ORANJESTAD- Diaranson mainta Minister President sr. Nelson Oduber y Minister di Finanzas y Asunto Economico sr. Nilo Swaen a ricibi bishita di un delegacion di e banco Venezolano Banvalor, consistiendo di e Presidente, sr. Leopoldo Castillo y e Presidente di Junta Directiva, sr. Homero Farias.
Meta di e bishita di e delegacion aki ta pa mustra nan interes den e desaroyo bancario di nos isla.

ORANJESTAD- Recientemente, Sra. Marlushka Scheper, Customer Interface Manager di SETAR a splica encuanto di e fecha di pago pa cuentanan di SETAR. Ela enfatisa cu e ultimo fecha di pago ta tur luna dia 8. Den caso cu dia 8 ta cai den fin di siman of dia di fiesta e ora ei e ultimo dia di pago ta e siguiente dialuna of siguiente dia di trabou. Semper ta consehabel pa e cliente no warda te cu e ultimo dia di pago pa paga su cobransa pa evita di perde tempo door di para den rij pa paga. E cliente ta core e risico tambe cu e por lubida di paga e cobransa na tempo cu consequencia cu e cliente por haña un boet.
Con cliente por ricibi su cobransa?
Tur cliente ta ricibi nan cobransa mensualmente via post, of electronico online via e-cuenta. Clientenan cu ta registra pa haci uso di e-cuenta ta ricibi tur luna, na momento cu e cobransa ta cla, un e-mail informand’e cu e por wak su cuenta via e-Cuenta. Beneficio di usa e-cuenta pa ricibi bo cobransa ta: Bo ta ricibi bo cobransa tempran, bo por usa e-cuenta pa wak bek e cobransanan di prome cu bo a yega di ricibi y pagonan haci.
Con cliente por paga su recibo?
Un cliente por paga su recibo den e siguiente formanan:
Via pago automatico via banco y via cuenta online.
Un pago automatico ta e forma di mas facil y eficiente pa paga bo cuenta. Un pago automatico ta un instruccion na bo banco preferi pa mensualmente paga bo cobransa di telefon for di bo cuenta coriente. Beneficionan di un pago automatico ta cu bo no por lubida di paga bo recibo na tempo y bo ta evita di para den rij pa paga na ultimo ora.

ORANJESTAD- JCI Aruba Female ta un organisacion afilia na Junior Chamber Internacional mundialmente reconoci.
E organisacion aki ta pa hendenan hoben. E ta un organisacion cu ta duna tur hoben e oportunidad di desaroya y participa activamente den projectonan constructivo. JCI Aruba Female conoce cuater campo di oportunidad, esakinan ta : Desaroyo Personal, Comunidad, Internashonal y Negoshi.
JCI Aruba Female ta invita comunidad di Aruba pa un training titula: “E arte di papia den publico”.
Meta di e training aki ta pa bo haya e hermentnan con abo como persona mester prepara
y presenta bo mes pa papia den publico cual sea e ocasion.
Tur e conocemento cu bo adkiri for di e training aki sigur lo por wordo usa den bo desaroyo personal y profesional.E facilidor pa e training aki lo ta Senadora Elva Angela y e training lo tuma lugar diasabra 26 di juli 2008 di 10:00or am pa 1:00or pm na Casa del Mar.
JCI Aruba Female ta invita tur organisacion local, tur hoben y adulto y miembronan pa atende e training importante aki. JCI Aruba Female ta ofreciendo bo e hermentnan necesario, haci uso di e oportunidad aki y asisti na e training intersante aki.
Pa mas informashon of pa inscripcion por tuma contacto cu e siguiente miembronan :
Jaclyn Agunbero740-7377 of Norma Rodriquez 5825629

