ORANJESTAD – Recientemente 19 bombero a ricibi nan diploma di brandwacht 1ste klasse, depues di sigui un cusro duna dor di docentenan interno. Ademas di e 19 bomberonan cu a gradua tin 5 bombero cu mester haci un her-examen, di antemano ta deseanan hopi exito.
E bomberonan cu a ricibi nan diploma for di man di comandante interino, Jaime Laclé ta: Mirto Boekhoudt, Kendrick Croes, George de Sousa, Guilhem de Nobrega, Gregory Donata, Ferdinand Erasmus, Danilo Giel (cu a ricibi e miho puntuacion), Rosellini Kelly, Marlon Lampe, Fransy Leest, Cergio Luidens, Rodney Maduro, Angelo Piña, Elvin Poppen, Alexander Simmons, Omar Todd, Patrick Wernet, Oswald Yarzagaray y Reginald Jacobs.
Cuerpo di Bombero ta yama tur cu a caba e curso cu exito pabien y na esnan cu no a logra ainda, un palabra di perseverancia den nan siguiente intento.

ORANJESTAD- Un di e proyectonan cu Apostolado Mundial di Fatima (Blue Army) tin pa e aña aki ta cuminsa cu construccion di un Capiya di Adoracion di Santisimo Sacramento. E capiya lo keda construi pega na e Centro Cas Curason di Maria situa den Caya Dick Cooper, pariba di misa St.Teresita.
E edificio ta conoci den pueblo como Blue Army Center. E Capiya lo ta enfrente di watertoren den Bernhardtstraat. Esun situa na San Nicolaas lo bira e di dos Capiya di Adoracion na Aruba pasobra na misa di Dakota ya tin un Capiya di Adoracion cu ta masha bon frecuenta.
Un Capiya di Adoracion ta un luga na unda tur fielnan por adora Hesus den Sacramento, duna nan gradicimento y haci oracion. E Capiya aki lo ta un bendicion pa pueblo pariba di brug. E proyecto ta siguiendo su desaroyo segun plan cu aprobacion di Obispo bou guia di Pastoor Daniel, vicario di obispado na Aruba.
Pa motibo cu e proyeto ta uno costoso e ta rekeri hopi finansa. Tambe pa e motibo aki Apostolado Mundial di Fatima ta tene su recaudacion di fondo anual pa yuda construi e Capiya.
E recaudacion di fondo ta diasabra awo, 12 di juli, den forma di un bake-sale y rifa, for di 10 or mainta pa 2 or di atardi na Centro Cas Curason di Maria. Tur hende ta bon bini pa bin cumpra sea cuminda, cos dushi, articulo religioso of mata y asina contribui na construccion di e Capiya di Adoracion, mantencion di centro, plama mensahe di Fatima y pa trabou apostolico den comunidad.

ORANJESTAD- Directiva di Centro di Bario Playa Pabao ta informa muchanan di Playa Pabao y di Aruba engeneral cu e aña aki atrobe lo tin dos siman yen di actividad den nos centro.
E plan vacacional lo tuma lugar durante e siman di 14 di Juli pa 18 di Juli y di 21 di Juli pa 25 di Juli di 8 ór pa 12 ór. Plan vacacional Playa Pabao 2008 ta pa muchanan enter 4 y 12 aña.
Lugarnan cu nos lo bishita ta Community Pool, Cinema y diferente lugar historico riba nos isla. Lo cobra e suma di 60 florin pa dos siman cu ta pa cubri gasto di lugarnan cu lo bishita, bus, seguro, sandwich y juice.
Ya caba por inscribi na nos centro tur dia di 8.00 'or pa 11.00 'or y atardi di 3.00 ‘or pa 5 ’or .Ademas di sali cu e muchanan riba Diamars y Diahuebs muchanan lo participa tambe na weganan recreativo y lo haci un "speurtocht" cu nan den nos bario.
Pa mas informacion por tuma contacto na nan nos centro telefon 583-7775. Ultimo dia pa inscribi ta Diabierna 11 di Juli.

