ORANJESTAD – Servicio di Impuesto ta informa cu actualmente e formularionan di declaracion di winstbelasting 2007 ta wordo parti. E fecha oficial di otorgamento ta 16 di juni 2008 y pa e fecha aki tur empresa cu ta cai bou winstbelasting (p.e. un N.V.) mester a ricibi su formulario. Si pa un of otro motibo un empresa no a ricibi su formulario, e mester busca un duplicado na Servicio di Impuesto mas pronto posibel.
Entrega dentro di 2 luna
Cada empresa cu a ricibi e formulario di declaracion menciona, tin 2 luna pa yena y entrega esaki. E ultimo dia pa entrega e formulario ta 18 di augustus 2008. Ta importante pa tene cuenta cu e termino di 2 luna aki, ya cu e empresa ta core riesgo di haya boet si e no entrega su formulario of si e entreg’e laat. Den caso cu e empresa no ta alcansa pa cumpli cu e entregamento di e formulario dentro di e termino di 2 luna, ta posibel pa pidi prolongacion di termino. Pa esaki, e cliente mester entrega un peticion no mas tarda cu dia 18 di augustus proximo. Servicio di Impuesto lo por prolonga e termino te cu dia 31 di december 2008.
Buki di aclaracion
Pa e clientenan por haya un aclaracion specifico riba e partinan menciona den e formulario, Servicio di Impuesto ta manda tambe un buki di aclaracion hunto cu e formulario. Tanto e formulario di declaracion como e buki di aclaracion ta disponibel riba e website www.siad.aw.
Mester remarca cu e cliente por download e formulario di declaracion for di internet solamente pa uzo priva y no pa entrega na Inspector como un documento oficial.
Servicio di Impuesto ta haci un apelacion na tur empresario pa yena e formulario cu atencion y contesta tur e preguntanan, haciendo uzo mas tanto posibel di e buki di aclaracion. Despues ta entrega e formulario hunto cu e relato anual, esta e balans y e cuenta di ganashi y perdida (balans en winst- en verliesrekening) hunto cu su respectivo aclaracion. E documentonan aki ta importante pa Inspector por haya un bista cla di e manera cu a calcula e ganashi di empresa.

ORANJESTAD- Mescos cu tin keintura di futbol na Aruba, mesun cos e campaña di SETAR “SETAR di bo tambe!” ta ser sinti bou di e pueblo di Aruba. Tur caminda bo por mira casnan dorna cu sticker y autonan ta core rond cu sticker di “SETAR di bo tambe!”.SETAR ta invita pueblo di Aruba pa sintonisa Telearuba canal 13 of canal 23 awenochi 25 di juni 2008 pa 7:30 pm pa un programa special di e prome salida di e bus di “SETAR di bo tambe!” den e districto di Oranjestad Oost. Haya sa kico abo tambe como cliente loyal di SETAR por gana y con e team di SETAR por yega di sorpresa na bo cas sin cu bo mes por kere.
E programa tin un duracion di 10 minuut y lo ser ripiti diabierna 27 di juni 2008 pa 7:30 pm. Asina ta, no perde esaki y mira e ambiente cu ta reina riba e diadomingonan ora e bus di “SETAR di bo tambe!” para dilanti di bo cas.
Bus di “SETAR di bo tambe!”
Diadomingo awor dia 29 di juni 2008, un otro districto di Aruba tin cu prepara pa ricibi e bus di “SETAR di bo tambe!”.
E bus lo sali pa exactamente 10’or di mainta. Sintonisa Canal 90 pa asina bo haya sa ta cua districto ta na beurt. Lo tin diferente premio cu lo ser parti diadomingo manera e.o. yamadanan gratis, descuento riba cuenta di telefoon, celular of internet, DSL gratis, servicio di LiveCam gratis, celularnan gratis y mucho mas y tur esaki pa 1 aña largo. Alaves, si bo no ta un ganador y bo a topa e bus di “SETAR di bo tambe!” nos ta regala’bo un T-shirt di “SETAR di bo tambe!” y pa e muchanan SETAR tin bala special di “SETAR di bo tambe!”. Esaki no ta tur!