ORANJESTAD- E preparacionnan di Miss Aruba 2008 ta den su ultimo siman, pa asina Aruba conoce su proximo Miss Aruba 2008.
E certamen final lo tuma lugar dia 2 di augustus y ya e ensayonan final a cuminsa, na unda Aruba por conta un biaha mas di un anochi fenomenal cu produccionnan sublime y espectacular manera e mentenan creativo di Star Promotion sa di trece dilanti durante e ultimo añanan.
E candidatanan ta haciendo e ultimo detayenan riba nan diferente presentacion y esaki sigur ta haci e calidad di e certamen nacional halto.
E apertura di e anochi ta un mensahe di inspiración di positivismo cu nos como un bon cuidadano mester transmiti cu nos ta orguyoso di ta biba riba e isla Aruba y cu nos mester uni hunto y mustra mundo henter cu nos ta keda un isla felis.
Un produccion musical espectacular cu efectonan special ta haci e apertura aki un biaha mas grandi. Sigur teniendo na cuenta e cu e coreografia di e candidatanan ta den man di e talentoso John Freddy Montoya di Departamento di Cultura. E musica, cu tawata na encargo di IQ music Lab, hunto cu e efectonan di Elite Sound & Lightning lo trece e anochi aki ta haci e produccion aki riba un nivel internacional. No por keda sin menciona e actitud y elegancia di e protagonistanan di anochi cu ta e 9 beyesa Arubana, ta engrandece esaki un tiki mas. E apertura lo ser presenta tambe cu e grupo di baile “Superdancers” bow direccion di Magali Croes.
No por keda sin menciona e ensayonan intensivo di pasarela bow encargo di Boyoura Martijn cu lo haci e segmento di trahe di baño hunto cu “Leonisa” uno espectacular. Sigur e fashionistanan ta pendiente di e creatividad di cada un di e trahenan di gala den e parada di moda 2008.

Logronan importante pa Aruba y Antiyas, via un proceso largo y cu hopi trabou su tras
ORANJESTAD – E aña aki tabata un aña cu hopi ocupa den mundo politico internacional. Por pensa ariba economia, conflictonan entre paisnan bisiña y tambe nos relacion cu Europa a wordo formaliza mas ainda. Cambionan di kieswet a wordo pasa luna pasa den Tweede Kamer na den Haag, Hulanda. E cambionan aki a hasi posibel pa Arubianonan (y tambe Antiyanonan) haya derecho di voto pa parlamento Europeo. E por zona algo hopi administrativo, pero e por tin consecuencianan grandi pa nos islanan. Un di e reiteracionan di e proceso aki tabata ta cu tur esnan di nacionalidad Hulandes residencia ariba Aruba y e islanan Antiyano ta “volwaardig Europees Burgers” y consecuentemente no ta merece e discriminacion di no por vota pa parlamento Europeo.
E cambionan den kieswet di luna pasa, no a cay for di cielo. E tabata un proceso cu a tuma mas o menos 4 aña for di su comienso te na final. E derecho di voto pa parlamento Europeo tabata uno hopi discriminatorio. Como un Hulandes Arubiano, si bo ta residencia na Caracas, algun miya pa zuid di Aruba, bo tabata tin derecho total pa di voto pa Union Europeo, pero un poco mas pa Nord di Caracas esey no por mas, aunke cu e teritorionan aki ta di Reino. Pa un ciudadano di Reino esey tabata algo masha descriminatorio mes, pero tabata basa ariba reglanan cu a wordo implementa den añanan 70, tempo cu tabata formalisando Union Europeo for di loke e tempo aya tabata Comunidad Comun Europeo.
Na 2004 Mike Eman y Benny Sevinger a cuminsa un proceso cu nan mes no a pensa cu lo pora dura asina largo. Hunto cu dr. Mito Croes nan cuminsa cu un test-case ariba votamento pa parlamento Europeo. Eman y Sevinger a purba inscribi nan mes pa por hasi esaki na e instituto indica na Den Haag. For di antemano caba, nan tabata sa cu e respuesta pa nan peticion lo ta negativo. Ainsa cu e resultado negativo di e inscripcion a yega, a cuminsa un caso via e canalnan legal. Durante añanan e proceso a pasa entre otro via Raad van Staate, Corte di Husticia Europeo y na ultimo finalisando den Tweede Kamer Hulandes.

