ORANJESTAD- Diadomingo dia 6 di juli 2008 lo tuma lugar e Aruba-race, un careda pa velero (yate di bela) grandi.
Aproximadamente un diez velero a registra caba pa participa den e careda aki, di locual algun cu ta bin di Curaçao. Banda di e ‘rond e isla’ pa velero den September, Aruba awor tin un segundo evento pa velero grandi.
E careda lo cuminsa pa 11:00 a.m. na e entrada pa waf di Oranjestad enfrente di Surfside Marina. Desde Parke Wilhelmina lo por tin bon bista riba esaki.
Di akinan e veleronan lo bay pa e prome boei na Barcadera y despues pa Arashi. Despues di algun boei mas dilanti di e hotelnan e veleronan lo pasa e finish dilanti di Manchebo Beach Resort pa alrededor di 3:30 p.m.
E captain’s meeting lo tuma lugar riba Diasabra dia 5 di juli pa 5:00 p.m. y e entregamento di premio lo tuma lugar riba Diadomingo dia 6 di juli pa 6:00 p.m., ambos na localidad di Bucuti Yacht Club. Pa cualkier pregunta of pa registra por tuma contacto cu Sr. Eric Mijts na 565-6887.

ORANJESTAD- Pa dos siman largo IDEFRE lo organiza e vakantiprogramma anual den e districto di San Nicolaas y vecindario.
E programma aki ta existi pa varios aña caba pa muchanan di skolnan basico di San Nicolaas cu no tin mucho cosnan di haci den nan vakantie di skol.
E hecho cu mayoria di mayornan di nos muchanan di San Nicolaas y vecendario ta traha den hotel ta cuasa cu hopi mucha ta keda cas sin guia di mayor.
Un otro aspecto ta cu e situacionan financiero cu instancianan ta pidi pa nan vakantieprogramma no ta permiti e mucha di menos recurso participa den e programanan concerni.
IDEFRE y su profesionalnan riba tereno di recreacion y deporte anualmente ta pone su programma pa asina yena e vacio aki y ta duna e mucha di menos recurso e oportunidad pa e tambe disfruta di por lo menos dos siman di vacacion na un manera recreativo y deportivo. E aña aki IDEFRE lo ehecuta dos programa .
E prome siman for di 14 te cu 18 di juli bou di e departamento SPORT VOOR ALLEN cu su hefe Willy Willems IDEFRE ta organiza un siman di weganan popular pa nos muchanan.
E di dos siman e departamente SPORTINSTRUCTIE ta organiza un siman den cual cuater deporte lo worde instrui na nos muchanan stimulando nan asina pa invulcra nan mes den un deporte organiza.
E aña aki e deportenan di Futbol, Softbol, Baseball y Atletismo lo worde instrui nan nos muchanan. Cada dia un deporte lo worde instrui pa instructornan di e federacion al respecto.
E intruccionan lo worde duna for di dialuna 21 te cu 24 di juli.
Diabierna dia 25 di juli IDEFRE e aña aki lo organiza e prome caminata pa mucha, hubentud y su mayornan. E caminata aki lo carga e nomber CAMINATA PA UN HUBENTUD SANO.

ORANJESTAD - Aña pasa Sr. Milton Berlinski a establece un beca di cuater aña pa un total di 16 mil dollar cu Aruba Scholarship Foundation lo administra.
E beca Sabina Berlinski Memorial Scholarship ta honra memoria di mama difunto di Sr. Berlinski.
Siman pasa e Selection Committee di Aruba Scholarship Foundation a evalua e peticionnan pa ayudo financiero pa aña escolar 2008 – 2009 y unanimamente e comite a selecta Srta. Maylin Dijkhoff pa ricibi e beca. Maylin ta studiante di Business Administration na Miami Dade Community College. Despues cu e caba su Associate Degree, Maylin ta bay specializa den Finance.
Ora cu e ta na Aruba e ta traha na Caribbean Mercantile Bank pa spaar pa su estudio.
Sabina Berlinski tabata un persona hopi conoci na Aruba pero bou nomber di Soybel. Soybel a nace na Brazil, su casa Leonard “Leo” Berlinski a bin di Polonia. Nan a establece e joyeria Pearl of the Orient na San Nicolas y despues a habri un sucursal den Nassaustraat na Playa.
Leo y Soybel tabata hopi activo den organizacionnan civico y caritativo. Pa hopi aña nan tabata tuma parti den actividadnan di Lions Club. Leo tabata miembro di Logia Masonico “EL Sol Naciente” mientras cu Soybel tabata un di e prome miembronan di e otro organizacion masonico “Order of the Eastern Star.”
Hopi hende ta recorda Leo como miembro di SAC y Soybel como participante den tur actividadnan di carnaval. Den su ultimo añanan Soybel a funda Organisashon Parkinson Aruba (OPA) pa yuda duna alivio na esnan cu ta sufri di e malesa teribel aki y nan famia.

