WILLEMSTAD -- Konseho di Iglesia lo no tòrnu na derechinan atkirí den un kombenio hurídiko, pero no ta rekonosé ningun matrimonio ku no ta entre parehanan heteroseksual, asina miembro di Konseho di Iglesia Mirtha Leetz-Cijntje a bisa relashoná ku e disputa entre gobièrnu i un pareha di mesun sekso ku korte a duna rason bisando ku mesun derechinan ku tin na Ulanda pa e pareha ta aplikabel na Antia. No ta kuestion di diskriminashon pero pa iglesia matrimonio ta basa di riba prokreashon, asina Leetz a enfatisá. Leetz a bisa ku den diskushonnan na Konseho di Iglesia semper a hasi distinshon entre kombenio hurídiko i matrimonio. Matrimonio ta un kombenio mará na prokreashon, pa forma un famia. E parti di kombenio hurídiko kaminda dos hende (den e kaso aki) di mesun sekso ta sera un kombenio pa regla diferente kos inkluyendo seguro, ta algu ku tur kaminda di mundu bo ta haña esei. Pero no por yama un kombenio asina un matrimonio segun Leetz. Matrimonio pa iglesia ta un sakramento kaminda ta duna otro palabra basá riba e parti natural di kreashon, kaminda Dios a krea e hòmber i muhé i a bisa nan bai i multipliká. Ta e hòmber i muhé huntu por multipliká. Den nos konstelashon kultural, multikultural, kristian na Kòrsou tin e konsepto di matrimonio entre un hòmber i un muhé, o sea Adam i Eva, manera Dios a krea nos promé mayornan. I iglesia ta keda mantené e konsepto aki. Por tin partnership, kombenionan ku ta drenta ku otro i bai biba ku otro, pero nos no ta yam’é matrimonio, segun e Konseho. Maske ku nos tin un kultura hopi religioso nos no a deskriminá hendenan di mesun sekso ku a bai biba huntu. Loke ta un diskushon ta, ku na Ulanda nan ta yam’é un matrimonio, pa nos e no ta un matrimonio. No ta deskriminá hende a base di nan orientashon seksual, pero mester ta kla kiko iglesia ta konsiderá matrimonio segun Palabra di Dios. Aktualmente segun tempu ta bai e ta un baile entre un kombenio hurídiko i loke iglesia ta yama matrimonio, asina Leetz a konkluí.

WILLEMSTAD – Djaweps 24 di yüli Curaçao Chess Players’ Foundation a tene un workshop di Ahedres den Sentro di Bario Janwé.
E workshop aki a keda duná dor di e Gran Maestro Joel Benjamin di Merka.
Benjamin tabata tres biaha kampion di Merka i te ainda ta e Gran Maestro mas hóben di Merka.
El a bini ku un par di su buki nobo di Ahedres, ku el a firma ku ya a ser bendí.
E buki ta hiba di nòmber “American Grandmaster, four decades of adventures”.
Un di e aventuranan sin duda ta e yudansa di dje pa programá e kòmpiuter di IBM, Deep Blue, ku a bin gana di e kampion di mundu Boris Kasparov.
Un total di 20 partisipante tabata tin na e workshop entre kual 9 ahedresista hubenil. Esakinan tabata ménos ku aña pasá, pero un bon sifra pa un bon workshop.
Entre e ahedresistanan adulto tabatin vários di e bon hungadónan di e Klup di Ahedres, Nacho Moron, entre otro e èks reportero di Ahedres di Ulanda, Hans Bohm, e rèfri di Ahedres di torneonan di Corus Alex tambe.
Henter e workshop a bai tokante di e weganan mas interesante di Bobby Fisher i tabatin un grandi di difikultat mas haltu ku aña pasá. No ta por nada tambe ku Bobby Fisher ta un leyenda di Ahedres.
Joel Benjamin ta haña ku Fisher ku su 13 aña a hunga su mihó partido, miéntras ku e mes a hunga su mihó wega ku 15 aña.
Durante di e kombersashon riba e diferente weganan, Benjamin a papia tambe di e sistema di atakenan di Fisher, su fleksibilidat den apertura di wega i su zètnan onorthodox, ku ta pone su kontrinkantenan pensa hopi kiko e tin tras di esaki.

