ORANJESTAD - A base di peticion den nos comunidad unda cu aña pasa e Grupo “Love & Light” a organisa un seminario The Secret Meets Aruba, unda cu un sala yen yen a presencia e DVD y tambe haya oportunidad pa descuti y haci pregunta na e panelistanan cu ta personanan conoci den nos comunidad, cu ta haci uso di e intrumento y flisofia di the secret. Grupo L& L ta organizando diaranson 18 di Juni proximo un seminario titula E ley di atraccion den accion “ cuminsando pa 7.30 or di anochi na cas di Cultura.
The secret ta un DVD cu a bira sumamente famoso full rond di mundo pa su contenido asina profundo. Grupo Love and Light tambe kier comparti e journey (e biahe ) y e proceso pa asina comparti cu comunidad tur e beneficio, sabiduría y conocemento di un ley cu ta asina formidabel y cu nos kier brinda e oportunidad pa e yega na conocemento di tur cu tin interes pe.
Love and Light ta consisti di personanan cu ta haci meditacion, visualisacion, practica spiritualidad cu e meta final di: comparti positivismo cu otro, nos comunidad y tambe traha na cambio positivo di mentalidad pa asina atrae bienestar, salud, abundancia den tur sentido di palabra pa Aruba.
HISTORIA CORTICO
Pa hopi tempo e secreto a wordo descubri, scondi y e la wordo suprimi, pero por medio di e pelicula aki e ta wordo revela.
Un cantidad di personan excepcional a jega di descubri e secreto aki caba y a usa esaki y nan a bira personanan conoci y grandi. Algun di nan ta: Plato, Leonardo Da Vinci, Hugo, Beethoven, Lincoln, Edison, Einstein, Marther Luther King y Ghandi.

ORANJESTAD- Diadomingo mainta 8 di juni lo tin un concierto di e coro Mélange, bao guia di Maybelline Arends-Croes y di e conocido guitarista Ivan Jansen cu su cuarteto.
E concierto aki ta bao di auspicio di Circulo Arubano Pro Arte y ta tuma lugar na Holiday Inn Hotel, las Palmas Ballroom, cuminsando pa 11’or di mainta.
Mélange ta un coro di adulto cu a ser lanta na Augustus 1994. E miembronan di coro a scohe e nomber Mélange como cu a uni dos coro existente, esta Fuga y Cristal, pa forma e grupo Mélange.
E coro ta canta regularmente durante celebracion eucaristico na Misa den weekend y tambe pa Pasco di Nacemento, Pasco grandi y otro dianan di fiesta di iglesia tambe. Últimamente nan a canta un Misa completo, tanto pa e apertura di e celebracion di e Aña di Hubileo di obispado di Antiyas/Aruba, como pa e celebracion principal na Aruba riba 4 di mei ultimo.
Ademas nan ta canta na actividadnan social y cultural. Mélange a yega di saca un cd ‘religioso’ titula”Duna Amor” cu canticanan di bon mensahe (inspirational songs), tambe algun single cu grabacionnan pa Pasco of otro temporada di aña.
E guitarista Arubiano Ivan Jansen, ta hopi conoci pa su diferente conciertonan, tanto clasico como di jazz y tambe pa e bunita cd-nan cu el a yega di saca, esta Con Alma I, Con Alma II y Versatility. Ultimamente el a saca un cd nobo titula ’Jazz at the Links’ riba cual e ta toca cu su cuarteto.
E cuarteto ta consisti di Ivan na guitara; Franklin Granadillo, trompet; Roy Croes na baho y Richard Holmond na bateria. E cuarteto aki di cual mayoria di e musiconan a sigui nan estudio na e prestigioso Berklee College of Music na Boston, ta toca na “Windows on Aruba” na Divi Links.

