ORANJESTAD- Dia 1 di july ta cumpli 30 anja den Cuerpo Policial Sr. Miguel J. Maduro. Despues di a cuminsa 30 anja pasa como hulp-agent (bijstand), ela sa di persevera y logra di pasa tur su examen nan pa polis, resultando di ta un di e unico cuater polis nan cu a logra di hanja nan diploma reconoci na Academia di Polis di Hulanda, L.L.O. (Leergang Leidinggevend op Operationeel Niveau). E estudio di nivel mas halto ofreci aki na Aruba. Un estudio cu lastimamente K.P.A. no a sa di sigi ofrece na su personal. Locura a drenta cabes anja pasa y ela postula su mes pa president di bond di polis, posicion cu e ta ejerciendo contra viento y marea. Miguel ta hayando felicitacion di su colega nan di GrensPolitieLuchthaven, compañeronan di Directiva di Sindicato di Polis, demas colegas y di su famia. No por keda sin felicita tambe tur e otro 8 polisnan cu tambe ta cumpli 30 aña den Cuerpo Policial, cada un cu nan storia pero semper eherciendo nan trabow jen dinamismo y cu lealtad pa cu nan tarea di polis, esta Nestro Poulina, Juan De Dios Poulina, Willie Croes, Clyde Orman, Franklin Richardson, Chaco Cornelio, Mervin Dinzey, y Erwin Cannister. Na total 270 aña!!!! Meneer Polis, All Men are not created equal, the finest becomes policemen! Pabien y sigi sirbi y proteha e comunidad di Aruba.
Pakico a boycotea e votacion den e referendum di 1977?
ORANJESTAD- Un comedia y payasada completo, asina mester describi e show cu a wordo monta relaciona cu e hecho partido AVP a haña for di Hulanda un lollipop estatal pa nan por chupa riba dje te cu e eleccion di 25 di September 2009, esta cu di awor en adelante tur Arubiano y Antiyano ta haña derecho pa vota pa Parlamento Europeo. Te ainda nos di MEP no ta mira ki gran logro estatal esaki ta pa AVP, ya cu ta hustamente e partido berde na 1948 a pone e cadena di esclavitud di 12-8 rond di garganta di nos isla y cu durante 37 aña largo nos a keda como un isla di segunda categoria den Antiyas Hulandes. Tur esaki danki na e traicion di familia Eman y partido AVP contra nos isla di Aruba. Logronan grandi y impresionante riba tereno estatal ta ora cu bo ta haña un gran estadista manera nos Libertador Betico Croes hunto cu su partido MEP, cu a hiba un lucha tenaz – a base di sanger, sodor y lagrimas – pa saca nos isla for di e constelacion Antiyano, rementando e cadena di esclavitud di 12-8 for di otro. E lucha pa Status Aparte siguramente no tabata algo facil, ya cu nos Libertador a haña hopi contratiempo y boycot di parti di esnan di AVP cu awe t’asina contento y orguyoso cu nan ta haña oportunidad pa vota pa Parlamento Europeo. No mester lubida con e lidernan di AVP e tempo ey a vota contra nos himno, bandera, ortografia, moneda y Banco Central. Tambe hustamente esakinan ta e hendenan di AVP cu na maart 1977 a pidi tur VOTADOR ARUBIANO pa NO BAY VOTA den e referendum consultativo y pa nan bay campa na beach haciendo barbecue etc. Sinembargo 83 % di e votadornan balente no a sigui e boycot decreta pa partido AVP na 1977! Awe e mesun partido aki ta bringa y lucha pa e votadornan Arubiano bay vota pa parlamentarionan Europeo cu nos ningun no sa cual pata a broei nan. Aki claramente nos ta bolbe haña e prueba palpable cu AVP ta prefera di boycotea un votacion, esta e referendum 25 di maart 1977 cu ta algo netamente Arubiano y pa awe na 2008 nan duna sosten completo pa nos Arubianonan por vota pa politiconan Europeo. Aki un biaha mas e famoso frase di nos Libertador ta resalta: ‘Un vez traidor, semper traidor’!
Diarason awor programa “Hunto nos ta Aruba” ta presenta.
