ORANJESTAD– Tin un gran fuente di energia den nos medio ambiente…E ta gratis, liber di polucion y infinito. Pero t’e awor, no a explora su posibilidadnan den ful su extension. Ta trata aki di e asina yama mashinnan pa genera electricidad na cas, esta molina di biento residencial. Ta trata’ki di unidadnan relativamente compacto cu aparentemente ta yuda reduci of elimina su gasto di electricidad mensual.
Por lo menos un compania ta haci posibel pa consumidornan por uza e sistema aki, cu nan ta califica como hopi “user friendly”. E representante di “Southwest Windpower” na Aruba ta bisa cu e por hasta baha bo coriente na cero. Nan ta desaroyando un proyecto piloto pa e molina di biento residencial na Aruba.
E ta un avanse tecnologico den practica y no ta nada futuristico. For di 3 aña pasa e comerciantenan aki a cuminsa atende cu molina di biento, inicialmente kisas como curiosidad. Cu e forma cu aworaki e prijs di fuel oil ta afecta e branstofclausule a bira interesante pa explora e opcion di molina como energia alternativo. Den ultimo añanan e molinanan a progresa t'e n'e punto cu awor e por ta conecta riba e red di N.V. ELMAR y funciona completamente automatico.
Con exactamente esaki ta, expertonan tecnico lo splica den e programa “Hunto nos ta Aruba” cu ta pasa Diarason awor 30 di juli na ATV pa 7’or di anochi y Tele Aruba pa 9’or y 10 anochi.
Curioso ta cu aunke e comerciantenan cu ta ofrece e producto, ta ofreciendo un alternativa pa kita e dependencia riba combustible, nan no ta keda sin conseha pa tur hende ta mas consciente cu e uso di energia.

Ultimo dia pa entrega formulario lo ta dia 28 di augustus 2008

ORANJESTAD – Gobierno di Aruba pa e aña escolar 2008-2009 atrobe lo duna un ayudo financiero na e mayornan cu te cu 31 di augustus 20008 tin derecho riba bijstand y cu tin yiu(nan) of yiunan di criansa cu ta bayendo scol.
Esaki pa yuda cubri gasto manera paña, sapato, articulonan pa scol, etc... E areglo aki ta conta tanto pa alumnonan di Scol Preparatorio (Kleuterschool) como alumnonan cu ta bishita scol regular durante dia (volledig dagonderwijs).
Condicion ta cu e yiu(nan) mester ta bibando cerca e mayornan concerni y tambe mester ta ricibiendo bijstand. Famianan cu ta hayando bijstand lo ricibi pa cada yiu cu ta bay scol Afl.120,= extra te na un maximo di Afl. 500=, pa famia.
E ayudo extra aki, cu ta di un solo biaha lo wordo paga hunto cu e pago regular di bijstand na luna di september 2008.
Mayornan cu tin yiu(nan) of yiu(nann di criansa mester busca e formulario na e scol unda e yiu(nan) ta inscribi entrante 8 di augustus 2008. Riba e formulario ey, cu Departamento di Asunto Social a diseña specialmente pa e ocasion aki, tin un parti cu e mayor tambe tin cu yena corectamente y firma. Den curso di e dianann cu ta bin lo reparti e formularionan menciona bao di e scolnan concerni
Ultimo dia pa entrega e formulario lo ta bay ta dia 28 di augustus 2008 y lo no bay tin excepcion. Den caso cu bo trece e formulario despues di e ultimo fecha ya menciona lo debolbe bo persona e formulario aki.
Dicho formulario por wordo entrega unicamente na nos oficina na Oranjestad (Lagoenweg 11) y San Nicolas (Bargestraat 1). Pa mas informacion yama libremente na 582-1100 y pidi pa Seccion di Bijstand.