ORANJESTAD – Parlamentario Zulay van Poppel-Marquez ta señala cu diasabra 24 di mei ultimo tabata Dia Internacional den e lucha contra Obesidad, y ta bon pa nos tambe reflexiona riba nos condicion di salud pa cu e fenomeno di obesidad.
Diferente raport entre otro rapport STEPS Aruba 2006 cual ta un compilacion di datos entre Departamento di Salubridad Publico y Central Bureau Statistiek ta indica cu gran parti di nos poblacion tin sobrepeso. Por ehemle pa e ser masculino rapport STEPS ta indica cu un promedio di 17,2% di personanan entre 25 y 64 aña tin un peso normal.
Pa sernan femenino ta indica pa e mesun categoria aki cu 27,1% tin un peso normal. Hunto e promedio ta sali 22,8% di nos poblacion tin un peso normal.
Esaki kiermen cu solamente un di cada cuatro persona so tin un peso normal; e tres otronan tin sobrepeso.
Tin diferente factor ta causa e sobrepeso, entre otro comemento di mas of robes y poco movecion. Segun Zulay rapport STEPS ta indica tambe cu e consumo di fruta y berdura durante un siman ta 4 dia y pa consumo di berdura ta 5,5 dia.
Pa yuda den esaki Minister Swaen a indica cu ta bai amplia e canasta basico cu fruta y berdura frozen y den blikki. Fruta y berdura fresco ta algo pa futuro y ta trahando riba e ampliacion di e canasta basico cu fruta y berdura fresco.
Nos comunidad por mira e trabaonan di Minister di Labor y Cultura unda a construi Centronan multifunctional na Parkietenbos y na Yara, un Centro deportivo Frans Figaroa na Nord y e Parke Curason na Yaburibari cual ta bon concuri desde su inauguracion. Departamento di Salud Publico periodicamente ta publica informacion pa comunidad tene cuenta cu su peso. Awor ta keda na nos pa hasi uso di e facilidadnan.

ORANJESTAD- Comision Waste- Rec, esta “Waste – management & Recycling Environmental Committee” ta organisa un otro limpiesa diasabra 31 di mei benidero.
E biaha aki pa deshaci di sushi di cura y sushi grandi, e asina jama ‘grof vuil’ (mata, stoof, wasmashin, frigidaire, colchon, cama, zinc etc).
Esaki pa e bario Esso Heigths, Nijhoffstraat, Weg Kust Batterij, Kust Battereij y de Vuyst.
E limpiesa den e diferente bario no ta posibel sin partipacion di e habitante di e diferente bario, hende grande y mucha. Tambe no tabata posibel sin yudansa di e sigiente companianan Mourik NV y Serlimar cu a pone baki disponible y ‘tipping fee’ pa hiba e desperdicio pa dump.
Otro instancia manera AHATA y Valero Volunteer Committee pa nan yudansa tecnico y cu material. Y sin falta esnan cu a percura pa cuminda, bebida y cuki pa tur trahado, esta B 55, supermercado Double Happy, AHATA, All Drive Car Rental y Valero Volunteer Committee. Tambe e Polis di Bario, Sr. Kenneth Phillips cu a duna indicacion na unda pa pone e bakinan.
Nos mision ta pa e habitantenan sinti nan mes responsabel pa limpiesa di nan bario y cu orguyo bisa: Nos bario ta keda limpi – limpi, paden y pafo di nos cura. Di bo tambe? Waste-Rec lo sigui lucha pa promove bario sano y limpi cu e tema: “Promove un comunidad sano y limpi”, pa medio di Maneho di Desperdicio y Reciclahe, lo cual ta parti di e solucion pa proteha y preserva nos medio ambiente.
Pa mas informacion por tuma contacto cu Sandra Wilson, na 5844694 / 5606033, Gloria Richardson na 5846965 / 7342150, Shirley Illidge – Hilman na 7302612 of Theresita de Graaf na 7486844.

Un iniciativa pa fiha maneho conhunto pa naturalesa di nos isla

ORANJESTAD- Comision organisado di Wild Aruba 2008 ta preparando pa discuti temanan urgente pa maneho di naturalesa di Aruba. E congreso ta planea pa tuma lugar di 25-29 Augustus 2008.
E prome dos dianan ta un symposium cu ta conta cu oradornan invita, tanto local como di exterior, cu lo amplia riba investigacion y experiencia di especienan di nos flora y fauna di Aruba.
Tanto e aspecto marino como esun terestre lo ser presenta den e lecturanan riba nivel profesional. E di dos parti ta consisti di 3 dia di tayer unda e stakeholdernan local lo prepara conhuntamente un plan di accion pa 5 aña pero cu un vision pa termino largo di 10 aña pa dilanti.
Un topico pa cual tin 5 orado internacional pendiente ta e topico di especio invasora problematico, manera e boa. Especialistanan cu a studia e tema tanto na Aruba como na otro localidad lo presenta nan experiencia y sugerencia.
E topico aki sigur ta relevante y al caso, mirando cuanto situacion ta bin dilanti regularmente. Trupial, Prikichi y hasta Warawara ta parhanan cu ta bira victima di boa, un serpiente cu a ser introduce un decada atras pero cual ta plamando rapidamente.
Banda di esaki, aspectonan di especie endemico na peliger, manera nos prikichi, shoco, cascabel, turtuga marino, y otronan lo haya atencion den Wild Aruba 2008. Otro parti esencial di nos naturalesa, manera habitat importante di mangrove, rif di coral, como tambe saliña y rooinan tambe ta keda trata.
E comision organisador ta consisti di representantenan di sector publico, organizacion ambiental, y tambe sector priva. Asistencia technico ta ser ricibi for di AZA (Association of Zoos and Aquiriums) y tambe IUCN (International Union Conservation of Nature) cu ta encarga pa facilita e parti di compilacion di e maneho integral di e congreso na Augustus 2008.

