ORANJESTAD- E boto crioyo di piscado ta colorido, distintivo y ta dorna asina nos paisahe di costa y lama di Aruba. Paga tino cuanto propaganda di turismo ta uza e imagen di un boto di piscado crioyo pa mustra un poco di Aruba su elementonan unico.
E colornan cora, geel, oranje ta resalta. Su forma tradicional tambe ta graba den nos memoria. Asina e boto crioyo, mescos cu piscamento y piscado, ta parti integral di cultura di Aruba.
Diferente bario na Aruba, manera e.o. Palm Beach, Rancho y Savaneta, por ser caracterisa pa e tradicion di piscamento. Te awe ainda hopi parti rond nos awanan, por mira boto crioyo ta haci nan trabou.
Mientras cu e ofishi di piscamento a sufri un poco na man di modernisacion y oportunidadnan den otro industrianan riba nos isla. Piscamento y su colorido boto crioyo, a sa di perdura y keda conserva den e caracter di e Arubiano.
Dia 29 di juni proximo Centro di Pesca Hadicurari ta celebra Dia di Piscado atrobe. Preparacion ta tumando lugar caba pa un tradicional torneo di pesca cu premio atractivo, acompaña pa dia di famia cu competencia di pesca riba pier pa hoben, musica, baile y cuminda, y hopi sorpresa mas.
Un comision ta kibrando cabes con pa mihor rindi homenahe na baluartenan di piscamento y pa scohe e nomidadonan. Un decision a cay caba e aña aki, ta pa pone e boto crioyo den pantaya.
Dentro di poco lo presenta e diseño di e poster y material di propaganda, cual lo estrena e boto crioyo di piscado como atraccion principal e aña aki. Pa mas informacion por tuma contacto cu centro di pesca hadicurari na tel. 586-6610.

ORANJESTAD- Diahuebs atardi na Mr. Jazz situa nan Paseo Herencia, Nico Connor a batisa su CD nobo titula “Gospel Affirmations” den un forma sumamente bunita y special y cu ta macra tambe e di 10 CD cu e ta produci.
Durante di un atardi masha ameno den compania di invitadonan, famia, amigonan y prensa, Nico Connor a trese dilanti su ultimo produccion, cual ta un bunita compilacion di varios cancion tradicional cu nos conose na Aruba den e genero di Gospel.
E forma cu e bautismo a tuma lugar tabata hopi special, ya cu Nico a escohe pa pasa e baton over na e generacion nobo di Connor. Nico Connor a aparece for di e balcon como un sorpresa y despues cu e la hasi su presentacion e la tira e sticksnan abao na unda cu su sobrinonan morocho, Quincy y Wesley Connor a catch nan y a cuminsa toca ariba steelpan di Nico.
Hopi emocionante y cu un significado hopi importante tabata e forma symbolico aki di e bautismo nobo di Nico Connor. Na su lugar e ta trata di un CD di Gospel. Despues Nico a baha for di e balcon y a topa su sobrinonan ariba escenario. Nan tur a uni hunto den un cancion y asina a marca historia y a asegura cu e tradicion Connor ariba steelpan lo continua pa hopi generacion mas.
E presentacion musical a ser acompaña pa Michael Odor ariba piano, Ivan Quandus ariba bass guitar y Eugene Jones ariba drumset, kende ta ruman di Nico.
Nico Connor a hasi un dedicacion special den su CD nobo cu ta bisa lo siguiente: “This album is dedicated to the Lord God Almighty who blessed me with my musical talent. A special honor to my grandfather, Pastor E.V. Connor, who shared with us that when you follow in the path of the father, you learn to walk like Him.”

