ORANJESTAD- E delegacion di Aruba cu atletanan Fiderd Vis y Jan Roodzant hunto cu e otro delegadonan a jega Beijing sano y salvo.
Nan a worde traslada pa e Villa Olimpico, unda nan por a bai descansa di un viahe di dos bes 9 ora. Ariba e potretnan por mira e apartamentonan cu a worde asigna na COA.
E delegacion ta keda den mesun edificio cu e delegacionnan di Armenia y Brasil.
Dia 6 di augustus pa 5 or di atardi e ceremonia di Bon Bini ta tuma lugar cu hisamento di nos bandera y tocamento di e himno di Aruba.
Diabierna 8 di augustus lo tin e ceremonia di apertura di e Weganan Olympico 2008, e delegacion di Aruba lo ta den e desfile como number 109.

ORANJESTAD – Victoria Bottling Company distribuidor di Nesbitt’s aki na Aruba a lansa dia 8 di April ultimo su campaña “Crea un nomber y gana!” pa su product nobo.
Victoria Bottling Company a lansa riba mercado un lemonade cu un sabor Arubiano cu ta hopi refrescante y alabes saludabel.
E lemonade aki ta wordo traha cu awa di Aruba, lamoenchi y honing. Locual ta hasie mas interesante ainda ta cu e no ta contene gas.
Pa participa tawata hopi facil, djis mester a bay na e website: www.arubaslemonade.com y yena un nomber creativo y unico pa e lemonade.
E campaña a sigui te cu 8 di Mei y por bisa cu e la haña un tremendo acogida di e pueblo di Aruba.
Mas o menos 1000 nomber a wordo manda y e trabou tawata hopi dificil pa por a scohe un nomber ganador. Dos commission a ser forma pa haci e evaluacion. finalmente e ganadora absoluto di e campaña a keda den persona di Joanna Pourier cu su nomber “Bee Squeeze” cu a gana un iPod Touch y Bee Squeeze sabroso y refrescante pa un luna GRATIS!
Joanna a inspira e nomber pa e lemonade imaginando varios bij ta primi lamoenchi pa traha e Limonada y despues mescla esaki cu honing.
Victoria Bottling Company ta gradici un y tur cu a participa na e campaña y ta invita tur esnan cu ainda no a purba Bee Squeeze pa pasa na e supermercado, minimarket of refresqueria mas serca y cumpra uno y asina purba e sabor dushi y unico cu e lemonade tin pa ofrece.
Den luna di October e lo ser lansa oficialmente cu su label y promocion pa henter Aruba.

ORANJESTAD- Comision Waste - Rec, esta “Waste – management & Recycling Environmental Committee” ta tene un Dia di Familia na Comunity pool San Nicolas.
E evenemento ta pa recauda fondo pa proyecto comunitario y lo tin cuminda y bebida na benta.
Tambe lo tene un Eco – Quiz cu premio pa mucha y e parte musical lo ta na encargo di Bito & the Boys y DJ HUSANI. Carchi pa cuminda ta na benta na tur miembro di e comision.
Famia grandi of chikito por haci uso di e Community Pool y alavez yuda recauda fondo pa proyecto comunitario. Uso di e piscina pa esnan cu no tin carchi pa cuminda lo ta manera custumber na 3 florin pa adulto y 2 florin pa mucha.
Entrada lo ta gratis cu compra di carchi pa cuminda na 15 florin. Por usa e carchi pa sea un cuminda grandi of dos chikito. Tambe lo tin sopi pa 6 florin, johnny cake cu keshi pa 3 florin, y pan cu hotdog pa 3 florin.
Pa mas informacion por tuma contacto cu sra Sandra Wilson, na 5844694 / 5606033, Gloria Richardson na 5846965 / 7342150, Shirley Illidge – Hilman na 7302612 of Theresita de Graaf na 7486844.

