ORANJESTAD- Desde 23 di juni te 1 di augusus Sarah-Quita Offringa tin cu enfrenta seis siman di competencia durante e Freestyle Tour di Professional Windsurf Association (PWA)
Di chiripa Sarah-Quita ta yega Lanzarote pa defende su titulo di campeon di e evento di freestyle na Costa Teguisa di aña pasa. Conciente di e deseo di su contrincantenan pa bah’e e ta nabega cu potencia.
E maniobranan super technico y su tactica durante cu e ta windsurf ta pone cu e ta gana dos di e tres dobbel eliminacionnan ariba e di cuater dia sigurando su victoria di e evento for di tempran caba. Awor e por nabega mas sosega y trankil pero Sarah-Quita ta mantene su forma y no ta cede tereno.
Sarah-Quita ta sigui domina mustrando cu e no ta perde ningun manga (heat) y cu e ta nabega na full un otro nivel. Paralisando su contrincantenan cu algun triki fenomenal e ta sinta firme na promer lugar mientras e otro windsurfistanan ta lucha pa di dos y di tres lugar.
Di e manera aki Sarah-Quita ta regala su mes cu poder di Dios su regalo di cumpli aña. Awe dia 4 di juli leu foi cas e ta cumpli 17 aña y nos di Aruba Sailing Association y Wind Racers Club Aruba ta dese’ele hopi anja mas di bida, salud y bendicion di Dios. Ademas nos ta keda pendiente di un temporada di competencia exitoso p’e ya cu e ta continua na Gran Canaria unda el a yega diadomingo pasa pa continua cu e di dos parti di e PWA freestyle World Tour di muher.
Unda dia 3 di juli te 18 di juli ta cuminsa cu competencianan di diferente disciplina manera freestyle, slalom y ola. E ultimo stop di freestyle pa Sarah Quita ta na e isla di Fuerteventura unda e ta participa tanto na e disciplina di slalom como freestyle.

ORANJESTAD- Orguyosamente Post Aruba ta emiti tres stampia na honor di motorcyclenan Harley Davidson.
Rhona Lemminga, diseñadora di e stampianan special aki di Harley Davidson, ta duna un splicacion tocante su diseñonan:
“The Knuckle-Head”
“The Road King”
The FRX Super-Glide Big Boy”
Stampia di 225 cen: “The Knuckle-Head”
E “Knuckle-Head” ta e veterano di tur motorcycle. Historia di motorcyclenan Harley Davidson a cuminza na 1903 na Milwaukee, Merca.
Bill Harley y Arthur Walter Davidson a introduci e prome motorcycle di un cilinder. Despues di esey, desaroyo a acelera masha lihe mes y nan a diseña diferente otro modelo di motorcycle.
Despues cu nan a produci motorcycle pa e ehercito Mericano, e marca Harley Davidson a crece mucho mas lihe ainda. Den careda di aña 1936 nan a diseña e “Knuckle-Head”, sigui pa “The Indian” y “The Panhead”. E “Knuckle-Head” a haya su nomber debi na e forma di e loke nan ta yama su ‘rocker boxes’.
Stampia di 305 cen: “The Road King”
Cuerpo Policial di Aruba ta usa “The Road King”. Ademas, miembronan di Cuerpo Policial di Aruba ta core diferente tipo y modelo di motorcyclenan Harley Davidson. Por reconoce e “Road King” facilmente na su tamaño mas grandi y su cara robusto, compara cu otro modelonan di motorcyclenan Harley Davidson. E “Road King” tin un luz blou grandi di alarma y dos cashi na banda na parti patras di e vehiculo. E “Road King” ta asina rapido cu e por alcanza tur sorto infractornan di ley.

ORANJESTAD – Na Kolpinghuis na Nijmegen a tuma lugar un celebracion na ocacion di Dia di Himno y Bandera di Corsow. E anochi aki a keda atendi pa Minister Plenipotenciario di Aruba sr Frido Croes y su señora Lourdes Croes-Figaroa, diputado di Nijmegen encarga cu entre otro Bienestar General y Integracion sra. Lenie Scholten y Minister Plenipotenciario di Antia sr. Paul Comenencia.
E himno di Corsow a keda canta pa Adilé Marcelia, sigi pa un palabra di gradicimento dor di Ryan Estanista.
Sr. Comenencia a tene un discurso tocante e cambionan ariba structura estatal di Antianan Hulandes. Despues a sigi presentacion di grupo di baile Nos Cultura.
Presidente di team di futbol NEC sr. Weyers a haci entrega di T-shirts di NEC cu e number di Corsow ariba dje – den cuadro di un programa pa desaroyo talentonan di futbol bou di hobennan Antiano – na Minister Plenipotenciario di Antia sr. Paul Comenencia y na presidente di organisacion SOLAAN sr. A. Leer.