WILLEMSTAD – Solamente 600 doño di kachó peligroso a registrá nan animal i asina kumpli ku e lei nobo ku a drenta na vigor resientemente. E kantidat akí ta hopi abou, si konsiderá ku na Kòrsou tin alrededor di 4000 kachó ku karakterístika di pitbull. E periodo pa registrá ta dura te dia 30 di yüni.
Despues ku anteriormente kaba e fecha pa registrá a vense, gobièrnu a disidí ku ta duna mas tempu pa doñonan di e kachónan en kestion por kumpli ku e registrashon. E promé bia ku e fecha a vense no tabatin mas ku 400 doño di un kachó peligroso ku a registrá nan animal. Awor ku a duna mas espasio pa registrá, ya por a nota ku e kantidat di registrashonnan a oumentá. Tin indikashon ku ta e publisidat rondó di e kampaña no tabata sufisiente. Esaki tabata motibu pa entre otro dòkternan di bestia i Stanley Ignacio hasi un yamada na gobièrnu pa duna mas tempu pa por sigui registrá.
Awor ku gobièrnu a kumpli ku e petishon, ya por a nota ku mas doño a bai registrá nan kachó. Di e 600 kachónan ku ta registrá, tin 530 ku ta registrá ofisial i 70 ku ta pendiente. Esnan pendiente ta yunan di kachó i otro kachónan ku tin ku haña yu. Na e momentu akí no por sterilisá nan ainda. E otro kachónan si por sterilisá i e doñonan a haña un fecha riba kua nan tin ku hiba nan kachó dòkter. Ora sterilisá e kachónan, ta registrá nan mes ora i implantá un chep den nan kueru. Riba e chep akí tin tur dato di e kachó i e doño, por si akaso haña e kachó riba kaya òf e morde un hende.

WILLEMSTAD – E reunion ku a tuma lugá ayera nochi entre Gobièrnu i e representantenan di shofùrnan di bùs no a trese kambio den e situashon entre e dos partidonan. Gobièrnu a risibí e shofùrnan pero a mantené e mesun poseshon. Di ningun manera Gobièrnu no por kumpli ku e eksigensianan di STU.
A dos puntonan prinsipal di negosashon tabata e opshon di supsidio di 25 pa 30 florin pa luna òf e posibilidat pa e shofùrnan haña un karchi ku kua nan por swaip i tènk na un preis preferensial. E shofùrnan un biaha mas a bandoná Bestuurscollege rabiá den oranan di mardugá. Den oranan tempran di anochi tabatin un grupo relativamente grandi di shofùr i simpatisante dilanti di Bestuurcollege, pero ora e reunion a kaba ta algun so tabata presente pa a tende kon a bai.
Entretantu awe mainta tabatin un grupo di shofùr ku a akudí na e sede di BTG, pendiente pa e desaroyonan. Un grupo di mas o ménos 15 persona a akudí awe mainta dilanti di Free Zone kaminda nan a blòkia e entrada ku 4 kònteiner. No ta konosí si ta trata di un akshon di e shofùrnan òf di miembronan di PWFC. Tabatin rumornan insistente tambe ku PWFC lo a separá su akshon for di STU. Parse ku e ta sigui sostené STU pero no ta bai den akshon huntu. Tambe tabatin informashon di un reunion bou di ora di trabou kaminda trahadónan di CPA i CPS lo a partisipá. Finalmente tabatin tambe informashon ku trahadónan di CURGAS a pone trabou abou.