LOS ANGELES, Merka, - E kantante merikano Britney Spears i su eks esposo, e bailarin Kevin Federline, a sera e huisio pa kustodia di nan dos yunan, despues di e ratifikashon ayera di un akuerdo amistoso di parti di un wes na Los Angeles.
Ku e firma di e wes Scott Gordon asina a pone un fin na un amargo disputa hudisial ku e pareha a konfrontá kasi un aña, un bosero di Korte Superior di Los Angeles a konfirmá na AFP.
“Ta un gran alivio pa Federline pa tin e mandato aki ku ta respald’é pa dos aña”, e abogado di e eks esposo di e kantante, Mark Vincent Kaplan a bisa.
E akuerdo, ku ta duna Federline kustodia legal i físiko di e dos yunan, a keda intakto pa Britney su régimen di bishita ounke ku e posibilidat habrí di oumentá e enkuentronan aki ku su yunan, e abogado a bisa.
Segun e resolushon, Spears lo paga Kaplan 250.000 dollar pa a representá su eks esposo i e penshun alimentisio pa e eks bailarin a oumentá di 15.000 dollar pa 20.000, konsiderando e pago retroaktivo for di 15 di yüli.
E propiedatnan di Britney lo sigui bou di kustodia legal di su tata, Jamie Spears.
Dia 18 di yüli último, e abogadonan di Spears, di 26 aña, i Federline di 30 aña, a anunsiá fin di e bataya legal.
E yunan Sean Preston, di 2 aña, i Jayden James, di 1 aña, lo keda ku e eks esposo di Britney.
E abogado di Spears, Laura Wasser, a bisa ku “Britney i Kevin a enkontrá un manera di traha huntu komo mayornan, i e muchanan lo benefisiá debido na esaki”.

WILLEMSTAD - Hóbennan ku a kaba klas 3 i 4 di VSBO por sigui un kurso di dealer na e instituto di formashon ku hotèl Renaissance a instituí. Angelo Martis, hefe di e departamentu di Rekurso Humano di Hotel Renaissance a bisa LA PRENSA, ku e instituto di formashon a wòrdu lantá den kuadro dje ehersisionan di e hotèl pa reklutá personal pa e hotèl i tambe su kasino.
Dia 24 di mei último Hotel Renaissance a tene un marshe di trabou, unda ku 800 persona a apliká. Originalmente e hotèl a partisipá ku e tin mester di 500 trahadó. Angelo Martis a bisa LA PRENSA ku a registrá tur e 800 aplikashonnan i ku a repartí nan den e diferente áreanan i despues a sigui ku e proseso di pre-selekshon. Seguidamente a repartí e solisitantenan ku a kumpli ku e kriterianan i pone nan den e áreanan konserní. Fin di yüni a kuminsá ku e entrevistanan di solisitut. Segun Angelo Martis ta e intenshon pa laga e trahadónan kuminsá traha na luna sèptèmber awor. E promé grupo di trahadó ta bira esnan di ‘house-keeping. ‘E hendenan aki mester kuminsá prepará e kambernan’. E siguiente grupo ku lo wòrdu kontratá lo ta esnan den e sektor di engineering. E sobrá grupo di hende ku ta drenta den servisio ta planeá pa kuminsá traha na novèmber.
CASINO
Lòs di e hendenan ku a solisitá pa traha den kasino, Hotel Renaissance ta habri e posibilidat pa hóbennan ku a kaba VSBO 3 i 4 klas, pa solisitá pa bira dealer. E hefe di e departamentu di Rekurso Humano di Hotel Renaissance a splika, ku e hóbennan ku ta bin na remarke pa sigui e kurso, entre otro mester dominá ingles i konta bon. E kurso ta kuminsá dia 11 di ougùstùs awor i tres dosente di Hotel Renaissance di Aruba ta bin Kòrsou pa duna e kurso, ku ta dura tres luna. E hóbennan ku ta deseá na bin na remarke tin oportunidat pa reakshoná pa mas tardá otro siman. E hóbennan interesá por akudí na e departamentu di Rekurso Humano na e di tres piso na Riffort i hasi nan solisitut. E kurso ta grátis i durante dje kurso e hóbennan ta risibí un suma.