ORANJESTAD – Den un entrevista haci cu sr. Wichi de Palm, el’a expresa cu gratitud inmenso cu el’a wordo recorda di ta e persona cu a cuminza cu little league organiza na Bonaire.
El’a menciona cu el’a wordo invita pa bay Bonaire, pa e comision campeonato Little League, cu ta wordo dedica e aña aki a su nomber.
E ta sigui menciona cu e equipo a bishita cinco pais, tempo e tabata dirigi little league na Bonaire y a hiba e nomber di Little League di Bonaire na varios pais den Caribe, te hasta Miami.
Sr. de Palm ta masha contento y gradicido cu e comision di awor cu ta corda riba dje y a organiza dicho campeonato na su nomber. Segun sr. de Palm, e ta contento di a haci esey ya cu e ta un homber di basta edad.
Segun sr. de Palm, tur e muchanan cu el’a yega di dirigi, ya ta mucha hombernan grandi y te hasta casa y e no por imagina con bida a cambia asina liher.
Lamentablemente sr. de Palm no por tey presente na Bonaire pa e campeonato, ya cu e y su señora ta sufri di kebrante di salud.
“Cu Dios drama su bendicion riba e comision di Little League di Bonaire y tur otro deporte.” el’a bisa finalmente.

Varios topico di interes a keda discuti
ORANJESTAD - Diamars ultimo, un delegacion di FESCA a hasi un bishita na oficina di representacion di Hulanda na Aruba. Presente pa ricibi e delegacion tabata drs. Myriam Jacobs, cu ta representante temporario na VNO y mr. Maarten van Rossum cu ta relacionista publico di representacion Hulandes na Aruba.
E meta di e bishita di e delegacion di FESCA tabata pa hasi entrega di e ultimo estudio macro-economico di e fundacion scientifico. E estudio ta ofrece un analysis detaya di e situacion y desaroyo economico Arubiano for di aña 2000 y ta ofrece un bista te na 2025, con e situacion por desaroya su mes teniendo na cuenta un cantidad di scenario.
Presidente di FESCA, mr. drs. Richard Arends, a hasi entrega di e estudio na representantenan di VNO presente.
E bishita a bay den un ambiente ameno y esnan presente a combersa basta largo ariba e contenido di e estudio y con e lo wordo usa den futuro. Temanan importante cu a bin dilanti tabata con nos structura di educasion ta relata na e situacion economico di Aruba, moratorio di hospedahe den sector turistico, e relacion di trabou cu FESCA tin cu “Wetenschappelijk Instituut voor het CDA” y e cooperacion di e diverso departamento y institutonan local cu FESCA a haya den e proceso di completa e estudio interesante aki.
Na final presidente di FESCA a gradici tanto sra. Jacobs y sr. van Rossum pa nan interes y hospitalidad. For di banda di VNO tambe a gradici FESCA pa e interes den Representacion Hulandes na Aruba.
E estudio macro-economico di FESCA, titula "Desaroyo Economici di Aruba", ta obtenibel pa download na: http://www.fesca.org

WILLEMSTAD – E Maestro Internashonal Luis Bernal Moro di Spaña a sòru pa un sorpresa dor di gana 7 punto for di 9 wega. E no a sabi di pèrdè kontra di niun Gran Maestro i a drenta e último buèlta ku un punto di delantero riba e sobra ahedresistanan. E tabatin sufisiente na un remise, empate, pa bai ku e título.
Den su último partido kontra di e Maestro Internashonal ulandes Thomas Willemze, mesora el a buska un remise, pero no a logra esaki i a bin kai derota dor di Willemze.
Ku esaki el a bin keda empatá ku e Gran Maestro Larry Christiansen di Merka i e otro Gran Maestro Joel Benjamin di Merka, ku mes tantu punto.
Larry Christinasen a bin sali na e promé lugá dor di un mihó promedio di skor i Luis Bernal Moro, mester a konformá su mes ku e di dos puesto. Na e di tres puesto a keda Joel Benjamin. Ku e puesto aki Benjamin a bin haña e promé di tres normanan ku e tin mester. E premio pa e mihó ahedresista lokal a bai pa Fabio Mensing ku 5 punto i mei na e di 11 lugá. Miéntras ku Jimmy Izijk tabatin e mesun kantidat di punto i a bin haña e premio di e hungadó mas haltu ku tabata “unrated”.
Seidi Salim-Moussa a bin haña e premio di e mihó hungadó femenino lokal.
Anna Zatonskih di Merka a bin haña e premio di e mihó hungadó femenino.
Jasel Lopez di Aruba ku e aña aki a debutá den e klase Habri, despues ku aña pasá el a hunga den Hubenil, a tèrminá ku 5 punto.