ORANJESTAD - Nos ta yegando na fin di un aña escolar, un aña di lucha (indexering), pero tambe di retonan interno.
E desaroyonan den curso di aña a haci cu directiva mester a desvia di su plan di aña y pone otro prioridadnan. Apesar cu falta basta asunto pa resolve, directiva a dicidi pa duna miembronan di directiva e espacio y tempo pa termina nan trabou na nan respectivo scol.
Durante e prome dos siman di juli directiva lo sigui traha riba e asuntonan pendiente, cu ta entre otro varios reunion general extraordinario cu grupo di miembro a solicita, compensacion pa e dianan di welga, casonan andando di miembronan individual y preparacionnan pa e siguiente reunion general anual.
A palabra den directiva cu lo tene tur miembro bon informa pa medio di un Mensahero cu lo bai scolnan prome cu vacantie ainda of cu lo worde manda via post. Si pa fin di otro siman bo no a ricibi bo Mensahero na scol por fabor tuma contacto cu nos oficina o pasa personalmente.
Ademas directiva ta anuncia cu e ultimo fecha pa entrega ‘payslip’ si bo a welga, ta 31 di juli venidero.
Por ultimo ta gradici miembronan pa e sosten na nos sindicato durante e simannan dificil di nos lucha pa indexering y den e temporada despues..
Boso por ta sigur, cu e directiva aki lo sigui cu su trabou na bienestar di miembronan y enseñansa. Nos prioridad ta haci di SIMAR un sindicato fuerte, cu por haci un diferencia den enseñansa y den comunidad. Pesei nos a y lo trata tur reclamo of keho di miembronan cu e seriedad necesario.

ORANJESTAD - Diaranson 2 di Juli 2008 pa 7 or ta habri reunion, Director di DIP Sr. Sjak Shie. For di tempo di Status Aparte no a bin Ordenansa specifico pa planificacion di tereno. Awor tin un concept traha for di diferente angulo, y diferente añanan.
Na 1994 tabatin e prome publicacion ariba Landsverordering Ruimtelijk Ontwikkeling. Den 1996 otro concept a entrega na gobierno riba e mesun tereno di LRO. Porfin na 2005 gobierno a bin aprobacion di e proyecto di iniciativa di LRO.
Riba 2 mei 2006 Ministerraad a vota pa Ley di Planificacion di Ordenansa di espacio bin na vigor. Riba 6 October 2006 LRO a sali den publicidad.
Lo ta bon pa scucha con terenonan ta worde parti. Ta resta bastante tereno pa e 100 mil alma cu ta biba riba e baranca Aruba?
Kiko ta para di terenonan bieu, y mondinan intacto? Con nos beach ta aki 20 aña? Nos watapana ta haya balor como nos palo encanta? Piedranan ta haya balor?
Parke Arikok ta pa turistanan so? Por campa na Dos Playa y traha cas di palo?
Tur hende por traha lugar riba rif y kap tur matanan?
Baby Baeach, un lugar di recreo pa hopi famia den fin di siman. Ta bin mas espacio pa e comunidad cu ta crece na Baby Beach?
Laga nos pone famia nos dilanti, mester di espacio pa nos amabel trahadornan di Aruba. Arashi ta un encanto pa su bahada di solo y su santo blanco unda driekeil ta pone webo, nos no ta stroba e bestia grandi ey pa procrea, como cu nos tur ta stima bestianan inocente.
Den un bon planeamento di añas, comunidad ta spera di ta ameno cu e concept traha pa expertonan di DIP. Cada hende tin su pregunta, awor bo tin oportunidad.

