ORANJESTAD - Recientemente a tuma lugar entrega di e buki di sra. Monica Kock na despacho di Minister di Cultura. Gustosamente Minister Tai Foo Ramon Lee a ricibi e buki titula “Tuma mi man y cana cu mi” for di man di e autora, parlamentario Monica Kock.
Durante un encuentro ameno Minister Ramon Lee a intercambia riba varios topico cu sra. Kock y a termina cu e mandatario di cultura gradiciendo pa e gesto aki y deseando e autora hopi exito cu su buki riba mercado.

ORANJESTAD - Den luna di augustus, 31 persona a goza di les di Salsa, Bachata y Son Montuno den Scol di Arte. Pues por bisa cu e interes pa e tipo di bailenan aki den tanto hoben como adulto ta grandi.
Na september Frencel Geertruida ganador di diferente contest lo bolbe duna nos hendenan e oportunidad pa bin siña baila Salsa, Bachata y Son Montuno. E biaha aki atrobe Frencel lo traha cu un combinacion di hoben y adulto. E lesnan lo tuma lugar ariba dialuna y diabierna y e ora lo ta di 6or p.m. pa 8or p.m.
Pa medio di e comunicado ta informa tur interesado cu por pasa ariba dialuna of diabierna awor pa mas informacion o pa haci un “baile di prueba” libremente cu Frencel pa sinti un tiki e sensacion di “marca paso”. Hoben y adulto, Scol di Arte su portanan ta habri pa bin disfruta bailando dushi

ORANJESTAD- Directiva S.V. Bubali ta informa bario di Noord i Aruba ingeneral cu e fecha di mercado liber i BBQ ta hala pa dia 07 September pa motibo cu weganan a wordo cancela door di awasero i veld den mal condicion. I dia 07 september lo termina e torneo copa 65 anja di exsictencia cual ta wordo dedica na Sr. Juan Tromp mihor conosi pa Sr. Juan Kid.
Riba diadomingo 07 September lo bira un dia familiar i lo bai tin B.B.Q. cu ta optenibel na tur e hungadornan i mercado liber for di 10’or di mainta te cu 6’or di atardi, lo cobra un suma di Afl.25,00 pa tent.
Persona nan cu ta interesa pa haya un tent pa por bende su producto porehempel mata, bolo, obra di man …por pasa club pa inscribi of jama na un miembro di Directiva Ryan Figaroa cel 5661703, Gregory Fung-a-fat cel 7403388 of Omar Maldonado cel 5920130 pa mas informacion.
Directiva ta hasi un jamada na tur su fanaticonan di Bubali pa por yega e tereno i asina por celebra e 65 anja di exsictencia pa por corda e momentonan bunita den pasado di SV Bubali.

ORANJESTAD- Ayera Parlamento di Aruba a haya un presentacion den cuadro di proyecto Plan Nacional Strategico Integral Nos Aruba 2025. Durante e presentacion srs. Martin Hazell, Eric Kihlstrom y Arjen van den Berg a trese informacion valioso padilanti.
A trese diferente scenarionan dilanti cu ta ofrese oportunidad pa pa actividadnan comercial y economico cu lo por ser desaroya, studia y elabora na Aruba. YA tabatin varios workshops organisa.
Miembronan di Parlamento a trese nan preocupacionnan dilanti pa loke ta trata asuntonan social, ecologico, economico, tecnologico y politico.
Segun Presidente di Parlamento tabatin interes pa e presentacion aki. Ta importante di berdad pa nos pensa den ki rumbo nos ke bai cu nos pais. Importante ta alavez cu ora traha cierto plan esakinan por ser realisa.

