente di acuerdo cu e ponencianan di AVP pa cu e posibilidadnan di energia alternativo. E compania aki a indica cu Aruba ta privilegia di por conta cu solo y biento cu ta dos fuente tremendo di energia alternativo.
Aki nan ta referi na mulinanan di biento y panelnan di solo.
Tanto Delta como fraccion di AVP ta considera cu mester bin cu un ley cu ta indica cu na momento cu produci mas energia pa medionan alternativo esaki por bai riba e sistema di Elmar.
Na Hulanda y diferente otro paisnan Parlamento ta esun cu a pasa e ley aki, los di e companianan di ultilidad. Despues e companianan di utilidad mester a adapta nan mes na esaki. Mike de Meza ta indica cu contrario na loke por a pensa, e cambio aki no a perhudica e companianan di utilidad y mas bien a ponenan traha den un forma mas eficiente.
Na momento cu e delegacion di AVP yega for di Hulanda lo cuminsa traha riba un concepto di ley pa por logra haci esaki na Aruba tambe.

WILLEMSTAD – Dos kas di palu a kima awe mainta na altura di Pòst 5. Debí ku e kasnan tabata situá kantu di kaminda grandi polis mester a sera e parti ei di Schottegatweg Wèst pa asina bomberonan por a hasi nan trabou. E kasnan no tabata habitá.
E dos kasnan di palu tabata situá nèt enfrente di Pòst 5 riba un distansia di algun meter for di otro. Polis no tin un idea kon bin e kasnan a pega kandela.
Bisiñanan a bisa polis ku e kasnan no tabata habitá.
Ounke tabata trata di dos kas di palu chikí, e molèster kousá pa tráfiko tòg tabata sufisiente grandi. Mester a sera e parti drechi di kaminda di Schottegatweg Wèst pa motibunan di seguridat. A desviá tur outomobilista via di un ruta alternativo, pa asina bomberonan por a paga e kandela.

WILLEMSTAD - E di tres torneo Hubenil di Ranking ku Curaçao Lawn Tennis Bond (CLTB) a organisá den wikènt tras di lomba tambe a resultá un éksito kompleto.
E hóben tènistanan a ofresé e públiko amante dje deporte aki enkuentronan hopi interesante riba kanchanan di Racing Club Curaçao (RCC) na Mon Repos.
Komishon Hubenil di CLTB por mira atras atrobe riba un kompetensia ku partisipashon di mas ku 70 hóben.
Pa ta mas spesífiko, 79 hóben a inskribí pa kompetí den e Terser Torneo Hubenil di Ranking.
Meskos ku den e promé i di dos torneo, den e di tres edishon tambe e tènistanan a keda repartí den kuater kategoria di edat, esta 18 aña i mas hóben, 16 aña i mas hóben, 12 aña i mas hóben i 10 aña i mas hóben.
Den tur e gruponan aki e hóbennan a hunga den pul, miéntras ku e dos hungadónan ku mas tantu punto den kada pul a pasa pa hunga den e ‘main draw’.
E final den e kategoria mucha hòmber 18 aña i mas hóben a bai entre Justin Tjon i Josuë Matos de Leon.
E enkuentro final aki a bai dos set.
E hungadó Tjon un biaha mas a sali viktorioso ku e siguiente skor 6-4 i 6-2 i asina titulá kampion den e grupo di edat aki.
Serka e damitanan 18 aña i mas hóben tabata Quiomy Hennep i Scarlett Stins ku a enfrentá otro den un tremendo final.
E wega aki a bai tres sèt ku Hennep tèrminando komo kampion.