ORANJESTAD- Gobierno di Aruba a proclama aña 2008 como aña di cultura. Den cuadro di esaki, Banco Central di Aruba, na nomber di gobierno, a emiti riba diamars un moneda special di plata pa conmemora e ‘Fiesta di San Juan’.
Celebracion di e fiesta aki ta tuma lugar tur aña riba dia 24 di juni door di comunidad Arubano y esaki mediante diferente evento combina cu dansa y canto tradicional, organisa door di varios instancia cultural y den seno familiar.
Un actividad special ta ‘Dera Gai’, cual su ilustracion tambe ta riba e moneda special aki, hunto cu baile y candela. E otro banda di e moneda ta representa e perfil di Reina Beatrix.
Pa e ocasion special aki, sr. Hassanali Mehran, Presidente di Banco Central di Aruba, den compania di sra. Jane Semeleer, Director ehecutivo a haci entrega di e moneda ‘Fiesta di San Juan’ na e ministronan di Gabinete Oduber y esaki den presencia di sr. Rodney Vingal, diseñador di e moneda special aki.
E intencion di Banco Central di Aruba ta pa proximamente bin cu dos otro moneda mas, esta pa conmemora Carnaval y tambe Dande.

ORANJESTAD- Tur aña Departamento di Enseñansa ta organisa den cuadro di preparacion di studiantenan cu ta bay sigui nan estudio den exterior diannan di informacion.
E projecto aki di Departamento di Enseñansa tin como meta duna e studiantenan cu ta biaha pa exterior pa sigui cu un estudio avansa un preparacion basico pa un bida independiente como studiante Arubano den exterior.
E programma ta lo siguiente:
GROEP 1
Datum: Woensdag 25 juni 2008
Tijd : 9.00 – 13.00 uur
Plaats : Aula Universiteit van Aruba
• U.S.A. (61)
GROEP 2
Datum: Donderdag 26 juni 2008
Tijd : 9.00 – 13.00 uur
Plaats : Aula Universiteit van Aruba
• Groningen (34)
• Tilburg (28)
• Vlissingen (1)
GROEP 3
Datum: Vrijdag 27 juni 2008
Tijd : 9.00 – 13.00 uur
Plaats : Aula Universiteit van Aruba
• Eindhoven (21)
• Utrecht (32)
• Zwolle (10)
GROEP 4
Datum: Maandag 30 juni 2008
Tijd : 9.00 – 13.00 uur
Plaats : Aula Universiteit van Aruba
• Arnhem (18)
• Nijmegen (29)
• Wageningen (3)
• Enschede (13)
GROEP 5
Datum: Dinsdag 1 juli 2008
Tijd : 9.00 – 13.00 uur
Plaats : Aula Universiteit van Aruba
• Amsterdam (44)
• Den Bosch (6)
• Haarlem (2)
• Diemen (1)
• Delft (7)
• Driebergen (2)
GROEP 6
Datum: Woensdag 2 juli 2008
Tijd : 9.00 – 13.00 uur

ORANJESTAD – Relaciona cu pago di impuesto di vehiculo di motor 2008, Servicio di
Impuesto kier a duna e siguiente informacion na e clientenan kendenan nan vehiculo no ta den uzo.
E condicionnan
Ta asina cu un cliente cu tin un vehiculo cu no ta den uzo y no lo bay ta den uzo pa un tempo, e no lo tin mester di paga e impuesto di un of mas kwartaal durante aña, solamente si e cliente a cumpli cu e siguiente condicionnan.
1. E cliente a entrega e plachinan di number na Servicio di Impuesto prome cu un
kwartaal cuminsa y 2. E plachinan a keda aden pa un of mas kwartaal completo durante aña.
Entregamento di e plachinan
Un cliente por entrega e plachinan di number sea na oficina principal na Oranjestad of na un oficina ausiliar den districto.
E cliente ta acudi cerca un cahero pa yena y firma un formulario. Pa medio di e formulario e cliente ta declara cu e ta entrega e plachinan di su vehiculo. Alabes e cliente ta duna e motibo pakico e ta entrega e plachinan por ehempel: pa motibo di biahe largo, vehiculo ta daña etc.
Tambe ta posibel cu un miembro di famia ta entrega e plachinan di un vehiculo kende su doño a fayece.
Ta reserva e number pa e aña fiscal coriente
Servicio di Impuesto ta warda e plachinan di number solamente pa e aña fiscal coriente.
Durante e periodo aki ta reserva e number tambe pa e doño di e vehiculo. Despues di e aña fiscal aki, e cliente ta core riesgo di perde su number si acaso e no reacciona.
Den caso di fayecimento di e doño di vehiculo, e casa di e fayecido por autorisa un persona pa e haya e number. Eventualmente e herederonan tambe por laga pasa e number riba nomber di e persona cu nan ta desea. Tur e herederonan mester firma pa e traspaso di number y nan ta apodera un persona pa regla esaki. Den un caso asina Servicio di Impuesto tin e formulario