ORANJESTAD– E ta parce un historia sin fin, pero e unico forma pa nos enfrenta e reto di prijs exagera di petroleo y e consecuente aumento di tarifa di utilidad, ta pa nos anda inteligentemente cu nos propio consumo. Den un forum teni siman pasa pa sindicato S.I.W.A. di W.E.B. Aruba N.V., por bisa cu esey practicamente tabata e conclusion mas importante. Controla demanda pa baha e dependencia riba crudo. Ta keda na cada uno di nos pa economisa riba uso di energia. Ademas cu ta baha e adiccion riba crudo e ta yuda nos pa paga menos. Esey ta de echo e unico forma riba plaso corto pa enfrenta tarifa halto. N.V. ELMAR a restructura su Departamento di Servicio na Cliente, creando un servicio util cu nos tur por haci uso di dje. Ta un forma pa asisti e cliente y dun’e informacion valioso cu por traduci den menos consumo y consecuentemente un cobransa mas abou. E servicio yama “Conoce Bo Consumo”. E proximo programa di W.E.B. Aruba N.V. cu yama: “Hunto nos ta Aruba”, ta concentra e biaha aki riba e servicio aki y kico e ta. Director di e companianan di utilidad lo bolbe pone den perspectiva e situacion di crisis di energia, pero ta mustra na mes momento cu e consumidor tin un opcion cu ta keda den su propio man. Funcionarionan di N.V. ELMAR lo ilustra kico ta pasa despues cu e cliente keha di consumo halto sea telefonicamente of presenta na N.V. ELMAR su oficina. Nan informacion ta sirbi e funcionario pa hunto cu e cliente purba determina, na kico tin un consumo halto. Si no por determina e problema, ta sugeri e cliente pa haci uzo dje servicio pa yega na conoce su propio consumo.
ORANJESTAD- Diaranson 2 di juli 2008 e campeonnan di Aruba, RCA lo enfrenta e equipo professional di Hulanda NEC di Nijmegen. E wega aki lo tuma lugar pa 8:00 PM den Compleho Deportivo Guiilermo Trinidad. Despues di basta aña atrobe tin un equipo professional di Hulanda lo bin hunga un wega aki na Aruba. NEC Nijmegen tabata un di e equiponan revelacion di e Eredivisie e temporada cu a caba di pasa na Hulanda. E equipo a logra pone un serie di 9 victoria consecutivo. Cu e resultadonan aki e equipo di NEC a logra clasifica pa e play-offnan cu lo duna e derecho pa hunga den e torneo di UEFA-Cup. Den e play-off aki NEC ta logra victorianan contra Roda JC (1 – 0 y 2 – 0), FC Groningen (1 – 0 y 3 – 1) y NAC Breda (6 – 0 y 1 – 0). NEC di Nijmegen ta un equipo cu un historia grandi. E organisacion a wordo funda na aña 1903. Desde 1995 nan ta hungando den e division mas halto di e futbol na Hulanda. E ultimo añanan e equipo di NEC ta hungando su weganan na cas den De Goffert Stadion pa un publico di 15.000 persona. Actualmente e equipo ta consisti di varios hungadornan internacional manera Gabor Babos y Vadocz di Hungaria, Jonas Olsson di Suecia y Brett Holman di Australia. Alavez tin varios hungadornan di e seleccion U-21 di Hulanda manera Mark Otten, Lorenzo Davids y Dominique Kivuvu. Mester remarca cu un di e directornan tecnico mas famoso na e momento aki, esta Guus Hiddink, ta un ex-hungador di NEC. Di su banda RCA tambe lo kier demonstra tur hende aki na Aruba cu ta nan ta e campeon di Aruba y cu nan lo bai duna bataya contra e equipo di NEC Nijmegen.
ORANJESTAD- Turismo ta e pilar economico di mas importante pa e desaroyo economico di nos pais y semper nos di partido MEP a traha cu alma y curpa pa fortifica e industria aki. Un ehempel clave ta e vision di e Bestuurscollege di MEP y su diputado sr. Nelson Oduber kende a percura den añanan 80 pa e proyecto di Plan Sasaki wordo ehecuta den sercania di Eagle Beach y Palm Beach. Esaki siguramente a forma na comienso di Status Aparte pa Aruba un base solido pa tur desaroyo hotelero den e areanan menciona. Awe henter comunidad Arubano ta cosecha fruta di e vision y maneho dinamico aki. Alavez nos Ministro di Turismo ing. Edison Briesen ta haciendo su maximo esfuerso pa sigui trece turista di calidad pa nos pais y tur dia nos ta mira e frutonan positivo di tur e esfuersonan aki. Sinembargo tin un politico ignorante na Aruba cu ta pretende di ta un gran experto di turismo y tur dia kier cuestiona e maneho di turismo cu ta wordo hiba pa Gabinete Oduber. Pero e politico aki, e tal Otmar Oduber, nunca a trece padilanti con bao di gobernacion di AVP na final di 2001 nos turismo a conoce un caida dramatico di -4.1%. Alavez sr. Oduber no ta conta pueblo con bao di gobernacion di AVP tabata reina un desempleo grandi den e sector hotelero, cu nan gobierno di AVP tabata nenga di paga pa promocion di turismo den exterior y cu esaki a yega na un debe acumula di mas cu 10 miyon dollar y cu a wordo laga atras pa Gabinete Oduber paga. Danki na e maneho dinamico y trabao duro di nos Minister di Turismo ing. Edison Briesen awe nos por mira con turismo ta den un crecemento continuo y cu esaki a crece for di 691 mil turista na 2001 te cu 754 mil na 2007.