Skina di Sorti, awe djaluna 23 di juni di 2008 ta deseá tur hende un bon siman. Den nos práktika polítiko, bo ta mira hopi akshonamentu ku ta paresido na un hungadó di bala ku ta asina asfiksiá ku su konfrontashon ku un eventual kontrinkante direkto, ku e ta pèrdè for di bista ku e ophetivo ta keda, di logra komo ekipo di penetrá e gol dje kontra partida i tene e propio gol limpi. Peso eksagerá pa e rivalidat polítiko (tur sorto di táktika pa stroba e kontrinkante) i virtual ignoransha di e aspekto gubernamental (atendé ku e realidatnan di pais).
Ta p’esei tambe, irespekto e tema ku ta na órden, tantu koalishon komo oposishon, ta rekurí na e despresiabel táktika di keda sin forma korum. Ku esei ámbos ta mustra un despresio reprochabel pa un di e fundamental instrumentonan dje sistema di gobernashon demokrátiko, ku ta e debate (“het parlamentair debat”). E lokual antes tabata sirbi komo plataforma pa konfrontashon di idea pa atendé ku asuntunan di pais, ni sikiera pa rèspèt pa e instituto demokrátiko ta wòrdu opstakulisá pa funshoná.
Kon mas por ilustrá e falta di konosementu i rèspèt pa e sistema di gobernashon demokrátiko. Nunka ántes den historia di nos demokrasia, miembronan di kuerponan representativo no a rekurí i sigur no ku e frekuensia ku kual e ta sosodé awor aki, na e táktika repudiabel di bòikotiá funshonamentu di e instituto ku ta sòru pa e status sosial ku nan ta gosa di dje. “Politieke onmacht” den optima forma.

WILLEMSTAD – Último tempu tin basta diskushon relashoná ku e asina yamá “Vlieg Tax” di 45 euro ku Gobièrnu di Ulanda ta bai introdusí entrante 1 di yüli. Esaki ta bai konta tambe pa Antia i Aruba, apesar ku paisnan ku no ta den Reino manera entre otro Turkia i Islanan Canaria si tin eksonerashon. Manera ta konosí tambe tantu minister di Tráfiko i Telekomunikashon di Antia i di Aruba a oponé fuertemente kontra e medida aki.
Algun Miembro di Tweede Kamer a tuma nota di e preokupashonnan ku a surgi ku e impuesto aki i mesora a hasi algun pregunta na Minister di Finansa di Ulanda, Wouter Bos. Tur e miembronan aki, Omtzigt, Van Bochove i Haverkamp, tur ta di e partido CDA.
Riba e kontestanan di e miembronan aki, Bos ta bisa ku e ta na altura ku tin un pensamentu ku e impuesto aki ta inhustu pa e islanan den Reino. E ta splika ku tur destinashon den Union Europeo ta kai bou di e tarifa redusí di 11,25 euro ku eksepshon di teritorionan ultraperefériko. “Si e teritorionan aki ta kai dentro di un distansia di 3500 kilometer, nan tambe ta kai bou di e tarifa redusí.” Esaki ta splika e motibu ku Madeira, Azores i Islanan Canaria tambe ta kai bou di e tarifa redusí. Pa e otro teritorionan mas leu manera Martinique, Guadeloupe i Frans Guyana, nan si ta kai bou di e tarifa normal.
Pa loke ta trata Antia, Minister Bos ta splika ku ta un midí ta midi i meskos ku otronan, tur destinashon mas leu ku 3500 kilometer ta paga e tarifa normal i esei ta konta pa Antia i Aruba tambe ku ta na un distansia di 8000 kilometer.

ISLAMABAD, Pakistan – Outoridatnan pakistaní djasabra a konmemorá kumpli aña di Benazir Bhutto ku plannan pa nombra un airopuerto na honor di e eks promé minister i lanta un monumento kaminda el a ser asesiná i lo kambia e kastigunan di míles di prezu kondená na morto.
Promé minister Yusuf Raza Gilanti a anunsiá e medidanan den un diskurso dilanti Parlamento, ku a tene un minüt di silensio na honor di e lider morto, kende lo a kumpli 55 aña djasabra.
Bhutto, kabesante di Partido Popular di Pakistan, a ser matá na dezèmber 2007 den un atentado ku bòm i tirunan durante un reunion elektoral na e siudat di Rawalpindi. Su morto a sakudí e pais, pero su partido a sigui dilanti pa gana elekshon na febrüari i forma e koalishon gobernante nobo.
A rekòrdá e fecha di su kumpli aña ku seremonianan na su mousuleo den e pueblo di Naudero, kaminda gran kantidat di partidario tristu di dje a reuní pa resa p’e. Algun tabata karga pòtrètnan grandi di Bhutto i a eksigí detenshon di su asesinonan. Su biudo i susesor komo lider di e partido, Asif Alí Zardari, a pone un krans riba su graf i a resa diferente vershon di Koran.
Gilani, un di e lidernan di e partido di Bhutto, a probechá e okashon pa rekomendá pa presidente Pervez Musharraf pordoná tur e prezunan ku ta warda pa ser ehekutá i kambia tur e kastigunan di pena kapital pa bida largu. Nan ta spera ku Musharraf lo aprobá e medida ei.