WILLEMSTAD – E problema di suministrashon di awa na e Marshe Flotante, por resultá den un problema serio pa salubridat si esnan responsabel no aktua pronto. E komersiantenan venesolano tin sigur dos luna kaba sin awa potabel suminsitrá dor di Aqualectra. Sinembargo Aqualectra no tin niun problema pa konektá awa pa e komersiantenan.
Ya ta algun tempu kaba ku e komersiantenan di e barkunan di fruta no tin suministrashon di awa, ku tur konsekuensia pa situashonnan no higiéniko. Aqualectra di su banda ta dispuesto pa konektá awa mes ora pa e komersiantenan, basta nan hasi un petishon manera tur otro kliente. Anteriormente Aqualectra a instalá un sistema di ‘paga tinu’ pa e komersiantenan i no tabatin problema ku e suministrashon di awa. E komersiantenan tabata kumpra nan karchi i tur momento nan tabatin awa. Dado momentu Aqualectra a nota ku e sistema di ‘paga tinu’ no tabata funshoná 100% i por a usa awa sin paga. Pa e motibu akí Aqualectra a deskonektá e sistema i asina evitá mas pèrdida di awa. Segun Aqualectra e ‘lekverlies’ tabata enorme.
For di e momentu ei e komersiantenan mester a buska nan mes awa. Segun nan a informá LA PRENSA, e situashon akí tin mas o ménos dos luna kaba asina. Mayoria di nan ta kumpra awa na bòter miéntras otronan ta haña awa for di nan konosínan akí na Kòrsou. E situashon akí no por keda asina, segun nan a informá LA PRENSA, ya komo ku nan tin ku laba nan frutanan i bèrduranan tur dia. Tambe nan mester di awa pa nan baña, laba nan pañanan i tene nan barkunan limpi.

WILLEMSTAD - E kampionato di Beisbòl Veterano a kontinuá djasabra último i tin e siguiente resultadonan.
Otrabanda a sorprendé Yesterday ganando ku skor pèrtá di 6-5.
Modesto Zinhagel a tira un tremendo wega, yudá pa un kantidat di eror di parti di Yesterday, ya ku e kuadro di Yesterday a kometé no ménos ku 5 eror ku a kosta nan e wega.
Pa Otrabanda: 6 kareda, 3 hit i 3 eror. Picher ganadó Modesto “Moi” Zinhagel. Mihó bate Marlon Rog i Eithel Mercelina di 2-1.
Pa Yesterday: 5 kareda, 7 hit i 5 eror. Picher pèrdèdó Erwin Curial. Mihó bate Dennis D’Arnault di 2-2.
Eagle ta gana Amstel pa default, pasobra Amstel no por a sera nuebe hungadó.
Ku esaki Amstel ta pèrdè pa di dos biaha pa default i outomátikamente ta keda ekskluí di partisipashon na restu di kampionato.
Debí ku Amstel no ta partisipá mas na kampionato, mester kambia e skèdjel i ta pidi tur ekipo pa tene kuenta ku esaki.
Kuminsando otro siman lo hunga un wega so riba djasabra ku ta pa 3’or di atardi.
Djadumingu lo hunga 3 wega i meskos ku aña pasá un ekipo lo ta liber pa e fin di siman. Pero p’e fin di siman aki weganan lo sigui normal segun e skèdjel ku tin aktualmente.
E weganan ku tin p’e wikènt aki ta tuma lugá riba Vèlt Salu.
Djasabra pa 1’or di atardi Sta. Rosa Memories kontra Eagle Veterans i pa 15.30 The Bears kontra Yesterday.