ORANJESTAD - Ban promove cultura di paz riba nos isla Aruba; e ta un trabao cu ta di nos tur como cuidadano di nos Pais. Pero pa realisa e trabao valioso aki nos mester di voluntarionan pa un realisacion structura den comunidad. Kico ta cultura di paz?
Cultura di paz ta un conhunto di balor, actitud, tradicion, comportamento y estilo di bida basa riba:
- Respet pa bida, fin di e violencia, promocion y practica di no-violencia pa medio di educacion, dialogo y cooperacion;
- Respet pleno di principio di soberania, integridad teritorial y independencia politica di e Estado y di no-mediacion den asunto cu ta esencialmente hurisdiccion interno di e Estado, di conformidad cu e Carta di Nacion Uni y e derecho internacional;
- Respet pleno y promocion di tur derecho humano y libertad fundamental;
- Compromiso cu areglo pacifico di conflicto;
- Esfuerso pa satisface e necesidad di desaroyo y proteccion di e medio ambiente di e generacion presente y di futuro;
- Respet y e promocion di derecho na desaroyo;
- Respet y fomentacion di igualdad di derecho y oportunidad di hende muhe y homber;
- Respet y fomentacion di derecho di tur persona pa libertad di expresion, opinion y informacion;
- Adhesion na principio di libertad, husticia, democracia, tolerancia, solidaridad, cooperacion, pluralismo, diversidad cultural, dialogo y entendemento na tur nivel di sociedad y entre nacion; y anima pa un medio nacional y internacional cu ta favorece paz.
Tambe ta importante pa menciona cu ta logra progreso pa desaroyo pleno di un cultura di paz pa medio di balor, actitud, comportamento y estilo di bida favorabel pa fomenta paz entre persona, grupo y nacion.

Maneho di nos reserva di oro ta urgi atencion di nos Parlamento

ORANJESTAD – Miembro di partido Democracia Real, sr. Serge Mansur ta mustra cu den e rapport anual di 2007 di Banco Central di Aruba (CBA) ta aparece riba pagina 61 un informe tocante nos pais su reservanan di oro cu ta hopi interesante. Pero mas cu interesante, pa Partido Democracia Real e ta sumamente preocupante.
Aparentemente, durante fin di anjanan 90, cu prijsnan di oro na nivelnan hopi abou, tabata existi un miedo entre algun persona cu e caida den e balor di nos reservanan di oro lo por causa CBA su cifranan mustra malo. Pero hasta si esey a sosode e perdida lo tabata uno teoretico como cu ningun cen preto lo no a sali for di caha di CBA a causa di e caida di e prijs di oro.
Con cu ta, pa motivonan dificil di compronde, gerenca di CBA, cu apoyo di Ministro di Finanzas, durante 1999, a dicidi di yega na un acuerdo cu un instancia financiero di exterior cu esencialmente lo garantiza cu banco su oro lo bal por lo menos US$200.00 pa ons. A cambio di e garantia ey CBA a bai di acuerdo pa duna un opcion na e instancia financiero pa cumpra Aruba su oro na US$400.00, of CBA lo mester paga e diferencia na e instancia aki.
E decision aki ta presenta un beneficio maximo di US$200.00, mientras cu e potencial perdida no tin limite. Simplemente esaki tabata un decision malo. Esencialmente e personanan aki a dicidi di converti un potencial perdida teoretico den uno real.
E contrato dudoso aki (cu nunca a wordo trata den Parlamento) a wordo renova na 2004 pa 5 anja. Atrobe esaki a sosode sin ningun involvimento di nos parlamento. Kizas pa algun persona esaki no ta un problema, pero ora yega na decisionnan asina importante, ta necesario cu e organo (Parlamento) cu ta representa nos comunidad, (donjo di e oro aki) ta involvi. Partido Democracia Real ta duda cu e acuerdo aki lo a ser cera of renova si un discusion habri a wordo permiti pa tuma lugar e tempo ey.