ORANJESTAD- E di “ X Festival Mundial di Teatro pa Mucha “, lo tuma lugar e biaha aki na Moscow, Rusia, durante e dia-nan 17 te cu 25 di Juli 2008 cu participacion di grupo-nan di teatro procedente di como 24 pais.
E Segundo lustro di e evento mundial aki cu ta tuma lugar cada 2 aña, lo ser celebra en grande na Moscow y e organizacion por a conta cu sosten completo di e alcalde di Moscow y tambe di e anterior Presidente Poetin.
E ciudad Moscow al momento ta conta cu mas di 10 miyon habitante.
E Federacion Ruso di Teatro a extende un invitacion personal na e Arubano, sr.Leonardo Tromp , pa ta presente na e acto di ceremonia di apertura di e magno evento aki y tambe pa asisti como invitado di honor na tur actividad.
Motibo di esaki, ta cu sr. Tromp –durante su termino como Presidente
( 2003-2007) di e Organizacion Mundial di Teatro AITA/IATA , tabata directamente envolvi den e reunionnan cu autoridadnan Ruso, unda a concretiza e financiamento y henter e preparacion preliminar pa e evento.
Awor cu esaki lo tuma lugar, un peticion a ser haci na e anterior presidente di AITA/IATA pa asisti como invitado di honor di e Federacion Ruso di Teatro.
Durante presencia di sr. Tromp na Moscow, siguramente nomber di Aruba lo ser resona na varios ocasion, na momento cu na tur acto mencion ta ser haci cu e invitado di honor ta procedente di Aruba.

WILLEMSTAD – E oumento di tarifa di bùs, repartí den tres subida, a sòru pa un situashon nunka bisto. Diferente shofùr di bùs a skibi e tarifa nobo riba nan bùs miéntras ku otronan a plak papel den nan bùs riba kua tin skibí ‘No rabia’. E tarifa pa e ruta mas kor’é a subi últimamente di 1,80 pa 1,95 i for di promé di yüli el a bira 2,25.
Shofùrnan di bùs no a pasa den un temporada fásil. Tabatin diferente insidente kaminda pasaheronan a zundra shofùrnan di bùs pa motibu di e oumento. Tabatin kaso kaminda pasaheronan a nenga redondamente pa paga e tarifa adaptá i a pèrsistí riba e tarifa bieu. Den un bùs, e shofùr a plak un papel riba kua el a skibi: ‘Tarifa di bùs a bira 2,25. No rabia’. E situashon akí nunka ántes a presentá, kaminda shofùrnan mester a pidi pasaheronan pa nan no rabia i zundra. Nunka ántes tampoko shofùrnan mester a skibi e tarifa di bùs riba nan vehíkulo pa asina atvertí e pasahero promé ku e drenta e bùs.
Ounke ku ta komprendibel ku tin pasahero ta malkontentu ku e oumento, e shofùr no mester bira víktima di insulto di parti di e pasahero. Pa pidi pasaheronan pa no rabia, ta indiká ku e situashon ta hopi serio. Sinembargo usuarionan di transporte públiko mester komprondé ku e situashon aktual, kaminda preis di kombustibel a subi, ta afektando rònt mundu. No ta na Kòrsou so siudadanonan ta sinti e preshon ku e oumento di krudo ta kousando. I den e kaso di tarifanan di bùs, mester tene kuenta ku no ta e shofùr a oumentá e tarifa.

WILLEMSTAD -- Un kantidat di kasi 40 hende, di kua mayoria di bario di Santa Rosa, a firma un petishon pa gobièrnu di Kòrsou deklará Bar Martin Oranjeboom komo un monumento basá riba su balor históriko-kultural. Resientemente Bar Martin Oranjeboom ku ta e nòmber di pueblo pa Café Santa Rosa resientemente a kumpli 65 aña di eksistensia. Durante e selebrashonnan aki nos Sekretario di Estado di Finansa, Sr. Alex Rosaria, a lansa e idea pa hinka un petishon den otro pa deklará e bar aki komo un monumento. E idea aki inmediatamente a karga aprobashon di doño di e bar, esta sr. Shon Ma Mademilia. Bar Martin Oranjeboom ta situá riba kaminda grandi di Santa Rosa. E ta un di e poko barnan tradishonal ku ainda a keda eksistí. E ta konta ku un gran kantidat di kliente. A entregá e petishon pa deklará e bar aki un monumento na Servisio di Maneho Urbano, Regional i di Bibienda (DROV) kua lo mester konsehá Kolegio Ehekutivo di Kòrsou (BC). BC finalmente lo mester disidí si ta bai di akuerdo òf no ku e petishon pa apuntá Bar Martin Oranjeboom komo un monumento. (Foto: LA PRENSA)