ORANJESTAD- Diahuebs atardi dia 3 di July 2008, a tuma lugar e acto oficial di ponemento di prome piedra pa e edificio nobo na Dakota cu lo ser yama YMCA “Jorge Guastavino” Center.
E ceremonia oficial di prome piedra a ser efectua pa Minister dio, Asunto Social y Infrastructura, Sra. Marisol Lopez Tromp y Sr. Jorge Guastavino. Sr. Guastavino tabata secretario general di YMCA for di 1967 te cu 1985. E edificio nobo di YMCA Dakota lo hiba su nomber na honor di su tremendo trabao y dedicacion pa hopi anja na comunidad di Aruba y na e hobennan di YMCA.
Durante di e ceremonia, Sr. Piet Janssen, President di Hunta di Director di YMCA, a bisa den su discurso cu nan ta realisa cu e soño aki ta bin cu hopi reto. Pero esaki ya nan a enfrenta caba 10 anja pasa na momento cu nan a reconstrui YMCA San Nicolas.
El a sigui bisa, cu nan lo percura pa e vision tuma lugar y cu Dakota ta ricibi su YMCA Center nobo cu e merese.
El a bisa cu tanto e hobennan y grandinan semper tabata gusta hasi uso di e facilidad di YMCA y esaki nan lo por hasi atrobe den futuro.
E edificio di YMCA na Dakota tabata den un condicion hopi malo. Hopi atento a ser hasi pa resolve e problemanan, pero ora tabata resolve uno otro problema tabata surgi. E ora a tuma e desicion pa re-emplaza e edificio bieuw cu ta existi ya pa 40 anja caba, cu un facilidad completamente nobo.
E edificio nobo lo ser construi den 4 fase. E prome fase lo costa Afl.1.6 million, cual ta consisti di e edificio principal, localnan pa les, localnan pa programa y cuido pa mucha despues di scol, un gym, computer room, biblioteca y localnan pa oficina. E segundo fase ta cushina y tercer fase ta basketball court cu dak y tribuna. E di 4 fase ta landscape y parkeerplaats. E costo di e tres ultimo fasenan ta 1.2 million..

WASHINGTON, Merka, - Manera kada aña, Atministrashon Nashonal di Seguridat di Karetera (NHTSA, abreviashon na ingles), a ofresé un seri di medida di seguridat pa selebrashon di “Fourth of July” (4 di yüli) pa asina e dia aki no kombèrtí den un tragedia.
Segun e estudio mas resiente, na 2006, 27% di e shofùrnan ku tabata relashoná ku algun aksidente ta’tin un konsentrashon haltu di alkohòl den sanger.
Durante e periodo di selebrashon a registrá un total di 659 morto den tráfiko di kua 37% tabata involukrá un shofùr òf motosiklista ku nivel haltu di alkohòl.
Pa evitá ku e estadístikanan ta sigui krese, NHTSA ta traha konhunto ku organismonan di salú di tur lokalidat, tambe outoridatnan legal bou di e lema “Buzzed Driving is Drunk Driving”.
Pa redusí e kantidat di aksidente, NHTSA a emití algun medida di seguridat ku por sigui fásilmente, manera entre otro plania un kaminda “safe” pa bai kas promé ku e festividatnan di “Fourth of July” kuminsá.
Tambe, promé ku kuminsá bebe, nombra un hende p’e bira bo shofùr i entreg’é bo yabi di outo.

Foto; Fourth of July 0407

Hendenan ayera nochi durante selebrashon di “Fourth of July” ta para wak show di vürwèrk riba riu Mississippi na Dubuque, Iowa.

