ORANJESTAD– Mayornan y alumnonan di Mon PLaisir Kleuterschool ta cla pa saca e sorteo di e rifa pa recauda fondo pa Mon Plaisir Kleuterschool cu lo tuma lugar diabierna awor pa 5or di atardi den showroom di R.E Yrausquin & Sons.
Lo tin oportunidad pa cumpra ticket ainda awe na PriceSmart desde 2or di atardi y diabierna henter dia na R.E Yrausquin & Sons. Prijs di rifa ta solamente 10 florin cu ta encera un rifa cu un prome premio cu un auto “Ford EcoSport” nobo-nobo.
Di dos premio lo ta un Disney Vakantie pa 4 persona y na di tres lugar lo rifa un Nintendo Wii.
E sorteo mes lo tuma lugar pa 5or di atardi na R.E Yrausquin & Sons y ta conta cu sosten di tur hende pa un bon causa.

ORANJESTAD- Studia riba un nivel superior, esta HBO of UNIVERSIDAD, ta diferencia den hopi sentido cu studia riba nivel di HAVO, VWO of EPI. Nos ta djis menciona algun ehempel:
• tin otro vaknan (vaknan nobo y desconoci),
• tin otro docente, cada uno cu nan estilo y sistema di duna college,
• bo ta mas liber pa atende college,
• bo mester studia mucho mas independiente etc.
Fuera di e mundo nobo cu bo ta bai haya bo ta biba aden, adicionalmente bo mester tene cuenta cu tur e exigencianan nobo y diferente pa loke ta studia of organisacion di bo studiamento.
E studiante ta na comienso di estudio riba nivel superior. Ta importante pa e studiante puntra su mes: “lo mi por sigui studia na e mesnun sistenma cu mi tabata studia den scol secundario?”
Conseho 1: Refleha riba bo “cultura di studia” (= e sistema organisatorio di “con bo tabata studia” y bo actitud pa/cu studia of studiamento). A base di e refleccion aki, haci un analisis critico di bo mes.
Aki ta sigui algun pregunta hopi importante cu cada studiante mester haci su mes pa e wak e aspecto “studia” den su historia escolar na Aruba. Por fabor, contesta e preguntanan honestamente.
 Bo tabatin hopi problema cu planificacion di bo estudio?
 Bo a experiencia cu bo no por traha cu tempo?
 Ora tabatin hopi dianan di fiesta tras di otro bo a sintibo desbalansa pa loke ta studia y palanificacion di bo estudio?
 Bo ta keda cas hopi bao di e pretexto of smoesje “na cas mi ta siña mas cu na scol”?

ORANJESTAD- E fin di siman pasa a tuma luga e 15th Aruba Reef Care. Aunke e voluntarionan di Turtugaruba ta masha druk e aña aki cu e proteccion di e neishi riba Eagle Beach, nan toch a participa.
Mas o menos trinta voluntario a haci limpi e beach patras di e Lighthouse, California.
Turtugaruba ta consciente, cu corremento riba e santo blanco cu autonan ta verboden, pasobra e ta danja nos naturaleza. Pesei tur e sushi colleciona a wordu hiba na pia na tres spots net pafo di e beach i duinen. Seis pick up yen yen a transporta e sushi for di aki na e baki riba e parkeerplaats di Arashi.
Un tire masha grandi tabata hopi pisa, pero... e tire tambe a perde!