Skina di Sorti, awe djarason 9 di yüli di 2008, ta kuminsá ku deseá tur hende un bon dia. Efektividat ta haltu na momentu ku e kosnan ku tin di wòrdu hasí (den kuadro di e meta) keda ehekutá den e forma indiká (e ta kondusí na ménos kosto sosial). Den gobernashon kiko tin di wòrdu hasí ta e kosnan ku ta kondusí na alsamentu di nivel di bida di komunidat, miéntras e manera ta esun ku tin sosten di e masa (pasobra tin un mayoria no ta sufisiente). Den e sistema di gobernashon demokrátiko e mayoria ta disidí, pero ta tene kuenta ku e minoria.
****
E kosto sosial ta mas abou na momentu ku desishon i ehekushon ta konta ku ménos resistensia. Si wak e desaroyo di e diverso prosesonan e konklushon no por ta otro ku no tabata tin ni efektividat haltu ni kosto sosial abou. Por lo demas ta insólito ku “de politiek” no por yega mas leu ku táktikanan ku ta destabilisá e proseso di gobernashon demokrátiko. Na momentu ku no tin debate real, nos tin di papia di un mofa di e proseso demokrátiko (“een schertsvertoning”).
****
Si e akuerdo riba finansiamentu di debe di e respektivo entidatnan estatal antiano, ta motibu di diskòrdia den “de politiek”, mester buska asuntu mas elevá pa krea plataforma pa pasifiká pais. No por pretendé di profilá ku un esfera di húbilo, miéntras tin atmósfera di enemistat den “de politiek”. No por tin esfera di húbilo si e problemanan di pais, ta keda primi e masa. Mi ta ripiti i no ta kansa di hasi esei, ku nos problemanan finansiero ta meramente un konsekuensia di e problema mes, kual ta un nivel general mental defisiente.

WILLEMSTAD - Ayera tardi patrosinadònan prinsipal a tene un konferensha di prensa na Hemingway Café na Lions Dive Hotel na unda a presentá Caribbean Cycling Youth Championships 2008 ku próksimamente lo tuma lugá aki na Kòrsou.
Orguyosamente Refineria Isla, ENNIA i Lions Dive Hotel a kompartí mesa ku e organisadónan di e evento pa asina anunsiá tur detaye relashoná ku e gran aktividat aki ku lo tuma lugá dia 12 i 13 di yüli próksimo, huntu ku nan representante di Curaçao Wielerbond komo e órgano mas haltu di e deporte di Siklismo na Kòrsou.
Caribbean Cycling Youth Championships:
E kompetensia di Siklismo aki ta dividí den dos parti.
Lo tin e kompetensia kontra oloshi pa aproksimadamente 20km ku lo tuma lugá djasabra dia 12 di yüli for di Barber pa Boca tabla i visevèrsa pa 9’or di mainta. E kompetensia aki ta pa tur kategoria.
E kompetensia di distansia largu ku ta aproksimadamente 85km pa Juniors ku ta pa hóbennan di 17 pa 18 aña. Esaki lo ta 10 buèlta di 8.5km. Pa mucha muhé, di 15 pa 18 aña i Hubenil di 15 pa 18 aña, esaki ta 7 buèlta di 8.5km.
Kada buèlta ta for di rotònde di Piscadera, bai KAE, bira bolbe bai rotònde Piscadera, bai Yotin Kòrtá, bolbe bira i bini bèk Piscadera.
E kompetensia aki ta di 60km lo tuma lugá na Veeris djadumingu dia 13 di yüli pa 7.30 di mainta.
E kompetensia di Caribbean Cycling Youth Championships 2008 ta wòrdu tené anualmente na diferente isla den Karibe i e aña aki Kòrsou lo ta anfitrion di e kompetensia, esaki pa promé biaha.

CHOLET, Fransia – E aleman Stefan Schumacher a logra djamars e triunfo mas importante di su karera, ora el a gana e promé prueba kontra oloshi individual di e Tour di Fransia i poderá di e kamisa hel.
Schumacher a marka 35 minüt, 44 sekònde riba e ruta di 29,5 km, pa superá Kim Kirchen i David Millar.
E prueba a start i kaba na Cholet.
E aleman a kita e kamisa hel for di e lider general, e franses Romain Feillu, kende a gan’é djaluna.
“Tur hende ta soña ku e kamisa aki”, Schumacher a bisa. “E ta inkreibel. Bo ta mira e momento di podio mil bia na televishon, i ta imposibel imaginá e sensashon di ta einan”.
E kampion mundial kontra oloshi, e suizo Fabian Cancellara, tabatin problema for di komienso i a kaba di sinku.
“Mi ta tristu, pero mi mester mantené mi kara na laria ora tin kosnan ku mi por drecha den e próksimo kontra oloshi”, Cancellara a bisa. “Mi ta kere ku awe no tabata mi dia. Mi no por a haña mi ritmo normal”.
Schumacher posiblemente lo keda ku e kamisa hel sigur un dia mas, ya ku e etapa di djarason ta favoresé e sprinternan i ta di spera ku e grupo lo keda será (uní). E ruta di 232 km for di Cholet te Chateauroux ta esun mas largu i plat di e kareda.
Pero e gran ganadó di djamars lo por tabata Cadel Evans, kende a mira kon su prinsipal kontrinkantenan pa e título a pèrdè tempu.
E oustraliano a kaba di kuater, miéntras ku e spañó Alejandro Valverde a keda di 23, na mas di un minüt. Feillu, kende a yega na sinku minüt tras di Schumacher, a rekonosé ku e no tabatin e forsa sufisiente pa retené e kamisa hel.

