ORANJESTAD- Directiva di Centro di Bario Playa Pabao ta invita habitantenan di Playa Pabao y nan famia pa un grandioso concierto.
Un concierto cu grandi y chiquito lo gosa di dje. Izaline Canister cu su wowo di cariño lo ta na Centro di Bario Playa Pabao pa delita grandi y chiquito cu un concierto cu a haña e nomber “Concierto Pa Henter Famia”.
E actividad aki lo tuma lugar Diamars dia 5 Augustus y lo cuminsa atardi pa 5.30 pm. Entrada ta “un wowo di cariño” pues completamente gratis. Manera tur actividad na Centro di Bario Playa Pabao esaki tambe pa henter pueblo di Aruba.
Si bo tin un ser keri den “rolstul” y cu presencia e concierto aki sea asina bon di informa nos (tel 583-7775) pa asina e ricibi un trato privilegial pa asina e tambe gosa y wak di Izaline di cerca.
Pues Diamars di 5 di Augustus nos ta topa na Playa Pabao na e “Concierto di Famia”

ORANJESTAD- Diasabra, 26 di juli e apertura inicial di e skol Montessori, Beautifull Sun, a tuma lugar. Durante e evento aki tanto e mayornan como e muchanan por a sera conoci cu e materialnan y e lugar.
Asina e atardi tabata un hopi ameno y educativo.
Beautifull Sun, lo bai ta habri pa muchanan for di 3 te cu 6 aña cuminsando na dia 18 di augustus, 2008.
Hopi mayornan cu ta traha ta busca un lugar adecua pa nan yiunan keda durante dia; na Montessori, Beautifull Sun School, e mayornan lo bai laga nan yiunan den bon man, unda cu nan lo tin e oportunidad di siña lenguahe, matematica, geografia, arte y musica, den un manera agradable y adapta na nan nivel.
“E idea di e skol Montessori ta pa probecha e posibilidad di aprendizahe cu e muchanan di edad di 3 pa 6 aña tin. Especialmente den e parti di lenguaje e muchanan lo tin hopi facilidad di siña, dor di esey na e skol aki nan lo haya Ingles, Hulandes y Spaño.” Manera su directora Sra. Susanne van Saalfeld a splica.
Na e skol aki e muchanan lo recibi e les di un manera individual y adapta na e nivel di cada mucha. E metodo aki tambe ta motiva e muchanan pa ta mas independiente dor di siña di nan mesun erornan.
E material cu e muchanan ta bai usa ta e mesun aplica rond di mundo, asina nan lo por traha di un manera individual pa mehora e confiansa di e mucha.
Dor cu skol lo ta habri for di 8 am te cu 2 pm e muchanan lo ta bai haya un cuminda balansa, traha pa e docent y e mesun mucha. Asina mes ta importante pa menciona cu tur e cumindanan lo ta crea pa un persona certifica den e area de nutricion.

ORANJESTAD- Falta poco, e dianan pa e prome congreso tocante bida salvahe na Aruba ta conta. E ora ta yegando pa duna nos mes un oportunidad pa conoce nos propio herencia natural, esta nos flora y fauna. E momento a jega pa pone tur aspecto di nos naturalesa den e spotlight. WildAruba ta algo unico y pa prome biaha lo bai tin un oportunidad pa presencia un congreso riba nivel academico dedica completamente na nos naturalesa.
Symposium general
E symposium general di 25 y 26 di Augustus lo ofrece presentacionnan tocante e conocemento y status actual di e ecosistemanan marino y terrestre di Aruba. Aki lo trata temanan interesante y impactante manera e ecologia y maneho di e boa constrictor invasivo, conservacion di nos cascabel, dori y mas. Sin falta, tambe lo pone hopi enfasis riba especienan den peliger serio di extincion. E symposium di Wild Aruba, cual lecturanan ta na nivel profesional, y ta pa e publico general. Tur interesado ta bon bini!
E presentacionnan durante e symposium ta wordo ofreci pa expertonan tanto local como di paisnan exterior manera:
Andy Odum, herpetologo y respresentante de AZA (Association of Zoo and Aquariums) lo presenta e topico “Overview reptiles and amphibian fauna”, Sr. Andy Odum ta un persona masha conoci Aruba, pa e anja nan largo cu nan a hasi estudio ariba e Cascabel y tambe recientemente a contribui na e estudio y maneho di e Boa constrictor invasivo di Aruba
Dr. Howard Reinert, ta professor di Biologia nan Universidad di New Jersey, tambe ta facilita lectura nan Arcadia University na Glenside Pennnsylvania. Dr. Reinert lo presenta “The Ecology and Conservation of the Aruba Island Rattlesnake (Croatalus unicolor)” y tambe otro topico cu ta “The Ecology and Management of the Invasive Boa constrictor on Aruba