ORANJESTAD– Partido MEP a tuma nota di un acusacion mentiroso di e lider di partido RED Rudy Lampe. T’asina cu diahuebs ultimo den pleno luz di dia un glas di e auto di Rudy Lampe a kibra of a ser kibra. Sinembargo te ainda no ta sigur kico a ocasiona e daño aki y promer cu e investigacion policial termina ya e ex-pastoor Rudy Lampe a lanta falso testimonio, bisando cu den pasado partido MEP ta conoci di ta haci dañonan na propiedadnan di contrincantenan politico. Partido MEP ta condena e acusacion baho di e ex-pastoor cu un biaha mas a demonstra su odio pa tur loke ta concerni MEP.
Dirigentenan di MEP durante e ultimo lunannan tambe a wordo perhudica ora cu nan autonan a wordo destrui, sabotea cu molotov cocktail y susha cu verf, y aunque cu nos tin un idea for di cual skina e destruccionnan aki ta sali, toch nos no a punta dede den direccion di cualkier partido politico.
Sinembargo pa loke ta e ‘destruccion’ di diahuebs ultimo, Rudy Lampe mester cuminsa pensa seriamente, si su actitud colonialista y su carta di traicion di 28 December 2006 den cual e ta pidi pa un solo Gobernador y un solo Procurador General pa Aruba y Antiyas y e forma insistente con e kier entrega henter e pais aki den man di Hulanda ta trece cu ne cu cierto parti di e comunidad Arubano no ta tolera e actonan di traicion aki mas y ta ventila esaki mediante di destruccion di propiedad di otro hende.
Talvez Rudy Lampe por pensa tambe den direccion di esnan cu a wordo ‘perhudica’ den e afamado caso di Fondo Desaroyo Nobo San Nicolas, kendenan ta mira Rudy Lampe di Comision di Berdad como e culpabel mayor cu nan mester a aparece den Corte di Husticia.

WILLEMSTAD – Djasabra 28 di yüli a kuminsá e Curaçao Chess festival 2008. Esaki ta e di ocho Curaçao Chess Festival, kaminda un grupo grandi di partisipante di vários pais den e periodo aki ta bini aki spesialmente. Tambe ta e di sinku aña konsekutivo ku e torneo aki ta tumando lugá den Hotel Breezes.
E organisadó di e torneo aki Curaçao Chess Players Association ta bai kumpli 20 aña na novèmber awor i ta di dos aña ku himno di Kòrsou ta wòrdu kantá dor di e elegante Thessely Williams ku su bos bunita.
Bou di e spònsernan tambe tin algun ku tin hopi aña ku e torneo aki.
Tin en total 41 partisipante ku ta bini for di entre otro Suesia, Venezuela, Merka, Trinidad & Tobago, Spaña, Ulanda, Alemania, Boneiru, Aruba i tambe for di Kòrsou.
Den e promé buèlta e promé parti di e hungadónan riba e lista di hungadó ta enfrentá esnan riba e di dos partido di e lista. Mesora sa tin hopi sorpresa.
Despues di e promé dos buèltanan tin tres hungadó den e grupo Hubenil ku ta invikto i 10 hungadó den e Grupo Habrí ku tambe ta invikto.

LONDON, Inglatera, - E kantante britániko Amy Winehouse, di 24 aña, a sali awe for di hospital, kaminda el a keda interná di urgensia ayera, pa un aparente “alergia pa remedi” un bosero di e sentro a informá.
Winehouse yegando den ambulans for di su kas situá den e bario di Camden (na nort di London) despues a drenta University College Hospital di London.
E bosero di e hospital a bisa ku e kantante a sali “di bon humor” despues di a pasa un bon anochi.
E bosero di e artista, Chris Goodman, a bisa ku e kantante a sufri di un “alergia pa remedi”.
E luna aki, e tata di Amy, Mitch Winehouse, a splika ku su yu muhé ta sufri di un enfermedat di pulmon (pa ta huma ‘crack’ i sigaria), e tin problemanan asina grave ku su salú, ku un simpel sigaria por hasié daño.
Huntu ku su problemanan di salú, tin tambe e kondena di 27 luna den prizòn imponé pa un Tribunal londinense pa su esposo, Blake Fielder-Civil, pa agredí doño di un pub di e kapital britániko i despues ofres’é sèn p’e retirá e akusashon.

Foto: Amy Winehouse 2907

Amy Winehouse, di 24 aña, a sali for di hospital awe.

Foto: Mitch Winehouse 2907

Mitch Winehouse, tata di Amy, ta yega hospital na London ayera nochi lat.

WILLEMSTAD.- E establesimentu aselerá di tokonan chines den barionan di Kòrsou sin lugá pa duda lo tin komo efekto direkto, subida di preis di komestibel i otro artíkulonan di promé nesesidat. Esaki sigur si e komersiantenan chines apliká na Kòrsou e práktika ekonómiko ku den tur merkado chikí ku nan ta operá, nan ta apliká. Esta, kumpra produktonan na “bulk” for di eksterior, pa despues hasi palabrashon “entre nan” pa asina tene preisnan artifisialmente haltu.
Ekspertonan ku LA PRENSA a papia kuné riba e tópiko aki a indiká ku e práktika ariba menshoná ta un di kousanan prinsipal pakiko na Aruba preisnan di komestibel i di produktonan di promé nesesidat a subi di un forma asina bárbaro.