ORANJESTAD- Diadomingo 14 di september tin oportunidad di pasa un rato divertido cu amigo, famia y conocirnan den e tremendo speurtocht of buskeda di tesoro monumental durante di Paseo Monumental. E buskeda ta inicia na e stacion di bus na San Nicolas durante e Paseo Monumental. Aki hobennan di tur edad por inscribi y participa pa siña tocante monumento y ademas pasa dushi y cu chens pa gana un di e 28 premio atractivo pa e diferente categoria di edad.
HOPI PREMIO
E premionan ta como lo siguiente y cortesia di: Cadeuabon di Plaza Bookshop, Antraco, de Wit en Van Dorp stores, Snorkel sail di Pelican, Sunset sail di Pelican, Red Sail Sports y de Palm Tours, Scubadiving trip di Atlantis, Half day pass na de Palm Island,Weekend stay na La Cabana y na Aruban Resort, Dinner for two di Radisson, Cadeaubon di Colombia Emeralds. Entre e colaborador voluntarionan, lo tin dos ticket pa Corsow di Tiara Air.
BUSKEDA DI TESORO MONUMENTAL (SPEURTOCHT)
Na 2006 tabata tin 120 mucha y hoben cu a participa na e buskeda di contesta preguntanan over di monumentonan. Nan mester a contesta 24 pregunta. E evento tabata hopi popular y a haya bon acceptacion entre e hobennan participante.
Pa 2008 atrobe lo organisa e buskeda aki y e biaha aki tin cu contesta 36 pregunta. Dos pregunta pa cada monumento. E formulario lo bo por ricibi na e stacion di Arubus na e tent di Paseo Monumental. E muchanan lo ricibi huntu cu nan formulario un potlood y e preguntanan lo ta ‘multiple choice ‘.
E promé pregunta ta bin di e texto largo riba e edificionan, esaki pa stimula un y tur pa lesa over di nos historia. E di nos pregunta over di e edificio ta algo cu nan mester rondia riba e edificio mes. Esaki pa stimulanan cu nan mester cana pasa tur edifcio.

ORANJESTAD –John v/d Biezen di partido AVP ta mustra den un comunicado di prensa, cu BBO ta causante di un inflacion grandi, cu por ser traduci na cresemento di pobresa y problemanan social aki na Aruba.
Pueblo cu a perde poder di compra lo sigui perde mas si gobierno mantene su actual maneho caotico. Negoshinan ta sigui haya nan mes den dificultad.
E poblacion a perde entrada y a cai atras den pago di nan fiansanan personal y entre otro hypotecanan di cas.
Esaki nan tabata e advertencianan cu partido AVP tabata trese padilanti y cu no a wordo scucha di parti di partido di gobernacion di MEP. Conviviendo cu e dolornan di pueblo, partido AVP, cu determinacion a cuminsa un lucha grandi pa purba para e implementacion di BBO y e deroche di placa di parti di Gabibinete Oduber 4.
Partido AVP a mustra den pasado cu e prijs di costo pa produsi awa y corriente tambe lo wordo afecta. Apesar cu no tin BBO ariba awa y electricidad e otro productonan cu WEB y ELMAR mester, si ta aumenta cu BBO cu consequencia cu prijs di awa y corriente tambe ta subi. Ora nos hasi un analisis di locual Gabinete Oduber ta haya na entrada na BBO y locual ta ser duna bek ta notabel cu e introduccion di BBO ta perhudicial pa pueblo, pues pueblo ta paga mas cu e ta ricibi na compensacion.
Consequentemente e pueblo ta bira mas pober y caha di gobierno ta sigui yena cu fondonan pa ser malgasta. Easaki ta e amargo realidad cu e pueblo ta bibando.
E compensacion di gobierno no ta yega. Banco Central a bati alarma pa e consequencianan cu e BBO lo a causa.
Tambe Raad van Advies a recomenda Gabinete Oduber pa no implementa e BBO.

WILLEMSTAD – Mama di e defuntu Ronarvey Franca, asesiná den Kaya Amatista, mes ta investigando morto di su yu. Segun e mama, Ministerio Públiko no a hasi nada pa solushoná e kaso. Entretantu e mes a kompilá tur dato relevante i ta na punta di solushoná e kaso e mes.
Tabata dia 3 di aprel último ku polis a haña e víktima bentá riba kaya dilanti di un outo, sin ta duna señal di bida. E tabatin alrededor di 12 heridá na su kurpa kousá pa bala prosedente di un arma di kandela. Mes ora rumornan a kuminsá sirkulá ku ta Marnol Bart lo a asesiná Franca. Mama di e víktima a bisa LA PRENSA, un dia despues di e suseso, ku si polis a detené Bart un dia promé ku e suseso, su yu lo no tabata morto. E mama a konta ku un dia promé ku e suseso, den oranan di mardugá, Bart a dal e un moketa den su kara. Siguiente dia algun hende a tira riba su outo ora el a pasa den Kaya Amatista, i ora el a hisa su kara pa wak ta ken, el a mira entre otro Bart.
Mama di e víktima a splika LA PRENSA ayera, ku Ministerio Públiko no ta investigando e kaso mas. “Fiskal Schoop ku ta atendé a kaso a bisami ku e aparato ku nan ta usa pa hasi investigashon tabata dañá i p’esei e investigashon a para. E fiskal a bisa mi tambe ku el a duna òrdu pa detené Bart i Clemensia i ku e no ta komprondé kon Bart a logra sali for di Kòrsou. Mi a komprondé ku Bart tin un dil ku O.M. i ku e tin ku haña sèn serka O.M. Ta p’esei nan a lag’é bai for di Kòrsou pasó e no tabatin ni pasport.”