Skina di Sorti, awe djabièrnè 25 di yüli di 2008, ta kuminsá ku deseá tur hende un bon dia. Den e disiplina ku mi ta praktiká, echonan tin importansia (ta relevante) a medida di nan impakto riba desaroyo di ékis proseso ku ta wòrdu kontemplá (opheto di análisis). Si kalidat di maneho ta opheto di análisis, akshon gubernamental ku a impaktá e elementonan ku ta determiná nivel di bida di komunidat ta echonan relevante.
****
Kosnan bon i malu ku por a tuma lugá pero ku no tabata tin un “causaal verband” (akshon gubernamental a determiná òf influensia e fenómeno su direkshon, dinámika i òf dimenshon) signifikante (grado di impakto ta importante), apesar ku nan por wòrdu eksperensia komo positivo òf negativo den e kuadro di análisis ta irelevante. Si por ehèmpel kresementu ekonómiko (un instrumento pa impaktá nivel di bida general den pais) ta bou di lokual mester a wòrdu realisá, akshonamentu gubernamental pa lokual ta e aspekto ei ta pober.
****
E echo ku e kresementu ekonómiko por wòrdu eksperensiá pa ékis grupo komo positivo ta irelevante. Si kresementu ekonómiko den un forma konsistente (pa añanan tras di otro) no ta kondusí na kambio relevante den e nivel di bida di e gruponan mas vulnerabel, akshonamentu gubernamental mester wòrdu konsiderá komo pober. Un gobièrnu efektivo mester sa kon ta utilisá e instrumentonan ku tin na su disposishon. E tin di hasi eskoho i si e no skohe (laga sirkunstansia impulsá kon kos ta kana) òf skohe robes, mester kalifiká e akshonamentu gubernamental komo defisiente.

Por spera vários kaso den korte di hende malu dor di asbèst

WILLEMSTAD - Turesten ku na Kòrsou ta ketu bai pendiente di resultado di kasonan di asbestos ku tabatin den último tempunan tin speransa ku tur víktima di asbestos por haña un rekompensa na Ulanda.
Resientemente e ofisina di malesanan di trabou di e sindikato ulandes FNV a gana pa di promé biaha un kaso di asbestos den korte.
Ta trata aki di e malesa di stòf di asbèst ku ta afekto pulmon di esun ku a traha sin protekshon ku asbèst. Te awor akí tabata asina ku ta únikamente hendenan ku kanser na pulmon ku tabata haña e rekompensa. Empleadonan ku asbestos òf ku tabata sufri di otro malesanan relashoná ku asbèst no tabata bin na remarke pa un rekompensa finansiero asina e ofisina a bisa.
E kaso ku a gana resientemente na Ulanda ta relashoná ku e elektromontùr Govert van der Kemp, ku durante di su trabou den añanan setenta tabatin kontakto ku asbèst sin protekshon durante di su trabou.
E mester a pasa kabel den plafòntnan kaminda partinan di asbèst tabata kita. Algun aña pasá a deskubrí ku e tin asbestos despues ku el a kuminsá haña problema ku tosamentu i rosea kòrtiku. Turesten a logra na drenta un areglo di pago ku e kompania kaminda e tabata traha.
E kompania ta pendiente, pasobra nan ta spera ku e kaso aki ta unu di e hopinan ku lo sigui. I chèns ta grandi ku e kantidat di víktimanan lo ta hopi grandi. Loke ta fastioso ta ku ta obligá e hendenan ku bira malu pa demostrá despues di 20 te ku 40 aña ku nan tabatin kontakto ku asbèst den nan trabou.Ta p'esei ta nesesario pa awor akí traha un fail asina ku bo sa ku bo tabatin kontakto no protehá ku asbèst.

WILLEMSTAD – E preokupashon pa konsekuensia di esfuersonan ku hendenan ta hasiendo awendia pa ta bunita ta un preokupashon, ounke ta difísil pa gana e lucha kontra di merkadeo di empresanan di kosmétika. Un produkto ku ta masha popular den esfuersonan pa keda hóben ta e asina yamá botox. E produkto aki ta manera un remedi milagroso ku ta yuda kita tur ploi na diferente parti di kurpa por prinsipalmente den kara i na garganta.
Botox a bini den añanan 90 riba merkado i te ainda tin monopolio riba dje. E empresa ku ta sali na interes di konsumidónan merikano Public Citizen a bisa, ku tin relativamente masha poko keho riba uso di botox. Pro tin si 16 hende di kua ta konosí ku nan a muri debí na diferente reakshon i konsekuensia di oso di botox. Tambe tin 658 hende ku a bira malu despues ku nan a usa e produkto.

Botox ta e nòmber ku ta usa pa e produkto botuline toxine A. Esaki ta un proteina ku tin den naturalesa ku ta relahá spirnan i di e forma ei ta fris ploi. Den mundu médiko a us’é hopi aña kaba pa finnan medisinal. I tin mas ku dies aña ku ta usando Botox den mundu di beyesa.