MANCHESTER, Inglatera – Cristiano Ronald tin pensá di pone un fin na e inseguridat riba su futuro den Manchester United pa djarason.
Prepará pa un posibel petishon di transferensia, e tékniko Alex Ferguson a atvertí ku e doñonan merikano di United lo por manda hungadónan importante manera Ronaldo den tribuna promé ku bende nan ku otro ekipo.
E tékniko a mustra su mes rabiá pa e intentonan di real Madrid pa atraé e delantero portugues, i United a menasá ku raportá e kampion spañó na UEFA.
“Mi ta spera ku lo tin notisia pronto”, Ronaldo a bisa, di akuerdo ku prensa portugues, despues di e viktoria di 2-0 djasabra di e selekshon riba Georgia. “Den dos pa tres dia mi ta bai anunsiá un desishon “.
Ronaldo a hinka 42 gol temporada pasá, ora el a enkabesá United pa e títulonan di Liga Premier i Liga di kampionnan.
Mi tabatin un par di reunion di Glazernan”, Ferguson a bisa periodistanan. “Nan lo manda e hungadó den tribuna, mi ta bisa boso di bèrdat, simplemente pa proba nan posishon. Nan no ta bai baha kabes”.

Skina di Sorti, awe djamars 3 di yüni di 2008, ta kuminsá ku deseá un i tur un bon dia. Den gobernashon efektivo papiamentu ta funshonal. E ta sirbi un propósito den kuadro di komunikashon. Serka nos bo ta haña e impreshon ku ta eksistí un obligashon papia. Tin gobernante ku no por sobra tempu pa kumpli ku e tareanan di maneho pasobra e ta okupá konstantemente ku entretené media.
****
Ekselensia ta manifestá su mes pa un esfuerso konstante pa mehoramentu di prestashon. Esei ta enserá ponementu di ophetivo, trasa plan pa alkansá nan i un maneho di e proseso pa alkansá e ophetivonan. Pues kòntròl, “feed back” i ahuste ta aspektonan ku ta internalisá. Bo por yama e proseso tambe unu di “constant learning” sea di eksperensia propio (“auto analysis”) òf di lektura (siña for di eksperensia i konosementu di otronan).
****
Serka nos e manifestashon konsistente di mekanismo di defensa di akshon di pasado (sea resien òf mas bieu) ta haks riba e karakterístika di sernan ku ta bai pa ekselensia. Pasobra imágen òf persepshon deseá òf kreá ta hunga un papel asina grandi, “constant learning” ta virtualmente imposibel. Kompai buriku su lès básiko mes no ta penetrá den e selebrenan i ripitishon di e mesun fayonan ta mas regla ku eksepshon.
****
Na hopi okashon e mekanismo di defensa ta tradusí su mes den uso di e konosido táktika di mata e mensahero i komo tal kubri e mensahe. Si tur e esfuersonan pa atake e mensahero wòrdu hinká den drecha e lokual ta wòrdu hasí, nos lo tabata hopi mas leu. Den polítika e gritu ku mester ta positivo no ta nada mas ku aplikashon di táktika pa mata mensaheronan indeseá. Si bo ta ninga e realidat, bo no por ta positivo.

WILLEMSTAD -- E selekshonnan di Aruba i Kòrsou lo no midi forsa den e fin di siman 7 i 8 yüni próksimo.
Kontrali na planifikashon esaki ya no ta posibel.
Sinembargo algun pelotero di Aruba lo ‘make’ e ‘team’.
Josua, Jonathan, Eldrige, Jason i Zjanzjare ta e nòmbernan ku mas ta wòrdu menshoná.
Ta trata aki di infieldernan rubiano ku bon man i ku por bati. Nan lo mester yuda i kompletá e ‘Dutch Caribbean Team’. Ademas di hungadó di kuadro tin interes i nesesidat di un kècher ku probablemente tambe lo ta di Aruba.
Huntu ku e peloteronan lokal ku ta studiando na Merka manera Juan Carlos Sulbaran i Curt Smith ademas peloteronan di St. Maarten manera Simon Panthoplet e ekipo ta spera di ta ‘ready’ pa duna bataya.
Esnan ku ta sigui e selekshon di aserka, ku tin konosementu i ophetividat nesesario ta di opinion ku ta e último dos simannan, e selekshon a drai bon di bèrdat.
Fin di siman tras di lomba e selekshon di Antia a kontinuá su preparashon ku mira riba su partisipashon den e “Siman Di Beisbòl” na Haarlem, 4 pa 17 di yüli.
Tabata trata di un treining planifiká, guia i bon organisá pa e maestro Alvin Fichi Fleming.
Komo un ‘novum’ pa loke ta selekshon NaBaFe a inkorporá un entrenadó físiko den e selekshon.
Sr. Nathaniel Esprit a duna di konosé di ta satisfecho i kontentu ku e progreso pa loke ta kondishon di e peloteronan.

