ORANJESTAD - Dia 11 juli 2008 Eldrid Angela mihor conosi como “Dichi” a cumpli 30 aña den servicio di Post Aruba NV. Esaki a wordo celebra den compania di e director, Sr. Kees van Nederkassel, demas miembronan di gerencia y su coleganan di Post Aruba.
Sr. Eldrid Angela a drenta servicio di Land Aruba como postknecht 11 juli 1978. Semper Eldrid a keda traha den e departamento di bestelling na Directie Posterijen. Eldrid a cuminsa traha como postknecht y a pasa den tur function cu e departamento di bestelling conose. Desde 1 augustus 2006 Eldrid a tuma e desicion pa bai traha den servicio di Post Aruba NV y entrega su status di ambtenaar.
Actualmenente Eldrid Angela ta ocupando e puesto di Senior Groepsleider di e departamento di postpakket.
Sr. Angela ta un persona serio, deportivo y dedica na su trabou. Den nomber di Post Aruba NV. Nos ta felicita di curazon señor Eldrid Angela pa e 30 aña nan. Nos tambe kier felicita su famia cu e hubileo aki.

ORANJESTAD- E aña aki un bez mas, Arugaldo ta organisa riba un solo anochi, e grandioso festival di canto “Voznan Uni di Banco & Seguro 2008. Aña pasa e tabata un exito total y e aña aki e ta priminti di bira mas grandi y interesante.
Aña pasa a participa 16 cantante cual ganador absoluto den categoria B a keda den persona di Norrene Dabian di Boogaard Assurantie y ganador absoluto den categoria A, a keda den persona di Ari Kooiman di Boogaard Asssurantie y compania cu a sali Compania Ganador den apoyo y ambiente, tambe a bai pa Boogaard Assurantie.
E aña’ki tin un total di 20 participante ya caba inscribi y por bisa caba cu e competencia ta hopi mas fuerte e aña’ki. Fecha di e festival lo ta dia 06 September 2008 y e lugar di e evento ta keda pendiente ainda.
Lo tin categoria A y B. Categoria A ta pa cantante nan cu experencia den canto y categoria B ta pa e cantante no experencia y cu gana di subi esenario pa canta y pasa bon.
Tur e participantenan lo wordo acompaña dor di e conocido musico Danny Koolman y e banda di momento C-U Band (ex Eyes Band) y despues di e festival lo bai tin un grandioso fiesta bailable cu C-U Band te cu 3or di marduga.
Si tin cantante cu ainda no a inscribi y kier participa den e festival, por yama cell: 9642049 of manda un e-mail na arugaldo@hotmail.com ya cu inscripcion lo sera diabierna 18 juli 2008.
Compania nan cu ya a confirma nan participacion ta: Sagicor, Boogaard Assurantie, Nagico, Seguros Geerman, Alico, RP Collections, SVB, AZV, CMB, Banco di Caribe y FCCA.

ORANJESTAD– Tin biento nobo den e di dos proyecto pa uza energia di biento como fuente energetico alternativo.
Hefe di Bedrijfsbureau di W.E.B. Aruba N.V., Sr. Luis Oduber ta di acuerdo cu esaki. Na 2004 a cuminsa cu e prome esfuerso pa desaroya un parke di molina di biento na Vader Piet; un tereno di 1½ kilometer, cu e intencion pa W.E.B. Aruba N.V. haci esaki un proyecto “turn-key”.
E empresa mes lo a cumpra, instala y opera e planta. E prijsnan den e diferente ofertanan tabata exageradamente halto y mescos e gastonan.
P’esey awe W.E.B. Aruba N.V. a scohe pa un asercamento diferente; e asina yama I.P.P., “Independent Power Producer.” E ta nifica cu W.E.B. Aruba N.V. a sondea companianan renombra cu no necesariamente ta fabricante di molina di biento so, sino tambe companianan cu por desaroya e proyecto na Vader Piet. Nan solides si ta relevante.
Dos luna pasa un proceso di screening a start pa produci 7 compania cu mester compronde e importancia di e proyecto y e proyecccion pa un contrato di 15 aña.
E compania cu gana e oferta lo cumpra e ekipo, construi e parke di molina, oper'e y mantene. Asina bendiendo e coriente genera na W.E.B. Aruba N.V. Esey ta e concepto di IPP.
W.E.B. Aruba N.V. na su turno lo percura pa e infrastructura pa conecta nos red di electricidad na e parke di molina na Vader Piet un distancia di alrededor di seis kilometer.
Den e proximo programa di Hunto nos ta Aruba, cu ta pasa Diarason 16 di juli na ATV y Tele Aruba, lo duna un impresion di desaroyo di e proyecto na Vader Piet.

