Gobierno perhudicando futuro di e exitoso proyecto cultural internacional aki

ORANJESTAD – Presidente di Fundacion FUNDARTE ta denuncia e hecho cu e popular Festival di Teatro Internacional di Aruba ta core peliger di no sigui mas.
Desde aña 1976 e festival aki ta ser organiza na Aruba, e asina yama “Festival Internacional di Teatro Aruba-FITA”.
Gruponan di teatro procedente di tur region na mundo a yega di participa den e evento cultural grandi aki cu cada biaha tabata conta cu alrededor di 150 participante di exterior, kendenan semper a regresa nan pais cu recuerdonan excelente.
Un variedad di obranan di teatro tabata ser presenta anochi pa publico y durante horanan di mainta pa nos estudiantenan.E gastonan semper a ser cubri pa subsidio y aporte financiero di algun organizacion.
Fundacion FUNDARTE den cuadro di Aña Nacional di Cultura a dicidi pa organiza e evento aki y na November 2007 a informa Gobierno cu e “Festival Internacional di Teatro” lo tuma lugar durante e dianan 1 te cu 4 di Oktober 2008.
E evento cultural aki ta aparece riba e calender cultural di Gobierno y tambe ta riba e website di ATA: aruba.com
Durante lunanan largo miembronan di Fundacion FUNDARTE ( tur boluntario) ta preparando pa e evento aki y a dirigi peticion na varios instancia na Aruba pa por ricibi e fondo necesario pa cubri e gastonan envolvi.
E gruponan di exterior tur ta paga na pasashi pa bin Aruba y tambe ta carga cu tur e gastonan di transporte pa loke nan tin mester pa por presenta nan obra. Nan tambe ta haci un sacrificio hopi biaha personal pa por bin Aruba, sin ta ricibi ningun forma di pago pa nan presentacion.Tur ta presenta gratis pa publico y pa skolnan.

 

ORANJESTAD- E conocido linguista señor Henry Habibe a haciendo un investigacion tocante literatura di Aruba cu sosten di UNOCA. Pa e trabou aki señor Habibe a haya bon cooperacion di entre otro Biblioteca Nacional.
Como cu señor Habibe ta haya necesario pa busca mas material pa fortifica su trabou, el a bishita Corsou tambe. Na Corsou el a logra haya diferente documento interesanto tocante e literatura di Aruba pa su investigacion.
Sinembargo e linguista investigador ta kere cu lo mester tin mas material na Aruba den forma di texto literario cu ta balioso pa su investigacion. Aki ta pensa por ehempel riba coleccionnan priva di ciudadanonan.
E epoca cu ta referi na dje ta di 1900 pa 1945 y ta busca sea material di prosa of poesia skirbi den cualkier idioma, con tal cu e ta procedente di autornan Arubano.
Tur persona cu por tin material den nan coleccion por pone esaki na disposicion di e investigacion dor di entrega un copia na oficina di UNOCA. Tur material ta contribui na e investigacion tocante literatura di Aruba den e epoca 1900 pa 1945.
Si no por saca copia, UNOCA mes lo haci esaki y lo debolbe material original na e doño mas pronto cu ta posibel.
E material por ta manuscrito, buki of cualkier otro tipo di documento. Si acaso bo tin duda di e epoca, autor etc. no preocupa. UNOCA lo percura pa e material yega cerca señor Habibe pa e por haci su investigacion.
UNOCA ta convenci cu e por conta cu ayudo y sosten di e comunidad Arubano pa un proyecto cu ta na beneficio di historia di nos literature cu ta parti di nos herencia cultural.

