Despues di vakantie lo cuminsa reuni tur diasabra

ORANJESTAD - Recientement durante un anochi masha ameno na Divi Phoenix, Aruba Lions Club a instala e Directiva di Aruba Leo Club, e parti hubenil di Aruba Lions Club.
Promer cu e instalacion, e Presidente saliente di Leo Club, Leo Jaydee Ann Kelly, a repasa nan acitividadnan, cual a consisti di nan projecto di Sinterklaas, na unda cu e hobennan a bisti na Zwarte Piet pa bai bishita kasnan di muchanan di menos recurso pa hiba un momento di alegria y hiba tanto regalo como kosnan dushi.
Tambe nan a asisti Aruba Lions durante tur nan actividadnan di Celebracion cu Comunidad, bendemento di rifa di kas y Aruba Leo a tene un projecto pa recauda fondo, cual tabata un carwash combina cu bendemento di cuminda.
Durante e aña 2007-2008, Aruba Leo Club a tene reunion den edificio di Aruba Lions Club tur diasabra, di cual algun di nan tabata sessionnan informativo y educativo na encargo di miembronan di Lions; Sr. Marinus Wegereef a duna un session di Etiquette y Protocol, Famia Planea a duna un session tocante Sexualidad y Fundacion SAMBA a duna un session tocante droga y otro tiponan di adiccion.
Lion Edwin Tromp cu tabata e Leo Advisor pa parti di Aruba Lions Club a gradici e direktiva saliente y a menciona su satisfaccion di waak e progreso cu a tuma lugar durante e periodo cu a termina y ta desea Lion Kenneth Luidens cu lo bira e Leo Advisor pa 2008-2009 hopi exito pa hunto cu e Directiva 2008-2009 lo continua cu e trabou pa sigi cu e desaroyo pa asina cumpli cu e meta di LEO Club cu ta para pa Liderazgo, Experiencia y Oportunidad cu ta ser brinda na cada miembro.

ORANJESTAD– Ta conoci cu varios school na momento di entrega di diploma ta invita e gobernante encarga cu enseñansa pa presencia entrega di dicho diploma. Tin ora esaki ta bay tambe pa e otro ministronan. Na mas cu un ocasion e aña aki a pasa cu directiva di school ta permiti un di e personanan cu a gradua hiba un discurso.
Ultimo aki na ocasion di entrega di diploma di IPA, den presencia di esnan cu ta guia e preparacionnan aki, un tipo cu a bira maestro a dicidi cu e ta ataca tanto e Ministro di Enseñanza como e Ministro Presidente, bao pretexto cu e lo a ser kita for di trabao y ta pesey el a bay IPA. E kier culpa gobierno di algo cu no ta berdad, asina den su comunicado di prensa partido MEP ta bisa.
Na promer lugar e chuba ey tabata traha pa SKOA, esta e directiva di schoolnan, unda e no ta ser reconoci den e vak di arte, esta C.K.V. Ta nos gobierno a duna reconocimento na esaki. Cualkier hende sa cu SKOA ta un fundacion independiente y no ta di gobierno. Con e directiva di IPA por contribui pa un mucha cu a bira maestro por bay asina leu na un ocasion bunita asina pa ataca gobernantenan ta pasobra nan ta mescos of ta kere cu ainda nan ta den huelga pa placa y mas placa.
Mescos tabata tin tur falta di respet na entrega di diploma di Avond-Havo, ya cu un supuesto ‘educador’ frustra, un tal Chen ta yama como promer graduado dilanti Ministro Presidente sr. Nelson Oduber como sifuera cu e ta masha gracioso y chistoso y keriendo cu sr. Oduber ta su pareu.
Con ta permiti elementonan asina para dilanti klas ta pasobra e control ariba e calidad, capacidad di e educador ta laga hopi di desea. E cosnan aki ta muestra di un decadencia total di e grupo di educadornan aki cu envez di educa positivamente nos yiunan, ta practica tur dia politica partidista pa AVP na school.