ORANJESTAD- Diabierna 11 di juli 2008, 25 hurista di diferente departamento di gobierno di Aruba a hanja nan certificado di e curso “Masterclass Beleidsontwikkeling en Regelgeving”. E Masterclass a wordo organisa door di Universidad di Aruba den cooperacion cu Departamento di Legislacion y Asunto Huridico ( DWJZ ) cu ta resorta bao di Ministerio di Husticia.
E masterclass a wordo guiá door di prof. dr. Philip Eijlander di Universiteit van Tilburg. E huristanan di DWJZ, KPA, DIMAS, Ministerio Publico, DTI, DIP, Aruba Financial Center, MOT y Directie Juridische Zaken di Antiyas, ademas di a wordo instruí teoricamente, a traha ariba un nota di maneho ( “beleidsnota”) tocante topiconan actual. Tambe nan a traha riba un nota di inicio di legislacion (“startnotitie wetgeving”).
En particular e uso di un “startnotitie wetgeving”, lo cual ta un tipo di checklist pa preparacion pa legislacion nobo, por stimuli e coordinacion y cooperacion entre diferente departamentonan.
E masterclass aki tabata e di tres encuentro den cuadro di e training postacademico di e huristanan na Aruba.

WILLEMSTAD -- Ainda gobiernu di Korsou no a tuma desishon si ta bai duna e kompania di aviashon American Airlines garantia pa asina e kompania mantene e dos vuelonan diario ku e tin entre Miami i Korsou, asina Billy Jonckheer di Chata a duna di konose.
Aktualmente tin un komishon di airlift konsistiendo di entre otro Chata, CTB, Curacao Airport Holding i Curacao Airport Partners ku ta deliberando. Si nos tuma desishon ku no ta duna garanatia mester karga e konsekuensia di e bahada di merkado merikano, ku ta unu hopi importante. Na Washington kaminda sr. Jonckheer a sali resientemente tur isla den Karibe a konfrima ku kompanianan di aviashon ta pidi garantia den e situashon di preis di petroleo aktual.
Asina sr. Jonckheer reakshona riba deklarashonnan di Minister di Telekomunikashon ku a bisa for di Bahamas ku American Airlines a pidi uun suma, pero e ta kere ku no ta prudente pa duna e suma pasobra si algu bai malu gobiernu ta perede su plaka. Adriaens a bisa ku gobiernu ta na mesa ainda pasobra e vuelonan ta yen pues de fakto no ta prudente pa baha e kantidat di vuelonan. Mas aleu e Minister a bisa ku Inselair ku tin intenshon pa kuminsa bula e destinashon lo hana tur sosten nesesario di parti di gobiernu pasina alivia e bahada di vuelonan di American Airlines for di merkado merikano. Adriaens ta kere ku mester wak merkadonan nobo manera Brazil i Mexico.
Di su banda sr. Jonckheer a bisa ku e industria merikano a proba su mes, ta un industria ku a genera 700 mion na divisa. Mester tene masha kuidou na tomo di desishon, pero mester tuma un desishon mas lihe posibel ya ku American a duna un deadline di prome di ougustus pasina nan tambe por planea nan vuelonan riba e destinashon. Mester tene kuenta ku gastunan pa e destinashon ta haltisimo, i esei nos mester wak. Motibu prinsipal ta gastunan pa kompanianan di aviashon manera Air traffic vontrol i aeropuerto. Si nos kier turismo komo prioridat mester evalua esakinan ya ku e krisis ta pa henter Karibe. No mester lubida ku nos tin ku prepara pa otronan merkadonan tambe kaminda nan tin destinashon si ta dispuesto pa traha ku nan. Ta trata aki di un negoshi refiriendo na e disponibilidat di gobiernu pa yuda Inselair. Ta Korsou mester sali miho benefisia. Inselair ta un kompania antiano importante ku ta bula na nos interes. Un biaha mas, nos mester wak kiko ta sali Korsou mas benefisioso, kual sea e kompania ku nos kier yuda.

