WILLEMSTAD – Prizòn Bon Futuro tin sufisiente kapasidat pa sera tur e sospechosonan ku hustisia a detené último dianan. E instituto di korekshon tin 690 kama i te ku ayera tabatin 499 prezu. Por lo pronto no tin niun motibu pa preokupashon. Esaki ta loke e bosero di Bon Futuro, Aldino Schoop, a bisa LA PRENSA ayera. E kantidat grandi di sospechosonan ku hustisia a detené resientemente, a pone LA PRENSA averiguá kon ta pará ku e kapasidat di sèl na prizòn. E ola di detenshonnan i vershonnan ku mas detenshon lo kai, a pone un relashon mes ora ku e problema struktural di falta di sèl na prizòn. Sinembargo Schoop a splika, ku no ta eksistí un problema struktural ku kapasidat pa sera delinkuentenan. “Nunka no tabatin e problema ei. Semper prizòn tabata den un posishon pa akapará e kantidat di delinkuentenan ku mester a sinta nan kastigu. Mi por bisa ku nunka nos no ta na kareda pa motibu di falta di espasio pa sera esun ku mester sinta su kastigu.” Mas aleu Schoop a splika ku prizòn tin 704 sèl, pero no ta tur sèl tin kama. Aktualmente tin 690 kama disponibel di kua 499 ta okupá. “Nos tin lugá awor akí pa 191 prezu mas. Ounke mi tin ku bisa ku tur dia i henter dia tin sospechosonan ta drenta i èks prezunan ku a kaba di sinta nan kastigu ta bai kas. Konstantemente nos ta registrá kuantu hende a drenta i kuantu a sali. P’esei nos sa kada momentu di dia eksaktamente kuantu lugá nos tin pa sera hende.” Schoop a splika ku Bon Futuro tin 8 diferente blòk. “Blòk 1 ku ta konosí komo e sèlnan di polis i ta reservá pa detenidonan ku no a haña nan kastigu ainda. Nan ta pendiente di e investigashon ku ta tumando lugá i pa e motibu ei nan ta detené den e asina yamá Huis van Bewaring.” Den HvB 37 sèl di kua 34 tabata okupá te ku ayera. Na mes momentu tabatin 3 prezu ku por a bai kas ayera. Na warda di polis na Rio Canario i na Barber tambe tin algun sèl. “Banda di e Huis van Bewaring tin tambe e Strafgevangenis mes. Esaki ta loke nos ta yama ‘patras’. E prezunan ku ta será patras ta esunnan ku tin un kastigu imponé dor di korte. Den e parti akí tin entre otro Blòk 2. Den e blòk akí tin prezunan ku por konsiderá peligroso. Tin kapasidat pa 44 prezu. Den Blòk 3 tin espasio pa 68 prezu i aktualmente tin 51. Akí tin detenidonan relativamente trankil. Nan ta adultonan mesklá ku hóben. Te ainda nos no tin un prizòn pa hóben na Kòrsou i ta pa e motibu ei nan ta será huntu ku e adultonan. Den Blòk 4 tin espasio pa 38 prezu, miéntras ku aktualmente tin 37. Den e blòk akí tin e detenidonan manera mandatario i otro funshonarionan haltu. Tin polis tambe será den e blòk akí. Blòk 5 tin 29 sèl i aktualmente tin 27 detenido, miéntras ku Blòk 6 ta un blòk ‘algemeen’ i tin espasio pa 28 prezu. Aktualmente tin 25 será.” Finalmente tin Blòk 7 i 8. Blòk 7 ta partí den 2x72 sèl. Aktualmente tin 121 detenido. Den un parti tin 60 prezu i den e otro parti tin 61. Tin tambe e parti di kashòt. E sèlnan akí ta pa detenidonan ku kibra ku regla i nan ta haña un kastigu èkstra. Tin espasio pa 9 prezu den kashòt i aktualmente tin 1 prezu será. Tin tambe e parti ku yama ‘afzondering’. Einan por sera 9 detenido i aktualmente tin 8 prezu será. E detenidonan ku ta será den e parti akí ta esunnan ku tin ku haña protekshon. E último parti kaminda tin prezu ta den e baraknan pa hende hòmber. Eiden tin espasio pa 48 prezu i aktualmente tin 23 prezu. E detenidonan akí ta esunnan mas trankil. Nan ta preparando pa bai kas, pues ta sintando nan último parti di kastigu. “Aktualmente tin 25 prezu femenino na Bon Futuro, miéntras ku e prezu di mas hóben tin 16 aña. Esun ku mas edat ta kai den e kategoria 50+. E prezunan entre 16 i 24 aña ta sigui kursonan di formashon sosial. Por nota últimamente ku e populashon den prizòn ta birando mas hóben, Aldino Schoop a splika. Schoop ta traha na Bon Futuro for di mart di 2007. E ta en prinsipio trahadó sosial i bosero. Anteriormente el a traha na FEFFIK kaminda e tabatin hopi kontakto ku prizòn. Tambe el a traha na ARBO komo persona di konfiansa pa tur empleado di servisionan uniformá. Finalmente Schoop a splika ku aktualmente tin tiki wardadó di prezu pa hopi prezu. “Esaki tòg tin komo konsekuensia ku e prezu ta pone preshon riba e wardadónan di prezu. Hopi bia ta pa haña atenshon. Tin bia nan ta yama i hasi manera ta algu urgente, pero finalmente ta resultá ku ta djis pa nan puntra konta ku nan papelnan.”