 
ORANJESTAD – Comision Think Green e siman aki introduci su proyecto di sciencia programa pa tuma lugar November benidero. Think Green science fair ta un intento pa incentiva nos hobenan pa yuda pensa riba e desaroyonan den temanan importante pa nos comunidad e ultimo añanan.
Fuentenan di energia convencional, manera petroleo, ta birando dia pa dia mas escaso y consecuentemente mas caro. Tur hende riba e isla aki ta sufri di e aumentonan den prijs di awa, coriente y gasolin pa meciona algun. Na Aruba nos tin e bendicion di tin fuentenan di energia cu na otro paisnan no tin. Nos solo ta uno ideal pa genera energia via di panelnan di solo. Nos biento ta supla, practicamente ta henter aña sin stop. Pesey mes nos comunidad en general tin di concientisa su mes cu e desaroyonan amplio den e area di generacion di energia alternativo.
Banda di e argumento di prijs di energia tin tambe e argumento di cuido di nos medio ambiente. Aki reciclahe por hunga un rol grandi den proteccion di loke nos genereacionan di futuro lo hereda. Tur e motibonan aki ta hunga un rol grandi den e iniciativa di comision Think Green pa organisa un science fair.
Mike Eman, lider di partido AVP a expresa cu e ta contento cu un iniciativa asina, pasobra ta importante pa nos hobenan concientisa nan mes ariba energia alternativo, medio ambiente y reciclahe. Tambe e lider di e partido a gradici e grupo grandi di hobenan cu tabata presente na e conferencia di prensa pa informa nan mes di e evento y tambe busca nan formularionan di inscripcion.
Drs. Rene Herde, na nomber di comision Think Green a duna un splicacion general di con e evento lo ta hinca den otro. E temanan cu a scohe como temanan di e science fair ta: 1) Energia Alternativo, 2) Reciclahe y 3) medio ambiente. E idea tras di e science fair ta pa participantenan crea un proyecto basa riba e tema cu nan scohe. For di aki nan ta haci un investigacion, experimento y finalmente saca un conclusion. Den november, durante di e feria scientifico mes, nan por expone nan proyecto den un presentacion amplio. Segun sr. Herde ta importante pa tur esnan intresa pasa mas liher cu ta posibel na Cas di partido pa un formulario di inscripcion pa asina nan segura nan mes di un lugar den e science fair.

 

ORANJESTAD- Ya caba scolnan ta drai casi un luna y keto bai problemanan (ta surgi y aumentando) den nos mundo di enseñansa ta acumulando. Colegio EPI su seccion di S & S a habri cu problemanan serio di personal. Netamente na e scol aki tin un situacion serio, cu ta tuma maestronan den a base di contract di un aña. Varios di nan ta den e situacion aki pa varios aña caba. Esfuerzonan di SIMAR pa coregi e inhusticia aki den deliberacion cu diferente instancia concerni tabata en vano. Awor a resta caminda pa corte. Lamentablemente e gobierno cu ta na mando awor no ta kere den dialogo pa soluciona problema. Nos y otro organisacionnan sindical por a constata cada biaha atrobe den curso di añanan. Den e caso di e maestra cu a haya su retiro na un manea incorecto y inhusto SIMAR no a logra haya contacto cu minister; awor e caso ta den man di abogado. Algo positivo pa enseñansa ta cu a habri un scol nobo na Kudawecha, cu segin informacion tin tur facilidad cu un scol normal mester tin. Hasta polis di bario ta aporta pa seguridad di e scol. Pero na unda e otro scolnan ta keda ? Nan seguridad ta cubri caba? Con a para cu e scolnan cu p.e tur ora cu Aruba haya yobida fuerte tin cu manda muchanan cas dor cu e scolnan ta bira mescos cu islanan den un lama? No mas cu siman pasa esaki a sosede atrobe.Dos scol so a bin den noticia, pero na cuanto scol mas mester a manda e alumnonan cas.
Biniendo bek riba e maestronan cu ta haya un contrato di duracion cortico, lo siguiente. E personanan aki no tin seguridad laboral y nan tin diferente problema pa nan posicion huridico. Entre otro nan no por drenta e fondo di pensioen (APFA) y no por haci un fiansa na banco o otro caminda. Ta cuanto maestro, cu prome cu mei 2005 a entrega peticion pa drenta fondo di pensioen APFA, te dia di awe no a recibi contesta algun ? Nan tin derecho di cai den e areglo bieu di pensioen y lo haya problema pa koop in nan añanan cu nan ta trahando.