WILLEMSTAD – Tur hende ku wak e komienso di e evento na Beijing di e kareda di 100m lo por mira un djente di oro ta “flash” ku un lèter “C” aden.
Churandy Martina su smail ta rondoná e “C” ku ta e promé lèter di su nòmber, di su Isla i tambe di su ambishon di bira kampion.
E sprinter yu di Kòrsou di 23 aña ta kere ku e ta un kontendor den e evento di 100m plano apesar ku e mester bai lucha kontra titannan manera Tyson Gay di Merka i Usian Bolt di Jamaica, ku den luna di mei último a kibra e rèkòrt di 100m ku tempu di 9.72 sekònde.
“Esaki ta un bon kos pa e evento mes, ku un otro persona kibra e rèkòrt mundial”, asina Martina a bisa den un entrevista despues di un training na su isla Kòrsou.
“Pero esaki no ta bai kambia nada di mi. Mi ta bai keda riba e mesun kurso di trata di kibra e rèkòrt un dia mi mes”, e ta sigui komentá.
Na e Kampionato Mundial Martina a bin terminá na di sinku lugá tantu riba 100m komo 200m i a pone rèkòrtnan personal e aña aki di 10.00 riba 100m i 20.17 riba 200m.
Un medaya lo trese fama pa Kòrsou.
“Churandy tin un hopi bon chèns pa un bon finish riba 100m i tambe e por terminá bon riba 200m”, asina e entrenadó Wendell Prince ku ta trahando pa mehorá Martina su salidanan. “Nos tin gran speransa pa Churandy gana un medaya”.
Martina su mayornan semper a sòru pa su estudionan bini promé ku tur kos.

WILLEMSTAD - , E ekipo di Little League di La Victoria di Maracaibo, Edo. Zulia, Venezuela a konfirmá nan partisipashon na e torneo internashonal di Crème de la Crème 2008.
E ekipo aki ta e mesun ekipo ku e tim di Little League di Kòrsou a laga den tereno durante e Kampionato Mundial di Little League na Williamsport, Pa., na 2007. Ta sigur ku nos muchanan lo bolbe duna nan e mesun remedi pa bai Venezuela bèk kuné.
E mènedjer ku ta Jesus Paez a duna di konosé ku nan ta bini pa deskitá di e derota ku nan a sufri na man di nos muchanan, durante e kampionato na Williamsport i ta sigur di bai ku e trofeo di kampion invikto.
Un invitashon na tur venezolano i tambe tur boneriano i arubano bibá na Kòrsou, ya ku Boneiru i Aruba tambe a konfirmá, i e públiko en general pa asistí masalmente na Cirilo Chirino Ballpark pa apoyá e futuro peloteronan lokal.
Alabes nos ke gradisí APNA pa e sosten enorme ku nan ta dunando na e evento aki i na tur e spònsernan i voluntarionan ku lo hasi e evento di Crème de la Crème 2008 unu super eksitoso.

