ORANJESTAD- Recientemente a eligi un directiva nobo pa e Asosacion di Fiscalistanan Arubiano, esta ‘Arubaanse Vereniging van Belastingconsulenten,’ AVvB.
E asosacion tin como meta primordial: promove e interesnan di e consulentenan professional den e ramo di impuesto. E asosacion lo trata di logra e meta aki dor di entre otro, consulta cu autoridadnan fiscal y organisa charlanan y workshops riba terenonan fiscal.
E directiva nobo ta consisti di e siguiente personanan:
Hans Ruiter, PriceWaterhouseCoopers (presidente)
Angel Gomez Osorio, Loyens & Loeff (vice-presidente)
Kartini del Prado, Deloitte (secretaria)
Anushka Lew Jen Tai, KPMG & Legal Services N.V. (tesorero)
Marcel ‘t Mannetje, Caribbean Accounting & Tax Consultants (miembro di directiva)
Pim van der Kleij, Pim van der Kleij Belastingadviseurs (miembro di directiva)
Ryan Kock, Ernst & Young (miembro di directiva)

ORANJESTAD- En coneccion cu e Fiesta di Santa Filomena lo cuminza Diasabra dia 2 di augustus venidero, e NOBENA na su honor na Iglesia Santa Filomena na Paradera.
E nobena aki lo tuma luga diasabra 2 di Augustus te diadumingo dia 10 di Augustus den Misa Sta. Filomena na Paradera.
Nobena.
(Tur dia 6.30 pm. menos diadomingo 5.00 pm.)
Tur dia ta resa e rosario y oracion di Sta. Filomena
Despues ta canta un cantica di Sta. Filomena.
Prome cu misa cuminsa tin un charla.
Tur dia un invitacion special ta bai pa algun bario di Parokia pa asisti na tur e actividadnan.
Durante e nobena aki nos ta pidi Santa Filomena pa henter nos parokia.
P’esey tur dia nos ta pone intencionnan pa nos pueblo y nos difuntonan.
Tambe nos kier corda riba esnan den necesidad.
P’esey nos ta pidi boso pa durante nobena segun nos barionan, trece comestibles den macuto y esnan cu trece un macuto por hiba esey dilanti durante ofrenda.
Tambe nos ta parti envelop pa esnan cu por yuda pa mantencion di nos misa.
Nos ta conta cu boso generosidad

ORANJESTAD- A haci uso di un sistema computarisa pa saca e number ganador den presencia di notario. Asina Digicel Aruba a saca e ganador di su campaña grandi na unda un solo persona ta gana Afl. 50.000,- como e premio principal pa celebra 5 aña di Digicel.
For di algun siman pasa caba a anuncia e campaña na unda cu tur cliente ta participa. Pero, por a haya mas chens den e competencia si paga e cuenta postpaid na tempo, cada bez cu manda mensahe, download ringtone, recarga bo celular prepaid of dor di manda un SMS pa aumenta bo chensnan.
E cliente Randy Hassell di Concordiabergweg na San Nicolaas di 21 aña di edad a gana e premio aki. E hoben ta cliente di e compania di celular for di December 2003 y for di e tempo ey semper a keda como un cliente fieldi e red mas grandi y mihor. Tabata momentonan masha emocionante ora cu e sistema computarisa a saca e number ganador....un pa un....pa na final presenta e number 7-4-2-7-6-7-7 na publico.
E ganador tabata presente tambe y mesora a subi escenario pa busca su premio. Gerente General di Digicel Aruba, esta Sra. Michelle Winklaar a haci entrega di e check “grandi” aki na e feliz ganador, pabien!

