ORANJESTAD- Fiscal Mayor Hans Mos awe mainta na nomber di Ministerio Publico a yama un conferencia di prensa pa anuncia publicamente cu su departamento a dicidi di retira su peticion di apelacion den e caso di Fondo di Desaroyo San Nicolas.
E apelacion aki a bai pa e decision di Corte den Prome Instncia contra di ex Minister Presidente Henny Eman, contra di e parlamentaro Otmar Oduber y Roly Sint Jago, kendenan a ser declara liber di tur acusacion den e caso di Fondo di Desaroyo San Nicolas.
Abogado mr Chris Leguez tambe a haci un declaracion na nomber di su cliente, ex Minister di Finanza Tico Croes, bisando cu a yega na un acuerdo cu Ministerio Publico, cu ambos partido lo retira nan peticion pa apelacion di e decision di Corte den Prome Instancia, caminda a haya e ex minister culpabel di a viola ley di compatibidad den algun decision cu el a tuma den e caso aki.
No a bai den mucho detaye riba e argumentonan cu ambos a usa pa tuma e decision aki pero solamente Leguez a mustra cu a tuma e decision aki na interes general di e pais.

ORANJESTAD- Despues di 25 siman di cursonan practico y teoretico sumamente intensivo un grupo di 6 operador nobo ta cuminsa traha den Valero Aruba Refinery e siman aki. Ta trata aki di Jorge Niebles Diaz, Jurvin Maduro, Derwin Tromp, Armando Abello-Lopez, Yeager Ching y Sandino Sarijoen.
Durante nan educacion e grupo a ricibi lesnan den areanan manera entre otro matematica basico, fisica, quimica y distilacion.
Tambe nan a wordo instrui den instrumentacion, salud, seguridad, medio ambiente, con pa traha den team, Ingles basico, comunicacion y nan a bai scol di prevencion y combatimento di candela.
E lesnan a wordo duna door di instructornan cu añanan di experiencia y no tabata tuma luga solamente den un lokaal. E studiantenan mester a bai na diferente ocasion den e planta pa asina nan por a completa tareanan importante cu ta laga nan pone e parti teoretico cu nan a haya di biaha den practica.
Un aspecto nobo den e curso aki ta e hecho cu tur e materialnan di educacion ta nobo y ta cumpli cu e exigencianan di VAPRO. E graduadonan awor tin e nivel VAPRO A.
Durante e graduacion cu a tuma lugar riba diabierna 4 di juli 2008, Jurvin Maduro a keda escohi pa su coleganan como e miho team player.
Banda di esey Jurvin tabata esun cu e score averahe di mas halto pa e curso cu a haci cu e a gana e premio pa ‘Most Outstanding Performance’.

ORANJESTAD - Exactamente dos aña despues di e prome bishita di e delegacion Arubano pa China encabeza pa Ministro Presidente sr. Nelson Oduber, e prome grupo di companianan a bin registra den Aruba su Free Zone pa distribucion di nan productonan pa e region di Latino America y Caribe. Hui Ying Group cu ta un plataforma cu ta representa no mas cu seis (6) compania productor di diferente producto cu ya ta exportando pa Latino America a bin pa establece na Aruba. Esaki danki na e oficina di estado di China cu ta CIIC-IBDC (International Business Development Centre) cu ta representando Aruba na Beijing.
E companianan cu a bin Aruba ta: Hui Ying (industrial trade & development), Guandong Meiya Group (furniture), Hantao Zhiying Shui Hebei (medical equipment), Zhong Xin Yinghao (motorcycles), Sunspo (cctv equipment) y Shengtai (hardware).
Diaranson ultimo e grupo a haci un bishita serca Ministro Presidente sr. Nelson Oduber. E grupo ta consisti di e siguiente personanan: Run Guang Guan, GM, Bai Sheng Xu, Vice GM, Qing Guang Wu, Director y Zhong Gui Xu, Director of Production, Supply & Marketing.
Ya e grupo aki a firma un pre-admission cu señora Lucia Martes di Free Zone N.V.
Segun CIIC-IBDC esaki ta e comienso, ya cu pa luna di October proximo ta planea pa bin adicionalmente dies (10) compania mas. Na Mei di 2009 CIIC-IBDC lo organisa e prome Chinese Trade Show na Aruba cu alrededor di 500 compania di China aki na Aruba.
Alavez Ministerio di Comercio di China a laga Aruba sa cu, Aruba lo tin e previlegio pa bira e transshipment harbour pa productonan di China pa henter e region di Caribe y parti Norte di Latino America. China su Gobierno a laga Aruba sa tambe cu nan no tin relacion diplomatico cu Panama, door cu Panama no ta reconoce e One China Policy, cu nan no ta haña Panama sigur y stabil, manera Aruba cu ta parti di Reino Hulandes y cu tin un sector financiero moderno y sigur.