ORANJESTAD- Nos atleta Arubano a gana e campeon nacional di Canada y despues a gana e campeon di Trinidad pa oro riba su pais.
Recientemente cuater atleta Arubano Ramphis Murray, Marshal Oehlers, Estrella Camara y Willy Willems jr a biaha pa Trinidad & Tobago pa participa den e
9th Caribbean Taekwondo Championship, unda pa prome biaha e protector electronico nobo a wordo intrudusi den e region di Caribe y America.
Tur atleta a bin bek Aruba cu un medaya significativo e.o: 2 plata, 1 brons y 1 oro. Marshall Oehlers a bringa un bon pelea pa promer biaha mirando cu e la cambia di divicion junior pa divicion adulto contra un atleta di Surinam cu hopi aña di experencia. Srta.Estralla Camara y Ramphis Murray tambe a haci nan best pero nan contricante tabata tin mas experecia.
Sinembargo tabata e hoben atleta elite y capitan di e selecion di Aruba Willy Willems jr. ta esun cu a sombresali ganando un Oro hopi importante pa Aruba.
Nos atleta Arubano a gana e campeon nacional di e pais grandi manera Canada cu a representa Barbados pa despues bai final contra e campeon di Trinidad y gana esaki riba su pais dilanti di su publico, pa Oro.
Mester remarca cu e campeonato aki tabata hopi grandi unda cu 15 diferente pais di caribe a participa y un nivel hopi halto mirando cu mayoria di e atletnanan cu a participa na Trinidad & Tobago ta train na paisnan renombra den e mundo di Taekwondo y nan ta forma parti di selecionnan di paisnan manera Canada, Francia, Hulanda y Merca.
Awor nos atleta(nan)Arubano despues di a representa Aruba na varios ocacion cu bon, resultadonan awe ta pone un medaya di Oro mas 1 plata y 2 brons banda di e otronan importante pa nos pais.

ORANJESTAD- Despues di e reunion general di directiva di ODEA cu a tuma lugar 26 di mei u.p. den facilidad di ATIA, e organisacion di enfermeronan di Aruba a tuma nota di un gran interes bou di nan miembronan pa participa na e eleccion di un directiva nobo cu lo tuma lugar diahuebs 12 di juni venidero.
Varios ta esnan cu a demonstra interes di e puestonan vacante. No por keda sin menciona un di e ex-presidentenan den perosna di sr. Richard Maxwell, kende por cierto ta tambe e fundador di e asosacion ODEA na 1989.
Ta haci un suplica na tur interesado pa corda yena e formulario di candidatura y entrega esaki na e directiva actual no mas laat cu diamars 10 di juni 2008.
Pa e eleccion riba 12 di juni venidero ta recorda dunadonan di cuido, "verzorgenden" cu nan tambe por forma parti di e directiva nobo. Tur loke nan tin di haci ta postula nan candidatura pa sea presidente of miembro di e directiva y stimula nan coleganan pa vota pa nan diahuebs 12 di juni venidero.

 
Pero ta lamenta cu esnan di MEP mes no kier sostene e comision aki

ORANJESTAD- Awe mi kier toca dos topico, cu ta e instalacion di e comision pa bin cu solucion pa AZV, y tambe e intencion di Gobierno pa bini cu un aumento grandi pa loke ta trata control di prijs di un gran cantidad di comestibel.
Nos, di Partido Democracia Real ta aplaudi e iniciativa aki di Gobierno pa traha hunto cu sector priva pa asina conhuntamente yega na un solucion pa e problemanan serio cu AZV ta confrontando.
Ta importante pa Gobierno realiza cu via consensus semper por yega na solucion pa e tipo di problemanan aki, y no via decisionnan cu gobierno kier impone sin consulta cu ningun hende.
Democracia Real ta spera cu conhuntamente lo por sali for di e problemanan grandi pa asina por beneficia henter nos comunidad.
Loke si a straña e partido, ta cu nos por a scucha un integrante di e partido mas grandi di oposicion critica e iniciativa aki, alegando cu ta net comercio y sector comercial ta culpabel di e problemanan actual.
Ta bon pa e partido aki corda cu ta nan mes a introduci AZV na un forma descabeya encontra di tur conseho e tempo ey, y cu ta e motivo cu nos tin tanto aña caba ta luchando cu un sistema cu a introduci sin preparacion adecuado.
Democracia Real ta spera cu partidonan den oposicion por apoya cos bon cu ta sosode, y no critica tur cos djis pasobra e ta bin di gobierno.
CONTROL DI PRIJS
Pa loke ta trata e intencion di Gobierno pa amplia e control di prijs di parti di gobierno, nos ta altanto di e carta cu Minister di Finanzas a manda pa tanto e supermercadonan como e importadornan caminda e ta splica cu gobierno kier impone margen maximo riba un cantidad enorme di producto.

