Logro di Mike Eman y Benny Sievinger di AVP

ORANJESTAD- Awe mainta Tweede Kamer cu gran mayoria, a bai di acuerdo pa trece cambio den e ley di votacion, caminda lo permiti Arubiano y Antianonan, pa vota den eleccionnan pa Parlamento Europeo.
Despues di discusionnan cu a tuma lugar den Tweede Kamer awe mainta, e cambio di voto a haya un sosten amplio y asina a bai di acuerdo cu e peticion cu a wordo haci pa e lider politico di partido AVP, esta Mike Eman, hunto cu otro miembro di e partido, esta Benny Sievinger.
Anteriormente e dos politiconan Arubiano ya a presenta un peticion na Corte di Husticia Europeo pa mustra cu Arubiano y Antianonan tambe tin mesun derecho pa vota cu esnan di Hulanda tin.
E peticion pa cambio di e dos politiconan tabata a base cu no por permiti cu ta haci un diferencia entre un Hulandes cu ta biba for di Europa of Hulanda y e Hulandesnan di Antias y Aruba.
Segun e ley di votacion actual di Hulanda, tur ciudadano cu tin un pasaporte Hulandes, por vota for di tur parti di mundo den e eleccion Europeo pero esaki no a ser permiti te cu awor pa esnan di Aruba y Amtias.
Awe mainta Tweede Kamer a bai asina leu na sostene e cambio pa esaki y cu lo permiti Arubiano y Antianonan pa vota den e proceso electoral Europeo.

WILLEMSTAD – Minister di Hustisia David Dick a kondená enérgikamente e lokual ku un grupo di manifestante a hasi ayera. Ounke Dick a papia di ‘tres pipita di hende’, el a konsiderá loke a pasa ayera komo un disturbio i no un demostrashon. “E susesonan di ayera a yega hopi serka di terorismo”, e minister a bisa.
E deklarashonnan akí minister Dick a hasi awe mainta durante un konferensia di prensa ku polis a tene. Bosero di kuerpo polisial, inspektor Reginald Huggins, a papia di un kantidat di insidente, unu mas grave ku otro. Huggins a splika ku tarea di polis ta pa mantené òrdu públiko i nan no tin problema ku niun hende ku ke manifestá.
“Meskos ku nan tin e derechi pa manifestá, nos tin e deber ankrá den lei pa mantené òrdu públiko. Na diferente okashon e manifestantenan a manifestá violento dor di sende kandela i tira un ‘molotov cocktail’ ku no a funshoná. Tambe deskonosínan a destruí e kashi di koriente na e edifisio di Konseho Insular. Tabatin tambe diferente distrukshon rondó di e edifisio i na vehíkulonan di hendenan ku tabata pasa den e área. A destruí lusnan di outo, blòkia kaminda públiko i tira kos riba kaya. Polis a tolerá basta ayera, pero a yega momentu kaminda ta bai tuma e kos aki muchu mas na serio.”
Mas aleu Huggins a hasi menshon tambe di un hóben ku a bira víktima di agreshon dor di un grupo di hòmber. E grupo a drenta den un establesimentu di horeka den Pietermaai i a agredí klientenan ku tabata na e sitio. Nan a maltratá entre otro un dama di riba 60 aña. E hóben a haña un fraktura serio na su kráneo okashoná pa un sla ku un pieda. “Lamentabel ta ku esaki a sosodé ku un di nos mes hendenan, un hóben yu di Kòrsou”, Huggins a bisa. “Polis a keda aktivo di un forma skèrpi te den oranan di mardugá patruyando, i banda di 2’or nos a baha nos intensidat un poko.” Finalmente Huggins a hasi un yamada na tur hende ku a bira víktima di sea destrukshon òf menasa, pa bai warda di polis pa entregá nan keho. “Bou di guia di Ministerio Públiko lo bai arestá e hendenan ku a falta ku lei ayera.”