DEN HAAG– Na Madurodam a tuma lugar presentacion di un serie di stampia nobo ‘Grenzeloos Nederland: Aruba en de Nederlandse Antillen’. Un prome edicion di e serie di stampia a keda entrega na Minister Plenopotenciario sr. Frido Croes for di man di sr. Theo van Aalst, director di Marketing di e compania di post di Hulanda TNT Post.
E mandatario a felicita TNT Post cu e bunita stampia y cu e initiativa aki y a bisa di spera cu hopi personan cumpra e stampianan pa di e manera aki cera conoci cu diferente aspectonan di nos islanan.
Durante di e presentacion e tres serie di stampianan a wordo trece dilanti pa un postbode Hulandes, Antiano y Arubiano di TNT Post. Pa e ocacion aki e postbodenan tabata bisti den uniforma di Servicio Postal di Antia y di Post Aruba.
‘Grenzeloos Nederland’ta un serie cu ta mira mas leu cu frontera. E ta brinda un luz nobo ariba relacionnan cultural conoci o menos conoci di un otro pais. Asina tin hopi aspecto di importancia di diferente paisnan y di Hulanda cu ta wordo treci padilanti y por keda descubri.
E prome emicion di e serie ‘Grenzeloos Nederland’ e aña aki ta relaciona cu e lasonan entre Hulanda, Aruba y Antianan Hulandes. E emicion aki ta encera un vel di stampia di Hulanda. Na e mesun momento un concepto singular lo keda emiti awe na Antia y Aruba.
Ariba e vel di stampia tin tres diferente stampia nacional y dos stampia di e otro paisnan. Asina bo ta haya cu ariba e vel di stampia Hulandes tin tres stampia di Hulanda, un stampia di 2,40 florin di Aruba y un stampia di cinco cen di Antia.

WILLEMSTAD – Riba djasabra 26 di yüli ta kuminsá e Curaçao Chess Festival 2008 den Flamboyant Conference Center di Superclub Breezes Resort, Spa & Casino Curacao.
Apertura di e torneo lo ta pa 14:30pm, mitar di 3 kaminda pa 3’or lo kuminsá ku e promé buèlta.
E torneo aki lo bai tin masha hopi bon hungadó kaminda lo b mira partidonan fuertemente bringá.
Te ku awor aki tin un sinku Gran Maestro Internashonal inskribí, entre kual IGM Daniel Fridman ku ta e aktual kampion di Alemania. Fridman lo partisipá pa promé bes na e torneo aki, miéntras ku su kasá, WGM Anna Zatonskih, tin Kòrsou komo un di su lugánan faborito pa un torneo. Zatonskih a titulá e aña aki i na 2006 kampion di Merka.
Tambe WGM Jennifer Shahade, ku a sali kampion di Merka na 2004, lo partisipá na e torneo aki. Den e último dos añanan el a dediká su mes na skirbi tokante di Ahedres i a biaha rònt mundu pa relatá torneonan di Ahedres. El a skirbi tambe tokante di e Curaçao Chess Festival riba e wepsait di Federashon di Ahedres di Merka, www.uschess.org, ku ta konta ku 80.000 miembro.
Riba djaweps 24 di yüli e IGM Joel Benjamin di Merka lo duna un workshop den Sentro di Bario Janwé pa 5’or di atardi.
E workshop aki aña pasá a hala hopi atenshon pa tantu e ahedresistanan lokal komo estranhero i a haña un petishon pa pone e fecha i ora tempran riba wepsait.

MIAMI, Florida, Merka - E orkan Bertha a bolbe haña fòrsa i a bai kategoria 2, miéntras e ta avansando pa islanan Bermuda sin sa di inmediato si e lo mishi ku tera, meteorólogonan a informá.
Orkannan di kategoria 3 i nivelnan mas haltu ta keda kalifiká komo e orkannan mas fuerte i mas destruktivo.
Orkan Katrina, ku a devastá New Orleans na aña 2005, a alkansá un peligroso kategoria 5 den Golfo di Mexico, promé ku yega kosta komo un tormenta di kategoria 3.
E “wowo” di e orkan Bertha tabata 1.060 kilometer sùitost di islanan Bermuda, un sentro finansiero ku un poblashon di 66.000 persona, pero ainda no ta sigur si e tormenta lo yega e kolonia britániko aki.
E bientunan máksimo tabata 170 kilometer pa ora i algun ráfaga mayó.
E Sentro Nashonal di Orkan ku sede na Miami a pronostiká ku Bertha lo fortalesé den próksimo 24 ora i e lo por bira un orkan importante i lo por alkansá kategoria 3 (ku e orkan aki ta’tin djaluna último), di un eskala di 5 punto.
Bertha, e promé orkan di temporada den Atlántiko, ta moviendo den direkshon wèst nortwèst ku un velosidat di 19 kilometer pa ora.