Bleki flit
Ta konosí ku na Aruba 9 di kada 10 supermarket, minimarket, toko òf tienda ta den mas di komersiantenan di orígen chines. E situashon a sali di tal forma for di man ku hasta den barionan mediano di mas o ménos 500 kas, tin 7 minimarket pa sirbi un poblashon di apénas 1.500 hende. Remarkabel ta si ku ningun di e tiendanan chines aki ta kompetí ku otro a base di preis. 1 òns di wòrs salu ta kosta mes tantu na TUR 7 supermarket. Meskos ta konta pa e batata, aros, karni di vris, un bleki flit òf mangel.

Homogenidat
Un investigashon ku LA PRENSA a hasi a saka afó ku na Kòrsou tambe e praktiká aki ta birando un kustumber. No ta pasa un siman ku den korant no ta sali publikashon di Servisio Asuntunan Ekonómiko den kua ta anunsiá establesimentu di un òf otro toko òf minimarket chines den un di e barionan di Kòrsou. Na Bándariba por ehèmpel ya kaba por konta ku alrededor di 30 toko, tienda, minimarket òf supermarket chines. Un chekeo ariba ariba na e establesimentunan aki a saka afó ku aki tambe tin un “homogenidat” pa loke ta preis di produktonan di promé nesesidat i otro produktonan vital. Por ehèmpel, na tur e establesimentunan ku LA PRENSA a chèk, preis di TUR marka i di TUR tamaño di bleki di flit ta kosta igual. Na ningun por a detektá un diferensha den preis. Hasta nos por a konstatá ku un marka di flit ku tabata na speshal, tabatin e mesun preis “speshal” na 12 otro establesimentu.

E konosido kompilashon di orashon i meditashonnan na papiamentu den forma di buki “Poder di Orashon” ta optenibel atrobe, ounke den kantidat limitá. Den e kolekshon di orashon nobo aki a inkluí un kantidat grandi di orashon pa esnan ku ta sufri kebrante di salú, esnan ku ta bai hasi un operashon òf ku ta rekuperando di un operashon grandi. Tambe tin un kantidat grandi di orashon pa komuniká ku Señor atraves di su Angelnan, pero tambe invokashon pa protekshon, guia i yudansa di Angelnan di Señor. E buki ta optenibel solamente na tiendanan di Samsom i na Mensing Caminada.
E kolumnista, lokutor i eskritor Bob Harms, mas o ménos 5 aña pasá a pone e promé buki “Poder di Orashon” ku hopi éksito riba merkado. Den e promé buki a dediká atenshon amplio na e siensia di Angelnan, prinsipalmente manera esaki ta para deskribí den Beibel. Den e di dos buki a kompilá orashonnan dediká na diferente Santu popular na Antia i Aruba. Den esun nobo, manera indiká kaba, a dediká e promé parti di e buki na orashonnan pa sanashon.
E buki di orashon aki ta un ekselente regalo pa personanan interná den hospital òf ku ta rekuperando di un malesa òf un operashon. E ta ofresé orashonnan di gratitut i di speransa den e promesa di grandi ku Dios nos Señor tin pa nos tur.

WILLEMSTAD – Djaweps pasá 24 di yüli, e mecha a sende pa sa ken ta bai eksplotá komo e Ekipo Kampion di Kòrsou Bola 8 pa 2008.
Federashon di Biyar di Kòrsou su Kampionato Nashonal di Ekipo pa Bola 8, su temporada regular a terminá i awor a yega e Kaya Seis pa despues bai playoff i final.
E kampionato, ku a kuminsá dia 6 di aprel ku 9 ekipo batayando otro riba e mesa bèrdè a drenta su fase di kulminashon.
E ekipo di The Scorpions ta terminá e temporada regular na promé lugá ku 14 wega ganá i 2 pèrdí.
Maishi Tigers ta sali na di dos lugá ku 13 wega ganá i 3 pèrdí.
E sistema di “Kaya Seis” ta asina ku number 1 ku number 2 ta warda e ganadónan di number 4 kontra di number 5 i di number 3 kontra di number 6.
Den “Kaya Seis” e number 3 ta topa e number 6 ku den e kaso aki ta The Biesheuvel Friends kontra di Hoi Nao Titans i e number 5 kontra di e number 5 ta The CUB Sharks kontra di The Pedrators.
E seri di playoff aki ta un “best of three”. E ekiponan ku gana ta topa number 1 i number 2.
The CUB Sharks i The Biesheuvel Friends djaweps último a sali i pika dilanti.
Federashon di Biyar di Kòrsou ta deseá tur ekipo éksito i ta yama danki na tur e ekiponan ku a partisipá e aña aki atrobe a demostrá un tremendo aktuashon i komportashon i ta konta ku nan tur atrobe otro aña.

