ORANJESTAD- Departamento di Enseñansa, seccion Facilidad di Estudio y Guia, ta haci un suplica na tur studiante cu ta bay sigui nan estudio na Hulanda y cu a aplica pa un prestamo di estudio di Gobierno di Aruba y kendenan a pasa nan examen cu exito (sea e aña aki of den añanan anterior) pa pasa na Departamento di Enseñansa den Caya G.F. (Betico) Croes 38 (ex Interbank) riba diahuebs 26 di juni proximo, pa busca e carta tocante otorgamento di dicho prestamo.
Orario ta di 8’or di mainta te 12’or di merdia y di 1’or di merdia te 4.30 di atardi.

ORANJESTAD- Departamento di Enseñansa, seccion Facilidad di Estudio y Guia, ta haci un suplica na tur studiante cu ta bay sigui nan estudio na Merca, Canada, Corsow, Aruba, Republica Dominicana, Venezuela y Colombia y cu a aplica pa un prestamo di estudio di Gobierno di Aruba y kendenan a pasa nan examen cu exito (sea e aña aki of den añanan anterior) pa pasa na Departamento di Enseñansa den Caya G.F. (Betico) Croes 38 (ex Interbank) riba diabierna 27 di juni proximo, pa busca e carta tocante otorgamento di dicho prestamo.
Orario ta di 8’or di mainta te 12’or di merdia y di 1’or di merdia te 4.30 di atardi.

ORANJESTAD- Diadomingo 29 di juni venidero ta e dia cu e ex-militarnan na Aruba lo reuni, lo marcha y lo recorda e momentonan cu nan a cumpli cu defensa di nan patria.
E comision “Reencuentro Ex-Militarnan” ta informa tur ex-militar na Aruba durante di e ultimo 2 reunionnan Centro di Bario Brazil y club D.O.S.V.A. bastante ex-militar a presenta y a contribui. Nan tur a haña nan t-shirt y a haña mas informacion tocante e marcha venidero.
E ora cero ta jegando y e preparacionnan pa e marcha di diadomingo 29 di juni venidero ta canando hopi bon. Awor ta na e participantenan pa presenta y marcha orguyosamente como ex-militarnan.
Ta recorda un y tur cu e marcha aki ta pa tur ex-militar presente na Aruba cu kier participa. E ta pa Schutterij, ANTMIL, ARUMIL y tur otro ex-militar bibando na Aruba. E marcha lo ta mas o menos 1.75 km. E lo cuminsa na parke Wilhelmina y lo termina na Plaza G.F. (Betico) Croes. Durante e marcha lo haci un ofrenda floral na diferente monumento di e veteranonan di guera. E vestuario pa e marcha aki lo ta un t-shirt diseña especialmente pa e actividad aki, un jeans blauw y cu tur e medayanan y decoracionnan oficial ricibi.
Tur ex-militar cu kier participa na e marcha aki lo mester contribui cu AFL. 25,00 (binticinco) cu ta ensera un t-shirt, bebida y algo di come. E contribución aki mester ser paga mas pronto posibel.
E proximo reunion lo tuma lugar diahuebs 19 di juni venidero na Soul city sportsbar (ex Juwanna beer) na San Nicolas pa 7.30 pm.
E comision ta conta cu presencia di tur ex militar na e reunion aki y ta pidi pa un boca bisa otro pa un y tur por presenta.