Foto: Bertha 1007

Imágen di orkan Bertha emití pa NASA.

CHATEAUROUX, Fransia – E ingles Mark Cavendish a imponé den un sprint pa djarason gana e di sinku etapa di eTour di Fransia, den kua e kolombiano Leonardo Duque a drenta di shete.
E aleman Stefan Schumacher a yega na di 26 puesto i el a mantené e kamisa hel di lider general.
Cavendish di e ekipo Team Columbia, a superá e spañó Oscar Freire i e aleman Erik Zabel den e sprint final di e ruta di 232 km entre Cholet i Chateauroux, esun mas largu di e Tour.
Cavendish a marka 5 ora, 27 minüt i 52 sekònde e mesun tempu ku su siguidónan, inkluyendo Duque, di e ekipo Cofidis.
Tres franses – Lilian Jegou, Nicolas Vogondy i Florent Brard – a pone nan mes na kabes di e grupo despues di 11 km i nan a traha un bentaha di mas di 8 minüt. Sin embargo, e grupo no a parse preokupá niun momento i e siklistanan a traha den tim pa yega nan kasi ora nan a yega final.
“E ta e kos di mas importante ku a pasa ku mi”, Cavendish di 23 aña a bisa. “Gana un etapa di e Tour ta algu inkreibel. M’a bini ku e intenshon di gana un. E ta nifiká hopi p’ami”.
Cavendish tabata desepshoná pasobra e di tres etapa di djaluna a ser ganá den un huida, loke a duna oportunidat na e sprinternan pa lucha pa e viktoria.
Cavendish a keda eligí djamars pa federashon ingles di siklismo pa kompetí den ‘madison’ den e Weganan Olímpiko di Beijing huntu ku Bradley Wiggins. E pareha a gana e disiplina ei na mart den e mundial.

ATLANTA – Evander Holyfield a yega na un akuerdo djarason den e kaso di pago di alimentashon i a evitá un oudiensia hudisial ku lo por a mand’é prizòn, miéntras e eks kampion mundial di bòkseo ta trata di resolvé su problemanan ekonómiko.
Randy Kessler, abogado di e mama di e yu hòmber di 10 aña di Holyfield, a bisa ku e bòksdó a paga 9.000 dollar na plaka di alimentashon atrasá i a aseptá pa kumpli ku su otro obligashonnan finansiero den un tempu di un luna, inkluyendo e pagonan di un skol privá, seguro di dòkter i un fondo di universidat.
Holyfield, di 45 aña, a aseptá tambe pa paga parti di e gastunan legal di e kliente di Kessler, Toi Irvin. E akuerdo a bini promé ku un oudiensia hudisial, den kua Kessler tabata bai pidi Pa sera Holyfield si e no paga.
Irvin a bai tribunal despues ku Holyfield a faya di hasi e pagonan mensual di 3.000 dòler na mei i yüni, aparentemente debí na su problemanan ekonómiko ku ta inkluí tambe e menasa di embargo di su kas na Atlanta.
E kas luhoso di Holyfield ku lo a bai vindishi dia 1 di yüli, a ser saka for di e lista di embargonan i te ainda e ta okupá pa e bòksdó.

ZURICH – FIFA lo saka un regla djaweps pa kalma e kresiente pleitu entre e klupnan i nan selekshon nashonal pa e uso di hungadónan pa e torneo olímpiko di futbòl.
E presidente di FIFA i miembro di KOI, Joseph Blatter, ta preparando un desishon pa disidí si e hungadónan tin ku raportá ku nan selekshonnan si nan ser yamá pa e Weganan Olímpiko di Beijing, ku ta koinsidí ku komienso di e temporada europeo.
FIFA a ninga di komentá djarason pero a bisa ku un komunikado ofisial di ofisina di e presidente ta sperá den e próksimo 24 ora.
Blatter ta miembro di KOI for di 1999 i firmemente ta respaldá e torneo olímpiko.
“Pa kualke hungadó, e torneo olímpiko ta representá e punto máksimo di nan karera i mi ta spera ku lo haña un resolushon”, Blatter a bisa na febrüari.
FIFA ta pidi e klupnan pa outorisá e hungadónan di 23 aña i ménos, pero ta pèrmití nan pa evitá ku lo partisipá hungadónan mas bieu ku e edat ei. Kada un di e selekshonnan olímpiko por tin un máksimo di tres hungadó di mas di 23 aña.
E regla informal a ser poné na prueba pa dos klup aleman despues di e anunsio di e selekshon brasileño djaluna.
Werder Bremen a informá djamars ku lo e no duna pèrmit na Diego, un bolante di 23 aña i Schalke a bisa ku e lo no outorisá Rafinha, un defensa di 22 aña.