ORANJESTAD - Dia 23, 24 y 25 di September proximo, Aruba lo ta e anfitrion pa e IX ACS Business Forum di Gran Caribe. E evento internacional aki ta wordo organisa pa prome biaha na Aruba y ta un oportunidad pa companianan local conoce empresarionan di e region di Caribe, cu interes pa haci negoshi cu otro.
ACS ta e Association di Estado Caribense cu tin como meta principal pa stimula comercio, mehora lasonan, intercambio di informacion relevante y cooperacion den e region Caribense.
E foro lo tuma lugar den Renaissance Convention Center y ta consisti di un conferencia, un expo internacional y posibilidad di matchmaking. Camara di Comercio (KvK) ta recomenda tur comerciantenan local pa participa den e foro empresarial aki.
CONFERENCIA
E conferencia lo atende topiconan importante, manera por ehempel con pa conduci negoshi exitosamente, con e estado di salud di bo populacion ta influencia desaroyo economico di bo pais y con pa reduci obstaculonan pa haci negoshi den Caribe? Lo tin diferente orador, local y internacional. E oradornan local ta Sr. Eduardo de Veer y Dr. Richard Visser. Durante e conferencia participantenan tin e oportunidad pa haci pregunta, intercambia idea y opinion cu e oradornan.
EXPO
Companianan participando na e expo lo exhibi nan producto y servicio na varios cliente y socio potencial. Te cu awor tin registra entre otro participantenan di Trinidad & Tobago; Francia; Cuba; Venezuela y Antiyas, como tambe varios compañia local manera Antraco, Free Zone Aruba, Yellow Pages y Integrated Security.
BENTAHA DI EXHIBI TA

Keda keto tin ora ta mihos cos pa haci

ORANJESTAD- Tin un dicho masha bieuw mes di bida, cu ta bisa lo siguiente: “Mihor bo keda keto y pasa pa bobo, cu habri bo boca y mustra tur hende cu en realidad bo ta bobo.”
Ta lanta e pregunta si e dicho aki ta cuadra pa Minister Presidente Nel Oduber, kende ayera durante di su reunion cu Minister Maxime Verhagen di asuntonan exterior durante di su bishita na Aruba.
Oduber a cataloga e logro aki, cu awor Arubiano y Antiyanonan por vota pa miembronan di Parlamento Hulandes, como un “dode mus.”
Premier Oduber no ta mira nada balioso den e derecho aki cu recientemente Tweede Kamer a legaliza caminda e Arubiano ta haya mesun derecho cu e Hulandes Europeo.
Segun Nel Oduber, ningun hende na Aruba ta kibra nan cabez cu e logro aki, cual ta un discusion cu a ser entabla pa lider di partido di oposicion Mike Eman, y hasta a duna e impresion, cu e ta bisa Verhagen cu Arubianonan no sa mes kico ta pasa na Hulanda of Europa.
Pa ridiculiza e logro di su rival politico, Premier Oduber hasta a cuestiona e propio Hulandesnan dor di bisa Verhagen cu na Hulanzdes mes tin mas cu miter di esnan cu derecho di voto, no ta haci uso di e derecho aki. Pa completa su sabiduria riba a materia aki, Oduber a mustra Verhagen cu e derecho aki, no ta cambia nada na e popsicion di e islanan pa loke ta Union Europeo.
Na prome lugar Premier Oduber a duna muestra bon cla cu e mes no tin nocion di loke ta e derecho di voto aki, y kico e por nifica den sentido general pa e ciudadano Arubiano, cu awor tambe tin “mesun derecho” cu e Hulandes Europeo, no solamente pa loke ta derecho di voto pa Parlamento Europeo, pero riba cantidad di otro tereno mas.