ORANJESTAD- Preguntanan di e miembro di Parlamento, dr. Armando R. Lampe na Ministro di Salubridad Publico y Medio Ambiente, según articulo III.17 di nos Constitucion y según articulo 59 di Reglamento di Orden di Staten di Aruba:
1. Minister a anuncia via medionan di comunicación cu e construccion di e centro cardiologico na Centro Medico San Nicolas lo costa Af. 20 miyon, despues a sali publica den corant Amigoe (26 di juni 2008, pag.1) cu e gastonan envolvi ta Af. 4 miyon. Aki ta trata di un diferencia substancial. Cua suma ta corecto?
2. E centro cardiologico ta keda construi leu for di e unico hospital di Aruba. Ta trata di un intervencion sumamente serio y pesei ta logico cu un centro asina mester ta den un hospital pa por actua de inmediato ora surgi complicacionnan. Di con Minister a opta pa bai contra logica y pone bida den hende na peliger?
3. Den pasado no ta exactamente esaki tabata e motibo pa stop e funcionamento di e centro cardiologico di Dr. Lacle, pasobra e no ta den hospital? Di con awor si por, mientras cu e centro di Minister ta hopi mas leu di e hospital?
4. Minister ta papia di promove turismo medico via e centro cardiologico di Centro Medico San Nicolas. Den pasado a lanta Clinica Posada cu e mesun meta pa promove turismo medico. Esaki no a duna resultado, e patientnan di Clinica Posada ta exclusivamente hende local. Si e no a duna resultado den pasado, ki ta pone Minister pensa cu e biaha aki si ta bai logra?
5. Minister ta splica cu un di e motibonan pa bin cu un centro cardiologico na Centro Medico di San Nicolas ta cu lo baha gasto di AZV. Minister ta na altura di e ley di oferta y demanda. Una bez cu crea un centro cardiologico cu ta aumenta e oferta riba mercado local, lo bai aumenta e demanda pa intervencion cardiologico, cu e consecuencia cu e gastonan di AZV lo aumenta. Con Minister por defende ainda cu e centro cardiologico ta bin ba baha gasto di AZV?

WILLEMSTAD – Awe na Ulanda a kuminsá ku e Haarlemse Honkbal Week na Ulanda, kaminda e selekshon di Antia/Aruba a enfrentá e selekshon di Cuba ku ta bayendo Weganan Olímpiko na Beijing, China.
Den un bon duelo di picheo, Cuba ta logra un triunfo di 2-1 riba Antia/Aruba.
E selekshon di Antia/Aruba a bati mas hit 6 ku Cuba ku a bati 4.
Pero Cuba ta sali anotá un kareda den bòm di kuater ining pa bai ariba 1-0.
Antia/Aruba ta bin empatá den kabes di seksto, 1-1.
Den bòm di séptimo ining Cuba ta bai ariba 2-1.
Cuba a usa vários picher i pa Antia/Aruba a kuminsá Juan Carlos Sulbaran, despues Lester Victoria i Orsendo Clemencia a bin tèrminá e wega.
Mañan e selekshon di Antia/Aruba lo enfrentá Hulanda pa 7’or ora di Ulanda.

WILLEMSTAD. - Liga Hubenil Basketbòl Kòrsou riba djasabra 5 di yüli, ta klousurá su promé periodo ku weganan den e diferente divishonnan hubenil di Basketbòl.
Manera ta konosí, e liga a lanta ku e meta pa duna muchanan i hóbennan te ku 17 aña e chèns pa kompetí kontra di otro pendiente komienso dje próksimo kampionato di Basketbòl organisá pa CuBaFe.
Despues di kuater fin di siman ku hopi wega, djasabra awor den Sala Niels Liberia, na Suffisant ta klousurá ku dos wega di ‘All Star’ kaminda e diferente timnan na un manera hopi inventivo ta pone hungadó na disposishon.
Den e promé partido, pa 4’or di atardi, un ‘All Star’ di mucha muhé formá pa hungadónan di B&M Sisters i Royal Hoops lo enfrentá un ‘All Star’ di mucha hòmber di Lettermen i Royal Hoops. Den e tim di mucha hòmber lo tin hungadónan Mini (te ku 12 aña) i Aspirant (13-14 aña).
Despues di esei, pa 6’or, lo tin ‘All Star East’ kontra ‘All Star West’ ku hóbennan Kadet (15-16 aña), huntu ku e mihónan di Mini, Aspirant i Dama.
Esaki ta bira un momento úniko pa mira e tòp basketbolistanan hubenil di Kòrsou huntu den dos ekipo.
Un invitashon ta bai na tur amante di deporte, prinsipalmente fanatikonan di Basketbòl kendenan últimamente a gosa di playoff di N.B.A., pa nan bin mira kiko nos mes hóbennan por hasi riba kancha di Basketbòl. E nivel ku a keda demostrá den Liga Hubenil Basketbòl Kòrsou ta hopi haltu i tur hende djasabra awor na Suffisant lo tin oportunidat pa komprobá esei.