WILLEMSTAD - E selekshon femenino di Antia Ulandes ta gana su último wega di e buèlta regular kontra di Martinique i ta pasa pa kuart final. Antia a sali hunga un bon wega pero ta bin hasi algun fayo den e promé sèt loke ta permití Martinique igualá e sèt. Pero Christine ku e kapitan Neysa ta tuma responsabilidat den nan man i ta bin gana e wega 26-24. E di dos sèt ta kuminsá mesun kos ku Martinique tumando un bentaha grandi, pero mesora e muchanan di Antia ta reakshoná. Segun e wega ta avansá, Antia ta bin tuma bentaha i ta gana e sèt fásil 25-16. E di tres sèt, Martinique un biaha mas ta trata di stroba e fiesta di Antia, pero un biaha mas ta Christine, Neysa i Samira ta tuma komando di e wega, p’asina Antia gana 25-21. Antia asina ta bin terminá na e di dos lugá i mester a hunga ayera kontra di Bahamas. E selekshon maskulino mester a hunga ayera kontra di Trinidad.
WILLEMSTAD - TDS den forma grandi a presentá djamars dia 15 di yüli un eksperensia úniko na 200 invitado. Den koperashon ku su partnernan di beisbòl, MCB, HUCOR Holding, Sagicor i UTS, TDS a duna 200 persona e oportunidat di eksperensiá e Wega di Tur Strea di Beisbòl Liga Grandi den un simulashon di Yankee Stadium riba e tereno di parker di Pizza Hut Sta. Maria. Pa e evento aki tambe TDS a estrená pa su 200 invitadonan e sistema nobo di televishon yamá “High Definition TV” alabes un logístika perfekto pa simulá “Yankee Stadium” ku 5 pantaya gigante i brindando e invitadonan tantu kuminda komo bebida manera ta wòrdu sirbí na Yankees Stadium. E mesun spònsernan di beisbòl Liga Grandi manera Pepsi i serbes Presidente tabat’ei presente tambe pa brinda e invitadonan bebidanan gratuito pa e anochi aki. Tabatin partimentu di hotdog tambe na enkargo di Zwan di e kompania EWT, miéntras ku e refresko energétiko Redbull a brinda tur invitado e energia sufisiente pa por a keda riba pia tur e 15 inningnan largu di e wega. Invitadonan pa e evento aki a keda sumamente entusiasmá pa e inovashon den televishon ku TDS a brinda nan. HDTV muy pronto lo ser lansá den e forma eksklusivo dor di TDS, e kompania lokal i legal di televishon pagá na Kòrsou i Boneiru. Keda pendiente pa e Weganan Olímpiko 2008 ku lo wòrdu brindá na bo pa TDS. Pa e okashon aki tambe TDS lo bai tin un evento úniko pa duna pueblo di Kòrsou e oportunidat pa kuminsá eksperensiá HDTV i disfrutá di su benefisionan.
WILLEMSTAD – Prizòn ta hopi den notisia atrobe. E siman aki tabatin un diskushon riba e aspekto di humanentu den prizòn. Wes a determiná, ku un prezu ku no por kontra huma, mester haña posibilidat pa skapa for di e huma aki. Tabatin masha hopi detenshon den último dianan i e pregunta a surgi, si prizòn no ta yenando mas i mas. Nos tin detayenan amplio di ámbos kaso den nos edishon di awe. Riba página tres, nos lo papia riba e kaso di humamentu den prizòn. Riba página sinku, nos lo dediká atenshon na prizòn i su kapasidat. Riba nos portada por mira un pòtret saká for di aire di Prizòn Bon Futuro, kortesia di Aubrey Sealy.