WILLEMSTAD- Curaçao Little League Foundation i Fundashon Sedreko tambe ta felisitá e selekshon di beisbòl Junior League ku a bira kampion Latino Amérika i alabes ta hasi un petishon na tur instansia ku lo a deseá di organisá un aktividat pa nan, pa nan wanta poko ku esaki i duna e muchanan di e selekshon e oportunidat pa nan por prepará trankil pa nan próksimo kompromiso ku ta e Kampionato Mundial na Taylor, Michigan.
Curaçao Little League Foundation i Fundashon Sedreko ta konsiente ku tin vários instansia ku ta deseá di hasi algu pa e kampionnan, pero ta pidi pa duna e muchanan e oportunidat pa den tur trankilidat train i konsentrá pa e próksimo kompromiso.
T’asina tambe, ku e selekshonnan di Senior League i Little League ta pendiente ainda pa loke ta nan aktuashon i meskos ku Junior League ta spera di nan tambe resultadonan positivo.
Manera ta konosí, e selekshon di beisbòl kategoria Big League a titulá sup kampion i tambe sali e Selekshon Mas Disipliná durante e kompetensia Latino Amerikano na Venezuela.
Na momento ku e kompromisonan di e muchanan ta tras di lomba, lo organisá un aktividat pa nan tur huntu.
Curaçao Little League Foundation i Fundashon Sedreko ta pidi komprenshon pa esaki.

JARTUM, Darfur, - E forsa konhunto Union Afrikano-ONU desplegá na Darfur, awe ta bai evakuá su personal no esensial, un dia despues ku fiskal di Korte Penal Internashonal (CPI) a pidi òrdu di kaptura kontra presidente sudanes pa supuesto krímennan di guera.
Ayera, fiskal di CPI, Luis Moreno Ocampo, a pidi wesnan di Korte pa emití òrdu di kaptura kontra presidente sudanes, Omar al-Bashhir, pa genosidio, krímennan kontra humanidat i krímennan di guera na region di Darfur (wèst di Sudan).
Ta trata di e promé petishon di aresto di un Hefe di Estado den funshonnan na CPI, e úniko Tribunal permanente pa huzga outornan di krímennan di guera, kontra humanidat i di genosidio.
E konhunto di Union Afrikano i Nashonnan Uní desplegá na Darfur a anunsiá ku personal no esensial lo bai keda “re-ubiká”.
Sudan a primintí hasi tur posibel pa protehá e forsa di pas i e empleadonan humanitario, ounke a atvertí ku no tin garantianan di seguridat.
Responsabelnan oksidental i sudanes a atvertí ku e petishon di aresto di Luis Moreno Ocampo lo por provoká represalianan kontra embahadanan oksidental i e mishon di pas di ONU na Darfur.
Djamars último a realisá un emboskada pa un milisia, durante kua 7 sòldá a muri i otro 22 persona a resultá heridá.
Miéntras tantu, e kapital sudanes ta preparando pa e protestanan kontra e petishon di aresto di Omar al-Bashir formulá pa Moreno Ocampo ayera.

WILLEMSTAD --- Un reunion fruktífero entre DMO i diputado Rhuggenaath tokante Turismo Krusero a tuma lugá último kaminda ku DMO a konfirmá atrobe serka e diputado nan interes i derecho di partisipashon, komo partner stratégiko den desaroyo ekonómiko di sentro di siudat, den tur lokual ku tin di haber ku ekonomia di Turismo Krusero.
E reunion a trata e interes di Royal Caribbean pa hasi un estudio di e posibilidat pa un segundo megapier na Caracasbaai. Den esaki DMO a ekspresá nan preokupashon pa e desaroyo aki basá riba e echo ku no solamente sentro di siudat, manera e kriterio di desaroyo presentá den e “Eilandelijke Ontwikkelingsplan”, EOP, mester keda wòrdu mantené komo kurason di desaroyo ekonómiko di Kòrsou, pero tambe mester para ketu i studia bon desaroyadó nan ku solamente ta interesá den e un “prime real estate” na preis di baka flaku i nan entradanan direkto, den e kaso aki pa medio di tour nan bendí i asina monopilisá tours i transfersnan. E práktikanan aki no ta laga un entrada ni kresementu real na e destinashon i su hendenan ku si mester paga mas pa tur e rekisitunan ménos atraktivo, impaktonan negativo, di e supuesto desaroyo turístiko.
DMO a trese dilanti, ku sentro di siudat mester keda foko, kurason, di desaroyo den e kaso partikular aki espesialmente nos sentro di siudat ku ta un produkto kultural históriko, úniko, ku ta netamente loke e bishitante por distinguí nos di otro destinashonnan i e kompania krusero por bende komo atrakshon úniko, spesial i duradero pasobra nos tur ta benefisiá di dje. Un kurason salú i bibu ta un kurpa salú i bibu.