Skina di Sòrti, awe djasabra 6 di sèptèmber di 2008, ta kuminsá ku deseá tur hende un bon dia. Un bon gobernante, ta preferá di saka su konklushon (sea pasobra su ideanan no ta konta ku sufisiente “draagvlak” òf pasobra ku su integridat personal i òf profeshonal, ta den konflikto ku lokual e ta pidi pa hasi) enbes di skohe e kaminda di ménos resistensia di laga e koriente hib’é den e direkshon ku e ta bai. Un otro karakterístika di un bon gobernante polítiko ta esun di respetá institutonan di kòntròl. Mi kier sa ku tin ku kana ku un flashlight pa buska nos bon gobernantenan òf mester sigui baha e lata enbes di insistí riba kalidat.
****
E instituto Defensor di Pueblo, a wòrdu instituí pasobra gobièrnu, gobernantenan i institutonan di gobièrnu ta malusá nan posishon di poder, lagando e suidadano ku un sentimentu di “machteloosheid”. Gobièrnu i gobernantenan i òf direktor di algun instituto gubernamental ta pone nan mes te hasta riba lei, neglishando veredikto (òf duna e interpretashon di nan kumbinensia) òf desprestigiando e mensahero enbes di aktua konforme espíritu di lokual ta wòrdu bisá.
****
Rònt mundu e Defensor di Pueblo ta asumí un posishon ku por aparentá di ta di tribi den bista di esnan ku a kustumbrá ku e posishon di poder ta spanta balente. E persona ku ta okupá e funshon di Defensor di Pueblo i tal bes hendenan denter di su despacho su eventual fayonan, no ta kita for di e kontenido i sigur e “strekking” di e relato ku Defensor di Pueblo a emití riba e manera ku gobièrnu a apliká e instrumento di destaho públiko. Ta un bèrdat ku na vários okashon ta argumentá i maniobrá den direkshon di un resultado deseá.

GINEBRA – KOI ta investigando e ganadónan di medaya di plata i bròns den tiramentu di martin den e Weganan Olímpiko di Beijing pa sospecho di drogamentu.
E bielorrusonan Vadim Devyatosvkiy i Ivan Tsikhan a tèst positivo pa restunan di testosterona despues di e final di 17 di ougùstùs, asina e agensia di notisia ruso Allsport a bisa djaweps.
Un komishon disiplinario di KOI lo reuní fin di luna pa atendé e kaso, asina e bosero di KOI, Emmanuelle Moreau, a bisa AP.
Federashon bielorruso di atletismo a bisa ku e no a risibí niun dokumento o konfirmashon di kualke resultado positivo di su atletanan.
Si nan resultá kulpabel di doping, tur dos lo keda deskualifiká i lo pèrdè nan medaya.
Devyatovskiy a ninga djaweps ku el a kometé violashon di doping.
E esloveno Primoz Kozmus a gana e medaya di oro.

NEWCASTLE, Inglatera – Kevin Keegan a renunsiá su kargo komo treiner di Newcastle djaweps despues di shete luna na e puesto.
Despues di un siman di negosiashon ku e hunta di direktor di e klup, Keegan a saka un komunikado bisando ku “no ta kedami otro alternativa ku di bai”.
Keegan tabata den retiro for di riba banki te ora ku Mapies a konvensé pa e dirigí e tim na yanüari. Pero e treiner a frustra pa su poko influensha den e transferensha di hungadónan.
“Mi ta di opinion di ku un tékniko mester tin e derechi di manehá i ku e klup no tin ku imponé niun hungadó ku e no ke riba dje”, Keegan a trese dilanti.
Esaki ta e di dos biaha ku Keegan a dirigí Newcastle, i su salida di e klup na 1997 tambe tabata meimei di un problema ku e hunta di direktornan.