Skina di Sorti, awe djabièrnè 27 di yüni di 2008, ta kuminsá ku deseá tur hende un bon dia. Tal pasobra e alegashon di aktitut anti demokrátiko ta aparesé hopi denter di e kakafonia polítiko di algun eksponente polítiko ku tin e kustumber di grita kosnan ku nan ta kere tin impakto popular, hopi ta ignorá lokual ta un realidat amargo. Si nos no paga tinu, nos lo por bin kai den práktikanan ku en esensia no ta muchu leu na esnan na Zimbabwe. Hopi “schertsvertoning” ku no tin nada di haber ku e prosesonan di un órden demokrátiko.
E aplikashon di táktika pa mata e “debate polítiko”, esta un interkambio skerpi di idea, táktika pa aludí e proseso di dunamentu di kuenta i rason i táktika pa pasa dor di redanan di proseduranan pa sigurá trato igual i eskoho huisioso, kombiná ku un violashon di reglanan di transparensia, ta alkansando frekuensia i magnitut molestioso. Outokrítika aparentemente no ta eksistí tampoko den seno di koalishon, kaminda mas i mas ta brasa e filosofia ku “het doel heiligt alle middelen”.
Temanan ku tin di haber ku asuntunan fundamental, sea kual sea e pretenshon di koalishon ku nan ta e úniko manera òf laga, mester wòrdu debatí den e forma mas amplio posibel pa por yega na desishon ku por tin legitimidat demokrátiko. Ta inaseptabel pa apliká táktikanan ku a bira kustumber ora di atendé ku kosnan rutinario, riba temanan di fundamental importansia ku de facto ta rekerí di un mayoria kalifiká.

WILLEMSTAD - Forsa Kòrsou a deklará di ta desaprobá enérgikamente tur akto di violensia, agreshon i destrukshon en general i sigur si esaki ta basá riba argumentunan rasial.
E loke a pasa ayera nochi den sierto establesimentu den Pietermaai despues ku e Lei di Supervishon Finansiero a ser aseptá pa Konseho Insular, hamas por ser aprobá pa e partido Forsa Kòrsou.
Aki na Kòrsou nos tin un tradishon di konvivensia, no opstante nos diferensianan.
Komo un pueblo formá pa imigrantenan semper nos a sa di biba den harmonia ku otro.
Forsa Kòrsou a deklará ku a base di su filosofia, su prinsipionan i su statutonan, nan nunka por ta di akuerdo ku lokual a pasa ayera den e establesimentunan den Pietermaai.
Forsa Kòrsou no ke laga niun lugá pa duda ku e kos aki simplemente no por.
Pero den mesun rosea Forsa Kòrsou ta desaprobá e aktitut terko di e gobièrnu di PAR, ku ni maske ki señal sali for di komunidat no ta hasi kaso.
Den e demokrasia partisipativo ku Forsa Kòrsou ta para p’e, tur ekspreshon di pueblo mester haña atenshon.
Forsa Kòrsou ke bolbe ripití, ku e ora a yega pa fris e proseso di struktura estatal sin mas, i laga pueblo papia awor pa medio di un referèndem.
No por sigui dal bai komo sifuera nada no ta pasando den komunidat. E aktitut di ninga realidat, e aktitut di biba den loke ta ser yamá “denial” lo resultá desastroso pa nos komunidat.

WILLEMSTAD - Den kuadro di e diskushonnan riba unifòrm di skol, Fundashon pa Konsumidó ke konsehá tur mayor, espesialmente esnan ku no a kumpra òf hasi pedido di unifòrm ainda, pa averiguá promé serka e diferente proveedornan ku ta bende unifòrm kua por ofresé bo e loke bo mester na un preis mas kumbiniente.
Fundashon pa Konsumidó ta na altura ku for di aña pasá tin diferente empresa ta hasi propaganda pa nan negoshi, anunsiando ku nan por entregá unifòrm di diferente skol i asina brinda e pueblo-konsumidó e oportunidat di disidí na unda e ta kumpra, kiko e ta kumpra i kuantu e ta paga.
Esaki sigur ta di aploudí ya ku e ta nifiká ku e konsumidó no ta obligá di kumpra unifòrm solamente kaminda komishon di mayor òf skol a indiká.
Fundashon ta spera ku tur konsumidó lo hasi bon uso di e posibilidat aki i kumpra kaminda ta mas kumbiniente pa su pòtmòni. Promé ku hasi kompra si, tene kuenta semper ku e akshonnan básiko di kompra, esta kompará e diferente ofertanan, kalidat i servisio ofresé i asina skohe esun ku mas ta kumbiní.
Importante ta pa kada mayor kòrda ku e unifòrm mester kumpli si ku e eksigensianan di kalidat ku e skol ta stipulá. Ku otro palabra, mayornan ta liber pa skohe i kumpra kaminda ta mas barata, pero semper bai teniendo kuenta ku e mesun eksigensianan stipulá tokante di e kalidat.
Aki ta sigui e instrukshonnan manera RK Centraal Schoolbestuur a manda pa tur kabes di skol i ku ta bálido pa e añanan eskolar 2008/2009 tambe.