 

ORANJESTAD – Recientemente miembronan di ABA tawatin un lunch meeting pa asina gradici tur esnan cu a contribui na e organisacion aki.
E presidente nobo, esta Sra. Edna Farro, a gradici Javier Wolter, kende tawatin e puesto di presidente di ABA anteriormente, pa su bon trabao y tambe Magriet Geerman y Alvin Quandus pa nan asistencia na e bestuur di ABA.
Di e manera aki tambe a tuma despedida di Sr. Bill Carson como miembro di ABA y a gradicie pa su tur su contribucion durante e aña nan cu e a traha na Aruba.
Miembronan di ABA ta desea Bill Carson tu clase di exito cu su retiro

ORANJESTAD- Den e weekend cu a pasa, a tuma lugar e tercer torneo di ajedrez “Leonardo Carter Memorial”.
E aña aki e torneo a wordo upgraded pa un weekend toernooi. Aña pasa ainda e tawata ta un “one-day-tournament” cu tempo limita.
E aña aki, e torneo a bira un torneo serio cu ta conta pa rating y pa punto di FAA.
E torneo aki ta wordo gesponsord door di famia di Leonardo Carter.
E torneo a wordo hunga den dos grupo. Un grupo habri, unda tur persona por inscribi un youth group pa muchanan bow di 17 anja.
Den e youth group, a participa un total di 14 mucha. Despues di 5 rond, tawata tin un empate na promer lugar entre Claudia Carrero y Zaily Arbona. Ambos a score 4 punto for di 5 partido. Claudia a gana mas wega contra hungadornan cu a score hopi punto y a keda na promer lugar y Zaily na segundo lugar.
Na tercer lugar tambe tawata tin un empate entre e dos rumannan Guido Dania y Luigi Dania. Guido a score mihor contra hungadornan cu a score hopi punto y a keda na tercer lugar.
Den e open group, un total di 16 persona a participa. Akinan e veterano Concepcion Cortez a pasa raspa tur hende. E la score 5 punto for di 5 partido.
Un score di 100%.
Na di 2 y 3 lugar tawata tin un empate entre Juste Lopez, Osh Lopez y Ormond Jowett. Nan tur tres a score 3 ½ punto for di 5 partido.
Juste Lopez a bay cu e segundo lugar a base di su punto di resistencia (esaki ta e total di punto cu su contrincantenan a score), Osh Lopez a keda na tercer lugar.
Esaki ta e di dos aña consecutivo cu Concepcion Cortez a gana e torneo aki. Si Concepcion particpa y gana e torneo otro anja, e lo bay cu e copa rotativa definitivamente.

Segun Gobierno di MEP

ORANJESTAD- Cu hopi alegria y satisfaccion partido MEP a tuma nota di e bishita cu e delegacion Chines Hui Ying Group a haci siman pasa serca Minister President sr. Nelson Oduber. E grupo aki ta e prome grupo di companianan Chines cu a bin registra den Aruba su Free Zone pa distribucion di nan productonan pa e region di Latino America y Caribe.
Sin duda algun cu esaki ta resultado di e prome bishita dos aña pasa di e delegacion Arubano pa China y cual delegacion tabata encabeza pa Ministro Presidente sr. Nelson Oduber. Aki claramente nos ta bolbe mira cu nos lider di partido y alavez Ministro Presidente ta traha cu vision y determinacion pa trece un diversificacion den e economia Arubano.
No mester lubida con den pasado sr. Oduber a percura pa exitonan grandi manera entre otro e logro di Status Aparte, introduccion di Himno y Bandera, reapertura di e refineria, schrapmento di e fecha di Independencia, independisacion di companianan estatal manera APA N.V., WEB N.V., Setar N.V., Arubus N.V., compra di Elmar N.V., solucion di e problema di garantianan y recientemente e firmamento di extension di US Customs and Pre clearance.
Awe nos pais ta para dilanti otro reto grandi pa loke ta diversificacion di nos economia y esaki na momento cu Aruba ta formando un aliansa strategico cu e pais gigante China. Hecho ta cu Aruba actualmente ta e pais den e region cu e mihor relacion cu e Gobierno di China.
Sinembargo partido MEP ta lamenta si cu den pasado cierto persona y politiconan den comunidad a ataca den forma baho y vil e viahe di Minister President Oduber pa China. Aki nos ta referi entre otro na e Presidente di Camara di Comercio, sr. Edwin Roos cu a declara cu Aruba no tin nada di busca serca China, ya cu China ta haciendo negoshi cu Panama caba y tambe e lider di partido RED, sr. Rudy Lampe – kende constantemente kier pa pais Aruba biba riba stif - cu a cuestiona cu cierto suma a wordo paga na un compania cu ta lobby pa Aruba serca e gobierno di China. Y pa no papia mes di e partido AVP cu desde November 2001 ta contra tur tur proyecto den e pais aki y naturalmente no kier tin nada di haber cu China.