ORANJESTAD- For di luna di Mei caba, Ateliers '89 y su director Elvis López y Stichting Ateliers '89, Academia di Bellas Artes Aruba, a ricibi e grato noticia cu nada menos cu cinco di su alumnonan a wordo acepta, na e prestigioso Academia di Gerrit Rietveld situa na Amsterdam Hulanda. Ta trata aki di su alumnonan Jess Wolf ( Moda), Ken Wolf (Audiovisual), Kevin Schuit (Audiovisual), Robin de Vogel (Escultura) i Wilfred Jansen ( Skirbimento i Performance).
Tur aña e academia ya menciona ta ricibi un cantidad di solicitud di mas o menos cinco mil aplicante. Di e cinco milnan aki ta tuma solamente shen y binti cinco. Ta pesey Stichting Ateliers '89 y su director ta sumamente orguyoso y contento cu e logro aki di por a admiti cinco di su mihor alumnonan na dicho academia di arte.
Ya a sali un paar di siman pasa caba pa Hulanda e sympatica damita apsirante artista Robin de Vogel. Awe dialuna, ta sali di biahe tambe pa e mesun destinacion e ya famoso poeta Arubano, Wilfred Jansen y e conocido musico y all around artist Kevin Schuit.
Mas laat lo bai tambe e mucha homber filmado di e programa di televicion "Ariba Un Trip" den persona di Ken Wolf. Ateliers '89 ta spera cu ainda e conocido modista y creador di varios bisti pa balet, cu a haci furor e aña aki "One In Soul" juffrouw Jess Wolf tambe, lo sigui tambe den e direccion aki.
Aña pasa Ateleirs '89 a logra di manda pa e "Pietermaai Kunst Route" (durante e Bienal di Architectura) na Curacao Wilfred Jansen, Ken y Jess Wolf. A bin resulta cu nan paticipacion tabata un exito rotundo y cu nan ta mas famoso na Curacao cu Aruba mes. Kevin Schuit na su turno tin su mesun band y por mira su videonan di musica ariba YOU TUBE y sVe Tv.

ORANJESTAD- Partido MEP a tuma nota di un acusacion mentiroso di e lider di partido RED Rudy Lampe. T’asina cu diahuebs ultimo den pleno luz di dia un glas di e auto di Rudy Lampe a kibra of a ser kibra.
Sinembargo te ainda no ta sigur kico a ocasiona e daño aki y promer cu e investigacion policial termina ya e ex-pastoor Rudy Lampe a lanta falso testimonio, bisando cu den pasado partido MEP ta conoci di ta haci dañonan na propiedadnan di contrincantenan politico.
Partido MEP ta condena e acusacion baho di e ex-pastoor cu un biaha mas a demonstra su odio pa tur loke ta concerni MEP.
Dirigentenan di MEP durante e ultimo lunannan tambe a wordo perhudica ora cu nan autonan a wordo destrui, sabotea cu molotov cocktail y susha cu verf, y aunque cu nos tin un idea for di cual skina e destruccionnan aki ta sali, toch nos no a punta dede den direccion di cualkier partido politico.
Sinembargo pa loke ta e ‘destruccion’ di diahuebs ultimo, Rudy Lampe mester cuminsa pensa seriamente, si su actitud colonialista y su carta di traicion di 28 December 2006 den cual e ta pidi pa un solo Gobernador y un solo Procurador General pa Aruba y Antiyas y e forma insistente con e kier entrega henter e pais aki den man di Hulanda ta trece cu ne cu cierto parti di e comunidad Arubano no ta tolera e actonan di traicion aki mas y ta ventila esaki mediante di destruccion di propiedad di otro hende.
Talvez Rudy Lampe por pensa tambe den direccion di esnan cu a wordo ‘perhudica’ den e afamado caso di Fondo Desaroyo Nobo San Nicolas, kendenan ta mira Rudy Lampe di Comision di Berdad como e culpabel mayor cu nan mester a aparece den Corte di Husticia.