ARIES: Awor bo ta mas kla enkuanto bo meta i ophetivonan. Bo ta den un bon momentu pa muda o simplemente kambia di panorama. 03,17,09.

TAURO: Redusí bo ritmo di bida. Bo ta di naturalesa fuerte i bo ta rekuperá di tur malu rápidamente, pero mihó prevení ku remediá. 10,45,12.

GEMINIS: Bo ta fortalesé emoshonalmente i asumí un aktitut diferente ante bida. Bo ta uni awor na personanan ku sa di rekonosé bo balornan. 20,04,16.

KANSER: Bo ta milagernan den bo área di trabou o preshon. Bo mente ta ofresé ideanan genial ku i ta pone bo mes den práktika di transformashon. 05,39,22.

LEO: Bo ta yena awor di balor pa pone na òrdu bo kurason, mente i bida. Move unda tin abundansia i prosperidat. Buska i hasi e loke realmente ta hasíbu felis. 11,43,50.

VIRGO: Sorpresivamente bo ta sintibú rondoná pa hende di enorme inspirashon. Probechá pa kultivá mas. Hasi gala di bo talentonan komo seduktor. 03,38,2.

LIBRA: Amor i romanse ta embeyesé bo eksistensia. Bo ta al tantu di tur kosnan ku ta pasa e dianan aki, riba nivel personal komo profeshonal. 18,04,35.

SKORPION: Ta posibel ku na e momentunan aki bo ta pasando dor di problemanan sentimental. Bo no meresé sufri. 26,01,19.

SAGITARIO: Enfatisá den e kalidat; kalidat den amor, den negoshi, servisio etc. Duna lo mihó di bo. Spera kambionan grandi den bo bida ku ta hasíbu logra bo metanan.

WILLEMSTAD - Kiko ta hasi huntu, kiko no ta hasi huntu. Esei tabata e pregunta ku a pone ku partidonan ayera nochi no por a haña otro riba institushon di 3 kuerpo polisial unabes ku desmantelá Antia. Manera e kos ta pinta awor aki, partidonan lo topa otro atrobe na ougùstùs awor pa sigui riba e asuntu aki.
Manera nos a informá ayera, partidonan a keda di papia riba e proposishon pa Kòrsou haña su mes kuerpo polisial, St Maarten haña di dje, miéntras ku ta bin un di tres kuerpo polisial pa e islanan chikí. E ta un konsepto ainda, pero ayera a kuminsá papia riba dje.
Sekretario di Estado pa Relashon den Reino Ank Schouten, a sinta den oranan di ayera tardi den ITC ku gobièrnu di Kòrsou i di St. Maarten riba e lei di alto supervishon ku mester regla institushon di kuerpo polisial den futuro.
E idea ainda ta poko kurú, pero partidonan a diskutí riba esaki durante un konsulta polítiko pa por haña otro na kaminda. Promé ku e enkuentro, diputado di Struktura Estatal di Kòrsou Zita Jesus- Leito a bisa ku riba un gran kantidat di punto, ya kaba tin konsenso. Pero a resultá durante e deliberashon ku riba e pregunta básiko, kiko ta hasi huntu, kiko no, partidonan no por a haña otro.
A resultá durante e deliberashonnan ayera ku Ulanda ta na fabor pa regla mas tantu kos huntu, miéntras ku Kòrsou i St. Maarten no ta sinti masha pa esei.
Sarah Wescot-Williams, diputado di St. Maarten por ehèmpel ke pa mantené e formulashon ku tin den e Slotverklaring.

