ORANJESTAD – SETAR a constata cu otro personanan ta mandando e-mailnan pa e usuarionan y clientenan di SETARNET pidiendo pa yena informacion personal (incluso password) y manda nan na cierto adres.
Esnan cu a manda e e-mailnan aki ta identifica nan mes na e momento aki como THE SETARNET UP-GRADE SUPPORT TEAM and pacman@codego.ca.
E e-mail ta pretende cu Setarnet ta upgrade bo account y cu bo tin cu manda bo password pa upgrade emaillink@gmail.com and teamgrade07@gmail.com.
E e-mailnan aki no ta bini di Setarnet. SETAR nunca lo pidi ningun cliente ni usuario pa inforacion pesonal ni password via di un e-mail. Nos ta urgi pa no contesta e e-mailnan aki y delete nan mesora.
SETAR ta conseha tur su clientenan pa nunca manda password ni informacion personal pa ningun hende via e-mail. Si acaso bo por contesta e e-mailnan aki toch, cambia bo password di inmediato of tuma contacto cu nos helpdesk na telefoon 583-4000.
E fenomeno aki di purba haya informacion personal di clientenan y usuarionan di internet na un manera scondi ta algo cu mundialmente ta pasando den vario pais cu tin servicio di internet.
Esaki nan ta yama “phishing”. Como compania responsabel SETAR ta tumando semper pasonan necesario pa preveni tipo di fenomenonan cu usuario por topa riba cyberspace.

Simon Bolivar ta inspira nos pa bira mas creativo dilanti problemanan cu ta afecta nos awendia

ORANJESTAD – Enconexion cu conmemoracion historico di e Republica Bolivariano di Venezuela su 197 aniversario di Independencia, Promer Minister di Aruba sr. Nelson Orlando Oduber a pronuncia un discurso di felicitacion na henter pueblo di Venezuela.
Den e acto protocolario di ponemento di ofrenda floral dilanti di escultura di Simon Bolibar riba cabay, Premier Oduber a hiba palabra caminda el a felicita Gobierno di Bolivariano di Venezuela y su pueblo den e fecha tan special di 5 di juli pa tur Venezolano, pero my specialmente na e colonia di Venezuela residencia na Aruba.
E mandatario Arubiano a laga sa cu ta hopi importante pa recorda e lucha di independecia di e pueblonan Sur Americano, bou e mando di e visionario Simon Bolivar y cu awendia e ta un inspiracion pa nos por bira mas creativo dilanti e problemanan cu ta afecta nos manera prijs halto di petrolio y cuminda, pero tambe e crisis social y moral.
Premier Oduber a declara cu e fecha di 5 di juli ta uno hopi special pa reafirma nos agradecimento na nos conciudadanonan Venezolano pa nan aporte na e sociedad y economia di nos isla. “Nos tur lo sigui cu un vision so di sfuerzo y trabou den direccion di un futuro propero”, asina e mandatario local a bisa.
Premier Oduber a recorda tambe cu ta existi un distancia cortico entre Venezuela y Aruba y esaki a contribui tambe cu awendia ta existi un laso di familiaridad masha fuerte. “Hopi di nos antecesornan Venezolano a bin residencia na Aruba pa asina construi un futuro riba e isla hospitalario aki”, asina Prome Minister Oduber a bisa diasabra ultimo riba Plaza Simon Bolivar.