ORANJESTAD - Miembronan di fraccion di AVP presente na Hulanda pa e reunion tripartidario a probecha e ocasion y a reuni cu e compania Delta cu ta esun cu tabata e encarga cu e proyecto di mulinanan di biento na Corsow.
Parlamentario di AVP Mike de Meza, comentando riba e reunion aki cu su coleganan na Hulanda tabatin, a indica cu esaki ta un muestra mas cu e partido berde ta poniendo tur atencion posibel na e buskeda di diferente opcionnan di energia alternativo pa nos isla.
Segun de Meza e compania Delta a mustra di ta completamente di acuerdo cu e ponencianan di AVP pa cu e posibilidadnan di energia alternativo.
E compania aki a indica cu Aruba ta privilegia di por conta cu solo y biento cu ta dos fuente tremendo di energia alternativo. Aki nan ta referi na mulinanan di biento y panelnan di solo.
Tanto Delta como fraccion di AVP ta considera cu mester bin cu un ley cu ta indica cu na momento cu produci mas energia pa medionan alternativo esaki por bai riba e sistema di Elmar.
Na Hulanda y diferente otro paisnan Parlamento ta esun cu a pasa e ley aki, los di e companianan di ultilidad. Despues e companianan di utilidad mester a adapta nan mes na esaki. Mike de Meza ta indica cu contrario na loke por a pensa, e cambio aki no a perhudica e companianan di utilidad y mas bien a ponenan traha den un forma mas eficiente.
Na momento cu e delegacion di AVP yega for di Hulanda lo cuminsa traha riba un concepto di ley pa por logra haci esaki na Aruba tambe.
Finalizando Mike de Meza a indica cu e partido berde lo sigui traha fuertemente riba tur e posibel alternativanan di energia alternativo pa asina por duna pueblo un alivio den e prijs di awa y coriente, pasobra indicacionnan ta cu prijs di crudo lo sigui subi.

ORANJESTAD- Dialuna dia 16 di juni a inicia cu reunionnan di Tripartite Parlementair Overleg Koninkrijksrelaties. Diferente punto importante a ser trata. Dicho puntonan ta:Posicion di idiomanan den Reino, Intercambio cultural, contenido di dia di Reino, Verwijs Index Antianonan, Rapport di e Overlegorgaan Caribische Nederlanders, Supervision Financiero, Energia duradero, Cambio di structura estatal bou di cual “good governance” y “rechtshandhaving”, deficit democratico y futuro di POK.
Na comienso a chek cu otro e palabracionnan di biaha pasa. Alavez a bishita Clinica Jellinek, unda a obtene informacion valioso encuanto adiccion, en especial adiccion na weganan (di placa).
Pa loke ta trata idioma y Taalunie, minister Plasterk a duna un exposicion. Durante deliberacion entre delegacionnan a senala cu den Reino nos tin 4 idioma esta hulandes, papiamento, fries y spano.
Ta reconoce cu cu aunke cu ora ta trata ley, derecho y den seno gubernamental te ainda hulandes ta e idioma official tog ta asina cu e pueblo no tin mucho afinidad cu hulandes. Tog ta mira si e importancia den mantene hulandes como idioma comun den Reino, aunke cu tin cu respeta autonomia di cada pais den Reino pa loke ta nan politica di idioma. Uzo di hulandes ta haci oportunidad di Antiano y Arubiananonan pa loke ta trat ensenanza y Mercado laboral mas halto. E delegacion di Aruba a pidi atencion pa tene cuenta cu e koers di euro cu ta fluctua en coneccion cu pago di debe di studio y pa e validez di diplomanan di studiantenan ora nan bai studia. Minister a priminti di duna un contesta ariba e peticion di Aruba.

BROOKLYN – Kiko lo pasa ora ku un picher ambidekstro, ku ta tira tur dos brasa, topa ku un bateadó ku ta bati tur dos banda di plato?
Pero siman pasá djaweps na Brooklyn tabatin un konmoshon total durante di e wega ku a konfundí e empayernan durante di un wega di klase A entre Brooklyn Cyclones i Staten Island Yankees.
Staten Island tabata ganá 7-2 kontra Cyclones den bòm di nobeno ining ora ku Pat Venditte a drenta wega pa Yankees pa kaba e wega.
Venditte ta un hungadó ku Yankees a draft na komienso di luna den e di 20 rònt i ku ta hasi su debut den e partido aki.
Venditte ta un ambidekstro, pues un picher ku ta tira ku tur dos brasa i tin un wante spesialmente trahá p’e di seis dede ku por bisti na tur dos man.
E èks hungadó di Creighton State University a kuminsá e entrada tirando ku e man drechi i a saka e promé dos outnan ku rolling.
Despues a sigui un hit pa center. Esaki a pone ku e bateadó tambe ta ambidekstro Ralph Henriquez mester a bini plato i aki e kos a kuminsá.
Den sírkulo di espera Henriquez tabata swing na e banda robes di plato, pues Venditte a kita su wante i pone na e man drechi pa e por tira ku su man robes i enfrentá Henriquez. Mirando esaki, Henriquez a bira na e banda drechi, Venditte tambe a kambia su wante.
Henriquez a disidí di bolbe kambia i Venditte tambe a bolbe kambia su wante.
Asina e kos a kontinuá sin ku e wega por a sigui.
Empayernan a disidí di pidi “time” i yama ámbos kuerpo tékniko pa un kòmbersashon.