WASHINGTON, Merka, - E presidente di Merka, George W. Bush, a aprobá pena di morto pa un sòldá di Ehérsito merikano akusá di asesinato i violashon na 1988.
Bush asina a bira e promé presidente di Merka ku ta aprobá e ehekushon militar den 51 aña.
Presidente Bush a firma un petishon di Ehérsito pa ehekutá e militar merikano Roland Gray despues di su kondena na un Korte marsial 20 aña pasá, pa múltiple kargo di asesinato i violashon.
Roland Gray a kometé kuater asesinato i ocho violashon entre aprel di aña 1986 i yanüari 1987 ora e tabata na un kampamentu militar na Nort Carolina.
Ounke e abogadonan di Gray lo bai apelá e desishon, pero Kas Blanku ta kere ku lo realisá e ehekushon.
“Ounke, aprobá un kondena pa morto pa un miembro di nos servisionan armá, esaki ta un desishon serio i difísil pa un hefe komandante. E presidente ta kere ku e echonan den e kaso aki no tin duda ku e sentensia ta hustu i hustifiká”, e bosero di Kas Blanku, Dana Perino, a bisa den un komunikado.
Ku e diferensia di e sistema penal sivil, e hustisia militar merikano ta dikta ku no por ehekutá un miembro di Forsanan Armá, te ora ku e presidente aprobá e kondena pa morto.
Alegando posibel desafionan legal, Perino a ninga realisá mas komentario riba e loke ku por bira e promé ehekushon militar na Merka for di aña 1961, ora a horka un violador konvikto, despues ku su sentensia a keda aprobá pa presidente Dwight Eisenhower na aña 1957.

WILLEMSTAD – Den e último buèlta di e Kampionato di Dam Pan Amerikano Junior Girls, ku a tuma lugá na Sürnam, Rishaira Giterson di Kòrsou, a logra un viktoria relámpago riba su kontrinkante Cathlien Wielzen di Sürnam, kompilá un total di 18 punto p’asina sinta warda e resultado di e wega entre Vivian Troncondi Kòrsou i Annelaine Jacobs di Aruba, kende na inisio di e último buèlta tabatin un total di 17 punto.
Apesar di un tremendo wega di Vivian Troncon, finalmente e no a yega mas leu ku un empate lokual a hasi ku Jacobs ku tambe a yega 18 punto.
Dor ku e reglanan di e kampionato ta bisa ku den kas di empate di total di punto entre dos hungadó ta wak promé kantidat di weganan XXXfanáXXX i despues e resultado di e wega entre e dos hungadónan aki.
Annelaine Jacobes di Aruba tabatin 8 wega ganá, 2 empate i 1 pèrdí.
Rishaira Giterson tabata tin 7 wega ganá, 4 empate i 0 pèrdí, a keda e ora ei na e di dos lugá.
E tabla di posishon final di e kampionato di Dam Junior Pan Amerikano Girls tabata lo siguiente:
-Annelaine Jacobs(Aru) 11-18
-Rishaira Giterson(Kor) 11-18
-Vivian Troncon(Kor)
11-17
-Janine Signgotiko(Sur)
11-15
-Krystal Azzimullah(Sur)
11-14
-Turani Lodriguez(Kor)
11-14
-Mahabir Omatie(T&T)
11-14
-Cathlien Wielzen(Sur)
11-9
-Tamar de Windt(Kor)
11-7
-Kudijah Birot(T&T)
11-3