WILLEMSTAD – Konsulado di Sürnam na Kòrsou a selebrá ayera den grandi 145 aña di abolishon di sklabitut den reino ulandes. Esaki a sosodé ku invitadonan i ku un mayoria presente di vários hende desendiente i relashoná ku Sürnam. Kònsel di Sürnam na Kòrsou, Evelyn Timmer den su diskurso a puntra, si ta di bèrdat a kibra kadenanan di sklabitut. El a referí na e diskurso ku presidente di Sürnam Ronald Venetiaan a tene na Paramaribo, kapital di Sürnam dia 1 di yüli último, den kua e hefe di e pais a papia riba e karakter marga dushi di abolishon di sklabitut. E marga ta loke katibunan a pasa aden i e dushi ta futuro.
Sra. Timmer a sigui puntra kiko nos a hasi ku nos libertat. El a puntra si nos komo individuo i pueblo di Sürnam ta liber di bèrdat ekonómikamente, sosial kultural òf spiritual. “Libertat ta pidi pa mantenshon i kurashi pa papia di loke bo ta pensa di bèrdat. Libertat ta pidi tambe pa bo riska na tene balor i normanan universal na haltu. I pensamentu riba nos historia di sklabitut ta hasi doló”, asina kònsel Timmer a bisa.
Segun e kònsel no mester sigui enfoká riba pasado, pero mester buska e forsa den nos antepasadonan, pasobra danki na nan, nos a logra hopi, na Sürnam i despues tambe na Antia.” E kònsel di Sürnam a finalisá su diskurso bisando ku mester aserká otro, duna otro un man i wak kiko nos tin igual en bes di kiko ta separá nos.

WILLEMSTAD - “Ami a para 200% tras di e organisashon i mi a pone sèn i hasi tur loke ta posibel pa atendé e problema serio aki den nos komunidat. Pero ta riba nivel di trahadónan ta sosodé ku e no ta kana, anto mi no por hasi nada ku esei”. Asina minister di Hustisia David Dick a bisa relashoná ku e echo ku e fundashon pa yuda víktimanan Slachtofferhulp ta bai stòp di eksistí. E fundashon ku tin basta tempu kaba ta chambuká ku vários problema serio interno no tabata duna yudansa i sosten mas na hendenan ku tabatin mester di e yudansa urgente pa esaki.
Fundashon Slachtofferhulp manera su nòmber mes ta bisa a bini ta traha for di aña 2003 ku hendenan ku bira víktima di un forma òf otro. Nan a yega di yuda eksitosamente hendenan ku tabata e.o. víktima di froude, di abusu doméstiko i di abusu di polis.
E kasonan di mas tantu ku e fundashon tabata atendé tabata di hendenan muhé ku tabata keda maltratá di tur forma dor di nan kasá òf partner. E fundashon tabata konsistí di hendenan di diferente disiplina di kua algun tabata keda pagá pa traha i otronan den mayoria tabata yuda boluntariamente. Hopi profeshonal tabata duna nan tempu liber, pasobra manera un di nan a bisa nos, e sa ku si e no kontribuí e ta sinti su mes malu, pasobra tur hende mester yuda ora tin problema den komunidat.
Fundashon Slachtofferhulp tabata realisá su trabounan for di den un ofisina den warda di polis na Rio Canario i nan a traha i haña sosten di tur instansia i organisashonnan ofisial i nan ta un kordinadó urgente i esensial pa e trabou di yudansa na víktima.