ZIMBABWE, - E presidente di Zimbabwe, Robert Mugabe, i e lider opositor, Morgan Tsvangirai, a yega na akuerdo pa forma un Gobièrnu di unidat nashonal i saka e pais for di e krísis polítiko i ekonómiko den kua e ta aden.
E presidente surafrikano i mediador den e negosiashonnan, Thabo Mbeki, a anunsiá ku, despues di mas ku un luna i mei di negosiashon, a alkansá un akuerdo.
Lo firma e akuerdo djaluna awó na Harare.
Mugabe lo keda komo presidente i Tsvangirai lo bira e promé minister.
Poder kompartí
E akuerdo, ku pa promé bia fo’i dia di independensia di Zimbabwe for di Reino Uní na 1980, lo kondusí ku Mugabe lo kompartí poder ku el a ehersé su so pa 28 aña.
Mbeki tambe a señalá ku a yega na akuerdonan “den tur asuntu di e agènda di negosiashonnan”, ounke e no a presisá kon lo repartí e karteranan den e Gobièrnu di Union Nashonal Afrikano di Zimbabwe-Frente Patriótiko (ZANU-PF), di Mugabe, i e opositor Movementu pa Kambio Demokrátiko (MDC), di Tsvangirai.
E situashon di Zimbabwe ta kaótiko despues di e di dos buèlta di e elekshonnan legislativo, ku a tuma lugá 27 di yüni último.

WILLEMSTAD – Durante e akshon “Clean Up Saliña” ku Ministerio Públiko a tene den mardugá di 19 pa 20 di yanüari e aña akí, a konfiská 5 arma di kandela di kua un rifel pa yag. Tambe a konfiská 12 kuchú i 25 bala pa arma di kandela.
Den e artíkulo riba portada di LA PRENSA di ayera tabatin algu skibí di e kòntròlnan preventivo ku Ministerio Públiko a tene na 2006 i 2007. Por a lesa ku durante e kòntròlnan kondusí dor di un arsenal di funshonario polisial i hudisial no a haña arma di kandela. Sinembargo e artíkulo no a menshoná e úniko akshon di e aña akí ku a tuma lugá na yanüari. E akshon di yanüari tabata dirigí prinsipalmente riba poseshon di arma di kandela ilegal, arma blanku i droga. Ministerio Públiko huntu ku Marrechaussee, Polis, SKS, VKC, Duana, Wardakosta, Marina Real i Kuerpo di Bombero a partisipá na e akshon i segun O.M. e tabata eksitoso.
Durante e akshonnan di 2006 i 2007 a sera e barionan, kaminda e akshon a tuma lugá hermétikamente i a kontrolá tur hende ku kier a drenta òf sali for di e área. A kontrolá entre otro na Brievengat, Seru Papaya, Saliña (2x), Skalo, Koraal Tabak. Pa kita e impreshon ku ta sierto bario so a kontrolá, O.M. a deklará dado momentu: “E barionan ku ta skohe pa tene kòntròl preventivo, ta barionan kaminda sa tin tiramentu, lòsmentu di bala den laira i bendementu di droga. E informashon aki ta bin di Kuerpo Polisial ku ta hasi nan investigashon profundo promé ku nan konsehá Ministerio Públiko. Ta a base di informashon di Polis, Ministerio Públiko ta disidí pa tene un kòntròl den un sierto bario.”