Skina di Sorti, awe djasabra 19 di yüli di 2008, ta kuminsá ku deseá tur hende un bon dia. Komo studioso, mi ta kontemplá i apresiá susesonan polítiko di un manera ku sa kai ménos bon serka e respektivo aktornan polítiko i nan simpatisantenan. Na algun okashon kaba mi a mustra ku e kultura lokal ta unu di un tendensia predominante pa simpatia pro òf kontra. Elementonan emoshonal ta impaktá e kapasidat rashonal den un forma negativo. Komo tal, reakshon ku karga emoshonal negativo no ta nada straño pa mi. Pero nan no ta kambia nada. Nan no ta kontené evidensia for di kual por yega na otro konklushon. **** Hopi kos ku ta aparentá polítikamente komo un bon táktika, “bestuurlijk” ta resultá un piedra molestioso. Den e proseso estatal, tabata tin diferente fayo stratégiko ku a wòrdu kometé ku si nan keda sin wòrdu rekonosé lo tradusí nan mes den retraso enorme pa desaroyo di komunidat. Ta un realidat amargo pero realidat ku polítikamente, sigur den un pais kaminda ta guera di imágen ta prevalesé riba e guera di idea ku ta karakterisá paisnan mas avansá, atmití un eror ta virtualmente imposibel. **** Echo ta keda sinembargo ku e kestion di, bienestar di komunidat komo meta den e proseso estatal, ta mas un “statement polítiko” ku e ta un ophetivo real di maneho. Si lokual a akordá ta intenshoná pa yega na emansipashon (un proseso di desaroyo) di komunidat, anto hopi mas bien ta representá un desviashon total for di esei. Bienestar general di komunidat entre otro ta kontené elementonan di término korto (ku ta mara na disposishon di plaka), pero mester tin prinsipalmente elementonan di tèrmino mas largu manera realisashon propio.
WILLEMSTAD - Selekshon Little League a biaha pa Boneiru djasabra dia 19 di yüli den oranan di mainta. E selekshon ta partisipá na e kampionato di Karibe di Little League, 11 i 12 aña, ku ta start dia 19 di yüli i tèrminá dia 27 di yüli. Curaçao Little League Foundation i RBTT tabata presente mainta tempran pa duna e hóbennan sosten i deseá nan éksito na Boneiru. RBTT ta spònser parti di biahe, unifòrm i material pa e hóbennan di Little League. RBTT i Curaçao Little League Foundation ta pendiente pa e bon resultadonan tantu riba komo pafó di tereno manera ta kustumber di selekshonnan di Kòrsou. Tur selekshon di Little League a logra yega final te awor. Selekshon Big League, sup-kampion i Mas Disipliná na Venezuela, selekshon Junior League, kampion Latino Amerikano na Puerto Rico i selekshon Senior lo hunga final djasabra 19 di yüli na Sint Thomas. Selekshonnan Little League di Kòrsou ta kampion di Karibe for di aña 2001, ke mèn 7 aña siguí kampion i awor ta bayendo pa e di 8 kampionato. Esnan ku ta forma parti di e selekshon ta: Edmond Americaan, Jairly Argus, Junters Dossett, Sjeantienne Ersilia, Tyvon Faneyte, Dennis Gustina, Claycandy Hariquez, Sherlon La Roche, Jason Libert, Hensley Martha, Juremi Profar, Entwin Reigina, Suenly Paulina i Sedwin Reigina. Mènedjer ta Vernon Isabella, asistí pa coachnan Michelangelo Celestina i Charlton Cijntje.