WILLEMSTAD - Fundashon Sedreko ta koperá ku un proyekto di “Tènis Den Bario” ku ta tuma lugá tur djasabra mainta riba kancha Teofilo Cuales na Mundu Nobo.
E aktividatnan di “Tènis Den Bario” ta kuminsá 7’or di mainta i ta finalisá 10’or.
Tènis semper tabata un deporte hopi popular den e bario di Mundu Nobo i ku plaser Fundashon Sedreko ta organisá e lèsnan di Tènis pa muchanan di bario di Mundu Nobo ku ta kompletamente grátis.
E lèsnan di tènis ta na enkargo di sr. Hans Den Hartog i sr. Clinston Cijntje.

WILLEMSTAD - Fundashon Sedreko a wòrdu aserká pa sr. Jean Lauffer ku ta kordiná e aktividatnan deportivo ku tin na “Kinderoord Brakkeput” ku e petishon pa kontribuí ku materialnan deportivo pa tantu Futbòl komo Beisbòl. Fuera di esei tambe nan ta deseá un rekompensa pa e lider deportivo ku ta train e muchanan e dos deportenan.
E muchanan ta train tantu beisbòl, komo futbòl 4 ora pa siman.
“Kinderoord Brakkeput” ta alohá aktualmente pa 44 mucha hòmber di entre 6 pa 18 aña di edat.
Fundashon Sedreko pa koperá ku e bon desaroyo di deporte a tuma e desishon ku nan lo entregá tur e materialnan nesesario ku e muchanan tin mester i tambe lo tuma e “rekompensa” di e entrenadó na nan enkargo.

Sometimes Life comes at you with tremendous speed. It came at me on august 17-01. I was traveling with my family to Miami. On arrival I had severe chest pain. My family advised me to go to the nearest hospital in Miami. In the emergency room a Cuban doctor, Dr. Lamelas, a heart surgeon was called. I was under heavy sedation. Tests were done and I was told I needed immediate heart surgery. My family was in tears, I was under heavy sedation.
In the operating room the skillful hands of the surgeon went to work. In the recovery room I wanted to receive Holy Communion. Due to some misunderstanding a priest came to give me last rites!! I explained the situation to him and he understood. In between resting and trying to walk, I was watching T.V.
At first I could not believe what I saw. A plane was flying towards a tower and crashed into the building. I kept watching and a few minutes later a second plane and also crashed. I realized it was reality and tragedy.
But I had my own worries. All this is history now. However one of my daughters gave me some incredible information. They follow..
Nine eleven…September eleven.
Day of attack 9/11…..9+1+1=eleven
September 11 is the 254th day of the year…2+5+4=11
After September 11..there are 111 days left to end year.
119 is the area code to Iran and Iraq….1+1+9=11
Twin towers look like 11
First plane to hit was # 11.
New York was 11th state to be added to the Union.
New York City …eleven letters
Afghanistan… 11 letters.

ST. PAUL, Minnesota – E republikano John McCain i e demokrat Barack Obama a adoptá un strategia polítiko basá den e kambio djabièrnè, despues di a sali ku vitalidat di e konvenshonnan polítiko di nan respektivo partidonan i prepará nan mes pa kapta e votonan independiente.
Oranan despues di a aseptá su nominashon presidensial, McCain a manda un mensahe pa e-mail pa haña donashonnan, argumentando ku e i su kompañero di fórmula, Sarah Palin, ta pretendé di kambia Washington. E kandidato republikano a bisa ku e demokratnan “a rebahá nan mes mas di loke kualke hende por imaginá nan mes”.
E krítika parse ta referí na e anunsio di Palin e siman aki riba e embaraso di su yu muhé soltera di 17 aña. Palin, kende ta gobernador di Alaska, a bisa ku e rumornan publiká riba Internet riba su famia a oblig’é papia públikamente riba e embaraso di su yu. Palin a mantené su mes alehá di periodistanan i nan ta spera ku e lo kuminsá e trabou di kampaña e fin di siman aki.
Di otro banda, ekspertonan i komentaristanan ta opiná ku McCain i Obama lo debatí nan proposishonnan di kambio.
“John McCain tin un historial di lucha pa kambio”, Steve Schmidt a bisa, konsehero di McCain, na e kanal di televishon NBC.
Pa Obama, sin embargo, e palabra “kambio” ta un término bunita, un táktika di kampaña elektoral... e no tin sentido”, Schmidt a señalá