WILLEMSTAD – “Pa nos e asuntu ta bon kla awor. O posishon ta kritiká, anto ora e no haña rason, e ta buska otro kos pa kritiká. E kos aki no ta korekto, e no por”, asina lider di frakshon di PAR Dennis Jackson a reakshoná, riba e hecho ku partidonan di oposishon awor ta kuestionando Raad van Advies.
Oposishon te ku awor a bin ta mustra enfátikamente ku e medida di supervishon haltu pa kòntròl finansiero den nos pais, ta mishi ku outonomia di pais, pasobra de fakto tur kos ta den man di outoridatnan ulandes.
E medida aki a keda aprobá algun siman pasá den Konseho Insular i tabata motibu pa e desòrdu ku tabatin e tempu ei, inkluso aktonan di agreshon ku a sigui despues ku e reunion ya a tèrminá kaba.
Den su konseho, Raad van Advies ta konkluí ku aki no por papia ku e medida ta mishi ku nos outonomia.
Lidernan di oposishon sinembargo ta para ‘riba ku e forma ku e medida ta hinká den otro, debidamente tin efekto riba e outoridat ku Kòrsou mester tin riba su asuntunan finansiero. Lider di MAN Charles Cooper, despues di un análisis, a mustra ku tin un pregunta esensial ku Raad van Advies ta atmití di no por kontestá, anto esei ta, kiko lo sosodé si gobièrnu no sigui e instrukshon ku e Kolegio pa Supervishon Finansiero duna. Kiko lo pasa e ora ei? ta loke Cooper tin gana di sa. El a bisa, ku e ta spera ku ora e proposishon yega Raad van State na Ulanda, nan si lo duna un kontesta riba esei.

WILLEMSTAD - Fundashon USONA a pone un montante di alrededor di 9 mion florin disponibel pa sigui drecha e kadena hudisial na Antia. Ayera tardi a firma un kombenio pa seya e koperashon aki entre minister di Hustisia David Dick i e representante di USONA Frans Versteeg.
Ku esaki a pone un paso mas den direkshon pa yega na un kadena hudisial bon organisá, efisiente, fuerte i ku ta duna e resultado ku komunidat ta spera di dje.
Mester bisa ku e biaha aki e aksènt ta riba e organisashon di Imigrashon den nos pais, ku mester di kambio.
Minister David Dick a splika ku tin 4 proyekto ku ta kai den kuadro di e ya konosí Plan Veiligheid Nederlandse Antillen. E proyektonan ta pa sigui mehorá e kadena hudisial, minister Dick a ripití.
Un dje promé kosnan ku lo hasi ta drecha e pòst di polis na Barber.
Mehorashon di e ofisina aki ta den kuadro di mehorashon di alohamentu di polis, segun e mandatario. Ya kaba a drecha e warda na Rio Canario, a traha un edifisio nobo na Montaña i awor ta bai drecha e warda di polis na Barber.
Un di dos kombenio ku a firma ku USONA ta pa mehorá edukashon i formashon polisial.
“Si bo ke tin bon polis, bo mester drecha tambe kalidat di e formashon ku bo ta duna. Ku e akuerdo aki nos a pone awe e promé paso,” David Dick a bisa.
E idea ta pa entrená e polis aspirant, e polis ku ta trahando kaba i tambe miembronan di staf i maneho di polis.
Un di tres punto ta drechamentu di e fasilidat pa detené hende indokumentá na St. Maarten, miéntras ku e di kuater aspekto ta enfoká riba mehorashon di e funshonamentu di e departamentu di Imigrashon.