Petishon pa para konstrukshon di dolfinario na Turks & Caicos
Providencia, Islanan Turks & Caicos – E sosiedat karitativo internashonal pa konservá bayena i dòlfein (Whale and Dolphin Conservation Society -WDCS), a manda un karta pa gobernadó i gobièrnu di Turks & Caicos pidiendo nan pa para e intenshon ku nan tin pa konstruí un dolfinario den e pais. E organisashon di mas ku 20 aña ku tin akredishon internashonal tin komo meta pa konservá dòlfein, bayena i turtuga na mundu. Mènèdjer pa e programa di koutivo di WDCS Cathy Williamson a bisa for di nan ofisina na Inglatera ku e organisashon ta masha preokupá pa e intenshon di gobièrnu di Turks & Caicos. Williamson a bisa sitando for di un relato di nan Plan di Akshon pa Konservashon pa e setasionan mundial pa añanan 2002 - 2010 ku ta prepará pa e Union Internashonal pa Konservashon di Naturalesa i e Komishon pa Sobrebibensia di Espesie (IUC/SSC), ku “Eliminashon di setasionan bibu for di naturalesa, pa eksponé nan den koutiverio i/òf pa investigashon, ta ekivalente na matamentu insidental òf konsientemente, na momentu ku ta kue e bestianan pa sera nan no ta disponibel pa yuda mantené e populashonnan. Kada biaha ku kue e bestianan aki sin un maneho i sin investigashonnan korekto rigoroso ta un menasa serio pa populashonnan lokal di setasio”. Setasionan ta e animalnan ku ta inkluí bayena i dòlfein i otro tipo di mamalnan marina karakterisá pa nan kurpa (hopi) grandi kasi sin kabei òf lana ku nan miembronan a modifiká den skamanan grandi i hanchu i nan rabu ta plat i hanchu.
WILLEMSTAD - Kòrsou den e simannan tras di lomba tabatin bishita di un grupo basta grandi di studiante venezolano kendenan a gradua ayera 18 di yüli pa nan titulo di Master den Gerensia di Salú Públiko. E proyekto aki ta un di Caribbean International University (CIU) na Kòrsou. E studiantenan ta di e ekstenshon di e universidat na Caracas, Repúblika Bolivariano di Venezuela. Kordinadó Akadémiko di CIU na Kòrsou Ing. Msc. Magdalena Ferrazzini pa final di estudio di e studiantenan a organisá un seri di charla ku diferente empresario na Kòrsou pa asina duna oportunidat pa e studiantenan tende mas di eksperensia den maneho empresarial di hendenan ku tin posishonnan gerensial. E presentashonnan mester a duna e studiantenan un bista kla riba diferente strategia gerensial posibel, kual nan mester por pone den práktika na momentu ku nan kuminsá traha sea ta den un organisashon públiko òf privá. E presentashonnan a tuma lugá den oula di ITC. Pa hopi di e studiantenan tabata promé biaha ku nan a bini Kòrsou i na e manera ku nan tabata hasi pregunta na empresarionan lokal por a nota nan interes i nan gana di haña e informashon disponibel. Riba e pòtrèt por mira algun di e studiantenan huntu ku Reyna Joe ku tabata un di e presentadónan.
NEW YORK/WILLEMSTAD – Un grupo di karibense bibá na Merka a kuminsá ku un kampaña pa haña ku den e próksimo senso na aña 2010 rekonosé karibensenan komo un grupo separá. Ku e kampaña di Caribid ta trata na logra esaki.
E resultado di senso ta influensia kon gobièrnu merikano ta aloká mas ku $300 bion pa aña den mehoramentu di barionan, salú públiko, edukashon, transporte i mas. Un senso ta e forma pa un pais wak kuantu hende tin i den ki kondishon e hendenan ta bibando. Na Merka tin den e formulario di senso tambe un pregunta riba desendensia geográfiko, pero no tin Karibe identifiká komo un region spesífiko. Ke men ku hendenan ku ta originá di Karibe ta kai den e grupo general huntu ku merikanonan. Senso na Merka ta algu hopi importante, e ta konfidensial i ta obligá pa lei pa partisipá n’e. Banda di ku e senso ta detektá kon ta supsidiá komunidat merikano e ta tambe e oportunidat pa haña un bos den Kongreso merikano, representashon den gobièrnunan di estado i lokal i e ta sigui desishonnan ku kai den e komunidat spesífiko. Esnan ku ke vota pa sostené e identifikashon karibense den próksimo senso na Merka por hasi esaki riba www.caribid2010.com.