BRUSSELS – Ayera tardi ora lokal, anochi na Brussels, Bèlgika, a tuma lugá e kareda di 100m den e kompetensia Van Damme Memorial.
Wer tabata friu i ku áwaseru i tambe un bientu fuerte kontra –1.3 m/s dilanti 47.000 fanátiko e kareda aki a tuma lugá.
Hopi fanátiko tabata kier a mira e lucha entre Usian Bolt i Asafa Powell, huntu ku e sobrá koredornan riba e distansia di 100m.
Den e kareda aki tabatin partisipashon di sinku velosista di Jamaica entre e nuebe koredornan.
Esnan ku a partisipá na e kareda aki tabata Usian Bolt, Asafa Powell, Nesta Carter, Michael Frater i Mario Forsythe, tur di Jamaica. Tambe a kore Tavis Padgett di Merka, Kim Collins di St. Kitts & Nevis, Churandy Martina i Ronald Pognon di Fransia.
Bolt tabatin un “reaction time” hopi malu, el a sali último. Martina tambe no tabatin un bon “reaction time”.
Asafa Powell a sali bai laga tur hende, pero e pianan largu di Bolt na mitar di kaminda a bula pasa e grupo, alkansá Powell ku su pianan largu i gana di esaki ku tempu di 9.77 sekònde ku ta solamente 0.08 ménos ku e rekòrt ku el a pone durante di Weganan Olímpiko. Powell a sali di dos ku tempu di 9.83 i Nesta Carter na di tres lugá ku 10.07.
Na e di kuater lugá a sali Michael Frater ku 10.08, Travid Padgett a sali na di sinku lugá ku 10.15, Kim Collins na di seis lugá ku 10.22, Churandy Martina na di shete lugá ku 10.24 sekònde, Ronald Pognon ku 10.26 i Mario Forsythe ku 10.36 último.

Lorito ta yama tur hende un felis djasabra. Nos a bula, bula i bula i bai sosegá tempran. Pero nos a mira tempran anochi masha moveshon tur kaminda. WTC tabata yen, diferente happy-hour a haña nan hendenan.
****
Awe nos ta den ambiente di kuestioná diferente kos ku ta pasando. Nos a menshoná kaba e kaso di ayera na e kompania di Gobièrnu kaminda a yama e hende ku a selekshoná pa kaba di atendé tur kos pa despues para kos. Nos tin tur detaye e biaha aki si i no bin bisa nos ku kosnan no ta asina. Pa rèspèt pa e hopi fuentenan ku nos tin, nos no a habri afó ainda! Pero e kaso ta mahos! Manera Galan tabata bisa semper: keda pendiente!
****
Nos a mira e lista di nominado di Prensa Uní i Lorito a disidí pa no duna komentario. Nos no kier pa niun hende kere ku nos ta kore tras di niun premio. Un kos nos a pone semper nos dilanti: nos a kere ku ta ekselensha ta konta pero si nos mes komo prensa no por huzga ekselensha, anto ku nos ta bai imponé regla di ekselensha pa otronan?
****
Laga nos bisa esaki: nos sa ku nos ta bon; nos sa ku nos korant ta bon, nos sa ku nos tim ta bon. Pa nos ta esei ta konta! No ta pòrnada nos ta bisa ku nos ta e mihó korant di Kòrsou. Un biaha mas no esun mas popular (ainda) pero esun mas mihó!
****
Despues ku tur e dianan di fiesta di prensa aki pasa lo ta bon pa kuminsá tuma akshon kontra e situashon ilegal ku tin rondó di Prensa Uní. Nos ku ta traha den prensa ta kuestioná tur dia tur ilegalidat i falta di transparensha di masha hende i organisashon pero ora ta trata nos mes organisashon nos ta keda ketu!