WILLEMSTAD – Djasabra awor lo bai tin weganan di All-Star den stadion Johnny Vrutaal for di mitar di 1 di mèrdia kuminsando ku e All-Star Game Hubenil.
FeBeKo, e Federashon di Beisbòl di Kòrsou, ayera tardi den Ribs & Chips, a tene un rueda di prensa pa e dia di All-Star.
E All-Star Game di Klase AA ta tuma lugá ya ku e temporada a yega su mitar.
Federashon huntu ku e dos kuerpo téknikonan a forma dos selekshon, Pariba ku ta konsistí di e timnan Sta. Rosa Indians/Ennia, Wild Cats/Fatum/Kambes, Groot Kwartier Stars/Mangusa i Curaçao Yankees.
E tim di Pabou ta konsistí di e timnan: Sta. Maria Pirates/Chippie, Royal Scorpions Mr. Baseball/Banco di Caribe i Blue Hawks/Aqualectra.
Federashon kier a gradisí e spònsernan ku a koperá ku e fecha aki.
Insel Air a pone un deurprijs di un pasashi pa Repúblika Dominikana. Tambe tin un estadia na Sabana Resort pa e MVP di e wega. Lo tin trofeo pa e Home Run Derby, pa e ganadó di e tim Hubenil, e ganadó di e wega di Veterano I medaya pa tur hende. Amstel, Heineken i Pepsi Cola tambe ta spònser e evento.
Tambe GIO Fuertísimo lo animá e fanatikada ku bini promé ku e All-Star Game di AA i Aya lo kanta huntu ku Zoyoyo despues di wega.
E wega di Hubenil i esun di Veterano, lo ta grátis, pero pa e wega di AA entrada lo ta fl. 5,- general. Lo tin un sekshon di VIP ku lo kosta fl. 50,-, ku drinks i snacks.
Un invitashon na fanatikada di beisbòl pa asistí na e weganan aki.

WILLEMSTAD – Un total di sinku deportista di Antia Ulandes i Aruba a biaha pa Peking pa partisipá na Weganan Olímpiko.
Churandy Martina, Philip Elhage i Rodion Davelaar ta e atletanan ku lo partisipá pa Antia Ulandes.
Martina tin segun ekspertonan e mihó oportunidat pa por logra un medaya olímpiko ku lo bai kore riba 100m i 200m.
Rodion Davelaar ta bai landa riba 50m estilo liber i Philip Elhage lo bai riba e disiplina di Pistol di Airu riba 10m.
Pa Aruba lo bai e yudoka Fiderd Vis i e landadó Jan Roodzant ku lo bai riba 100m estilo liber.
Dia 7 di ougùstùs lo tin un seremonia spesial pa yama e delegashon di Antia bon bini den e Villa Olímpiko. Un dia promé lo ta Aruba lo haña e honor aki.
E deportistanan lo trata di duna un bon prestashon.
Pa Davelaar e Weganan Olímpiko lo kontribuí na un progreso di e landadó. Aki kuater aña na Londres e lo bai tin un mihó chèns pa gana un medaya, pero e tin muchu tiki eksperensia awor aki.
Fiderd Vis di Aruba ta mira su soño bira realidat. E lo ta e kargadó di bandera pa Aruba. Jan Roodzxant ta spera ku kibra su rèkòrt personal durante di e weganan.
Pa Nicole Hoevertsz, e miembro arubano ku ta miembro di e direktiva di KOI, Komité Olímpiko Internashonal.. E lo ta enkargá pa mira ku algun deporte ku ta kai bou di dje ta kana sin problema.
Hoevertsz mes na 1984 a bai e Weganan Olímpiko di Los Angeles.

