ORANJESTAD- Manera ya a anuncia luna cu a pasa, tur automobilistanan di Aruba cu e sticker di SETAR di BO TAMBE! riba nan auto, ta participa den e campaña di 5 aña di NV di nos compania nacional SETAR y por gana premionan. E ganadornan cu tin sticker riba nan auto ta:
A-37402
A-30465
A-15535
A-41261
Doño di e number di autonan menciona por pasa na Oficina na Seroe Blanco pa reclama nan premio cu nan a gana. Loke mester trece ta e papel di registracion di e number di auto y un identificacion valido.
E departamento di Mercadeo lo entrega e premio na cada un di e participantenan aki cu ta un gift certificate na balor di Awg. 150.00
Pabien ta bai pa tur e automobilistanan cu a gana y ta motiva un y tur cu no tin sticker ainda pa busca uno na cualkier Teleshop di SETAR plak esaki riba bo auto y participa pa gana den e tremendo campaña cu tin como celebracion di e 5 aña cu SETAR ta NV: SETAR di BO TAMBE!

ORANJESTAD- Na Luna di november Mgr. Luis Antonio Seco lo bini Aruba pa suministra Sacramento di Confirmacion na Parokia Inmaculada Concepcion na Santa Cruz.
Esaki ta pa tur hoben cu a caba scol basico o cu ta bishita un scol avansa caba y cu ta biba den parokia di Sta. Cruz cu kier ricibi e Sacramento aki.
En coneccion cu esaki nos ta informa mayornan cu inscripcion pa Sacramento di Confirmacion lo ta riba e siguiente dianan di 5:00 pa 6:30 di atardi na Pastorie Santa Cruz parti pa nort.
Dia 30 di juni 2008 ta pa esnan di COLEGIO LAURA WERNET PASKEL
Dia 01 di juli 2008 ta pa esnan di MARIA SCHOOL
Dia 02 di juli 2008 ta pa esnan di CACIQUE MACUARIMA SCHOOL
Dia 03 di juli 2008 ta pa esnan di COLEGIO SAN HOSE
Dia 04 di juli 2008 ta pa esnan cu no por a bini e fecha stipula
Dia 07 di juli 2008 ta pa esnan cu TA BISHITA UN SCOL AVANSA CABA.
E hoben mester presenta su mes cu un identificacion y un prueba di bautismo. Si e hoben a batisa na un otro parokia e mester busca su papel di bautismo na e parokia concerni, sino e no por ser inscribi.
E prueba di bautismo por ta trouwboek of kaarchi di bautismo.
Ta pidi mayornan pa tuma bon nota di esaki y cumpli cu e dianan y orario stipula.
Nos ta pidi un contribucion di Afl.15,=esaki ta pa cubri gastonan di lunch box,material etc

ORANJESTAD- Ta un secreto publico cu despues di e resultadonan di e “Nationale Eind Toets” di aña escolar 2006 / 2007 nada no a wordo haci, di parti minister ,pa por a juda e diferente scolnan pa mehora nan resultado.
Diferente cabesante y guia interno a wordo jama pa papia di e resultadonan . Lesa bon.. algun, no tur esnan cu a wordo jama, a haña tende den concreto con nan scol a score.
E scolnan en cuestion lo mester a scohe kico nan lo ta desea cambia pa nan scol (lesamento, matematica of idioma) y nan den nan cuerpo di maestro nan mes mester a bay traha hunto un “verbeterplan”. Si, e famoso “verbeterplan” cu minister ta papia di dje, pa logra mihor resultadonan.
Un tardansa di otro mundo……...
Den e mundo globalisa, computarisa cu nos ta biba aden, ta tuma maximo di 2 dia pa saca resultadonan di cualkier “toets”. Ta kico a pasa cu e resultadonan di e “Nationale Eind Toets” atrobe no a sali ainda? Paso ja un luna a pasa y nada! Lo ta cu minister ta wardando pa e bay show cu e resultadonan aki?
Pa bisa cu danki na su bon maneho e resultadonan ta mihor e aña aki? Mi ta spera cu prome cu scol sera nos lo por haña e resultadonan di e “Nationale Eind Toets”, pa asina scolnan por prepara bon pa ora scol habri y no warda te cu mei aña pasa manera aña pasa!
E resultadonan di “Nationale Eind Toets” 2008……...
Manera cu diferente maestro y maestra a confirma na nos, despues di a tuma nota di loke ta wordo evalua den e “toets” di e aña anterior, nan a bay over na prepara (= train!) e muchanan pa cu e forma con e preguntanan ta wordo haci y tambe nan a busca materialnan extra pa zorg pa nan trata e diferente partinan cu nan mester por domina pa por traha e “toets” bon.