E organisashon di konsumidó a bisa ku uso di botox ta duna prinsipalmente problema ku halamentu di rosea. Pero esun ku usa e produkto pa rasonnan kosmétiko tin ménos problema.
Public Citizen ta tratando sinembargo pa pone ku dòkternan ta duna nan pashèntnan un aviso skibí kada biaha ku nan inyektá Botox. Na Inglatera i na Alemania tin reglanan stringente kaba pa esaki i dòkternan franses ku ta inyekt’é mester tin kualifikashonnan akadémiko kirúrgiko.

PARIS, Fransia, - E kandidato demókrata pa Kas Blanku, Barack Obama, ta sper’é na Paris awe, pa un bishita relámpago limitá ofisialmente pa un reunion ku e presidente, Nicolas Sarkozy, na Palasio Eliseo, siguí pa un rueda di prensa konhunto, promé ku e sigui su biahe na Reino Uní.
E paseo kòrtiku di Obama na Paris, ta kontrali ku su bishita na Berlin, kaminda, ademas di a reuní ku e kansier, Angela Merkel, i e minister di Eksterior, Frank Walter Steinmeier, a pronunsiá un diskurso dilanti mas o ménos 200.000 persona durante kua el a urgí pa un mayó koperashon entre Merka i Europa pa konfrontá e retonan nobo di siglo XXI.
No a indiká kon largu e reunion entre Sarkozy i Obama lo dura, ku lo kuminsá 3’or di atardi, durante kua den e mesun reunion ei lo trata e relashonnan franses-merikano i e temanan grandi internashonal.
“Obama ta mi amigu”, e hefe di Estado konservador franses a bisa korant Le Figaro.
Sarkozy, kende komo minister franses di Interior a reuní ku e senador di Illinois na Washington na aña 2006, tin un rekuerdo “hopi bon” di e enkuentro ei.
“Kontrali na mi konseheronan di e sélula diplomátiko, nunka mi a kere den e posibilidatnan di Hillary Clinton. Semper mi a bisa ku Obama lo bai keda nombrá komo kandidato di Partido Demókrata pa Presidensia di Merka”, e hefe di Estado a sigurá.
Segun e korant, Sarkozy tabata hopi kouteloso pa realisá pronóstikonan riba resultado di e elekshonnan presidensial di novèmber benidero, pero e no a skonde e sentimentu ku viktoria di Obama “lo tin balides” pa su strategia di rekonsiliashon ku Merka.

WILLEMSTAD – Entrante djaluna e trabounan pa drecha Van Engelenweg ku ta konektá ku Cas Coraweg i Santa Rosaweg lo kuminsá. Diputado Anthony Godett a duna instrukshon pa Servisio pa Obra Públiko (DOW) realisá e trabou aki. E trabounan aki ta inisiá den koperashon ku departamentu tékniko di Polis di Tráfiko, konsiderando ku e kondishon di e kaya aki ta hopi malu. Komo konsekuensia di e daño kousá pa vehíkulonan pisá i komo konsekuensia di áwaseru ku a penetrá den e fundeshi, e kaminda aki a debilitá enormemente i e kaminda aworakí ta den estado di deterioro serio. Esei ta nifiká ku mester remplasá/fortifiká e fundeshi (ku kalksteen) pa asina garantisá un kaminda ku ta keda bon pa hopi aña. Lo bira nesesario pa tuma medidanan di tráfiko durante e periodo ku trabounan ta tumando lugá den Van Engelenweg. Un di e medidanan ta ku ta sera Van Engelenweg pa tráfiko biniendo for di Cas Coraweg i tráfiko for di Sta. Rosaweg. Aparte di esei, e kaya lo ta aksesibel pa habitantenan di e kaya. E trabounan ta tuma mas o ménos 10 siman i lo ta na enkargo di e kontratista CWM BV. E proyekto ta kosta 855 mil florin, finansiá pa Stichting Wegenfonds Curaçao.
Servisio pa Obra Públiko ta konsiente ku e trabounan aki lo por nifiká molèster pa esnan ku ta trafiká den e kaya aki. E kontratista lo hasi tur esfuerso pa limitá e molèster aki te na un mínimo. Den kòmbersashon ku diputado Anthony Godett a splika ku e trabounan dirigí lo kontinuá tantu pa barionan prudente komo esnan ménos prudente di manera ku por tin kamindanan den bon kondishon. Ademas diputado Godett ta splika ku despues ku Soto a haña atenshon, mester duna Van Engelenweg, pa sigui ku Mahumaweg, Maishiweg inkluyendo Seru Loraweg. E mandatario ta pone énfasis ku e trabounan na bienestar di e komunidat ta kontinuá den silensio.