WILLEMSTAD – Riba e wepsait di IAAF, e Federashon Internashonal di Atletismo, a sali un artíkulo di sinku velosista ku por sorprendé e tres grandinan ku ta Usain Bolt, Tyson Gay i Asafa Powell ku nan ta yama “The Forgotten Five”.
Den e grupo “The Forgotten Five” aki tin Churandy Martina tambe.
Nan a tene un entrevista ku tur e sinku atletanan aki ku ta Derrick Atkins di Barbados, Churandy Martina di Antia ulandes e duo di Trinidad & Tobago, Richard Thompson i Marc Burns i Francis Obikwelu di Portugal.
Aña pasá durante di e Kampionato Mundial na Osaka, Hapon Churandy Martina tambe a hunga un ròl den e 100m final. Na e okashon ei el a yega na e di sinku puesto.
Awor aki e atleta yu di Kòrsou di 24 aña ta un aña mas bieu, mas sabí i mas velos.
“Semper mi ta mira kosnan masha positivo. Na e salida nos tur ta humano, Gay, Bolt i Powell. Nan tur ta ser humano meskos ku tur otro hende i mi ta sinti mi mes kapas di gana un medaya meskos ku tur otro”, asina Martina ta bisa.
“Mi kier gana un medaya e aña aki na e Weganan olímpiko di Beijing. Mi kier yega mas haltu riba e lista di e atletanan mas velos na mundu. Mi meta ta pa kibra e rèkòrt mundial. Mi sa ku mi por yega tur esaki pa motibu ku awendia mi ta pará pega ku e gran atletanan ei ku mi sa atmirá. Nan no ta e héroenan intokabel mas. Nan ta atletanan meskos ku mi ku ta kompetiendo ku otro pa mira kual di nos ta esun mas velos”.

ARIES: Bo no tin pakiko di defendé bo akshonnan. Bo ta awor sigur di loke bo ke. E balor di bo personalidat ta e mihó arma pa sali dilanti i triunfá. 51,22,31.

TAURO; Promé di envolví bo mes den kualkier proyekto, buska respaldo di bo famia. Esei lo dunábu mas stabilidat emoshonal, loke ta hasi bida mas fásil. 23,49,08.

GEMINIS: Kambia e aktitutnan fatal i pesimista pa bo drenta den e kosnan bunita di bida. Kuminsá un kapítulo nobo ku bo mester kuminsá yen di balor i konfiansa den Dios.

KANSER: Ta parse ku pa hopi ku bo ta traha i forsa, nunka ta sufisiente. No broma ku tur loke bo tin ku hasi ni tampoko trata di komplasé ku otro. Abo promé. 16,05,04.

LEO: Loke ta bon pa bo, no nesesariamente ta bon pa otronan. Bo mester kuida hopi di e konsehonan ku bo ta haña. Prepará pa kambionan positivo. 15,30,06.

VIRGO: Pa awor bo no tin ningun interes di mira bida ku seriedat. Bo ke divertíbu i pasa bon ku amistatnan ku awor solamente ta mira bo banda superfisial, alegre i dibertido.

LIBRA: Pensa mas den loke ta kumbiníbu ku den loke bo ta gusta. Kuida bo plaka bon. Ser mas práktiko invertiendo plaka den kosnan ku solamente ta sirbi komo adorno.

SKORPION: Mantené bo optimismo den futuro. Kosnan transitorio ta yudabu aseptá lo inevitabel di kriterio di balansa na bo bida. 02,08,50.

SAGITARIO: Bo lasonan afektivo ta fortalesébu i bo ta sintibu hopi mas uní na bo pareha. Amistatnan nobo i algun di nan ta un tiki straño, pero bon hende. 12,10,27.

WILLEMSTAD – “No mester wak hende den e kaso aki. Laga nos wak i konsentrá riba futuro di e kompania Curaçaose Dokmaatschappij, CDM pasobra e ora ei nos ta haña un solushon”, asina diputado Eugène Rhuggenaath a bisa, na bispu di e reunion krusial pa nombra un direktor nobo pa e kompania.
Djabièrnè awor tin e reunion krusial pa tuma desishon riba un direktor nobo pa e kompania. Diputado Eugène Rhuggenaath a enfatisá ku su punto di bista a keda mesun kos.
Diputado Rhuggenaath no ta di akuerdo ku e kandidato ku awor aki ta riba mesa pa bira direktor di Curaçaose Dokmaatschappij.
Rhuggenaath, a pone un posishon skèrpi, esta ku e kandidato mas fuerte te ku awor Franklin “Chebu” Sluis, no ta aseptabel p’e debí na su pasado ku ta manchá ku un kondena di korte pa aktonan froudulento ku el a kometé.
Banda di esei, Rhuggenaath ta haña ku e kandidato aki no ta disponé di e konosementu nesesario di mundu naviero.
Rhuggenaath a ripití e posishon aki na diferente okashon den pasado i ketu bai ta para riba su punto ku e ta konsiderá un punto di prinsipio.
Rhuggenaath mes a lansa un proposishon pa sali for di e impase aki. El a proponé pa nombra un direktor interino ku e tarea spesífiko pa trese e kambionan nesesario den e kompania i pone e empresa aki riba e kaminda di progreso i kresementu atrobe. E direktor interino aki lo mester keda pa un tempu definí, despues di kua ta nombra un direktor definitivo.