WILLEMSTAD – Miéntras ku aki na Kòrsou un parti di nos poblashon ta protestá pa e oumento di preis di gasolin, na St. Maarten nan ta rabia pasobra preis di gasolin na e isla aki ta mas karu ku aki na Kòrsou i nan ke sa pakiko.
No ta un sekreto, ku ounke den último lunanan e preis di gasolin aki na Kòrsou a subi na vários okashon kaba, ainda outomobilistanan ta pagando un preis mas abou si kompará ku otro islanan di Antia i Aruba.
Na St. Maarten esaki a lanta basta diskushon i ta pidiendo un splikashon kon esaki por ta posibel. E korant The Daily Herald den su edishon di awe a dediká su editorial na e tópiko awe i den esaki nan ta mustra, ku for di siman pasá nan a hasi un petishon na Departamentu di Asuntunan Ekonómiko pa splika presis kon e preis di gasolin na St. Maarten ta hinká den otro pa motibu ku tin interogatorio riba e último oumento.
Na St. Maarten nan no por komprondé kon por ta posibel, ku apesar ku aki na Kòrsou tabatin oumentonan mas drástiko den preis di gasolin, tòg ainda esaki ta mas barata ku na Isla Ariba.
Pa tal motibu ken ta publiká kon e preis di gasolin ta wòrdu repartí, pa asina duna e konsumidónan un mihó bista pa kiko nan ta pagando na pòmp i unda esaki ta bai presisamente.
Na Boneiru tambe oposishon a hasi pregunta riba e inkonsistensia ora ku ku ahustá preis di gasolin. Nan ta kere ku tin sufisiente motibu pa investigá esaki.
Na Saba habitantenan di e isla aki luna pasá a lanta un dia i mester a tuma nota ku preis di gasolin a keda oumentá sin ningun aviso previo. Esaki a okashoná basta mal kontentu.

BALTIMORE – Si Boston Red Sox lo kier ripití komo kampion di Seri Mundial e temporada aki i gana nan di tres título den sinku aña, nan lo mester hasié sin David Ortiz kisas.
Despues ku el a leshoná su pòls robes durante di e viktoria di djasabra anochi kontra Orioles di Baltimore, ayera Ortiz a bin haña sa ku e tin problema ku un tendon na su pòls ku lo ten’é for di akshon indefinitivamente.
Di akuerdo ku un fuente, nan lo inmobilisá e pòls di Ortiz pa e próksimo luna pa determiná si e leshon por kura riba su mes. Si e leshon kura den próksimo dos siman lo dura dos siman mas promé ku e por drenta den kondishon di hunga.
Si esaki no ta e posibilidat RSox i Ortiz lo mester enfrentá e realidat kual ta un operashon ku lo terminá su temporada.
Ortiz lo tin un sker den e tendon ku ta na e parti ariba, pafó di su pòls robes i el a keda pon’é riba DL pa 15 dia despues di e wega di ayera.
“No ta sigur ku mester operá”, asina e mènedjer Terry Francona a bisa. “Pero e lo subi DL pa 15 dia”.
Esaki sigur ta un gòlpi pa RSox. For di 2003 ora ku Ortiz a bini RSox i ta huntu ku Manny Ramirez, e ekipo di Boston tin un mihó rekòrt ku kualke otro tim ku eksepshon di Yankees.
For di komienso di temporada 2003, Ortiz tin 685 kareda empuhá i 221 honron konektá. Ta Alex Rodriguez, ku 227 i Albert Pujols, ku 225, só tin mas honron konektá.

MERKA, - Barack Obama i Hillary Clinton ta aserkando e linea di meta den nan duelo dramátiko pa kandidatura presidensial demókrata, ku e senador kla pa haña nominashon, miéntras su kolega ta konfrontá posibel final di su kampaña.
Hasiendo kampaña promé ku e último votashonnan primario di awe na Montana i Sur Dakota, Obama a primintí unifiká e partido pa e elekshonnan di novèmber kontra e republikano John McCain i a bisa ku é i Clinton lo ta kapas di uni. “Nos ta bai uni pa polítika ekonómiko i internashonal di George W. Bush pèrdè na urnanan”, Obama a señalá durante enkuentro na Michigan.
“Senador Clinton a realisá un karera destaká. E ta un sirbidó públiko destaká, i nos dos lo traha huntu na novèmber”, Obama a deklará, durante un eskala di su kampaña na Troy, Michigan.
Clinton a realisá un bishita di final di kampaña na Sur Dakota promé ku e regresá New York awe pa un enkuentro ku lo marka su despedida for di un karera kaminda el a drenta komo faborito, pero awor kasi e no tin oportunidat di gana.
Obama, senador pa Illinois, falta mas o ménos 40 delegado di 2.118 nesesario pa sigurá e viktoria, i e lo por alkansá e kantidat aki rápidamente ku yudansa di algun di e mas o ménos 180 superdelegado no komprometé (funshonarionan di e partido kendenan por apoyá kualke kandidato).