WILLEMSTAD - Den kaso ku Gobièrnu aktua kontra direktornan general i finansiero di Fundashon Kas Popular, esaki lo nifiká un alivio pa e klientenan di Fundashon Kas Popular. Asina diputado Godett a deklará, ora ku el a referí na e partisipashon ku el a hasi Arthur Con, direktor general di Fundashon Kas Popular, ku e no tin konfiansa mas den su manera di manehá Fundashon Kas Popular.
Segun Godett si hasi un sondeo entre klientenan di FKP, por konkluí ku mayoria kliente ku akudí na FKP, su asuntu nó ta wòrdu solushoná pasobra e gerensia aktual no ta tuma e desishonnan nesesario pa kosnan kana korektamente den e empresa.
Tambe e diputado enkargá ku FKP a bisa ku e ta pendiente di regreso di Henry Jourdain for di eksterior, pa e tambe haña e mesun partisipashon ku señor Con.
Godett a papia kaba ku SEBI, ku ta e sindikato ku ta representá trahadónan di FKP.
Entretantu e diputado a risibí por eskrito, kontesta riba preguntanan ku el a hasi direktor Arthur Con i riba asuntunan interno di FKP. Godett a bisa di no ke adelantá riba e siguiente pasonan ku direktiva ta bai tuma kontra Con i Jourdain. “Pero e situashon a base di e maneho di FKP ta laga hopi di deseá”, e diputado a remarká.
Awor ku Gobièrnu a pèrdè konfiansa den e direktornan, el a enkargá un abogado ku investigashon di e aspektonan hurídiko. Diputado Godett a splika ku na su debido tempu, lo bira konosí kua desishon direktiva di FKP ta tuma.

WILLEMSTAD - Durante di un reunion djaweps último, Gobièrnu a tende e proposishon di Dutch Caribbean Taxi Association, DCTA, ku lo mester ta un solushon kontra pa e efektonan okashoná dor di e subida di preis di kombustibel.
Gibi Vernon, presidente di e Asosashon, a splika ku ta trata di un tarheta ku mester yuda kubri e márgen di oumento di preis di kombustibel. Segun e Asosashon, tumando na kuenta ku no tin nada ainda ku por nifiká un solushon pa e problema mundial di subida di kombustibel, e Asosashon di Taksi ta boga pa introdusí e asina yamá: ‘Transportation Benefit Card’, TBC.
Segun e deskripshon dje proyekto di e Asosashon, e pòt lo wòrdu manehá dor di e koperativa di DCTA pa medio di un koperativa.
E tarheta lo mester wòrdu usá den tur establesimentu ku bira miembro di e komishon. Na e establesimentunan lo tin un ‘swipe-machine’ ku ora ku un kliente kumpra algu, e kahera ta ‘swipe’ den e mashin di TBC. Na e momentu ei, e kliente ta risibí benefisio riba e loke ku el a kumpra. Den futuro TBC lo ofresé e miembro muchu mas benefisio, segun Gibi Vernon. E benefisio lo no wòrdu duná na e kliente, segun e proyekto di e Asosashon di Taksi, pero e ta bai den pòt. E pòt aki ta pa kubri e márgen na momentu ku un kliente di TBC kumpra kombustibel. Dutch Caribbean Taxi Association konhuntamente ku e establesimentunan lo traha riba un tabèl, pa fiha loke mester bira e kantidat di porshento ku un kliente lo risibí na momentu di hasi kada kompra.