WILLEMSTAD – E registrashon di kachónan pitbull ta sera awe. Despues ku gobièrnu a introdusí e lei nobo, ku ta obligá tur doño registrá nan kachó pitbull, solamente 700 doño a kumpli ku esaki. Ta kalkulá ku na Kòrsou tin entre 3000 pa 3500 pitbull. Despues di basta luna di preparashon, finalmente e proseso pa poko poko eliminá e rasa di kachó pitbull ta bai kuminsá. Tur doño di kachó pitbull ku bai registrá, mester laga implantá un chep den kueru di e kachó i mes ora sterilisá esaki. E chep ta kontené tur dato di e kachó inklusive datonan di e doño. Esaki ta pa lokalisá e doño legítimo den kaso ku e kachó okashoná daño. E obligashon pa sterilisá e kachó ta pa poko poko e rasa eksterminá. Kachónan ku ta serka di haña yu no mester sterilisá mes ora. Despues di 6 luna ku nan kaba di wèrp, nan tin ku hasi esaki. Kachónan ku kaba di nase tampoko mester sterilisá mes ora. Ku e medidanan akí gobièrnu ta spera ku den futuro e rasa akí no ta eksistí mas. Remarkabel ta ku ta alrededor di 700 i piku doño so a laga registrá nan kachó. Tin indikashon ku tin sigur entre 3000 pa 3500 pitbull na Kòrsou, loke ta nifiká ku e kachónan ku no registrá i sterilisá lo sigui reprodusí i mantené e rasa eksistente. Ku otro palabra, e intentonan di gobièrnu pa eksterminá e rasa lo no kristalisá. Mirando ku gran mayoria di doño no a laga sterilisá nan kachó, ta solamente si tin kòntròl severo e proseso pa eliminá e kachónan por tin éksito. Te ainda gobièrnu no a informá ta di ki forma e kòntròlnan ta bai tuma lugá ni tampoko dor di kua entidat. Ta importante pa sa kiko ta pasa si polis òf S.K.S. mira un kachó pitbull den kurá di un kas. Si ta baha i pidi e doño pa mustra registrashon di e kachó i si ta konfiská e kachó mes ora si resultá ku e no ta registrá. E fecha pa registrashon ta sera awe sin e preguntanan akí ta kontestá. Esaki mes ora ta indiká tambe e manera ku gobièrnu a hiba e kampaña di informashon. Ta notabel tambe ku gobièrnu no a saka un último aviso awe pa informá esaki.
WILLEMSTAD – E problemanan ku ta afektando e Marshe Flotante den Punda ta serio. Tin indikashon fuerte ku e barkunan di fruta ta drif den awa kontaminá. Gobièrnu parse tampoko a kumpli ku e palabrashonnan pa konstruí fasilidat sanitario pa e komersiantenan. E informashonnan akí, i hopi otro mas, LA PRENSA a risibí despues di publikashon amplio siman pasá enkuanto suministrashon di awa na e barkunan.