Si nos no ta pagando kaba p’e, nos lo bai paga sigur sigur den futuro serka òf mas leu pa e profundo falta di union ku yunan di Kòrsou real tin.
Un falta profundo di union ku bo ta nota hopi kaminda i ku te na ora hasi manera ku e t’ei, tòg ta lanta ken ku ta fuerte asina pa mustra ku no tin union i dikon no mester tin.
Ta bèrdat, tin gruponan den komunidat ku ta realmente uní basá riba nan interesnan personal. Pero mayoria hende ta aparentá di no tin e noshon pakiko no mester bringa otro i pakiko mester ta un, pa yuda nos komunidat i di mes e ora ei tur hende den nos komunidat.

E falta di union ta bai kompañá tambe ku un falta di rèspèt pa nos mes. Komo ku hopi hende no ta sinti ku nan ta parti di loke ta nesesario pa e otro e no ta mira tampoko pakiko e tin di duna rèspèt na e otro yu di Kòrsou.
Esaki atrobe ta pone ku hopi yu di Kòrsou ku korektamente a yega na posishonnan klave mester atendé ku yunan di Kòrsou ku pa kolmo supkonsientemente ta sali pa stroba e otro yu di Kòrsou ku a hasi esfuerso pa yega kaminda e ta; ta keda sin dun’é e sosten ku e mester i ta hasi tur esfuerso pa demostr’é ku no tin intenshon tampoko pa dun’é rèspèt; ni sikiera e rèspèt normal ku nos tur mester tin pa otro, sin ta importá ken e hende ta.

Mi ta spera ku bo ta trata na bisa ku mi no tin rason. I ku bo por komprobámi esei. Pasobra esei lo ta bon. Pero e ehèmpelnan tantísimo di kon nos mes ta ku nos mes, ta asina muchu ku nos mester bai traha riba e konsientisashon di nos hendenan riba e pakiko ku nos mester hasi kos huntu. Prepará huntu pa e kambionan benidero impaktante den nos struktura estatal. Kana huntu pa plania kon nos lo por saka mihó benefisio pa nos kada un den e pais nobo. Aseptá huntu, ku nos mester para uní kontra di tur otro ku ta kontra di nos chènsnan bon pendiente. I riska huntu, pa nos tuma mihó desishonnan posibel, awor aki i pa mas despues.

AURILLAC, Fransia – Bosero dje ekipo Liquigas di siklismo a bisa ku e spañó Manuel Beltran lo no kontinuá den e Tour di Fransia despues di a tèst positivo pa EPO den un prueba di doping.
Paolo Barbieri a bisa ku sobrá dje tim lo kontinuá.
“Ki dia e idiotnan aki ta siña ku e kosnan aki a kaba?” Nan ta sigui pensa ku nan por pasa den e sistema, pero nan ta kiboká. E sistema ta detektá nan tur ora”, Pat McQuaid, lider di Union Siklista Internashonal, a bisa.
Beltran, un siklista spañó di 37 aña, kende a kompetí huntu ku Lance Armstrong durante tres aña komo parti di e tim U.S. Postal, a keda arestá pa polis franses dos ora despues ku el a tèst positivo.
E atleta por pidi pa hasi un di dos tèst anti doping, ounke esaki masha poko bia sa salba e deportistanan. Si Beltran pidi pa habri e prueba “B” i e tambe sali positivo, lo e ser koré di e tim mesora, Barbieri a bisa djabièrnè.
Beltran tabata opheto di un investigashon di Agensia Franses Anti doping promé ku e Tour di Fransia kuminsá i despues di ku su eksamennan di sanger na kua el a keda someté entre 3 i 4 di yüli a duna “indikashonnan a normal”, e direktor dje organismo, Pierre Brodry, a señalá na AP.
Beltran a ser poné na altura i e tin derechi pa pidi pa hasi un di dos tèst, Bordry a indiká.
“No solamente tin rastronan di EPO, tin EPO”, Bordry a bisa na telefòn. “Sea ku ta e hopi o tiki, EPO ta prohibí”.

BAGNERES-DE-BIGORRE, Fransia – Riccardo Ricco djadumingu a gana e di nuebe etapa di e Tour di Fransia, miéntras ku Kim Kirchen di Luxemburgo a keda ku e kamisa hel di lider.
E italiano a optené su di dos triunfo den un fase di e kareda e aña aki, ora el a yega mas di un minüt dilanti e grupo, den kua tabatin Kirchen di e Team Columbia.
Ricco, di 24 aña i miembro di e ekipo Saunier Duval, a bai laga e otro siklistanan den e subida final ora a keda komo 30 km pa final ku a kubri 224 km di Toulouse pa Bagneres-de-Bigorre.
“E tabata kompletamente improvisá”, Ricco a bisa. M’a sigui te na e meta di bèrdat mi tabata rápido awe”.
Ricco a gana tambe e di seis etapa djaweps den e kordiyera di Massif Central, ménos haltu ku Pirineos, loke ta demostrá su bon aktuashon den serunan.
“Laga nos bisa ku esaki realmente ta mi tereno, mi dominio”, e italiano a trese dilanti. El a kaba ku un minüt i 4 sekònde riba e ruso Vladimir Efimkin, kende a drenta di dos. E franses Cyril Dessel di e tim AG2R a drenta di tres na 1:17 di e ganadó.