BAGDAD, Irak, - Eksploshon di tres bòm konsekutivo a kousa mas ku 50 morto i kasi 250 herido na Bagdad awe, den pleno peregrinashon chiita pa bai e kapital irakí, kaminda ta tuma lugá un importante evento religioso, polisnan a bisa.
E atentadonan a marka un di e dianan mas sangriente den lunanan i a suprayá fragilidat di último logronan den seguridat na Irak, kaminda e violensia ta na su nivel mas abou fo’i kuminsamentu di 2004.
Segun informashonnan inisial, e tres eksploshonnan a keda kousá pa hendenan muhé suisidio.
Al Qaida ku frekuensia ta usa hendenan muhé pa realisá atentadonan suisidio, pasobra hopi bia nan por evadí kòntròlnan di seguridat mas estrikto apliká pa e hendenan hòmber.
Imágennan di Reuters Television a mustra polisnan, bomberonan, i otro trahadónan limpiando sanger i ruinanan riba kaya na e lugá di un di e eksploshonnan.
Un testigu di Reuters a mira kon tabata retirá parti di kurpanan for di riba kaya.
Ta spera ku mas o ménos un mion di persona ta bishitá e meskita di Kadhamiya situá na nortwèst di Bagdad pa e peregrinashon, di kua e dia prinsipal ta djamars.
Polisnan irakí a amplia e seguridat na e zona.
No tabata kla si e víktimanan ta peregrino, pero e eksploshonnan a sosodé pegá ku e distrito di Karrada, den sentro di Bagdad, un zona kaminda hopi fiel ta pasa den nan kaminda pa e meskita.
E promé minister Nouri al-Maliki a urgí dignatarionan estranhero i e empresanan pa bai for di Irak, sigurando ku e forsanan di seguridat irakí ta mas kapas di mantené pas ku ménos yudansa militar merikano.

WILLEMSTAD – Direktiva di FeVoKo ta partisipá ku dia 1 di ougùstùs próksimo lo tin oportunidat pa partisipá na e kurso di Bich Vòlibòl.
E kurso aki ta dura un siman pues di 1 pa 6 di ougùstùs próksimo.
E lugá ta na Holiday Beach Hotel i e orario ta di 9’or di mainta pa 6’or di atardi ku un pousa meimei.
E kurso aki ta pa tur vòlibòlista, árbitro i tékniko.
Tur e muchanan ku ta forma parti di e selekshon lokal por partisipá na e kurso aki grátis.
E persona ku lo duna e kurso aki ta sr. Johann Huber, instruktor di FIVB. No pèrdè e oportunidat aki.
Inskripshon pa e kurso aki por ta na e siguiente e-mail:
Ku ta glenda-1112@hotmail.com 1/o 3.timesg@gmail.com tambe via telefon 520-7042.

CARACAS, Venezuela, - E presidente di Venezuela, Hugo Chávez, ayera a mustra e T-shirt ku e frase “¿por qué no te callas?” ku ta un opsekio di Rei di Spaña, den un resiente enkuentro pa plakia e insidente diplomátiko.
Rei Juan Carlos aña pasá a usa e frase ei ku e lider venezolano den e kumbre iberoamerikano na Chile, frase ku a bira famoso, ku a generá un krísis, ku a keda superá ku un bishita di Chávez na e monarka su residensia di verano na Mallorca siman pasá djabièrnè.
“Ami i e Rei ta bon amigu, for di e promé dia. Asina ta, ku e dia di re-enkuentro ta yega, despues di e insidente ku a okurí aya na Santiago”, e mandatario a komentá den su programa semanal di televishon i radio “Aló Presidente”.
E grabashon di e konfrontashon entre e Rei i Chávez a dal buèlta rònt mundu i a inspirá tononan di telefòn selular, chistenan i T-shirtnan.
Chávez ademas a konsiderá ku e insidente a keda eksagerá pa medionan di komunikashon, apesar ku na e momentu ei el a menasá revisá e lasonan diplomátiko i empresarial ku Spaña, i a eksigí despensa di e monarka.
Empresanan spañó, entre otro e bankonan BBVA i Santander, ademas di e empresa petrolero Repsol-YPF tin mas o ménos 2.400 mion dollar invertí n’e pais suramerikano, ku ta riku na petroli.
Chávez a bishitá Spaña komo parti di un gira europeo ku a hib’é Rusia, Bielorrusia i Portugal.