TAIPEI / SHANGHAI, - Históriko buelonan regular entre China i Taiwan a kuminsá awe, den un demostrashon di konsiliashon entre e dos eterno rivalnan.
E promé di e buelonan, un avion di China Southern Airlines, a aterisá na aeropuerto Taoyuan di Tapei, kapital di e isla, prosedente di Guangzhou situá sùit di China, den e promé oranan di mainta, ku a transportá mas o ménos 250 pasahero.
Poko despues a sigui un otro buelo for di siudat sùit di Xiamen ku a aterisá na aeropuerto Songshan di Tapei.
E buelonan for di China lo sali for di vários siudat, inkluyendo Shanghai.
Lo inougurá un total di 36 buelo e fin di siman aki, konektando sinku siudat grandi chines ku ocho aeropuerto na Taiwan.
No tabatin buelonan regular, aparte di algun tiki buelo charter den épokanan di fakansi, fo’i aña 1949, ora e derotá fòrsanan nashonalista a huí bai Taiwan despues di e guera sivil chines.
A reanudá e buelonan danki na trabou di e presidente nobo taiwanes Ma Ying-jeou, kende a asumí e kargo na mei ku e kompromiso di revitalisá ekonomia di e isla ku algun relashon komersial i di tránsito mas estrecho ku China.
Ta kalkulá ku mas o ménos 50 mion chines ke bishitá Taiwan.
Esaki ta e promé servisio aéreo direkto regular entre teritorio chines i Taiwan den kasi seis dékada.
Entre otro medidanan di distenshon, kuminsando 18 di yüli, kada un di e partinan lo pèrmití tambe entrada di 3.000 turista diariamente.

WILLEMSTAD - Ayera dia di bandera tabata tin un nifikashon èkstra serka e muchanan i tambe dirigentenan di Christelijk Kinderhersteloord SILOAM; nan a risibí un donashon di 15 mil florin for di mannan di sr. Gerard Van Den Tweel (propietario di Albert Heijn Supermarket Zeelandia) ku a hasi esaki den nòmber di DITO Child Foundation.

E donashon ku a keda realisá ayera ta danki na rekoudashon di fondo ku a keda hasi aña pasá novèmber durante di un Gala Dinner na Ulanda. Ta asina ku ehekutivonan, invershonistanan i otro personahenan di sosiedat ta keda invitá pa partisipá na e sena aki, ku e solo meta di por aportá na e bunita kousa di DITO Child Foundation. Ta interesante hasi menshon ku e Gala Dinner di e aña aki lo keda hasí dia 13 di novèmber próksimo na e sentro di evento Hart van Holland ku ta keda na Nijkerk. Pa e sena aki, e mesanan ta repartí pa 10 persona na un mesa i kada mesa ta kosta 5 mil Euro. Tur loke ku wòrdu rekoudá for di e benta pa e sena aki ta wòrdu duná na diferente instansianan karitativo ku ta wòrdu sostené pa DITO Child Foundation. Ta bunita pa mira kon un organisashon totalmente non-profit establesé na Kòrsou por benefisiá di un fundashon internashonal.

Riba kombinashon di foto por apresiá momentu ku sr. Gerard Van Den Tweel ta hasi entrega di e chek balorá na 15 mil florin den nòmber di DITO Child Foundation na Broeder Herman di SILOAM. Tambe por tuma nota momentu ku Broeder Herman tabata duna splikashon di e plannan pa ekspandé e edifisio di SILOAM pa di e forma ei por yuda mas mucha.