ORANJESTAD- Despues cu Minister di Turismo y e comicion organizador di Aruba Music Festival a nuncia e line up di e aña aki pueblo di Aruba a keda den espera pa por cumpra nan ticket di entrada pa e fabuloso 2 anochinan di concierto.
Pa medio di esaki Aruba Music Festival kier a informa na tur fanaticonan di tanto Reo Speedwagon como Gloria Estefan cu entradanan pa e conciertonan lo bai ta obtenibel entrante diahuebs 10 di july na tur SETAR Teleshop y mester remarca cu e “Gold Circle” ticket lo bai ta obtenibel solamente na SETAR Teleshop na Irausquinplein esta e ofcina banda di Post Aruba .
Manera a ser anuncia e festival lo bai tuma lugar den Aruba Entertainemnet Center y ta custumber cu Aruba Entertainement Center tin 3 area y fanaticonan di e artistanan por escoge na unda nan kier sinta durante e conciertonan.
Entrada:
US$ 125,= pa asiento “Gold Circle” (cantidad limita)
US$ 75,= pa asiento di preferencia
US$ 50,= pa admission general
Aparte di e teleshopnan di SETAR entrada lo ta obtenibel tambe via internet via
www.ticketweb.com y na De Palm Tours.
Aruba Music Festival:
Di acuerdo cu Ing. Edison Briesen, Minister di Turismo y Transporte y Comicion di Aruba Music Festval desde cu a anuncia e line up luna pasa e demanda pa entradanan pa tur dos anochi ta super grandi den tur mercado y kier a informa pueblo di Aruba cu un cantidad remarcabel a ser poni un banda pa e mercado di Aruba pero cu esaki ta obtenibel tanten cu tin den stock.
Asina ta recomenda pa tur hende cu kier garantiza nan entranda pa mira Reo Speedwagon y Gloria Estefan den concierto na Aruba dianan 10 y 11 di oktober respectivamente pa buska nan entrada lo mas pronto posibel y NO warda pa mañan. Y corda cu e capacidad di espacio den Aruba Entertainment Center ta limita.

ORANJESTAD- Directiva di Juliana School ta presenta e lista di graduadonan cu a termina cu exito nan educacion di MAVO pa e institucion aki.
Nan ta Ramon Arends, Cedric Croes, Omar Elbakh, Thaisa Farro, David Fernandez, Najee Geerman,Najibe Herrera, Peter Huaman, Zjevaun Janga, Richenelly Kelly
Jeanoir Koolman, Maria Lagare, Isis Rivero, Darren Romero, Christian Ureta Lozada, Julaisca Angela, Carlos Barrera,Elton Blanco-Colina, Benoni Chirino, Elvinia Evertsz, Jodie-Ann Godet, Renomar Henriquez, Victor Huamani Espillco, Jordrick Jacquin, Chantel Levestone,, Jay-Am Maduro, Alex Mansur, Daniel Marchena.
Tambe tin Kevin Martinez, Roan Misran, Henry Rodgers,, Karen Sanchez, Rossy Scharbaay, Youni Siem, Randall Wester, Jafet Albertsz, Richaline Barguez, Gillianne van der Biezen, Jovelle Castro, Rodlimar Centeno, Samira Yarzagaray, Anamarie Kock, Veronique de Kort, Jean-Pierre van der Lak,, Pascal Nasir, Julio Palencia, Carolyn Quant, Michael Rasmijn, Gerardine Ridderstap, Jonathan Ridderstap, Valeria Salazar, Andrew Tromp, Sidney Tromp, Marylaine Willems.
Mihor graduado ta Roan Misran
Directiva y maestronan ta felicita tur e graduadonan y nan mayornan.

ORANJESTAD- Parlamento di Aruba ta tratando na yega na otro pa asina haci un voordracht pa loke ta trata e presidencia di Contraloria General.
Desde anja pasa juni e proceso aki a inicia ora Parlamento a ricibi carta di Contraloria General cu contrario na pasado cu ta nombra un persona renombra den e organo aki lo haci un proceso di sollicitacion pa cu e candidatonan.
Aki Parlamento a contesta na september 2007 cu lo Parlamento lo ke mantene e sistema usual cu tin, esta di apunta personanan califica y renombra cu un reputacion intachabel den comunidad, mirando cu ta trata un organo halto segun nos Constitucion.
Desde december di anja pasa a trata e nombernan proponi sinembargo aunke cu a parse cu a yega na otro den reunion di comision central, e reunion publico di dia 11 di januari a ser suspendi te dia 26 di februari y esaki atrobe a keda suspendi suspendi te dia 28 di februari unda a vota y a resulta cu e candidato pa Presidente no a carga mayoria di dos tercera parti di e total miembronan di Parlamento presente.
Esaki segun nos Constitucion. Den reunion publico di dia 5 di maart a dicidi di manda e proposicion bek pa reunion di Comision Central y Parlamento a dicidi di manda un carta pa informa Contraloria General di esaki y pa por manda Parlamento un otro proposicion. A base di contesta di Contraloria General pa Parlamento mes bin cu proposicion, Parlamento a tuma decision pa lanta un Petite Committee, consistiendo di representante di cada fraccion, cu e tarea pa dentro di un par di siman yega na un proposicion pa Staten.
Un fraccion esta di RED a bisa cu e lo no participa den e committee.