cpa ta kobra liggeld/ den poyekt dosiier tin venesolano dne part nobo i yu korsou den parti bieuw
ora yega na stads verbiewing plan di cooper bc a aproba proyekto/ pdvsa a bisa ku e ta dujna regalo / uniko kos ku nan a pidi ta un pipa di awa pa kada un barku hanja un aansluiting/ gobiernu mester a kumpli / sradsvernieuweing ta trekker di e
ta diskriina yu di korsou
e wc nan a pidi tereno patras i awor banko maduro a hanje pa luga di parker
marshe mester hanja e beheer
awa ta kontamina ta logisch
afval rioolwater / lodo di bagger/ bemosnter di kleinhojfe (rodrigues dow klein hofje) ta bemonster zeewater
davelaar ke pa sera ei bou i laga e hendenan lanta i asina pone preshon riba CPA
VIENA – Ku un gol di Fernando Torres, Spaña a pone e tripel kampion Alemania na rudia djadumingu den e final di Eurokopa i a gana su di dos título despues di 44 aña. Torres a anotá na di 33 minüt den stadion Ernst-Happel di e kapital oustriako pa duna Spaña su promé korona den un torneo di magnitut for di e Eurokopa di 1964. E skor pèrtá no a duna un muestra real di e mihó ekipo di e torneo, ku un pa un a bai superando e opstákulonan i su mes troumanan. El a start ku un sota di 4-1 riba Rusia riba e anochi ku David Villa a bira e promé spañó ku ta realisá e “hat-trick” (hinka tres gol) den e Eurokopa. Villa, kende a anotá un gol tambe den e triunfo di 2-1 riba Suesia, no a hunga e final, a kaba komo máksimo goliadó di e torneo ku 4 gol. Alemania, den kua finalmente a hunga su kapitan Michael Ballack apesar ku e tabatin problema ku leshon ku tabatin é na duda te na último momento, a kuminsá manera ku e ke kome e spañónan, ku talbes pa falta di kustumber a sinti e peso di e final den e promé minütnan. Na di tres minüt, Sergio Ramos a duna un pase malu i Miroslav Klse a kue e bala i a bai riba e gol spañó. Pero e delantero aleman a trompeká i e eror a di dje no a produsí nada partikular. Hustamente e banda robes di Ramos tabata e kaminda skohé pa e alemannan pa hasi daño. Lukas Podolski i Philipp Lahm tabata kombiná riba e defensa di Real Madrid i un dje salidanan ei kasi a kaba den gol di Thomas Hitzlsperger na di 9 minüt.
WILLEMSTAD – Sitionan históriko rònt Kòrsou ta na peliger. Rònt Schottegat, na Roi Rincon, Spaanse Water i na otro lugá, tabatin 4000 aña pasá e promé habitantenan di nos isla ta biba. Ni di e promé indjan, ni di e indjannan konosí komo Kaketio i tampoko di e promé grupo di poblashon afrikano nos no tin muchu konosementu. Hopi di e lugánan ei a desaparesé kaba, debí na desaroyo moderno i tambe pa motibu di ignoransia. Pa kontribuí na mayor konosementu i pa evitá ku ainda mas di e sitionan históriko kultural ta bai pèrdí pa motibu di trabounan di konstrukshon, fundashon NAAM, sostené pa ekspertonan lokal i e arkeólogo di siudat di munisipio di Amsterdam, J. Gawronski, tin algun aña kaba ta traha riba produkshon di un Mapa Kultural Históriko di Kòrsou. Di forma digital e mapa ta indiká kaminda tin sitio arkeológiko importante te asina leu ku ta konosí, pa evitá destrukshon mas aleu i pa sirbi komo instrumento di maneho ora ta planifiká proyekto di desaroyo na Kòrsou. Riba e pòtret, kortesia di NAAM, por mira un sitio menasá di alrededor di 4000 pasá situá na Buskabaai, Schottegat.
Skina di Sorti, awe djaluna 30 di yüni di 2008 ta deseá tur hende un bon siman. Sin ningun sorto di reserva i den e forma di mas kategóriko posibel, mi ke kondena e akshonnan repudiabel ku a tuma lugá. Na e mesun momentu tambe mi ta mustra dede den direkshon di tur esnan ku a bini ta tolerá un faltamentu grave i molestioso di rèspèt pa e instituto di mas haltu di Kòrsou ku ta Konseho Insular. **** E instigashon di parti di lider polítiko di PS, Helmin Wiels ta kolmo temporal di komportashon aktivo i pasivo repudiabel di un grupo sumamente grandi den seno di polítika di Kòrsou. Pa kumbinensia polítiko ta tolerá kos di unu i ta repudiá kos di un otro. En realidat nos a yega na un situashon di violashon grave di huramentashon komo miembro di Konseho Insular i te hasta komo diputado di aktornan polítiko ku no a resultá den akshon fuerte, konsistente i determiná den seno di ni Konseho Insular, ni di Bestuurscollege. **** E disposishon mental pa “to serve and protect” serka muchu miembro no t’ei. Gloria personal, ambishon malisioso i te hasta tendensia patológiko ta resultá ku frekuensia den akshon ku ta degradá sala di Konseho Insular den un teatro di tragi komedia kolmá ku vulgaridat. Lugá (den sentido figurativo) kaminda maestronan den e debate popular tabata bria, a para bira foro pa menasa, insulto i awor provokashon di desórden públiko i pèrsiguishon di gruponan den komunidat. Un mensahe di e instituto Konseho Insular ta na órden.