WILLEMSTAD – E komishon organisadó di Dia di Wishi/Marchena i Dia di Rasa Kòrsou djasabra awor lo tin un grandioso “Fundraising Vacation Heat”. E evento aki ta pa rekoudá fondo pa nan aktividatnan ku lo tuma lugá den e bario di Marchena. Djasabra awor e animashon lo ta na enkargo di DJ Renzo, GMO i e agrupashon musikal di e bario GIO Fuertísimo.
E komishon lo konstruí un área spesial banda di Marchena Hardware kaminda lo tin e evento grandi aki. Huntu ku e diferente spònsernan manera Amstel, Pepsi Cola i MAS 99 lo bai pone e área di Wishi/Marchena den un ambiente eufóriko.
“Fundraising Vacation Heat” lo kuminsá pa 6’or di atardi i lo tèrminá 11’or di anochi. Entrada lo ta fl. 3.- pa persona. Tur e fondonan ta destiná pa e bon kousa pa por tin mas evento den e bario.

WILLEMSTAD – Kontrali na loke hopi a kere, tin indikashon ku no tin bahada den biahe pa fakansi. Pa e agensia renombrá Maduro Travel & Indigo Tours a konosé un subida di 25% den benta di paketenan pa destinashonnan ku a keda ofresé pa e temporada aki. E destinashon nobo ku a keda lansá, Ecuador a resultá faborabel, ya ku e interes tabata grandi. E destinashon popular a resultá Florida i Orlando, ya ku tin gruponan grandi ku ta saliendo pa e destinashonnan aki.
Den kombersashon ku gerente di Maduro Travel, Joop Snel ta konfirmá, ku e kompania aki a konosé un oumento di 25% di biaheronan ku a hasi uso di nan servisio pa e temporada di fakansi aki. Segun Snel ta deklará, ku kontrali na 2007, e interes tabata muchu mas grandi i ku esaki ta duna un bista ku e kompania por mira un kresementu den benta di biahenan. Snel ta deklará ku e destinashon di Santo Domingo tambe ta un destinashon ku hopi a skohe pa nan fakansi.
Ulanda ta keda un destinashon preferensial, debí na e relashonnan familiar. Aki tin mas tantu famia ta bai, debí ku nan tin un miembro di famia pa bishitá. E destinashon di Ulanda pa motibu di euro no tabata asina fuerte, segun Snel ta agregá, pero tin otro kresementunan pa e islanan alrededor manera Aruba i Boneiru.
Pa e departamentu krusero, Maduro Travel mester a tuma dos persona na trabou pa atendé ku reservashonnan. Un interes grandi ta biba bou di e komunidat pa bai ku barku i ku Maduro Travel mester a amplia den trahadó pa garantisá nan servisio. Finalmente Joop Snel ta indiká, ku 2008 ta mustra mihó ku 2007 i ku ya nan tin 25% mas bendé ku aña anterior.

WILLEMSTAD – Fundashon pa Konsumidó ta pidi mayornan kòrda apliká pa transporte pa nan yunan aña eskolar 2008-2009.
Pero tambe ta temporada ku mayornan mester atendé otro asuntunan manera por ehèmpel transporte eskolar. Mayornan ku no tin transporte propio por hasi trámitenan pa nan yu ku ta alumno i ta bayendo skol, pa bin na remarke pa hasi uso di transporte eskolar. Segun informashon ku Fundashon pa Konsumidó a kompilá, e siguiente reglanan ketu bai ta aplikabel na momentu ku un alumno ke bin na remarke pa hasi uso di transporte eskolar.
E skol ku e mucha ta bishitá mester ta un skol básiko spesial (Mytyl, LOM, MLK, ZMLK), òf un skol avansá spesial. (pa muchanan ku tin difikultat pa siña enseñansa regular).
E mucha mester ta bishita durante di e aña un “speciale eerste klas” òf un “schakelklas”.
Si e mucha ta biba den “Tweede of Derde District” i e skol di fundeshi òf skol básiko di mas serka ta keda na un distansha di mas ku 3 (tres) kilometer for di su kas.
Si e mucha ta bai skol avansá di un tipo ku no tin denter di 3 (tres) kilometer for di su kas.
Si pa formashon básiko (esta promé i di dos aña na enseñansa avansá) e skol di mas serka ta keda mas leu ku 3 (tres) kilometer.
Si pa terser i kuarto aña na enseñansa avansá e mucha ta sigui un estudio di un disiplina òf direkshon di estudio ku no tin na un skol denter di 3 (tres) kilometer for di su kas.