WILLEMSTAD, - Djadumingu último 22 di yüni 2008 Federashon Antiano di Esgrima a tene su di tres i último kampionato senior di e aña aki: e biaha aki riba e arma di spada. Un total di 9 esgrimista a presentá; kasi tur e esgrimistanan tabata hóbennan bou di 20 aña ku eksepshon di unu.
E sistema di kompetensia ku a apliká tabata di un buèlta klasifikatorio di dos pul, ku un pul di 5 i un pul di 4 esgrimista den kual tur esgrimista mester a topa otro un biaha den un “round robin” pa 5 toke. A base di e kantidat di partido ganá, i e diferensia di toke duná i toke risibí a klasifiká e esgrimistanan riba e tabla di posishon pa e buèlta di Eliminashon Direkto te Final.
Klasifikashon despues di promé buèlta
Despues di e buèlta di klasifikashon Bryan Betrian i Jairo Jessurun a terminá invikto na promé lugá den nan pul. Pero e diferensia di toke duná i toke risibí di Bryan tabata 12 toke miéntras ku di Jairo tabata 10 toke, loke a pone Bryan na promé lugá riba tabla di posishon i Jairo na di dos lugá.
Na di 3 lugá riba tabla di posishon a klasifiká Arion Hasselmeyer ku 3 partido ganá un pèrdí, siguí pa Lou Girigorie na di 4 lugá ku 2 partido ganá un pèrdí.
Na di 5 lugá a klasifiká Sergio Coronel ku un partido ganá dos pèrdí ku un índise di 0.333. Siguí na di 6 lugá pa Khao Dao i na di 7 lugá Jean Carlos Jessurun na di 8 lugá Yardley Ricardo, tur tres ku 1 partido ganá 3 pèrdí i un índise di 0.250.

WILLEMSTAD – Un grupo di 44 militar antiano ta graduá e siman akí, pa e parti di preparashon profeshonal elementario ku nan a sigui durante 6 luna. E preparashon akí nan e sigui den kuadro di e Servisio Militar Obligatorio ku Milisia Antiano ta ofresé. Despues di un preparashon di 6 luna, e militarnan ta sigui un preparashon práktiko sivil kaminda nan ta siña un fishi. E preparashon elementario ta un eksigensia pa por tuma parti na e preparashon práktiko, i ta destiná solamente pa e militarnan bon prepará! (Foto: Peter Bijpost)

WILLEMSTAD – “Mi tin hopi trabou importante pa atendé i mi no ta dispuesto pa sinta skucha hendenan ta papia hopi sin hasi nada”, tabata deklarashon di diputado Anthony Godett den un entrevista telefóniko ku LA PRENSA.
Segun diputado Godett tin seis diputado i tin hopi tarea ku mester keda atendé rápidamente. E manera ku oposishon a bin ta hasi e trabou di papia hopi i krea broyo ta hasi ku mi no ta sinta skucha loke no ta na bienestar di e isla. Dia nan siña dediká nan mes na e trabou manera mester ta enbes di yama reunion tur siman pa stroba trabounan ku diputadonan mester hasi, anto nan lo mira progreso.
“Tampoko no tin niun konflikto den koalishon. Koalishon tin 1 aña ta bai sin krísis, loke ta hasi ku otronan ta yalurs riba e parti aki”, diputado Godett ta añadí. Nan ke stroba logronan, dor di organisá manifestashon i subi kaya i purba di kibra gobièrnu. E mesun grupo di oposishon aki a purba riba nivel sentral di basha gobièrnu abou sin a logra i awor ke purba riba nivel insular. Koalishon ke krea ku nan komentarionan broyo den gobernashon i no tin tempu pa sinta skucha, pero pa traha ku resultado.
Diputado Anthony Godett ta agregá ku por mira kuantu resultado tin den e trabounan ku ta tumando lugá. Ora yega pa reunion mester stòp di mira ken tei i no tei, sino ta firma mester firma. Ora di nan nan no ta firma, pero ta spera ku otronan si mester hasi loke nan ke. Den e reunion di awe nan lo bai papia riba avion ku a bula riba teritorio venesolano sin pèrmit, “Kiko esaki tin haber ku Kòrsou?”, diputado Godett ta puntra. Pa bai papia riba avion ku ta bula sin pèrmit riba teritorio venesolano, ami ta preferá traha pa kos por kana pa bienestar di e isla.