MALMOK- E di 22 edicion di e conocido “Aruba Hi-Winds”, lo tuma lugar e aña aki, cumninzando 2 di Juli, y lo dura te cu dia 7 di Juli, cu ta dialuna otro siman.
Manera ya a bira un tradicion, e competencia aki lo tuma lugar na e conocido sitio di Fisherman’s Hut net panord di Marriott Hotel.
E evento lo inicia awe mainta ora cu habri e proceso di registracion di e participantenan y e lo clausura cu e gran evento di premiacion cu lo tuma lugar dialuna anochi na Paseo Herencia.
E organizadornan ta spera participacion di mas cu 100 atleta for di diferente parti d mundo, kendenan lo compete den e specialidadnan di ‘slalom windsurfing,’ ‘kite boardin’ y tambe ‘freestyle windsurfing.’
Aruba Hi-Winds ta e evento di windsurfing di mas bieu den e region di Caribe. E prome edicion a tuma lugar na luna di Juni di 1987, riba iniciativa di e organizadornan local manera Anthony Blok y Ruben Croes.
E prome evento aki a resulta asina bon y tremendo, cu e conocido “Professional Boardsailing Association, esta PBA, a dicidi di sanciona e evento aki y converti Aruba Hi-Winds den parti di e World Tour di e competencia pa 1988.
Den e siguiente añanan, Aruba Hi Winds a transforma su mes den un di e eventonan mas renombra di e circuito di windsurfing mundial y atletanan renombra mundialmente, manera e ex campeonnan mundial Bjorn Dunckerbeck, Robby Naish y Andres Bringdal, ta ehempel di e nivel mundial cu a participa den e eventonan aki, teni na Aruba.
For di 1997 e evento di Aruba ya no a firma parti mas di e Professional Windsurfing World Tour y el a ser converti den un evento amateur pero cu a sigui goza di gran interes.

Minister Adriaens: “Tin atenshon pa programa di Helmin Wiels”

WILLEMSTAD – “E programa di radio di Helmin Wiels realmente meresé atenshon di parti di gobièrnu, mirando sierto palabranan ku ta usa durante e programa. Ounke mester bisa tambe, ku no tin hopi espasio pa aktua, teniendo kuenta ku e libertat di ekspreshon ku ta eksistí.” Esaki ta loke minister di Tráfiko i Komunikashon Maurice Adriaens, a bisa LA PRENSA awe, relashoná ku pregunta i krítikanan ku tabatin riba e programa último dianan.
E minister a bisa, ku na e momentunan akí tin atenshon pa e programa di radio i ku tur hende mester tene nan mes na norma i balor ku ta konta den komunidat. “Un hende por tin su krítika riba mandatarionan, pero no ta nesesario pa yama hende na nòmber. Mester papia riba e tópiko i no riba e hende. No tin ningun sentido pa menshoná niun hende su nòmber na manera ofensivo. Den e kaso spesífiko akí, nos por aserká nan i bisa nan pa tene nan mes na reglanan di étika. Por konstatá regularmente, ku durante e programa nan ta agitá. Esaki por ta un motibu pa intervení, pero ainda no a yega na e punto ei. Ami personalmente ta responsabel pa e parti tékniko i mi tin ku kontrolá por ehèmpel si tur radio tin e kònòpi di ‘delay’ ku kual por filtra palabranan insolente i saka nan afó. Esei ta e ròl ku ami tin téknikamente.”
Pa loke ta trata e kontenido di e programa, e minister a splika, ku esei ta kai bou di minister Omayra Leeflang ku ta enkargá ku entre otro enseñansa. “Prensa tin un ròl importante den komunidat i ta p’esei mester evitá ku palabranan malu ta zona na radio. Komo gobièrnu bo mester duna un señal ku bo no ta aseptá tur kos. Mira kon minister Leeflang a atendé mes ora ku e korant Boletin, despues ku den un edishon a sali pòtrètnan pornográfiko. Via di Departamentu di Enseñansa e minister por atendé ku e reglanan di kontenido di korantnan i programanan di radio i televishon.”