FRANSIA / INGLATERA, - E bomberonan di Fransia i Inglatera awe pa di dos dia konsekutivo ta sigui lucha kontra e kandela na Channel Tunnel.
Te ainda a suspendé e servisio di trein supmarino, asina e minister franses di Transporte, Dominique Busserau, a informá.
E funshonario a bisa ku e no ta den kondishon pa antisipá ki ora lo reanudá e tráfiko na Channel Tunnel, ku tambe sa wòrdu yamá “Chunnel”.
E tùnel aki, será fo’i ayera tardi, ora un trùk transportá den un trein transbordador di 30 wagòn fo’i Inglatera pa Fransia a kima.
E vlamnan di e kandela a leshoná 14 persona, inkluyendo seis ku a inhalá huma.
Kandela ta un di e insidentenan mas grave den historia di e tùnel di 50 kilometer, habrí pa servisio públiko na 1994.
“Promé nos tin ku paga e kandela, nos tin ku saminá loke a okurí i ventilá e tùnel”, Busserau a bisa radio emisora Europe-1.
E motibu ainda ta deskonosí.

Foto: Bombero 1209

Bomberonan franses awe mainta trempan ta preparando pa sigui kombatí e kandela den “Channel Tunnel”.

Skina di Sorti, awe djabièrnè 12 di sèptèmber di 2008, ta kuminsá ku deseá tur hende un bon dia. E proseso di tomo di desishon pa ratifikashon òf nò di un konstitushon pa e komunidat oropeo no ta e mesun kos ku un proseso di tomo di desishon den kuadro di ehersementu di derecho di outodeterminashon. E promé tin di haber ku delegashon di outoridat for di un poder nashonal pa un organisashon kolektivo (supra) miéntras e di dos tin di haber ku futuro di identidat di un komunidat. E ekstremonan ta independensia (mantené outensidat kompletu) i integrashon (transformashon di identidat).
****
Esei ta nifiká ku partisipashon di e komunidat den e proseso di tomo di desishon pa lokual ta outodeterminashon ta preskribí. Bo no por lag’é pa e elenko ku ta okupá puestonan ehekutivo i legislativo hasi i deshasí. No ta meramente un asuntu di legislashon pero un proseso ku implikashon serio pa traspaso di herensia sosio kultural. E komunidat mas chikitu pa definishon ta kore e riesgonan grandi.
****
E manera ku ulandesnan ta fòrsa derechonan atkerí denter di kultura aheno na esun antiano riba e islanan antiano no a wòrdu atendé pasobra nos a guli e “oneigenlijk argument” ulandes ku denter di Reino derechonan fundamental mester por wòrdu ehersé riba tur e teritorionan. E argumento ta “oneigenlijk” komo ku derechonan fundamental pa lokual ta kalidat di bida no ta indeskriminá, pero ta wòrdu mará na e region denter di kual e teritorio geográfikamente ta pertenesé.

WILLEMSTAD – Gerensia di Insel Air a konfirmá e primisia ku LA PRENSA a publiká fo’i dos siman pasá, ku riba djasabra 30 di ougùstùs 2008 un di e avionnan di Insel Air, un Embraer Bandeirante, a kai ku su wil dilanti den un buraku riba plataforma. Esaki a sosodé na momentu ku e avion tabata regresando hangar for di su chekeo diario. E buraku mester tabata será i sigurá segun normanan internashonal i outoridatnan kompetente ta investigando e kaso.
Manera LA PRENSA a informá na e okashon ei, e aksidente aki a pone ku e avion a sufri daño basta grandi i dor di e suseso aki Insel Air ta konfrontando hopi problema ku su skèdjel. Management di Insel Air a kuminsá ku drechamentu di e avion, sperando e investigashon ofisial, ku lo determiná kulpabilidat di e diferente aktornan. E resultadonan di e investigashon lo wòrdu inkluí den e ramo di e gastunan total.
“Lástimamente, dor di e aksidente aki nos a haña nos ta despachá nos pasaheronan riba buelonan di otro kompanianan aéreo siman pasá i tambe e siman benidero. Esaki tin konsekuensia ku nos pasaheronan no tur ora por a keda akomodá na e momentu deseá. Por sierto, un situashon ferfelu i Insel Air ta hasiendo su máksimo esfuerso pa por akomodá tur su pasaheronan mas mihó posibel. Insel Air ta spera ku mas lihé posibel e avion ta bèk den operashon i nos ta pidi komprenshon i tambe nos ta pidi nos diskulpa pa e inkonbeniensia,” asina gerensia ta duna di konosé den un komunikado.