WILLEMSTAD -- Tantu minister di Relashonnan di Eksterior, Maxime Verhagen komo promé minister di Antia, sra. Emily de Jongh-Elhage a enfatisá durante un konferensha di prensa ku den proseso pa bira paisnan nobo ta importante kiko nos ta bai hasi ku maneho eksterior. Promé Minister a informá, ku aktualmente tin kontakto diario entre e departamentu di Relashonnan Eksterior i Ministerio Ulandes. Mester tin mas kontakto den Reino i mundu. Minister Verhagen a bini Antia pa sera konosí i hasi palabrashonnan relashoná ku kambionan di struktura estatal den Reino, ku e minister a bisa ta bira mas kompliká, komo parti di Ulanda den Karibe. Den e tempu aki mas tin di haber ku otro paisnan, pasobra desaroyonan den eksterior tin konsekuensia pa nos na Kòrsou sigur loke ta pasa den region i esei ta pone kondishonnan haltu den relashonnan di eksterior. Esaki ta rekerí bon informashon mutuo i koperashon, ta p’esei ta bon ku por a papia riba maneho di eksterior kon pa guia esaki. Ta bon ku Antia mes ta tuma inisiativa pa wak kon e maneho lo ta den futuro, ya tin un komishon miksto ku a interkambiá di idea. E minister ta habrí pa mas interkambio kon duna kontenido pa traha mas estrecho ku departamentu di Asuntunan di Eksterior. Pa loke ta trata e status di Antia pa ku Union Oropeo, Verhagen a bisa, ku Ulanda ta habrí pa deseonan di Antia. Tin un investigashon kaminda ta duna pro i kontra entre UPG òf LGO. Kada eskoho ta bon pa Antia evaluá e konsekuensianan di kada opshon. Lòs di esaki mester tene kuenta ku leinan internashonal i obligashonnan riba tereno di medio ambiente i derechonan humano. Ta un asuntu ku mester atendé a base di tratado. Por lo general den region a para ketu na desaroyonan den region. Kier enfatisá ku tur pais ta lucha pa bon relashon i koperashon ku bisiñanan i aliadonan. Ta kontentu ku Promé Minister a papia riba desaroyonan den Karibe i manera konosí ta trahando riba un nota di Karibe (Caribbean notitie) pa parlamento ulandes i Antia su opinion ta hopi importante den esaki.

WASHINGTON, Merka, - E kandidato presidensial demókrata Barack Obama a aseptá despensa di e reverendo Jesse Jackson, kende a realisá komentarionan fuerte riba e senador, ora el a akus’é di entre otro di no ta papia di asuntunan importante pa komunidat di hende pretu.
Reverendo Jackson, kende djadumingu último tambe a bisa, durante pousa di un programa di televishon den un lenguahe hopi brutu, ku e ke kòrta e testíkulonan di Barack Obama, ya ku el a kere ku e mikrofon tabata pagá.
Jesse Jackson, djarason último, a pidi e aspirante presidensial despensa, despues ku el a haña sa ku Fox News tin planiá di transmitié.
A realisá e insidente aki ora otro di e invitadonan a pidié su opinion riba e diskursonan riba moralidat di Obama.