CARACAS, Venezuela, - Pa di tres bia konsekutivo, transmishon di e programa “Aló presidente”, kondusí pa e mandatario venezolano Hugo Chávez, a keda suspendé pa agènda pèrtá di e presidente.
“E presidente a disidí atendé un kantidat di asuntu ku tin pendiente, entre otro, kontinuá ku seri di evento relashoná ku siman militar”, e minister di Komunikashon i Informashon, Andrés Izarra, a splika via e kanal di televishon ofisial.
“Aló presidente” ta un programa transmití tur djadumingu na kanalnan di televishon i na emisoranan di radio ofisial, durante kua e lider venezolano ta definí e temanan di e agènda nashonal i internashonal di e pais suramerikano.
Tambe, e reunion entre e lider boliviariano ku su kolega colombiano, Alvaro Uribe, 12 di yüli benidero na Palacio de Miraflores na Caracas, ta okupá e programa presidensial den próksimo shete dia.
Tambe, lo realisá na siudat di Maracaibo (nortwèst) un enkuentro nobo entre hefenan di Estado di Petrocaribe, 12 i 13 di yüli benidero, despues ku e gobernante di Guatemala, Alvaro Colom, a manifestá su intenshon di drenta e grupo.

WILLEMSTAD - Direktiva di Aspafico ta rekordá tur miembro riba e reunion di sumo urgensia djaluna 7 di yüli.
Ta trata di e reunion general pa eligí direktiva nobo pa periodo 2007/2008.
E reunion ta kuminsá 19.30pm, esta mitar di 8 di anochi i ta tuma lugá na Rancho de Herberg.
Puntonan di agènda pa e reunion lo ta;
1. apertura
2. partisipashon
3. futuro di Aspafico
4. aprobashon di notulonan di reunion 2 di mart 2007
5. relato di presidente riba aña 2007
6. relato finansiero di tesorero riba aña 2007
7. relato komishon di kòntròl
8. elekshon pa un komishon di kòntròl nobo
9. kontribushon
10. elekshon pa direktiva nobo.
E miembronan ku a pone nan mes disponibel pa elekshon i re-elekshon ta:
Stanley Ignacio re-eligibel
Keunen Frans re-eligibel
Luyendo Jamel re-eligibel
Manuel Gilber re-eligibel
Phelipa Eddy re-eligibel
Prins Tony re-eligibel
Sande van de Charly re-eligibel
Michael Soliano re-eligibel
Earny Schoop re-eligibel
11. turno liber
12. klousura

WILLEMSTAD.- Djasabra 5 di yüli último Liga Hubenil di Basketbòl Kòrsou a klousurá e promé periodo di un seri di partido ku a tuma lugá durante di kuater fin di siman konsekutivo, durante kua e diferente nivelnan hubenil di Basketbòl tabata den kompetensia.
E klousura a tuma lugá den Sala Niels Liberia, na Suffisant, ku dos wega ‘All Star’.
Den e promé partido, un ekipo di dama formá pa Royal Hoops i B&M Sisters a gana di un ekipo di streanan mucha hòmber Aspirant i Mini di Royal Hoops i Lettermen. Tabata un partido bringá hopi bon di ámbos parti, pero prinsipalmente e damitanan a demostrá, ku nan no ta baha kabes pa hende hòmber i a bin bèk di un desbentaha pa gana ku skor di 35-31.
Topskorernan serka e damanan tabata Naima Tromp ku 12 punto i Roxanne-Lianne Francisca ku 6.
Esnan ku a sobresalí serka e muchanan hòmber tabata Kenville Kleinmoedig, ku 9 punto i Giomar Bernardus ku 8.
Despues di esei a sigui ku un wega elektrisante na nivel di kadet (16-17 aña), den kua tambe a inkluí 2 mucha muhé, 1 hungadó aspirant i 1 mini di manera ku esakinan ta haña eksperensia hungando na un nivel mas haltu.
All Star West a sali bai dilanti 6-0, pero rápidamente East a empatá.
E ekiponan a sigui hinter e partido hopi nivelá, pa despues West kue un bentaha di komo dies punto. Pero un biaha mas East ta yega hopi serka i West den e minüt final mester a tene e bala, p’asina gana ku apénas dos punto di diferensha: 64-62.