ANTIGUA/WILLEMSTAD – Merka ta kontinuá ku su desishon pa para tur chèns ku merikanonan tin pa nan hunga wega di plaka riba Internèt. Awor aki tin negosiashonnan tumando lugá riba e isla den Karibe Antigua–Barbuda, pa wak kon Merka ta logra na para e weganan di plaka riba Internèt via di e isla aki den Karibe. Kongreso merikano na 2006 a bin ku e desishon pa prohibí tur banko i instansia finansiero merikano pa prosesá pago na kompanianan ku ta fasilitá wega di plaka riba Internèt pafó di Merka. Esaki tabatin konsekuensia tambe pa e negoshi di wega di plaka riba Internèt ku tin na Kòrsou. Merka ta poniendo awor aki preshon riba gobièrnu di Antigua i Barbuda i ta spera ku e kòmbersashonnan ku nan tin den e dianan aki ta trese un fin na e disputa i e ora ei lo no por haña e servisio aki mas na Antigua-Barbuda tampoko pas merikanonan. E echo ku e islanan a para fuerte kontra di e desishon merikano, a pone ku no a alkansá na tres biaha kaba e fecha stipulá pa e Organisashon Mundial di Komersio (World Trade Organization) pa a tende e kaso aki. E lei merikano ku a hasi ilegal pa bankonan òf institutonan finansiero akordá pagonan via Internèt pa weganan di plaka riba Internèt tabata un paso pa regulá kasinonan offshore. Ke men kasinonan ku ta kai pafó di hurisprudensia di lei merikano. Ke men ku e kasinonan no ta kai bou di lei merikano, pero e institutonan finansiero i bankonan merikano si. E pregunta ta si e bankonan realmente lo por para e pagonan.
Wisdom comes in different degrees, with time it varies and changes depending on the present situation. Many things give us wisdom, but only true love will make us wise. For if we fail there, we have truly failed. It is what we learn after we think we know it all that really counts. The beginning of wisdom is silence, the second step is listening. We spent almost half of our lives listening, if we don’t we are not as intelligent as we should be. True wisdom lies in gathering the precious things provided by each day as it goes by. There is no limit to reach our wisdom, every day is another moment of opportunity. We cannot stand still, we must forge ahead, for time marches on and might leave us behind. Because of the wisdom of others we have reached our destination. However it is not the end, time marches on and demands more wisdom for all the problems that arise every day in our lives and those we love. We have to plan for ourselves and those who depend on us, for if we make mistakes, they also suffer. If a need persists, the solution exists. The final source of all wisdom is between our ears, but in some people it is a vacuum. Wisdom is knowing what to do; skill is knowing how to do it; virtue is doing it well. The door of wisdom swings on the hinges of common sense and uncommon ignorance. Every obstacle we encounter is a challenge to grow in wisdom, if we fail at anytime it is also an opportunity to learn. Failure is repeating the same mistake twice, and time lost can never be regained. Wisdom is also knowing who to trust. Ultimately the only person we can trust is ourselves. I am a great believer in wisdom, and I find the harder I work the more wisdom I attain. There is no limit to how much wisdom we can attain, for life it self is a teacher and the more we live, hopefully the wiser we get. Otherwise it is a waste of time! But some people have so much time they really do not care. The past cannot be recalled, the future is ahead, and the present is in our hands. Using it wisely is wisdom in itself.
WILLEMSTAD - Direktiva di Fundashon “Amigunan di Ergilio Hato” ta organisá e aña aki pa di sinku biaha un torneo di Futbòl Internashonal Pa Veterano den e dos fin di simannan di dianan 18, 19 i 20 di yüli i 25, 26 i 27 di yüli. E torneo ta karga e nòmber “Kopa Rotativo Ergilio Hato” i ta ser hungá den dos buèlta ku ekiponan veterano di Kòrsou, kuminsando ku 18 ekipo di F.F.V.K, St. Maarten, Boneiru i Ulanda. E ekiponan di eksterior a hasi esfuersonan hopi grandi pa nan por bini kla ku gastunan di transporte aéreo i hotèl na Kòrsou. Ademas nan tin basta luna ta train pa nan por hasi un tremendo presentashon aki na Kòrsou. Di Ulanda a bin haña konfirmashon ku lo bini un gran kantidat hungadó yu di Kòrsou ku nan famia. Ta trata aki di e ekipo Veteranonan Perfekto di Ulanda ku hungadónan ku ántes tabata militá den ekiponan di F.F.K., Federashon di Futbòl di Kòrsou. Hopi di nan tabata hunga den selekshon i awor ta biba na Ulanda. Nan ta bou di guia di e gran Glenn Kwidama ku a militá den Feyenoord. Di Boneiru ta bini dos ekipo, Ho Bon i Un Dep ku den e torneo di yüli 2007 a hasi un gran impreshon i por poko un di nan a bai ku e kopa. Di St. Maarten lo bini un selekshon di futbolistanan di kual hopi tambe a militá den e divishon di mas haltu. Zen Andrade i Arnold Priest ta entre esnan ku lo deleitá e públiko. Pues lo bai tin un tremendo fiesta di futbòl pa selebrá e promé lustro di Kopa Rotativo Ergilio Hato.