Etiketa ta bai ku tempu?
Kisas lo tin algun hende ku no tin kunes ku bon manera. Pero ta di spera ku mayoria hende ke pa nan mes ta bon den kontakto i komunikashon ku otro hende. I ta esaki ta hasi ku etiketa i reglanan di protokòl ta keda nesesario.
Etiketa ta reglanan sosial skibí òf nò, ku ta pone ku komunikashon i kontakto entre hende ta bai bon i dushi i ku no tin, ni ta okashoná, problema sin nodi. Bon manera ta algu ku ta keda komprondé na un otro manera den kada pais, kultura i gremio sosial. I kambionan den mundu ta pone ku kada tempu tin otro etiketa i protokòl. Etiketa ta bai ku tempu, pero ku hende bou di sirkunstansia normal, tin nesesidat kontinuo pa sinti su mes bon i dushi ku otro, ta algu ku nunka lo kambia.

Sabiendo esaki nos ta ban wak rondó di nos na Kòrsou den e tempu aki. Kaminda sa parse muchu biaha ku hopi hende; di tur gremio sosial, di tur edat, di tur nivel di enseñansa, no sa, no ta komprondé ni ta interesá mashá den etiketa.

Kumindamentu
Yunan di Kòrsou ta konosí komo hende ku ta kumindá otro hende ora nan krusa ku otro i maske ku nan no konosé otro. Hopi hende ta parse di a pèrdè e kustumber aki. I ta kasi normal ku hopi hende no ta kumindá otro mas outomátikamente. Tin hende ta asta spanta ora un hende ku no konosé nan kumindá i ta kuminsá pensa kaba ku ta algu malu tin òf a pasa. Tristu ta ku hasta den dunamentu di servisio nos hendenan no ta mira pakiko mester kuminda e hende ku ta drenta komo kliente pa gasta su sèn.

Prof. dr. Lorito ta yama tur hende un felis siman. Nos ta spera ku e siman aki tin mihó resultado positivo pa tur fanátiko. Nos a bisa hopi hende ku Ulanda lo trompeká riba su mes pia. Hopi hende di ai no, e biaha aki si no! Kiko a pasa: Ulanda a trompeká mahos! Anto no bisa ku Lorito su boka ta mará ni ku nos tin bola di kristal. Tin biaha bo ta sinti e kosnan aki ta bin adelantá! Ora bo pretendé ku bo sa tur kos mas mihó ku tur otro hende òf bo ta hasi tur kos mas mihó ku tur otro hende, palu ta hala ku bo!
****
Lorito tin duele di masha fanátiko ferviente di Ulanda. Nan a diskutí i pleita ku nos pa motibu di Ulanda. Awe mainta nan a laga sa ku e wega a pasa i awor ta di wak dilanti i stòp di papia riba e wega di djasabra. Masha fásil pa bisa esei awor aki! Nos pregunta ta kiko lo a pasa si Ulanda lo a gana. E ora ei si lo a sigui papia? Di tur manera ”next time better geluck!”
****
Loke si a duel nos ayera ta ku Antia a kai afó. E chènsnan tabatei sigur. Un bunita esfuerso di diferente organisashon i empresa ku a laga nos soña un ratu. Ohalá ku den futuro (2014!), e bunita soño aki lo dura mas largu. Nos si ta kere ku ta posibel. Pero pa yega dje leu ei nos mester ta uní tur ora! No ora tin deporte (futbòl) so!
****
Masha mamamentu di gai tin riba e haitianonan. Nan a bisa nos ku si Sero Toleransia a presentá ayera den stadion, lo no tabatin lugá pa pone hende den barak. Un otro hende a bisa nos ku e fenetanan a traha. Un haitiano a pasa awe mainta tempran bai traha (Nan ta trahadó!) Algun hende e grita “voodoo”. El a keda hari so. E mester a djis kontestá: “ganée est ganée!” (Jesse nos yama pasobra nos créole ta malu!)