HAMILTON, Bermuda, - E orkan Bertha a debilitá ayera i a bira tormenta tropikal ménos menasante despues di a keda un dia pegá ku islanan di Bermuda, Sentro Nashonal di Orkan di Merka (CNH, abreviashon na ingles) a bisa.
E bientunan di loke tabata e promé orkan di temporada den Atlántiko a baha bira 100 kilometer pa ora e Sentro di Orkan a indiká, segun Reuters.
Un tormenta tropikal mester superá 119 kilometer pa ora pa keda klasifiká komo orkan.
Pa awe ta spera un kambio leve den Bertha su fòrsa.
E tormenta lentamente ta sigui avansá den direkshon nortwèst i meteorólogonan a presisá ku su sentro lo pasa mas pegá ku Bermuda di loke a indiká anteriormente.
Bertha, ku na un punto tabata un orkan “mayó” di kategoria 3 riba eskala Saffir-Simpson di sinku nivel, manera orkan Katrina ora el a mishi ku tera na New Orleans na 2005, a debilitá pa su falta di movementu.
Tormenta tropikal Elida
Na Mexico, e tormenta tropikal Elida, e di sinku di temporada di Pasífiko, por fortalesé i ta menasá provoká áwaserunan na estadonan di sùit i wèst di Mexico.
Elida, ku a keda formá djasabra último i por bira orkan awe, lo no impaktá kostanan di Mexico, pero Servisio Meteorológiko Nashonal a alertá riba áwaserunan fuerte i tambe olanan intenso elevá na estadonan mèksikano di Oaxaca, Guerrero i Michoacán.

ARIES: No ser tan rabiá ante problemanan ku lamentablemente no por wòrdu solushoná. Buska diferente alternativa ya ku tur tin solushon. 36,16,50.

TAURO: Muchu aktividat den bo kas i algun yalusí i kompetensianan entre yu, rumannan o tata por tin tenshon. Amor ta intenso pa solteronan. 01,19,26.

GEMINIS: Bo palabra ta risibí bendishon. Ta e mihó momentu pa komuniká ku bo amor, si ainda bo no tin pareha, lo bo ta rondoná. 50,03,12.

KANSER: Pone bo bida sentimental na òrdu. Tin dos persona importante den bo bida ku ta stimabu. Bo ta bai haña loke bo ta deseá. Tene pasenshi. 08,44,06.

LEO: E lugá unda mihó bo ta sintibu lo ta den bo kas, unda bo por ta trankil i na gustu. Pone atenshon na tur kos, tantu den dekorashon komo na kuminda. 17,04,32.

VIRGO: Bo ta komplasé i entretené na tur loke bo ta stima. Tur loke bo hasi awor ta pa yuda, di duna bo amor i di kompartí. 07,34,22.

LIBRA: Bo ta preokupá pa bo situashon ekonómiko pa lokual bo ta tuma medidanan. Un evento inesperá bo ta logra riba presupuesto i bo por hala rosea nobo. 50,06,11.

SKORPION: No bandoná esun ku semper tabata huntu ku bo. Evitá di ser boluntario i tèrko. Bo trabou, ounke importante, no por duna loke mas bo mester. 11,28,43.

SAGITARIO: Bo ta den hopi bon estado di ánimo i bo ta mas den dibertí. Probechá tur kos ku bo hasi, ya ku bo ta e alma di fiesta. 01,45,08.