WILLEMSTAD - Akademia Pedagógiko Kòrsou (APK) lo stòp di eksistí na Kòrsou.
Ku firmamentu di un kombenio ayera tardi, a formalisá integrashon di e dos institutonan di formashon pa maestro di skol ku ta APK i e formashon nobo ku a kuminsá na Universidat Nashonal di Antia.
Pa direktiva di IPSO ku durante hopi aña a manehá APK, a firma su presidente Charlie de Haseth, pa UNA a firma Hugo de França. Diputado Marilyn Alcalá-Wallé, kende a firma pa gobièrnu insular di Kòrsou a ekspresá su satisfakshon pa e hecho ku despues di un periodo di intrankilidat, awor tin e klaridat nesesario pa esun ku ke sigui su karera komo edukador.
Manera ta konosí, dia a sali na kla ku UNA ta bai kuminsá ku formashon di maestro, a surgi hopi konsternashon bou di tantu personal komo studiantenan di APK. Tur tabata konsiderá esaki un menasa pa nan eksistensia. Tabatin den pasado asta akshon di parti di studiantenan sostené pa e dosentenan.
Gobièrnu di Kòrsou, segun diputado Alcalá-Wallé a bisa aña pasá ku lo bini un solo instituto pa formashon di maestro. Nos a bisa tambe ku nos lo traha riba kalidat, el a bisa.
Aña pasá a kuminsá ku e trayekto aki, a firma un Memorandum of Understanding pero esaki a kousa sierto konsternashon.
Hustamente pa e motibu ei mes gobièrnu a disidí ku ta bai traha intensivamente riba un trayekto di integrashon, segun e diputado a trese dilanti.

WILLEMSTAD – Mañan, djabièrnè, ta firma e kontrakt kolektivo nobo na kompania di konvoi Autobusbedrijf Curaçao. Ku esaki, pas laboral a regresá na e kompania ABC, ku di ta vital importansha pa transporte públiko aki na Kòrsou.
Pa basta dia kaba, e sindikato ta koriendo tras di gerensia di e kompania ABC pa logra ku ta firma e kontrakt kolektivo aki.
A yega na un akuerdo riba e kontrakt kolektivo dos luna i piku pasá. Tabata un kuestion di trese algun modifikashon den e dokumento pa firma esaki. Pero pa un òf otro motibu, esaki no a kristalisá.
Segun Wendell Meulen, e sindikato, despues di hopi insistensia a bin komprondé di gerensia ku nan mester di tempu pa hasi e kambionan atministrativo i pa nan haña aprobashon promé di hunta di komisario di ABC.
Esei, aparentemente a bin ta tarda e proseso konsiderablemente.
Djamars anochi, e sindikato a tene un reunion general ku su miembronan na ABC pa diskutí e situashon aki. Tur kos tabata indiká ku e trahadónan lo a drenta akshon e dia siguiente, loke lo a nifiká ku no tabatin konvoi pero diputado responsabel a ABC Anthony Godett a kai aden, mirando e menasa di akshon.
E sindikato, mirando ku tin solushon na horizonte, a disidí ku no ta kanta akshon mas na ABC pero e personal a bai traha ayera sin nan unifòrm di kustumber pa asina tòg demostrá nan malkontentu.
Esaki por sierto a okashoná sierto tenshon pasobra ayera mainta, gerensia no kier a pèrmití e trahadónan subi tereno sin unifòrm. Despues di intervenshon di e sindikato, esei a sosodé tòg.

WILLEMSTAD / AMSTELVEEN – Un polis a muri ayera nochi na Amstelveen despues ku un hòmber arubiano a tir’é. E polis femenino, Gabriëlle Cevat, di 28 aña di edat, tabata bayendo su trabou ora el a nota un outo BMW pasa ku velosidat haltu. Despues ku el a para e vehíkulo i a aserká e shofùr, esaki a tir’é.
E tiroteo a tuma lugá den kareda di 23.00 den Pieter di Winterlaan. Koleganan di Cevat a risibí un yamada telefóniko di dje, den kua el a menshoná ku e ta koriendo tras di e BMW. Despues di un ratu e sentral di polis a risibí un yamada di bisiñanan ku a tende un tiru den e kaya. Ora polis a yega na e sitio, nan a lokalisá nan kolega bentá riba kaya ku un herida di bala na altura di su pechu. Cevat tabata for di konosementu i intentonan pa reanim’é no a logra.
Ambulans ku a yega mes ora na e sitio a transport’é pa hòspital, kaminda el a muri mas lat. Riba kaya banda di dje su koleganan a haña su karnèt di polis ku kua e lo mester a identifiká su mes kuné. Tin indikashon ku ta e ora ei e hòmber a tir’é.
Polis a informá ku e hòmber arubiano, di 49 aña, tabata envolví den un lòsmentu di bala anteriormente e anochi ei. E lo mester a tira riba porta di un kas den Amtelveen. Despues di e suseso akí el a kore bai ku velosidat haltu. E polis víktima ku tabata bayendo su trabou a nota e vehíkulo. E hòmber arubiano tabata konosí kaba serka polis. E tabata sentensiá pa violensia i inmoralidat.