ARIES: Bo abilidat mental ta lagabu optené e kontesta ku lo mester pa logra loke tantu bo ta sintibu sigur di dje. Bo ta topa un hende pa kompartí bo mesun interesnan. 02.

TAURO: No kometé siegamente e mesun erornan. Bo pensamentu ta enfoká den algu di bo pa por rebibí rekuerdonan di e vlamnan di amor bieu. 03,20,17.

GEMINIS: No sera e oportunidatnan i disfrutá di kada momentu. Bo tin hopi ku ofresé i ta dispuesto pa risibí. No sigui spera ku kosnan ta yega serka bo, tuma inisiativa.

KANSER: E búskeda di algu hopi personal ta yega su final. Bo ta stabilisá tantu riba plannan sentimental komo ekonómiko. Bo ta mas kapasitá pa por solushoná bo problemanan.

LEO: Bo sensibilidat i amor ta bolbe floresé. Mundu di lo spiritual ta deskubrí pa forsanan ku e persona ku ta kompartí bo mesun interesnan i bo ta mira hopi di bo soñonan realisá.

VIRGO: Desaroyá mayor konfiansa den bo mes. Proyektá positivamente i nada ta ser nengá na bo. No keda ketu pa loke bo ta konsiderá ta inhustisia. 18,04,33.

LIBRA: Nada por daña o afektá awor. Simplifiká bida hasiendo e kosnan ku realmente ta kumbiníbu. Tuma bo tempu pa tur kos, deskansá i disfrutá di bon kompania.

SKORPION: Bo ta uni awor na personanan ku ta sirbi di inspirashon pa sigui dilanti ku bo metanan. Bo bida ta aktivo. Tempu ta parse di no ta duna tur loke bo ke hasi. 08,10.

WILLEMSTAD - “E asuntu no ta, ku si MAN ta keda forma parti di Aliansa Patriótiko, òf ta bandoná esaki. No ta asina e kos ta,” asina presidente nobo di e partido blou Mayra Coffie a deklará, na bispu di un desenlase den e kaso aki.
Evaluashon di partisipashon di MAN den Aliansa Patriótiko, en realidat no ta un kos nobo ni tampoko un kos straño, asina Mayra Coffie a bisa. Evaluashon di kiko bo ta hasiendo, kiko bo partisipashon den un organisashon ta nifiká p’abo, ta algu masha normal i demokrátiko.
Coffie a splika, ku for di algun siman pasá ku partido MAN tabatin su kongreso, e punto aki tabata riba agènda. A hasi menshon tambe di e punto aki den publisidat, pero opviamente no tabatin masha atenshon p’e, el a bisa.
E evaluashon no tin nada ke ber ku e susesonan di último simannan, el a enfatisá, kitando mesora rumornan for di riba mesa ku ta pa e motibu ei, partido MAN ke rekonsiderá su partisipashon den Aliansa Patriótiko. Tabatin gritunan konstante ku un partido manera MAN mester konsiderá seriamente si e ta sigui asosiá su mes ku otro partidonan den Aliansa Patriótiko, pasobra den nan tin figuranan ku solamente por hiba e partido blou den un abismo. T’asina ku a pone por lo ménos un dje partidonan aki responsabel pa e disturbionan ku tabatin den sentro di siudat.
MAN algun siman pasá a instalá un komishon di 3 persona pa kondusí e proseso di evaluashon di e partido den e aliansa.