WILLEMSTAD - E selekshon di beisbòl Antiano/Arubiano ta kla pa subi e promé buelo rumbo pa Ulanda ku tuma lugá djaluna atardi mitar di shete ku buelo 662 di Martin Air. Despues ku e último atletanan di St.Maarten i Aruba ku a yega ku buelo di Insel Air e último piesanan pa e selekshon ta kla pa nan promé tèst ku lo yama “Haarlemse honkbalweek 2008”. E último trainingnan a tuma lugá den un ambiente ameno i super positivo. E diferente mentornan den beisbòl antiano manera Raffy Josefa i Fichi Flemming a hiba diferente palabra di motivashon i konseho pa e grupa aki. Un biaha mas e pèrsonanan aki ta aksentuá e parti di keda di focus maske kiko ku pasa den kua situashon di wega òf dor di kosnan eksterno ku no ta den nan man. Na Ulanda riba e diferente sitenan tin diferente palabranan positivo pa e grupa aki di 24 pelotero ku lo aparesé un biaha mas riba e tarima internashonal. Por último den fin di siman tambe a tuma lugá e entrega di e poloshirtnan ku e selekshon lo biaha den pa Ulanda. Riba e anochi aki yùfrou Jessemien ta entregá kapitan di e ekipo kenda te Ardley Jansen un di e poloshirtnan. Por último Jessemien ta sita”Up to the Top” i tambe ta deseá tur e 24 peloteronan hopi suerte i kòrda saka kara di nos pais.
CHUQUISACA, Bolivia, - Savina Cuéllar, e kandidata opositor di “Alianza del Comité Interinstitucional” (ACI) ayera a gana e elekshonnan i a bira gobernador eligí di departamento di Chuquisaca. Ku e resultado aki, presidente di Bolivia, Evo Morales, a pèrdè un di e departamentonan ku el a gana kuné den e elekshonnan di desèmber di aña 2005. Segun e konteo rápido di entre otro empresa Ipso, Apoyo, Opinión, Savina Cuéllar a optené 55,5 porshento di e votonan i e kandidato di “Movimiento al Socialismo” (MAS), Wálter Valda, a optené 40,5% di e votonan. E aspirante di “Alianza Social” (AS), Felipe Cruz, a optené 4 porshento. E ousentismo tabata 22,8 porshento. Presidente Evo Morales awor ta kontrolá solamente e departamentonan di Potosí i Oruro, miéntras ku otro shete ta den man di oposishon. Di e shete departamento aki, kuater (Santa Cruz, Tarija, Bení i Pando) ya a aprobá nan statutonan outonómiko den referèndemnan regional. Cochabamba ta mantené den e linea opositor i La Paz no a tèrminá di alinea ku niun di e gruponan den disputa. Savina Cuéllar ta un dama indjan, bendedó di paña usá i tabata konstituyente di MAS. Sin embargo, el bandoná e filanan di MAS pa alinea ku e demanda di kapitalidat pleno pa Sucre, durante realisashon di Asamblea Konstituyente. E lidernan sucrense a kibra relashonnan ku gobièrnu, a alinea ku opositornan outonomista i a eksigí konvokatorio pa elekshonnan di gobernador.
WIMBLEDON – Rafael Nadal a enkargá su mes di drecha e aktuashon di e spañónan riba kancha di yerba i e ta na kabes di un trio di spañónan den oktavo final di Wimbledon. Suiza, Fransia, Rusia i Kroasia ta konta ku dos representante den e grupo di 16 mihó. Inglatera ku for di 1936 no ta disfrutá ku e título di un di esnan di dje den sekshon maskulino, tin su ilushonnan den Andy Murray. Oustralia, Alemania, Serbia i asta e isla di Chipre tin unu. I ke hubo di Merka? Sero. E pais di unda a surgi Andre Agassi, Jimmy Connors, John McEnroe, Pete Sampras i Bill Tilden ta pasando un periodo di krísis i no tin señal di lanta kabes. Miéntras ku talento a bira skars na Merka, un kantidat di figuranan ta aparesé na Asia, Europa i Amérika Latina. Ricardo Acuña, un eks hungadó chileno kende awor ta treiner ku e Asosiashon di Tenis di Merka, a komentá ku e mal resultado di e merikanonan ta reflehá den e alkanse global di e deporte. “E no ta un sekura, e asuntu ta ku sobrá di mundu a pone su mes na e mesun nivel”, Acuña ta señalá, kende a figurá den e promé 50 di mundu den añanan ’80. “Tempu mi tabata hunga, mayoria di e yabinan den e torneonan tabata formá pa merikanonan i e sobrá tabata nos. Awor e ta kontrali”. Mas aya di un aktuashon débil di e tènis merikano, e promé siman di Wimbledon a karakterisá su mes pa e kaida di un kantidat grandi di kabesnan di seri.