WILLEMSTAD – Djaluna 30 di yüni Vesta a selebrá su 60 aña di eksistensia.
Pa mitar di 7 di anochi nan tabatin un misa pa gradesí Dios pa e logro aki i despues a sigui un resepshon bastante animá den paviljoen na Californiaweg.
Sr. Fraay den su diskurso a elaborá riba historia di Vesta.
El a bisa ku tur hende ta konsiente ku no ta fásil pa un klup kumpli 60 aña.
Vesta a ser fundá 30 di yüni 1948 dor di un grupo di amigu.
E desishon a wòrdu tumá riba seru di Kristoffel kaminda un dia promé un grupo di amigu a sali ku baiskel for di Sta Maria. Nan a keda drumi na pia di e seru pa mainta trempan nan subi e seru te den tòp pa kristalisá nan idea.
Nan a duna e klup un nomber Vesta (su sekreto ya pa 60 aña ta sinta den su nòmber).
Vriendschap Eendracht Sterken Tegen Allen (palabranan di Piet Veerkamp R.I.P.)
E idealnan di Vesta semper a keda usá dor di tantu su dirigentenan ku nan miembronan.
Historia remarkabel
Na aña 2004 Vesta a subi pa Promé Divishon ku hungadónan di U-17. Aktualmente 4 aña konsolidando di 5 lugá.
Mérito na Ronni Trouwloon i Manfred Sabina i tambe FFK ku a bini ku reglanan proponé dor di entre otro Harold Wanga, presidente di Vesta, pa protehá hungadónan hóben ku a wòrdu formá den nan klup.
Kantidat di miembro aktual
Vesta tin aktualmente 150 miembro aktivo den Senior, U-20, U-17, U-15, U-13 i e aña aki U-11 i probablemente U-9.

OMAHA, Nebraska, Merka – Natalie Coughlin djamars a fiha su di dos rekòrt mundial den dos dia, i Aaron Peirsol a kibra otro rekòrt riba e di tres dia di e eliminatorio merikano di landamentu pa e Weganan Olímpiko.
Coughlin a kibra su mes rekòrt riba 100m lomba i a bira e promé muhé kende ta landa e distansia den ménos ku 59 sekònde, ora el a mishi ku muraya na 58,97. Un dia promé, el a pone un rekòrt mundial di 59,03 den e pruebanan preliminar, apénas dos minüt despues ku Hayley McGregory a kibra e rekòrt promé di Coughlin.
Margaret Hoelzer a drenta di dos i probablemente ya el a sigurá un pasashi pa e Olimpiada di Beijing – ku un tempu di 59,21. McGregory, kende apénas 24 ora promé tabatin un rekòrt, a drenta na di tres lugá ku un tempu di 59,42, i no a logra keda den e tim ku lo bai e evento.
Apénas minütnan despues, Peirsol a kibra e rekòrt mundial di 100m lomba pa hende hòmber, superando un grupo di rivalnan fuerte ku un tempu di 52,89 sekònde.
Peirsol a kibra e marka di 52,98 sekònde ku e mes a pone aña pasá, durante e Mundial di Oustralia, i a sigurá su di tres pasashi pa Beijing. Awor e falta pa kompetí den 200m lomba, kaminda e ta spera di bini bèk despues di un derota sorprendente di e poseedó di rekòrt Ryan Lochte den e Mundial di 2007.
Matt Grevers a sigurá su di dos pasashi olímpiko ora el a marka 53,19, miéntras ku Lochte, kende a ninga di partisipá den e final anochi di 200m liber, ku e speransa di tin mihó chènsnan riba lomba, tabata di tres ku 53,37.

CARACAS, Venezuela, - E gobièrnu venezolano ayera den un komunikado a selebrá liberashon di 15 rehen den man di e gueria colombiano, i a pidi FARC pa entregá tur persona sekuestrá ku e tin den su poder.
E gobièrnu di Hugo Chávez ta uni n’e hubilo p’e felis akontesimentu di liberashon di eks kandidata presidensial Ingrid Betancourt, 11 siudadano colombiano i 3 siudadano merikano kendenan den karni propio a sufri angustianan di e selva i duresa di e koutiverio”, e komunikado ofisial risibí pa AFP a afirmá.
Segun kadena di televishon estatal VTV, Chávez a yama su kolega colombiano Alvaro Uribe ayera pa felisit’é pa liberashon di e rehennan.
No opstante, e mandatario venezolano ainda no a ekspresá públikamente riba e kuestion.
Entre yanüari i febrüari, Chávez a risibí seis rehen di FARC, librá di forma unilateral pa e gueria den su gesto pa e mandatario venezolano.