WILLEMSTAD, - E molèster i kasonan kriminal kometé pa antianonan na e siudat Rotterdam a oumentá den 2007, kompará ku 2006.
Esaki a sali na kla den un relato ku mester midi progreso di esfuersonan pa kombatí krímen, ku a diskutí den seno di konseho munisipal di Rotterdam ayera nochi.
Ironia di e asuntu ta, ku registrashon di e kantidat di delito ku antianonan ta kometé a oumentá, hustamente pasobra outoridatnan ta konstantemente riba e antianonan.
Polis ta aktua mesora, asina e splikashon ku a duna ta bisa.
T’asina ku Rotterdam ta mantené un maneho di sero toleransha.
Hustamente e maneho aki a pone ku kasonan mas pisá kontra lei manera robo riba kaya, violashon, poseshon di arma di kandela i maltrato severo a baha aña pasá.
E aktonan kriminal mas leve hustamente a subi, segun e investigashon.
Interesante ta pa menshoná ku den 2007 e kantidat di molèster komo konsekuensia di droga a bolbe baha ku un 30 porshentu.
“Mas tantu polis papia ku hendenan ku ta hendenan ku ta kla pa hasi malu, ménos nan ta skohe kaminda di kriminalidat. Nan ta bai mustra un otro tipo di komportashon”, asina Henk Korvinus di Ministerio Públiko a deklará. El a bisa ku e ta kalkulá ku pa e aña aki tantu e kasonan di molèster komo delitonan kontra lei lo bira ménos.
Rotterdam tur aña di nobo ta gasta miónes pa redusí kasonan di kriminalidat, molèster i retraso sosial entre antianonan den e siudat aki i pa evitá ku nan ta bai kai den e sirkuito kriminal.

WILLEMSTAD, - Servisio di Obra Públiko ta bai kuminsá pronto ku e di dos fase di drechamentu di Schottegatweg Noord. Ta trata di e área di Schottegatweg ku ta kore for di Warda di Polis na Rio Canario te na altura di Puerto Ricoweg. E trabounan ta kuminsá – si no bin nada imprevisto – e próksimo siman di yüni.
Manera boso sa kaba, e promé fase ta tras di lomba. E promé fase a kubri e área entre Gosieweg te na entrada di Suffisantweg i aworakí ta práktikamente kla.
“Eksperensia di promé fase a siña nos ku e fundeshi riba e trayekto aki – esta e promé fase – ta bon. Esei ta nifiká ku den e di dos fase, lo no ta nesesario tampoko pa koba i saka e fundeshi bieu. Loke e kaminda aki lo haña ta e asina yamá “binder” i e kapa final di asfalt. Un bentaha ta e ora ei, ku e trabounan lo dura ménos.
Esei ta e kaminda mes. Pero banda di esaki, lo pone atenshon na e parti di alsera. Riba e alsera mei-mei lo planta palu miéntras lo pone klenku na e alsera na banda.
Unabes trahando riba e trayekto aki, lo probechá kambia i drecha iluminashon di kaya. Unabes ku esaki ta kla, e ta bai keda un beyesa kompleto. Den kuadro di e di dos fase, lo drecha tambe e krusada kompleto na e lusnan di tráfiko na Rio Canario, ke men, tantu e baan nort komo e baan sùit.
Pa por ehekutá e trabounan aki manera boso tur por komprondé, lo tin ku adaptá tráfiko.
Básikamente lo apliká e mesun prinsipio di e promé fase. Lo kita un parti di e vangreil i tráfiko lo pasa parsialmente riba e baan sùit.

WILLEMSTAD, - E proyekto di konstrukshon di 14 kas di Fundashon Kas Popular na Johan van Walbeeckplein aworakí ta pegá. E ta pegá, pasobra e kontratista ku a kuminsá traha riba e proyekto, a hañ’é ku problema finansiero, ku konsekuensia ku e no por a kaba e kasnan manera palabrá. Mi ta pone Fundashon Kas Popular responsabel pa esaki, asina diputado Anthony Godett a anunsiá ayera tardi.
E kos aki ta ferfelu, pasobra e tin konsekuensia finansiero tambe, asina el a agregá.
Ta trata aki di 14 kas ku a kuminsá konstruí òktober aña pasá. Na okashon di ponementu di promé piedra, diputado Anthony Godett a anunsiá ku e ta spera ku e kasnan lo ta kla na prinsipio di desèmber, di manera ku e por hasi un regalu di San Nikolas ku e kasnan. E kasnan mester a keda kla dia 6 di desèmber 2007.
Esei sinembargo no a kristalisá. Na diferente okashon den e lunanan ku a pasa, diputado Godett a kritiká esaki, mustrando ku e no por komprondé kon bin konstrukshon di apénas 14 kas mester tuma asina tantu tempu.
Ayera, durante e enkuentro ku prensa, e mandatario a anunsiá ku ta ofisialmente konosí awor, ku e kontratista ta den problema finansiero i no por kaba e trabou.
Esei ta nifiká ku nos mester kana e kaminda hurídiko, di pone e kontratista manera nan ta bisa na ulandes ‘in gebreke’. Normalmente den un kaso asina’ki e kontratista lo mester pidi un otro kontratista pa finalisá e trabou ku e no a kaba. Pero manera nos tur sa, di un galiña sin pluma bo’n por kita nada”, segun e diputado.