WILLEMSTAD - Miéntras ku den e dianan aki e desaroyonan relashoná ku aseptashon di matrimonio entre homoseksualnan na Antia ta den diskushon na Ulanda, vários homoseksual antiano a legumai nan partisipashon na e promé boto antiano pa gay-nan antiano arubiano, na e parada di boto Gay Pride na Ámsterdam.
E inisiadó dje proyekto di partisipashon pa e antiano i arubianonan, Charlene Oduber a bisa na Ulanda, ku e no a entregá ainda. Entre otro Oduber ta hasi un yamada na ministernan Plenipotensiario Comenencia i Croes, pa partisipá 2 di ougùstùs awor riba e boto ku partisipantenan antiano/arubiano, na e Gay Pride. Oduber: ’’Esaki mester kibra e taboe enkuanto homoseksualidat’’.
Di e 50 homoseksualnan antiano i arubiano ku originalmente a inskribí solamente 15, finalmente a konfirmá nan partisipashon.
Charlene ta lamentá, ku segun e dia ta aserká, e partisipantenan ta anulá. Segun Charlene Oduber, probablemente esaki tin di haber ku e hecho, ku e homoseksualnan ta teme ku nan ta bai muchu den publisidat. “Nan ta bisa mi, ku nan tin miedo di wòrdu rekonosé despues riba pòtrèt i filmashon tantu na Ulanda komo na Antia i Aruba. Un situashon asina aki lo tin konsekuensia pa restu di nan bida”, segun Oduber.
E inisiadó dje proyekto a enfatisá, ku kontrali na loke hopi hende ta pensa, e partisipashon riba e boto, ningun momento so no ta enserá partisipashon sunú.
Segun Oduber, ta e intenshon pa tòg konvensé e hendenan pa partisipá na e boto.

ARIES: Tur laso di amor ta estrechá i bo ta mira e amor reflehá den kada persona, den kada kos ku ta biba. Loke realmente bo mester, ta traha mas den bo bida spiritual. 20.

TAURO: Bo a siña kuida i alimentá bo mes, pa bo por gosa di bon salú. Bo instinto ta realisá kosnan sano, liber i bon. Bo ta biba awor den presente. 12,31,03.

GEMINIS: Lo bo tin éksito riba tereno profeshonal asina manera promoshonnan huntu pa responsabilidat nobo den trabou. 10,14,16.

KANSER: No disidí nada delantá, ya ku e tempu awor ta di bo banda. Skucha e konseho di bo amigunan, pero semper disidí segun bo konsenshi ta dikta. 18,36,50.

LEO: Bo habilidat pa desenvolví bo mes den bo mundu sosial ta enfatisá faborablemente. No aseptá kondishonnan ku no ta di bo agrado. 19,40,32.

VIRGO: Amigunan nobo i ekselente ta kolaborá ku bo pa bo proyektonan funshoná. Destaká tur kosnan bunita ku ta enserá bo banda positivo. 40,10,01.

LIBRA: Tin un mundu di kosnan bunita pa bo. Bo konstansia ta permitíbu habri bo kaminda i logra bo propósito. Ta tempu unda bo mester invertí pa gana. 28,19,45.

SKORPION: For di bo ta alehá tur kos ku ta atrasá i ta perhudikábu i ta dunábu e lugá ku bo meresé pa bo talento i habilidatnan. 05,22,18.

SAGITARIO: A yega ayudo pa bo ku ta un fuente superior i bo mester probechá di dje. Algu spiritual ta rondonábu. Distruí e indesishon i kontrolá bo mente. 02,30,46.

WILLEMSTAD - “Dia nos a anunsiá ku ta bai drecha Van Engelenweg, m’a tende tur sorto di komentario, entre otro, ku nos ta bai drecha e kaya aki pa kita poko voto for di partido PAR. Laga mi klarifiká e kos aki mesora: gobièrnu no t’ei pa hasi polítika ku e kos aki. Nos ta drecha bario pudiente, nos ta drecha bario di hende pober. Nos tin atenshon pa tur bario ku mester di atenshon. Si boso ta kontentu ku loke mi a hasi, boso ta vota p’ami. Si esei no ta e kaso, mi no ta rabia tampoko,” asina diputado Anthony Godett a bisa ayera tardi, djis promé ku el a subi den e mashin grandi di Curaçaose Wegenbouw Maatschappij pa ofisialmente realisá e akto simbóliko pa asina marka kuminsamentu di e trabounan pa drecha e kaya aki.
Manera nos a informá ayera kaba, djaluna awor 28 di yüli ta kuminsá ku trabounan pa drecha e kaya aki Van Engelenweg.
Den su palabranan di introdukshon, e diputado a splika ku tur hende ta konsiente ku Van Engelenweg ta den kondishon hopi malu.
“E kaya aki tin hopi aña sin konosé mantenshon. Ta bin aserka ku vehíkulonan pisá ta usa e kaya aki diariamente, anto esei a pone ku e fundeshi di e kaminda aki a debilitá enormemente i e kaminda awor aki ta den estado hopi malu.
Esei ta nifiká ku práktikamente mester konstruí un kaminda nobo. Mester fortifiká e fundeshi ku e pieda blanku fuerte ku DOW a bin ta usa último añanan ku hopi éksito (e asina yamá “kalksteen”) pa asina garantisá ku e kaminda ta keda fuerte i bon pa hopi aña,” e diputado a trese dilanti. El a bisa ku tin algun ehèmpel kaba di esaki, entre otro na e kaminda di Sumbu.