Meteorologo Marck Oduber cu presentacion pa doño di boto y piscado

ORANJESTAD- Diabierna proximo 1 di augustus Centro di Pesca Hadicurari ta invita tur su usuarionan, tur piscado y doño di boto na Aruba, como tambe publico general, pa un interesante presentacion audiovisual tocante fenomeno di lama, ola y con pa saca informacion for di boletin di tempo di Meteo.
E charla informativo lo cubri varios informacion cientifico y al caso tocante di fenomeno di lama. Bin siña di e diferente tipo di ola, manera por ehempel, ola crea door di biento, ola crea door di resake (swell of deining).
E profesional local di meteorologia Marck Oduber, lo amplia con e olanan aki ta forma y ki efecto condicionnan local ta hunga. Haya sa con cada un di nos, como doño di boto of piscado, por saca mas informacion for di e boletin di tempo di Meteo y Marck Oduber na TeleAruba.
E di dos piso di e centro lo ta habri for di 7:30 di anochi pa asina 8’or en punto e presentacion por cuminsa, diabierna awor 1 di augustus 2008, na Centro di Pesca Hadicurari na Berea di Piscado 1 na Noord.
Despues di e presentacion tin oportunidad pa haci pregunta y intercambia cu e invitado. Lo clausura e anochi cu e tradicional hospitalidad di Hadicurari. Un y tur ta bon bini. Entrada ta gratis.

ORANJESTAD- United Forces Foundation su meta ta uni forsa den nos comunidad pa logra bienestart cultural, social economico y un medio ambiente sano pa nos hubentud y e comunidad di San Nicolas en general.
Dia: 02 di augustus 2008.
Lugar: “Caya Dick Cooper op het open terein te zuiden van de watertoren.
Horario : 9:00 am – 600 pm
Nos kier a pidi negoshi nan , constructors, hotels, pueblo, deartamentonan di gobierno y Aaruba ingeneral pa juda nos muchanan dor di dunannan un man pa articulonan di skol .
Pa cual kier information: por jama : Janine tel 5607388
Dorinda 5857625 , Claudia 9649118, Claudia W 5649139, Laurene 6631107.

ORANJESTAD- SETAR NV recientemente a invita tur e participantenan activo di e Campeonato di Futbol Copa SETAR 2008 pa e entrega oficial di e premio nan pa tur cu a resalta durante e campeonato aki.
E teamnan ganador a ricibi un cheque cu nan premionnan den forma di cash pa asina nan por continua di practica y motiva e deporte di futbol. Tur e deportistanan cu a resalta durante e campeonato cu un premiacion individual a ricibi un telefon Zing cu un chip nobo nobo 3G for di SETAR.
E equipo CAMPEON di e campeonato a resulta di ta e team RCA y aki e delegacion representando e team a ricibi e cheque cu SETAR a otorga na e ganador.
Esnan cu a sobresali den e equipo RCA durante di e Copa SETAR 2007-2008 tabata: MIHOR ENTRENADOR: JOHNNY DOUGLAS di RCA
MIHOR DEFENSA: GIOVANNI THODE di RCA
MVP DI CAMPEONATO copa SETAR: GIOVANNI THODE di RCA
GOALGETTER DI CAMPEONATO: MAURICE ESCALONA (RCA).
Otro team cu a ricibi un cheque tabata e equipo cu a sali SUB-CAMPEON ta BRITANNIA cu ademas a ricibi e titulo di MIHOR PORTERO den persona di - KENDRICK DANIA (BRITANNIA).
Ademas di esaki e otro dos teamnan cu a sali na di tres y cuater lugar tambe a ricibi un cheque pa nan participación y nan clasificacion. Na di tres lugar e equipo- NACIONAL y na di cuater lugar a sali e team di LA FAMA
Otro premio a bai pa e hungador mas disciplina:
THERIC RUIZ (NACIONAL)
Mihor mediocampista: RUDOLPH SCHWENGLE (LA FAMA
EQUIPO MAS DISCIPLINA:RIVERPLATE.
MIHOR DELANTERO:JELANO CRUDEN (RIVERPLATE)
ROOKIE OF THE YEAR ta: FRANCOIS CROES (ESTRELLA).