WILLEMSTAD - “Ami a kere semper ku e aktual gobièrnu, partikularmente un partido ku semper ta pretendé di ke kaba ku kosnan tradishonal ku no ta kumbiní e pais aki, lo no praktiká loke nos konosé komo nepotismo mas. Pero mi mester konstatá, ku nepotismo ta mas grandi ku nunka den kompanianan di gobièrnu,” asina Gregory Damoen a bisa, relashoná ku e desaroyonan na Curoil.
Partidonan di oposishon a pidi un reunion públiko riba desaroyonan na e kompania Curoil. Esnan ku a firma e petishon ta Forsa Kòrsou, MAN i Niun Paso Atras.
Ta konosí, ku Konseho Insular di Kòrsou, ketu bai ta ku resès, pues no ta muchu kla ainda si gezaghèber lo konsiderá e asuntu aki di tal importansia, ku e ta dispuesto pa kibra resès i konvoká un reunion tòg.
Gregory Damoen a bisa, ku loke a sosodé na Curoil, kaminda tabatin negoshi den negoshi, ta simplemente inaseptabel.
“Pero tin un faktor mas importante ainda: nos no sa si loke a sosodé, no tabatin influensia riba e preis haltu ku pueblo ta paga aki ‘fo pa energia. Ta bale la pena analisá esaki i p’esei nos tambe ta boga pa un investigashon profundo,” asina ela bisa.
Damoen a mustra, ku e ke bai un paso mas leu: nos ta na fabor pa hasi un investigashon den tur kompania di gobièrnu, no solamente e kompania Curoil, el a bisa.
Pa Damoen, ta inkreibel tuma nota kiko ta pasando na e kompania. “Awor nos a bin tuma nota, ku a nombra miembronan di famia den e kompania i den Hunta di Komisario. Nos ta haña nos ku un diputado ku ta rekonosé abiertamente ku ta su famia el a hinka den e kompania. Nan ta biaha den ambiente di luho, nan ta keda na e hotèlnan di mas karu i sofistiká ku tin, anto pueblo ta sigui sufri. Ta esaki ta e ehèmpel di nepotismo di mas grandi ku nos por a konosé,” segun Damoen.

WILLEMSTAD - E aña aki tabata masha difísil pa konvensé yunan di tera maestro di skol ku ta biba na Ulanda, pa bin traha na Kòrsou. E motibu ta masha simpel: algun luna pasá, minister di Enseñansa di Ulanda a bai di akuerdo ku sindikatonan den enseñansa pa oumentá sueldo di e maestro di skol ku un suma supstansial.
E oumento aki a bira un hecho despues di negosiashonnan basta pisá ku a bai kaba te den oranan di mardugá algun luna pasá. Minister di Enseñansa a bisa na e okashon ei, ku e ta primintí e oumento aki, pa asina garantisá un mihó desaroyo di enseñansa. E sindikato di maestronan di skol sinembargo a bisa, ku nan ta kontentu, pero ku ainda no a yega kaminda mester a yega.
Kompará ku Kòrsou e oumento sinembargo ta keda un oumento grandi.
E salario di un maestro di skol ta asina atraktivo, ku ni maske e sirkunstansianan di trabou ta ménos faborabel na Ulanda ku aki na Antia, hopi maestro ta preferá di keda traha na Ulanda tòg.
Lisette van Lamoen-Garmers, a konfirmá ku Direktiva di Skol Katóliko a sinti efekto di esaki tambe durante e intento resien pa rekrutá maestro na Ulanda.
“Si normalmente nos sa haña manera un 20 maestro, e biaha aki nos no a yega mas leu ku un 15 asina,” ta loke el a bisa.
Sidney Justiana a bisa, ku di akuerdo ku e informashon ku e ta disponé di dje, e situashon no ta asina grave, en todo kaso no manera nos a konosé algun aña pasá.