WILLEMSTAD, - “Nos a pèrkurá pa hopi material di promoshon i animashon durante di e weganan di Digicel Caribbean Championships. Naturalmente tin premio pa esnan ku bin bistí na kòrá tambe. Mi ta imaginámi ku tur hende tin un t-shirt kòrá den kashi, na SDK nos lo duna fanátikonan bandana, flùit, klappers i hopi detaye mas pa asina nan ta totalmente den ambiente pa animá nos selekshon”, asina representante di Digicel a komentá.
Durante di e promé enkuentro di Digicel Caribbean Championship djadumingu anochi, dos persona a ser skohé for di den públiko pa nan uzo di material di promoshon di Digicel i pa e echo ku nan tambe tabata un di e tantísimonan ku a bisti na kòrá pa bin mira e wega.
Representante di Digicel a sorpresá nan ku un premio na final di e wega.
Ámbos ganadó tabata sumamente kontentu.
“Nos ta invitá tur fanátiko pa bisti na kòrá pa e próksimo weganan, ademas di premionan den ‘Kick for Cash’ bo por gana premio tambe ora bo ta bistí na kòrá!”, asina representante di Digicel a finalisá.

WILLEMSTAD – Si gobièrnu sigui ku e maneho ku e ta hibando, anto e kompania lokal di telekomunikashon UTS, poko poko ta wòrdu hibá landfill. Asina direktor di UTS, Paul de Geus a reakshoná riba e pèrmit di e kompania di telekomunikashon Colombus pa operá na Kòrsou.
E kompania aki a haña pèrmit pa traha riba e merkado lokal i anteriormente, e sindikato SITCOM, tambe den persona di su presidente, Emilio Brunken, a ekspresá su preokupashon pa e desishon aki tumá pa gobièrnu.
E direktor di UTS tambe ta hopi preokupá ku e situashon aki i el a indiká di no ta komprondé e maneho ku gobièrnu ta hibando. ‘Na un banda por konstatá, ku nos pais tin hopi debe i na otro banda por mira kon gobièrnu mes ta baha balor di nos kompania di telekomunikashon’. Asina de Geus a remarká, splikando ku e presensia di Colombus ta nifiká un redukshon di balor di UTS.
E presensia di Colombus lo nifiká ku e ta bai kompetí ku otro kompanianan di telekomunikashon lokal, ofresiendo i bendiendo servisionan di telekomunikashon ku klientenan aktual di UTS. Segun de Geus, UTS no tabatin un mal relashon ku Colombus i aktualmente e relashon ku e kompania en kuestion ta bon. Pero e realidat ta, ku presensia di e kompania lo nifiká un situashon di relashon di kompetensia inhustu pa UTS, por a komprondé for di e splikashon di Paul de Geus. Prinsipalmente e ròl ku Colombus lo bai hunga den henter e proseso di telekomunikashon, tin e direktor di UTS hopi preokupá. Segun de Geus, e no ta komprondé e maneho ku minister di Telekomunikashon, Maurice Adriaens ta hibando relashoná ku UTS, pasobra manera e situashon ta awor aki, e no ta na benefisio di e kompania.

WILLEMSTAD- Ku gran orguyo partido Frente Obrero Liberashon 30 di Mei i su lider Anthony Godett a tuma nota di e eksitoso resultado ku hóbennan lokal a logra den Kampionato di Little League di Karibe na Boneiru.
E logro aki ta otro indikashon i benefisio ku komunidat kompleto tin na momentu ku invertí den deporte hubenil.
Partido Frente Obrero Liberashon 30 di Mei i lider Anthony Godett no únikamente ke felisitá tur e hóbennan pelotero, pero tambe e dirigentenan deportivo ku dia den dia afó a duna muestra kon ta ehèmpel pa e hóben.
Frente Obrero Liberashon 30 di Mei i lider Anthony Godett ke pone e esfuersonan aki komo ehèmpel, loke por hasi pa traha riba e hóbennan riba futuro di pais.
Un pabien na e hóbennan di Little League ku un biaha mas a saka kara di Kòrsou i ku ta ehèmpel pa otro hóbennan i tur klase di éksito na e Kampionato Mundial na Williamsport, Pa., kaminda e hóbennan lo bai representá bandera di Kòrsou i di Karibe pa e título mundial.
Un biaha mas pabien i éksito na e kompetensianan mundial na Williamsport.

ARIES: Plaka ta yega pa medio di herensia o regalo. Bo enkanto personal i bo seksualidat ta eksaltá. Bo por aktua i demostrá bo sentimentunan. 38,03,17.