WILLEMSTAD – Federashon di Biyar di Kòrsou, FeBiKo, mester enfatisá ku poko, poko pero sigur nan ta logrando nan meta ku organisashon di e diferente tournan.
Un biaha mas a keda demostrá ku e nivel di vários hungadó a bai mas dilanti i esaki ta keda reflehá den vários di e partidonan ku a finalisá ku skornan pèrtá.
Den e wikènt tras di lomba un total di 44 miembro di FeBiKo a inskribí i partisipá den e Tour II di Bola 9. E evento aki a tuma lugá den Poolarena na Gosieweg i tabata bou di direkshon di sr. Vernon Clarke, ku a supervisá i dirigí e evento.
Dos hungadó a sobresalí den e buèlta di ganadó i no ta un sorpresa ku e dos hungadónan ei ta den e tòp 5 di Kòrsou.
Johnny Hellmund a dominá e parti ariba di e skèdjel.
E otro hungadó ku a dominá tabta Bryan Landskind.
Hellmund i Landskind a bai final i den un bon partido Landskind ta gana ku skor di 8-5.
Den e buèlta di pèrdèdónan Juan van Doorn i Isidro Noor a mustra bon nivel di wega i ta terminá empatá na di 7 lugá.
Den un partido di revancha, Anthony Wever ta bolbe gana di Johnny Hellmund 8-5.
Den e final Bryan Landskind ta enfrentá Wever i ta gana 9-5.
Federashon di Biyar di Kòrsou ta partisipá na su miembronan ku e siguiente evento Individual ta Tour number 3 di Bola 8 ku alabes ta konta pa e título di Kampion di Kòrsou. E evento aki lo tuma lugá dianan 31 di yüli, 1, 2 i 3 di ougùstùs awor na breakpoint Pool Café na Granbeeuw

...Por a skucha kansionnan di CD grátis riba Internet...

PARIS, Fransia, - E 14 kansionnan di e di tres CD di Carla Bruni-Sarkozy, e eks modelo i aktual esposa di presidente franses Nicolas Sarkozy, por skuch’é grátis riba Internet, asina su kas di disko a informá den un komunikado.
E 14 kansionnan ku tin entre otro “Comme si de rien n’étail” (“Komo si nada”), ta e di tres CD di e eks dama modelo, di 40 aña, i ta optenibel te dia di awe riba Internet, ounke kada hende ku subi Internet tin solamente dos ora di “krédito”, asina su kas di disko a sigui informá.
E CD lo sali awe riba merkado na Fransia, meimei di krítikanan pa e dama su kondishon komo kantante i esposa di presidente di Fransia.
“Ata’ki e famoso álbùm di Carla Bruni”, korant Journal du Dimanche a skibi den su último edishon.
Miéntras korant Figaro resientemente a papia di “e disko mas sperá ku a graba na Fransia den e último dékadanan aki”.
For di luna pasá, e Promé Dama franses, un eks modelo kende a bira kantante, a sali riba portada di kasi tur korant.
E produktor di e álbùm, Dominique Blanc-Francard, a rekonosé ku e agitashon provoká pa e álbùm aki, mas ku un luna promé ku su lansamentu riba merkado, ta un kaso straño den industria diskográfiko.
“Nunka mi a biba un kos asina aki”, e produktor a bisa.

ESTADO FALCON, Venezuela, - E presidente di Venezuela Hugo Chávez i presidente di Colombia Alvaro Uribe lo reuní pa algun ora na Venezuela despues di lunanan di distansiamentu.
E enkuentro di awe entre e presidentenan ta buskando “normalisá” e relashonnan deteriorá entre e gobièrnu di Caracas i gobièrnu di Bogotá, despues di akusashonnan fuerte mutuo entre ámbos mandatario den último lunanan.
Chávez i su kolega colombiano tin programá reuní awe na estado nortwèst di Falcón, ku e meta pa seya restablesimentu di e vínkulonan.
Ounke e reunion lo bai ta solamente algun ora, ta eksistí un gran ekspektativa relashoná ku e enkuentro, pasobra esaki lo bai ta e promé reunion entre e gobernantenan aki, despues di vários luna di ofensanan i menasanan ku a pone ku e relashonnan colombiano -venezolano a bai na nan nivel mas abou den dékadanan.
Presidente Uribe lo yega na estado di Falcón i na aeropuerto Josefa Carnejo, i e lo risibí honornan militar.
E espektakular reskate di 15 rehen, inkluyendo e eks kandidata presidensial Ingrid Betancourt di parti di Fuerzas Armadas di Colombia dia 2 di yüli último, a dal un buèlta espektakular n’e relashonnan tenso di último lunanan entre gobièrnunan di Caracas i Bogotá.
E reskate aki ku ademas tabata un gòlpi fuerte pa FARC, a fortalesé e figura di presidente colombiano Alvaro Uribe tantu nashonal komo internashonal.