WILLEMSTAD - Durante di e konsulta polítiko ku ta tuma lugá djarason awor, entre di Hulanda, Antia i Sint Maarten, e tópiko di mas importante ta e lei di konsenso di reino enkuanto polis. Den deklarashonnan ku el a hasi, diputado di struktura estatal, Zita Jesus-Leito, a splika ku den e dianan aki gobièrnu ta preparando pa e reunion di e grupo piloto polítiko, ku ademas di su persona lo konta ku partisipashon di entre otro sekretario di estado Ank Bijleveld, minister presidènt Emily de Jongh-Elhage i Sarah Wescott, den representashon di Sint Maarten.
Ta e intenshon pa durante e konsulta trata e puntonan di salida di e lei di konsenso di reino pa polis. Esaki lo krea posibilidat pa e ekspertonan por sigui traha pa tan pronto posibel yega na formulashon di e lei di konsenso di reino.
Tur esaki, segun diputado Jesus-Leito, ta den e kuadro di e loke gobièrnu ta bisando ku gobièrnu ta boga p’e, ku ta pa tin e leinan di konsenso di reino kla mas lihé posibel. Den e kuadro ei, segun diputado Jesus-Leito, gobièrnu ta hasiendo su esfuerso pa konkretisá kada lei di konsenso di reino, ku mester ta kla. Esei ta e aporte ku gobièrnu ke duna pa duna un empuhe pa logra ku e trabounan por desaroyá mas rápido.
Pa loke ta trata e kompleksidat di e lei di konsenso di reino di polis, e lei di konsenso aki tin su puntonan ku mester atendé. Den e Dekreto Final tabatin e kuadro poné, pa e lei aki i loke ku tambe ta eksigí hopi preparashon, ta e parti di koperashon. Den e sentido kon ta bai koperá ku otro komo islanan riba e tereno polisial, ta e parti di mas difísil pa hinka den otro. Ta e intenshon pa kada isla keda ku su responsabilidat, pero ku por traha ku otro na un manera di tal forma ku e efekto ku e ta bai tin pa nos pueblo pa e kombatimentu di kriminalidat, ta mas efektivo posibel.

WILLEMSTAD - Djadumingu dia 6 di yüli, Prinses Wilhelmina Fonds ta bai organisá un tremendo Torneo di Dominó, den kuadro di su kampaña di informashon i konsientisashon tokante kanser di prostat.
Ta trata di un torneo den kua lo partisipá 14 klup di Dominó lokal, miéntras ku paralelo ku esaki lo tin otro torneo, pa personanan individual ku ke inskribí ku nan man.
Pa lokual ta trata e torneo di e klupnan, esaki lo hunga den dos pul i e ganadónan di e pulnan lo enfrentá otro den final.
E torneo di e personanan individual ku nan man tambe lo bai den forma di pul, di kua e ganadónan di kada pul tambe lo enfrentá otro den final.
E torneo lo tuma lugá den Hòfi Kultural di Sentro Kultural Kòrsou, ku ta situá den Koninginnelaan den Emmastad.
E torneo ta kuminsá 12’or di mèrdia i lo finalisá 6’or di atardi.
Entrega di premio lo ta 6.30’or di atardi.
Manera ta konosí, luna di yüni a keda simbolisá komo “Luna Blou” dor di Prinses Wilhelmina Fonds.
“Luna Blou” ta un kampaña den kua Prinses Wilhelmina Fonds ke pone atenshon i tambe trese e konsientisashon den komunidat pa e malesa di kanser na prostat.
Komo klousura di su kampaña “Luna Blou”, Prinses Wilhelmina Fonds kier a hasi algu spesial pa asina envolví e hende hòmbernan mas tantu den e kampaña aki.
Komo tal a bin ku e idea pa klousura e kampaña ku un torneo di Dominó, ku ta e wega faborito di e komunidat maskulino.

RIO DE JANEIRO – Liga de Quito, djarason a regalá Ecuador e trofeo mas importante den historia di futbòl dje pais ora el a koroná su mes kampion di Kopa Libertadores.
“Los Albos” a superá Fluminense 3-1 den tiramentu di pinalti di e final, den kua e kiper ekuatoriano Jose Francisco Cevallos a kue tres pinalti. Fluminense a gana e tempu reglamentario 3-1, loke a manda e wega den tempu èkstra i finalmente e tiramentu di pinalti.
Patricio Urrutiia, Franklin Salas i Joffre Guerrón a hinka e pinaltinan di Quito, i Cícero tabata e úniko ku a hinka pa Fluminense. “Pancho” Cevallos a kue e tirunan di e argentino Dario Conca, Thiago Nieves i Washington.
Neves a hinka e tres golnan di Fluminense den tempu regular, i Luis Bolaños a sakudí nèt pa Liga, ku na novèmber lo hunga e final mundial di klupnan.
E skor global tabata 5-5. Liga a gana 4-2 den e promé partido siman pasá na Quito.
Liga a bira e promé klup ekuatoriano ku a gana Libertadores, despues di e frakasonan di Barcelona di Guayaquil den dos final na 1990 i 1998, den kua Cevallos tabata su kiper. Ecuador no a gana niun título di kategoria ni na nivel di klupnan ni na nivel di selekshon, apart di e medaya di oro ku nan a kologá aña pasá den Weganan Panamerikano di Rio de Janeiro.
Fluminense tambe tabata buska su promé título kontinental i tabata parse na kaminda pa logra esaki ora ela sali manera un tròm na komienso dje wega.