TEHERAN, Iran, - Iran a tèst mas misil den Golfo Pérsiko, medionan di komunikashon estatal a informá awe, un dia despues di a risibí krítikanan for di Oksidente, pa a lansa proyektilnan nobo similar.
Washington, ku a bisa ku Teheran ke desaroyá teknologia pa konstrukshon di armanan nuklear, ayera a bisa ku Iran mester stòp realisá tèstnan di misil, si ke gana konfiansa di mundu.
E spekulashonnan di ku Israel lo por bombardiá Iran a oumentá for di dia ku e Estado hudiu luna pasá a realisá práktikanan aéreo grandi.
E lidernan merikano no a deskartá e opshon militar si diplomasia no por tèrminá ku e disputa riba e tema aki.
Iran a kontestá bisando ku si atak’é, e lo realisá atakenan kontra Tel Aviv i kontra interesnan i flotanan merikano.
Teheran ta insistí ku su programa nuklear solamente tin ophetivonan sivil.
E televishon estatal i radio a informá ku e tèstnan nobo ku misilnan a tuma lugá ayera durante oranan lat di anochi pa habri djaweps.
“Den awanan di Golfo Pérsiko, e lansamentu di diferente tipo di misil tera-laman, tera-tera, laman-aire, i e lansamentu poderoso di misil Hout, a tuma lugá eksitosamente”, e radio estatal a bisa, sin duna mas detaye di e misilnan.
E kanal estatal iraní Press TV a bisa ku misil Hout ta un torpedo.
E informashonnan ku a yega despues di afirmashonnan realisá ayera nochi pa e komandante di forsa aéreo di Guardia Revolushonario di Iran, Hosein Salami, kende a bisa televishon estatal ku un “tèst misilístiko nokturno” a kaba di tuma lugá, pero sin duna mas detaye.

LOS ANGELES – Tres dia despues ku nan a lag’é for di e tim di Liga Nashonal di All-Star Game, Jair Jurrjens por lo ménos a keda konsolá ayera, ora ku el a keda selektá komo Nobato di Luna di yüni di Liga Nashonal.
E picher derecho yu di Kòrsou, tabatin rèkòrt di 3-0 ku un era di 1.63 den kuater salida den luna di yüni, inkluyendo niun kareda limpi den tres salida, despues di no tabatin un salida pa motibu di un leshon na un ènkel.
Despues di e leshon aki, Jurrjens a bini bèk, el a limitá oponentenan na solamente .182 “on-base percentage” den su siguiente tres salidanan.
E partido den luna di yüni ku a poné gana e premio tabata esun di dia 27 di yüni kontra di Toronto Blue Jays. Den e partido aki Jurrjens a tira ocho ining di blankeo, permitiendo tres hit. Despues di e partido aki, mènedjer Bobby Cox a bisa, ku e no ta kere ku niun otro hende por a picha mas mihó.
“Mi ta kere, ku dor di a pèrdè e salida, kisas esaki a ponemi kalma i kuminsá hasi kosnan ku mi tabata hasi na komienso di temporada”, asina Jurrjens a bisa. “Mi no ta kere den sifranan i tur e otro kosnan. Ora ku bo bai pensa riba e kosnan ei, bo ta pone preshon riba bo mes”.
Djamars último el a sabi di gana di Los Angeles Dodgers i a mehorá su rekòrt na 9-4 ku un era di 3.00 den su promé temporada kompleto den Liga Grandi.
E viktoria di djamars ei kontra di Dodgers tabata su di tres viktoria den weganan for di Atlanta, permitiendo 1 kareda, sinku hit den seis ining, ku tres base por bola i seis ponche tirá. Den su último tres salidanan e tin un efektividat di 0.42 den tres salida den weganan for di kas.