WILLEMSTAD – Awe ta un dia importante pa tur esnan ku a yuda kontribuí ku nan labor na desaroyo di nos dushi isla. Ta esnan ku awe ta mas grandi, a yuda konstruí e fundeshi fuerte riba kual Kòrsou ta para te ku dia di awe manera un baranka fuerte den laman Karibe, segun Partido Nashonal di Pueblo (PNP).
Segun e partido bèrdè, hopi biaha ta keha di e situashon lokal, pero ora kompará esaki ku diferente isla den region, tur hende ta atmití ku Kòrsou ta un pèrla den laman Karibe. Prueba di esaki ta, ku sentro di suidat úniko, a kaba di kumpli 10 aña riba lista di Curaçao World Heritage. Kòrsou tin un refineria, un sektor di turismo kresiente i sektor finansiero kada un pilarnan di e ekonomia.
E ekonomia sólido i e nivel di bida relativamente bon kompará ku e region no ta desaroyonan ku a logra di un dia pa otro. Ta añanan i mas añanan di labor i dedikashon di esnan ku awe ta penshonado a hasi posibel, ku awe ku ta mas hóben por piki e frutanan di nan labor. I pa esaki na nòmber di tur habitante di Kòrsou, Partido Nashonal di Pueblo ta yama tur penshonado danki pa nan kontribushon balioso.
PNP ta deseá tur penshonado un felis dia i ku Dios bendishoná kada un di boso i duna boso hopi aña mas di bida yená ku hopi felisidat, prosperidat i espesialmente un bon salú riba tur kos.

WILLEMSTAD - Manera ta konosí, na final di aña pasá Ofisina di Turismo (CTB) huntu ku ‘CHATA Dive Task Force’ i operadornan asosiá di sambuyamentu lokal, a reuní i akordá e stándar mínimo pa sentronan pa sambuyá.
Esaki tabata un esfuerso konhunto entre e partidonan envolví, pa garantisá servisionan di kalidat tòp na e industria di turismo kresiente na Kòrsou i pa konsolidá e posishon di nos isla komo un di e destinashonnan tòp pa sambuyadó.
E ehersisio aki ta esensial pa e sentronan pa sambuyá por ofresé nan klientenan un fasilidat limpi, ordená i konfortabel. Di e mes manera, studiantenan di e sentronan pa sambuyá mester risibí instrukshon usando ekipo moderno, al dia i bon mantené durante tur lès, sea den lokal, den awanan será òf den laman.
Komo parti di e standard lo rekerí pa sentronan pa sambuyá tin disponibel durante tur aktividat di sambuyamentu, ekipo di seguridat, manera un kaha di ayudo di emergensia i oksígeno. Tambe nan lo mester inkorporá konsientisashon ambiental den aktividatnan di sambuyamentu di rekreashon i snòrkelmentu.
Den kaso di sentronan pa sambuyá ku ta operá boto, nan mester ta ekipá ku ekipo di seguridat apropiá i tambe kumpli ku prosedura di seguridat manera instrukshon ekstenso i prosedura di responsabilisashon apropiá pa sambuyadó.
E stándarnan mínimo lo sirbi pa garantisá kalidat i seguridat pa tantu e dunadó di servisio komo pa e sambuyadó i esun ku ta snòrkel pa rekreo.