WILLEMSTAD – E maneho di Aqualectra ta basá riba rashonalisashon ku tur su gruponan di interes. Asina direktor interino di Aqualectra, Anthon Casperson a bisa awe mainta. Casperson a referí spesífikamente na e relashon ku e sindikato SSA, ku ta representá trahadónan di staf na Aqualectra. Den e kuadro aki Casperson a indiká tambe na e posishon di e dos partidonan den e konflikto aktual, gerensia di Aqualectra i SSA.
E último aki ta den un lucha pa mas ku seis luna, pa haña rekonosimentu di gerensia di Aqualectra. Pa obligá e kompania pa rekonosé komo sindikato, SSA su miembronan, mènèdjernan i supervisornan di Aqualectra a drenta akshon awe mainta.
Segun Casperson, no solamente ku e sindikatonan den e kompania, pero ku tur grupo di interes di Aqualectra, e kompania ta hiba un maneho di rashonalisashon. Ta p’esei gerensia di Aqualectra ta boga pa diálogo, ku ta e forma pa yega na solushon, tambe den e konflikto ku SSA. Ta den e kuadro ei, Aqualectra a invitá SSA pa sinta na mesa pa atendé e asuntu aki ku e meta pa yega na un akuerdo. ‘Despues ku den fin di siman nos a risibí e karta di SSA, nos a komprondé e doló mas mihó’. Esei tambe tabata e motibu ku gerensia a ekstendé e invitashon na SSA.
Casperson a sigui splika ku e komplesidat ku SSA ta relashoná entre otro ku e hecho ku tin un otro sindikato ku tambe representá e trahadónan di Aqualectra i tambe e proseso di SSA pa bira un sindikato.

MADRID, Spaña, - E wes di Oudiensia Nashonal Baltasar Garzón a laga e supuesto representante di FARC (Fuerzas Armadas Revolucionarias de Colombia), e spañó María Remedios García Albert, den libertat bou di fiansa.
A deten’é García Albert, di 57 aña, djasabra último na San Lorenzo del Escorial, situá pegá ku Madrid, den kordinashon ku outoridatnan polisial colombiano den e denominá “Operación Cali”.
E dama a duna deklarashon dilanti e wes di Oudiensia Nashonal, ku ta akus’é di delito di kolaborashon i integrashon den e gueria colombiano.
A dun’é libertat bou di fiansa di 12 mil euro i a prohibié sali fo’i Spaña.
Garzón a sigurá ku a konstatá García Albert su vinkulashon ku FARC, via sistema di koreonan elektróniko, prinsipalmente ku un di e lidernan di FARC, Raúl Reyes, kende na mart último a muri den bombardeo na teritorio ecuatoriano.
Tambe e tabata mantené kontakto ku Ovidio Salinas Pérez, alias Juan Antonio Rojas, representante internashonal di FARC, i ku otro alto kargonan i representantenan di e gueria.
E dama deten’é, kende tabata usa beinam di “Soraya” i “Irene”, na 2006 fo’i man di Raúl Reyes tabata risibí e kantidat di 6.000 euro pa esaki yega Lucas Gualdron, representante di FARC na Europa.
Segun polisnan, e dama deten’é a usa su kargo dentro di sekretariado di ONG OSPAAAL (Organisashon di Solidaridat pa Asia, Afrika i Amérika Latina), ku el a okupá te algun luna pasá, pa ta involukrá aktivamente for di 2000 den labornan di apoyo i kolaborashon ku FARC.

WILLEMSTAD – Awe mainta e miembronan di staf di Aqualectra, a reuní dilanti di porta di e kompania di produkshon, kaminda nan a mustra nan malkontentu ku gerensia den un akshon. E akshon aki ta pa motibu ku nan ta buska rekonosementu di nan Sindikato di Personal di Staf di Aqualectra (SPSA). For di den fin di siman e miembronan a reuní i a mustra nan malkontentu riba e tono di e karta ku nan a risibí di gerensia di Aqualectra i manera nan mes a bisa for di djabièrnè anochi, ku si no tin un reakshon di parti di gerensia, nan lo drenta akshon. Awe mainta e miembronan a mustra nan solidaridat pa ku e akshon i awor ta spera un reakshon di gerensia di Aqualectra pa rekonosimentu di e sindikato. Pa mas informashon por lesa página 3 di edishon di awe.

ARIES: Bo tin dudanan i bo ta vense riba esnan ku ta deseá di hasibu daño. Lei di karma sa bon bon ken ta ser e mas afektadonan. 15,06,27.