Federashon di Otrabanda i SKO ke konfundí komunidat!

WILLEMSTAD – Organisashonnan manera Federashon di Otrabanda i Sosiedat di Komersiantenan di Otrabanda ta purba di konfundí pueblo i brua tera pa stroba proyektonan lanta riba e isla. Segun diputado Anthony Godett den deklarashon na LA PRENSA ta mustra ku awor tur hende ke kore bai Ombudsman, enbes di duna sosten pa proyektonan keda realisá. Mas ainda esnan ku no ke invertí no mester stroba otronan pa hasi esaki, tabata palabranan di diputado Godett den un entrevista telefóniko.
Diputado Godett ta indiká ku esnan ku a kore bai Ombudsman no ke invertí i awor ku tin otro hendenan pa invertí nan ke brua tera. Lo tabata bon pa Ombudsman kuminsá investigá SKO den loke nan ta hasiendo, ya ku nan ta strobando desaroyonan importante pa e isla. E mandatario ta mustra ku e no tin miedu di niun investigashon, ya ku 19 voto unánime Konseho Insular a vota pa e proyekto di Grupo Alfredo Lowenstein di 60 mion dollar na Zaquito/Parasasa.
E proyekto aki lo ta enserá dos hotèl di 350 kamber, ademas lo duna 350 persona trabou. E komersiantenan ku ta protestá no ta invertí, pero nan ke stroba otronan ku si ta invertí hinka nan plaka pa desaroyo di e isla. Diputado Godett ta opiná ku enbes di kore bai Ombudsman, presentá na BC i buska tur dokumentu ku tin ku ta bon aprobá, di manera ku tur hende por fria kabes. E tipo di aktitut di e organisashonnan aki ta stroba i konfundí e komunidat i ku nan lo no logra ku e pensamentu maligno aki. Nunka negativismo a vense positivismo, pues ta urgí pa laga proyektonan kana pa e pais su bienestar.

WILLEMSTAD - Djasabra último tabata dia di famia pa Banco di Caribe, Crown Automotives i Digicel. A brinda e oportunidat pa klientenan eksperensiá Caribe real.
E ‘car show’ kombiná ku dia di famia di djasabra último a tuma lugá na Crown Automotives na Caracasbaaiweg. Durante di e kampaña aki Banco di Caribe a ofresé potensial klientenan; un fiansa di outo 3.95 % APR 7.01 %, pagando bèk den un máksimo di 5 aña. Huntu ku Crown Automotives i Digicel a sa di hinka un pakete realmente bentahoso den otro. Asina por menshoná ku den e pakete tambe ta inkluí kùrmentu i number di outo, 20% riba e pakete di seguro, selular + un handsfree kit (tanten tin na stòk) i oportunidat di haña kontesta den 48 ora.
Mester hasi menshon ku ta hopi ta esnan ku a probechá di e oportunidat aki di ‘shòp’ pa nan Hyundai modelo 2008, djasabra último. Tantu e representantenan di Crown Automotives i esnan di Banco di Caribe tabatin nan mannan yen, Digicel tambe tabata tei ku telefònnan na preisnan sumamente atraktivo spesial pa e dia aki. Riba kombinashon di foto por apresiá representantenan di tur tres kompania, e tim di Banco di Caribe ku a sòru pa yena aplikashon di fiansa i tambe esnan ku a pèrkurá pa mayoria di e fiansanan keda aprobá.