NEW YORK – E left fielder di Colorado Rockies, Mark Holliday lo remplasá e outfielder di Chicago Cubs, Alfonso Soriano den e aliniashon habridó di Liga Nashonal den e All-Star Game djamars awor na Yankee Stadium.
“Mi a pensa di haña un chèns despues ku Soriano no tabata por hunga”, asina Holliday a bisa despues di e wega di ayera nochi ku Rockies a bin pèrdè 11-1 kontra Milwaukee Brewers.
Soriano ta riba DL for di dia 12 di yüni último ku un fraktura na su man robes despues ku e picher di Braves Jeff Bennett a alkans’é ku un lansamentu.
Mènedjer di Rockies, Clint Hurdle a bisa ku Matt Hollliday lo habri, pasobra el a terminá na di dos lugá tras di Ryan Braun den e votashon di hungadónan pa selektá hungadónan reserva.
“Ta mustra ku mi koleganan den liga ta mustra ku mi ta importante”, asina Holliday a bisa. “Ta esnan ku bo ta kompetiendo kontra di dje. Esaki ta nifiká hopi di kon e gainan ei ta pensa di bo”.
Hurdle a bisa ku e tabata spera te ku djabièrnè pa nombra un hungadó pa remplasá Soriano.

ARIES: Ounke bo tin hopi trabou bo ta sinti bo mes motivá i satisfecho di bo labor. E seguridat ku bo tin ta trese un stabilidat den bo relashonnan familiar i di pareha. 06,04,20.

TAURO: Bo salú mester sigui ta bo punto di interes. No desanimá si algu no resultá, sigui buska e kaminda. E momentu ta presentá pa kompra o invertí den un kas. 05,23,13.

GEMINIS: Bo karisma sosial ta hopi fuerte. Utilisá pa habri bo kaminda. Disfrutá di e momentu i no preokupá pa loke ta sosodé den e pasado. 12,44,35.

KANSER: Asuntunan familiar ta sigui tuma importansia. Skucha e propuesto nobo ku nan ta hasibu. Portanan pa oportunidatnan nobo ta habri pa bo. 07,15,09.

LEO: Bo ta bolbe tuma riendanan di bo bida i e bia aki bo ta proponé pa sigui e kaminda ku bo ke, na bo bienestar. Sigui kuida bo salú. 07,15,19.

VIRGO: Probechá bo tempu liber pa dibirtíbu i pasa bon, pero no bandoná bo responsabilidatnan. No sinti bo mes frustrá, al kontrario duna bo mes hopi kurashi. 01,15.

LIBRA: Kompartí i renobá e afekto i kariño. No kansa, pasobra bo tin muchu trabou i poko tempu pa kaba nan. 09,21,10.

SKORPION: Kompartí mas ku bo famia i disfrutá mas di bo amistatnan. Bo a yega na e konklushon pa no hasi ningun bataya. 11,50,04.

SAGITARIO: Ta momentu di laga sa kua ta bo intenshonnan. Tuma e atardi pa traha i nochi pa dibertí. Amor ta un tiki instabil. 28,07,14.