WILLEMSTAD – Si e organisashonnan di turismo i hotèl di Karibe haña nan gana, Karibe lo mester forma un fondo di 60 mion dollar pa kontrarestá e situashon ku a surgi den aviashon i ku tin su impakto den destinashonnan pa Karibe. Tur destinashon den Karibe lo mester bai koperá ku e fondo aki, asina a sali na kla durante un konferensha resien na Merka. Diferente kompania a anunsiá, ku nan ta anulá òf kòrta den nan buelonan pa diferente destinashon den nos region. Pa loke ta trata Kòrsou, American Airlines a anunsiá ku e lo stòp un di su buelonan diario pa Miami entrante sèptèmber awor. E desaroyo aki tin sektor di turismo hopi preokupá, sigur ku awor aki diferente hotèl na Kòrsou ta biniendo kla.
Resientemente un delegashon di Kòrsou enkabesá pa diputado di Turismo Eugène Rhuggenaath a partisipá na e promé konferensha turístiko di Karibe di CTO i CHA. E delegashon di Kòrsou a konsistí di CHATA, Ofisina di Turismo i DEZ. Caribbean Tourism Organization (CTO) i Caribbean Hotel Association (CHA) pa promé bia a organisá nan reunionnan anual, siguí pa e promé konferensha Annual Caribbean Tourism Summit konhuntamente den e kapital merikano, Washington. E evento a konta ku partisipashon di kasi tur isla den Karibe.
E tema prinsipal di e konferensha tabata, kon konhuntamente sektor públiko i sektor privá por enfrentá e problemanan di preis di zeta, e krísis di aviashon i e reseshon ku ta enfrentá Estádos Unídos. Resultado di diferente investigashon ku a keda presentá a ilustrá kon e desaroyo den preis di krudo ta afektá e konsumidó mundialmente i espesialmente e konsumidó merikano. Esaki teniendo kuenta ku mayoria isla den Caribe ta enfoká riba Estádos Unídos komo nan merkado turístiko prinsipal. Tambe por a dedusí for di e investigashonnan ku Caribe komo region ta pèrdiendo márgen di merkado. Kompetensia ta grandi i a konkluí ku Caribe komo region mester tuma akshon lihé.

WILLEMSTAD – Algun hòmber deskonosí a sekuestrá yu hòmber di un komersiante libanes awe mainta. E suseso a tuma lugá na Esperansaweg dilanti kas di e víktima. E hòmbernan tabata armá ku arma di kandela i a hui den un outo ku nan mes tabatin. Tabata den kareda di 08.21 ora e víktima Wallid Gazal di 27 aña di edat, den kompania di su mama, kier a drenta nan outo. Na e momentu ei e vehíkulo ku e hòmbernan den dje a kore yega. No ta konosí eksaktamente kuantu hòmber tabata den e outo. Bou di menasa di arma di kandela nan a fòrsa Gazal drenta nan outo. Ku velosidat haltu nan a bandoná e sitio. Segun e mama, nan tabata sea den un outo kòrá òf pretu. Dor di e konsternashon ku a surgi, e no por a kòrda eksaktamente ta kua koló e vehíkulo tabatin. E tata di e hòmber sekuestrá i un otro yu ta na Panamá pa asuntunan di negoshi.
E kaso a kousa bastante konsternashon bou di algun komersiante libanes na Kòrsou. Mes ora un grupo di komersiante a akudí na warda di reshèrshi na Garipitoweg pa ekspresá nan preokupashon. LA PRENSA a komprondé, ku nan a akudí na e warda, pa puntra kiko nan mester hasi pa nan protekshon. Entre tantu nan a bai reuní na un otro sitio i nan a keda di saka un deklarashon mas lat awe, segun un di e personanan ku tabata den e grupo a bisa LA PRENSA. Entretantu e mama tambe a akudí na reshèrshi pa duna mas informashon di loke a pasa.