WILLEMSTAD – Djaweps mundu ta selebrá “Dia Internashonal kontra abuso di droga i tráfiko ilegal di droga” ku a keda proklamá pa Nashonnan Uní.
E dia aki ta keda selebrá na vários parti di mundu, miéntras ku ainda na Kòrsou e dia aki no ta haña su importansia manera otro tipo di dianan ku si ta keda rekonosé.
Aña pasá a probechá pa selebrashon aniversario di Fundashon pa Maneho di Adikshon (FMA) riba e fecha aki, pero ya mañan lo no tin nada ku lo hasi e isla para ketu ku tin gruponan ta preokupá pa e kresementu den uso di droga meskos ku trafikashon ilegal di droga.
Algun aña anterior tabata evangelista/pastor Norwin Josepa ku a duna e dia aki su kontenido dor di organisá “Nochi di Testimonio” tresiendo personanan ku Dios a librá for di e mundu di adikshon i trafikashon na droga. Aña pasá FMA a pidi pa duna nan e oportunidat pa selebrá nan aniversario i e aña aki no tin niun grupo ku a tuma inisiativa pa tin un aktividat riba e dia aki. E slogan di Nashonnan Uní ku a enkargá nan Ofisina ku ta atendé ku Droga i Krímen ta usa riba 26 di yüni ta “Do Drugs control your life? Your life. Your community. No place for drugs”. E slogan aki lo keda usá pa tres aña den tres diferente aspekto di kòntròl di droga. Tabata na 2007 ku e abusu di droga, 2008 lo konsentrá riba kultivashon i produkshon di droga i tráfiko ilegal lo haña atenshon den 2009. Ku e kampaña aki Nashonnan Uní ta hasi un yamada pa konsientisashon na komunidat pa e problema grandi ku ta afektá sosiedat. Niun individual, famia òf komunidat ta sigur kaminda droga a tuma kòntròl. Droga por kontrolá bo kurpa i mente di e konsumidó individual, kultivadónan i kartelnan di droga por tin nan plantashon, tráfiko ilegal i krímen ku por tin kòntròl riba e komunidat.

WILLEMSTAD – Organisashonnan manera Federashon di Otrabanda i Sosiedat di Komersiante di Otrabanda ta purba di konfundí pueblo i brua tera pa stroba proyektonan lanta riba e isla. Segun diputado Anthony Godett den deklarashon na LA PRENSA ta mustra ku awor tur hende ke kore bai Ombudsman, enbes di duna sosten pa proyektonan keda realisá. Mas ainda esnan ku no ke invertí no mester stroba otronan pa hasi esaki, tabata palabranan di diputado Godett den un entrevista telefóniko.
Diputado Godett ta indiká ku esnan ku a kore bai Ombudsman no ke invertí i awor ku tin otro hendenan pa invertí nan ke brua tera. Lo tabata bon pa Ombudsman kuminsá investigá SKO den loke nan ta hasiendo, ya ku nan ta strobando desaroyonan importante pa e isla. E mandatario ta mustra ku e no tin miedu di niun investigashon, ya ku 19 voto unánime Konseho Insular a vota pa e proyekto di Grupo Alfredo Lowenstein di 60 mion dòler na Zaquitó/Parasasa.
E proyekto aki lo enserá dos hotèl di 350 kamber, ademas lo duna 350 persona trabou. E komersiantenan ku ta protesta no ta invertí, pero nan ke stroba otronan ku si ta invertí hinka nan plaka pa desaroyo di e isla. Diputado Godett ta opiná ku enbes di kore bai Ombudsman, presentá na BC i buska tur dokumentunan ku tin ku ta bon aprobá di manera ku tur hende por fria kabes. e tipo di aktitut di e organisashonnan aki ta stroba i konfundí e komunidat. “Nan lo no logra ku e pensamentu maligno aki. Nunka negativismo a vense positivismo, pues mi ta urgi pa laga proyektonan kana pa bienestar di nos pais”, asina e diputado a bisa.