WILLEMSTAD – “Gobièrnu di Kòrsou a supsidiá e kompania ABC (atrobe) pasobra ta trata aki di un kompania netamente di gobièrnu. Lo ta bon pa STU buska e informashon korekto, promé ku nan kritiká”, asina diputado Anthony Godett, diputado responsabel pa ABC a bisa.
Den nos edishon di djasabra último, e bosero di Sindikato di Transporte Uni STU Andres Everitz a lansa krítika fuerte riba e desishon di Bestuurscollege aki.
STU ta bisa di a tuma nota di e informe ku gobièrnu di Kòrsou ta bai inyektá 5 mion florin den e kompania di konvoi Autobusbedrijf Curaçao, ABC.
“Manera nos ta mira e asuntu aki, ta komo si fuera gobièrnu konsientemente ke eliminá eksistensia di bùsnan chikitu”, asina bosero di e sindikato a bisa.
Gobièrnu di Kòrsou a pone 5 mion florin disponibel pa e kompania Autobusbedrijf Curaçao (ABC), pa di un banda atendé ku e situashon finansiero difísil di e empresa, pero di otro banda pa renobá su flota.
Ku e 5 mion florin aki nos ta bai mira un kambio den e flota dje kompania, diputado Godett bisa. Ta papiando den promé instansia di un total di 13 bus kompletamente nobo, algun di nan grandi, algun mediano.
Everitz a bisa, ku no tin sèn pa bùs chikí, pero tin sèn pa kompania di konvoi si.
Diputado Anthony Godett a refutá ku ta asuntu di privilegiá un riba e otro. Nos mester hasi distinshon, pasobra aki ta trata di un kompania di gobièrnu.

WILLEMSTAD – “Ulanda a bai di akuerdo pa sanea debe di tantu Boneiru, Saba komo Statia te ku fin di aña pasá. Esaki indudablemente ta bon notisia pa e islanan”, asina sekretario di Estado enkargá ku Asuntu Estatal Hubert Martis a deklará.
Manera ta ampliamente konosí, Ulanda a palabrá ku e islanan di Antia den e Slotverklaring ku partidonan a firma, ku Ulanda lo kubri un parti supstansial di debe di Antia te ku desèmber 2005. Esei ta konta pa Kòrsou, St. Maarten pero tambe e islanan chikitu.
Esei mes ta motibu di sierto preokupashon, pasobra niun hende sa kiko ta bai pasa ku e parti di debe for di desèmber 2005 te ku awor.
Anto mas tantu dura pa e status nobo drenta na vigor, mas haltu e parti aki di debe ta bira.
Sekretario di Estado Hubert Martis a anunsiá e siman aki sinembargo ku Ulanda a bai di akuerdo pa kubri e debe di en todo kaso e islanan mas chikitu te ku desèmber 2007.
Esaki ta un bon desaroyo, pasobra e ta nifiká ku e fondo ku bin liber, awor ku no mester paga interes i paga e debe mes bèk, lo por ser destiná pa otro kos produktivo, manera enseñansa, salú públiko i ekonomia.
Esaki por sierto ta mesun speransa ku Kòrsou tambe ta karga, unabes e proseso di saneamentu kuminsá. Tantu promé minister di Antia komo diputado di Finansa di Kòrsou a bisa ku saneamentu lo trese e rosea nesesario pa asina desaroyo di Kòrsou berdaderamente por kuminsá.
E pregunta ta keda sinembargo, kiko ta bai sosodé ku e debe for di desèmber 2005 te na momentu ku Kòrsou (i St. Maarten) haña e status di pais outónomo den Reino. Te ku kuminsamentu di e aña aki, tabata papia ainda di desèmber 2008, loke lo a nifiká “solamente” tres aña di debe akumulá. Awor ku ta papiando di 2011, asta posiblemente 2012, e montante aki lo bira muchu mas grandi.

WILLEMSTAD – “Nos no ta na fabor di un kuerpo polisial elitario riba esun di nos pais. Nos a bisa esei tur tempu”, asina presidente di e sindikato di polis NAPB Elvis Mercelina a duna di konosé, komo reakshon riba e kombersashon siman pasá pa yega na un lei di konsenso pa regla funshonamentu di kuerpo polisial riba e entidatnan nobo, unabes desmantel160 Antia.
Kòrsou, St. Maarten i Ulanda no por a haña otro riba e lei ku mester regla organisashon di kuerponan polisial pa Kòrsou, St. Maarten i e islanan chikitu. Si anteriormente tabatin problema, pasobra Ulanda tabata ke un solo kuerpo polisial, finalmente ta papiando riba un solo kuerpo pa kada isla. Pero Ulanda ta haña ku mester regla sierto kosnan den un kuerpo komun, anto Kòrsou i St. Maarten tin opheshon kontra esaki.
Siman pasá sekretario di Estado Ank Bijleveld a reuní den edifisio di WTC ku delegashon di Kòrsou, di St. Maarten i di Gobièrnu Sentral.
E deliberashonnan a dura largu, pero partidonan no a haña otro.
Kòrsou i St. Maarten ta haña, ku loke Ulanda ke regla konhuntamente, ta bai demasiado leu i ta mina e propio kuerpo polisial di e islanan.
Ulanda sinembargo ta di otro opinion.
Ulanda ta haña, ku puntonan manera kriminalidat ku ta krusa frontera i tipo di kosnan asin’aki mester kai bou di un entidat konhunto.
“Partidonan a negoshá fuerte”, asina sekretario di Estado Ank Bijleveld a atmití, “pero no a haña otro”. El a mustra ku tur hende mester komprondé ku e islanan mas chikitu (BESS) no por karga un kuerpo asin’aki den su totalidat. Pa nan ta importante, pa regla mas tantu kos posibel sentral. A palabrá ku no ta formulá nada pa awor aki, pero lo sigui papia na ougùstùs awor.