ARIES: Ta un dia hopi interesante pa bo unda tur kos por pasa. Si bo mantenébu positivo i no tuma e kosnan tantu na serio, bo ta dibertí en grande. 05,20,13.

TAURO: Bo por ta arepentí di desishonnan pasá, pero di nada ta sirbi awor pa lamentá. Sigui ku bo proyektonan. No biba bou di peso di insiguransa. 04,27,18.

GEMINIS: Un angel komo kai di shelu lo ta e amigu(a) ku konsehonan i desishonnan pa enriksébu. Suerte ta rondonábu i plaka no ta faltábu. 31,29,16.

KANSER: Bo ta realisá, ku bo ta topa mas tono ku e realidat. Bo ta tuma desishonnan sabí den bo eksperensianan. Tuma mayor interes pa bo salú. 06,14,33.

LEO: Bo deseonan di yuda otro ta krese i e sentimentu ta yenábu di hopi satisfakshon. Bo ta hopi kla pa ophetivonan den bida i un di nan lo ta yuda bo próhimo. 40,32,12.

VIRGO: Bo ta konsentrá awor riba tur e lokualnan ku ta relashoná ku bo trabou. Ta momentu di demostrá múltiple talentonan. 08,50,02.

LIBRA: Un man di amiga ta yudábu sali di un problema. Bo ta mira e lus unda ántes tabata eksistí solamente pena. Kuminsá awor un tempu nobo di yen di oportunidatnan. 17.

SKORPION: Un amor i romanse nobo ta bolbe sende e vlamnan di pashon den bo. Si bo tin di spera di e dosis masivo di atenshonnan i eksitante enkuentronan. 03,25.

SAGITARIO: Si bo buska pa kousa un bon impreshon den otronan, ta un bon dia pa hasié. Fortuna ta yega awor di un manera ineksplikabel. 15,33,07.

WILLEMSTAD – “Tur kompania di aviashon ku den pasado a yega di bula e ruta pa Kòrsou i esnan ku ke hasi esei den futuro, no ta hasi esei pòrnada. E kompania di aviashon tin mes tantu mester di nos, komo nos tin mester di nan. Ami no ta kere den asuntu di duna garantia di stul òf supsidiá un kompania pa e bula pa nos islanan,” asina Maurice Adriaens, minister di Telekomunikashon a aksentuá den su deliberashon ku parlamentu ayera.
Staten, riba petishon di e miembro di frakshon di PAR Glenn Liqui Lung a pidi e interkambio di pensamentu ku minister Adriaens pa weta kiko ta pensamentu di gobièrnu pa loke ta e problemátika aki.
Rònt mundu kompanianan di aviashon ta pasando momentunan difísil. E problema ta e oumento konstante di preis di petroli ku ta pone ku preis di kerosin ku avionnan ta usa komo kombustibel, tambe a bin ta konosé un desaroyo alarmante. Minister Maurice Adriaens, resientemente a partisipá na un konferensha den Karibe pa diskutí e punto aki, ku ta un punto di preokupashon tambe pa tur isla den nos region ku ta dependé prinsipalmente di turismo.
Manera LA PRENSA a informá for di algun siman pasá kaba, e mandatario antiano, despues di a skucha e diferente ideanan ku ta biba a bisa ku e no ta na fabor pa paga kompanianan di aviashon pa nan (sigui) bula pa nos isla. Ta konosí, ku debí na e situashon penoso ku ta reina serka kompanianan di aviashon, vários kompania a ekspresá e deseo di ke weta un tipo di kompensashon pa e buelonan ku nan realisá. Un kos ku Adriaens a bisa for di algun tempu kaba, ku e no ta di akuerdo kuné. Ayera den reunion di Komishon Sentral el a ripití e posishon aki.