MIAMI, Florida, Merka, - E tormenta tropikal Bertha a bira e promé orkan di temporada Atlántiko di e tormentanan di 2008.
Awe mainta 5’or orkan Bertha tabata situá nortwèst di islanan Leewards.
Sentro Nashonal di Orkan a indiká ku ainda no tin señalnan konfiabel si e orkan aki lo mishi ku tera.
E bientunan máksimo di Bertha lo sigui elevá i ta ferwagt ku nan lo sigui oumentá durante próksimo dos dia,
E sistema, ku ta den awanan sentral di Atlántiko, a keda formá siman pasá djaweps, pegá ku e isla di Cabo Verde, frente e kontinente afrikano.
E fenómeno aki ta dirigiendo direkshon wèst 33 kilometer pa ora, i su bientunan a alkansá máksimo di 120 kilometer pa ora.
Segun Sentro Nashonal di Orkan di Merka, ta ferwagt ku e tormenta lo fortalesé gradualmente, aserkando e awanan mas kayente.
Bertha ainda no ta situá serka di kosta.
Pronóstikonan di e Sentro di Orkan a indiká ku e tormenta lo mantené den laman, ounke a sigurá ku ainda ta hopi trempan pa determiná si e lo afektá algun área di tera.
Esaki ta e di dos tormenta tropikal di e temporada.
Esun promé, Arthur, a keda formá 31 di mei último, un dia promé ku e temporada di orkan a kuminsá ofisialmente.
Arthur a desintegrá despues di mishi ku tera na península di Yucatán.
E merkadonan energétiko ta vigilando djaserka e tormentanan tropikal den Atlántiko debí n’e riesgo potensial ku esakinan ta presentá pa e instalashonnan petrolero den Golfo di Mexico.

MIAMI, Florida, Merka, - E presidente venezolano Hugo Chávez tabata personalmente involukrá den e esfuerso pa skonde partisipashon di Venezuela den e skandal di maletin di 800.000 dollar, di kua e destino berdadero supuestamente tabata pa kampaña elektoral di e aktual dama presidente di Argentina, Cristina Fernández de Kirchner, di akuerdo ku testimonionan rekohé pa FBI sitá den un moshon presentá siman pasá na un Korte di Miami.
Di akuerdo ku e dokumentonan presentá na Korte federal na Miami 27 di yüni último, e empresario venezolano Franklin Durán, un di e akusadonan kende a aktua komo agente no registrá den representashon di gobièrnu venezolano, a deklará ku su sosio Carlos Kauffman, tambe impliká den e kaso, a involukrá presidente Chávez direktamente den su testimonio dilanti agentenan di FBI.
Den su testimonio dilanti FBI, Kauffman a bisa ku abogado Moisés Miaonica a sigur’é “ku presidente Chávez tabata involukrá den e asuntu i ku a pone na kargo e direktor di Disip, Henry Rangel Silva, i ku Rangel Silva a bis’é ku presidente Chávez tabata personalmente involukrá den e kaso.
Esaki ta e promé bia ku e presidente venezolano ta aparesé direktamente impliká den e asina yamá “skandal di maletin”.
Te ku awor aki e moshonnan presentá na Korte pa e kaso di maletin a impliká e direktor di Disip i e ofisina di vise presidente di Venezuela, Jorge Rodríguez, pero no a menshoná e mandatario venezolano.