WILLEMSTAD – LA PRENSA a komprondé di presidente di direktiva di Brasami, sra. Noraida Peterson, ku a disidí di pone direktor di Brasami Marcel Pinedo riba non aktif, riba diferente reklamo di personal ku a drenta. Un investigashon profundo a kuminsá di manera ku mester manda e direktor kas, pa asina no stroba e desaroyo aki. Segun sra. Peterson den kòmbersashon telefóniko a duna di konosé ku e direktor aki a wòrdu poné riba tempu indefiní pa asina por buska tur informashon rondó di e reklamonan ku a drenta.
Ademas tin otro informashonnan ku e direktiva ta disponé di dje ku ta duna motibu pa mas investigashon i ku durante di e temporada aki tin un investigashon riba e maneho ku a keda hibá di direktor di Brasami, Marcel Pinedo. Peterson no a bai masha den detayenan di kontenido di reklamonan di e personal, tampoko e otro motibunan di investigá e maneho, pero a limitá su mes pa laga e proseso kana te final.

WILLEMSTAD – Trahadónan di CPA ku ta traha riba brùg i fèri a notifiká nan doño di trabou, ku nan lo bai un reunion konvoká pa e sindikato PWFC i di manera ei e tráfiko marítimo a keda paralisá pa e parti públiko lokal. E tráfiko marítimo si no a keda paralisá, ya ku tantu CPO, KTK i Fort Nassau a keda riba trabou. Den kombersashon ku Agustin Diaz a splika LA PRENSA ku en bèrdat a surgi un disgustu na momentu ku mester a habri brùg i pone bewaker, ya ku entre 3’or di atardi te ku 8 di anochi no tabatin trahadó pa atendé ku e brùg i fèrinan.
Tabata pa 3’or e sindikato a konvoká un reunion urgente i pa 5’or di atardi e trahadónan a disidí di akudí na e reunion ku a keda yamá. Nan a reanudá nan trabou pa 8’or di anochi. E trahadónan di fèri, tambe a bai e reunion ku konsekuentemente no por a transportá públiko di Otrabanda pa Punda visevèrsa i tampoko por a hasi uso di brùg.
E gerensianan di e kompania no tin konflikto ku e sindikato PWFC, pero simplemente ta den kuadro di akshonnan di ayera a sindikato a yama un reunion pa su miembronan. Segun Diaz, na momentu ku e notifikashon a drenta mester a tuma medidanan di manera ku ta garantisá seguridat di brùg, dor di pone bewakernan.
Di otro banda e paralisashon aki a hasi ku tabatin turistanan ku no tabatin informashon a subi brùg grandi i disidí di krusa na pia, meskos ku algun persona ku tambe a disidí ku nan baiskel pa krusa laman via di brùg grandi. Den futuro ta bon pa tin un notifikashon pa turistanan ku ta pone bùsnan na disposishon pa transportá di Otrabanda pa Punda visevèrsa pa evitá ku nan ta subi di brùg grandi na pia.

WILLEMSTAD – Sentro di Guia Edukashonal huntu ku Lito por mira atras riba un eksitoso kompetensia di eskolar “Lesa pa otro skucha”. E kompetensia aki a konosé 6 studiante di skol básiko ku a representá nan skol den e final di e kompetensia ariba menshoná. Nan mester a lesa na 3 okashon, e promé biaha e studiantenan a lesa un teksto na ulandes ku durashon di 4 minüt, despues un otro teksto na ulandes ku durashon di 1 minüt i mei i na final un teksto na papiamentu ku durashon di 1 minüt i mei.
Rheandra Groenberg di Johan van Walbeeck a resultá e ganadó di e kompetensia “Lesa pa otro skucha” i a gana un montante di fl. 5000.- pa su skol den kuadro di Lito su proyekto “Kuida Bo skol i stima Bo skol”. Lee-Ann Martes di Sta. Rosa de Lima a sali na di dos lugá i a gana fl. 3.500.- pa su skol i na di tres lugá a sali Lis Marina Felix Pita di Kolegio Iris Bryning kende a gana fl. 2500.- pa su skol den kuadro di Lito su proyekto “Kuida Bo Skol i stima Bo skol”. Naturalmente Sentro pa guia Edukashonal i Lito a pèrkurá pa premionan individual pa tur e 6 finalistanan tambe.
Aparte di e kompetensia di “Lesa pa otro skucha” e skolnan ku tabata den final por a kompetí tambe pa e mihó ‘yèll’. E premio aki a bai pa Kolegio Iris Bruyning ku a sa di animá nan representante mas mihó durante di e kompetensia ku un tremendo “yèll” i a gana fl. 1000.- den kuadro di Lito su proyekto “Kuida Bo skol i stima Bo skol”.