TAURO: Miedu i inseguridat pa bo a kaba. Ta momentu pa konektá ku hende i eksigí pa loke tantu bo a lucha p’e. Bon suerte ta parti di bo i bo mester probechá. 19,33,02.

GEMINIS: Mustra bo agradesimentu na esnan ku bo ta kompartí bo bida diario. Pone resistensia na esnan ku no ta laga nada positivo. 49,26,33.

KANSER: E amor ta toka bo bida. Dera pasado. Deskonektá di tur loke a kousábu pena. Enfatisá awor en adelante solamente riba kosnan positivo. 30,04,12.

LEO: Pone bo mes awor den un balansa bo relashonnan personal. Bo por topa ku pasado na e momentunan aki, pero ta hopi importante. Un hende ta bai for di bo bida. 01,15.

VIRGO: Responsabilidatnan ta suma den bo bida ku di tur banda. Lo relashoná den bo trabou ta na vlam e dianan aki. Mantené kalma, spera ku pasenshi i ku fe. 14,03,26.

LIBRA: Responsabilidatnan a suma den bo bida ku mucha o personanan hóben ku tin mester awor di bo direktamente. Duna nan bo ayudo. 44,37,11.

SKORPION: Bo tin planiá pa biaha i esei no ta tumabu di sorpresa si un hende invitábu. Organisábu den bo kas pa bo por tuma un par di dia pa eksplorá, konosé lugánan nobo. 38.

SAGITARIO: Ku tur kos ku a pasábu durante e último añanan awor, bo ta kana e kaminda korekto i pas. Organisá bo mas ku ménos esfuerso i pone bo atenshon na e prioridatnan.

WILLEMSTAD - Ulanda lo aseptá den su komunidat ku ta eksistí poligamia? Kaminda un hòmber por ta kasá òf bibá ku dos muhé? E pregunta aki minister Omayra Leeflang a bolbe lansa den e dianan ku a pasa.
Di akuerdo ku un artíkulo ku a sali den e korant ulandes De Telegraaf, den e diskushon ku a surgi rondó di rekonosimentu di un matrimonio homoseksual, minister Leeflang a pone e kaso ku un pregunta, bèk den skochi di Ulanda ku un karta habri ku el a publiká den prensa lokal.
Manera LA PRENSA a indiká kaba, Antia lo apelá e sentensia di Korte ku a dikta ku un pareha homoseksual ku a kasa na Ulanda, tin mes derechi na Antia i na Aruba ku un pareha heteroseksual.
E kos aki p’ami, ta un kuestion di prinsipio, asina minister Omayra Leeflang a deklará.
Ta trata di e kaso konosí kaminda un pareha lesbiana kier a hasi uso di Bureau Ziektekostenverzekering, BZV pa sigurá su partner i nan yunan. BZV a ninga di aseptá e miembresia aki, riba kua e pareha a disidí di skohe kaminda di korte.
E argumento di BZV tabata ku un matrimonio di e mesun sekso, no ta ser aseptá den nos komunidat.
Korte, klaramente a pensa otro i a dikta ku debidamente BZV tin e deber di sigurá e pareha pa gastu médiko.
Den su karta habrí, e minister ta enfatisá ku ta un proseso demokrátiko a tuma lugá na aña 2000 den kua parlamentu di Antia a disidí ku un matrimonio por ta entre un hòmber i un muhé.

WILLEMSTAD – “Pa tur esnan ku ke sa, mi no tin niun intenshon di bandoná partido PAR. Tampoko mi tin intenshon di lanta mi mes partido”, Eugène Rhuggenaath, aktual diputado di e partido hel a deklará.
Di e forma aki Rhuggenaath a desmentí un kantidat di spekulashon i rumor ku a bin ta sirkulá pa basta dia rondó di su persona.
Pa basta dia kaba tin un kantidat di spekulashon, kiko lo ta futuro (polítiko) di e aktual representante di PAR enkargá ku e kartera di Asuntunan Ekonómiko den e aktual Bestuurscollege di Kòrsou.
Ta trata aki di e hecho, ku diputado Rhuggenaath no ta di akuerdo ku e kandidato pa bira direktor di Curaçaose Dokmaatschappij, CDM. Rhuggenaath, a pone un posishon klarito riba mesa, esta ku e kandidato mas fuerte te ku awor no ta aseptabel p’e, debí na su pasado ku ta manchá ku un kondena di korte pa aktonan kontra lei ku el a kometé.
Banda di esei, Rhuggenaath ta haña, ku e kandidato aki no ta disponé di e konosementu nesesario di mundu naviero. Rhuggenaath a ripití e posishon aki na diferente okashon den pasado i ketu bai ta para riba su punto ku e ta konsiderá un punto di prinsipio.
Rhuggenaath mes a lansa un proposishon pa sali for di e impase aki. El a proponé pa nombra un direktor interino ku e tarea spesífiko pa trese e kambionan nesesario den e kompania i pone e empresa aki riba e kaminda di progreso i kresementu atrobe. E direktor interino aki lo mester keda pa un tempu definí, despues di kua ta nombra un direktor definitivo.