WILLEMSTAD - Despues di a gana e kompetensia FBK Games na Ulanda i su puesto number 4 na Berlin, Alemania, e atleta lokal Olímpiko, Churandy Martina, a sufri un leshon leve.
El a wòrdu tratá na tantu Kòrsou komo Ulanda, kaminda el a opta pa kanselá su kompetensia na Merka.
Djasabra 5 di yüli, sinembargo, Churandy a presentá masha motivá na Madrid, Spaña, kaminda e Grand Prix a wòrdu organisá, ku atletanan fuerte manera Francis Obikwelu, di Portugal i tambe Kim Collins, di St. Kitts.
Despues ku den e promé heat Churandy, a okashoná un start falsu, el a logra tòg di sali di dos, nèt tras di Obikwelu.
Churandy a marka e tempu 10.11 sekònde, ku ta un tempu bastante skèrpi konsiderando su rekuperashon i tambe e kontrabientu fuerte ku ta tin.
Den e final, djasabra anochi 21.30pm, Churandy a kore den baan 4, atrobe pegá ku Obikwelu.
El a logra di gan’é e biaha aki ku un tempu hasta mas rápido di 10.03 sekònde, kaminda e kontrabientu tabata -1.1 meter pa sekònde. Obikwelu ta drenta na di dos lugá ku tempu di 10:08 sekònde i Collins na di tres luga ku tempu di 10:16 sekònde. Na di kuater luga a drenta Craig Pickering di Gran Bretania ku tempu di 10:23 sekònde i Jose Carlos Moreira di Brazil, na e di sinku puesto ku tempu di 10:25 sekònde.
Churandy su próksimo kompetensia ta e Golden Leauge di Roma, Italia, e siman aki djabièrnè 11 di yüli 2008.

LA HABANA, Cuba, - Cuba lo no pidi Merka ekstradishon di e anticastrista, Luis Posada Carriles, kende ta fugitivo di hustisia venezolano i kende mester regresá e pais kumpliendo su kondena, e presidente di Parlamento cubano, Ricardo Alarcón, a afirmá na Panamá ayera.
“Mi no sa pakiko sierto medio di komunikashon merikano semper ta ripití e mesun kos, ku Cuba ke pidi ekstradishon di Posada Carriles. Nan ta hasié pa skonde e bèrdat di ku Posada Carriles te e siman aki ta un fugitivo di hustisia venezolano”, Alarcón a indiká na periodistanan.
Alarcón, kende a yega Panamá pa partisipá awe den un reunion di diputadonan di Amérika Latina i Caribe, a señalá ku loke Cuba a bisa ta ku e hòmber aki a huí fo’i prizòn na Venezuela i einan e mester regresá pa kumpli su kondena.
Alarcón a añadí ku “awor ta protehá Posada Carriles na Merka despues di tabata fugitivo di hustisia venezolano 20 aña pasá i awor ademas di hustisia panameño. Mi ta kere ku esaki ta un rèkòrt mundial!”
A detené Posada Carriles, un anticastrista, na 2005 na Texas, pa kargonan migratorio pero librá na mei 2007, sin atendé e petishonnan di ekstradishon di Venezuela, kaminda el a huí fo’i prizòn na 1985, ora tabata proses’é akusá di a plania eksplotá un avion komersial di kompania Cubana de Aviación, ku a kousa 73 morto.

ZACATECAS / VERACRUZ, Mexico, - E depreshon tropikal 5-E ayera a obligá dekretá alèrta na Osean Pasífiko, for di Puerto Angel, Oaxaca te Cabo Corrientes, Jalisco, Servisio Meteorológiko Nashonal a informá.
Sentro Nashonal di Orkan di Merka a bisa ku e meteor lo debilitá aserkando kosta di Mexico, pero ainda ta ferwagt ku e lo produsí áwaseru fuerte.
Na Golfo di Mexico, e áwaserunan kousá pa e onda tropikal number 9 i presensia di number 10 a kousa daño na mas o ménos 30 komunidat di 20 munisipio di Veracruz, kaminda 800 persona a refugiá na shelternan i tambe no por komuniká ku mas ku 5.000 persona debí na entre otro derumbe di un brùg, lòsmentu di lodo riba kamindanan rural.
Un mucha hòmber, di 21 aña, a muri hogá.
E depreshon tropikal number 5-E lo sigui provoká áwaserunan, bientunan i olanan haltu na Nayarit, Jalisco, Colima, Michoacán, Guerrero i Oaxaca.
E áwaserunan a inundá kayanan di Acapulco i Chilpancingo, Guerrero.
A pronostiká áwaserunan fuerte na Tabasco awe.