WILLEMSTAD – Manera kosnan ta pintando, no por bai kana den futuro mas den e área di Koredor. Den futuro esei lo bai konta tambe pa Jan Thiel, dos área ku ta masha gustá serka hendenan ku ta kana tur dia, pero awor ta bou di preshon di desaroyo turístiko. Den e kuadro aki awe mainta Federashon Otrobanda a entregá un keho na Ombudsman Fred Wiel.
Segun e Federashon, e kasonan aki ta mustra kon poko partisipashon pueblo tin pa loke ta trata desaroyonan di áreanan turístiko. “No ta tene kuenta ku e poblashon”, asina Maruska Manuel di Federashon Otrobanda a bisa LA PRENSA despues di e reunion di awe mainta na sede di Ombudsman.
E publikashonnan den LA PRENSA den sentido ku a duna Grupo Lowenstein lus bèrdè pa desaroyá parti di Koredor i e playa na Sonesta a kousa alarma den e organisashonnan ku ta afiliá na Federashon Otrobanda.
“Nos ta kere ku mester bini un sistema kaminda no ta entregá terenonan na invershonistanan sin mas. E desishon pa duna Lowenstein e tereno aki ta nifiká ku pueblo lo no por pasa i landa mas den e área aki den futuro. Banda di esei nos ta preokupá pa e intenshon pa duna dos invershonista e terenonan na Rif. Na Jan Thiel ta pasando mesun kos. Finalmente ta pueblo ta sufri komo ku e lo no tin akseso mas”, asina sra. Manuel a bisa.
Durante e reunion di awe a bin dilanti ku por ehèmpel na Barbados a kohe pa e opshon kaminda pueblo i turismo ta meskla. A bin dilanti tambe ku na e momentu aki na Dubai nan ta konstruyendo 25 hotèl pareu ku a duna na diferente invershonista. Na Costa Rica kaminda un delegashon di Kòrsou tabata resientemente tin e mesun situashon kaminda pueblo por skohe pa su partisipashon. “Loke nos ta pidi no ta apnormal. Nos pueblo mester sinti ku e ta parti di e prosesonan di kambionan, entre otro riba tereno estatal, ku ta tumando lugá”, asina sra. Manuel a bisa. Segun sra. Manuel, Ombudsman a primintí ku e lo bai traha mesora riba e denunsia.

WILLEMSTAD – Informashonnan ku LA PRENSA a haña ta hasi menshon di e hecho ku e lider di Niun Paso Atras, Nelson Pierre, a drenta misa den e fin di siman tras di lomba.
Testigunan a bisa ku Pierre a asosiá ku Atventistanan djasabra último den un seremonia den kua a batis’é ofisialmente komo miembro di e kongregashon. Den e kaso aki e mester a bisti un paña blanku largu komo parti di e seremonia.
Pierre, ku ta yama su mes un revolushonario marksista (marksismo no ta kere den iglesia), di e forma aki ta duna un buèlta diferente na su bida. No ta masha kla kiko a indusí e dirigente polítiko pa bin ku e kambio aki.
Na diferente okashon el a demostrá falta di konsistensia den su pasonan, manera su anunsio ku e lo bandoná polítika aktivo i liderato di su partido. Últimamente e ta bisa ku e lo keda na puesto te ora tin un (bon) susesor.
Intentonan awe mainta pa haña su komentario riba su desishon pa drenta misa no a haña kontesta. Su telefòn komo miembro di Konseho Insular i ku pueblo ta pagá, tabata será.