WIMBLEDON – Rafael Nadal, apoyá ku un sùrf potente i efektivo, a kuminsá ku paso firme su kampaña na Wimbledon ora el a derotá e aleman Andreas Beck den promé rònt den tres sèt.
E spañó Nadal di dos preklasifiká den sektor maskulino, no tabatin masha doló’i kabes pa sali viktorioso.
“E debut semper ta hopi kompliká, pero m’a hunga estupendo”, Nadal a bisa. “Mi tabata un poko nervioso. E tabata duru, pero mi tin bunita rekuerdo di e último dos aña”.
Nadal a pèrdè e dos último finalnan di Wimbledon kontra Roger Federer, esun di aña pasá den un wega ku a bai sinku sèt.
El a gana e kuater último Habrínan di Fransia, pero te ainda ta buska su promé título di Grand Slam riba un suela ku no ta esun di klei di Roland Garros.
Tambe djamars, e merikano Andy Roddick, dos bia finalista di e torneo, a kaba e resistensia di e argentino Eduardo Schwank pa gan’é den tres sèt.
Di otro banda e argentino Guillermo Cañas, e ecuatoriano Nicolas Lapentti i e colombiana Catalina Castaño a keda eliminá den promé rònt, miéntras ku e argentinonan Agustin Calleri, Martin Vassallo Arguello i Gisela Dulko a klasifiká pa di dos rònt.
Calleri a bin djatras pa gana e surafrikano Kevin Anderson. Arguello a superá e cheko Ivo Minar i Dulko a dal Aravane Rezai.
Cañas a kai kontra e aleman Tommy Haas; Lapentti a retirá kontra e serbio Viktor Troicki i Castaño a kai kontra e indio Sania Mirza.

PENSACOLA, Florida – Komité olímpiko merikano a apelá e desishon di un wes ku ta pèrmití e koredó suspendé Justin Gatlin kompetí den e eliminatorio olímpiko di Merka.
E apelashon a ser presentá djamars den un Korte na Atlanta, i su intenshon ta pa revoká un òrdu di e wes merikano ku a bai kontra e suspenshon di kuater aña di Gatlin pa doping.
Nuebe abogado di Komité Olímpiko, di federashon di atletismo merikano i di e agensia antidopong di e pais ei a trata di konvensé e wes federal Lacey Collier pa e revoká e desishon di djaluna. Pero e wes a wanta su desishon pa sigur te djamars.
Gatlin, tanten, ta prepará su mes pa kompetí den e eliminatorio di 100m di e kampionato di Merka ku ta kuminsá djabièrnè na Eugene, Oregon.
Si pèrmiti’é kompetí den e evento, Gatlin lo tin sufisiente pa keda entre e tres promé pa gana un puesto den e tim di Merka.
Sin embargo, Komité Olímpiko di Merka a bisa djaluna ku Gatlin lo no por bai e Weganan di Beijing sin importá e desishon di e wes na Pensacola.

QUITO – E gol komo bishitante, di vital importansia den desishonnan anterior, lo stòp di konta dòbel pa e final di Kopa Libertadores ku for di djarason lo ser realisá pa Liga de Quito di Ecuador i Fluminense di Brazil.
Asina e regla di Conmebol ta fiha, e entidat ku ta dirigí futbòl suramerikano.
Si Liga i Fluminense kaba empatá na punto i den diferensia di gol despues di e di dos wega dia 2 di yüli na Rio, lo hunga prolongashon di 30 minüt, den dos pida di 15 minüt. Si keda empatá, lo disidí e seri ku pinalti.
Di bèrdat, e gol komo bishitante nunka a bal dòbel. Pero e tema a bira popular asina i a lo largo e tabata e úniko manera di simplifiká e asuntu.
E regla di Conmebol ta kla: promé ta duna prioridat na definishon di punto i den kaso di empate, einan sí ta drenta na vigor e golnan.