WILLEMSTAD, - Tres hòmber ku tabata enbolbí den e kaso di tiramentu na e sentro nokturno El Hombre na Spijkenisse, a haña 6 aña di kastigu di prizòn. Esei ta sentensia di Korte relashoná ku e kaso aki, den kua tabatin yu di Kòrsou enbolbí. E kaso a hala basta atenshon dia el a tuma lugá.
E kaso a tuma lugá dia 10 di ougùstùs aña pasá. En total 5 persona a resultá heridá den e tiramentu aki ku a tuma lugá den e bar ku yama El Hombre na Spijkenisse.
E hòmber ku nan ta konsiderá esun ku a inisiá e tiramentu, Vernon P., a kana drenta e bar den kareda di mei anochi.
Segun su mes vershon, e tabatin intenshon di bai kumpra sigaria den e sentro nokturno, pero ora el a drenta, el a konstatá ku tabatin e dos personanan sintá, Drem G. i Nadyen I. den e sentro.
P. ku aparentemente no a konfia e kos a saka su arma di kandela i a kuminsá tira. E dos otro akusadonan a kontestá e tiramentu. E dos akusadonan aki den pasado a yega di bati P. pa mata i nan a hòrta un kadena di oro for di dje.
Aparentemente P. a kuminsá tira manera hende loko, heridando 6 persona. Un di esnan heridá, un hòmber di 39 aña ku ta biba na Spijkenisse mes, por a bai kas e mesun anochi despues di a risibí tratamentu. Di e 4 heridonan ku a keda interná, dos otro tambe a bai kas den e fin di siman despues.
Manera indiká kaba, e hòmber a kuminsá tira kasi pa loko, pero su tiramentu a ser kontestá pa un persona ku tabata den e bar e momentu ei.

AMSTERDAM / WILLEMSTAD, - E kompania ulandes Martinair ta konsiderando pa kuminsá bula mas poko poko pa asina spar riba e kombustibel ku e ta usa. Nos ta hasiendo un estudio di e kos aki, pasobra nos ke sa eksaktamente kiko nos ta kuminsá kuné, asina un portabos di e kompania a anunsiá awe.
E portabos a bisa ku esaki ta un opshon serio ku e kompania ta kontemplando.
Pa e kompania KLM sinembargo, e posibilidat aki no ta na diskushon.
Un portabos di e kompania a mustra ku danki na un maneho di kombustibel hopi fuerte, de fakto esun di mas fuerte den sektor di transporte, KLM a logra baha su gastunan di kombustibel ku 25 porshentu mas abou ku e kompania promedio den e sektor aki.
Medidanan ku kompanianan di aviashon ya a introdusí, entre otro KLM mes tambe, ta entre otro e kore riba pista riba un motor so i tambe semper tene kuenta ku e ruta di mas kòrtiku.
Tantu KLM komo Martinair entretantu a adaptá e forma ku ta limpia motor di avion.
Mas limpi un motor ta, ménos kombustibel e ta usa, a sali na kla. Pa Martinair esaki ta nifiká sparmentu ku 1 porshentu di gastu di kombustibel.
Manera ta konosí, sektor di aviashon ta pasando momentunan difísil komo konsekuensia di oumento di preis di kombustibel.
E kompanianan di aviashon aki ta luchando tur ku tin, pensando riba formanan kreativo pa sali for di e problema di kombustibel ku ta oumentando konstantemente.
E pasahero, ta esun ku ta sufriendo mas, pasobra ta poniendo e oumento den forma di un porsentahe adishonal riba pasashi.