WILLEMSTAD – “Nos ta hopi kontentu ku e konfiansa ku gobièrnu a bolbe pone den nos, pa ehekutá e trabou aki”, asina Wendell Bonafacio, direktor di e kompania Curaçaose Wegenbouw Maatschappij (CWM) a bisa na momentu ku tabata bai duna inisio na e trabounan pa drecha Van Engelenweg ayera tardi.
Den mas o ménos 10 siman di tempu, lo mester ehekutá e proyekto aki.
CWM ta un dje kompanianan ku durante último añanan aki a bin ta ehekutá basta proyekto pa gobièrnu di Kòrsou. Esaki, huntu ku e otro kompania grandi, MNO-Vervat, ku entre otro ta hasiendo e trabou di rekonstrukshon den Punda awor aki.
E direktor di CWM a bisa ku ta ku hopi plaser e kompania lo hasi e trabou tambe den Van Engelenweg.
Bonafacio a konsiderá nesesario sinembargo pa aklará e punto di gastu di e proyekto ku segun e, ta motibu pa sierto konfushon.
“Mi a tuma nota den prensa ku a skibi ku e proyekto ta kosta 855 mil. Ei mes mi a tuma nota otro kaminda ku e proyekto lo kosta 800 mion.
Lagami splika mesora ku e proyekto aki a kosta 777.523,75. Esei ta inkluso OB ku mester paga,” asina Bonafacio a indiká.

WILLEMSTAD - Shofùrnan ku ta transportá mucha di skol, ta hopi preokupá pa un desishon di gobièrnu, ku den e aña aki lo bai redusí e supsidio ku a destiná pa transporte di mucha di skol.
Nan a aserká nan sindikato SITEK pa atendé e asuntu aki.
Pero segun presidente di SITEK Sidney Justiana, e sindikato ta atendiendo e asuntu i no tin peliger inmediato pa e shofùrnan aki.
Gobièrnu di Kòrsou, den kuadro di esfuersonan pa redusí su gastunan yega na un sistema mas efisiente di funshoná, a anunsiá, ku pa e aña aki lo redusí e supsidio ku ta duna pa transporte eskolar ku 2 mion florin.
Manera ya ta kustumber, mayornan ku pa un òf otro motibu no tin e fasilidat di hiba nan yu skol, por apliká na final di kada aña eskolar pa bin na remarke pa transporte. E servisio ku ta regla esaki ta Servisio pa Asuntunan di Enseñansa, SAE.
E aña aki tabatin un situashon un poko konfuso. Tin mayor ku a bai inskribí ku a haña tende ku ta informá nan despues, si nan ta haña transporte eskolar.
Pero tin mayor ku a bai inskribí, ku a tende mesora ku no tin transporte eskolar. E situashon aki a krea konfushon, tantu entre mayornan komo entre shofùrnan ku ta transportá mucha di skol. Tin mayor ku asta a aserká e shofùrnan den forma direkto. Pa e shofùrnan aki, e trabou aki ta nan entrada prinsipal i komo tal, nan a ekspresá nan preokupashon pa e situashon ku a surgi.

WILLEMSTAD - Kontrali na e kalkulashon ku tabatin, ku den di tres mitar di yüli por a kuminsá paga di dos parti di number di outo pa 2008, e espektativa nobo ta, ku esaki lo no por kuminsá promé ku inisio di ougùstùs benidero.
Esei Ontvanger Errol Goeloe a konfirmá.
Un total di 32 mil outomobilista ainda mester paga number di outo pa e di dos mitar di 2008.
E aña aki e asuntu di number di outo ta parse di ta kompañá pa un mala suerte enorme. Manera nos lektornan ta kòrda, produkshon di plachi di number e aña aki a kana den forma erátiko.
E plachi di number tabata asina kompliká, hasiendo kòntròl asina difísil, ku finalmente a desaprobá uso di e plachi i a tuma e desishon ku e plachinan di 2007 mes ta keda na vigor pa 2008. E plachi di kòntròl ku tabata destiná pa henter 2008 a ser usá pa e promé parti di 2008. A disidí tambe, ku ta laga traha steker pa e di dos mitar di e aña aki.
Pero aki tambe a surgi difikultat, pasobra a resultá, ku e kompanianan ku a inskribí pa traha e steker, no tabata kumpli ku e spesifikashonnan kompleto manera deskribí den e “bestèk”, ku konsekuensia ku mester a tene un destaho di nobo.
A hasi un destaho públiko di nobo pa un total di 74 mil steker.
E destaho públiko nobo a produsí un kompania, ku finalmente si ta kumpli ku e rekisitonan.
Esaki ta nifiká, ku den kuminsamentu di ougùstùs – sin nada otro no presentá – por kuminsá paga number pa e di dos mitar di 2008 na e lugánan di kustumber. Esun ku paga, mesora ta risibí su steker.