SYDNEY, Australia, - E Papa Benedicto XVI a pidi despensa awe, pa abusunan seksual di Iglesia Katóliko na Australia, señalando ku mester hiba esnan responsabel dilanti Hustisia. “Mi ta sinti mi profundamente tristu pa e doló i sufrimentu ku e víktimanan a soportá”, e Pontífise a bisa den un diskurso na Sydney. “E fechorianan aki, ku ta konstituí un grave traishon na e konfiansa, meresé un kondena”, el a afirmá. “Mester hiba esnan responsabel dilanti Hustisia”, el a apuntá. Ta e promé bia ku e Papa a pidi despensa spesífikamente pa e abusunan seksual di e pastornan i a bisa klaramente ku mester hiba e abusadónan dilanti Hustisia. E Tata Santu ta konfrontando e tema di abusu seksual dentro di Iglesia Katóliko na Merka durante un bishita na Washington na aprel último, momentu ku el a reuní ku e víktimanan i a primintí nan ku lo mantené e pastornan pedofil for di saserdosio. Pero e palabranan di e Sumo Pontífise na Australia tabata mas fuerte ku esnan ku el a usa na Merka, kaminda a okurí e mayó skandalnan na aña 2002 i kaminda e kardenal di Boston, Bernard Law, a renunsiá aña pasá debí n’e tema. Durante e skandal a deskubrí ku obispunan di Merka i otro lugánan a trasladá e klérigonan, kendenan a abusá di menornan di edat, di parokia pa parokia, na lugá di ekspulsá nan for di Iglesia òf entregá nan na outoridatnan.
WILLEMSTAD – Mañan anochi pa 7’or lo tin un enkuentro spesial pa hende muhé na Ministerio Bida Abundante. Un sirbishi spesial den kua hende muhénan lo keda ministrá pa pastor Lucinda Brunett di Power Church na Almere, Ulanda. Pastor Lucinda Brunett, kasá di pastor Sesley Brunett ta pastoriá un iglesia den un bario nobo na Almere, kaminda por a mira kon Dios ta moviendo den e bario aki. Na e momentunan aki nan ta di vakashon i Ministerio Bida Abundante no ke laga e oportunidat aki pasa sin ku duna oportunidat pa sirbishi pa hende muhé. Konsiderando ku djadumingu den oranan di mainta tin hopi hende muhé ku ta traha den kantornan di number òf supermerkado ku ta bira difísil pa nan por hiba nan karga na Kristu òf tira nan preokupashon riba Señor, e sirbishi ta aki ta na su lugá. Pues mañan anochi tur hende muhé, sin importá bo situashon ta bon bini. Sea bo tin malesa, òf pa kualke frustrashon, prekupashon, rechaso, engaño, afligí, etc. bo ta keda invitá pa e sirbishi aki. Entrada ta grátis. Ministerio Bida Abundante pastoriá pa pastor Norwin Josepa ta úbika den Colon Shopping Center, unit 151 ariba.
WILLEMSTAD - Kas di Kultura i Plataforma Bèrdat Históriko ta invitá pueblo di Kòrsou pa partisipá na Ruta Tula ku ta tuma lugá riba 24 di ougùstùs. Esaki ta di 10 aña ku Plataforma Bèrdat Históriko ta organisá Ruta Tula. E aña aki konhuntamente ku Kas di Kultura. Pa motibunan organisatorio Archivo Nashonal no por partisipá e aña aki. Ruta Tula ta un rekorido ku bùs na lugánan di memoria ku tabata importante den e rebelion di 1795 bou di mando di nos hérue, Tula. Den e bùs partisipantenan ta haña informashon históriko di sklabitut en general i di Kòrsou i di e rebelion ku a tuma lugá na 1795 na Bándabou. Na e lugánan di memoria ta para pa dramatisá loke ku a pasa durante e lucha di 1795. E dramatisashon ta den man di e gruponan di hóben: Anaku Kuumba, Grupo Kara, Hóbennan Positivo Aktivo i Kombinashon Moderno. Plataforma Bèrdat Históriko i Kas di Kultura tin e siguiente metanan ku Ruta Tula: Splika e bèrdat di loke a tuma lugá na 1795, usando un método aktivo i dinámiko ku ta pone ku hende ta komprondé e informashon mas mihó; Ilustrá e balornan importante ku a bin dilanti den e lucha di 1795 ku ta indispensabel pa drecha bida di yunan di Kòrsou ku ta biba awe. Duna oportunidat pa pueblo siña konosé su historia i haña forsa pa salbaguardiá nos patrimonio.