WILLEMSTAD -- Refineria Isla a konfirmá awe mainta ku a para un gran kantidat di planta pa motibu di falta di awa i stom. “Debí na situashon krítiko di suministro di stom i awa (boiler feed water) na CUOC, ISLA mester a para gran parti di su unidatnan. Esaki ta enserá ku mas ku 80% di ISLA su operashon / produkshon a keda afektá. E parada di plantanan a keda efektuá entrante ayera nochi na manera bon kontrolá. E situashon aki lo por pèrdurá algun dia, sinembargo no ta premirá konsekuensia pa suministro di produktonan pa merkado lokal. Na momento ku e situashon na CUOC normalisá i ISLA tin garantia ku e suministro di stom i awa ta konfiabel, lo inisiá ku e proseso pa start up plantanan. ISLA lo hasi máksimo esfuerso pa minimalisá posibel inkombeniensia ku por presentá na momentu di start up, asina e ofisina di relashon públiko di Refineria Isla a informá.
Ta di tantísimo biaha e aña aki ku BOO ta krea problema pa operashonnan di Refineria Isla. Anteriormente e aña aki e situashon di BOO a krea un black-out na Refineria Isla. Despues di algun dia ora a kere ku e situashon a normalisá a surgi un di dos black-out na e kompania. Ta bon pa bisa ku ora para operashon di (parti) di un Refineria esei ta okashon daño di algun mion florin. E dos paradanan di e aña aki a kousa daño di den kareda di 12 mion florin na Refineria Isla.

WILLEMSTAD -- “Nos mester stòp di puntra pakiko? i kuminsá puntra pakiko nò?” Nos mester stòp di puntra di kon kosnan ta manera nan ta, i kuminsá puntra dikon nan no por ta manera den nos speransa i soñonan mas oudas”. Esei ta mensahe básiko ku miembro di gerensia di Maduro & Curiels’ Bank Ron Gomes Casseres a bisa ayera den su diskurso na apertura di aña akadémiko 2008/2009 di Universidat Nashonal di Antia. Gomes Casseres tabatin e aña aki e diskurso di órden na su enkargo. El a hasi esei por sierto na un universidat ku ta pasando den dianan un poko turbulento. Maneho di e universidat ta den konflikto serio ku diferente miembro di su staf akadémiko i ketu bai e konflikto ku CURISES no ta solushoná. E situashon aki sinembargo no a kita e animo i positivismo ku kua a habri e aña akadémiko nobo.
Den su diskurso di órden, konosí komo dies-rede, e bankero a referí na “Governance and Society”. LA PRENSA ta publiká un sinopsis di e puntonan mas importante ku a resaltá den e diskurso elokuente aki. “Awor ku nos ta na kuminsamentu di un transishon masha importante pa nos Pais, ta keda na nos pa disidí si nos ta desperdisiá e oportunidatnan ku esei ta presentá òf si nos ta hasi uso di e momentu transendental aki den historia pa krea un mihó Kòrsou pa futuro generashonnan. Pa hasi esei, nos lo mester mehorá, den hinter nos komunidat, kalidat di tumamentu di desishon i e proseso pa implementá (òf keda sin implementá) desishon, sin tene kuenta ku si esei ta den sektor públiko òf no-públiko. Un órgano di Nashonnan Uní ta definí ‘governance’ komo “e proseso pa tuma desishon i e proseso pa implementá (òf keda sin implementá) desishon”. P’esei, loke nos mester hasi ta drecha kalidat di governance den Gobièrnu, den kompanianan privá i organisashonnan den sektor privá - brevemente bisá, den tur organisashon kaminda ta tuma i implementá desishon. Ta den e konteksto ei lo mi referí na ‘good governance’. Governance i komunidat ta ligá ku otro di hopi manera. Tin di e maneranan ei ku ta presentá oportunidat pa ehersé liderazgo, miéntras otronan por interaktuá ku otro i resultá den un spiral negativo di kaida ku ta resultá den ménos, i no mas, bienestar. Den esaki e parti sivil di komunidat tin un papel hopi importante pa sigurá ku ta ataká malestar i preokupashonnan di nos komunidat efektivamente, hasta den kaso ku for di punto di bista polítiko por ta mas fásil òf mas oportuno pa tapa nan.

WILLEMSTAD – E siman aki e eksposishon “Canvas Eyes” di e artista argentino Silvina Ibañez a habri na Landhuis Bloemhof. Ibañez (1973) a nase na Buenos Aires, pero e ta biba na Mexico aktualmente. Su obranan ta sumamente narativo. Nan ta konta di un mundu di fantasia i ta mustra imágen personal di su mundu. Ta na esaki título di e eksposishon ta referí: Via su obranan e ke laga e espektador mira loke su wowonan ta kapta i lag’é drenta den su mundu masha spesial di fantasia.
E ta traha ku pigmento puru (usando e téknika di temperá) riba tela i e no ta hasi uso de leshi tradishonal, sino ku e ta krea un leshi di felpa, lokual ta produsí un efekto di tapeit di muraya masha partikular. Ta promé bia ku Silvina ta eksponé na Kòrsou. Promé ku esaki el a eksponé mas tantu na diferente museo i galeria na Argentina.
Por bishitá e eksposishon “Canvas Eyes” te dia 26 di sèptèmber entrante. Oranan ku ta habrí ta di djaluna te djabièrnè di 9’or di mainta te 4’or di atardi. Bloemhof ta situá na Santa Rosaweg no: 6 (entrada ta riba lugá di parker di “Tap Maar In”. Website: www. bloemhof.an