Lorito ta yama tur hende un felis djamars. Ta masha kos tin di konta. Danki Dios ta poko espasio so Lorito tin sino e kos no ta keda interesante mas.
****
Bo ta kere ku nos kier yama felisitá Selikor pa nan 12 aña i mei pero no tin kontesta ni di direktor ni di sekretario. Lorito ta bisa semper: ora bo ta un servisio di gobièrnu, bo responsabilidat ta pa kontestá telefòn. Ora bo tin un telefòn ku gobièrnu òf un NV/Fundashon di gobièrnu ta paga, tambe bo tin ku kontestá yamadanan. Si bo no por anto, simplemente buska bo mes telefòn!
****
Por ehèmpel, nos amigu Nelson a yama nos na diferente okashon bisa nos ku su number ta tal i tal i pa nos kòrda yam’é. Su number ta pagá pa Konseho Insular (pues plaka di pueblo). Nos ta yama e number sin stòp, pero e no ta alkansabel! Asina tin diferente ehèmpel mas ku nos por menshoná. Un biaha mas nos konseho: si bo telefòn ta paga ku fondonan públiko (di gobièrnu òf entidatnan ku ta ligá ku gobièrnu), ta bo responsabilidat pa hisa tur telefòn. Di tur manera Selikor masha pabien!
****
Tin medionan gusta bruha tera, anto ora nan ta nobo ta pió. Henter un badabada tabatin riba e koalishon aktual te ora ku Nini a sali bisa bon kla ku nada no a pasa. Awor si e mesun medio no ta bisa nada, loke ta krea enbèrdat e impreshon ku a publiká djis pa krea konfushon. Esei no ta straño si bo mira ken ta propagá kiko i ken ta tras di sierto figura!

(Kuater hóben yu di Kòrsou ta kuminsá ku skol di futbòl N.E.C.)

WILLEMSTAD – Djaweps 19 di yüni lo ta un dia inolvidabel pa deporte na Kòrsou i sigur pa e talentonan di futbòl hóben.
Stefan Martina: “Mi soño a sali. Mi ta sintimi bon ku mi a keda selektá. Kompetensia tabata grandi. Lo mi hasi mi bèst pa mi bai den NEC-I”.
Sicny Meulens: ta presidente di Konseho di Alumno di su skol Maria College: ”Mi ke bisa e hóbennan di mi edat ku no entregá nunka e deseo di realisá bo soño. Atami a logra. Aki a keda demostrá ku disiplina i fòrsa di boluntat bo ta yega hopi leu”.
Ryadh Monte: “E chèns akí bo ta hañ’é un bes den bo bida. Saka lo máksimo for di dje. Mi ta kohe e chèns akí tene ku tur dos man i lo mi hasi algu bunita kuné!”
Shannon Carmelia: “Mustra tur yu di Kòrsou ku den futbòl tambe nos por produsí talento ku ta konta internashonalmente. Lo mi hasi bon uso di e oportunidat akí. Lo mi ke ta un ehèmpel pa e otro hóbennan!”
N.E.C., Fundashon Bon Intenshon i Union di Futbòl Antiano (NAVU) a pone nan firma bou di un aliansa sosial ku ta enserá entre otro ku riba un base anual tres pa sinku talento di futbòl na Kòrsou den e kategorianan di edat di 14 pa 20 aña lo haña e oportunidat pa desaroyá nan mes ku e meta final pa bira un hungadó profeshonal.