WILLEMSTAD – Diputado Humphrey Davelaar a duna instrukshon na Servisio di Salubridat Públiko pa aktua na momentu ku deskubrí situashon a-higiéniko na altura di Marshe Flotante na Skarlo.
Manera ta konosí tin e problema di entrega di awa na e tripulashonnan venesolano ku ta bin pa hasi komèrsio i ku e asuntu aki a bira kuestionabel pa salú públiko.
Diputado Davelaar ta splika ku a papia ku su kolega diputado Eugene Rhuggenaath pa por atendé ku e parti di CPA pa mira na ki solushon lo por yega pa ku e tripulantenan por tin awa.
E awa ta importante, ya ku mester por laba e produktonan ku nan ta bende na komunidat i ademas tambe pa e higiene personal.
Atrabes di tempu e venesolanonan a bin ta malusá e awa dor di yena djùknan pa saka awa na un manera ilegal for di Kòrsou.
E mandatario ta amplia pa bisa ku ta imposibel pa laga e awa wòrdu usá sin tin un hende ta paga pa esaki. Esaki ta e motibu ku Aqualectra a deskonektá e awa i ku tin protesta kontra esaki.
Konhuntamente ku CPA ta buskando solushon, miéntras ku kònsùl venesolano a pone su disponibilidat pa paga e konekshon nobo ku mester tin di manera ku e tripulantenan lo por tin awa pa nan uso.
Di otro banda si tuma nota ku den pasado CPA tabata paga demasiado plaka pa uso di awa i for di esaki tin impreshon ku tin un uso di awa inkontrolabel ta tumando lugá. Tin sospecho ku e tripulantenan lo ta yena awa i bandoná e isla ku esaki. Pero pa e parti higiéniko diputado Davelaar ta para ariba ku lo no tolerá un situashon kontra di norma ku ta trese salú públiko na peliger.

WILLEMSTAD – Edifisio St. Thomas lo keda e alternativa pa konstrukshon di hospital nobo, si no presentá otro sitio. E protokòl entre gobièrnu di Kòrsou, gerensia di St. Elisabeth Hospital i Asosashon di Spesialistanan lo keda firmá den oranan di awe tardi.
Den kòmbersashon ku diputado di Salubridat, Humphrey Davelaar, ta splika ku e protokòl lo duna inisio na e proseso ku mester tuma lugá pa konstruí un hospital nobo. Den su deklarashonnan formulá pa LA PRENSA, diputado Davelaar ta duna di konosé te ainda tin e tereno di edifisio St. Thomas ta esun ku lo ta e alternativa pa esaki.
Diputado Davelaar ta amplia ku no por deskartá ku si logra haña otro tereno esaki lo por bira e sitio i ta laga e tereno di St. Thomas kai. Tur esaki ta dependé di e akuerdonan ku yega entre e tres partidonan. Gerensia di Sehos mester por traha den e proseso aki konhuntamente ku Asosashon di Spesialistanan den konsulta ku gobièrnu pa logra un trayekto sano. E proseso pa konstrukshon di un hospital nobo mester sigui i ku tin akuerdonan den kua kada partido mester bai di akuerdo ku e kondishonnan stipulá.
E protokòl ta mara tur tres partido na palabrashonnan konkreto i ku niun no por pasa otro, pero mester mantené otro informá. Den e proseso ku mester traha riba sierto punto pa yega na e bestèk definitivo. E modelo di hospital meskos ku e kantidat di kamber ta sumamente importante. Tokante di e edifisio bieu diputado no por bisa nada, ya ku ta trata di un edifisio ku Sehos ta doño i ku e edifisio aki tambe ta riba lista di monumento.