Cambio di coneccion ta causa interupcion di coriente.

ORANJESTAD- Ayera merdia pa un cuarto pa tres coriente a cay afo riba e cabel mayor ELMAR # 5 causando un interupcion di suministro den un parti substancial di p’abou di brug di Aruba.
Esaki ta den area di Noord un parti, Kudawecha, Sabana Liber, Calabas, Sero Janchi, Montaña, Shaba, Tanki Flip un parti, Boegoeroei, partinan di: Hato, Bubali, Pos Abou, Palm Beach, Koyari, Eagel tambe Punta Brabo, Bushiri y Hospital tambe RIU Hotel y The Mill Resort.
Ademas Sero Blanco un parti, Cumana, Meiveld, Pavia, Hooiberg, Rooi Afo, Morgenster, San Barbola, Janana, Dakota un parti, Oranjestad un parti, Regents Park, Sero Patrishi un parti, Hooiberg Kavel, partinan di: Piedra Plat, Sabana Blanco, Primavera, Wayaca, Ponton, Matadera y Paraguana.
Un ora despues, alrededor di 15:45, W.E.B. Aruba N.V. a caba cu pone ful e carga necesario bek den man di N.V. ELMAR pa reconecta e barionan afecta.
Motibo principal di e fayo ta cu durante trabou na W.E.B. Aruba N.V. pa conecta e schakelstation nobo riba e schakelstation existente, un coneccion cu eroneamente a keda sin desconecta, a “trip” un di e cabelnan mayor di suministro di electricidad cu yama ELMAR # 5. Pero cu trabou diligente di nos tecniconan, a descubri e fayo y a reconecta e cabel ELMAR # 5 den tempo relativamente corto.
Di parti di gerencia di W.E.B. Aruba N.V. ta pidi un disculpa na e consumidornan cu a keda afecta pa e interupcion aki.

MUNDU, - Ta solamente 17 aña pasá ku pa promé bia mundu a skucha e palabra AIDS i ya 33 mion di persona ta kontagiá ku e enfermedat aki, ku ainda ta inkurabel.
E úniko kos ku a logra, for di 2001, ta frena levemente su avanse ku remedinan retroviral i disminuí e kantidat anual di kontagionan nobo atrabes di kampañanan di prevenshon.
Na Venezuela, segun sifranan di ‘Sociedad Venezolana de Inmunología’, ta kalkulá ku ta eksistí entre 120.000 i 150.000 persona seropositivo, kier men, kontagiá pa e vírùs, ounke ainda no a diagnostiká nan.
Aktualmente, 23.000 venezolano ta risibiendo tratamentu kontra VIH.
Pa debatí riba e tema, lo reuní mas ku 20.000 spesialista den e ‘XVII Konferensia Internashonal riba AIDS’ ku lo tuma lugá entre 3 i 8 di ougùstùs na Mexico.
Komo antesala pa e evento, organisashonnan mundial a adelantá informashonnan, sifranan i diagnóstikonan.
E diagnóstiko general di e epidemia na e planeta ta mustra un leve redukshon den e infekshonnan nobo, tendensia ku ta manteniendo for di aña 2001, i un mayó akseso pa e tratamentu pa e enfermedat letal i inkurabel.
Na Afrika ta biba 67 porshento di esnan infektá na mundu.
Sin embargo, regionnan situá pegá ku Venezuela tambe a resultá hopi afektá ku e pandemia aki.
Por ehèmpel, Caribe ta e di dos zona ku mayó insidensia di e vírùs (segun e relashon entre kantidat di habitante i kantidat di seropositivo) i Amérika Latina, komo region, ta e di tres ku mas kantidat di kaso di persona kontagiá ku VIH.