WILLEMSTAD - Partido MAN no por kaba di komprondé tur e beheit ku ta eksistí rondó di nombramentu di un direktor nobo pa Curaçaose Dokmaatschappij. Si nos ta papiando tòg di privatisá e kompania, kuantu purá tin pa nombra un direktor nobo? asina Charles Cooper, lider di e partido MAN ta opiná.
Tur kos ta indiká ku djaweps otro siman, lo bira desisivo pa loke ta nombramentu di un direktor nobo pa e astiero lokal.
Tal manera nos a informá algun dia pasá, e diputado responsabel pa e kompania aki Eugène Rhuggenaath, a pone un posishon kla riba mesa, esta ku e kandidato mas fuerte te ku awor no ta aseptabel p’e, debí na su pasado ku ta manchá ku un kondena di korte pa aktonan kontra lei ku el a kometé. E ta dispuesto pa saka su konklushon, si a nombramentu sigui tòg.
Banda di e mancha ku e kandidato, Franklin “Chebu” Sluis tin, Rhuggenaath ta haña, ku e kandidato aki no ta disponé di e konosementu nesesario di mundu naviero.
Rhuggenaath mes a lansa un proposishon pa sali for di e impase aki. El a proponé pa nombra un direktor interino ku e tarea spesífiko pa trese e kambionan nesesario den e kompania i pone e empresa aki riba e kaminda di progreso i kresementu atrobe. E direktor interino aki lo mester keda pa un tempu definí, despues di kua ta nombra un direktor definitivo.
No ta masha kla si e idea aki a haña aseptashon serka e partidonan konserní. E kompania awor aki ta bou di gerente Frank Esser, pendiente pues un gerensia nobo.

WILLEMSTAD - Frakshon di Forsa Kòrsou den parlamentu ta masha preokupá pa e desaroyo di oumento di preis di krudo riba merkado internashonal. Pero tin alternativanan ku vários pais a aseptá komo un alivio pa nan situashon, den e kaso aki dor di bira miembro di PetroCaribe. Te awe nos no sa pakiko Kòrsou (Antia) no por bira miembro, asina e parlamentario Glenn Camelia a opiná.
Papiando di e problema di preis di krudo, Camelia a aksentuá ku en bèrdat ta trata di un problema mundial i no un problema ku ta afektá Kòrsou so.
Pero ta konosí tambe, ku tin esfuersonan ta tumando lugá pa weta kon por enfrentá e situashon aki, el a bisa.
Un dje posibilidatnan ku tin awor pa haña krudo na un preis mas barata ta atraves di e organisashon ku ta yama su mes PetroCaribe.
Resientemente, Guatemala a disidí, ku e tambe ta djòin e organisashon aki.
Glenn Camelia, a bisa ku por a tende un kantidat di konhetura rondó di miembresia di PetroCaribe. Un dje kosnan ku por tende ta, ku e paisnan ku bira miembro ta kai direktamente den e zona di influensha di presidente Hugo Chávez i ku Venezuela ta haña muchu di bisa den un situashon asina.
“Mi ta kere ku mester bi klaridat den e asuntu aki. Tin ora mi ta haña e impreshon ku nos ta pretendé di ta mas sabi ku tur hende. Hopi pais ta birando miembro. Pakiko nos mester tin miedu di Venezuela?
Merka ta un pais grandi ku tur dia ta hasi negoshi ku Venezuela. Tin un kantidat di pòmp di gasolin ku ta prueba di esei. Ademas ta un hecho konosí ku Merka ta kumpra petroli diariamente for di e pais aki.