WILLEMSTAD - Kas Real na Ulanda e aña aki ta kosta estado ulandes e montante di 114 mion euro. Esaki, di akuerdo ku profesor Herman Mathijs di Vrije Universiteit di Brussel.
El a hasi un investigashon di gastunan di tur kas real na Oropa.
Di akuerdo ku e investigashon aki, Ulanda ta e kas real di mas karu di henter kontinente di Oropa, eksepto kas real di Gran Bretaña.
Mester bisa di otro banda, ku e gastunan di kas real na Gran Bretaña no ta kompletamente kla pa tur hende.
E revelashon di Mathijs ta notabel, pasobra promé minister di Ulanda Jan Peter Balkenende te ku resientemente no por a bisa kuantu kas real ta kosta e pagadó di belasting ulandes.
Manera ta konosí, último tempu tabatin bosnan lantando pa trese klaridat den e asuntu aki. No por t’asina ku ta Ulanda ta finansiá kas real, anto no ta konosí kiko e ta kostando estado, segun vários gremio na Ulanda.
E asuntu a yega te den Tweede Kamer ku tambe a reakshoná iritá i a pidi pa haña klaridat riba e asuntu aki.

NICE, Fransia, - E aktris merikano Angelina Jolie djasabra último a duna lus na su yunan ohochi, un mucha hòmber i un mucha muhé, na Lenvan Hospital, na siudat di Nice, sùit di Fransia.
E beibinan kendenan a nase via sesareo ta den estado di salú perfekto, tambe nan mama famoso, asina dòkter Michel Sussmann a destaká na korant lokal Nice-Matin.
E tata, aktor Brad Pitt, di 44 aña, kende tabata na nasementu di su yunan, tabata perfektamente trankil i Jolie solamente a haña anestesia lokal i e tabata konsiente den e operashon.
“Brad tabata hopi kontentu i e emoshon tabata hopi fuerte p’e”, e dòkter a bisa.
E dòkter a añadí ku Angelina tabata papia i tabata hari ku su esposo i nan tabata hopi felis.
E beibinan yama Vivienne Marcheline i Knox Leon, i nan ta pisa respektivamente 2 kilo 280 gram i 2 kilo i 270 gram.
Nan balor mediátiko ya a alkansá 11 mion dollar, e suma ku un revista merikano a paga pa kumpra eksklusividat di e promé pòtrètnan di e beibinan resien nasí mas famoso di mundu.
E suma aki lo keda entregá na un asosashon karitativo.
Dòkter Sussmann a indiká ku a adelantá e sesareo pa “motibunan médiko”, pa asina e yunan por nase “den e mihó kondishonnan”.
Jolie lo bai keda interná pa algun dia mas.
E dòkter a splika ku e di dos nòmber di e yu muhé a keda skohé na honor di mama di Jolie, e aktris Marcheline Bertrand, kende a muri di kanser na yanüari 2007 despues di ocho aña di lucha kontra e malesa aki.