ST. JOHN’S, Antigua, - Polisnan di e isla karibense Antigua a bisa ku un dama dòkter britániko a keda asesiná, i su esposo ta den kondishon krítiko na hospital, heridá den un aparente atrako na Coco’s Hotel.
Funshonario di polis, Gary Nelson, a informá ku un hòmber armá a drenta e bungalow na Coco’s Hotel djadumingu último, i a tira kontra e pareha resien kasá Catherine i Benjamin Mullany, kendenan tabata disfrutando di nan luna de miel.
Nelson a bisa ku outoridatnan a interogá diferente persona, pero te ainda no a realisá niun detenshon.
Benjamin Mullany ku herida di bala ta den kondishon krítiko na Holberton General Hospital, situá na kapital St. John’s.
Polisnan a bisa ku e pareha britániko ku a kaba di kasa 12 di yüli último, kendenan ámbos tin 31 aña di edat, pa luna di miel a biaha bai Antigua pa dos siman.
Nan mester a regresá nan kas djaluna, nan famianan a bisa.
“Nos a haña un shòk tremendo p’e insidente ku a tuma lugá na Antigua. Nos a keda devastá loke a pasa ku Ben i Catherine”, e famianan a sigui bisa.
E esposa ta dòkter na e área di Pontardawe di South Wales, British Broadcasting Corporation, a informá.
Inspektor di polis, Cornelius Charles, a bisa ku e motibu aparentemente tabata atrako.

Foto: Benjamin i Catherine Mullany 3007

Catherine Mullany ta para brasa su esposo Benjamin riba pòtrèt di archivo emití pa polisnan di South Wales.

WILLEMSTAD - Djamars anochi e di dos enkuentro di Digicel Caribbean Championship a tuma lugá.
Digicel a sigui repartí premio na kantidat tantu pa esnan ku a sali ganadó i a logra partisipá den ‘Kick for Cash’ komo esnan ku a bin SDK na kòrá bistí.
E ganadónan di “Kick for Cash” di djamars anochi a resultá: Tashya Lawson ku a sali na promé lugá, a risibí 200 florin kèsh, Leannon Valentina na di dos lugá, a risibí su telefon selular Nokia i Harry Davelaar, na di terser lugá, a risibí su Digicel Goodybag.
Fanátikonan ku ke partisipá den ‘Kick 4 Cash’ mester manda un SMS na number 4625 ku e palabra KICK, pa djaweps awor durante di e enkuentro di Antia kontra di Grenada lo bolbe saka 3 ganadó ku lo tira pinalti durante di ‘half time’.
Digicel ta invitá fanátikonan di deporte rei futbòl pa bin apoyá e Selekshon Nashonal durante di e wega final djaweps anochi na unda ku nan lo enfrentá e ekipo di Grenada, ku a gana di Aruba ku skor di 3-1.
Djaweps anochi huntu nos lo ta e di 12 hungadó riba tereno, nos ta topa den SDK!