WILLEMSTAD - Djaweps 29 mei Kooyman Techniek B.V. a hasi un donashon di 20 fèn na balor di FL 5300.- na Stichting Kinderoorden Brakkeput. Riba e pòtrèt yùfrou Jeannette Gerard Marketing Manager Kooyman Techniek entregando un cheque simbólikamente na Sra. Godalys Kwidama- Reina dirèktris di Stichting Kinderoorden Brakkeput ku un par di mucha di e Stichting i Service Team di Kooyman Techniek.

WILLEMSTAD - KUNG FU PANDA un sine di Dreamworks, ta un sine animá di un Panda ku yama Po. E ta stima Karate pero e ta e animal di mas floho na China. E ta siña su mes Karate i despues ta usa su abilidat nobo pa bringa su enemigunan. E ta un sine pa tur edat.
Pa selebrá e tremendo pelíkula aki, McDonald’s ta selebrá Kung Fu Panda ku nan Happy Meal. Muchanan lo por kolekta tur e personahenan di e sine na kompra di un Happy Meal. Tambe na kompra di un Happy meal ta risibí un coupon pa un Popcorn grátis na The Movies. Bin selebrá Kung Fu Panda na McDonald’s i wak e pelíkula na The Movies.
Preisnan chikí
Mirando ku preis ta subi tur kaminda, McDonald’s ta sigui su kampaña di Preisnan chikitu.
Awor te ku próksimo aviso Bo por saboriá e konosido i tremendo Big Mac pa solamente Fl. 3,25! Tambe por saboriá un hamburger, limonada chikí, Mc Nuggets di 4 pida, sundae di Strawberry òf batata chikí pa solamente Fl.2,00.

WILLEMSTAD – Na nòmber di Konseho Pastoral i tur gruponan di Parokia di Zùit Bonam, Parokia di Zùit ta partisipá na Pueblo di Kòrsou, ku nan a risibí e grato notisia ku Pastor Jose Guillermo Ortega, a wòrdu nombra dor di Obispado di Willemstad, komo e Pastor di Parokia di Zùit Bonam.
Parokia di Zùit ta invitá pueblo di Kòrsou i spesialmente tur Parokiano di Zùit Bonam pa bishita Misa durante fin di siman i den siman pa por sera konosí ku Pastor Guillermo, ku resientemente a haña su nombramentu komo Pastor di Parokia di San Hudas Tadeo.
“Nos ke gradisí pueblo di Kòrsou den su totalidat ku huntu ku nos a spera pa nos haña nos Pastor di Parokia, i aktualmente huntu nos ta selebrando e grato notisia, ku Zùit Bonam tin su Pastor,” asina e komunikado di Parokia di Zùit ta finalisa.

WILLEMSTAD - Den kuadro di e proseso pa konsolidá i sigui mehorá trabounan i dunamentu di servisio dor di e departamentonan ku ta kai bou di su enkargo, Minister Adriaens resientemente a hasi apelashon riba su kolega Minister Eurlings di Hulanda pa yuda finansiá e proyekto “reforsá atministrashon marítimo” na e Direktorado Marítimo.
Minister Eurlings ku a mira e propósito di e proyekto no a duda pa yuda Gobièrnu Sentral en partikular i nos komunidat en general. “Mi ta kontentu i gradesido ku Minister Eurlings a duna su koperashon kompleto i ta suprayá asina mi vishon pa nos keda mehorá kalidat di trabou ku direktoradonan ta ehersé”.
Komo esun enkargá ku atministrashon marítimo na Direktorado di Nabegashon i Marítimo di Antia, Minister di Tráfiko i Telekomunikashon Ir. Adriaens a sera un areglo pa finansiamentu di e proyekto “Reforsá atministrashon marítimo” ku USONA.
Seramentu di e finansiamentu aki por wòrdu kategorisá komo otro gran resultado a base di esfuersonan hasí huntu entre Minister Eurlings (ku resientemente tabata na Kòrsou) i Minister Adriaens. Alabes esaki ta otro muestra ku huntu nos por logra hopi den reino.
Propósito di e proyekto spesífiko aki ta pa mehorá e atministrashon marítimo konforme normanan internashonal i asina tene e nivel di trabounan, hasi tantu paden komo pafó di reino haltu.
E finansiamentu ta wòrdu hasí posibel via USONA ku ta e organisashon den kua Hulanda ta buta fondo disponibel pa finansiá proyektonan ku ta kontribuí na desaroyo di Antia.