WILLEMSTAD- Un pregunta ku hopi hende ta hasiendo nan mes ta: ‘Kiko abo lo hasi ku 35 mil florin?’. E pregunta lansá pa Banco di Caribe i ku den e último simannan aki tin tur hende ansioso, awor lo konta ku imaginashon di nos muchanan tambe.
E kampaña pa fiansa personal di Banco di Caribe ta ofresé 7.35% (APR 12.15%) pa un suma di 10 mil florin òf mas i un chèns úniko di gana 35,000 florin na yanüari 2009. Miéntras ku adultonan ta pensando e mihó forma di invertí òf spar e 35 mil florin, nos muchanan lo ‘pens’é i pint’é’. Muchanan i nan mayornan ta keda kordialmente invitá pa ‘topa’ ku Banco di Caribe djasabra awor na bukhandel Bruna den Zuikertuin Mall. Lo tin oportunidat pa risibí informashon di e kampaña pa fiansa personal i mesora yena aplikashon, miéntras tantu nos muchanan ta wòrdu entretené den un ‘Kids Corner’ ku Banco di Caribe a hasi posibel na unda ku lo tin oportunidat di klùr e plachi spesial di e kampaña pa nos muchanan tambe gana premio.
“Pa nos por ofresé un servisio rápido i brinda mas tantu informashon posibel, nos a opta pa tin dos representante di e departamentu di fiansa personal presente. Pa potensial klientenan ta importante pa nan bin ku un identifikashon bálido, deklarashon di doño di trabou, 2 último slepnan di salario i statement di banko i nos ta yena e aplikashon mesora”, asina representante di Banco di Caribe a komentá.

WILLEMSTAD – Sosiedat di Komersiantenan di Otrabanda (SKO) i Downtown Management Organization (DMO) a reuní na bienestar di sentro di siudat i lo bai sali otro siman den publisidat riba e unidat aki. Durante un konferensha di prensa otro siman, ámbos organisashon lo bai amplia riba e temanan importante di sentro di siudat. Un di e temanan ku nan lo bai atendé ta e asuntu di Megapir II ku nan ta para riba ku mester bin den Punda.
Anteriormente DMO a mustra su opinion tokante e partikularidat aki, indikando ku e alternativa mester keda Punda. E asuntu di Caracasbaai, segun nan pensamentu den pasado lo tin sierto inkumbinensia, pa e distansia di e Megapir II. No solamente DMO, komo organisashon komersiante, pero tambe otro instansianan tambe ta kere ku mester konstruí megapir den Punda. Den e siman aki Agustin Diaz di CPA a mustra, ku Caracasbaai lo ta e sitio, pero e dos organisashonnan a reuní i a yega na un agènda di koperashon pa bienestar di sentro di siudat.
Ámbos organisashon ta kere, ku e interes di sentro di siudat mester por ser mirá di un manera, den kua e desaroyo ekonómiko lo keda fortifiká pa un megapir den sentro di siudat. E distansia lo por tin diferente efekto negativo, ya ku e tráfiko lo por ta un opstákulo riba e ruta aki. Banda di e asuntu di megapir tambe tin proyektonan ku SKO i DMO lo bai traha huntu pa realisá. Komersio ta sumamente kontentu ku e desaroyo aki, ya ku tabata anhelá pa DMO i SKO uni pa progreso di sentro di siudat.

LONDRES – Presidente di Federashon Internashonal di Outomobilismo (FIA), Max Mosley, djaweps a gana un demanda pa invashon di privasidat kontra e korant ingles ku a akus’é di a partisipá den un orgia ku prostitutanan ku un tema nazi.
E wes David Eady a disidí ku e korant News of the World mester paga Mosley 60.000 libra esterlina (120.000 dòler) na daño, ademas di e gastunan legal pa e historia ku ta bisa ku e lider di FIA a partisipá den un orgia sadomasokista ku tema di nazi.
E gastunan legal di Mosley ta yega un 450.000 libra (900.000 dòler). E korant tambe mester paga su mes gastunan ku ta yega un 400.000 libra (800.000 dòler).
Mosley di 68 aña, ta atmití e ambiente ku prostitutanan, pero e ta afirmá ku esaki tabata privá i ku e no tabatin un tema nazi.
“E veredikto ta eliminá e mentira (di e tema) nazi ku kua News of the World a trata di hustifiká su metementu bergonsoso den mi bida privá”, Mosley a bisa den un komunikado. “Mi ta spera ku mi kaso lo yuda evitá ku e korantnan den Reino Uni ta hasi e tipo di periodismo di invashon i malisioso aki”.
E tema tabata spesialmente sensitivo pasobra Mosley ta yu di Oswald Mosley, e prinsipal polítiko fasista di Gran Bretaña den dékada di 1930 i kende tabatin Adolf Hitler komo invitado na su kasamentu.
E pago ta grandi pa un demanda di privasidat na Gran Bretaña, kaminda e kompensashonnan normalmente ta modesto. Pero e wes no a duna e indeminsashon ku Mosley a pidi pa evitá ku otro korantnan ta publiká historianan similar.