WILLEMSTAD - Parlamentu di Antia tabatin su último reunion ayera promé ku reseso. Entrante awe, Staten a baha ku fakansi, den terminologia parlamentario yamá reseso.
Esei ta tradishon di tur aña kaminda semper e fakansi di parlamentu ta kai den e mesun temporada ku fakansi grandi di skol, ku ta e periodo tambe ku mayoria hende ta tuma liber pa bai sosegá un ratu.
Presidente di Staten Pedro Atacho a anunsiá esaki ayera, indikando ku manera semper, lo no tin reunion di parlamentu, a ménos si mester reuní den forma urgente pa atendé kualke asuntu di pais.
Den e reunion di ayera, minister Maurice Adriaens tabata instrumental. E promé reunion di Komishon Sentral parti mainta a trata desaroyonan den aviashon relashoná ku e oumento konstante di preis di krudo i konsekuentemente, oumento di preis di kombustibel pa aviashon miéntras ku parti atardi e mesun minister aki tabata den parlamentu atrobe pa splika desaroyonan riba tereno di teknologia di informashon i su aplikashon den futuro pa Kòrsou komo pais outónomo den Reino.
Staten, awor aki lo kuminsá su aktividatnan atrobe den e siman di 11 di ougùstùs.
Por sierto ku Konseho Insular tambe a bai ku reseso. E último reunion tabata e reunion solèm pa selebrá Dia di Bandera. Konseho Insular tambe lo no tin reunion te dia 15 di ougùstùs, ora tur miembro ta bèk pa reanudá nan labor.
Por sierto ku Konseho Insular tin algun reunion ku no a finalisá i ku e mester sigui kuné, unabes e kuminsá bèk ku su trabounan meimei di ougùstùs awor.

WILLEMSTAD – “Parlamentu di Antia, riba término no masha largu, ta bai trata e proposishon di lei ku ta destiná pa kombatí e fenómeno pornografia.
E lei ta kla i awor por bai reunion públiko”, asina parlamentario pa frakshon di PAR Jacqueline Spencer a anunsiá.
Frakshon di PAR, partikularmente minister di Enseñansa Omayra Leeflang semper tabata na fabor di e legislashon nesesario pa bringa e fenómeno aki.
Resientemente, tabatin diskushon den komunidat atrobe, despues ku riba un wepsait a sali pòtrètnan pornográfiko ku tabata inkluí muchanan relativamente hóben. Un matutino ku a reprodusí e fotonan aki a okashoná indignashon serka sierto gremionan den komunidat.
E korant mes ta sostené, ku el a simplemente reprodusí loke a sali publiká riba Internèt. E no a sinti su mes kulpabel pa esei.
Jacqueline Spencer a bisa, ku e hecho ku a entregá e lei e siman aki no tin algu direktamente di aber ku e kaso aki.
Ta trata di un proposishon di lei ku tabata den preparashon pa algun tempu kaba. E lei a ser tratá kaba den reunion di Komishon Sentral i gobièrnu mester a kontestá algun pregunta ku miembronan di parlamentu tabatin.
Esei entretantu a sosodé. Minister Omayra Leeflang a kontestá e preguntanan di manera ku no tin nada ku ta strob’é tratamentu den reunion públiko.
Esei lo sosodé sinembargo despues ku Staten bini bèk for di reseso, esta despues di 11 di ougùstùs.

WILLEMSTAD - “Ta masha importante pa nos tur hinka nos skouder bou di desaroyonan ku ta tumando lugá riba tereno di teknologia di informashon.
Ta ku e meta ei, nos ta preparando lantamentu di e ICT Platform, un plataforma ku mester uni forsanan riba e tereno aki pa traha huntu pa nos no pèrdè e desaroyo aki riba nivel mundial. Un plataforma asin’aki lo kondusí finalmente na mas kalidat i na un funshonamentu efektivo i ekonómiko. Nos ta kere ku esaki ta importante tambe, mirando e desaroyonan riba tereno estatal, kaminda Kòrsou ta na kaminda pa bira pais outónomo den Reino.
Nos ta kere ku ta un bon idea tambe pa yega na un ministerio pa enkargá su mes ku desaroyo di ICT,” asina Irving Roosburg, mènèdjer di informashon di gobièrnu di Kòrsou a deklará.
Un ministerio mester haña rienda riba tur loke ta sosodé riba e tereno aki den futuro.
E plataforma aki a nase despues ku sektornan riba e tereno aki a nota ku tin problema ku kada ken riba su mes no por solushoná asina fásil.
Poniendo esfuerso huntu, e ta bira muchu mas fásil pa atendé ku e tereno aki ku ta birando masha prometedor pa mundu, segun Roosburg. Den e plataforma tin sektor públiko i sektor privá: tin gobièrnu di Kòrsou, Gobièrnu Sentral i sektor privá.
Roosburg, huntu ku Monique Rafaela, direktor di Stimul-IT, Sigmund Sasso, kolaboradó di maneho na departamentu di P&O-ICT i kompañá pa minister di Telekomunikashon Maurice Adriaens a duna Staten un splikashon di kiko ta sosodiendo i kiko nan ta hasiendo pa fomentá un desaroyo sano riba e tereno aki. E plataforma, manera indiká kaba ainda no ta eksistí ofisialmente. Ta trata di un plataforma ku ta den proseso di lantamentu, asina esnan resente ayera a enfatisá, pa splika ku nan no tin kontesta pa tur pregunta ainda.