TAURO: Sigui limpia bo alma, bo kas, bo negatividat. Defendé bo mes di agresividat. Bo tin ku hasi algu pa saka for di sistema un romanse ku tin hopi yoramentu. 04,19,30.

GEMINIS: Evitá amistatnan ku no ta franko i ku ta demostrá envidia ku su akshon i palabra. Ta momentu di hasi bo propio estilo. 50,13,24.

KANSER: Hopi kuidou ku loke bo ta hasi i bisa, ya ku bo por eksaltá e sentimentunan di yalusí di bo pareha o bo famia. Desaroyá mayor serenidat, madures. 10,35,05.

LEO: Bo ta sigui superá den tur e aspektonan di bo bida. Tur kos ku a pasa ta keda awor derá na bida i kaminda pa amor i trabou nobo ta habri. 09,11,32.

VIRGO: Bo tin e kapasidat di mira e puntonan di bista di otro personanan influyente. Union, matrimonio, romanse ta toka na porta di bo kurason. 18,23,17.

LIBRA: Portanan nobo ta habri pa bo i ta relashoná ku personanan influyente. Union, matrimonio, romanse ta toka na porta di bo kurason. 22,35,46.

SKORPION: Bo ta uni na sernan ku ta duna i no ta kita. Bo tin mayor suerte den spekulashonnan i wega. Skucha e bos di bo kurason, ora bo tin ku bisa algu importante. 30.

SAGITARIO: Bo no ta falta bo promesanan i sigui dilanti ku bo plannan di dieta o ehersisio pa mantenébu den akshon tur idea kreativo ku ta krusa dor di bo mente. 28.

KAPRIKORNIO: Den amor bo ta rekuperá di engaño i traishonnan. Bo tin na un banda awor esun ku ta stimábu, respetábu. Proyektá sigur i konfia den tur loke bo ta realisá. 03.

WILLEMSTAD - Minister Omayra Leeflang no a trata Kolegio Omega hustu. Si tabatin kos mes ku a bai robes, lo tabata mas korekto pa pone nos na altura di esei, pa eksigí di nos pa koregí. Pero no por lanta di un dia pa otro i kita nos rekonosimentu, asina mayornan i direktiva di fundashon Kolegio Omega a konkluí i komo tal a disidí tambe ku entre otro, lo hiba Gobièrnu Sentral Korte.
Den fin di siman, e fundashon a konvoká un reunion di urgensia pa atendé e situashon ku a surgi, esta e desishon ku minister Leeflang a tuma.
Gobièrnu, manera LA PRENSA a informá for di siman pasá, a revoká e rekonosementu ofisial ku Kolegio Omega tabatin. E desishon ta basa riba e nesesidat pa garantisá nivel na e skol, asina minister di Enseñansa Omayra Leeflang a anunsiá.
E skol tin algun aña ta funshonando. Inspekshon di Enseñansa a hasi un análisis di e situashon na e skol i a yega na e konklushon ku kos no ta kanando manera mester ta. Nos a bin konstatá, segun e mandatario, ku tin un diferensha grandi den e sifranan di eksamen, loke ta inaseptabel pa gobièrnu.
“Un mucha ku pasa eksamen na e skol, ta logra sifranan positivo, tin biaha hopi haltu, pero ora ta trata di eksamen sentral, e mesun mucha ei no por duna e mesun prestashon. Basé riba un análisis profundo di Inspekshon di Enseñansa, nos a yega na e konklushon ku no ta responsabel mas a mantené e skol aki komo un skol ku rekonosimentu ofisial,” segun e minister.