WILLEMSTAD – E tema di supervishon ta hopi den diskushon den último dianan pero tin ehèmpel di pasado ku ta pone duda si nos mester ta den posishon òf dispuesto pa atendé ku e supervishon ku t’asina nesesario den un demokrasia.
Eienne van der Horst, suidadano ku den último lunanan a okupá su mes ku e materia di kòntròl, supervishon i bon gobernashon, den un análisis ta hasi e pregunta si nos mes por supervisá nos atministrashon di finansa.
Van der Horst ta splika ku dia 29 di Mei 2008 Kontrolaria General (K.G.) a entregá su rapòrt na Konseho Insular konteniendo su opheshonnan i remarkenan relashoná ku e investigashon ku K.G. a hasi tokante e kuenta anual di Teritorio Insular di Kòrsou pa aña 2001. Meta di e investigashon tabata pa duna un opinion tokante e atministrashon finansiero hibá pa Bestuurscollege i su responsabilisashon pa ku esaki. A investigá (1) si kompromisonan, gastunan i entradanan a tuma lugá segun e presupuesto aprobá di 2001, (2) si a pèrkurá pa un atministrashon finansiero ordená i kontrolabel, (3) si responsabilisashon finansiero a tuma lugá segun instrukshonnan i (4) si e responsabilisashon finansiero ta duna un bon bista di e atministrashon finansiero hibá.
Segun van der Horst, Kontrolaria General a konkluí ku (1) pa gran parti kompromisonan, gastunan i entradanan no a tuma lugá segun e presupuesto aprobá di 2001 ni segun otro leinan relevante, (2) e atministrashon finansiero no ta ordená ainda, (3) e responsabilisashon finansiero no ta hasí segun instrukshonnan ku ta konta p’esaki i (4) e responsabilisashon no ta duna un bon bista di e atministrashon finansiero hibá. A konstatá erornan pa ku legalidat; Nafl. 149 mion a ser gastá sin ku esaki tabata presupuestá i Nafl. 89 mion a ser otorgá komo supsidio no konforme e ordenansa di supsidio. Tambe a konstatá erornan di konfiabilidat pa ku un montante di Nafl. 121 mion i un inseguridat pa ku un montante di Nafl. 828 mion. E inseguridat aki ta resultado di falta di un organisashon atministrativo adekuá inkluyendo kòntròl interno i falta di atministrashon.

WILLEMSTAD – Gilbert Wawoe, ku a baha komo miembro di Raad van State, a bira presidente di e komishon ku mester atendé aspektonan ku tin di aber pa krea mas perspektiva pa hóbennan den futuro. Resientemente representashon di Hulanda na Willemstad (VNW) den estrecho koperashon ku e.o. Kòrsou a yega na un fórmula pa guia e proseso di e akuerdo ku e programa di enseñansa i formashon será entre Hulanda ku e islanan di Antia. Meta di e programa ta pa duna mas perspektiva na nos hóbennan den nan futuro.
Sr. Gilbert Wawoe, eks miembro di Raad van State di Hulanda, a asumí e enkargo komo presidente di e komishon. Resientemente sr. Wawoe a hasi un bishita serka Diputado di Enseñansa, sra. Marilyn Alcalá-Wallé, kaminda a elaborá tokante di e temanan importante pa garantisá éksito di e programa di enseñansa aki na Kòrsou. Riba e foto por mira sr. Gilbert Wawoe i sra. Diputado Marilyn Alcalá-Wallé.

WILLEMSTAD – Un tema ku nos ta papia masha riba dje pero ku poko poko ta hañando su lugá ta esun ku tin aber ku amistat i relashon (seksual) di hendenan ku limitashon. Den paisnan manera Ulanda tin avanse masha grandi riba e tereno aki kaminda ku ta rekonosé ku e hende ku un limitashon (desabilidat, manera tabata bisa ántes) tambe tin derechi riba relashonnan íntimo. Opviamente ku e tema ta unu masha delikado komo ku hustamente pa motibu di nan limitashonnan, hendenan ku desabilidat mester tin un guia estrikto pa nan no hasi nan mes daño òf laga otro hende hasi nan daño.
Sede di Asosashon Totolika djasabra último tabata e sentro kaminda hóbennan ku limitashon mes a organisá i tene e seminario riba Amistat i Relashon. Nan a invitá hóbennan di skolnan regular avansá i un grupo di Aruba i Boneiru pa nan tambe ta presente. A kombiná e simposio ku un kampamentu.
Diferente orador a duna nan punto di bista durante e simposio aki, manera Bob Domhof ku a papia di un “Bida sin amistat”, Kurt Römer ku a papia riba e pregunta si tin diferensia entre Amistat i Relashon. Un otro aspekto ku a bin dilanti ta e tema “Amistat i Trabou: e yabi pa éksito” presentá pa Jimmy Hollander. Tambe a papia habrí i sinsero riba e tema di seksualidat, guiá pa Patricia Mondesir. Un otro punto importante ta kon un hende ku limitashon mester defendé su kurpa, presentá pa Marvin Emerenciana, i kon mantené animo i atenshon ku Junnie Harms a presentá. Diferente partisipante a duna testimonio di loke ta nan eksperensia di bida te awor.