Lorito ta yama tur hende un felis dia, t’e asina leu ku esei ta posibel. Nos a lanta masha tristu awe, pasobra kosnan no ta kanando bon. Di un banda, un grupito ta daña ambiente pa tur esnan ku ta biba honestamente i ta soda tur dia pa nan pan di kada dia. Lorito ta spera ku un i tur ta tuma bon nota ken e impulsá e desaroyo aki i kua meta nan ta sirbi.
****
Loke a pasa ayera mester di un kondena kompleto. E loke a pasa ta inaseptabel den un sosiedat ku fundeshi demokrátiko. I p’esei nos ta spera ku ta kòrta e kos aki den tòm, no solamente ku palabranan bunita ku nos a bolbe tende awe mainta, pero ku akshon konkreto i determiná. I si mester tuma akshon drástiko, asi sea!
****
Kon ku bo bòltu e situashon, kon ku bo bir’é, outoridatnan no ta sali liber den e loke a pasa ayera. Nan tabata demasiado fleksibel i tolerante i esei no por! Asuntu ku ta filma i no kier a sali demasiado outoritario i brutu riba video, no ta un kos ku mester tene kuenta ku ne. Bo ta outoridat den tur sirkunstansia i mester respetá bo!
****
E loke a pasa ayera tambe lo seya futuro di partidonan manera MAN i Forsa Kòrsou. Kon hende drechi por uni nan mes ku e tipo di bòmbòshi aki? Nos tabatin hendenan manera Charles, Eugene, Urving, Nelson, Gregory i Glen komo hende masha desente. Kere nos: nan ta bayendo abou rápidamente den kredibilidat di pueblo. E úniko solushon pa nan ta: Sali for di tur loke ta hole ekstremismo i anarkismo. Ademas no asosiá ku kosnan moribundo. Tin hende ku nan tempu a pasa i nan no ke aseptá esei!

WILLEMSTAD – Despues di hopi aña Kòrsou a lanta awe ku un rabia inmenso pa loke a pasa den apénas algun ora. Polítikonan a bringa otro un biaha mas (anke esei no ta notisia mas!), arogansia polítiko a prevalesé, tiramentu di palabra (insolente) den direkshon di otro a bira masha normal, deseo pa diálogo i rekonsiliashon nashonal no tei i pa kolmo riba tur e kosnan aki a kousa un disturbio serio pa nos komunidat. Te awe mainta numa hopi hende a tuma nota di e envergadura di loke a pasa ayera, na momentu ku un grupo di hende for di kòntròl a kousa un situashon ku ta inaseptabel den kualke komunidat demokrátiko. E tristu di e situashon ta ku ta dirigentenan polítiko iresponsabel mes a indiká nan pa nan kometé tal akto. E resultado ta un trouma grandi, un hende di nos mes ku heridanan serio na su kabes, bishitantenan morto spantá i nos ta teme pa e publisidat negativo internashonalmente. Outoridatnan a mira loke ta pasa den forma demasiado pasivo. Mayoria hende a ekspresá awe mainta ku nan ke mira un aktuashon mas firme di nos outoridatnan. Awe mainta a anunsiá ku ta esei ta bai ta e maneho awor aki. Anke lat, mihó lat ku nunka! Riba e pòrtrètnan por mira parti di loke a pasa den último 24 ora. Nos tin mas detaye den nos edishon di awe. E pòrtrètnan ta di Rudney Vrutaal i kortesia di Vigilante.