Foto: Mexico 0707

Áwaserunan generá pa depreshon tropikal number 9 i number 10 a kousa dañonan na vários komunidat di Veracruz. E pòtrèt aki ta saká na munisipio di Actopan.

WILLEMSTAD - Mas i mas e deporte di Waterpolo ta haña su kaminda pa popularidat serka e hóbennan lokal.
Semanalmente e tim di Sharks Waterpolo ta trein kondishon, téknika i prinsipalmente ‘wega den ekipo’ na Pisina di Rif.
Próksimamente e tim ku a klasifiká pa e Pan Am, lo biaha pa eksterior pa asina representá Kòrsou den e deporte di Waterpolo.
E ekipo di Sharks ta konsistí di 13 hóben ku dia 23 di yüli próksimo lo biaha pa Sao Paolo, Brazil. E ekipo di kabayero, bou di 17 aña, a kualifiká aña pasá na El Salvador durante di e CCCAN ( Kompetensia di Sentro Amérika).
Durante di e kompetensia aki nan a logra e di dos puesto siguí pa Venezuela, Colombia, Trinidad, Puerto Rico i otro paisnan partisipante, e aña ei Mexico a resultá e ganador siguí naturalmente pa e ekipo di Pan Am.
E kabayeronan ku ta den e selekshon ta: Karym Leito, Caetano Kluyver, Kevin Richards, Donovan Lieuw–a-Len, Paco Martina, Maurice Rutenfrans, Javier Diaz, Alexander Ros, Christopher Suares, Josue Hooi, Bram Rooijakkers en Bjinse Bouma, Gary Lo-Fo-Wong, Renato Schotborgh.
E kabayeronan ta bou di guia di Headcoach Vernon Toré i asistènt Kevin Pieter.
“ENNIA a pone skouder bou di e proyekto pa sigui motivá nos hóbennan pa partisipá aktivamente na deporte. Un biaha mas ta bisto ku un deportista ku tin disiplina ta logra destaká i representá su pais internashonalmente. Nos no ke a brinda simplemente un patrosinio, nos a pidi e tim di Sharks pa laga mas hóben sera konosí ku e deporte, esaki komo parti di nos akuerdo. Asina, ta bon pa menshoná ku muchanan di Casa Manita i tambe Kinderoorden Brakkeput a haña lès ‘privá’ di Waterpolo serka henter e tim durante di tres dia, e muchanan a gosa un bòl. Esaki sigur ta algu di aploudí”, asina Patrick Thissen marketing manager di ENNIA a komentá.

TOYAKO, Hapon, - Afrika awe ta figurá komo e promé di e temanan abordá pa e lidernan di e mayó potensianan mundial, kendenan ta reuní pa un kumbre anual, durante kua tambe lo diskutí e kambio klimátiko i e krísis mundial di e alimentonan.
E Grupo di Ocho pais mas industrialisá di mundu (G8) a reuní ku shete lider afrikano pa abordá problemanan krusial manera suministronan di alimento, enfermedatnan infeksioso i desaroyo ekonómiko.
Vários aktivista a akusá algun miembro di G8, partikularmente Fransia, Canada i Italia, di minimalisá yudansa pa Afrika i nan a urgí pa oumentá nan kontribushonnan.
G8 ta formá pa Merka, Hapon, Gran Bretaña, Alemania, Fransia, Italia, Canada i Rusia.
Ta spera ku e kòmbersashonnan di mañan i djarason tin komo enfoke e kambio klimátiko, pa buska un akuerdo nobo den e materia pa kabamentu di 2009.

Foto: G8 0707

Lidernan di G8 na Toyako awe. D.r.p.d.: promé minister italiano Silvio Berlusconi; presidente ruso Dmitry Medvedev; kansier aleman Angela Merkel; promé minister britániko Gordon Brown; promé minister hapones Yasuo Fukuda; presidente merikano George W. Bush; promé minister canades Stephen Harper; presidente franses Nicolas Sarkozy i presidente di Union Europeo José Manuel Barroso.