BEIJING – Miles di persona, algun di nan ku a warda dos dia den rei, djabièrnè a basha riba e lokètnan di benta di karchi pa e Weganan Olímpiko na Beijing.
Na lugá di bendementu a bin bringamentu ora outoridatnan a habri lokètnan nobo na último minüt, loke a kousa un korementu ku trapamentu di hende kendenan a trata di yega promé. Komo 250.000 karchi a ser pone na benta na diferente lugá di e siudat.
“E tabata hopi inhustu”,Li Liqiang a bisa, kende a warda 28 ora ku Wang Zhenqiang, un hòmber di negoshi di e provinsia di Shandong, pa kumpra karchi pa e kompetensianan di klavado (bula for di trampolin).
“Esnan ku a yega lat, pero ku por a pusha yega dilanti a logra e karchinan”, el a agregá.
Tur dos a pèrdè nan puesto den e rei meimei di e pushamentu i na lugá di karchi pa mira e evento, den kua China ta favorito, nan mester a konformá nan mes ku karchi pa landamentu sinkronisá.
“E tabata hopi peligroso. Mi tabatin miedu”, Wang a bisa. “Tabatin hende rondó di mi. Nan a kai i a lastimá nan rudia i kokoti. E hendenan a kibra un barikada”.
Zhang Xiaojing, di 17 aña, a yega for di e provinsia di Hebei ku su primu i tres amigu i a bisa ku e rei tabata bastante na òrdu ora el a yega djaweps atardi. Pero durante e pushamentu di djabièrnè solamente tres di su amigunan por a yega sufisiente serka pa por kumpra karchi.
E agensia ofisial Xinhua a informá ku un 30 mil persona a forma fila pa karchi, pero debí na e kalor i e tempu largu di warda, algun a pèrdè pasenshi. Polis a tuma medida pa mantené òrdu, inkluso limitá e akseso pa algun aria.

WILLEMSTAD – Djaweps e kampionato di klase AA a kontinuá ku Curaçao Yankees ku un viktoria fásil di 7-1 riba Groot Kwartier Stars/Mangusá.
Pa Cur. Yankees: 7 kareda, 10 hit, 1 eror. Gillord Kirnon a gana i kuater batidó a bai di 5-2.
Pa Groot Kwartier: 1 kareda, 2 hit, 4 eror. Juan Carlos Agudo a pèrdè i Richène Martina/Robert Anastatia di 3-1.
Ayera Sta. Rosa Indians/Ennia ku un rèli di seis kareda den kabes di shete inng ta gana 9-5 di Wild Cats/Fatum/Kambes.
E wega tabata empatá 3-3 te den di sinku ining.
Pa Sta. Rosa: 9 kareda, 10 hit, 0 eror. Sherman Esclodina a gana i Mayron Isenia di 4-4.
Pa Wild Cats: 5 kareda,, 7 hit, 3 eror. Gavanee Virginie a pèrdè i Randolph Kirindongo di 2-2, inkluyendo un honron.
Awe Sta. Maria Pirates/Chippie ta enfrentá Royal Scorpions Mr. Baseball/Banco di Caribe pa 8’or den stadion Johnny Vrutaal.

WILLEMSTAD/ AMSTERDAM – E alkalde di Amsterdam, Job Cohen, ta partisipá na e parada di boto Gay Pride. Su partisipashon ta pa suprayá e importansia di aseptashon di diversidat seksual. “Diferensia den preferensia seksual òf rasial ta un ‘fact of life’ den e Amsterdam di 2008. Esun ku resistí esaki, ta desaprobá den e núkleo e orígen di konvivensia.”
Ta promé bia ku Cohen ta partisipá na e parada di boto. E organisadó di e parada, ProGay, ta kontentu di por yama e alkalde bon biní. Dia 2 di ougùstùs Cohen ta nabegá huntu ku e diputadonan Gehrels i Herrema riba e boto di e munisipio. Riba e boto Cohen ta risibí un delegashon di e organisashon di homo Turko Lambda. Tambe Cohen lo ta presente na un debate tokante emansipashon di homoseksualnan Nort Afrikano.
Segun Cohen, kada forma di deskriminashon ta inaseptabel. Pa e motibu akí tambe e presidente di ProGay Frank van Dalen ta kontentu ku Cohen ta nabegá huntu ku nan. “Presensia di alkalde Cohen ta un señal bon kla pa tur e hendenan ku te ku awe tin problema ku homoseksualidat bistoso. Bistoso den e siudat Amsterdam, pero tambe leu eifó.”
Banda ku mandatarionan tin na bordo tambe ámtenarnan di e munisipio Amsterdam. Meskos ku Amsterdam ta nabegá botonan di munisipio di Den Haag i Leeuwarden.