AMSTELVEEN/ WILLEMSTAD - E kompania KLM-Air France a weta su ganashi baha ku mas ku 50 porshento den e promé kuartal di aña 2008. E motibu prinsipal pa e desaroyo negativo aki ta e hecho ku preis di kombustibel a subi barbaramente komo konsekuensia di oumento di preis di petroli riba merkado mundial.
Esei ta loke e kompania a anunsiá ayera.
Hustamente pa e motibunan ekonómiko aki, KLM-Air France a tuma e desishon pa redusí gastu ku no ménos ku 190 mion euro.
Ku esaki, e redukshon di gastu total pa aña fiskal 2008/2009 lo yega e montante di 620 mion euro. Den e proseso di redukshon di gastu, e kompania lo bai evaluá su rutanan, pa determiná kua ta sufisiente lukrativo pa e mantené i kua no. No ta kontemplando, a lo ménos ainda, pa mishi ku e servisio ku KLM-Air France ta duna. Di tur manera, no ta parse ku e pakete di medida ku e ta bai tuma, lo afektá buelonan pa Kòrsou.
E ganashi nèto ku e kompania a hasi ta di 168 mion euro, ku ta hopi ménos ku e 415 mion euro ku el a hasi den e promé kuartal di aña pasá.
Ta bon pa bisa tambe, ku den e último kuartal di 2007, e kompania a sufri un pèrdida. Pa loke ta volúmen di benta, mester bisa ku KLM-Air France den e promé kuartal di e aña aki a logra un márgen mas grandi pa un total di 6.3 mil mion euro.
O sea, ku no opstante stankamentu den ekonomia rònt mundu i no opstante ku preis di pasashi a bira mas karu pa asina purba kompensá oumento di kombustibel, KLM-Air France a transportá mas tantu pasahero.

WILLEMSTAD – Den fin di siman ku ta tras di lomba “De Tafelronde Curaçao” durante di un keirumentu ku boto ku miembronan i tambe eks miembronan i nan partner, a risibí “Henk Bruna Award”. Durante di e anochi festivo aki na Spaanse Water un delegashon di Fundashon Sòfbòl Soto, a keda sorprendí ku un chek na balor di 22 mil florin, pa por konstruí nan propio tereno di sòfbòl.
T’asina ku e organisashon “De Tafelronde Curaçao” a risibí e rekonosimentu aki pa motibu ku na kuminsamentu di yüni último, durante di un enkuentro anual nan a haña e grato notisia di tafelronde ulandes, komo e organisashon ku mas a presta, di ta aktivo i ku mas éksito pa temporada 2007/2008. E rekonosimentu aki por keda katalogá komo e premio ku mas honor. Tabata e presidente Deryck Levens ku a risibí e premio.
Durante entrega di e premio na “Tafelronde Curaçao”, e personanan Marwin Martina i Aishel Hooi tabata presente pa Fundashon Sòfbòl Soto. E chek na balor di 22 mil florin a keda rekoudá pa e organisashonnan di Hulanda i e otro mitar di e sèn aki na Kòrsou mes.
Fundashon Sòfbòl Soto no ta djis un organisashon, pero un fundashon ku tin un ròl hopi importante den bida soshal di hopi famia. Pues Tafelronde no ta hasi donashon so di métodonan finansiero, pero ta duna un man den realisá proyektonan ku nan a skohe.

WILLEMSTAD – Direktiva di Skolnan Katóliko ta partisipá ku Kolegio Dòdò Palm lo no por kuminsá skol djaweps awor sino te dia 18 di ougùstùs. Esaki ta debí na trabounan di konstrukshon. Tambe Direktiva di Skolnan Katóliko ta partisipá ku Kolegio Santa Famia su gruponan 3, 4 i 5 no por kuminsá djaweps awor, sino te djaluna 11 di ougùstùs.