BOGOTA, Colombia, - Ingrid Betancourt i otro 11 polis i militarnan colombiano eks rehennan di FARC a kompañá presidente Alvaro Uribe durante e diskurso fo’i palasio presidensial durante kua el a felisitá tur esnan involukrá den e operashon di reskate.
Nan tur, huntu ku otro 3 sekuestrá merikano kendenan direktamente a bula bai nan pais, a keda librá ayera trempan den un operashon di inteligensia militar colombiano durante kua “no a realisá niun solo tiru”.
Den un seremonia televisá, e mandatario colombiano a urgí “Fuerzas Armadas Revolucionarias de Colombia” (FARC) pa aseptá invitashon di gobièrnu pa desmobilisá.
“Nos ta invitá FARC pa hasi pas i kuminsá libra tur esnan sekuestrá kendenan ainda ta den boso poder”, Uribe a señalá.
Uribe a kalifiká e operashon “Jaque”, manera e reskate a keda boutisá, komo homenahe na Derechonan Humano i a elogiá minister di Defensa, Juan Manuel Santos, i miembronan di Ehérsito di Colombia.
Un bosero di Kas Blanku a konfirmá ku gobièrnu di Merka a yuda, ounke e no a spesifiká detaye riba e karakterístika di e yudansa.
E bosero tambe a indiká ku Washington tabata na haltura di e operashon di reskate fo’i su fasenan inisial i tin sinku aña trahando ku gobièrnu colombiano pa logra liberashon di esnan sekuestrá.
Entre nan tin e kontratistanan merikano Keith Stansell, Thomas Howes i Marc Gonsalves, kapturá pa FARC na 2003.

 

WILLEMSTAD - Djasabra último tabatin un tremendo kareda di Street Legal na Curaçao International Raceway.
FAC i Komishon Organisadó sigur ta hopi satisfecho pa sigui mira kon e aktividat di Street Legal ta kresiendo. Ta hopi tabata e koredónan ku a bolbe haña kaminda pa Curaçao International Raceway i tambe vários koredó ku tabata nan promé biaha riba pista.
Karedanan emoshonante den Heavy Bracket ora ku e American Muscle Cars nan a sali 1,2,3 sakando tur e import nan afó.
Resultado di kategoria di Street Bracket ku ta kore di 18.00 sekònde pa 13.00 ta lo siguiente:
1] Ethley Martina Toyota Starlet Turbo Dial In. 14.03 E.T. 14.088
MPH 97.64 R.T. .097
2] Woon King Ng Honda Civic Dial In. 14.99 E.T. 14.975
MPH 89.90 R.T. .342
Mihó Elapsed Time a bai pa Geonaar “Pollo” Ferreira ku su Mazda RX-7 Turbo a kore E.T. 13.029 sekònde.
Mihó Miles Per Hour a bai pa Geonaar “Pollo” Ferreira ku su Mazda RX-7 Turbo ku 112.58 miya pa ora.
Mihó Reaction Time na lus a bai pa Julien Bonifasio ku su Toyota Starlet i Woon King Ng ku su Honda Civic ku .014.
Lider di e kampionato 2008 na promé ta Julien Bonifasio ku 440 punto. Na di dos lugá tei Otmar Conradus ku 420 punto. Na di tres puesto Johnny “Juni Mondi” Dickens tin 330 punto.
Tabata un final entre e Martis nan. Raymich su lus na final a sende ora ku el a drenta promé ku Jenny “Showman”. Tantu Alden Merite, Andy Neman i Shanigan Paula a buta nan turbo nan baha tempu chikí riba e pista prepará pe Kareda Lokal “Selebrando dia di Bandera, 5 di Yüli proksimo.

WILLEMSTAD – Miembronan di famia Claret a presentá awe mainta na De Tempel pa sigui insistí riba un investigashon di e entrada di Sero Toleransha den kas di e famia na Wishi/Marchena na mart último. Nan no ta satisfecho ku progreso di e investigashon.