WILLEMSTAD - Sitando rapòrt di Kontrolaria General di Antia (ARNA), Asosiashon di Komersio i Industria VBC ta bisa, ku e no por yega na otro konklushon ku atministrashon, maneho i responsabilisashon finansiero di gobièrnu di Kòrsou, básikamente ta un kos kaótiko.
Esei VBC ta señalá den un komentario den e mas resiente edishon di su órgano informativo Newsletter.
Den e komentario, VBC ta mustra ku dia 29 di mei 2008, Algemene Rekenkamer Nederlandse Antillen, ARNA a ofresé su konklushonnan tokante e kuenta anual 2001 di teritorio insular di Kòrsou na presidente i miembronan di Konseho Insular di Kòrsou.
E rapòrt di ARNA ta mustra ku na promé lugá kompromisonan, gastunan i entradanan di teritorio insular, pa un gran parti no a sosodé konforme presupuesto aprobá di Kòrsou ni tampoko konforme otro stipulashonnan legal.
E rapòrt ta señalá tambe ku maneho finansiero ainda no ta na òrdu.
Responsabilisashon finansiero no ta sosodé di akuerdo ku reglanan preskribí.
E responsabilisashon no ta duna un refleho di e maneho finansiero ku a hiba.
VBC ta bisa ku e konklushonnan di ARNA i su opinion final ta frankamente bisá bergonsoso.
Atministrashon, maneho i responsabilisashon finansiero ta kompletamente bou di nivel.
No ta respetá (òf no ta respetá sufisientemente) reglanan legalmente preskribí. Mas tristu ta, ku for di e rapòrt di ARNA por konkluí ku no ta eksistí interes tampoko pa trese kambio den esaki.

WILLEMSTAD - Yunan di tera ku aktualmente ta radiká na Ulanda, studiantenan ku ta studiando aya tin masha gana di bini bèk nan pais. Si nan por haña e siguridat ku nan por hiba un bida desente aki, nan ta bini bèk.
Esaki a resaltá durante un nochi di informashon ku dos parlamentario, Eunice Eisden di partido MAN i Nelson Navarro di Forsa Kòrsou a tene pa yunan di tera na Almere e siman aki.
E enkuentro a sirbi pa duna informashon na e poblashon antiano na Ulanda ku tabata presente na e enkuentro, asina Eisden a informá. El a bisa ku ta notabel kuantu informashon hendenan di Antia na Ulanda ta karesé di dje.
Esaki sigur ta e kaso riba tereno di struktura estatal, sigur pa loke ta trata e último desaroyonan.
A keda klaramente establesé, ku yunan di tera ta interesá pa bini bèk pa biba aki. Pero, nan ke haña e garantia si pa por hiba un bida normal i desente.
Aki nos ta papiando riba kas, un trabou i otro kondishonnan básiko pa un hende por hiba un bida.
Segun Eunice Eisden, mester yega na un maneho dirigí riba atraé hóbennan i nos hendenan bèk pa nos pais.
Nos ta kere ku esei mester bira punto di lansa den maneho di gobièrnu pa nos yunan di tera aya na Ulanda, asina Eunice Eisden a señalá.
Eisden ta kere ku si tin un bon maneho basá riba e aktual desaroyo ekonómiko, ta posibel pa haña nos yunan di tera bèk.
E mesun pensamentu aki e lider di Forsa Kòrsou Nelson Navarro a ekspresá.

AMSTERDAM / WILLEMSTAD - Polis ta buskando dos hòmber antiano ku algun dia pasá a hasi un intento pa atraká i a pèrsiguí un ulandes di 53 aña di edat, ora esaki tabata yegando su kas.
E hòmber ta biba na Hoptille na Zuidoost Amsterdam.
Den kareda di 2’or di mardugá, e duo a aserká e hòmber. Nan a agredí e hòmber i el a keda ku leshon na su kabes.
Na momentu ku el a lòs for di nan, ela kore bai den direkshon di su kas, pero tabata e momentu ei ku nan a los algun bala riba dje.
Niun di e balanan a alkans’é. E hòmbernan a persiguié te na su kas i aki a surgi un forsageo.
E atrakadónan a hui ku algun propiedat di e víktima.
Polis ta bisa ku e ta sali for di e pensamentu na promé instansia ku a skohe e hòmber aki djis komo un víktima.
E hòmber ku a bira víktima no tin un pasado kriminal. E hòmber tabatin suerte ku e balanan no a alkans’é, segun polis.
E víktima a haña tratamentu pa su heridanan, ku no tabata di gravedat. Polis a informá si, ku e hòmber tabata hopi alterá i tabata hopi emoshoná.
E kaso ta ferfelu segun outoridatnan i p’esei mes nan ta buskando testigu.