WILLEMSTAD - E situashon den Kaya Junior Salas a normalisá. Esei ta nifiká ku no por drenta Kaya Junior Salas for di De Ruyterkade, dilanti Marshe Bieu.
Kaya Junior Salas (e kaya pabou di San Pedro Supermarket) semper tabata un kaya ku solamente por a sali di dje i subi De Ruyterkade.
Den kuadro di e trabounan ku tabata tuma lugá den sentro di siudat, a kambia e situashon temporalmente, pa aliviá tráfiko. Tráfiko por a drenta pabou di San Pedro Supermarket pa subi Pietermaaiweg i asina sali for di Punda. Esei awor no ta e kaso mas.
For di awor, e situashon a bai bèk manera e tabata originalmente.
Tráfiko den Prinsenstraat ku yega na e edifisio di Kámara di Komersio por lora sea na man robes subi De Ruyterkade òf man drechi subi Pietermaaiweg.
Ta pidi outomobilistanan pa tene bon kuenta ku esaki.

WILLEMSTAD - Dia 4 di ougùstùs tabatin apèrtura di e siman di introdukshon pa studiantenan ku a keda Kòrsou pa studia na UNA. E organisashon tabata tremendo, pero loke tabata hopi desapuntante ta e falta di medionan di komunikashon. “Nos ta hopi gradisido na e korant ku si a sòru pa tin un fotógrafo/periodista presente,” di akuerdo ku minster Leeflang.
El a sigui bisa, ku ta parse ku tin mas atenshon pa e studiantenan ku ta bai Ulanda, kaminda prensa ta presente na gran kantidat. Miéntras esnan ku a skohe pa keda studia den nan mes pais, na nos propio universidat mester di nos apoyo mes tantu.
“Studia den bo mes pais, tin un balor ekonómiko i un balor sosial hopi grandi.”
E ta splika ku e balor ekonómiko ta sinta entre otro den e echo ku e plaka ta keda invertí den nos mes pais.
Asina Gobièrnu Sentral ta invertí 13 mion den UNA pa supsidiá nos studiantenan. Banda di esei, e studiante mes tambe ta invertí den su estudio atrabes di finansiamentu di studio.
Un otro balor ekonómiko ta, ku e debe ku e studiante ta krea atrabes di e fiansa, ta keda hasí den propio florin Antiano. Pa e studiante ei ta muchu mas fásil pa traha na Kòrsou despues di su estudio, pasobra su debe ta na florin i e ta gana un salario na florin.
“Por sierto mi a duna instrukshon na Direktorado di Enseñansa, pa entamá e proseso ku Ulanda pa bini ku un solushon pa esaki.”
E di dos ventaha pa e studiante ku keda aki ta esun sosial. Presensia di hóbennan ku un nivel di enseñansa avansá riba nivel di havo/vwo ta studia riba nivel di UNA, ta duna un dinamismo na e sosiedat. Un ehèmpel hopi ilustrativo ta importansia di nos hòbennan pa deporte profeshonal i semi profeshonal.

WILLEMSTAD - UTS ta brinda tur su fiel klientenan di Chippie prepago Kòrsou i Boneiru e posibilidat pa gana sèn kèsh durante luna di ougùstùs den ‘Kanta Bingo ku Blinko’ hasiendo uso di e kampaña nobo: rekargá bo Chippie i haña SMS grátis.
Klientenan ta risibí e chèns di partisipá na e kampaña Kanta Bingo ku Blinko ora ku nan rekargá nan Chippie i haña SMS kompletamente grátis entre 5 i 28 di ougùstùs. E klientenan aki lo no risibí un lòt físiko ni digital, pero nan lo wòrdu registrá outomátikamente den e sistema pa asin’aki saka dos ganadó via tómbola digital.
Pues entre e klientenan aki, lo saka un ganadó dia 29 di ougùstùs via tómbola digital, pa partisipá den e kampaña di Kanta Bingo ku Blinko, ku lo tuma lugá ‘live’ dia 9 di sèptèmber na TeleCuraçao.
Rekargá bo Chippie pa bo tambe por risibí un chèns pa partisipá den ‘Kanta Bingo ku Blinko’ pa luna di ougùstùs.

WILLEMSTAD - Bùs di buki di Biblioteka Públiko Kòrsou a kuminsá bishitá bario di Janwe kada tres siman i ta para den kurá di misa di Janwe. Riba e pòtrèt por apresiá e promé klientenan ku a inskribí dia 5 di ougùstùs. Pa mas informashon tokante servisio di Bùs di buki por yama tel. 434 5259.