LAS VEGAS – E filipino Manny Pacquiao a konkistá su di kuater título mundial den diferente divishon djasabra ora el a nòkout e mèksikano David Diaz den di nuebe rònt i gana e korona di peso lihé di Konseho Mundial. E fenómeno filipino, ku 2,3 kilo mas di poder den su moketanan rápido, a konfirmá su fama komo e mihó bòksdó di mundu i el a amplia su dominio riba bòksdónan mèksikano. For di 13 aña pasá ku el a kuminsá su karera den 48 kilo, Pacquiao (47-3-2 ku 35 nòkout) a desaroyá te ora ela bira un bòksdó dominante den sinku kategoria. Su debut den e kategoria lihé tabata kargá ku e mesun dinamismo demostrá den su historia largu di peleanan den divishonnan di ménos peso – i meskos ku mayoria di su rivalnan, Diaz (34-2-1) a kai derotá. Velosidat tabata e spesialidat di Pacquiao for di tempu e tabata un fahadó teenager ku 148 liber. Ora el a subi rin ku 61 kilo djasabra, asta su treiner tabata puntra su mes si Pacquiao lo pèrdè e tremendo rapides ku e peso adishonal. E temor a pèrdè sentido ku un mirá so riba e kara lastimá i sangrá di Diaz, inkluso promé ku el a kai na suela den di nuebe rònt. “Mi ta sintimi hopi, hopi mas fuerte i mas poderoso den 135 liber”, Pacquiao a bisa, e promé bòksdó asiátiko ku a gana e koronanan di kuater kategoria. “Aki ta kaminda mi tin pensá di sigui. Mi tabata realmente bon. M’a keda hopi sorprendé ku e no a kaba promé”.
Rekonosé ku rasismo ta internalisá na Kòrsou tambe Semper ta interesante pa opservá kon na Kòrsou ta drai rònt di sierto realidat, miéntras ku tur hende si nan ke, por identifiká un òf otro indikashon di rasismo na Kòrsou. Den último dos dianan tabatin sufisiente kòmbersashon den vários sírkulo riba diskriminashon i rasismo. Interesante ta, ku muchu di esnan ku por hasi un diferensia den nos komunidat, ku ta duna testimonio di nan eksperensia ku rasismo, tin hopi biaha kurashi pa hasié ketu ketu bou di otro, ku miedu pa por keda indiká komo hende ku kompleho òf hende ku no meresé di a yega na e bon posishon ku nan tin. I aya banda tin mas hende ku públikamente a ekspresá masha hopi kos pa ekspresá nan repudio pa loke a pasa, pero niun no a riska na atendé ku nos realidat. Esei kaminda ku, sin nan ke, nan a demostrá parti di e rasismo internalisá ku ta bibu bibu serka nos tambe.
Loke mi a spera despues di e suseso ku a pèrmití papiamentu públiko/abiertamente riba rasismo na Kòrsou tabata un akshon real i inmediato di esnan konserní kontra di un akto kriminal abierto ku a tuma lugá riba nos isla; komo demostrashon di kon nos ta atendé, ku lei den man, ku kosnan ku no por ta aseptabel i tambe spesífikamente kon lo bai sigui atendé ku tur forma di ekspreshon di rasismo den futuro. Ami tambe ta bibando konsientemente na Kòrsou, basá riba un eskoho ku no tin mihó lugá na mundu pa biba. Aki nos tur ku ke ta biba kómodo den un ambiente kaminda tin hende ta sinti i ta aktua for di e pensamentu ku nan ta mihó, pasobra nan koló ta poko te hopi habrí i otronan ku ta sinti nan ménos, pasobra nan koló ta skur kla te hopi skur. Konsiderá esaki nos mihó sekreto públiko skondí.