WILLEMSTAD - Gerensia di Nieuwe Post Nederlandse Antillen NV (NPNA) a firma ekstenshon di e kontrato kolektivo ayera ku ABVO, miéntras ku na St. Maarten tabata ku WICSU. Na e okashon aki tantu miembronan di personal i staf i direktiva di e respektivo sindikatonan tabata presente pa e firmamentu i un bríndis. E realidat di e CAO aktual tabata bálido te ku fin di desèmber 2007. Debí na e asuntunan rònt di terminashon di e aliansa stratégiko ku Canada Post International Ltd. i e traspaso di e kompania den su totalidat pa Gobièrnu Sentral, a surgi un tardansa den e proseso di negosiashon pa loke ta trata e CAO nobo. Gerensia di NPNA i e sindikatonan a menshoná di a yega na un akuerdo mutuo pa laga e ekstenshon di e CAO nobo drenta na vigor ku forsa retroaktivo for di 11 yanüari 2008. E ekstenshon ta un kontinuashon di e aktual CAO i ta kontené solamente algun adaptashon chikitu. E ekstenshon ta kaduká 31 di desèmber 2008.
WILLEMSTAD- Resien- temente Banco di Caribe a bishitá e instansia GVI (Stichting Gezinsvoogdij Instelling) pa asina entregá un chèk ku lo benefisiá vários mucha den nos komunidat, na momentu di hasi e preparashonnan pa bai bèk skol. “Nos ta kere firmemente ku tur mucha mester tin oportunidat igual pa bai skol. E añanan di skol di fundeshi ta sumamente importante pa desaroyo di e mucha, un kontribushon asin’aki di parti di nos ta simplemente indespensabel, es mas e ta forma parti di nos responsabilidat sosial”, asina sra. Marielle Dorand-Lebacks enkargá ku merkadeo i promoshon na Banco di Caribe a komentá. Sr. Percy Virginia di Banco di Caribe a hasi entrega di e chèk na GVI siman pasá, miéntras ku resientemente,Sra. Marielle Dorand-Lebacks a bishitá e instansia pa kòmbersá ku e trahadónan i mayornan di e muchanan ku lo benefisiá di e donashon di Banco di Caribe. Mayornan ta risibí un ‘man’ ku e donashon aki, pa por kumpra unifòrm di skol i paga ‘schoolgeld’ i kumpli ku otro nesesidatnan eskolar di e muchanan. Riba kombinashon di foto por mira momentu ku sr. Percy Virginia ta hasi entrega di e chèk na dirigentenan di GVI, i tambe por haya un impreshon di e bishita e siman aki di Banco di Caribe na e instansia momentu ku representante di BdC ta den kombersashon ku dirigente i e muchanan.
WILLEMSTAD - Tur aña den luna di sèptèmber Kas di Kultura ta selebrá Siman di Kultura. Kada aña ta toka turno na un bario pa organisá e aktividat akí. E aña akí Kas di Kultura lo kumpli su promé lustro organisando e evento akí i a toka turno na e bario di Suffisant pa ta e bario anfitrion pa e Siman di Kultura e aña akí. Kas di Kultura a aserká Sentro di Rekreashon Suffisant pa nan organisá e siman di Kultura. Direktiva di SRS (Klup di Shell) na su turno huntu ku direktiva di FUBASU (Fundashon Bario di Suffisant) a instituí un komishon ku ta enkargá ku organisashon di e Siman di Kultura den su totalidat. E komishon ta konsistí di (eks)habitantenan di Suffisant ku a pone nan mes disponibel pa karga e proyekto akí. E komishon a sinta vários biaha kaba pa planifiká un programa pa e Siman di Kultura. Tin hopi trabou pa hasi i ta konhunto nos por logra pa asina yega na un Siman di Kultura eksitoso. Habitantenan por a tuma nota kaba di limpiesa den bario, kual tambe ta parti di e proyekto pa asina kana yega na e Siman di Kultura. E aña akí Siman di Kultura ta den e siman di 12 sèptèmber te ku 21 sèptèmber 2008. Pues den e siman akí Suffisant lo bria di punta pa punta den un ambiente hopi festivo kaminda kada un di nos habitantenan por disfrutá i demostrá kuantu nos ta stima nos dushi bario Suffisant. Habitantenan di Suffisant ta keda kordialmente invitá na un atardi di informashon djadumingu awor dia 20 yüli 2008 di 4 or pa 6 or atardi na SRS (Klup di Shell).