WILLEMSTAD - Pa duna un sosten na e kampaña “Luna Blou” di Prinses Wilhelmina Fonds i alabes duna un aporte na e lucha kontra kanser na prostat den luna di yüni, KLM a disidí pa duna su kolaborashon pa hasi e kampaña aki eksitoso. Sostené pa un kampaña di radio ku yudansa di Radio Dolfijn FM i tambe via di poster, KLM a promové di lo bai entregá Prinses Wilhelmina Fonds 5 florin pa kada reservashon ku keda realisá den luna di yüni via di su website www.klm.com.
Djaluna último por fin a yega e momentu, ku Gerente General di KLM señor Wim Iserief a entregá señora Dulcie Goedgedrag, Protektor di Prinses Wilhelmina Fonds un chèk na balor di Naf 2340,- komo e kontribushon di e resultado di e kampaña ku KLM a tene bou di su klientenan.
KLM ta hopi orguyoso i honrá, ku di e manera aki e por a duna un sosten na e kampaña “Luna Blou” di Prinses Wilhelmina Fonds i alabes di por a kontribuí ku un “man blou” na e lucha kontra kanser na prostat, un malesa ku hopi hende ta sufri di dje.
Riba foto nos ta mira di rpd: Wim Iserief, Gerente General di KLM Region di Karibe i Sürnam; Yvonne Verbrugge-Neuman, presi-dente di Fundashon Prinses Wilhelmina Fonds; Ageeth Oosten, tesorero di Fundashon Prinses Wilhelmina Fonds; Dulcie Goedgedrag, protektor di Fundashon Prinses Wilhelmina Fonds; Arianne Staal, Ehekutivo di Merkadeo di KLM Karibe.

MENDEZ-ISENIA
Julieta Remigia
Mihó konosí komo Jeta
A laga atras su kasá Edgar Mendez, yunan Edgar Mendez, Juliette Chirino-Mendez. Akto di entiero ta wòrdu anunsiá despues

BASILIO
Emiliano Aquino
Mihó konosí komo Mian
A laga atras su rumannan Silvio i Rita Basilio, Polito, Jacintha, Sisto Basilio, Ofelia Hooi, Rafael i Rita Basilio tur ku nan famia. Akto di entiero ta djaweps 10 yüli for di el Tributo pa santana Soto. Bishita 1or. 3.30or tin un respòns na El Tributo.

VAN DER VLIS
Anne Cornélie (76 aña)
A laga atras J. Van der Vlis, M. Van der Vlis-Rooyen, Ch. Van der Vlis, Chr. Van der Vlis, J. Van der Vlis-van der Burg. Kremashon ta tuma lugá djarason 9 yüli 11or. Bishita 10or na Crefona, Brievengat.

WIHBY-AQUI
Marguerite
A laga atras su kasá Shaffie Wihby, yu Rachel, rumannan Carol Lee, Patricia Mesnage, Ronald, Stephen i Keith Aqui. Akto di entiero ta djarason 9 yüli na misa Gr. Kwartier 10.30or. Bishita 9.30or.

PIETER
Carmen Olimpia (91 aña)
Mihó konosí komo Shon Ka
A laga atras su yunan Celsa Espulien-Pieter, Elsa, Hubert, Ronald Pieter, Serita i Mourill Matthew-Pieter, Dilcia Pieter i Emerik Hernandez, Hubert Kopra i rumannan. Akto di entiero ta djarason 9 yüli 3.30or for di El Tributo pa santana Jandoret. Bishita 1or. Promé ku entiero tin un s.s. di misa 4or na misa Jandoret.

CIJNTJE
Senaida florencia
A laga atras su mama Virgilia Cijntje, yunan Farley i Sandy Cijntje, rumannan Hubert i Noris Cijntje, Franklin, Glenda, Elfrin Cijntje, Inocente, Delia i Glen Reina, Boy albertus. Akto di entiero ta djarason 9 yüli for di El Señorial pa santana Barber. Bishita 1or-3.30or. Promé ku entiero tin un s.s. di misa na misa Barber.

PETRONIA
Egberto Marcelo
Mihó konosí komo Boechi òf Boeis ku tabata kore taksi 170
A laga atras su kasá Mercelina Petronia-Allée, yunan Herbert i Maruka Petronia-Goeloe, Nelson i Sheryl Petronia-Simmons, Myrtha Petronia, Orlando Petronia, Allan Desiré, Egberto Pantophlet. Akto di entiero ta djarason 9 di yüli. Bishita 1or na misa Sta. Famia. Promé ku entiero tin un s.s. di misa 4or i despues pa santana Roodeweg.