WILLEMSTAD - Partido MAN ta na fabor pa tene un referèndem awor, pa laga pueblo disidí si e rumbo ku nos ta bayendo ta esun korekto. Di e forma aki nos ta eliminá di una bes tur diskushon i tur duda, si ta oposishon òf ta koalishon tin rason den e asuntu aki.
Esei ta proposishon di partido MAN. MAN a enfatisá e punto aki atrobe despues di desaroyonan di último dianan kaminda un biaha mas por a ripara kon dividí mundu polítiko ta, prinsipalmente pa motibu di e trayekto estatal; ku Kòrsou ta kanando.
Den su diskurso den Konseho Insular na okashon di e reunion sòlèm pa selebrá Dia di Bandera, Cooper a ripití posishon di su partido, esta ku Kòrsou ta kanando e trayekto estatal robes.
“Na opinion di hopi hende, e kaminda ku gobièrnu ta kanando pa kambionan estatal ta e kaminda robes. Pueblo no a skohe pa e direkshon aki,” Cooper a bisa na e okashon ei.
E lider di MAN a bisa mas aleu, ku Kòrsou a bin ta pasa den un reto grandi. Gobièrnu parse ta sinti su mes poderoso pa dal bai ku e kambionan ku e ta kere ku e mester hasi.
“Nos ta entregando tur loke nos tin, pa un supuesto saku di plaka,” di akuerdo ku e lider di partido MAN.
MAN ta rechasá e kos aki i lo sigui lucha pa un Kòrsou outónomo den Reino, sin pèrdè loke nos tin awor aki. P’esei nos ta kere den un referèndem awor aki, segun e lider di MAN.
Un referèndem awor aki, ta kompletamente na su lugá. E referèndem, segun e dirigente polítiko mester konsentrá riba un pregunta básiko, esta si e siudadano ta pro òf kontra e trayekto estatal aktual.

NICE, Fransia, - E yunan ohochi di Angelina Jolie lo por tarda i nase den algun siman, segun e dòkter di e aktris sitá pa medionan di komunikashon.
Dòkter Michel Sussmann a afirmá ku e aktris a drenta Lenval Hospital na Nice, Fransia, pa un revishon mas amplio i no por duna lus pa awor aki.
E dòkter a añadí ku Jolie lo keda na e hospital te dia di e parto.
“Angelina ta hopi bon. Brad i Angelina ke pa boso sa ku tur kos ta bayendo bon, dentro di normalidat”, dòkter Sussmann a sigurá.
Dòkter Sussmann no a adelantá e fecha di nasementu di yunan ohochi di Jolie, afirmando solamente ku ta spera ku e yunan lo nase den algun siman.
“Ta algu ku no por programá. Nunka por sa ku seguridat”, dòkter Sussmann a bisa.
E aktris ganadó di un premio Oscar, di 33 aña di edat, ya tin un yu muhé ku aktor Brad Pitt, esta Shiloh Nouvel Jolie-Pitt, di 2 aña.
E pareha tambe a adoptá otro 3 yu: Maddox di Cambodia, Zahara di Etiopia i Pax di Vietnam.


Foto; Angelina Jolie 0407

Angelina Jolie

Foto: michel Sussmann 0407

Dòkter Michel Sussmann dilanti Lenval Hospital na Nice, situá sùit di Fransia.

Foto: Prensa 0407

Miembronan di prensa ta para warda dilanti Lenval Hospital ayera.