WILLEMSTAD - Maduro & Curiel’s Bank (MCB) a hasi donashonnan ayera na 5 instansia/organisashon ku metanan ambiental. Tur esaki den afan di MCB pa aportá di bèrdè mes na un mihó medio ambiente i trata na konsientisá su amigunan pa nan tambe djòin nan pa huntu sigui kuida nos medio ambiente i nos planeta, asina Kenneth Isidora di gerensia di MCB a bisa den un enkuentro ku a tuma lugá na Angelica’s Kitchen.
Isidora ku ta enkargá ku sekshon di Departamentu di Fiansa Personal i Hipotek a bisa tur aña di nobo MCB ta sòru pa tur loke generá na porta durante Auto Show duna esaki bèk na komunidat. “E aña aki nos a hasié un poko diferente. Pa sigui duna un aporte di bèrdè mes, nos a duna instansianan i organisashonnan ku meta ambiental e oportunidat pa entregá nan ideanan ku nan ke implementá pa yuda kuida nos medio ambiente. Loke nos a generá e aña aki na Auto Show a keda repartí entre e mihó 5 proyektonan ku meta ambiental ku a kumpli ku kriterionan di un kuerpo di hurado imparsial. Reakshonnan tabata hopi, pero lamentablemente ta 5 instansia/organisashon so e pènel di hurado por a skohe di moda ku esakinan por risibí un montante ku por yuda nan aloménos start ku nan proyektonan”, asina Isidora a bisa.
Instansianan/organisashonnan ku meta ambiental ku a risibí donashon ta:
Fundashon Tuma mi Man ku nan proyekto “1,2,3,4 papier van oud papier”,
JCI IOBA Curaçao ku nan proyekto “Watertool kit”, Fundashon Instituto Splikami ku nan proyekto “Splikawa”, Uniek Curaçao ku nan proyekto “Projectaanvraag gebied Fontein” i Nahambri ku nan proyekto “Re-plantá bario di Brievengat”.

WILLEMSTAD / MIDDELBURG – Polis di e siudat Middelburg no a usa violensia desproporshonal durante un manifestashon i protesta di 500 mucha di skol. Sinembargo Ministerio Públiko ta pèrsiguí dos polis ku a maltratá algun di e muchanan. A konsiderá e kaso komo maltrato, debí ku e muchanan ya tabata kanando ta bai for di e sitio, ora e dos polisnan a dal nan ku klòp.
E suseso a tuma lugá dia 23 di novèmber aña pasá na Middelburg, durante un manifestashon di muchanan di skol. Nan tabata protestá kontra un areglo di 1040 ora obligatorio ku nan mester asistí na skol. Dado momentu e protestanan a sali for di man i un grupo di 500 mucha di skol a okupá un krusada kaminda nan a tira blekinan di limonada yen i webu.
Einan polis a aktua ku fòrsa kontra e grupo, pa a plama nan for di otro. Un investigashon di Rijksrecherche a konkluí ku polis en general, a usa violensia na un manera proporshonal. Sinembargo e dos polisnan en kestion a bati e muchanan ku klòp ora ya nan tabata alehando nan mes for di e sitio.
Banda di e dos polisnan ku Ministerio Públiko ta bai pèrsiguí, lo inisiá tambe un investigashon disiplinario kontra nan i kontra dos otro polis mas.

WILLEMSTAD - Fin di yüni ta presis 30 aña pasá ku Parke Kristòf a wòrdu habrí ofisialmente i a ser pasá den man di fundashon STINAPA (Stichting Nationale Parken) pa maneho. Dia 30 di yüni 1978 tabata e dia yen di festividat. Ku e revelashon di e bòrchi nobo di Parke i e otorgashon di un makutu simbóliko ku orkidia blanku, e promé Parke Natural i esun di mas grandi riba nos isla tabata habrí pa públiko.
E trinta aña di historia aki ta selebrá henter aña dor di organisá aktividatnan spesial pa henter públiko di Kòrsou pa preisnan spesial. Tur hende por sera konosí asina ku e vários atrakshon i flora i founa partikular ku tin den e parke.
Huntu ku i naturalmente spesialmente pa tur amante di naturalesa i tur e organisashonnan ku ta i tabata un partner importante den e historia de Parke Kristòf ta rekòrdá e apertura ofisial di aña 1978 ku un OPEN HOUSE riba djadumingu 6 di yüli próksimo.
Entrada ta grátis pa tur hende riba e dia aki.
Meskos ku tur djadumingu, Parke ta habri 6 or di mainta riba e dia aki pa tur esnan ku ke subi seru mas trempan ku ta posibel. E festividatnan ofisial ta kuminsá 9 or di mainta, kaminda lo pasa entre otro e maneho di naturalesa di e último 30 añanan ku pòrtrèt di ántes i awor.
Durante henter e dia lo organisá diferente aktividat. Bishitante por partisipá den diferente kaminata den naturalesa, muchanan por hasi obra di man e weganan den Mahokkenbos òf wak e presentashon di yuana i kolebra riba nos terras. I naturalmente e sorpresa di mas grandi ta nos yuchi di mas chikitu den nos kinderboerderij ku te e buriku So-Ca ku a nanse dia 17 yüni. E ta nos maskota di mas yòn den nos kinderboerderij.