HAARLEM – Djasabra e selekshon di beisbòl di Antia/Aruba, Dutch Caribbean Team ta kai kontra di e selekshon di Ulanda ku ta preparando pa bai Weganan Olímpiko na Beijing próksimamente ku skor di 5-1 djasabra.
Tabata un wega kaminda ku áwaseru a stroba kos hopi.
Na tres okashon e wega a keda pará pa áwaseru, kaminda na un okashon pa kasi un ora.
Esaki sigur a hunga un ròl riba e selekshon di Kòrsou.
Simon Pantophlet a habri pa Antia i a keda relevá pa Orsendo Clemencia i Doran.
Ayera djadumingu e selekshon Dutch Caribbean tabata liber i awe mester hunga kontra di Hapon.
E otro resultadonan te ku ayera den e di 24 edishon di Haarlemse Honkbal Week ta:
Hapon-Chinese Taipei 5-4
USA-Hapon 5-2
Chinese Taipei-Ulanda 6-4
Merka-Cuba 1-0

ARIES: Kuida bo palabra e dianan aki. No ekspresá nada bou di rabia o kurashi. Tormenta a pasa i bo ta rekohiendo enkuentronan loke ta salbabu. 04,51,02.

TAURO: Tuma e kosnan ku kalmu, spesialmente den bo área di trabou. Ta mui posibel ku bo tin ku duna splikashonnan riba bo ideanan o proyektonan. 05,40,02.

GEMINIS: Bo ta rekuperá di problemanan ku ta parse imposibel di superá. Tur kos ta parse mas kla i bo bida spiritual ta fortalesé. 15,27,04.

KANSER: Si bo tin asuntunan legal pendiente, ta mui posibel ku ta surgi retraso. Kambionan ta bini den aspekto personal i den bo trabou tuma e kosnan ku kalmu.18,04,39.

LEO: Bo atraktivo personal ta oumentá, loke ta lagábu disfrutá mas di e kompania di un hende spesial, spesialmente si bo no ta franko ku bo pareha. 01,49,20.

VIRGO: Si bo ta buska trabou, desaroyá pasenshi, ya ku bo ta bai tin mester di dje. No pèrdè speransa. 24,16,07.

LIBRA: Posibel problemanan relashoná ku tur loke bo tin ku mira ku e komunikashon, por presentá. Ainda bo ta sinti bo mes bou kòntròl riba bo poseshonnan. 24.

SKORPION: Toleransia, pasenshi, koperashon ta palabranan ku bo tin ku apliká na bo bida diario. Uni bo mes mas ku bo famia. 31,06,12.

SAGITARIO: Relashon ku bo rumannan i bisiña lo ta tenso, pa loke bo tin ku pone di bo parti i traha pa e situashon mehorá. 08,03,25.

KAPRIKORNIO: Finansa, plaka, asuntunan relashoná ku bienes o ganashi ta rekerí mas di bo tempu. Organisá bo mes i bo ta logra mas den ménos tempu. 47,28,19.

WILLEMSTAD - Mester paga tinu ku e odio ku a manifestá kontra e ulandes oropeo algun siman pasá riba nos isla. Mester paga tinu tambe pa no bagatelisá e kos aki, asina ta sali na kla den un artíkulo ekstenso bou di e kabes “Blankenjacht Curaçao” ku e periodista Bert Huisjes a skibi riba e susesonan den sentro di siudat, ku a laga un siudadano hóben seriamente heridá.
Afortunadamente, e hóben aki ta rekuperando. Si t’asina, ku e tabata na aparato den hospital, entretantu a kita e aparatonan for di dje i e por funshoná riba su mes forsa. Si no surgi komplikashon, anto tur loke Carlos Moreno lo keda kuné ta sikatris di loke a sosodé.
Den e artíkulo, e outor Bert Huisjes ta deskribí kon uní selebrashon di Dia di Bandera a bai i e ta pone esaki den konteksto di loke a sosodé algun dia promé.
Vários minister a haña menasa anónimo riba nan telefon dianan promé ku e selebrashon aki.
E artíkulo ta pinta un situashon di berdadero pániko ku a surgi ora e manifestantenan a yega e sentro nokturno De Nachtwacht. E ta papia di hende ku mester a kore pa nan bida.
“E kos aki ta repudiabel. Ta un grupo di polítiko tin ku ta instigá e hendenan. Nan ta purba sembra odio i ta esaki nan ta kosechá,” asina gezaghèber di Kòrsou, Lisa Dindial a bisa.
“Nos no ta tolerá rasismo aki. Un grupo di 50 hende ta purba pone nos den un lus negativo. Nos no ta aseptá e kos aki. E parti mas grandi di pueblo tambe a reakshoná ku repudio. Den korant i na radio tambe nan a rechasá loke a pasa,” Dindial a agregá.