WILLEMSTAD – Ayera a tuma lugá e di dos partido di Grupo A di e Digicel Caribbean Championship ku a inisiá aki na Kòrsou.
Despues ku den e promé partido Antia i Aruba a empatá sin anotashon, ayera si tabata tin basta gol.
E partido a inisiá ku ámbos ekipo tratando di wak kiko otro tin aden.
Despues Grenada a tuma inisiativa i a sali fuerte riba e arko defendé pa Jeffrey Werleman, portero di Aruba.
Werleman a traha hopi duru den e promé mitar aki pa tene su arko limpi.
Aruba a sali ataká i purba di bai dilanti, pero no por a pasa den e defensa di Grenada.
Den e parti final di e promé tempu ta basta preshon Grenada a pone riba e defensa di Aruba, pero no por a konkretisá esaki den gol.
E promé mitar a bai sosegá sin anotashon.
Despues di sosiegu Aruba a bolbe sali en buska di gol i ta logra esaki tambe.
Den un corner, e kapital Ruiz di Aruba ta kabesá i marka e promé gol di Digicel Caribbean Championship 2008. Aruba 1-0 riba Grenada.
Despues di e gol aki Grenada a tuma kos mas serio.
Grenada ta bin empatá e partido na 1-1 despues di dos minüt di e gol di Aruba.
Un ratu despues den un atake di Grenada un hungadó ta ser tumbá den área penal i e pena máksimo ta ser kobrá pa e kapitan Anthony Modeste na di 75 minüt ku éksito pa pone e skor 2-1 pa Grenada.
Djis despues na di 79 minüt Shane Reine ta pone e skor final di 3-1.
Grenada despues di e golnan aki a haña mas oportunidat, pero portero Werleman a defendé bon i tambe tabatin algun tiru kua sali desviá.

WILLEMSTAD – Pa hasi posibel pa stòp di pago di salario na e presidente komisario di UTS, ta tantu Gobièrnu di Kòrsou komo Gobièrnu Sentral mester tuma e desishon aki. Esaki ta e splikashon ku diputado i presidente komisario di UTS, Anthony Godett a duna.
Último dianan e sindikato SITCOM a bolbe trese e asuntu aki dilanti i presidente di SITCOM, Emilio Brunken a mustra riba e hecho, ku ta trata aki di un responsabilidat di Gezaghèber di Kòrsou, pa korigí e situashon aki, unda ku e presidente komisario ta kobra e salario di 3.750 florin. Segun e deklarashon di Brunken, gezaghèber Lisa Dindial, ta na altura, ku no por t’asina, ku e presidente komisario ta kobra i ta lamentá ku Gezaghèber ainda ta tolerá e situashon aki.
Segun Emilio Brunken, e tin un karta unda Gezaghèber ta bisa, ku ningun diputado ku ta forma parti di Bestuurscollege no por kobra pa e kompania ku e ta traha kuné. Mas aleu Brunken a indiká, ku ta den e kuadro aki e ta warda riba un kontesta di Gezaghèber riba e tópiko, pa kua el a hala su atenshon.
Segun Brunken, miéntras ku e no risibí un kontesta di Gezaghèber kon bin e situashon ta asina aki, e ta kontinuá ku su investigashon. Tambe e presidente di Sitcom a konfirmá, ku e kaso a wòrdu hinká den man di Defensor di Pueblo, pa wòrdu averiguá.
Di su parti diputado Godett a insistí, ku no tin nada robes ku su kobramentu di salario den su kalidat di presidente komisario di UTS. “Mi no ta e promé ni tampoko e delaster ku lo kobra e salario aki”. Asina diputado Godett a bisa, agregando ku el a informá belasting tambe di su rekompensa salarial ku e ta risibí na UTS.

ARIES: Lasonan efektivo ta fortalesé pa bo, asina ku duda i engañonan ta bai for di bo bida. Traha riba bo finansa i so bo tin algun plaka èkstra plania bo vakashon. 47,05,32.

TAURO: Sigui konsehonan di ekspertonan riba kamponan di finansa. Tur bo atenshon ta konsentrá awor den oumento di bo ingreso. 02,50,11.

GEMINIS: Tene hopi kuidou di no heridá e sentimentunan di otro persona. No eksagerá den bo komentarionan. Bo ta inkliná awor pa usa bo mente na un manera di divershon. 39.

KANSER: Dediká bo tempu na bo pareha. Fortalesé tur laso afektivo. Pa haña loke bo ke, duna karisma i e manera di komuniká ku los demas, lo ta e klave di bo éksito. 43,02,15.

LEO: Awor lo ta otronan ku mester adaptá na bo manera di bida, na bo kondishonnan. Bo ta gana atenshon di hopi i tambe bo popularidat den bo sírkulo di amistat ta oumentá.

VIRGO: Bo ta mas selektivo den loke bo amistatnan ta referí i bo no ta konfia bo sekretonan na niun hende. Bo ta sintíbu kómodo, bon ku bo mes. 26,10,21.