WILLEMSTAD – Asosashon di Komèrsio i Industria (VBC) a kritiká e aviso ku tabatin siman pasá di Aliansa Patriótiko. “Un aviso instigativo i klaramente ku e meta pa krea miedu, pániko i divishon”, asina VBC ta bisa den un komentario awe.
“Ta ku sentimentu di konfushon Asosiashon di Komèrsio i Industria di Kòrsou (VBC) a tuma nota di e kontenido di e anunsio di henter un página di e grupo Aliansa Patriótiko, kaminda e partidonan polítiko MAN, NPA, PS, FK i PLKP (ku no tin niun asiento), a uni fòrsa. E tekstonan den e anunsio ta simplemente instigativo i klaramente tin komo meta krea miedu, pániko i divishon dor di lanta gruponan di poblashon kontra otro i saka probecho for di esei. Asosiashon di Komèrsio i Industria di Kòrsou ta desaprobá e manera i forma di hiba oposishon aki fuertemente pa motibu ku den henter mundu ta probá ku un polítika basá riba xenofobia òf odio kontra strañero únikamente lo kondusí na profundo desgrasia (mira e desaroyonan resien na Suráfrika dirigí kontra refugiadonan for di Zimbabwe)”, asina VBC ta bisa.
Na opinion di e asosashon, nunka por ta e intenshon pa e tipo di práktikanan repudiabel aki, manifestá nan mes na Kòrsou. “Mundialmente Kòrsou ta para konosí komo demokrátiko i tolerante i ta apsolutamente balioso pa tur hende hasi nan esfuerso pa mantené un klima i un ambiente asina. Ta pues masha di lamentá ku partidonan polítiko renombrá manera MAN i Forsa Kòrsou ta laga nan mes wòrdu hibá den e práktikanan malu, oportunista i demagógiko ku Aliansa Patriótiko ta haña bon di usa. Den un demokrasia ta nesesario pa tin oposishon pa por pone e sistema funshoná optimalmente. Pero pa alkansá un situashon asina ta nesesario pa tin un oposishon konstruktivo i disposishon di banda di e partidonan ku ta na mando pa tene kuenta ku esaki. Den un par di palabra mester tin rèspèt mutuo i diálogo entre gobièrnu i oposishon. Lástimamente Asosiashon di Komèrsio i Industria di Kòrsou ta konstatá ku relashoná ku e asuntunan grandi i importante ku komunidat ta ser konfrontá kuné, no tin kuestion di komunikashon saludabel entre partidonan i pa tal motibu ta hasi un apelashon riba tantu gobièrnu komo partidonan di oposishon pa traha riba esaki. Podisé e pronunsiashonnan di e presidente di partido polítiko MAN por ser mirá komo un promé paso positivo den e bon direkshon ei. E desaroyo aki seguramente por ta benefisioso pa komunidat”, asina VBC a duna di konosé.

WILLEMSTAD – Ku un donashon di Marina Real, Kolegio Erasmo por kumpra un kantidat di stul i mesa pa e proyekto Yogatina. Yogatina ta un proyekto di kuido pa mucha entre 2 i 4 aña.
E plaka ku Marina Real a generá a bin for di aktividatnan ku e personal di Hr.Ms. Van Galen a organisá. Ta trata di aktividatnan manera bingo i ganzenbord ku a generá 4.100 florin. E komandante di Hr.Ms. Van Galen, kapitein-luitenant ter zee Wilko van Zanten, a entregá siman pasá e montante destiná pa Yogatina.

WILLEMSTAD / UTRECHT – E bario kaminda un mucha ta biba, ta determiná pa gran parti si e ta resultá riba e kaminda di kriminalidat. Un bario ku hopi kriminalidat i droga ta duna e mucha e mensahe ku ta trata di fenómenonan normal. Un ambiente asina ta pone ku fásilmente e mucha ta kue un estilo di bida kriminal. Esaki ta resultado di un investigashon di Verwey-Jonker Instituut i Universidat di Utrecht.
Komportashon kriminal ta relashoná direktamente ku e bario kaminda muchanan ta biba. Pa a yega na e konklushon akí e investigadónan a laga 2300 mucha, di e promé tres klasnan di skol avansá, kontestá un lista ku pregunta tokante komportashon kriminal. Algun di e preguntanan tabata si nan a yega di kometé un krímen, i si tabata asina kuantu bia i bou di kua sirkunstansia. For di e kontestanan por a konkluí ku muchanan for di barionan problemátiko, regularmente ta forma parti di un guèn i ku kasi nunka nan ta kometé un krímen nan so sino kasi semper den grupo.
Mas aleu e investigadónan a konstatá ku un famia instabil, mal karera eskolar i amigunan kriminal ta pronóstiko di komportashon kriminal. Fayo na skol no ta pronostiká algu bon: esaki ta nifiká un status inferior, marginalisashon i tiki perspektiva pa un trabou.
Hubentut ku ta presta malu na skol i tin problema na kas ta buska aserkamentu serka otro hóbennan marginá. Den e gruponan ei ta propagá uso di droga i alkohòl segun e rapòrt.