WILLEMSTAD/ AMSTERDAM – E boto spesial reservá pa homoseksualnan antiano i arubiano, ku ke partisipá na GayPride próksimamente, ta kedando blo bashí. Despues ku inisialmente tabatin 50 inskripshon, poko poko kanselashonnan ta drentando. Tin chèns ku e boto no ta nabegá dia 2 di ougùstùs durante e parada di boto na Amsterdam.
Pa promé biaha den historia un boto pa homoseksualnan antiano i arubiano lo a partisipá durante e parada di boto GayPride. Pero gradualmente e partisipantenan ta kayendo afó. E partisipashon di e boto ta kayendo na awa. Aktivista Charlene Oduber ta bisa, ku e tabú te ainda ta muchu grandi. E suseso aktual ta demostrá esei un bia mas segun Oduber. “Ta transmití GayPride na Antia tambe i tin hopi miedu ta biba bou di antiano i arubianonan homoseksual, ku famianan di e manera akí lo haña sa. E hendenan ta bolbe ‘drenta den kashi’ i nos no mester laga esaki sosodé. Esaki lo ta un desaster pa e emansipashon di homoseksualnan antiano i arubiano.”
Ta hustamente pa e motibu akí Oduber ta haña ku e boto pa antiano i rubiano mester ta yen dia 2 di ougùstùs. E ta bisa ku homoseksualidat tei tur kaminda. “E tin un efekto emansipatorio si nos si demostrá esei. E no ta meskos si nos laga e Ulandesnan papia pa nos. Nos ta otro. Homoseksualidat no ta un kos típiko Ulandes. Si nos hasi manera ta asina, e ta traha kontra produktivo pa emansipashon di homoseksualnan antiano i rubiano. Nos no ta gusta pa sinta den un hòki i papia. Nos tin ku hiba nos lucha na nos mes manera, durante fiestanan i enkuentronan. No pa mustra ku nos ta eksistí, pero pa mustra bon kla ku nos ta para pa nos derechinan. Nos tin ku mustra ku nos ta uní. Esei ta ‘empowerment’.”

WILLEMSTAD/DEN HAAG – Ministerio Públiko a keda sin atendé un gran kantidat di kaso di violensia leve aña pasá. E bònt di polis ta rabiá, pasó di e manera akí OM ta mina e trabou di polis. Un kantidat di 41% di kasonan di violensia leve a keda sin konkluí. Entretantu e partidonan SP i PVV a pidi aklarashon.
For di sifranan di CBS por konkluí, ku aña pasá na 9445 okashon no a pasa pa persekushon, miéntras ku den mayoria (5695) kaso esei tabata posibel. Den 1/3 parti di e kasonan OM a keda sin pèrsiguí, pasó e sospechoso ya na un manera bisto a drecha su bida. Un hòmber ku a dal su kasá, por ehèmpel a bai terapia. A keda sin atendé sigur ¼ parti di e kasonan pa motibu ku tabata trata di un kaso bieu òf un krímen insignifikante, manera para vigilá durante un robo. Den 27% di e kasonan tabata trata di por ehèmpel un krímen kaminda e víktima di un manera òf otro mes a provoká e violensia.
“Esaki no por,” Gerrit van de Kamp di e bònt di polis ACP ta bisa. “Di e manera akí Ministerio Públiko ta duna un señal kompletamente robes na komunidat.”
“Krímennan di violensia leve ta hustamente punta di lansa di polis. Dor di no pèrsiguí ta mina konfiansa di komunidat,” segun Sanne Eichorn di e sindikato VMHP. “Probablemente nos ta hasi nos trabou bon, pero e ta resultá den ko’i shushi.”

WILLEMSTAD – E hòmber fuma ku a bisa ku e tin un kaha ku un bòm riba un avion di Insel Air, por haña un kastigu di prizòn di 2 aña. E suseso a tuma lugá djaweps anochi na aeropuerto Juliana na St. Maarten. Personal atento a nota ku e hòmber yu di Kòrsou tabata bou di influensia di alkohòl i a prohibié di subi e avion.
E situashon a sali kompletamente for di man ora e hòmber a deklará ku na bordo di e avion e tin un kaha ku un bòm den dje i ku e lo laga e avion eksplotá. Mes ora a tuma tur medida di prekoushon i a listra e avion kompletamente. Polis di St. Maarten a detené e hòmber i a hib’é warda di polis pa el a drumi i rekuperá di su fuma. Sinembargo el a keda será te ainda. Segun Fiskal Mayó Taco Stein, e hòmber por risibí un kastigu di 2 aña pa sospecho di kandela i intento di asesinato.