WILLEMSTAD/ DEN HAAG – E proposishon pa introdusí un ‘slòt pa alkohòl’ pa outo, a haña bon akohida serka koleganan ulandes di minister Camil Eurlings. Meta di e slòt pa alkohòl ta pa atendé na un manera severo ku uso di alkohòl den tráfiko.
E slòt ta un aparato den kua e shofùr tin ku supla promé ku e start su vehíkulo. Si den su rosea tin mas ku 0.2 promilahe di alkohòl e vehíkulo no ta start. Durante ku e ta koriendo e tin ku supla algun biaha pa asina evitá ku e vehíkulo ta paga. Esaki ta pa esun ku a bebe no laga un otro hende start su outo pe. Tur aña tin alrededor di 200 persona ku ta muri a konsekuensia di uso di alkohòl den tráfiko. Ku introdukshon di e programa di slòt pa alkohòl, Eurlings ke engrandesé seguridat den tráfiko. Ta trata di un pakete di medida kaminda ta dependé di e seriedat di e infrakshon di alkohòl ku e outomobilista kometé i e eksperensia di manehá di e outomobilista. E slòt ta un sanshon pa e outomobilista ku a yega di kometé infrakshonnan di alkohòl grave, kaminda a midi mas ku 1.3 promilahe di alkohòl den su rosea. Outomobilistanan ku a kaba di haña nan reibeweis ta haña e slòt asina nan pasa 1.0 promilahe. Pa residivistanan ta konta un promilahe di 0.8.
Na paisnan manera Merka, Suisa i Canada e slòt pa alkohòl ta den uso kaba. For di diferente estudio a sali na kla, ku e slòt ta un bon método pa seguridat den tráfiko. Ku e slòt ta evitá ku esnan ku a kibra ku lei ta bolbe kai den ripitishon. Un di e medidanan ku ta forma parti di e pakete ta e kurso ‘ema’. Esaki ta un kurso di komportashon dirigí riba alkohòl i partisipashon den tráfiko. E meta di e kurso ta pa siña e kursistanan pa hasi un diferensia entre uso di alkohòl i korementu di outo. E kurso ta pa evitá ripitishon di uso di alkohòl den tráfiko. Konsekuensia di e proposishon di lei ta, ku outomobilistanan ku eksperensia ta un ‘ema’ for di un infrakshon ku un promilahe di alkohòl ta abou. Pa outomobilistanan ku kometé un infrakshon di alkohòl kaminda e promilahe ta hopi abou tin un ‘lema’ (lichte ema). Pa outomobilistanan ku a kaba di haña nan reibeweis ya e ‘lema’ ta desaroyá i ta drenta na vigor dia promé di òktober próksimo. Tur e gastunan envolví ta pa esun ku kometé e infrakshon.

WILLEMSTAD – Ketu bai outomobilistanan no ta kumpli ku bistimentu di faha di seguridat. Durante kòntròlnan di tráfiko dianan 7 i 8 di yüli último, polis a parti un kantidat di 82 prosèsverbal. Un total di 38 tabata pa outomobilistanan ku no tabatin nan faha di seguridat bistí.
E kòntròlnan tabata na enkargo di e polisnan di RASPA i nan a tuma lugá na diferente parti di Kòrsou. Banda di e prosèsverbalnan pa faha di seguridat, e polisnan a parti prosèsverbal pa korementu sin reibeweis (12), outo sin seguro (5), outo sin karchi di kùr (5), papiamentu na selular sin handsfreeset (9), stashonamentu di outo na sitionan prohibí (6) i pa diferente otro infrakshon (7). Durante e kòntròlnan a detené un persona estranhero ku no tabatin su dokumentonan di estadia huntu kuné.

WILLEMSTAD / DEN HAAG – Polis na Ulanda no ta kontrolá sufisiente, doñonan di un pèrmit ku tin un arma di kandela legal. Segun reglanan, polis mester kontrolá tur hende ku tin un pèrmit kada aña. E investigashon a proba ku polis no ta bishitá e personanan akí.
For di e investigashon a sali na kla ku e kuerpo di Utrecht ta esun ku a skor mas malu. Den e region di e siudat ta solamente 10 % di e doñonan di un pèrmit pa arma a haña un bishita di kòntròl. Den diferente otro kuerpo polis a kontrolá 25% di e pèrmitnan. Den niun kaso no a alkansá 50%. E kuerponan di Groningen i Flevoland so a indiká ku nan ta bai kontrolá tur hende ku tin un pèrmit pa karga un arma di kandela. E investigashon a tuma lugá bou di tur e 25 kuerponan di polis na Ulanda. Dos di e kuerponan no a reakshoná.