WILLEMSTAD / DEN HAAG – E mesun sonido di sirena pa outo di polis, ambulans i kuerpo di bombero, mester sòru pa outomobilistanan riba kaya tende muchu mas mihó ku e vehíkulonan akí ta aserkando. Esaki ta un proposishon di e minister hulandes di Verkeer en Waterstaat, Camile Eurlings.
Eurlings a manda e proposishon pa Tweede Kamer i esaki a asept’é. Awor ta bai kambia tur e diferente tiponan di sirena pa un ku tin solamente dos tono. Na e momentunan akí tin un diferensia grandi entre e diferente sirenanan ku polis, ambulans i kuerpo di bombero ta usa. Tur e tres entidatnan ta usa nan mes tono i esaki lo ta pone ku outomobilistanan no ta reakshoná sufisientemente na tempu ora e vehíkulonan ke pasa.
Ku e kambio akí e minister ke logra ku outomobilistanan ta tende e sirena muchu mas lihé. Mes ora lo kambia tambe e lusnan giratorio di e diferente vehíkulonan i hasi nan bistoso. Den futuro un vehíkulo di asistensia tin mag usa lus blou dilanti i tambe èkstra indikadó.

WILLEMSTAD - Djadumingu 22 di yüni, Museo Tula a habri su tienda di produkto di artesania i suvenir na un manera festivo. Bishitante di Museo Tula, tantu hende lokal komo turista por a kumpra produkto nèchi akabá, manera bòslá, T-shirt i pèchi ku emblema di Museo Tula, biña trahá di fruta di Kòrsou i loke ta masha importante e pòpchinan pretu di e koperativa di artesania. E koperativa a lanta despues ku un grupo di 50 persona bibá na Bándabou a sigui kurso di artesania komo parti di e plan edukashonal di Museo Tula.
Despues ku nan a haña nan sertifikado un grupo di persona ku a sigui e kurso di artesania a lanta un koperativa di produkshon.
Ku inougurashon di Tienda Museo Tula, Kas di Kultura ta logra un paso mas den direkshon di drecha e produkto Museo Tula. Museo Tula no ta solamente un museo, pero tambe un proyekto modelo ku ta para pa desaroyo duradero.
E tienda a bira realidat ku gran esfuerso di partikularmente e diseñadó di Kas di Kultura, sra. Helen de Haas i e kolaborashon di amigunan di Kas di Kultura i Museo Tula, empleadonan di Museo Tula, diseñadó i artista Wendell Elisabeth i Papi Adriana, konosido pintor Kurasoleño.

WILLEMSTAD - Dos stagiere Rodoika Cordilia i Mee-lyn Wong ku a tèrminá nan stage na Huize St Jozef djarason siman pasá a gradisí diputado Sr. Anthony Godett pa e sosten risibí pa loke ta trata e tayer di peskeria ku e departamentu di muchanan di 9 pa 12 aña a risibí na playa di Piskadera i tambe pa e barbekiú bon prepará ku e muchanan a saboriá despues di e tayer di peskeria i asina tuma nan despedida pa loke ta nan temporada komo stagiere.
E muchanan a haña basta informashon di peskeria, entre otro kon ta kose un reda, kon ta stiwa reda den kanoa, kon ta tira e reda den laman, kon ta saka e piskánan for di den e reda i tambe a haña un trep den e bahia di Piskadera i asina konosé un parti bunita di Kòrsou su bahianan i naturalesa.
Na nòmber di tur lider i e muchanan di e departamentu di 9 pa 12 aña i mui spesial Lisa Genoveva ku ta Huize St. Jozef miembro di staf, e dos stagierenan Rodoika Cordilia i Mee-lyn Wong ta gradisí tambe Juniel Carolina ku a hasi e kontaktonan nesesario i tambe na Omero i Jaruis Da Costa Gomez ku a pone nan reda, boto, kanoa i tambe e edifisio di piskadó disponibel pa e muchanan i asina e aktividat por tabata eksitoso.