WILLEMSTAD - Servisio pa Obra Públiko ta informá ku e lusnan di tráfiko na e krusada Garipitoweg/Winston Churchillweg/Bermudaweg for di ayera tardi no ta funshonando. E lusnan aworakí ta pagá. Un promé análisis ta mustra ku por tuma algu di tempu pa resolvé e problema.
Konsiderando ku e krusada aki ta hopi importante den tráfiko, ta pidi outomobilistanan pa bai ku koutela, na momentu ku ta aserká e área aki. Laga nos tur koperá ku otro, pa asina nos por tin un tráfiko seif i sigur riba nos isla.

WILLEMSTAD – Manera ku nan ta bisa den tèrmino di Dominó, Royal Scorpions Mr. Baseball/Banco di Caribe a pasa Curaçao Yankees un sapatu di 10-0 ayera nochi.
Ku karedanan den ining 2 te ku e di 6 ining, Scorpions a anotá nan 10 kareda. Den di seis ining Scorpions a seya e viktoria anotando kuater kareda.
Mark Hennep a bai ruta kompletu pa Scorpions i a gana e wega. Di e otro banda Ronny Inesia a habri i a tira kuater ining pa pèrdè e wega.
Pa Royal Scorpions: 10 kareda, 13 hit, 1 eror. Mark Hennep a gana Gedion Sambo di 3-3.
Pa Cur. Yankees: 0 kareda, 5 hit, 4 eror. Ronny Inesia ta pèrdè i Gillord Kirnon di 2-1.
Mañan djasabra tin e último wega promé ku e selekshon antiano biaha pa Ulanda.
Sta. Rosa Indians/Ennia ta enfrentá Sta. Maria Pirates/Chippie.

WILLEMSTAD, - Interes general, semper mester prevalesé riba interes partikular. Ta esei tabata e motivashon tras di e reunion di awe mainta, asina gezaghebber di Kòrsou mr. Lisa Dindial a enfatisá, pa splika e hecho ku a konvoká e reunion públiko di Konseho Insular pa ayera mainta i no ayera tardi.
Motibu di e diskushon riba e aspekto aki ta e skol St. Albertus College ku ta keda nèt dilanti di edifisio di reunion di Konseho Insular.
Ta konosí ku último lunanan tabatin vários reunion ku a bai kompañá pa hopi turbulensia di esnan ku no tabata di akuerdo ku kontenido di e reunion. E manifestashon i protesta tabata kontra prinsipalmente e trayekto estatal ku Kòrsou ta kanando aworakí.
Konsekuensia tabata ku ki ora ku tabatin e manifestashon i protesta aki, e skol en kuestion tabatin molèster formal i tabata ser strobá den su dunamentu di lès diario.
E situashon a bira di tal forma ku e sinta ku esnan konserní pa weta den ki forma por atendé ku e problema aki.
A yega na palabrashon ku gezaghebber ku ta programá e reunionnan públiko parti mèrdia. Esei, lógikamente te asina leu ku ta posibel.
Mester bisa ku último simannan reunionnan ku un tinte kontroversial a tuma lugá tambe den oranan di mèrdia, pero pa sorpresa di hopi hende, esun di ayera, pa trata e lei tan diskutí pa supervishon finansiero a ser konvoká pa mitar di dies di mainta.
Punto ta, ku ayera lo a bira e último dia di skol pa St. Albertus College. Lo tabatin un selebrashon ku e muchanan, pa asina sera aña eskolar na un forma festivo i alegre. Na momentu ku kabes di skol a tuma nota di e konvokashon a disidí di kanselá tur aktividat.