WILLEMSTAD- Algemeen Pensioenfonds van de Nederlandse Antillen (APNA), a hasi entrega di su plan di parselashon Damasco Resort. Ta trata aki di e plan di parselashon na Jan Thiel West ku nos a yama Damasco Resort. Damasco mihó konosí pa mayoria komo Jan Thiel, ta un plantage ku ta data di fin di siglo 17. Investigashonnan ku a hasi a mustra ku plantage Damasco alias Jan Thiel a konosé un seri di doño. E promé doño tabata Jan Thielen. Despues ku sr. Jan Thielen a fayesé na 1737 e plantage a kambia di doño 20 biaha, promé di a pasa den man di APNA na 1979 pa un suma di 10 mion florin. Na aña 1915 te ku aña 1979 Famia Perret Gentil tabata e doño di e área ku tabata 400 ha. Na aña 1925 nan a bende 29 ha di tereno ku Shell pa a pasa pipa di zeta. E famia a hasi diferente kos ku e tereno. Entre otro a lanta un plantashon di fruta i tambe e tabatin krio di hopi bestia. Banda di esei tambe a usa e tereno pa saka salu i bende esakinan ku barkunan. Na aña 1924 a bin traha un playa ku a keda inougurá komo Jan Thiel Beach. I ku Awendia yama Zanzibar. Durante añanan 60 e famia Perret Gentil a kuminsá parselá e parti ost di e plantage bieu. Esaki tabata kuminsamentu di e fin di e era di plantage Jan Thiel. E fin definitivo a yega na momento ku nan a bende e plantage na aña 1979 ku APNA. APNA na su turno a kuminsá fo’i 1990 pa parselá gran parti di terenonan pa bibienda i proyektonan turístiko. E plan di parselashon aki a hiba un invershon di 5 mion florin. Tin un kantidat di 148 parsela ku tin un grandura promedio di 500 meter kuadrá, kontrali na e parselanan di Vista Royal ku ta mas grandi i mas karu.
WILLEMSTAD – Un kantidat di 359 studiante lo sali otro siman pa Ulanda repartí den 3 dia riba buelo di KLM. E promé grupo lo sali riba dia 22, kua grupo ta esnan ku tin ku biaha pa Ulanda pa siudatnan ku no ta Rotterdam, Den Haag, Leiden, Amsterdam i Groningen. Riba dianan 23 i 24 di yüli próksimo e gruponan ku lo sali lo bai e destinashonnan ariba menshoná kaminda nan lo bai ta den promé luna den preparashon di orientashon i otro detayenan pa nan establesé nan mes na Ulanda. E siklo di informashon a tèrminá pa loke ta trata Kòrsou, awor nan lo tin diferente preparashon den famianan ku ta tumando lugá, pa otro siman por despedí di e gruponan riba nan respektivo dia di partida. Manera LA PRENSA a anunsiá kaba e aña aki lo tin ménos preshon debí ku a repartí e bekadonan riba tres buelo ku ta hasi e preshon na aeropuerto ménos, kompará ku añanan anterior. Lo no tin kambionan pa loke ta tráfiko i ku por tuma despedida di e studiante na aeropuerto na e sala di ‘check-in’, promé ku nan subi e trapi bai ariba. Despues ku nan subi e trapi, ya lo no por mira e studiantenan aki mas, komokiera ku e aeropuerto ta será ku lo no por tuma despedida for di distansia di e otro. SSC durante e último dianan ta sumamente okupá pa atendé e último detayenan promé ku e studiantenan subi nan buelo pa nan estudionan ku nan a solisitá. E úniko peso ku hopi ta reklamando ta e echo di e euro ku ta haltu i ku e studiantenan lo bai kai den un temporada desfaborabel pa loke ta trata e tasa di kambio di florin pa euro. Den último dos dianan e euro a baha relativamente, pero kompará ku añanan anterior tin un diferensia grandi den e kambio di florin antiano pa euro. Por lo general den e siman aki tabatin e anochi di informashon den kua tur studiante a partisipá i hopi énfasis a keda poné riba e asuntu di ‘loverboy’.