WILLEMSTAD, - Liga Hubenil di Basketbòl Kòrsou durante fin di siman último a sigui ku su di dos wikènt di weganan amistoso.
E partidonan a tuma lugá den Sala Niels Liberia, na Suffisant, miéntras ku preparashon di inmediato a start pa den wikènt benidero muda pa Rooi Santu.
E meta ta pa kada wikènt bai un otro bario, di manera ku e deporte di Basketbòl ta keda hungá rònt Kòrsou.
E ‘highlight’ di wikènt último sin duda tabata e retiro di B&M Sisters na ekiponan aspirant (maskulino) pa nan por a hiba training kontra ekipo di mucha hòmber.
Den nan promé wega, B&M Sisters mester a baha kabes pa Royal Hoops aspirant ku a gana 37-10.
Waynor Wederfoort a destaká ku 20 punto pa Royal Hoops, miéntras ku Roxanne Francisca a anotá 6 pa B&M Sisters.
Djasabra B&M Sisters a presentá fuerte i a gana di Lettermen aspirant 19-11.
Adrienne Lint a anotá 5 punto pa e damanan, miéntras ku Weijie Wu a skor 5 pa Lettermen.
Den weganan di Kategoria Mini, Lettermen a gana dos biaha di Royal Hoops.
E promé wega a kaba 16-11. Henry Uribe a anotá 10 punto pa Lettermen i Jurnemil Molina a sobresalí ku 4 pa Royal Hoops.
Den nan di dos partido, Lettermen a sali viktorioso 10-4. Jesus Ferrero tabata topskorer pa Lettermen ku 10 punto, miéntras ku Cedric Kerkeboom i Bjorn Verspoor a skor 2 kada un pa Royal Hoops.
Den wega di Kategoria Kadet riba djasabra, Lettermen 2 den un tremendo partido a gana 58-49 di Royal Hoops.

Skina di Sorti, awe djamars 24 di yüni di 2008, ta kuminsá ku deseá un i tur un bon dia. Ora ku bo sali riba un mal pia, ta bira sumamente difísil pa hasi kos bon. E relashonnan polítiko (algun te hasta a bira personal) na Kòrsou, ta kontinuashon di mal maneho di e koalishon ku PAR, PNP i MAN tabata tin na momentu ku a firma e “slotverklaring” na 2007. Ta for di promé ku e akuerdo polítiko aki a keda firma, MAN tabata mustra di ke profilá ku mas prominensia. MAN despues di un elekshon sumamente eksitoso, opviamente no tabata kontentá su mes ku un posishon den sombra di PAR.
Un postura ku PNP, a base di resultado elektoral desapuntante, si a adoptá den koalishon ku PAR. Ni PAR, ni MAN, ni PNP no a atendé e situashon aki, pero a laga kosnan sigui nan kurso apesar di diverso iritashon. Den práktika polítiko mas elevá, partnernan di koalishon ta definí e espasio ku tur tin, banda di lokual ta akordá den e akuerdo di gobernashon. Un koalishon, ku sierto signatura, no ta nifiká ku e partnernan a bira parti di un webu machiká.
Lokual tin ta ku nan ta kumbiní di ehekutá un determinadó programa di akshon i ta minimalisá e tumamentu di posishon ku ta afektá kredibilidat di e koalishon. Puntonan ku no ta kontené den e akuerdo di gobernashon, no ta mara partidonan di mantené un liña komun. Naturalmente bo por akordá di tene neutralidat riba ékis punto delikado pasobra no tin konkordansia riba e asuntu. Esaki naturalmente no por ta un asuntu ku tin prioridat denter di e periodo di gobernashon òf por lo ménos na su inisio.