WILLEMSTAD/ AMSTERDAM - Direktor di un instituto merikano renombrá ku ta bringa kanser a spanta su 3 mil empleadonan mata, na momentu ku el a informá nan ku e radiashon di un telefon selular ta malu pa nan salú, spesífikamente nan serebro.
Ronald Herberman a manda un mail pa tur su empleadonan den kua e ta konsehá nan pa tene nan telefon selular leu for di nan kabes.
Si ta trata di mucha ku ainda no a kaba di krese, Herberman ta konsehá pa nan no us’é mes, ku no ta den kaso di emergensia.
E estudio aki ta parse di ta konfirmá e sospecho ku tabata eksistí hopi tempu kaba, ku e señalnan ku e aparato mobil ta saka, ta dañino pa hende su salú. E sospecho ei tabat’ei tur tempu, numa ku nunka tabatin konfirmashon ofisial di esaki.
Segun e wepsait di BBC den kua nan ta sita Herberman, e sientífiko ta basa su mes riba e promé resultadonan di un investigashon ku nan no a publiká ainda.
Mihó nos ta na tempu, ku nos ta lat, Herberman a bisa.
“Nos no mester warda te ora e resultado definitivo Sali,” asina el a agregá.
Te ku awor no tabatin niun investigashon sientífiko ku a proba ku un telefon selular ta kousa daño na serebro di hende.
Un estudio di un sientífiko bèlga resientemente a revelá ku tèstnan ku nan a hasi ku raton a proba ku e bestianan aki a muri di kanser, despues di a keda eksponé na rayonan di un selular.
Investigadornan di telekomunikashon britániko a yega di bisa ku nan tin “un sospecho leve ku den kaso ku un hende keda eksponé hopi tempu, riba término largu lo tin un chèns mas haltu riba kanser.”

WILLEMSTAD - Ulanda lo aseptá den su komunidat ku ta eksistí poligamia? Kaminda un hòmber por ta kasá òf bibá ku dos muhé? E pregunta aki minister Omayra Leeflang a bolbe lansa den e dianan ku a pasa.
Di akuerdo ku un artíkulo ku a sali den e korant ulandes De Telegraaf, den e diskushon ku a surgi rondó di rekonosimentu di un matrimonio homoseksual, minister Leeflang a pone e kaso ku un pregunta, bèk den skochi di Ulanda ku un karta habri ku el a publiká den prensa lokal.
Manera LA PRENSA a indiká kaba, Antia lo apelá e sentensia di Korte ku a dikta ku un pareha homoseksual ku a kasa na Ulanda, tin mes derechi na Antia i na Aruba ku un pareha heteroseksual.
E kos aki p’ami, ta un kuestion di prinsipio, asina minister Omayra Leeflang a deklará.
Ta trata di e kaso konosí kaminda un pareha lesbiana kier a hasi uso di Bureau Ziektekostenverzekering, BZV pa sigurá su partner i nan yunan. BZV a ninga di aseptá e miembresia aki, riba kua e pareha a disidí di skohe kaminda di korte.
E argumento di BZV tabata ku un matrimonio di e mesun sekso, no ta ser aseptá den nos komunidat.
Korte, klaramente a pensa otro i a dikta ku debidamente BZV tin e deber di sigurá e pareha pa gastu médiko.
Den su karta habrí, e minister ta enfatisá ku ta un proseso demokrátiko a tuma lugá na aña 2000 den kua parlamentu di Antia a disidí ku un matrimonio por ta entre un hòmber i un muhé.

WILLEMSTAD - Polis na Rotterdam a detené un kriminal antiano ku tabata internashonalmente buská durante Zomerkarnaval djasabra último na Rotterdam.
Mester bisa si, ku ta pa kasualidat polis a rekonosé e hòmber, ku na e momentu ei tabata na Maasstad, disfrutando di e ambiente, asina e korant De Telegraaf ta informá den su edishon di ayera.
E hòmber di 40 aña di edat, ta konosí na Kòrsou entre otro pa trafikashon di droga.
Karnaval a bai relativamente trankil, ounke e tabatin su pida-pida kosnan kuné. En total, polis a detené 49 persona, entre otro pa motibu di poseshon di droga, pa maltrato, pa ladronisia den pakus i pa ofensa.
Polis, no opstante ta papia di un evento ku a kana trankil i den ambiente festivo.
E parada a kuminsá na altura di De Maas, el a pasa den sentro di Rotterdam pa bai a kaba manera kustumber na Coolsingel. Tabatin hopi grupo i un total di 36 karosa presente. Na final di e parada, tabatin hopi hende ku a keda gosa di e ambiente manera kustumber.
No opstante ku servisio meteorológiko a pronostiká mal tempu, esaki a keda limitá na otro partinan di Ulanda. Na Gelderland por ehèmpel tabatin bastante mal tempu ku áwaseru pisá, bos i welek.
Pero na Rotterdam mes, wer a keda seku. Pió ainda, esnan na e pòstnan di EHBO enkargá ku dunamentu di promé yudansa tabatin nan man yen. Tabata hasi hopi kalor i en total 173 hende a akudí na un dje pòstnan di EHBO pa yudansa, komo ku e kayente a bira di mas pa nan, òf nan tabatin blar na pia òf pasobra insekto a pika nan.