Mas ku 400 hende lo bishitá Kòrsou pa reunion di asamblea di ALIDE

WILLEMSTAD - Arthur Rosaria, direktor di Korpodeko, a keda apuntá den direktiva di Asociación Latinoamericana de Instituciones Financieras para el Desarrollo (ALIDE). Durante su reunion anual, asamblea general di ALIDE a aprobá Kòrsou komo sede pa organisá e reunion di 2009.
E aña akí ALIDE a kumpli 40 aña. Arthur Rosaria a asistí na e kongreso i a postulá Kòrsou eksitosamente na nòmber di Korpodeko, ku ta bai aktua komo anfitrion.
“Nos a bai p’e i nos a logr’é. E kos akí ta hopi bon pa Kòrsou”, asina Arthur Rosaria a duna di konosé. Aparte ku awor Kòrsou ta konta ku representashon den direktiva di e órgano máksimo di bankonan di desaroyo den nos region, organisashon di un kongreso asina tin un impakto dirèkt riba ekonomia di Kòrsou.
E kongreso lo atraé 400 persona i lo tuma lugá durante e delaster siman di mei di aña 2009. Partisipantenan prosedente di rònt Latinoamérika i Karibe, Canada, Alemania i Spaña lo bin Kòrsou pa mas o ménos un siman. Hopi lo probechá pa pasa wikènt na Kòrsou.
Korpodeko, Kòrsou su banko di desaroyo, tin komo meta prinsipal pa stimulá un desaroyo sosial ekonómiko positivo di Kòrsou. Hopi biaha esaki ta sosodé atrabes di fiansa na empresa chikitu i grandi ku ta stimulá ekonomia. Sinembargo den e kaso akí, Korpodeko ta stimulá nos ekonomia direktamente organisando un evento di e magnitut akí.

WILLEMSTAD – Un polis ku hañ’é den un situashon kaminda rápidamente e tin ku tuma un desishon i aktua, no tin hopi tempu pa pensa. Sin embargo e desishon ku e tuma mester ta un bon desishon. Skol di Polis (LPO) tin un programa nobo ku yama Backbone.
Backbone ta simplemente un ‘wesu di lomba hurídiko’ pa e polis ku kaba di subi kaya. E kantidat di regla ku un polis tin ku tene kuenta kuné, ta pone ku difísilmente un polis por sa tur kos hurídikamente pa e por hasi su trabou. Espesialmente si tene na kuenta ku e reglanan akí ta kambia tur aña. “Esaki no ta na Antia so sino tambe na Ulanda i posiblemente tambe na China, Chile òf Zambia”, segun LPO. Tòg na e skol di polis nan no ke pa e polis ta insigur. Segun LPO e polis mester por aktua di un forma sigur. “No pa e poder sino pa por para fuerte riba su pia a base di lei.”
Backbone tin ku kontribuí ku esaki. Backbone ta trein via un sistema moderno riba kòmpiuter, e maneranan pa e polis usa e medionan ku e tin na su disposishon. Ku ehèmpelnan riba felm i kasonan den práktika, ta trein e polis aspirant kon pa tuma desishonnan lihé i bon. Esaki ta nesesario pasó si riba kaya tuma lugá un atrako, e polis no tin tempu pa wak den su buki di lei loke no por i si por. Ora e mira e sospechoso e tin ku drenta akshon mesora. E tin ku detené e sospechoso, listr’é i konfiská pruebanan sin tin ku pensa muchu largu. Tur loke sosodé despues, por buska den buki. ‘Drill & practise’ te ora e polis riba kaya ta sigur di su aktuashon hurídiko.