WILLEMSTAD - Parlamentu antiano, no opstante ku awor aki tin resès, lo bin huntu próksimamente pa kaba di atendé i aprobá e lei ku ta regla sueldo mínimo. Tur frakshon entretantu ta para tras di e oumento di sueldo mínimo ku 15 porshento, asina inisiadó di e proyekto di lei aki, parlamentario mr. Faroe Metry a deklará ku bastante optimismo.
“Pero mi tin mas bon notisia pa esnan ku ta kobra sueldo mínimo. E oumento di 15 porshento lo ta un oumento real. Na di dos lugá t’asina ku na yanüari 2009, lo adaptá sueldo mínimo atrobe na oumento di kosto di bida. Anto na di tres lugá t’asina ku esnan ku tin solamente sueldo mínimo komo entrada, lo no paga belasting riba esaki,” asina e lider di frakshon di Partido Nashonal di Pueblo a anunsiá.
Metry, ayera a manda un karta pa presidente di parlamentu Pedro Atacho den kua e ta pidi e presidente di Staten pa kibra resès i konvoká un reunion públiko pa trata e lei en kuestion. E lei, ya a pasa Komishon Sentral i ta kla pa tratamentu públiko.
Staten ofisialmente ta ku fakansi te meimei di ougùstùs. Promé minister Emily de Jongh-Elhage sinembargo tambe a hasi un apelashon riba presidente di parlamentu antiano pa atendé e asuntu aki mas lihé posibel.
Ora tin kos positivo, nos ke pa esaki kana mas rápido posibel, e promé mandatario a añadí.
Na Kòrsou tin komo 8 mil hende ku ta kobrando sueldo mínimo.

WILLEMSTAD - “Diskushon sa tin semper den seno di koalishon. Pa kasualidat e último diskushon aki a alkansá atenshon di medionan di komunikashon. Pero sigur no ta e úniko diskushon ku tabatin”, asina promé minister di Antia Emily de Jongh-Elhage a reakshoná riba e frikshon serio ku a surgi entre partnernan di koalishon PAR I PNP.
“No tin krísis den gobernashon”, asina e promé mandatario a bisa ku énfasis.
Manera LA PRENSA a relatá ekstensamente for di siman pasá, a surgi un diskushon serio entre minister di Finansa i diputado di Struktura Estatal relashoná ku asuntunan dje trayekto estatal ku Kòrsou ta kanando.
Anteriormente tabatin e kaso tambe di nombramentu di un direktor na CDM, kaminda tambe e aktual minister di Finansa no a keda masha kontentu pa e forma ku e reunion a tuma lugá. Básikamente, Partido Nashonal di Pueblo hopi biaha ta bou di e impreshon ku nan ta simplemente un tayer di resèrve na e outo ku yama PAR. PNP ta haña, ku su partner di koalishon PAR mester duna mas rèspèt na e partido bèrdè.
Promé minister De Jongh-Elhage ta konsiderá sinembargo, ku e loke a sosodé, ta kos ku por pasa.
“Lagami bisa, ku den partido PAR mes komo partido, hopi biaha tin diskushon hopi fuerte. Fuerte mes. Kiko ta para ora bo tin un koalishon ku diferente partido? E no ta un kos straño,” asina el a insistí.
El a bisa, ku e biaha aki e asuntu a yega ora di prensa, pero definitivamente no ta promé biaha.

AMSTELVEEN/WILLEMSTAD - Lo duna e agente polisial Gabrielle Cevat tur honor durante su entiero ku ta tuma lugá djaweps awor na Amstelveen, asina kuerpo polisial di Amstelveen a anunsiá ayera.
For di tur huki di Ulanda lo bin agentenan polisial na unifòrm pa paga atenshon na nan kolega ku a muri den forma asesiná siman pasá, víktima di un bala ku un hòmber arubiano di 49 aña di edat lòs riba dje.
E agentenan polisial den unifòrm lo forma un kordon grandi durante e akto di entiero.
Su deseo semper tabata pa forma parti di polis riba kabai. Ta den e ambiente ei tambe nos lo hib’é su último lugá di sosiegu, asina famianan di e víktima a partisipá ayera den un aviso di morto ku nan a emití.
E restunan lo sali den un kitoki den oranan di mainta for di Amsterdam pa e seremonia di despedida.
Entretantu manera ta konosí, a prolongá detenshon di e hòmber sospechoso. Te ainda e no a hasi deklarashon, di manera ku outoridatnan no por bisa nada ainda di motibunan di su akto.
E kargonan ku tin kontra e hòmber aki ta vários. Ta akus’é na promé lugá di asesinato òf homisidio, tambe di intento di asesinato i di poseshon ilegal di arma.
T’asina ku promé ku el a lòs e tiru fatal riba e dama polis, e hòmber aki tabata enbolbí den un kaso, kaminda el a lòs algun tiru riba porta di un kas na Amstelveen. E kaso aki probablemente tin di aber ku un kaso den ambiente amoroso.