WILLEMSTAD, - “Mi mester bisa ku sinseramente no tabata mi intenshon di a ekspresá mi mes manera mi a hasié. Komo tal, mi ke pidi públikamente mi diskulpa pa loke a sosodé,” asina diputado Mike Willem a anunsiá ayera tardi den reunion públiko di Konseho Insular pa trata e lei pa supervishon finansiero.
Motibu pa e diskulpa aki tabata ekspreshonnan hasí pa diputado Willem algun dia pasá riba Plasa Brion durante un evento kultural.
E mandatario a alegá na e okashon ei ku el a papia na nòmber di gezaghebber di Kòrsou.
E ekspreshon aki a kousa strañesa den promé instansia serka esnan presente, pero despues a okashoná indignashon.
Manera por a spera, vários polítiko a denunsiá loke a sosodé, entre e polítikonan aki lider di MAN ingeniero Charles Cooper.
Cooper a bisa ku e no por kaba di komprondé kon un diputado por tribi hasi un kos asina’ki.
Tur hende sa ku gezaghebber ta pará riba diputadonan, e ta presidente di Bestuurscollege i e ta presidente di Konseho Insular.
Gezaghebber di Kòrsou tin un remplasante si dado kaso e no por asistí na un evento den su funshon komo gezaghebber, anto esei ta gezaghebber interino. Ta asina’ki nos tin pensá di pasa pa e entidat nobo ku yama pais outónomo den Reino?, Cooper a puntra.
Cooper a bai dje leu ei di bisa, ku e ta haña ku e diputado mester saka su konklushon pa loke el a hasi.
Ayera durante e reunion públiko, e miembro di frakshon di MAN, Eugene Cleopa, tambe a referí na e asuntu aki. Mester bisa ku Cleopa tabata presente riba Plasa Brion i a tende personalmente kon Mike Willem a papia na nòmber di e promé mandatario di Kòrsou.

WILLEMSTAD, - Ku e mayoria di kustumber, Konseho Insular ayera nochi kasi 11’or a bai di akuerdo ku e proposishon ku ta habri kaminda pa introdusí e Kolegio pa Supervishon Finansiero.
Oposishon, ku no por a haña su mes den e lei, a vota kontra.
“Ami no por haña mi mes den e rotzooi aki,” asina Norbert George, lider di Partido Demokrat a fulminá na final di reunion ora a yega momentu di bai vota, loke a pone gezaghebber di Kòrsou hala atenshon di George ku e palabra “rotzooi” no ta un palabra parlamentario.
Partidonan di oposishon a para riba ku e lei aki lo kita outonomia di un kantidat di órgano importante den nos pais, loke nunka nan por aprobá.
E dia di reunion ayera a kuminsá bastante agitá, ku un kantidat di hende manifestando nan malkontentu pa e hecho ku Konseho Insular lo a bai trata – i posiblemente aprobá – e lei en kuestion. E manifestantenan a pone barikada den kaya, tabatin algun konfrontashon ku outoridat.
E manifestashon a pone ku Punda ayera tabata práktikamente paralisá: no por a drenta sentro di siudat ya ku outoridatnan tabata desviando tráfiko for di Ser’i Pietermaai i a sera Ansinghstraat (kaminda e edifisio di Konseho Insular ta situá) kompletamente.
Tabatin un gran kantidat di polis riba pia. A surgi diskushon riba e último desaroyo aki, esta, te kon leu polis por stroba un hende kana den forma liber den kaya. Algun manifestante, ku lider di PLKP Errol Cova na kabes, a tuma e desishon pa entamá un huisio sumario, pa asina haña klaridat riba e punto aki. Esei a sosodé, despues ku un grupo di persona a bai ofisina di Defensor di Pueblo pa haña sa kiko ta nan derechi i te kon leu polis por stroba nan den nan moveshon liber.

WILLEMSTAD - Ta un hecho kondenabel ku apesar ku nos ta un pais ku ta na punta di bai riba nos mes, drentando un estado nobo, ta sufri bou e hecho ku esnan responsabel no ta duna e informashonnan korekto. Esei ta opinion di eks inspektor di polis i polítiko, Udemar ‘Shon Ma’ Isidora.
Segun Isidora, a bira tempu pa esnan ku ta guia e pais i ta yama nan mes lider, papia sinsero ku komunidat. Isidora a reakshoná prinsipalmente na e último ekspreshonnan general, den e sentido ku probablemente tin un grupo di ámtenar mester bai kas, relashoná ku realishon di e futuro struktura nobo di nos pais.
Isidora: “Ta fresku den mi memoria ku gobièrnu a splika su situashon finansiero i informá ta kiko ta pisa riba su entrada. Ta p’esei nos no mester hunga bobo i malinformá komunidat”. Isidora a sigui bisa ku ta un realidat ku tur kaminda, ku ora bo ta bai riba bo mes i bo tin un aparato gubernamental ku bo no por karga, ta konosí ku lo tin kitamentu di hende for di trabou. Kisas e hendenan ku ta bai wòrdu retirá na e momentu aki no ta prepará pa bai kas. I gobièrnu no ta prepará nan tampoko. Gobièrnu no ta informando, pero ta hunga e mesun wega di den pasado, dor di primintí un kantidat di kos i despues ta bai haña hende desampará den nos komunidat, na opinion di Shon Ma Isidora.
“A yega tempu pa kada hende ku ta yamá pa sali na vanguardia di e klase trahadó i komunidat, pa papia na un manera sinsero i kla. Ta di e forma ei ta bira posibel pa informá i forma hende, pa yega na un situashon, ku nos kada un por eksperensiá ta kua situashon berdaderamente nos ta bai drenta.