WILLEMSTAD – Lider di Frakshon pa Partido Nashonal den Konseho Insular, sra. Gimena van der Gen, ta felisitá diputado Davelaar ku firmamentu di e protokòl históriko pa yega denter di algun aña na un hospital nobo pa pueblo di Kòrsou. Den mesun rosea, Van der Gen ta felisitá pueblo di Kòrsou ku e logro grandi aki pa salubridat públiko. Djabièrnè último diputado Davelaar na nòmber di Bestuurscollege a firma un protokòl ku Sehos i e organisashon di spesialistanan. Van der Gen ta kontentu ku despues di hopi aña di konflikto, sano huisio a prevalesé i ku tur aktor envolví a realisá ku ta huntu nan mester traha si ke yega un dia na un hospital nobo pa Kòrsou. Na 2006 tempu ku sra. Van der Gen tabata diputado di Salubridat a laga hasi un studio di komparashon di e diferente sitionan ku na e momento ei tabata riba mesa pa konstruí un hospital nobo, esta Jan Noorduynweg, Emmastad i Otrabanda. Mayoria di e arkitektonan envolví a stipulá, ku Otrabanda ta e mihó lokashon. Despues a tene un diálogo nashonal bou di tur stakeholders i for di esaki tambe a sali ku mayoria a deklará ku Sehos mester a haña e promé opshon pa konstruí un hospital i ku Otrabanda ta e mihó alokashon. Basá riba esaki, Bestuurscollege a tuma e desishonnan al respekto for di 2006. Tambe den e tempu ei eks diputado Van der Gen e aserká bouwcollege na Ulanda pa yuda guia e proseso pa yega na un hospital nobo i a bolbe nombra sra. Suzy Camelia- Ròmer pa a traha riba un protokòl entre gobièrnu di Kòrsou, Sehos i e organisashon di spesialistanan.
WILLEMSTAD – Partido Nashonal di Pueblo (PNP) ta rechasá kategórikamente e disturbionan ku tendensia rasista i ekstremista ku a tuma lugá siman pasá. Un ke otro instigá pa e asina yamá Aliansa Patriótiko. Segun PNP mester pone tur e partidonan polítiko ku ta den e aliansa responsabel pa konsekuensia di nan aktonan. Ta muchu fásil, segun PNP, pa simplemente bo distansiá bo mes di e konsekuensianan di un akto ora bo mes a yuda sembra odio i resistensia kontra un grupo spesífiko. Awor ku kos a sali kompletamente for di man algun di e partidonan ku ta forma parti di e aliansa, ke laba nan man manera nada no a pasa. Pa ta mas eksakto partidonan manera Forsa Kòrsou i MAN. E disturbionan rasista ku a keda instigá pa sierto lider ta un bèrgwensa pa Kòrsou i no ta relevante si ta mesun grupo ku a manifestá a bishitá e diferente establesimentunan despues, i a agredí hendenan ku segun nan tabata Hulandesnan Europeo. Echo ta ku ora komo lider ku tin siguidó bo kuminsá ku un proseso pa instigá un grupo kontra otro, bo ta lanta odio i vengansa den un komunidat i bo ta krea un esfera di violensia i ekstremismo ku por plama manera un venenu den adernan di bo komunidat. E instigamentu di e lidernan den e aliansa patriótiko no a kuminsá siman pasá pero for di na Marriot i den otro aktonan di ekseso ku nan a organisá o partisipá. Tur hende sa ku e úniko meta real di e aliansa patriótiko ta pa tumba gobièrnu pa nan mes goberná.
Segun sekretario di Estado: “Mester laga direktiva kaba e trabou di investigashon:
WILLEMSTAD – Hunta di Supervishon di Brasami ta sostené desishon di direktiva di Brasami, pa ku investigashon riba e maneho di direktor Marcel Pinedo. Tabata siman pasá ku Hunta di Supervishon di Brasami mester a drenta den kontakto ku direktiva di Brasami, kende a pone e direktor Marcel Pinedo riba no aktivo pa investigá sierto iregularidat ku a tuma lugá den e instituto Brasami. Tabatin hopi kuestionamentu di e forma ku esaki a tuma lugá, den kua e direktiva a mira ta nesesario pa pone e direktor Pinedo no aktivo, despues ku a deskubrí sierto informashonnan di maneho dudoso. Den promé instante Marcel Pinedo no a keda kontentu ku e forma ku presidente di direktiva di Brasami ta atendé e investigashon, dor di interogá empleadonan di Brasami pa yega na informashonnan riba diferente punto ku a keda denunsiá. Den kombersashon previo ku presidente di direktiva di Brasami Noraida Klaber a mustra, ku ta importante pa realisá e investigashonnan i ku lo no bèk despues di a purba di intimidá su persona. Klaber den entrevista anterior no a bai muchu den detaye, pero a mustra ku tin un investigashon na bienestar di Brasami ta tumando lugá. Pa e investigashon por kana su kurso, mester pone direktor Marcel Pinedo no aktivo. Den e disputa ku a surgi den medionan di komunikashon, sekretario di Estado a deklará, ku lo intervení dor di laga Hunta di Supervishon di Brasami drenta ku forsa ku e konflikto aki pa mira te na unda por responsabilidat riba nivel di gobièrnu lo por aktua.