WILLEMSTAD - Habitantenan di Van Engelenweg a hala un rosea di alivio, na momentu ku diputado Anthony Godett a anunsiá ku e komersiante chines ku ta biba nèt na skina Sta. Rosaweg/Van Engelenweg, pronto lo muda.
Ku esaki, ta parse ku lo yega na un fin na e desgustu di e habitantenan ku durante hopi luna largu tabata sufri di tantu e bista mahos komo e trafikashon di kònteiner pisa den nan bario.
E kaso aki di e komersiante Liang, tin un istoria largu.
Originalmente e komersiante aki tabata na punto di habri un restorant na e sitio. Reportadamente ta un eks diputado lo a hasi e konseshon na e chines en kuestion. Por sierto ku ela pone tur instalashon rekerí, pero habitantenan a laga nan bos di protesta zona.
E habitantenan a konsiderá ku no ta korekto ni deseabel ku ta habri un negoshi asina den un bario habitá. Mester bisa ku ta despues di protesta hopi fuerte, ku komersiante chines a desistí di su plannan.
Pero, el a disidí di kuminsá un otro negoshi, den e kaso aki di muebel i pa esei, konstantemente tin un kantidat di kònteiner di pak riba otro den e kurá dje kas.
E habitantenan a protestá na diferente okashon i a aserka Bestuurscollege, ku tabatin eks diputado Cooper komo esun enkargá ku Infrastruktura.
Cooper a anunsiá ku el a regla pa e komersiante bai sigui hasi su negoshi na un otro sitio. Pa sorpresa di e habitantenan, ora a kere ku e komersiante lo a move for di Van Engelenweg, te awe e t’ei ketu bai.
P’esei mes nan a keda kontentu ku e anunsio di diputado Godett.

WILLEMSTAD – E kampionato di beisbòl Klase A organisá pa FEBEKO a kontinuá den fin di siman ku vários wega.
Originalmente tabata e intenshon pa a kuminsá hunga na Jandoret, pero pa motibu tékniko, e wega aki a keda posponé.
E fin di siman binidero aki si lo tin wega na Jandoret.
E resultadonan:
Djasabra 26 di yüli na Tio Daou
Curaçao Yankees ta gana di Banda Abou City ku skor di 13-3.
Pa: Cur Yankees: 14 kareda, 13 hit i 1 eror.
Lenox Lard a gana i mihó bate tabata Quincy Lambertina 2-2.
Pa: Banda Bou City: 3, kareda, 9 hit, 5 eror.
Desmond Leito a pèrdè i e mihó bate tabata Sharmel Monte di 3-2.
Djasabra 26 di yüli na Bonam
Sta. Maria Pirates ta logra un triunfo pèrtá di 2-1 riba Groot Kwartier Stars.
Pa: Sta Maria Pirates:2 kareda, 7 hit i 2 eror.
Picher Ganadó tabata Dennis Testing i e mihó bate tabata Abraham Castillo i Jurensley Thielman di 4-2.
Pa Groot Kwartier Stars: 1 kareda, 9 hit, 3 eror.
Picher pèrdèdó tabata Wilhelm Lindeberg i mihó bate tabata Rashadsan Alexander i Rudailo Leito di 4-2.
Djadumingu 27 di yüli na Tio Daou
Sta Maria Pirates ta logra gana 7-5 di Wild Cats.
Pa Sta. Maria: 7 kareda, 9 hit i 1 eror.
Gionelo Jansen a gana i e mihó bate tabata Abraham Castillo di 4-2.
Pa Wild Cats: 5 kareda, 5 hit i 3 eror.
Rignald Janga a pèrdè i e mihó bate tabata Gavenee Virginie di 4-2.