JONIS
Franklin Seferino (repentino)
Mihó konosí komo Frank
Akto di entiero lo wòrdu anunsiá despues

DAFLAAR
Rosa Carmen
Akto di entiero ta wòrdu anunsiá despues

SIMMONS
Richard Joseph
Mihó konosí komo Chako
Akto di entiero ta wòrdu anunsiá despues

VAN PUTTEN
Ivan Martin
Mihó konosí komo Martin
Akto di entiero ta wòrdu anunsiá despues

LA PRENSA ta manda kondolensia na famianan

Lorito ta yama tur hende un felis djarason. Ya kaba awe nos ta na mitar di e siman aki. Ta masha kos tin di komentá! Na promé lugá, nos kier a manda un saludo pa nos amigu aya i dese’é un “bon voyage”. Si e ke sigui sulfurá, e sulfurá numa pasobra nos no ta den nada, apsolutamente nada!
*********
Famia Claret a disidí ku e ta sigui buska hustisia. Nos sa ku ta un esfuerso digno, pero si bo tende e famia papia, anto no tin duda ku pa nan ta un esfuerso masha noble. Lorito a bisa na diferente okashon, ku nos no tin nada kontra kòntròl mas rigoroso, pero esei mester tuma lugá semper a base di leinan establesé. Nos kuerponan (kua ku nan ta) no mester ta kuerponan outónomo ku ta kere ku ta nan tin outoridat máksimo. Nan mester ta someté na un kòntròl mas ariba, sino fásilmente nos por haña nos den un estado polisial.
*********
Nos a relatá resientemente e kaso di e mandatarionan sentral ku a para riba balkon di hotèl sigui e selebrashon di Dia di Bandera for di mesun altura ku Lorito. Nos a bisa tambe, ku ta un eskoho ku nan a hasi i ku ta nan mester paga pa e kamber aki i no gobièrnu. Un di e ministernan a informá, nos ku korektamente manera nos a señalá, ku ta e mes a paga e kamber di e hotèl! Nos ta manda un pluma p’e, ounke un poko lat!
*********
Papiando di lat, nos a ripará, ku e partidonan di koalishon ta reakshonando demasiado lat riba e kosnan bon ku a bin dilanti últimamente. Riba e punto di supervishon i e konseho di Raad van Advies, tantu PAR komo PNP tabata bon lat. Riba e punto di IMF, PAR i PNP tabata super lat. E mashin di publisidat di e dos partidonan ta laga hopi di deseá. Tur dia masha hende ta bati nan kabes aden riba mil i un kos (tin biaha, pero no tur ora korektamente), pero e partidonan mes ta morto morto ku nan PR. Lorito tin biaha tin masha duele di nan, pasobra nos sa ku tin masha hende ku ke yuda, pero no ta haña entrada serka niun di dos! Lorito lo bisa: sigui chambuká numa. Anto di Frente nos no ta spera masha! Lebumai nos!

WILLEMSTAD -- Gobièrnu di Kòrsou, riba petishon di Diputado Marilyn Alcalá-Wallé di Enseñansa, Kultura i Deporte, a pidi Konseho di Minister di Antia pa buska informashon na Aruba kiko ta e maneho riba tereno di pèrmitnan pa bandanan di Kòrsou ku ke bai toka na Aruba. Esaki despues di un petishon di Asosashon di Músiko i Artista, AMAK, ku ta keha di proseduranan burokrátiko di parti di Aruba.
Segun AMAK, bandanan di Kòrsou ku ta pidi pèrmit pa toka na Aruba, ta haña trato di bandanan internashonal. Esaki ta resultá den kriterionan mas pisá ku ta nesesario.
AMAK ta bisa ku gruponan di Aruba si ta haña tur akomodashon ora nan bin toka na Kòrsou, hasta ora nan no ta topa ku e kriterionan nesesario. Gobièrnu di Kòrsou a hasi e petishon na Gobièrnu di Antia pa intermediá den e problema, pasobra e ta importante pa yega na un akuerdo riba e punto di interkambio di kultura artístiko i musikal di ámbos isla den Reino, asina gobièrnu di Kòrsou a informá awe.
Den último dianan e problema tabatin tendensha di eskalá, sigur despues di un reunion interno di AMAK. E problema aki ta pa algun aña kaba sin un solushon. Durante e último enkuentro ministerial entre Antia i Aruba el a bolbe bin na diskushon pero te awe e problema no ta solushoná. Den gremio kultural nan tin miedu ku e situashon aki lo por stroba e lasonan kultural intensivo ku tin entre Kòrsou i Aruba i ku a mehorá sustanshalmente for di despues ku Aruba a haña su status outónomo na 1986. Gobièrnunan di turno na Aruba sinembargo no a formalisá e situashon pa músiko i artistanan di Antia (Kòrsou) haña sierto fleksibilidat ora nan yega Aruba. Kòrsou no tin restrikshon pa aktuashon di músiko i artistanan for di Aruba.