WILLEMSTAD – “Tur ulandes oropeo ku ke establesé su mes na Kòrsou pa mas ku seis luna, mester sigui un kurso di integrashon (“inburgering”) obligatorio. Bo ta bin aki, bo mester siña dominá nos idioma. Esnan ku ta bin ku sèn aki ta bonbiní, sobrá por keda Ulanda numa,” asina Helmin Wiels, lider di Pueblo Soberano ta bisa den un entrevista ku e korant De Telegraaf.
Manera nos ta informá den un otro artíkulo, hopi ta konsiderá Wiels komo esun ku a instigá pa e manifestashon i e aktonan di agreshon.
E aktonan di agreshon aki no ta bini di nan mes.
“E kos aki ta resultado di 300 aña di sklabitut i kolonialismo.
Nos hendenan no ta pèrmití pa bolbe kolonisá nan, pasobra ta esei ta loke ta sosodiendo awor aki. Ami ta bisa hamas!” asina Wiels a splika.
Nos pueblo, asina el a agregá, tin derechi riba outonomia. Pueblo a ekspresá su mes den e sentido ei, pero gobièrnu ta benta deseo di pueblo den ko’i sushi, segun Wiels.
“E antiano tin hopi kos pa kua e mester tin rabia. Ami ta hasi nan konsiente di esei. Loke ta pasando awor aki, ta un sorto di okupashon. Nan ta serando tur nos playanan. E playanan awor ta birando di ulandesnan ku hopi plaka i di turista. Nos mes hendenan mester paga pa por landa, esta si nan pèrmití nos drenta. Henter kosta sùit di Kòrsou ta yená ku kasnan karu, tur di ulandes oropeo.
E tipo di situashonnan aki tabatin den pasado kaba, nan a kondusí na 30 di mei 1969. Pero ta parse ku nos no ke siña,” segun Wiels.

WILLEMSTAD - Direktiva di Fundashon Brasami no tin niun pia pa para ‘riba. Esei ta loke mr. Marius Römer a pronostiká relashoná ku e kaso ku ta bai kuminsá pronto den korte pa eksigí pa rehabilitá Pinedo bèk den su funshon komo direktor.
Na kuminsamentu di mei, direktiva a pone Pinedo riba non aktif, pasobra e no tabata masha kontentu pa su manera di manehá.
Tabatin keho kontra dje, ku e no por a responsabilisá sierto fondonan ku el a haña na su disposishon, ku e no tabatin un maneho transparente di duna kliente drogadikto alohamentu (tin un lista di espera, pero ta parse ku otronan ku no ta riba e lista ta drenta e instituto tòg promé) i asina tabatin vários keho mas kontra su persona.
Marcel Pinedo ta na kas, pendiente un investigashon ku ta tumando lugá. E tin dos luna kaba na kas, pero si ta kobrando su salario normalmente.
Siman pasá sinembargo, Pinedo a bin komprondé, ku direktiva di fundashon Brasami lo bolbe prolongá su estado di non aktif ku dos luna mas, pa por sigui ku e investigashon kontra su persona.
Esei mes tabata motibu, pa el a aserká su abogado pa entamá un kaso den korte. Pinedo ke pa rehabilit’é komo direktor di Brasami i pa limpia su nòmber di tur e akusashon i insinuashonnan ku tin ta kore den komunidat.
Abogado Marius Römer a rekonosé, ku den promé instansia tabatin un kibokashon, kaminda mester a entamá e kaso, pero ku esei entretantu ta remediá i ku dia 14 di yüli awor e kaso ta sirbi.