 

WILLEMSTAD- Diputado Marilyn Alcalá-Wallé ta stroi maishi, ta duna inisio na selebrashon di Siman di Kultura durante un seremonia eufóriko den Building Depot. E stroimentu di maishi a tuma lugá, djis despues ku direktor di Kas di Kultura mr. dr. René Rosalia a kibra e koko den porta di e negoshi. A skohe Building Depot komo negoshi ehèmpel ku ta selebrá 5 aña di Siman di Kultura i ta laga esaki por ta un yamada pa mas tantu negoshi por enbolbí nan mes den e siman aki. Ademas tabata okashon pa trese Zus di Plasa den e korteho kultura, miéntras ku Judith Rooi ta e baluarte ku Building Depot a skohe pa duna homenahe komo persona ehèmpel di perseveransia i alegria konstante. Vários mensahe a kompañá e seremonia, inkluso di Roderick Lucia, gerente komersial di Building Depot. Pa mas informashon por lesa página 28. (foto: Norwin Josepa)

 

WILLEMSTAD – Kámara Sindikal ta straña ku tin diskushon rondó di ehersisio militar ruso/venesolano. Mas straño ta ainda di e rumornan di último dianan sin para ketu ku den añanan ku a pasa tambe tabatin ehersisio merikano/ulandes ku niun hende no a reklamá esaki. Aparentemente niun hende no tabata preokupá di e tipo di ehersisionan aki. Awor diripiente ku ta trata di ehersisionan rusiano/venesolano tin hopi diskushon asina i ku Kámara Sindikal ta kere ku Gobièrnu Sentral mester paga bon tinu riba nan aktitut ku nan ta tumando.
Gobièrnu Sentral no mester lubidá riba e posishon geo polítiko i ta duna un leve impreshon ku ta purba di komplasé Ulanda i Merka lubidando e relashon entre Venezuela. No mester lubidá ku e ardu mayó di ekonomia ta e refineria i ku ta di hür ku PDVSA pa no daña e relashon aki. Mester por para ketu ku e relashon ku Venezuela tin muchu mas peso ku e relashon ku otro islanan inkluyendo Merka. Paisnan di Amérika Latina ta kana riba e trayektoria di unifikashon i esun ku ta liderá e proseso aki ta Venezuela.
Kámara Sindikal no ke bisa ku Kòrsou mester ta dependiente di Venezuela, pero no mester pèrdè for di bista ku e influensia ku Venezuela tin den paisnan Amérika Latino ku ta e fuente mas importante geo polítiko i tambe pa loke ta trata produktonan natural. Pa Kámara Sindikal un Kòrsou ku bon relashon ku Venezuela ta garantisá ekonomia kaminda por haña bahada di preis di kombustibel i komestibel.

 