WILLEMSTAD – A base di e defisiensianan konstatá i opheshonnan, Kontrolaria General ta konkluí ku e no por aprobá e sifranan anual 2001 di Gobièrnu di Kòrsou. E sifranan anual 2001 ta e promé ku SOAB a kontrolá i mes ora a disidí pa duna un deklarashon di akountent negativo.
E informashon akí ta saká for di un dokumento ku LA PRENSA a risibí awe mainta. E investigashon di ARNA tabata pa duna un opinion tokante e maneho finansiero i responsabilisashon. A kontrolá si a realisá e obligashonnan, gastunan i entradanan segun e presupuesto stipulá; si a sòru pa un maneho finansiero na òrdu i kontrolabel; e responsabilisashon finansiero tabata hinká den otro segun reglanan stipulá i finalmente si e responsabilisashon finansiero tabata reflehá na un manera sólido, e maneho finansiero ku a hiba.
Kontrolaria General, despues di a desaprobá e sifranan anual, ta pone énfasis ku e kousanan ku a kondusí na e konklushon akí no ta nobo. Kontrolaria General apénas a nota mehorashon pa resolvé e kousanan ku ta kondusí na e konklushon ku e maneho finansiero te ainda ta defisiente, ounke ku e sifranan anual 2001 ta e proménan ku SOAB a kontrolá. Den e ‘managementletter’ di SOAB, e ta konstatá ku e rekomendashonnan ku el a hasi relashoná ku investigashonnan independiente di balansa, no a kondusí na mehorashon.
Mas aleu e dokumento ta bisa ku, si enbèrdat Bestuurscollege ke yega na un situashon kontrolabel, no por otro ku mester traha aktivo pa drecha e kalidat di e organisashon atministrativo, e kòntròl interno, pero tambe na eliminashon di e metementu direkto di diputadonan ku e trabounan operashonal. Kontrolaria General ta remarká ku mehoramentu di e organisashon pa definishon no ta un asuntu kompliká i kompleho. Den hopi kaso ta trata di tumamentu di medidanan básiko. Segun Kontrolaria General no tin niun èksküs pa keda sin tuma e medidanan ei riba tèrmino kòrtiku, pa asina por yega na e situashon deseá denter di un tèrmino rasonabel di algun aña. Kontrolaria General ta konsiente ku no ta trata solamente di asuntunan tékniko, pero tambe ampliamentu di konsiensia i envolvimentu.

Lorito ta yama tur hende un felis djabièrnè. Nos ta sigui bula, bula i bula anke tin hende ku no ke pa nos bula den nan serkania. E problema ta ku nan no por stroba nos di bula kaminda nan ta. Pa nan hasi esei, nan mester buska ala falsu òf rab’i fli pa nan yega kaminda nos so por yega! Nan a keda lep!
****
Lorito a tende ku e proyekto aya na ta kana masha bon. Nan a bisa ku a hür edifisio pa masha hopi sèn pa luna, a pretendé mil i un kos i awor no por kumpli. Doño di lugá a bin kobra hür pero no tin plaka pa paga. Trahadónan ku a prepará proyekto tambe ke kobra pero pa nan tampoko tin sèn. Awor hasta tin hende a kuminsá bula for di proyekto. Nan a bisa kaba ku nan si no ta sigui traha mas ku hende kaminda nan plaka no ta sigur! Lorito a komprondé ku por lo pronto por wèl lubidá. Lorito ke bisa nan “next time better luck”! Bida no ta fásil!
****
E kos mas prèt ku Lorito a tende e siman aki ta hende ta diskutí riba prensa neutral i ophetivo. Pa bo por diskutí riba e pregunta si prensa ta neutral i ophetivo, bo mes mester ta neutral i ophetivo. Ademas bo mester tin konosementu di kiko bo ta papia. Bo no mester ta kos bruha di tal forma ku Lorito tin impreshon ku bo pianan no ta riba suela. Esaki ta djis algun ingrediente. Tin hende ta gusta hasi nan mes ridíkulo! Anto tin hende ta bai nan tras tambe!
****
Nos amigu Bicho MBA mester wak su kaya masha bon. Nan a bisa ku parse tin un koriente kontra dje ku ta buska moda pa hal’é un banda. Den e grupo tin hendenan ku no kier kaba di realisá ku nan tempu a pasa. E siman aki nan a haña otro derota fulminante. Nan a laga hendenan inosente bai un lucha ku nan no por a gana. Ken a sali pèrdí? Korekto……esun ku a bai lucha!