Skina di Sorti, awe djaweps 3 di yüli di 2008, ta kuminsá ku deseá tur hende un bon dia. Pa midi progreso di un pais, bo tin di wak bosnan outorisá riba un òf otro aspekto di maneho, den lus di e faktor krítiko pa un desaroyo eksitoso di e pais. Lokual ta bon pa argumentashon den kuadro di retórika polítiko, no ta apto òf sufisiente ora ta trata di un aserkamentu di apresiashon metódiko di maneho. Mi a yega di splika na algun okashon kaba ku e pregunta no ta kiko bo a alkansá, pero si bo a alkansá lokual bo por a alkansá.
****
Si bo ta usa IMF komo bos outorisá riba aspektonan di maneho (makro ekonómiko ku speshalisashon riba e parti finansiero monetario), nan proyekshonnan, entre kual esun di kresementu ekonómiko ta un “benchmark” ku mester aparesé den bo evaluashon despues ku e periodo determiná transkurí. E faktor krítiko pa alkansá e proyekshonnan ku IMF ta menshoná den su relato ta bira kriterionan di evaluashon di maneho.
****
Mi a bini ta mustra ku insistensia ku maneho di un pais semper bai mester ta di oumentá su kapasidat pa atendé ku “shock” eksterno. Mi a kalifiká e aspekto aki komo fleksibilidat (“resiliency”). Pa lokual ta nos nivel di devisa, e relato di IMF ta mustra ku nos ta dependé di kapital eksterno i ku retonan manera desaroyo global di komestibel i kombustibel eminente.
****
IMF ta skirbi ku: ”The current account deficit will remain large as a result, but will be financed by foreign direct investment and development aid, allowing reserve coverage to be maintained at existing levels. A negative factor is the global food and fuel price shock, which is boosting inflation”. Pregunta ta keda kiko ta e maneho pa redusí e dependensia aki? Kaminda bo tin poko influensia riba faktornan stratégiko, bo úniko opshon ta esun di krea reserva. Un maneho ku ta haks riba esun di splender rekurso di kompanan di gobièrnu ku Kòrsou a brasa.

WILLEMSTAD -- Tur esten ku na Kòrsou tin masha hopi hende ta skohe pa flit abeha pa asina libra nan mes di molèster ku e bestianan aki ta trese, tin un problema serio na parto ost di Merka, pasobra abehanan di un forma no komprendibel ta disparsiendo di e área.
Un informashon publiká e siman aki den e korant merikano Seattle Times a mustra, ku preisnan di kuminda por bai subi bastante si no solushoná e echo ku abehanan ta disparsé sin tin un splikashon komprendibel. E realidat ta, ku mester di abeha pa enter flornan, pa esakinan bira kuminda pa hende. Pero e aña aki so kaba tin 36% di abehanan ku a disparsé, miéntras ku ekspertonan ku miedu ta opservando ku e porsentahe ta sigui oumentá drástikamente.
For di aña 2006 a opservá kaba, ku diripiente no ta mira masha abeha i tampoko ta topa ku abehanan bentá abou morto. Un posibel rason pa e situashon sin splikashon aki por ta uso di pestisida, un parasit nobo ku ta mata abeha òf un rason patogéniko. Banda di esaki por tin asuntu di mal nutrishon di e abehanan, falta di sufisiente awa òf awa kontaminá i e situashon ku por tin ku ta pone ku abehanan mester bula bai muchu leu, pa por haña flor pa alimentá nan mes kuné. “Nos tin un krísis kompleto”, asina presidente di e Kas di Hortikultura i Agrikultura Orgániko na California, e republikano Dennis Cardoza a bisa.
Empresanan merikano ku ta traha p.e. eiskrim a pone sèn disponibel pa asina hasi investigashon pa wak kiko ta pasando. Un empresa di eiskrim a bisa, ku e problema ta afektando 40% di su 73 fabornan. Esaki, pasobra den e sabor di eiskrimnan aki tin almendra, chèri i stròbèri, kualnan ta produkto di matanan ku ta dependé di abeha pa produsí fruta.