WILLEMSTAD – Su edat a subi, pero su lenga ta tur skèrpi ku tin. Elis Juliana, kurasoleño di pura sepa ku ayera tabata sentro di atenshon pa motibu di a haña e prestigioso distinshon Klavel di Plata (Zilveren Anjer). No ta pasa un momentu ku Òmpi Elis, manera ta yam’é kariñosamente ta dediká atenshon tambe na su “ruman” i amigu pader Paul Brenneker ku huntu ku Elis Juliana a hunga un ròl asina instrumental den preservashon di nos pasado den tur su fasetanan.
Ya kaba ayera LA PRENSA tabatin un portada relashoná ku e dia importante aki den bida di e kurasoleño multi-fasétiko. Awe nos tin mas detaye riba e aktividat ku a tuma lugá ayera i ku a haña bon kobertura den prensa lokal.
Den e mesun fin di siman ku Fondo kultural Prins Bernhard pa Antia Ulandes i Aruba aki na Kòrsou ta selebrá su di 55 aniversario, Gobernador Frits Goedgedrag na nòmber di Reina Beatrix a otorgá e artista multifasétiko Elis Juliana (81) e premio ‘Klavel di Plata’ (‘Zilveren Anjer’). Esaki a sosodé na Palasio di Gobernador den Fòrti den presensia di su famia, direktiva di e fondo lokal, direktora Adriana Esmeijer di e fondo na Ulanda i otro invitadonan. E idea pa pidi e fondo kultural Prins Bernhard di Ulanda pa laga señor Juliana bini na remarke pa e premio aki, a bini di e direktiva lokal di e fondo. Nan a deskribí den un karta ekstenso e diferente méritonan ku Elis Juliana tin riba diferente faseta di e bida kultural di su isla Kòrsou: pintor, históriko, arkeólogo, antropólogo, filósofo, outor, dokumentalista, etno-musikólogo i konosedó di folklor. Ku masha dedikashon el a logra dokumentá hopi artefakto i storia di Antianonan di pasado ku awor a keda wardá pa generashonnan nobo tuma nota di nan. Ta danki tambe na su esfuersonan a konservá konosementu di instrumentonan di Kòrsou di moda ku por toka nan te awor. Pa su obra i su méritonan el a optené na dos okashon e premio kultural Colá Debrot (na 1973 pa su obranan plástiko i na 1976 pa su obranan literario), e premio di Sticusa (na 1978) i e premio Chapi di Plata di Fundashon Pierre Lauffer (na 1986 pa su obranan di literatura). Na 2004 a toka n’e pa risibí e Krus di Mérito di teritorio insular di Kòrsou. Na 1990 a pone un busto di dje den Biblioteka Nashonal i na 2006 un mas na Kas di Kultura. Nan a traha un dokumental riba bida i trabou di Elis Juliana i na 1994 nan a dediká e Curaçao International Festival of Arts n’e. E lista di obra tantu diversifiká di Elis Juliana ta kubri un kantidat respetá di página. Originalmente Elis Juliana a haña e invitashon pa dia 19 di yüni e aña aki e risibí e premio prestigioso ‘Klavel di Plata’ for di man di Reina Beatrix den Palasio Noordeinde na Den Haag. Sinembargo, komo ku e laureato no ta hasi biahe largu mas, a disidí ku e lo haña e kondekorashon na su isla natal mes. Esei a kristalisá awe mainta den Fòrti kaminda nan a pasa filmashon di e presentashon di entrega di e premio aki na Den Haag i kaminda nan a para ketu tambe na e méritonan di e kurasoleño aki. Na final di e enkuentro awe mainta Elis Juliana na su manera a gradisí pa e honor ku a tok’é i el a inkluí su amigu defuntu pader Paul Brenneker den su palabranan di gratitut.