ORANJESTAD- Despues cu e miembronan a vota riba 12 di juni 2008 ultimo y a eligi nan presidente nobo den persona di sr. Richard Maxwell, e reunion di traspaso di documento a tuma lugar su diahuebs 19 di juni 2008 den sala di conferencia di Dr. Horacio Oduber Hospital.
E presidente saliente sr. Howard Maxwel a entrega un relato di traspaso di directiva 2008, den cual tin stipula tur loke a sosode durante e ultimo dos anjanan. El a elabora ampliamente riba tur punto den e relato y despues a haci entrega di esaki na e presidente nobo.
E enfermera y enfermeronan cu a postula nan mes como candidato pa forma parti di e directiva a expresa nan mes y e votacion pa e diferente funcionnan a tuma lugar.
E directiva nobo eligi ta como lo siguiente.
Presidente ta sr. Richard Maxwell
vice presidente ta sr. Michael Quandt
secretario ta sra. Sharlyn Farro-Tromp
tesorero ta sra. Astrid de Palm-Tromp
comisarionan ta sra. Tecla Celaire-Eduardo, Magaly Farro (segundo vice presidente), Juelson van der Biezen (segundo secretario). Shirley Isei (segundo tesorero), Miriam Kock y Lorencia Geerman (coordinador di projecto).
A apunta sra. Morgan Arrindell como Relacionista Publico di ODEA den cuadro di e preparacionnan pa e Conferencia di CNO 2010 na Aruba .
E prome reunion di e directiva a tuma lugar Dialuna 23 di juni 2008 den e leslokaal di Simar na Sero Blanco, y tabata pa e miembronan sera conoci cu otro y ricibi informacion encuanto e plannan riba corto y largo plaso.

ORANJESTAD- Recientemente en coneccion cu celebracion di e 60 Aniversario di Aruba Lions Club, diez organisacion a ricibi un donacion, separa di e donacionnnan cu ta ser reparti normalmente durante aña.
E donacionnan a ser reparti den diferente forma, e promer parti a socede den e DEN di Aruba Lions Club na unda cu den presencia di Lions y Lionessnan, cuatro organizacion a duna un presentacion tocante e trabow cu nan ta hasi pa comunidad, splicando e necesidadnan y desaroyo en general den e sector cu nan ta activo.
E promer organizacion cu a hasi un presentacion ta “Fundacion ban uni man pa cria nos muchanan” den persona di Sra. Felicia Halman, kende a splika en extenso nan operacion, cantidad di muchanan cu ta ricibi nan desayuno for di e voluntarionan y e necesidad cu ta creciendo. Hopi mucha den comunidad ta depende ariba e ayudo aki, pa cual motibo Aruba Lions a escohe pa hasi posibel cu e fondonan ricibi nan por sigi hasi e trabow valioso aki den comunidad.
HOBENNAN
E di dos organizacion cu a hasi un presentacion ta “Fundacion Teen Challenge”, representa pa Sr. Freddy Biesum den compania di Miembro di Direktiva di Teen Challenge, Sr. Franco do Nacimento. Durante e presentacion, Teen Challenge a splika specialmente tocante e trabow cu nan ta hasi den KIA, impartiendo cursonan cu ta juda den e parti di rehabitalizacion di esnan cu a cai sera, den cooperacion cu reclassering.
Tambe a comparti cu e nomber di e organizacion por confundi hopi, pero cu “Teen Challenge” ta duna asistencia ariba diferente tereno social. Teen Challenge tin e vision pa den futuro cercano nan por bin cu un rehab center pa hobennan, cual ta hopi necesario, specialmente tumando na consideracion e edad hoben cu ya caba nos muchanan ta cuminsa usa sustancianan adictivo. Aruba Lions a contribui pa asina nan por sigi buska material pa nan trabow, specialmente den KIA.

ORANJESTAD- En coneccion cu celebracion di e 60 Aniversario di Aruba Lions Club, diez organisacion a ricibi un donacion, separa di e donacionnnan cu ta ser reparti normalmente durante aña
Despues a sigi e tercer organizacion cu ta “Fundacion Mary Joan Breast Cancer Support” kende tabata representa pa Sra. Enrita Werleman y Sra. Deta Figaroa. Sra. Werleman a splika e importancia di tin informacion disponibel pa esnan cu ser detecta cu cancer, especialmente cancer di pecho y tambe e asina jama “support group” pa tanto e patient como tambe e famia di e patient.
Nan trabow ta encera entre otro pa bishita patientnan na cas y hospital, dunando apoyo y informacion na esnan cu ser detecta cu e enfermedad aki. Aruba Lions ta considera importante e parti di educacion den forma di material disponibel pa esnan cu ta pasando den momentonan dificil y tambe cu tin voluntario cu ta pone un cantidad di ora disponibel na bienestar di nos comunidad, cual sigur ta algo di aplaudi y apoya.

Ultimo pero sigur no menos importante, “Fundacion Edmund Harms” a duna un presentacion cu tabata na encargo di Sra. Sonia Jacobs. Sra. Jacobs a duna tambe un splicashon di nan trabow cu ta depende casi completo ariba donacionan di instancianan y di e trabow noble cu nan ta hasi.
Fundacion Edmund Harms ta asisti e pacient di cancer y su famia den e parti terminal di e malesa, na unda cu profesionalnan y voluntarionan ta compaña e pacient y su famia den e ultimo dianan di bida, specialmente e pacientnan cu ta na cas pa asina pasa nan ultimo dia serca di famia y den un ambiente conoci.