WILLEMSTAD -- E agensia di prensa Reuter ayera a publiká un relato ekstenso riba trabounan di Dinah Veeris pa loke ta kuidamentu di konosementu di yerbanan medisinal. Segun e periodista Brian Ellsworth, Veeris ta konservando kuramentu tradishonal di Karibe.
E relato ta mustra, ku Dinah Veeris añanan largu a ignorá medisina tradishonal karibense na Kòrsou. Pero ta ora e tabata rekuperando di un operashon el a deskubrí ku ta tenan ku su mama tabata traha tabata suavisá su dolónan di stoma.
Kòmbersashonnan ku su mama resultá den un estudio di sinku aña riba medisina di yerba ku no a keda na investigashon na Kòrsou so. Dinah a biaha bai tambe den serunan i na Aruba, Boneiru i parti nort di Venezuela.
E relato ta sigui bisa ku Veeris, kende tabata un yùfrou di skol, a kolekshoná tambe yerbanan lokal ku tabata keda menasá pa desaroyo ekonómiko di Kòrsou. Na aña 1994 el a kuminsá ku su hardin di yerba pa preservá medisina di yerba i tradishonnan di isla di Kòrsou. Dinah Veeris a argumentá ku el a hasi esaki, pasobra nos hendenan a kuminsá pèrdè konosementu di e tradishonnan medisinal ku yerba. Ku su kurá ku yama ‘Den Paradera’ e por tin tur konosementu di balor medisinal di yerba konsentrá na un lugá.
Aktualmente tin hende ta bin bishitá kurá di yerba ‘Den Paradera’ dos biaha pa dia i Dinah Veeris tin tratamentunan di yerba ku ta originá for di tempu di indjannan Arawak i di katibunan afrikano.

TEHERAN, - Preis di petroli a bolbe alkansá un rèkòrt nobo, impulsá pa kaidanan den e reservanan merikano i e retroseso di dollar.
Na London, e barí di krudo pa promé bia a pasa e barera di 146 dollar, miéntras ku na Merka e krudo liviano a yega 144,81 dollar.
Ta realisando e oumento despues di anunsio di gobièrnu merikano ku su inventarionan ta kayendo mas di loke a keda pronostiká siman pasá.
E preisnan mundial di petroli a dupliká den último aña.
E kombinashon di dollar debil, e demanda haltu di krudo i e temornan riba interupshon di e suministronan na Medio Oriente i na Afrika ta e èksküs pa e oumento nobo aki den e preisnan.
“E merkado aktual ta impulsá pa e dollar debil, i, debí n’e situashon desastroso di e merkado di akshonnan, e invershonistanan ta buskando un merkado ku ta ofresé mas ganashinan”, Tetsu Emori a bisa, kende ta gerente di fondonan basá na Tokio.
Ta debí ku e dollar a debilitá ta pone ku e invershon den e merkado petrolero ta mas atraktivo.
Tenshon
Ta spera ku preis di petroli ta bai elevá ainda mas si Banko Sentral Europeo disidí djaweps awó oumentá e tasanan di interes.
E presidente di “Organisashon di Paisnan Eksportadó di Petroli” (OPEP), Chakib Khelil, a bisa ku un oumento den e tasanan di interes lo debilitá e dollar ainda mas tantu i lo provoká un oumento nobo di e krudo.

ALBERTO
Wilfred Climaco
Mihó konosí komo Scotty
A laga atras su yunan Mariela, Jessica, Meeuw Alberto, Minchi Alberto i Don, Nataly i Papa Viuda, ruman Lelia Martina. Akto di entiero ta djasabra 5 di yüli 3.30or for di el Tributo pa santana Roodeweg. Bishita 1or. Promé ku entiero tin un s.s. di misa 4or na misa Santa Familia.

BALENTINA
Margaritha Obispu
Mihó konosí komo Shon mama òf yùfrou Gregg
A laga atras su yunan Darwin Gregg i Chynusca Prince, Genetha i Thierry Koeiman-Gregg, Edna i Ivan Lodowica Gregg, Christma i Richard Goeloe-
Gregg, Sidney Gregg, Elma Gregg, Norma i Robert Candelaria-Gregg, Orma Maria Gregg, tata di yunan Frank Gregg. Akto di entiero ta djasabra 5 di yüli for di misa Sta. Maria pa santana Sta. Maria. Bishita 1or-4or siguí pa un s.s. di misa.

DEWINDT
Harold Juan
Mihó konosí komo Boi òf Boris
A laga atras su rumannan Catharina Olaria, Glorinda, Edmundo, Erwin, Robert Dewindt, Ronald i Elaine Dewindt. Akto di entiero ta djabièrnè 4 di yüli na santana Gr. Kwartier. Bishita 9or-11or na misa Gr. Kwartier. Promé ku entiero tin un s.s. di misa.