ORANJESTAD- ILA a inscribi den un Competencia di Reggae cu lo tuma lugar na Italia den e luna di July. E contest aki tabata parti den 2 fase, e prome fase tabata votashon online y e banda cu ricibi mas voto lo bai representa su pais, esaki e ora lo bira e di dos fase di e contest.
Tur esnan cu a vota y algun fanatico cu tabata sigi e contest por amira cu durante e 2 simannan di votashon ILA tabata para na prome lugar y a sera cu un total di 967 voto y 364 voto di ventaha.
Tambe por a nota riba differente website cu e banda Pura Vida a orginsa un toka pa recauda voto como cu nan ta para na di dos lugar.
Lastimamente ora ILA tabata warda pa ricibi e e-mail di confirmashon (for di Italia) pa confirma nan victoria, a sali na cla cu esaki no ta e caso. ILA a pasa 2 siman cu un promoshon intenso na television, corant, radio y online, a bin resulta cu e juradonan di Benelux(Nederland,Luxemburg,Belgica) a skohe e banda ganador.
Un puntuashon di 3.00, ta loke ILA tabata tin y e juradonan a duna ILA 6.25 punto di cual e total cu ILA a sera cune ta 9.25 punto.
E banda Pura Vida tabata tin 1.87 punto di votashon y e juradonan a duna nan 8.25 punto y asina nan a sera cu un total di 10.12 punnto cu hasi nan e banda ganador.
E manera cu e juradonan a jusga e competencia ta pone cu e votashon no tabata necesario, como cu tabata tin bandanan di otro pais cu a ricibi 0 punto di votashon y e juradonan a duna nan e cantidad di punto cu e banda mester pa a gana e banda cu si a haya e votashon maximo.
Esaki no a wordo bisa na comienso di e contest. E banda cu ricibi mas voto lo bai representa su pais y no e banda cu e juradonan a skohe. ILA ta gradici tur esnan cu a demostra nan apoyo den tur forma y pa keda pendiente paso ILA lo bin cu algo pa tur nan fanaticonan, di chikito te grandi por disfruta.

ORANJESTAD- Biblioteca ta recorda tur hende pa tira un bista na cas si por tin buki(nan) di biblioteca of di bibliobus cu a lubida di entrega. Ata e oportunidad te cu dia 11 di juli 2008 pa hasi esaki sin paga boete.
Por entrega e buki(nan)sea na biblioteca mes na Playa of na San Nicolas durante orarionan di biblioteca of na e bibliobus.
E Bibliobus tabata den diferente bario caba pa busca bukinan. Pa otro siman ta toca turno na e siguiente barionan:
Dialuna 30 Juni: Brazil (St. Michael School)
Diamars 01 Juli: Dakota (Centro di Bario)
Diaranson 02 Juli: Tanki Leendert (Kapel Monte Calvario)
Diahuebs 03 Juli: O’stad (Postkantoor)
Diabierna 04 Juli: Paradera (Rotonde Aruba Bank)
Diasabra 05 Juli: San Nicolas (Santa Theresita plein)
Orario: Dialuna pa Diabierna: 5.00—8.00 p.m.,
Diasabra : 9.00 a.m.- 4.00 p.m.
Biblioteca tin hopi buki cu ta na cas cerca usuarionan y cu no ta wordo entrega bek. Aki ta trata buki di mucha y adulto.
Por fabor coopera cu biblioteca pa haya e bukinan aki bek. Di antemano Biblioteca Nacional Aruba ta yama danki pa e cooperacion.