SAMUEL-LYTE
Vilma
A laga atras su kasá Prophet Mohipaul Samuel, yunan Pauline Samuel, Daniel i Mark Samuel, ñetu Isaiah Farley, ruman Barbra Nurse, kuñá Sonadai Mahangoo. Akto di entiero ta djaluna 28 yüli for di Bottelier pa santana Bottelier. Bishita 9.30or-11.30or siguí pa un sirbishi 11.30or.

MAGDALENA
Aldrin
Mihó konosí komo Dini
A laga atras su mama Selma Magdalena, kompañera Nelyda Nita, yunan Dinaldrick, Aldier, Micheline, Aldrinela, Jayden, rumannan Mariela i Humphrey Mercera, Merelin Magdalena, Roland Magdalena i Lian Balentina, Pursey i Czigany Magdalena, Guilen Magdalena, Erick Capriles. Akto di entiero ta djasabra 26 yüli na misa Sta. Maria. Bishita 9or-11or. Promé ku entiero tin un s.s. di misa.

ANTONIA
Wimbert Atanacio (repentino)
Mihó konosí komo Win
A laga atras su kasá Lourdes Antonia-Godfried, yunan Arlene Antonia, Shurmin i Nancy Antonia, Wimbert i Ismeri Antonia tur ku nan yunan, yunan di kriansa Angelique Godfried, Rodney Godfried i esposa. Akto di entiero ta djadumingu 27 yüli 4or for di El Señorial pa santana Gr. Kwartier. Bishita 1or. Promé ku entiero tin un respòns na el señorial.

DOS SANTOS VIEIRA
Rosa
Mihó konosí komo Rosita Modista
A laga atras su yunan maria Custodia Dos Santos, Maria Ilda Dos Santos Cappadona, Elvira Dos Santos Pereira, Antonia Dos Santos. Akto di entiero ta djadumingu 27 yüli for di misa Suffisant pa santana Sta. Maria. Bishita 1or-3or.

WILLEMSTAD – Milan “Golden Boy” Eugenio ta hopi solisitá tantu pa promotornan lokal komo internashonal ku kier mir’é komo un atrakshon speshal den nan programanan.
E “Golden Boy” di Kòrsou tin bon kondishon físiko, bon téknika i ta bringa sabí.
Awor aki tur su atenshon ta fihá riba proyekto T&T: Fight Night di dia 14 di ougùstùs awor kaminda Milan lo ta den kompetensia pa un faha i título mundial amatùr di World Association of Kickboxing Organizations, W.A.K.O.
Esaki lo tuma lugá den luna di ougùstùs na Trinidad & Tobago.
Despues di e kompromiso aki “Golden Boy” ku ta bèk bou di maneho di Cijntje Team: O.J., lo e ta den rin na kas pa un otro kompetensia mas pa faha i título mundial amatùr, e biaha aki di World Kickboxing Network, WKN.
E pelea aki lo tuma lugá na Kòrsou i ta forma parti di CurThaiBo proyekto 3: Caribbean World Classics 2008.
Milan su último kombatenan tabata na Sürnam i Aruba.
Keda pendiente pa mir’é despues di Trinidad, mas determiná ku nunka den akshon na Kòrsou.
Milan ta na kabes di e tim di talentonan hóben ku ta den trainingscamp di CurTaiBo preparando pa proyekto T & T: Night 14 di ougùstùs.
“Golden Boy” Eugenio ta e atleta ku tin mayor edat, mas kompetensia, mas eksperensia internashonal den e tim di e generashon nobo di World Kickboxing Network, WKN, Kòrsou den aliansa ku CurThaiBo.