WILLEMSTAD – Fundashon Konsiente a klousurá djadumingu 27 di yüli 12’or di anochi e siman di Reto Eskolar Konsiente 2008 i awor ta bai evaluá e aplikashonnan. Den siman ku a kaba a duna oportunidat na hóbennan ku fondonan limitá, di entre 15 i 25 aña, ku ta bai sea un HAVO/VWO, IFE òf UNA pa nan a apliká pa haña un sosten sea finansiero òf material pa nan skol, bou di kondishon ku nan ta bira boluntario pa un aña pa sostené proyektonan di Fundashon Konsiente.
A haña masha hopi aplikashon di kua mas o ménos sinkuenta ta válido, segun regla i kondishonnan stipulá pa Fundashon Konsiente, pa pasa den e komishon di evaluashon. Djamars dia 29 di yüli ta papia personalmente ku esnan ku a bin na remarke pa keda konsiderá i dependiendo di kon e kombersashon bai ta evaluá si por yuda e studiante spesífiko aki. Djabièrnè dia 1 di ougùstùs próksimo ta informá tur esnan ku keda aprobá si nan ta haña e sosten di Fundashon Konsiente si òf no. Tur komunikashon ku esnan ku apliká ta bai solamente via di e-mail i tur hende ku a apliká ta haña un e-mail pa bisanan si nan ta haña e sosten òf no.
Loke tabata notabel den henter e proseso di e Reto Eskolar Konsiente 2008 ta e echo ku hopi di nos hendenan ta aparentá di no ta dominá òf no ta konsiente di balor i oportunidatnan di Internèt. Mester realisá ku den aña 2008 no ta posibel ku un hóben studiante no tin akseso i/òf no sa kon traha ku Internèt. Te na ora ku hóbennan tin e akseso mes ta un realidat ku hopi no ta benefisiá di e oportunidat, pasobra nan ta usando e kòmpiuter pa chèt i no pa amplia nan konosementu, loke por yuda nan den nan futuro i eventual karera ku nan skohe. I esaki atrobe ta keda reflehá den e manera defisiente di komuniká via di Internèt. Pa Fundashon Konsiente esaki ta pone ku mester traha riba konsientisashon di nos komunidat di benefisio i oportunidat ku uso di Internèt tin.

WILLEMSTAD – E spa ofisial di Renaissance Curaçao Resort & Casino ta preparando pa su apertura. E spa di destinashon kompletamente integrá lo ta parti di e amenidatnan di klase mundial ku lo wòrdu ofresí na huéspetnan di e spa hotèl, ku ta programá pa habri na hèrfst di 2008.
Aqua Spa a skohe e históriko Rif Fort pa su ubikashon, kontando riba e isla su historia pa krea un fushon nobo entre pasado i presente.
Aqua Spa lo ta situá na e Rif Fort históriko banda di e hotèl. E lo ta un fasilidat di 4 piso, ku bistanan riba Willemstad i su famoso St. Anna Baai. E fasilidat ku ta di 690 meter kuadra lo konta ku 10 kamber di tratamentu ku e teknologia aleman mas moderno pa stom i bañonan di yakuzzi.
E spa lo introdusí hopi amenidat spesial manera un sala di te i un tèras di relahashon riba e dak.
Un bosero di Aqua Spa ta indiká ku e diseño ambisioso ta inkorporá eksperensianan riba vários nivel: E promé piso di Aqua Spa lo inkluí e spa lòbi i e stashonnan di Pedikure/Manikure i kabei, tur dunando e impreshon di un ambiente di siudat grandi. E salon di kabei lo ofresé e servisionan di un estilista/pelukero di fama internashonal.
E promé piso lo sirbi komo un Dai Spa ku tres kamber kompletamente ekipá pa facials ku ta ofresé tratamentunan inovativo di un ora.
E di dos piso lo ta dediká na e Sentro ultra moderno di Gym i Fitness ku tambe ta ofresé lèsnan di Yoga. E Watsu, masashinan den awa lo wòrdu duná den e "infiniti pool" di Renaissance Curacao Resort ku bista riba laman.