WILLEMSTAD – Burokrasia ta un kos ku ta kome tur kaminda den nos sistema. Aparentemente nada no ta skapa. Esei a resultá tambe den e kaso di Insiativa Sosial-Ekonómiko (SEI) ku a pasa den Konseho Insular ku asina fervor i ansha. Den práktika a resultá, ku a dura dos luna promé ku e promé proyekto di e programa ta kla pa kuminsá. Kosnan a bai dje leu ei, ku dos siman pasá hasta presidente di SONA, e organisashon ku ta supervisá USONA, Jaime Saleh a konstatá ku ainda no a aprobá ningun proyekto siendo ku e sèn t’ei kaba. Ademas no a bin klaridat ainda ta kon ta bai dil ku e proyektonan. Gobièrnu di Kòrsou, den un kaso remarkabel ku no a haña klaridat te awe, a trata di hinka e Sekretariado interino den man di Deloitte & Touche. Freddy Curiel ku ta asosiá ku Deloitte a presidí e trabounan di SEI. Ken finalmente lo bai ta enkargá ku e kordinashon i supervishon no ta masha kla. Gobièrnu no ta klarifiká e punto aki tampoko na momentu ku a anunsiá e promé proyekto ayera.
Di tur manera, lòs for di e diskushon aki, e promé proyekto ta kla pa kuminsá.
Gobièrnu di Kòrsou den un komunikado amplio a splika, ku desempleo ta un problema grandi pa desaroyo personal di hende i alabes pa desaroyo sosial di komunidat. P’esei Gobièrnu di Kòrsou ta konsiderá di sumo importansia, pa promové partisipashon di desempleadonan na merkado laboral. Spesialmente awor, ku danki na entre otro e efekto positivo di firmamentu di e “Deklarashon Final”, Kòrsou a drenta un desaroyo ekonómiko favorabel, ta imperativo pa pèrkurá pa nos mes desempleadonan haña oportunidat pa okupá e kuponan di trabou nobo. Esaki sinembargo ta eksigí preparashon i formashon di e grupo di hende akí, ku tin biaha hopi aña largu no a haña oportunidat pa partisipá na e proseso laboral, asina Gobièrnu di Kòrsou ta splika.

SCHOTBORG
Efraim Policarpo
Mihó konosí komo Scotty
A laga atras su yunan Esther, Raymond, Jovanka, Winonha Schotborg, Sherdell i Sobeida Schotborg, Giovano i Genevieve Schotborg, Michael i Ruthlyne de Leeuw, Nunny de Leeuw, Gwendelyn Pardo tur ku nan famia. Akto di entiero ta djarason 30 yüni for di El Tributo pa santana Sta. Maria. Bishita 1or.

SNIJDERS
Marjorie Germaine
Mihó konosí komo Majo
A laga atras su kompañero Ronald Manuel, yu Melissa Snijders i Frensley wilson, yunan di kriansa Jardine Varlack, Rolien, Seppie i Gregory Manuel, rumannan Lelia Hernandez, Reginald, Renauld, Randolph, Royston, Marlon Snijders. Akto di entiero ta djamars 29 yüli for di El Señorial pa santana Sta. Maria. Bishita 1or. Promé ku entiero tin un s.s. di misa 4or.

SAMUEL-LYTE
Vilma
A laga atras su kasá Prophet Mohipaul Samuel, yunan Pauline Samuel, Daniel i Mark Samuel, ñetu Isaiah Farley, ruman Barbra Nurse, kuñá Sonadai Mahangoo. Akto di entiero ta djaluna 28 yüli for di Bottelier pa santana Bottelier. Bishita 9.30or-11.30or siguí pa un sirbishi 11.30or.

ANTONIA
Wimbert Atanacio (repentino)
Mihó konosí komo Win
A laga atras su kasá Lourdes Antonia-Godfried, yunan Arlene Antonia, Shurmin i Nancy Antonia, Wimbert i Ismeri Antonia tur ku nan yunan, yunan di kriansa Angelique Godfried, Rodney Godfried i esposa. Akto di entiero ta djadumingu 27 yüli 4or for di El Señorial pa santana Gr. Kwartier. Bishita 1or. Promé ku entiero tin un respòns na el señorial.