WILLEMSTAD - Den e próksimo seis simannan lo bin un kambio grandi rondó di Prins Bernhardschool na Rio Canario. Aparte di drèmpel, lo konstruí kaminda pa hende na pia kana seif, lo drecha e alsera ku klenku i – komo regalo, manera direktor di e kompania kontratista MNO Vervat Herman van der Laan a anunsiá ayera tardi – lo modernisá e entrada di e skol ku awor aki ta konsistí di klenku bieu.
E asento di tur e trabounan aki ta riba e aspekto di siguridat. Esaki ta otro proyekto importante pa komunidat, pasobra e proyekto aki, unabes ku e ta finalisá, lo nifiká un paso grandi pa mas siguridat na e skol aki. Pero e ta importante tambe, pasobra e ta nifiká alabes, ku nos ta krea un ambiente agradabel pa tur esnan ku ta trafiká i traha den e área aki, segun e diputado enkargá ku Infrastruktura, kende a duna señal ayera tardi pa e trabounan kuminsá.
Ta trata di trabounan tambe ku ta enserá adaptashon di e situashon di tráfiko na altura di e skol aki.
En realidat a kuminsá ku preparashon di e proyekto aki for di 2006. E proyekto a kuminsá den kuadro di e trayekto Quick Win. Den e kuadro aki a logra pone e promé drèmpel. Awe nos ta asina leu, ku ta sigui ku e proyekto di mas siguridat na e skol aki, diputado Godett a bisa.
E proyekto ta enserá entre otro ku ta bai konstruí “looppaden” pa e hende grandi, pero tambe pa e muchanan di skol ku por kana den futuro na un manera seif drenta skol i ta bin drèmpel pa vehíkulonan redusí velosidat i asina garantisá mas siguridat pa tur esnan den e besindario aki.

WILLEMSTAD - Forsa Kòrsou tambe ke para ketu na funshonamentu di Aliansa Patriótiko. Forsa Kòrsou ta kere, ku mester yega na un mihó komportashon den Aliansa Patriótiko i ta mara su futuro partisipashon na esaki, asina lider dje partido mr. Nelson Navarro a bisa.
Navarro tabatin basta dia ku e no tabata na Kòrsou. El a asistí, manera ta konosí na e enkuentro parlamentario POK ku a tuma lugá algun siman pasá na Ulanda, pero a hañ’é konfrontá ku problema ku su salú, di manera ku e mester a keda mas largu.
Esei mes a pone ku e no tabata presente durante e diskushon ku tabatin último tempu riba funshonamentu di Aliansa Polítiko.
Manera ta konosí, partido MAN a entamá e asuntu aki. Un komishon ku e partido blou a instalá pa evaluá partisipashon di MAN den Aliansa Patriótiko a konkluí entre otro ku mester yega na un mihó funshonamentu di Aliansa Patriótiko. MAN ta na fabor pa un mihó struktura di funshonamentu i un kódigo di komportashon. MAN a pone esei komo kondishon pa keda den e aliansa.
Forsa Kòrsou awor ta parse di ta riba e mesun liña. Segun Nelson Navarro, e meta di Aliansa Patriótiko ta bon, pero nunka por ta e intenshon pa e aliansa aki kousa desgustu. Awor aki tin un desgustu enorme den komunidat.
“Nos ke un mihó kondukta. Asin’aki no por sigui. Nos tin un desgustu general den pais. Nos no tin mag di sera wowo pa e realidat aki,” Navarro a trese dilanti. E lider di Forsa Kòrsou ta haña, ku mester atendé e problemanan ku pais ta konfrontando.