WILLEMSTAD – E kampionato di beisbòl klase A, a kontinuá den e fin di siman ku diferente enkuentro.
Djasabra na Tio Daou Ballpark, e ekipo di Sta. Maria Chippie a gana di Wildcats Fatum/Kambes ku skor di 8-7.
E ekipo di Sta. Maria a laga e Pushinan Brabu den tereno.
Pa Sta. Maria: 8 kareda, 11 hit, 2 eror Nurlison Leonora a gana miéntras ku Angelo Bito a bai di 4-2.
Pa Wildcats: 7 kareda, 14 hit, 4eror. Kevin Muller a pèrdè i Flaymar Wijman a bai di 4-3.
Den e otro enkuentro djasabra na Parke Tata Beaumont na Bonam, Curaçao Yankees ta gana Real Athletics ku skor di nòkout 14-4.
Pa Cur. Yankees: 14 kareda, 15 hit, 1 eror Lennox Lard a gana i Aldrin Anastatia a bai di 3-3.
Pa Real Athletics: 4 kareda, 10 hit, 7 eror. Roel Obispo a pèrdè i Dachineau Willems a bai di 3-2.
Djadumingu mainta na Tio Daou Ball Park, Wildcats/Fatum/Kambes a derotá Banda Abou City ku skor di 9-3.
Pa Wildcats: 9 kareda, 8 hit, 2 eror. Jose Da Silva a gana i Rignald Janga di 3-1.
Pa Banda Abou City: 3 kareda, 9 hit i 9 eror. Eduardo Lovera a pèrdè i Desmond Leito a bai di 4-3.
Na Tio Daou Ballpark Curacao Yankees ta logra nan di dos viktoria den fin di siman ora ku nan a derotá Groot Kwartier Stars ku skor di 7-2.
Pa Cur. Yankees: 7 kareda,8 hit, 4 eror. Picher ganador tabata Gillord Kirnon miéntras ku Emirit Volk a bai di 4-2.
Pa Gr. Kwartier: 2 kareda, 4 hit i 3 eror. Kevin Kelly a pèrdè i Rudailo Leito a bai di 3-2.

WILLEMSTAD - Den kuadro di su di 21 aña e klup di kanamentu “The Jolly Walkers” ta organisá un tremendo “Midnight Walk”.
E kaminata ta tuma lugá djasabra 19 di yüli 12’or di anochi bou di lus di luna yen.
Salida i final lo ta na: Beach di Caracasbaai
DOS DISTANSIA
Por kana 15 i 10 km.
E “Midnight Walk” ta spesialmente p’e kanadónan ku ta gusta kana ku luna yen, ku un dushi temperatura (solo no ta kima) i ademas di esei no tin hopi tráfiko den e oranan ei.
Pero esaki no ta tur kos.
E promé 200 kanadónan ku inskribí i partisipá lo bini na remarke pa kana Fatum-loop 2008 dia 25 di òktober kompletamente grátis!!!
Preis ta 15 florin ku ta inkluí un bunita T-shirt.
INSKRIPSHON
Por inskribí dia djaweps 17 di yüli na S.D.K. di 18.00-21.00 di anochi i tambe via e-mail: thejollywalkers1987@hotmail.com òf telefon 667-5570 i 511-6226.
Kòrda shonnan, mester move i kanamentu ta masha bon pa salú!!!!!!!