LIBRA: E konfiansa ku bo tin den bo mes ta oumentá i kiko realmente bo ke i te na unda bo ta dirigí. E progreso lo ta rápido. Bo seguridat ta un tesoro balioso. 10,40,07.

SKORPION: Dal un gira diferente na bo trabou, inkorporando métodonan nobo ku ta hibábu na kosnan efikasmente. Modernisá den tur e aspektonan di bo bida. 27,07,30.

SAGITARIO: Bo atenshon ta enfoká awor pa bo lugá i bo famia. Bo felisidat ta primordial i esei ta dependé di e armonia ku bo ta respirá den bo sirkulo familiar. 03,12,15.

WILLEMSTAD – “Den e kaso di mas ekstremo, Gobièrnu di Kòrsou en todo kaso tin e tarea pa sòru pa muchanan ku no por bai Kolegio Omega mas, haña ubikashon na un otro skol. Esei ta responsabilidat di gobièrnu di Kòrsou”, asina diputado Marilyn Alcalá-Wallé a duna di konosé, den e diskushon ku a surgi riba eksistensia di e skol en kuestion.
Gobièrnu, manera LA PRENSA a informá for di siman pasá, a revoká e rekonosementu ofisial ku Kolegio Omega tabatin. E desishon ta basa riba e nesesidat, pa garantisá nivel na e skol, segun minister di Enseñansa Omayra Leeflang.
E skol tin algun aña ta funshonando. Inspekshon di Enseñansa a hasi un análisis di e situashon na e skol i a yega na e konklushon, ku kos no ta kanando manera mester ta. Nos a bin konstatá, segun e mandatario, ku tin un diferensha grandi den e sifranan di eksamen, loke ta inaseptabel pa gobièrnu.
“Un mucha ku pasa eksamen na e skol, ta logra sifranan positivo, tin biaha hopi haltu, pero ora ta trata di eksamen sentral, e mesun mucha ei no por duna e mesun prestashon. Basá riba un análisis profundo di Inspekshon di Enseñansa, nos a yega na e konklushon ku no ta responsabel mas pa mantené e skol aki komo un skol ku rekonosimentu ofisial,” segun e minister.
Fundashon Kolegio Omega no ta di akuerdo ku esaki. Durante e reunion, direktiva di e skol i mayornan a insistí, ku no ta korekto loke e mandatario a bin ta sostené. E skol a anunsiá, ku e ta bai entamá akshon kontra e desishon entre otro, lo bai korte ku gobièrnu.

WILLEMSTAD - Ta di kon semper nos mester hasi kosnan robes pa drechi? Di kon mester a warda te den porta di aña eskolar nobo, pa bin ku otro areglo pa transporte eskolar? Miembro di Konseho Insular Hensley Koeiman ku a hasi e preguntanan aki no por kaba di komprondé e forma di aktua di gobièrnu den e kaso aki.
Koeiman tabata referí aki na e desishon di gobièrnu di Kòrsou pa kòrta den gastu di transporte eskolar, ku a subi den forma alarmante.
“Mi por komprondé, ku mester tuma medida. Pero mester a warda te awor ku skol ta bai kuminsá, pa anunsiá esaki? Nos tin un kantidat di mayor ku ta konfuso i ku no sa kon nan ta bai hasi,” asina Koeiman a splika.
Koeiman a bisa, ku masha hopi mayor preokupá, desgustá, pero tambe rabiá a aserká den e dianan ku a pasa ku nan problema, pasobra nan no tin otro rekurso.
E asuntu ku ta pone un mayor ku tin 2200 florin pa luna dilanti e hecho ku awor e mes mester sòru pa transporte eskolar, no ta e kaso di mas elegante pa hasi, el a bisa.
El a indiká mas aleu, ku hopi biaha no ta kuestion solamente di sèn pa paga, pero tambe sirkunstansianan familiar ku ta pone ku mester buska otro solushon.
El a mustra, ku si tuma por ehèmpel áreanan un poko mas alehá, manera Bándabou, tin un situashon kaminda muchanan mester lanta masha tempran mainta pa nan bai skol.
Tin mucha ku mester ta kla pa sali kas 5’or di mainta, pa nan haña e transporte eskolar aki. Awor, si esaki kai afó, kisas nan mester kana un distansia na pia, promé ku nan por yega na un sitio ku bùs ta pasa. Anto ku chèns, ku ora e bùs pasa e ta yen kaba. Pa no papia mes di e hecho ku sèn di bùs a bira asina haltu, ku un mucha ta paga fásilmente 10 florin pa e yega skol i 10 florin pa e regresá su kas. E situashon aki ta birando un kos horibel pa e hendenan aki, segun Koeiman.