WILLEMSTAD - E selekshon nashonal di futbòl di Antia Ulandes, ta preparando serio pa su kompromiso kontra di Haiti dianan 15 i 22 di yüni próksimo.
Komo parti di e preparashon e selekshon nashonal ta enfrentá dia 9 di yüni e fuerte selekshon di Venezuela i djarason dia 18 di yüni e selekshon di Honduras.
Ámbos enkuentro interesante ta tuma lugá pa 8or di anochi den Stadion Ergilio Hato. Ta mas ku klaro ku e selekshon ta konta ku e sosten di su públiko, ku a demostrá di ta un faktor importante den su éksito.
Karchinan pa e enkuentronan kontra di Venezuela, Honduras i Haiti ya ta na benta.
NAVU, Fundashon Bon Intenshon, Maduro & Curiel’s Bank i Ennia ta invitá un i tur pa ban apoyá e selekshon.
Manera ta konosí e selekshon nashonal di futbòl tin kompromiso importante, den kuadro di eliminatorio di futbòl pa Mundial 2010.
Den preparashon pa e enkuentro kontra di Haiti na Port-au-Prince dia 15 di yüni próksimo.
En preparashon pa e wega aki, djaluna dia 9 di yüni próksimo e selekshon nashonal ta enfrentá e selekshon di Venezuela.
E selekshon di Venezuela ta bin Kòrsou despues di un partido kontra di e Selekshon di Brazil na Merka.
E onsena venesolano últimamente tambe a enfrentá e selekshon di Haiti i ta un bon kandidato pa nos selekshon midi forsa kuné promé ku e kompromiso na Haiti.
E selekshon di Hondúras ta brinda otro posibilidat pa nos selekshon ahustá i ta kla pa enfrentá e selekshon di Haiti dia 22 di yüni den stadion Ergilio Hato.

BARNIER
Sidney Cornelio
Mihó konosí komo Sidney Chikí
A laga atras su mama Emita Barnier-Naar, kasá Mildred Barnier-Martselita, yu Natasha Barnier, yu di kriansa Michandra Petronia, rumannan Mildred Regalado-Barnier, Ivonne i Richard Meulens-Barnier, Rudi i Josephina Barnier-Machin, Velma i Huis Rubio-Barnier, Bernadette Barnier i Walter de Haseth i tur sobrá rumannan. Akto di entiero ta djarason 4 yüni for di El Consolador pa santana Sta. Maria. Bishita 1or. Promé ku entiero 3.30or tin un respòns na El Consolador i despues pa santana Sta. Maria.

BENILIA
Ansela Damasia
Mihó konosí komo Chela
A laga atras su yunan Selwin Benilia, Irwin Benilia, Lizette Benilia i Rudley Libiee, Merilin Benilia i Roly Everon, yunan di kriansa Aisheline Benilia, Francheska Benilia, kompañero Roland Hansen. Akto di entiero ta djaweps 5 yüni, for di misa Z-Bonam pa Parke El Consolador. Bishita 1or. Promé ku entiero tin un s.s. di misa 3.30or.

MARTINA-MENDES DOS SANTOS
Alice (87 aña)
A laga atras su kasé Lorenzio Martina, yunan di kriansa Humphrey Martina i famia, Bernadette dos Santos, Clovis Rijnschot, Idamies Burnette-Rijna, ruman Antonio dos Santos i famia. Akto di entiero ta djaweps 5 yüni for di El Señorial pa santana Memorial Park. Bishita 1.30or-3.30or. Promé ku entiero tin un s.s. di misa na misa Buena Vista 4or.

NOTEN
Ruthsela Maria
Mihó konosí komo Sella
A laga atras su mama Lourdes Noten-Bishop, yunan Nailys, Nessa, Wally Noten, ñeta Irona Noten, rumannan Ruthmila Noten, Turley Noten, Richinel Noten i Lupe Melfor. Akto di entiero ta tuma lugá djamars 3 di yüni na Ulanda.