WILLEMSTAD – Frakshon di Niun Paso Atras (NPA) den Konseho Insular a pidi diputado di salubridat públiko Humphrey Davelaar, pa intervení den e situashon na CEMS. Ademas e partido ta kere ku mester tin un audit na e fundashon. Kiko nos ta warda? Pa CEMS bira un otro ALM/DCA?”, asina miembro di Konseho Insular Aldebert Rooijer a puntra.
Rooijer a bisa ku tin un kos ta pasando den CEMS ku no ta zùiver ni transparente.
“Na aprel 2000 servisio di ambulans a wòrdu privatisá i a bira CEMS. E intenshon tabata pa tene gobièrnu riba distansia i pa ta ménos dependiente posibel di gobièrnu. Esaki no solamente a trese ku n’e un subida enorme di preisnan pa servisio di ambulans, pero tambe un situashon ku Gobièrnu no por ehekutá ningun maneho den CEMS pasobra ta direktiva, a base di statutonan, ta disidí den CEMS. Na sèptèmber 2007 CEMS a selebrá en grande inougurashon di su edifisio super luhoso na Emmastad ku kasi sigur lo a kosta miónes di florin. No mas ku 6 luna despues CEMS a kuminsá keha ku no tin sèn pa paga trahadónan i a pidi intervenshon finansiero di Gobièrnu. Resientemente Giro ta menasando di pone beslag riba CEMS pa pagonan ku ta atrasá. Pa frakshon di NPA, esaki ta inaseptabel. A pidi un reunion di komishon sentral ku Bestuurscollege pa wak ta kiko ta e problemanan di CEMS i pa wak ta kon ta atendiendo nan. Pero e reunion a wòrdu posponé no mas ku na dos okashon. Despues ku e reunion a kontinuá despues di kasi tres luna ku a pidié i a hasi pregunta riba e tópiko, Bestuurscollege a keda di kontestá nan, pero te awe Konseho Insular no a tende nada di Bestuurscollege. Entre tantu Giro su deurwaarder ta kla pa pone beslag, anto direktornan di CEMS ta kore den nan SUVnan karu ta gasta gasolin òf den outo di trabou bai bin, ta sinta den èrko den un edifisio super luhoso na Emmastad, ku kasi sigur ta ku plaka ku mester a paga trahadónan a laga trahe, poniendo ku awor e trahadónan ta pasa malu anochi, pasobra nan no sa ku su siguiente mainta nan lo kobra pa nan trabou. Manera semper, ta e pober trahadó tin ku sufri pa problemanan finansiero ku un kompania ta pasa aden. Ta ki dia nan bùrt di pasa bon i di tin siguridat di trabou i di pago tambe ta yega? Anto ta Gobièrnu tin ku bin ku sèn riba mesa, sin ku e tin algu di bisa den e instituto”, asina Rooijer ta bisa.

WILLEMSTAD – “Nos mester soña mas, tribi mas i hasi mas”. Asina sekretario di Estado Alex Rosaria a bisa relashoná ku desaroyonan den sektor di servisio finansiero. Riba Invitashon di Curaçao International Financial Services (CIFA), Rosaria, lo hiba palabra durante e kongreso di Asosashon Mundial di Fiskalia Internashonal na Bruselas ku ta tuma lugá di 31 di ougùstùs pa 5 di sèptèmber próksimo. Durante e kongreso aki, CIFA ta organisá un seminario, den kua ta bai duna informashon tokante di e sektor finansiero internashonal di Kòrsou. Na e okashon aki Rosaria lo papia di e maneho ku Gobièrnu a bin ta hiba pa trese nos pais bèk den e top-10 sentronan finansiero internashonal di mundu.
“Mi ta hopi kontentu ku lokual nos a logra kaba, pero importante ta pa nos realisá ku nos no por ta komplasiente, esta satisfecho ku lokual nos tin,” e mandatario a atvertí.
Rosaria ta kere, ku kos bon mester bira mihó i ku tin espasio pa hasi mihó uso di lokual nos tin kaba, prinsipalmente pa loke ta trata e tratadonan fiskal ku nos pais a firma. Hecho ta, ku Antia Ulandes tin tratadonan firmá aktualmente, for di kua nos no ta probechando di tur e oportunidatnan ku esakinan ta presentá.
“Mi ta kere, ku den tur aspekto, pues tambe e sektor finansiero internashonal, den e pais aki nos mester soña mas, tribi mas i prinsipalmente hasi mas. Tantu Gobièrnu komo sektor privá mester ta muchu mas alerta pa mehorá nos produkto i servisio finansiero. E rason pa esaki ta fásil. Nos ta den un sektor kaminda e kompetensia ta feros, kaminda nos kompetidornan tur dia ta move pa nan saka bentaha riba bo. Pues nos no mester tin miedu pa pensa i hasi kosnan diferente di lokual semper nos a pensa i hasi. Si nos ke yega i keda den e mihónan di mundu nos mester tin kurashi i traha duru,” sr. Rosaria a bisa finalmente. Mas mihó e sektor finansiero internashonal drei, mas kupo di trabou esaki lo krea pa nos hendenan, mas plaka di belasting ta drenta i prinsipalmente, mas hende tin plaka den nan saku pa nan gasta na kosnan ku ta importante pa nan, asina Rosaria a bisa.