WILLEMSTAD - Si resultá ku e diesel ku e dos eks empleadonan di Curoil tabata kumpra na Venezuela tabata diesel supsidiá pa gobièrnu, anto esei ta nifiká ku nan tabata hasiendo algu ilegal i tabata kumprando diesel hòrtá. Esei lo nifiká, ku e kompania Curoil lo hañ’é den problema hopi grave, asina miembro di Konseho Insular Nelson Pierre a antisipá.
Nelson Pierre ta haña, ku loke a sosodé, algu inkonsebibel. E ta un kos grave ku mester haña tur atenshon i mester bin un investigashon profundo.
“E ta komprobá tambe loke mi a bin ta bisa durante hopi aña largu, kaminda tin netwerk den kompanianan di utilidat di nos pais, kaminda tin hende ta hasi i deshasí manera nan haña ta bon, sin ku por bisa nan nada,” asina Pierre a trese dilanti.
Nelson Pierre ta haña, ku a yega momentu pa gobièrnu intervení den e kompania, kaminda ta pone gerensia di Curoil un banda di manera ku por hasi investigashon den tur trankilidat.
El a enfatisá, ku un aspekto ku sigur mester investigá, ta prosedensia di e diesel ku kua tabatin negoshi na gran eskala.
Ku tin korupshon den e propio struktura di PDVSA, no ta nada nobo. E kompania aki ta asina grandi, ku e ta difísil pa kontrolá i tin tur sorto di struktura, dentro di struktura ku ta kometé e tipo di práktika aki. Presidente Hugo Chávez a hura ku e lo bringa e asuntu aki, pero tur hende sa ku ta difísil eradiká esaki por kompleto, segun Pierre.

WILLEMSTAD/ AMSTERDAM - Tur kos tabata parse masha bunita: pa promé biaha lo tabatin un boto ku homoseksual antiano i arubiano riba dje durante e Gay Parade na Amsterdam. For di momentu ku esaki a bira konosí, mesora tabatin un 50 hende ku a mèldu nan mes pa subi e boto.
E entusiasmo tabata grandi. Te na momentu ku e organisadó Charlene Oduber un dama lesbiana di 36 aña di Aruba a ser konfrontá di ripiente ku un kandidato tras di otro tabata kanselá nan partisipashon.
Te ku ayera, dilanti porta di e evento, tabatin apénas 13 kandidato ku a sobra pa keiru riba e boto.
Kiko ta motibu di esaki, pa Oduber no tin nodi di pensa muchu.
Homoseksualidat ketu bai ta un kos di bèrgwensa na Antia. Ta posibel i asta probabel ku imágen di esnan ku ta partisipá na tipo di eventonan asin’aki ta sali na televishon i hopi di e partisipantenan tin miedu ku nan famia ta rekonosé nan.
Partisipashon di e boto, ku ta karga e nòmber Pirates of the Caribbean na e parada awor ta na duda. Oduber ta teme pa lo peor.
“Nos no tin spònser. Nos lo a paga e gastunan for di e entrada ku nos lo a risibí di e partisipantenan. Mi no sa awor aki kiko mi mester hasi,” Charlene Oduber a reakshoná.
Su speransa ta, ku ta surgi un spònser ku ta kla pa duna bòshi plaka òf ku tòg ta bin na último momentu un kantidat di partisipante aserka.
“Mi ta komprondé e temor, sigur serka hende hóben. Tempu mi tabata bai Aruba ku fakansi, mi no por tabata habrí kontra mi mayornan. E situashon ta difísil. Na momentu ku por ehèmpel Roze Maandag di e feria di Tilburg kuminsá, mi tabata paga televishon mesora,” Oduber a reakshoná.