WILLEMSTAD – Te ku algun luna pasá e komersiantenan di e Marshe Flotante, tabata por a yena awa den djùk pa nan uso diario. E bista akí tabata típiko. Aktualmente no tin kranchi di awa mas ni tampoko suministrashon di awa. (Foto: Yves Cooper)

WILLEMSTAD - Vivian Troncon djasabra último a sali kampion durante di e Curaçao Championship di Taekwondo ku a tuma lugá den sala di Don Bosco.
Troncon a bringa den e kategoria ‘Fin Weight’ kontra Kimberley Rog di King Taekwondo.
Den un pelea ku a dura 3 rònt Troncon ku tin 14 aña a derotá su kontrinkante ku un skor di 12-5.
Tambe Vivian a wòrdu pidí pa bringa un asina yamá pelea di eksibishon ku Corvianique Nicolina di Olympia Taekwondo.
Maske ku Vivian a keda ku leshon di su promé pelea, el a subi mat i hasi su bèst pa tòg por a duna un bon bataya.
Seven Star Taekwondo Academy ta felisitá Vivian Troncon ku su logro.
Tantu su dos coachnan, su mayornan i alumnonan di Seven Star Taekwondo Academy ta sumamente orguyoso di Vivian i tambe nan ta spera ku Vivian lo dal bai den e bon kaminda.
Seven Star alabes ta gradisí Angelique Presilia, Roline i Albert Gomes, Soraida Juliana, Dangelo Maduro, Fam. Alias, Huize Pellitier, Sedreko, CWM, Toyota, Kuster Trading, Danella NV, Kambes i naturalmente tur alumno pa nan sosten den e promé 6 lunanan di eksistensia di Seven Star Taekwondo Academy.

Skina di Sorti, awe djarason 25 di yüni di 2008, ta kuminsá ku deseá tur hende un bon dia. Akshoná sin konosementu di e elementonan relevante ta enserá korementu di riesgonan grandi. Te hasta esun ku ta bon fortuna ku don eksepshonal, ta hinka su mes den un posishon di desbentaha kaminda e ta limitá na postura reakshonario (konfrontá ku reto òf oportunidat e ta improvisá).

Akshona a base di eksperiensha ta garantisá únikamente un mihó ehekushon di lokual keda determiná pa hasi. Nos tin poko disposishon pa siña (haña konosementu) i ta karesé di eksperiensha riba algun aspekto importante di polítika.

E falta di trankilidat pa evaluá asuntu i midi impakto di eventual akshonnan (“think things through”) ta un di e mayor defisiensianan den direkshon di mayoria organisashon polítiko. Un otro defisiensia grandi ta e falta di ambishon sano, esta e disposishon mental pa progresá den kapasidat pa hasi kos. Kasi tur pensamentu ta ku mira riba lokual tabata hasi ayera enbes di lokual ta hasi bo mas kompetitivo den e mundu di futuro.

Ora ku bo ta limitá na rekursonan natural, bo por aspirá ainda di ta kompetitivo kontra di esnan ku di momentu ta disponé di mas rekurso. Esei ta nifiká ku bo mester por pensa mas aya di e delimitashonnan teritorial konvenshonal. E konsepto “outsourcing” ta un ehèmpel di pensamentu ku ta bai mas leu di e kuadronan tradishonal pa lokual ta base di rekursonan ku ta disponibel pa un empresa. Na un otro okashon lo mi eksplorá e tema aki ku mas profundidat.