SANTO DOMINGO – E picher di Mets, Pedro Martinez, a yega Repúblika Dominikana ayera despues ku su tata a fayesé.
E tata di Martinez, Pablo Jaime, a bin fayesé djarason na edat di 79 aña despues di un lucha largu ku kanser na selebre pa mas ku un aña. Martinez a bai kas promé ku e “break” di All-Star Game pa ta ku su tata.
“Mi tata a sostenémi masha hopi durante di mi karera”, asina Martinez a bisa. Jaime ta tata tambe di e èks picher di Liga Grandi Ramon Martinez.
Pedro Martinez a regresá Santo Domingo pa por yuda ku areglo di entiero. E ta pone pa tira awe kontra St. Louis, i Mike Pelfrey lo tira na su lugá pa Mets.
Martinez no a tira for di dia 12 di yüli último debí ku e tabatin un skouder leshoná i un leshon na su lies.

AMSTERDAM – Siman pasá djasabra Javier Martina kontra di e ekipo Noordwijk mester a sinta i mira e wega for di riba banki. Pero kontra di e ekipo di germanicus el a haña su chèns.
E rechtsbuiten antiano a hunga un tremendo partido ku dos asistensia i un gol i tabata e hòmber grandi di wega.
“Mi ta spera ku kada bes ku e hunga e mustra asina”, e coach Marco van Basten a reakshoná kontentu.
“Despues di weganan na De Lutte òf Inglatera lo mi bai pone e roster na 25 hungadó ya ku tin di mas hungadó awor aki”, Van Basten a primintí.
Martina ta spera i por ta entre e 25 hungadónan ei ya ku loke el a demostrá djamars último tabata tremendo.
“Mi a haña ku djamars ei Javier a hunga un bon partido”, asina van Basten a bisa.
E atakante di Kòrsou a bisa:”M’a haña nesesario pa demostrá kiko mi tin aden i mi tin plan pa hasi esaki kada bes ku mi haña un oportunidat. Nunka no ta sufisiente”, asina el a bisa.
El a hunga ku masha velosidat, baila su kontrinkantenan i hasi vários pase bon.
Na di 48 minüt di wega riba un pase di Martina Kennedy por a anotá un gol i hasi e skor 4-0.
Nuebe minüt mas lat Javier a kore meimei di tereno kaminda tabatin tereno liber.
Siem de Jong a hasi un pase korekto i Martina no a faya i anotá.
Na di 78 minüt el a demostrá ku e ta den bon forma ora ku el a kore bai i hasi un pase korekto pa Leonardo por a pone e markadó 6-0.

Prof. dr. Lorito ta yama tur hende un felis djabièrnè. Un pabien awe na tur para ku ta ku penshun. Pa nos amigunan penshonado den prensa tambe ta bai un saludo i nan ta hopi: Ronny, Orlando, Paul, Carlos, Maria, Signa, Cedric, Elvin, Mem ta bai un saludo. Na otro penshonadonan manera Eric, Sonia, Morris, Stanley etc. tambe un saludo!
*********
Nos a tende último dianan masha komentario riba e kaso den Nieuwe Straat. E kaso ta den investigashon i Kabuya ta detené. E kos ku nos no a komprondé ta, ku tin informashon ku ta un krùk di bar a usa pa lastimá e víktima kuné. Pero ketu bai tin medio ta insistí pa papia di piedra i klenku. Es mas, na Ulanda nan a bisa klaramente ‘stenegooier gearresteerd”. Nos tin ku warda awor te ora tin un kaso den korte pa nos tende kiko ta kiko. Nos a komprondé, ku e víktima mes a indiká, ku su pèchi di Boston a keda tur kibrá pa motibu di e akto aki.
*********
Papiando di Boston, yen di hende nervioso e fin di siman aki pasobra Boston ta bai topa Yankees. Nos amigunan aya no ke tende nada malu di nan ekipo. Nan tabata den un proseso di duele nashonal, na momentu ku kosnan no tabata bayendo bon ku nan. Nan tabata skonde pa no komentá nada. Bo mester tende nan awe: nan tin e boka mas grandi atrobe. Ta di kon hende mester t’asina?
*********
Bo ta mira tur biaha ku den mundu internashonal hendenan ta demostrá nan grandesa. Si bo tuma nota ku Hugo Chávez a duna Rei di Spaña un man, bo ta komprondé, ku aki ta un kos grandi a pasa. Ken no ta kòrda ku Rei Juan Carlos a manda Chávez sera su boca. “Por que no ta calles!” a zona rònt mundu i te awe ta un di e filmashonnan mas gustá riba youtube.com