WILLEMSTAD – E ekiponan U-20 di Antigua, St. Martin (Franses) i Anguilla a yega Kòrsou pa e eliminatorio pa e Mundial U-20 ku ta tuma lugá na Egipto otro aña. E siman aki e ekiponan aki i e selekshon nashonal U-20 ta midi forsa den un eliminatorio di Caribbean Footbal Union den Stadion Ergilio Hato. Ku e ekiponan na Kòrsou tur kos ta kla pa haña futbòl kandente mira atrobe aki na Kòrsou. NAVU, huntu ku e patrosinadónan mayó Fundashon Bon Intenshon, Ennia, Maduro & Curiel’s Bank i Breezes Hotel ke enkurashá un i tur pa bin apoyá e selekshon nashonal U-20. Ta trata aki di e estreanan lokal ku poko poko lo konsagrá nan mes den e estreanan ku mester hiba Antia na Mundial 2014. Ganadó di e eliminatorio aki ta pasa pa e siguiente buèlta. For di djadumingu e selekshonnan a kuminsá entrená den Stadion Ergilio Hato. E promé enkuentro entre Antigua i St. Martin ta tuma lugá djamars 1 di yüli pa 18.30, mitar di 7 den Stadion Ergilio Hato. E di dos partido di e fecha ta entre selekshon di Antia i Anguila ta tuma lugá 20.30, mitar di 9. Djaweps dia 3 di yüli ta tuma lugá pa 18.30, mitar di 7, tin e partido entre Anguila i St. Maarten siguí pa e Antia kontra Antigua pa 20.30, mitar di 9. Djasabra dia 5 di yüli tin e último partidonan kuminsando for di 18.30. mitar di 7, ora ku Antigua enfrentá Anguilla i pa 20.30, mitar di 9, Antia lo midi forsa ku St. Martin.
BLUME Rene Agustín (78 aña) Eks futbolista di Sithoc A laga atras su kasá Martha Blume-Gonzalez, yunan Michael, Gregory, Monique, Rene, Gilmar Blume i nan famia. Kremashon a tuma lugá 23 yüni na Medellin, Colombia.
HURTADO-JANGA Ligia Eusebia (74 aña) A laga atras Rrenard, Patricia i Rowan Hurtado, Pierrot, Gerda, Celine i Tiffany Hurtado, Prisca Trappenberg, Thom Janga, Hendrik Janga, BGermaine de Jongh-Hart tur ku nan famia. Akto di entiero ta djamars 1 yüli 11or for di misa Janwe pa santana Janwe. Bishita 9or. Promé ku entiero tin un s.s. di misa. Trahe alegre.
SCOTT Loisie Allan A laga atras su mama Iona Scott, yunan Scott i Leesly, rumannan Aridia Ventura, Adriana Williams-Leesly i demas rumannan. Akto di entiero ta djamars 1 yüli na Amsterdam, Ulanda.
Nicolaas Julia Margaritha Mihó konosí komo Juya Akto di entiero ta wòrdu anunsiá despues
FRAAY Maida Angela A laga atras su mama i rumannan. Mihó konosí komo Baby Akto di entiero a tuma lugá djaweps 26 di yüni.
PAULETTA Dennis Akto di entiero ta wòrdu anunsiá despues
TRINIDAD Victor Herman Mihó konosí komo Manchi A laga atras su kasá Maria Teresa Trinidad-Luis, yunan Farina Pombo-Trinidad, isbel Trona-Trinidad, nadine Trinidad. Akto di entiero ta djaluna 30 yüni 4or for di misa Janwe pa santana Janwe. Bishita 1or. Tin un s.s. di misa pa 3.30or.