AIROPUERTO BEN GURION, Israel – Un polis israelí a mata su kurpa ku un tiru den kabes djamars durante e seremonia di despedida pa e presidente franses Nicolas Sarkozy, asina outoridatnan a bisa, kousando temor di un atentado i a pone ku e agentenan di seguridat a saka Sarkozy i e promé minister israelí Ehud Olmert for di e lugá.
E tiru a bini miéntras un banda tabata toka un himno na Airopuerto Ben Gurion, i al pareser e lidernan polítiko no a tende nada. E agentenan di seguridat, bistí ku trahe skur i sakando arma, mesora a hiba Sarkozy i su kasá via trapi paden di su avion. Yená ku pániko, Carla Bruni-Sarkozy masha lihé a subi e stèpnan pasando dilanti su esposo.
Na mes momento, otro agentenan a hiba Olmert i e presidente israelí Shimon Peres na nan outo. E insidente a dura algun minüt i Olmert a bini bèk i subi e avion di Sarkozy pa inform’é loke a pasa, asina testigunan a bisa.
Shlomi Sagui, bosero di polis, a konfirmá ku un polis ku tabata kuida e airopuerto a mata su kurpa nèt ora Sarkozy tabata na punto di subi su avion i e banda tabata toka.
Otro bosero polisial, Micky Rosenfeld, a ninga informenan di ku ta trata di un intento di asesinato kontra e mandatario franses.
E polis komandante di e zona, Nissim Mor, a bisa ku ta investigando e echonan. “Nos ta investigando e sirkunstansianan pa mira si tabata un suisidio o si e arma a tira pa aksidente”, el a señalá. “Su mishon tabata di defendé e aria pa evitá ku hende ta yega serka dje seremonia”, el a agregá.

WILLEMSTAD – Hopi interes pa konsiertonan titulá “On Eagle’s Wings Worship & Praise Days” ku lo tuma lugá otro siman na Hulanda. E evento aki ta hañando reakshon pa motibu di e presentashonnan di Junny Anzola i Junaida Ferero huntu ku Boy Thode i evangelista/pastor Norwin Josepa. For di 3 di yüli e promé anochi na Tilburg tin un interes grandi ta biba sperando e gran anochi di e konsierto ku lo tuma lugá den Theater La Vida (Veldhovenring 79). Esaki lo bira e promé konsierto di un seri di kuater ku lo keda selebrá riba petishon di hopi ku ta skucha e programa spiritual na emisora MAS 99, Mas Bida Abundante, den kua evangelista/pastor Norwin Josepa ta ministrá.
E di e dos konsierto lo tuma lugá riba djabièrnè 4 di yüli na Nijmegen na Kolpinghuis (Smetiusstraat 1) i djasabra e konsierto aki lo tuma lugá na Rotterdam. Riba e anochi di djaweps i djabièrnè e konsierto lo ta di 19.00 pa 22.30, ku lo bira un anochi di kanto di alabansa i adorashon, ku interpretashon di Junny Anzola, Junaida Ferero i Boy Thode, miéntras ku ministrashon di e palabra di Dios ta na enkargo di evangelista/pastor Norwin Josepa.
Djasabra 5 di yüli e konsierto na Rotterdam lo ta for di 13.30 pa 18.30 na Gemeente Triomfator Kerk Zout der Aarde (Krabbendijkstraat 255-Pendrecht). Djadumingu 6 di yüli lo tin e konsierto na Amsterdam na Christen Gemeente Philadelphia (Amsterdam Zuid Oost-Garage Echtentein 100D) pa 14.30 pa 20.00. Entrada pa e konsierto ta 10 euro i pa mucha te 11 aña lo paga 5 euro. Durante e anochinan di konsierto lo tin ministrashon di e palabra i tambe lo hasi orashon pa sanashon, liberashon òf kualke otro nesesidat.