WILLEMSTAD - Partido MAN ta kontentu ku Kòrsou a para duru den e deliberashonnan ku Ulanda pa un propio kuerpo polisial. Meskos ku nos ta kritiká ora mustra debilidat, meskos nos ta haña ku gobièrnu meresé un elogio, asina lider dje partido blou Charles Cooper a deklará.
Kòrsou, St. Maarten i Ulanda no por a haña otro e siman aki riba e lei ku mester regla organisashon di kuerponan polisial pa Kòrsou, St. Maarten i e islanan chikitu. Si anteriormente tabatin problema pasobra Ulanda tabata ke un solo kuerpo polisial, finalmente ta papiando riba un kuerpo pa kada isla. Pero Ulanda ta haña ku mester regla sierto kosnan den un kuerpo komun, anto aki e sapatu ta primi.
Kòrsou i St. Maarten ta haña ku loke Ulanda ke regla konhuntamente, ta bai demasiado leu i ta mina e propio kuerpo polisial di e islanan.
Ulanda sinembargo ta di otro opinion.
Ulanda ta haña ku puntonan manera kriminalidat ku ta krusa frontera, asuntu di formashon di polis i tipo di kosnan asin’aki mester kai bou di un entidat konhunto.
Partidonan a negoshá fuerte, asina sekretario di Estado, Ank Bijleveld a atmití, pero no a haña otro. El a mustra ku tur hende mester komprondé ku e islanan mas chikitu (BESS) no por karga un kuerpo asin’aki den su totalidat. Pa nan ta importante, pa regla mas tantu kos posibel sentral. A palabrá ku no ta formulá nada pa aworakí, pero lo sigui papia na ougùstùs awor.
Sekretario di Estado Bijleveld a bisa anteriormente ku ta importante pa realisá ku e asuntu aki mester ta kla pa dia 15 di desèmber benidero.

AMSTERDAM / WILLEMSTAD - Ulanda tin un multi mionario nobo.
E “Jackpot” rèkòrt di 25 mion euro di Staatsloterij na Ulanda ayera a bai pa un habitante di Den Haag. E ganadó a kumpra e number ECO43312, asina Staatsloterij mes a anunsiá ayera.
E ganadó tabatin e suerte ku el a kumpra e lòt kompleto, o sea, ku el a gana e montante gordo gordo pa e so. E montante, por sierto esun di mas grandi di istoria di loteria na Ulanda, mester a sali ayera.
T’asina ku tabatin hopi tempu ku no tabatin ganadó, di manera ku e preis a sigui akumulá. A disidí ayera ku e premio méster sali.
Esaki por sierto a pone ku tur hende tabata loko loko ayera ta buska nan lòt pa kumpra.
En total a bende 6.2 mion na lòt den e pais. E ganadó tin un aña di tempu pa mèldu na ofisina prinsipal di Staatsloterij na Den Haag. E premio ta kaduká despues di un aña.
Un portabos di Staatsloterij a bisa, ku e no ta kere ku ta bai dura muchu, promé ku e ganadó mèldu.
“E kos aki a haña asina tantu publisidat, ku mi no por maginá mi, ku un hende a lubidá ku el a kumpra un lòt,” el a agregá.
I tòg tin kosnan straño ta pasa. Na 2003, Staatsloterij a sali en buska di un ganadó ku a gana e premio di 5 mion. Pa straño ku por parse, e ganadó nunka a presentá, di manera ku e 5 mion a bai bèk den kaha di gobièrnu......