WILLEMSTAD – Despues ku polis a detené 10 sospechoso entre ayera nochi 19.00 i awe mardugá 00.30, polis ta trahando un plachi pa konektá e sospechosonan ku e diferente krímennan kometé últimamente. E sospechosonan ta detené entre otro en konekshon ku asesinato di dos komersiante i sekuestro di un otro.
Despues di a investigá profundamente último simannan, polis a detené ayera nochi 19.00, 2 hòmber venesolano i 1 kolombiano. Ta trata di respektivamente G.R. (54), R.A. (31) i J.M. (25). E detenshonnan a tuma lugá den e área di Fuik, riba e boto Carmen-D. Mas lat den kareda di 22.00 polis a detené 3 hòmber yu di Kòrsou i 1 dama dominikano. ta trata di respektivamente A.H. (37), L.O. (49), R.M. (53) i A.de A. (52). A detené nan den un kas na Dein. Durante ku polis tabata listra den e kas nan a lokalisá 2 arma di kandela i un kantidat di droga no spesifiká. Despues den kareda di 23.30 polis a detené tambe 2 hòmber yu di Kòrsou na altura di un snèk na Dein. Ta trata di W.S. (22) i J.L. (17). Finalmente den kareda di 00.30 polis a pone man riba e hòmber kolombiano di 27 aña di edat di inisial O.M. E detenshon akí a tuma lugá den Amerikanen Kamp.
Polis no por a bisa eksaktamente ta pa kua krímen e diferente sospechosonan ta detené. Den transkurso di awe lo interogá nan pa asina konkluí nan envolvimentu den e diferente krímennan ku a tuma lugá resientemente.

WILLEMSTAD – E efektonan di un ola tropikal ku a pasa riba Kòrsou ayera mèrdia a kousa diferente inkumbinensia rònt Kòrsou. E palu di awa ku a kai a pone ku riba Erosweg un taki grandi a kai for di un palu i a resultá mei mei riba e kaminda. Mester a pidi asistensia di un loader pa aliviá e situashon. Tambe un dama habitante di Jongbloed a spanta inmensamente ora bos a zona. Mester a bai hòspital kuné pa opservashon. Na diferente otro parti di Kòrsou tabatin kamindanan ku a yena ku awe i a paralisá e fluho di tráfiko.
Pa awe Servisio Meteorológiko a pronostiká un wer parsialmente nublá i momentunan hopi nublá ku áwaseru lokal posiblemente kompañá ku mal tempu. Bientu lo ta moderá i tambe fuerte for di direkshon Ost. Awe mainta 11’or ora lokal, e tormenta tropikal Bertha tabata na un distansia di 415 kilometer nort/nortost di Bermuda i no tabata forma niun menasa.

Mi ta kòrda novèmber 15 aña pasá, tempu ku tabata hasiendo gestionnan pa lanta Partido Antia Restrukturá. Ounke tur esnan presente tabatin mil i un motibu personal pakiko nan kier a drenta polítika (bèk), tur tabata uni den un solo pensamentu polítiko: kon kibra e poder polítiko di Partido Nashonal di Pueblo, ku e tempu ei, dirigí pa señora Maria Liberia-Peters, tabatin e poder polítiko kasi apsoluto na Kòrsou.

Prinsipalmente despues di e referèndem di ’93, ora ku e órden polítiko na mando e tempu ei a mustra bon kla, ku no tabata nan intenshon pa duna kontenido na e deseo di pueblo di Kòrsou pa e islanan antiano keda huntu den Antia di 5. “Referèndem ta referèndem, elekshon ta elekshon” tabata e kontesta di señora Liberia-Peters kada biaha ku prensa puntr’é si e lo “respetá” resultado di e referèndem ei. Pues ku otro palabra, Partido Nashonal tabata e “nemesis” polítiko di PAR. E “enemigu” ku PAR a usa semper komo referensha pa mustra kon diferente e si ta for di “polítika tradishonal”.

E enemistat polítiko aki a perdurá te na 1998, kulminando den pitu di elekshon ku un kaso den korte di hustisia ku lider polítiko di Nashonal di e tempu ei, señora Suzy Camelia-Römer a entamá kontra PAR, pasobra PAR a referí na su persona den un spòt di televishon ku el a “sufri” un kantidat di skandal tempu e tabata minister di Hustisia.