WILLEMSTAD – CPA ta buskando alternativa pa e situashon ku a surgi entre Aqualectra e venesolanonan ku ta bin ku barku di fruta. Den kòmbersashon ku direktor di CPA, Agustin Diaz, ta splika ku enbèrdat tin un situashon ku mester buska un mihó alternativa, debí ku uso di awa destiná pa e venesolanonan a bira un manera inkontrolabel. Diaz ta splika ku e barku nan ta pagando ‘liggeld’ ku ta duna nan sierto servisio. Den pasado CPA tabata paga awa ku nan usa, pero e kantidat di plaka ku tabata paga ta hasi ku ta manera CPA tin negoshi di awa.
No ta bisa ku ta e venesolanonan lo ta usando e awa na kantidat, pero mester a buska un forma. Despues di esaki Aqualectra a introdusí un sistema di karchi ku tambe no a funshoná i ku mester bai na buska un alternativa pa e servisio por drecha. Segun Agustin Diaz mester bai traha pa yega na un mihó servisio, pero meskos tambe pa un mihó forma di uso di awa ku lo sali e kantidat di plaka ku CPA tabata paga den pasado.
Talbes despues di e kambio aki a hasi ku e propio Aqualectra a nota ku tin algu ku no ta kanando bon ku uso di e awa na e área di Skalo, spesialmente pa esnan ku ta bishitá e isla ku barku di fruta. LA PRENSA a komprondé ku mester keda pendiente pa un alternativa ku CPA lo presentá pronto pa mehorá e situashon aki.

WILLEMSTAD – Richard Lopez Ramirez ta konsiderando pa entamá un kaso hudisial kontra Hero Brinkman, despues ku e último a ninga di rektifiká riba su petishon. Ta trata di e publikashon ku a tuma simannan atras den kua Hero Brinkman a publiká un lista di persona ku e ta denunsiá komo korupto. E úniko ku a reakshoná tabata Richard Lopez Ramirez, direktor di CPA, kende via di e bufete di abogado Gelmer Pieter a manda un karta pa Brinkman eksigiendo pa rektifiká.
Den deklarashonnan ku Brinkman a hasi den medionan hulandes ta indiká ku su persona lo no kumpli ku petishon di e abogado Pieter. Den e karta ku abogado Pieter a manda pa Brinkman ta bin e parti dilanti ku si mester resultá ku no rektifiká lo bai entamá un kaso den Korte pa hasi ku wes lo duna sentensia na fabor di su kliente pa drecha loke Brinkman a purba ku su nòmber.
Den kòmbersashon ku LA PRENSA a sostené ku abogado Gelmer Pieter a deklará ku hustamente ayera tabatin kòmbersashon ku su kliente riba e desaroyo i ta spera riba lus bèrdè pa atendé esaki via un ofisina di abogado establesé na Hulanda. Ta den oranan di awe tardi un kontesta definitivo di Lopez Ramirez ta determiná pa inisiá ku un kaso den Korte pa hasi ku Hero Brinkman lo rektifiká.

WILLEMSTAD - Digicel, e kompania di selular ku mas ta kresiendo den henter Caribe i ta un partisipante nobo den e merkado Sentro Amerikano, a anunsiá awe ku nan a sera nan aña fiskal dia 31 di mart 2008 ku un kantidat rèkòrt di usuario, esta 6.54 mion kliente. Esaki riba su mes ta representá un kresementu di 39% kompará ku e mesun kuartal di aña pasá. Operando ya kaba den 23 diferente merkado, Digicel Group ta sigui eksperensiá kresementu sostenibel den merkadonan eksistente miéntras ku nivelnan di penetrashon den merkadonan nobo ta sigui krese.
Na novèmber 2007, Digicel a duna inisio na su operashonnan na Sürnam ku masha éksito, ofresiendo servisio superior na e pueblo Surinameño, mas balor pa nan plaka, mas kobertura i na mes momento tabata instrumental pa oumentá e penetrashon di selular for di 50% pa serka di 70% den e pais.
Digicel ya kaba a logra penetrá den e merkado Latino Amerikano dor di su presensia na tantu Guyana komo tambe na Guyana Franses. Su retnan GSM den Caribe i Sur Amérika ta ekstendé tambe na British West Indies, Caribe Hulandes (Islanan ABC), French West Indies, Bermuda i El Salvador.
Digicel su ekspanshon lo sigui durante aña 2008 ku inisio di su operashonnan na British Virgin Islands, miéntras ku Digicel Central America Holdings, e kompania ruman di Digicel Group, ya ta preparando kaba pa start ku su operashonnan na Hondúras i Panamá. E merkadonan aki lo oumentá e total di merkadonan den kual Digicel ta operá na un total di 26 pais.