LAS VEGAS, Merka, - Rayonan X di e aeropuerto internashonal McCarran, na Las Vegas, a detektá un pistol deskargá den ekipahe di man di e kómiko merikano, Jerry Lewis.
E aktor, kende tabata biaha pa Detroit, na e estado di Michigan, pa realisá un show, a keda deten’é pa polisnan.
E representante di Jerry Lewis, Claudia Marghilano, a sigurá ku ta trata di un arma, inkapas di tira, ku e aktor ta usa den su aktuashonnan.
Ademas, el a insistí ku e aktor, di 82 aña, no tabata sa ku e arma tabata den su ekipahe di man.
Sin embargo, Bill Cassell, di Departamento di Polis di Las Vegas a deklará ku e pistol ta registrá na nòmber di Jerry Lewis i ku e komediante lo tin ku deklará djabièrnè na un Tribunal.

Foto: Jerry Lewis 3007

E komediante, Jerry Lewis, di 82 aña.

DEN HAAG, Ulanda, - E eks hefe polítiko di e serbio-bosnionan, Radovan Karadzic, a yega awe sentro di detenshon di Tribunal Penal Internashonal (TPI) pa eks Yugoslavia na Den Haag, un periodista di AFP a konstatá na e lugá.
Dos van pretu sin logo polisial ku tur velosidat a yega e sentro di detenshon, kaminda TPI ta hür sèlnan pa mediashon di Nashonnan Uní, e periodista a konstatá.
E portanan di e sentro di detenshon a habri pa laga e karavana drenta, miéntras forsanan di òrdu a para e sirkulashon, e periodista a agregá.
Radovan Karadzic, di 63 aña, tabata huntu ku e hefe militar di e serbio-bosnionan, e general Ratko Mladic, un di e fugitivonan mas buská di Europa, promé ku su detenshon di siman pasá pa e servisionan sekretu bosnio.
For di Belgrado a ekstraditá Karadzic pa Den Haag, kaminda Tribunal Penal Internashonal pa eks Yugoslavia ta situá, ku ta huzga akusashonnan di genosidio durante e guera di Bosnia (1992 - 1995).
Den oranan di awe mardugá, a trasladá Karadzic for di Belgrado, e kapital di Serbia, te na e aeropuerto ulandes di Rotterdam, i for di einan a bai ku n’e te na e lugá kaminda ta sper’é inisio di e proseso.
E tabata 11 aña fugitivo, te dia di su detenshon siman pasá.
Awor e ta konfrontando kargonan pa supuesto partisipashon den un di e pió matansanan na Europa for di tempu di e di Dos Guera Mundial.
Karadzic a deklará independensia di e serbionan di Bosnia na 1991, komo parti di un seri di akontesimentu ku a kondusí na e guera di Bosnia, di 1992 pa 1995.

WILLEMSTAD – Djaluna 28 di yüli Biblioteka Públiko a hasi entrega ofisial di un set di poster tokante lesamentu di buki, na diputado di Enseñansa, Kultura i Deporte, sra. Marilyn Alcalá-Wallé. E posternan akí ta forma parti di un kampaña pa stimulá lesamentu den tempu liber.
E kampaña ta basá riba e kampaña similar di Merka Get Caught Reading, kaminda ta portretá hendenan konosí den komunidat, lesando un buki. Meta di e kampaña ta pa stimulá hende lesa buki den nan tempu liber i tambe drecha e imágen di lesamentu mustrando ku e ta algu plasentero. E aña aki a kuminsá promové lesamentu via di poster i den futuro lo elaborá e kampaña ku mas aktividat.
Fotógrafo Pitopolo na un manera kreativo a portretá konosínan den nos komunidat manera Nathalie Petronia, Reinier Lijfrock, Ephrem J, Ilvia Gustina i Finchi Statia ku a sostené e kampaña. For di e siman aki por mira posternan ku e titulo Ami tambe ta lesa den mi tempu liber rònt Kòrsou promoviendo lesamentu.