WILLEMSTAD/DEN HAAG – Un aserkamentu duru pa kombatí kriminalidat i engrandesé e sentimentu di seguridat, no ta funshoná. Den algun kaso kastigu leve òf keda sin kastigá ta yuda muchu mas tantu. Esaki ta pará den e rapòrt ‘Sociale Veiligheid ontsleuteld’ ku Sociaal Cultureel Planbureau (SCP) a publiká ayera.
SCP a wak si e programa di gabinete Balkenende ‘Naar een veiliger samenleving’, ku a implementá na 2002, a sòru pa ménos kriminalidat, molèster i sentimentu di inseguridat. Tambe a wak e medidanan manera kastigunan largu, mas polis riba kaya i kuido i guia di hóbennan ku ta kore riesgo.
For di 2002 tin un bahamentu di kriminalidat den su totalidat, pero e kantidat di krímennan ku violensia i destrukshon a subi. Segun e investigashonnan, no tin prueba ku e bahamentu ta debí na e maneho di gobièrnu. E rapòrt ta indiká, ku kampamentunan será pa hóbennan kriminal ta funshoná nèt kontrali. Seramentu di e hóbennan den e kampamentunan akí òf internat ta sòru ku e hóbennan ta bolbe kometé un eror mas lihé, miéntras ku e chèns pa ripití ta mas abou ora e hóbennan keda biba na kas i sigui un programa kaminda ta inkluí skol i famia.
Meskos ta konta tambe pa kastigunan di prizòn largu pa residivistanan adikto. E medida akí ta sòru ku si nan keda será den sèl i keda sin haña terapia pa komportashon, e chèns ta mas grandi pa despues ku nan sali liber nan bolbe kometé un eror. Loke tambe tin su riesgonan ta e manera lihé pa intervení penalmente, segun e investigadónan. Ora ta trata di infrakshonnan leve i espesialmente serka menornan di edat, tin biaha ta mihó pa laga derechi penal afó. Un karchi di kastigu por baha e drèmpel pa bolbe kibra ku lei.

Destinguido señora Gezaghèber,

Permití mi pa komo kolumnista eks patria, trahando i bibando na Aruba i na mes momento, ferviente siguidó di farándula, pa tuma bo tempu valioso pa elaborá riba un asuntu ku mi ta kere lo ta bon pa bo konsiderá e otro banda di e medaya. Ta trata aki di e petishon di Asosiashon di Músiko i Artista di Kòrsou (AMAK) ku resientemente nan a hasi na’bo, pa di un forma of otro restringí entrada di agrupashonnan musikal di Aruba na Kòrsou. Esaki komo medida di “resiprosidat” pa e aparente “traba” ku outoridatnan arubiano lo ta pone pa stroba entrada liber di gruponan di Kòrsou na Aruba.
Señora, AMAK ta motivá su petishon pa e echo, ku pa añanan largu kaba, no ta impedí bandanan musikal manera Claudius Phillips i su OREO òf kómikonan manera Vale Croes pa bin aktua na Kòrsou kada biaha ku kontratá nan. Pero, ku ora bandanan manera ERA, GIO i Diesel, òf artistanan manera Melania van der Veen ke bai Aruba, ta pone tur sorto di traba pa nan. Awor, komo mantenedor di lei, señora lo ta di akuerdo ku mi ku kada pais den Reino Ulandes ta liber pa tuma i ehekutá e leinan di atmishon di stranhero òf artista ku NAN ta konsiderá esnan apropiá pa nan sirkunstansianan lokal.
E palabra “resiprosidat” ta unu ku ta menshoná hopi den e diskushon aki. Na mi opinion personal, ora usa e palabra aki, mester dun’é su kontenido kompleto i no parsial. Pasobra si kisas señora por a tuma nota, den tur e diskushon aki kada biaha ta hasi menshon di dos (2!) banda/artista ku ta bini ku regularidat for di Aruba. Te asina leu ku mi sa, nunka ainda empresario òf organisadónan di konsierto, inkluso AMAK mes, a yega di kontratá un Robert Jeandor i su Solo Banda Show pa toka na un fiesta òf aktua den un konsierto na Kòrsou. Òf un Eyes Band, Perfect Sound, Tsunami, Le Groove, Youth Extreme, Search, Humphrey i su BaDu, Blade, Papito i su Biba Lekker Band, DejaVu, BMW, Impact, etcetera. Nunka!