Prof. dr. Lorito ta yama tur hende un felis dia 25. Nos a kanta San Juan, bula kandela, dera gai, awa a kai i lo sigui kai tambe. Kiko mas no ke?
****
Nan a splika nos ku ora bo bai bula kandela di San Juan i bo kai, esei ta trese masha problema! Nos a mira un dama ku a kai i nos ta kere ku e mester bai buska un manera lihé. No tuma e kos aki levemente, pasobra di hende ku ta kere den “kos” nos a komprondé ku no ta kos di hasi wega!
****
Parse ku GGD no ta di akuerdo pa prolongá e kontrakt na BZV. A pone e konseho di GGD un banda, segun Lorito a tende. Lógikamente si oposishon hole e kos aki, lo tin otro reunion atrobe. Ban wak kiko lo pasa.
****
Ayera nos a menshoná ku gobernashon di Sint Maarten ta kaótiko, pero si nos mira kiko a pasa ayera na Kòrsou, nos no por yega na un otro konklushon ku na nivel insular tambe kosnan no ta kanando bon pa no bisa algu mas pió. Asuntu ku koalishon ta bandoná reunion ora trata moshon ta muchachada. Nos a pidi masha tempu pa tur hende aktua madurá. Ta un Kòrsou Nobo ta bai krea tòg? Kere nos ku si sigui asina aki mas i mas hende lo bira lomba no solamente pa polítika, pero pa Kòrsou nobo tambe.
****
Nos no a tende Ombudsman bisa nada riba e aviso masha mahos ku Aliansa Patriótiko a saka siman pasá. Na nos pensamentu, e tipo di avisonan aki (anke di oposishon) tambe mester haña komentario di Defensor di Pueblo. Nos no ta kere ku e palabra Defensor di Pueblo ta referí na loke gobièrnu bisa so, pero na tur órgano representativo i eligí. Nos ta wardando ansiosamente riba kontesta di Ombudsman pa sa si “ambtshalve” (manera un palabra popular ku e ta usa tur ora), lo kuminsá un investigashon riba e aviso aki. Defensor di Pueblo por mira korantnan di siman pasá!

BRUSSEL / WILLEMSTAD – Komishon Oropeo a saka awe mainta loke nan ta yama un “groenboek”, ku ta enserá un nota di diskushon riba e futuro relashon entre Union Oropeo i e teritorionan ultramar. Awor aki e relashon entre e teritorionan aki i Union Oropeo ta reglá den e akuerdo di LGO (Land en Gebieden Overzee). Ku presentashon di e nota awe, Komishon Oropeo kier lanta un diskushon riba e relashon entre Union Oropeo i e paisnan di ultramar. Paisnan di ultramar ta e teritorionan ku tin un relashon históriko i fiho ku miembronan di Union Oropeo. Mayoria di e relashon aki tin su base di tempunan kolonial. Segun Komishon Oropeo, e proposishon nobo lo tene mas kuenta ku karakterístikanan di e paisnan aki i e kondishonnan ekonómiko den e 21 teritorionan LGO.
Komisario di desaroyo i yudansa humanitario Louis Michel a bisa ku e teritorionan ultramar tin masha balor pa Oropa. “Nos mester rekonosé ku relashonnan ku ta sali for di e punto di bista di un modelo tradishonal di yudansa di desaroyo no ta kuadra mas den nos tempu konsiderando globalisashon. Mester modernisá e relashon entre Union Oropeo i e teritorionan aki rápidamente di manera ku por tene kuenta ku e kambionan global, e realidat nobo i liberalisashon di komèrsio internashonal”, asina Michel a bisa.
Pa motibu di nan relashonnan partikular ku Dinamarka, Fransia, Ulanda i Gran Bretaña e paisnan aki tin lasonan estrecho ku Union Oropeo. Pa motibunan históriko e lasonan aktual ta inspirá riba e relashon ku teritorionan na Afrika, region di Caribe i Oséano Pasífiko. Pero tur e paisnan aki ta konfrontando relatonan serio, asina Union Oropeo a bisa.