KOOK
Angelo Simon (48 aña)
A laga atras su yunan Lyubrenette i Giselle Kook, mama Gertrude Lambert, rumannan Edvin Kook, Melene Rodriguez-Kook i Sherwin Rodriguez, rumannan di kriansa Edeline Kook, Carlos Woodley, Suzette Steinbuch-Stapleton, eks esposa Naveline Baromeo. Akto di entiero ta djabièrnè 4 yüli for di El Señorial pa santana Veeris. Bishita 1or. 3or tin un respòns.

BOGOTA, Colombia, - E sekretario general di OEA, José Miguel Insulza, a felisitá gobièrnu di presidente Alvaro Uribe pa perfekshon di e operativo ku a kondusí na reskate di 15 persona sekuestrá den man di gueria colombiano di FARC, entre otro e eks kandidata presidensial Ingrid Betancourt i 3 merikano, un komunikado a indiká.
“Nos ta festehá liberashon di e rehennan, pa nan, pa nan famianan i pa sosiedat colombiano kompletu”, Insulza a bisa, sitá den e komunikado.
“E akshon realisá pa Fuerzas Armadas de Colombia, ta konstituí un paso mas den e proseso di pas di e pais andino”, Insulza di “Organización de Estados Americanos” (OEA) a sigui bisa.
E presidente brasileño, Luiz Inácio Lula da Silva, a ekspresá su satisfakshon i speransa pa esaki ta un paso importante pa liberashon di otro personanan sekuestrá i tambe pa pas.
Un komunikado divulgá pa Presidensia brasileño a ekspresá ku Lula a manda un abraso fraternal p’e rehennan i “a manifestá satisfakshon ku e notisia ei tan sperá pa komunidat internashonal di liberashon di e 15 rehennan”.
E presidente brasileño a ekspresá “e speransa ku a dal un paso importante pa liberashon di tur hende sekuestrá, rekonsiliashon di tur colombiano i pas na Colombia”, e komunikado a señalá.
Ecuador ku alivio a risibí e reskate militar di Ingrid Betancourt i otro 14 rehen, pero a lamentá ku e liberashon no tabata resultado di un negosiashon di pas, e minister di Defensa, Javier Ponce, a bisa AFP.

Prof. Dr Lorito ta yama tur hende bonbiní. Nos ta spera ku tur hende a pasa un dushi Dia di Bandera. Di loke Lorito por a mira, tur hende tabata den ambiente di patriotismo i amor pa nos isla. Nos ta spera ku esei no tabata e kaso ayera so, pero tur dia di aña.
*********
Lorito a para riba dak di un hotèl i nos a mira bou di nos un parti di hende pará. Ora nos a bai wak, lugá tabata Zus, Omayra, Hubert i Noris. Zus tabatin un bandera chikiritiku asina den su man ta zuai. Lorito a keda masha strañá, pasobra nos a mira un tènt pa hende importante i ta einan nan mester tabata. Ora nos a bai wak mas mihó, a resultá ku tabatin un problema ku asuntu di unda mester sinta si òf no.
*********
Lorito a haña masha straño ku hende ku a haña ménos voto i algun di nan ku no ta elihí mes, ta sinta dushi asina bou di un tènt i otronan ku nos pueblo a basha masha voto riba nan ta pará den balkon di un hotèl. T’asina nos kier krea union? Komprondé Lorito bon: tin biaha nos ta papia di union, pero nos mes ta krea desunion! Anto nos kier pa pueblo para tras di un kousa!
*********
Tin un kos mas ku a molestiá nos masha tantu mes. Di kon mandatarionan i invitadonan mester sinta den fresku i sobrá di pueblo den solo. Por ta, ku e kueru di pueblo si por soportá kalor i solo? Tin un kos ku no ta lógiko den e kaso aki. Si tin un hende tin un splikashon, laga nos sa!
*********
Nos a mira nos Obispu a slùip yega lat na e seremonia di ayera. Ku tur rèspèt pa nos Obispu, e kos no a keda masha bon. Na un aktividat di Dia di Bandera, simplemente komo invitado, bo no por yega lat, maske ta misa bo ta hasiendo. Ta un aktividat spesial ku tur hende sa for di adelantá ku ta bai tuma lugá i ki ora ta kuminsá. Un obispu ta representá henter un pueblo! Danki Dios ku Obispu Amado si tabat’ei na ora!