Dr. Mr. Lorito ta yama tur hende un felis djamars. Ta masha difísil pa konsentrá ora tin hende ta kita bo atenshon for di trabou. Awe mainta tabata un bon ehèmpel di esei.
****
Lorito a mira ku na LA PRENSA tabatin deliberashonnan amplio awe. Parse ku nan no ta masha kontentu ku aktitut di Defensor di Pueblo i su ofisina. Nan tabata hopi disgustá i Lorito a tende palabranan duru a kai. Mañan nos tin mas detaye riba e disgustu aki pasobra niun hende no kier bisa nada.
****
Lorito a pasa mira masha hende ta kana riba brùg grandi ta kue kabes ariba. Despues nos a mira baiskel ta pasa bai ariba. Ora nos a bai wak bon, a resultá ku brùg di ponton no tabata funshoná i fèri a stòp di kore. Lorito a pensa ku e hendenan ei mester wak masha bon mes pasobra nan ta hinka nan mes den masha peliger.
****
E akshonnan di ayera a kue un rumbo mahos atrobe. Lorito a mira ku e polisnan tabatin masha pasenshi. Tin hende ku no por kaba di komprondé ku polis ta outoridat. Bo mester wak kon ta papia ku polis. No ta pa loko ta papia kon ku ta, sigur no ku un polis! Nos ta gusta reklamá polis pero si bo tende kon tabata papia ku polis ayera nos a konkluí ku nan a demostrá hopi takto i pasenshi! Ademas tin polis ta yu di shofùr di bùs tambe. No lubidá esei!

Foto lorito 1

Lorito a mira ku tabatin masha pushamentu pa ta serka di un tal Camiel. Ora Lorito a yega serka a resultá ku Camiel ta un minister ulandes. Parse den Fòrti tabatin yen di dama mandatario ku kier a tene su man. Nan a bisa nos ku tabatin por lo ménos un “kabayero” tambe ku tabata bin para hopi serka. E tambe a bisa: “Esta tuti no!”

WILLEMSTAD – Awe mainta den kareda di 11or, shofùrnan di bùs den akshon a blòkiá e krusadanan prinsipal na Nieuwe Haven na entrada di Zona Liber i Fokkerweg. For di tempran por a mira trèkernan ku kònteiner poné den e área di entrada di Zona Liber den forma sospechoso. Diferente persona a yama nos redakshon pa puntra si nos ta na altura di e situashon aki. Despues a resultá, ku tabata e plan pa usa e trèkernan aki ku kònteiner pa blòkia kaminda. E idea tabata pa pone e kònteiner (nan) riba kaminda i bai ku e trèker, pa di e forma dura un poko promé ku kita nan for di e sitio. Komo ku outoridatnan a haña informashon ku tabatin un akshon na kaminda, nan por a aktua rápidamente. Lógikamente e akshon a kousa un estorbo pa tráfiko. Polis a trata di kontrolá e emoshonnan ku a surgi na e sitio, pero tabatin un trabou masha difísil pa kontené algun di e hendenan den akshon.
Na momentu ku nos tabata bayendo imprenta, inspektor Udemar “Shon Ma” Isidora a trata di plakiá e situashon, pero e no a logra den su intento. E mester a soportá un andanada di krítika i palabra insolente den su direkshon. Mas despues otro outoridatnan di polis a presentá na e sitio.
E akshon di awe a tuma lugá, despues ku e dos partidonan a reuní ayera nochi sin ku esei a trese kambio den e situashon entre e dos partidonan. Gobièrnu a risibí e shofùrnan, pero a mantené e mesun poseshon. Di ningun manera Gobièrnu no por kumpli ku e eksigensianan di STU. E dos puntonan prinsipal di negosiashon tabata e opshon di supsidio di 25 pa 30 florin pa luna òf e posibilidat pa e shofùrnan haña un karchi ku kua nan por swaip i tènk na un preis preferensial. E shofùrnan un biaha mas a bandoná Bestuurscollege rabiá den oranan di mardugá. Den oranan tempran di anochi tabatin un grupo relativamente grandi di shofùr i simpatisante dilanti di Bestuurscollege, pero ora e reunion a kaba ta algun so tabata presente pa a tende kon a bai. Entretantu awe mainta tabatin un grupo di shofùr ku a akudí na e sede di BTG, pendiente pa e desaroyonan. Henter mainta tabatin un seri di vershon riba kiko lo bai pasa i tambe riba gruponan ku lo uni den e lucha.