WILLEMSTAD/ DEN HAAG – Outomobilistanan ku regularmente ta haña but pa korementu duru, mester laga sea nan vehíkulo. Esnan ku stür despues ku nan a bebe alkohòl, mester instalá un aparato den kua nan mester supla promé ku nan start e vehíkulo. Si nan a bebe di mas e vehíkulo no ta start.
Esakinan ta algun medida ku e minister Ulandes Camile Eurlings ke tuma pa baha e kantidat di mortonan den tráfiko na Ulanda. Ayera el a manda e Plan Stratégiko pa Seguridat den Tráfiko 2008-2020 pa Tweede Kamer. Eurlings tin e ambishon pa na aña 2020 baha e kantidat di mortonan te ku 500 na lugá di 580. E ta bisa ku esaki ta un ambishon enorme, hustamente pasó Ulanda ta pertenesé na e tòp mundial riba tereno di seguridat den tráfiko. E fundashon pa investigashon sientífiko di seguridat den tráfiko SWOV ta mas ambishoná ku Eurlings: e kantidat di mortonan por baha mas tantu. Dor di traha mas rotònde i prohibí hóbennan pa stür anochi. Sinembargo pa realisá e meta akí ta nesesario pa implementá tur e medidanan menshoná den e plan ku éksito i den nan totalidat. E plan ta trahá dor di entre otro organisashonnan ku interes pa tráfiko, institutonan ku konosementu i esnan ku ta mantené lei. E ministerio di Verkeer en Waterstaat i órganonan desentralisá di gobièrnu ta karga e proyekto. For di e plan por konkluí, ku e ambishon pa alkansá no mas ku 500 morto pa aña ta realisabel.

WILLEMSTAD – Marina Real i Wardakosta di Antia i Aruba a duna minister Maxime Verhagen un rekorido awe mainta. Durante e mainta a informá e minister di e tareanan di Marina Real den área di Karibe. Tambe Verhagen a bishitá e Sentro di Reskate i Koordinashon kaminda ta koordiná tur operashon di Wardakosta. A sera e bishita riba un super-RHIB, ku ta un boto di spit haltu, ku kua sa interseptá entre otro Go Fastnan ku droga i ilegal.

WILLEMSTAD – Ounke turismo a krese spektakularmente den e promé 5 lunanan di 2008, Kòrsou ta konfrontando retonan serio den e di dos mitar di e aña aki. Asina miembronan di gerensia di Ofisina di Turismo di Kòrsou (CTB) a bisa den kompania di diputado di Turismo Eugène Rhuggenaath ku ta presidente di e direktiva. Komo retonan grandi a menshoná oumentu di preis di kombustibel, redukshon di buelo for di Merka i oumento di pasashi na Ulanda (Oropa) ku introdukshon di e “vliegtax”.
Di tur manera te awor aki e sifranan di 2008 ta masha spekutakular.
E sifranan preliminar aki ta indiká ku en total 155.883 turista di estadia a bishitá Kòrsou den e promé 5 lunanan di 2008, un oumento di 40.8% kompará ku e promé 5 lunanan di 2007.
Tráfiko for di Europa a krese ku 10.4% den e periodo menshoná. Mayoria di e kresementu aki ta bini di e merkado ulandes ku a krese ku 10.4%. En total tabatin 48,122 ulandes di bishita na Kòrsou. E merkado aki ta representá 30,9% di e total kantidat di turista ku ta bishitá Kòrsou i algu mas ku 50% di tur e anochinan ku turistanan ta pasa riba nos isla.
Otro merkadonan europeo tambe a krese, manera entre otro for di Bèlgika (5.2%), Alemania (20.5%), i Inglatera (6.4%). Algun merkado ku a desaroyá ménos positivo ta Suesia ( -19%) i Dinamarka (-9.2%). E problema di kupo aéreo tabata un bottleneck ku a frena desaroyo simultáneo di e diferente merkadonan europeo. Subida den un merkado tabata nifiká bahada den otro merkado pa e simpel motibu di falta di sufisiente asiento riba e ruta Amsterdam - Kòrsou. E problemátiko aki lo keda solushoná den e lunanan benidero ku oumento di e kantidat di buelo planeá di Martinair i Arkefly. Dunando Kòrsou mas kapasidat di stul riba e ruta aki.