WILLEMSTAD – Pa inisio di yanüari 2009 konstrukshon di Plaza Monarca lo kuminsá riba Rooseveltweg (kaminda ántes tabata Nooijen) na entrada di Mirla Plateweg. Ayera a pega e bòrchi pa anunsiá Plaza Monarca, ku tin tur e pèrmitnan korespondiente pa kuminsá ku e konstrukshon di e galeria komersial grandi. Den kòmbersashon ku Randy Neuman di New Winds Realty NV ta splika ku enbèrdat e konstrukshon lo bai kuminsá entrante yanüari 2009. E plannan ta pa e konstrukshon keda entregá pa e apertura ofisial na yüli 2009.
Segun Neuman e kompleho komersial aki lo bai tin 14 negoshi, kafetaria/restorant grandi meimei, miéntras ku parti patras lo tin 11 depósito. Plaza Monarca no solamente tin e unidat i depósitonan pa hür, pero tambe pa esnan ku ke kumpra kualke un di e unitnan. Den e kompleho komersial grandi aki lo bin Casa Monarca ku ta un negoshi pa bende tur loke mester pa kaba bo kas. Lo no bende material di konstrukshon, pero tur loke un hende mester pa kaba su kas.
Tur e artíkulonan aki ta eksklusivo i di karakter spesial. Komo ehèmpel Randy Neuman ta splika ku lo bende mosaiko bunita di marmer, ku lo bo por haña fásil den otro establesimentunan, jacuzzi, douche, kranchi moderno luhoso i otro tipo di artíkulonan luhoso. Tambe lo tin artíkulonan pa sala, komedor i kamber. E muebelnan ku lo bai wòrdu bendé den Casa Monarca ku lo konsistí di tres unit grandi lo ta di karakter luhoso. Lo tin hopi otro produkto mas luhoso pa esnan ku ke konstruí nan hogar ku karakter moderno.

WILLEMSTAD – Awe mainta, apertura ofisial di Siman di Kultura a tuma lugá den e establesimentu di Building Depot. Un entrada eufóriko/kultural ku damanan bentando pinda na suela pa diputado Marilyn Alcalá-Wallé por kana drenta. Djis su tras direktor di Kas di Kultura mr. dr. René Rosalia ku ta pasa pa kibra e koko na suela i diputado Alcalá-Wallé pa stroi maishi den e negoshi.
Zus di Plasa tambe den e korteho kultural pa por presentá Judith Rooi komo e baluarte ku Building Depot ta duna homenahe. Un seremonia bunita ku a duna e karakter kultural outéntiko pa duna inisio di Siman di Kultura den kua Building Depot ta selebrá pa di 5 aña konsekutivo.
Tabata un goso pa mira e forma ku e apertura aki a tuma lugá i ku ta duna sigur un empuhe pa e komunidat en bèrdat lanta nan kara i biba e kultura. Por a tuma nota di diskursonan di diputado Alcalá-Wallé ku a trese dilanti, ku no ta pòrnada a skohe Building Depot, ya ku ta trata di konstruí e pueblo i no kualke depósito, pero mas bien pa rebibá e kultura. Di su banda mr. dr. René Rosalia ta manifestá di ta kontentu, ku Building Depot komo negoshi ta duna su aporte pa hasi Siman di Kultura mas grandi i ta boga pa mas tantu negoshinan por sigui e ehèmpel aki.
Ya komo pastor Norwin Josepa tabata presente, a pidié pa habri den orashon i a para ketu riba e búskeda di identidat, ku a kita for di e pueblo. Elaborando riba e buki di Huesnan den kua e danitanan a kita nan for di nan herensia i manda nan den seru pa e aromeonan probechá di nan tera. Tambe den e mesun buki aki ta mustra, ku pa falta di un rei den Israel, e pueblo tabata hasi loke tabata mustra bon den nan mes bista. Pastor Josepa a pidi pa reflekshoná riba e historia aki, ku a krea divishon den e pueblo, despues ku a kita loke tabata pertenesé na nan i ku mester a buska kos di otronan pa hasi di nan.

JACQUES
Nervil Jean (trágiko)
A laga atras su kasá Duvella Louis Juste, yunan Islande, Michelouse, Nerva i Dyogens Jean Jacques. Akto di entiero ta djasabra 13 di sèptèmber for di El Consolador pa Parke El Consolador. Bishita 1or. Promé ku entiero tin un sirbishi 3.30or na El Consolador.

ROJER
Nicolas Wilhelm Domenico
Mihó konosí komo Tachi di Cobèrdè
A laga atras su yu Ideline Sambo-rojer, ñetunan Charine Trenidad-Rojer, Suylaica Henriquez-rojer, Surldric Rojer, Suzette Dorsiel-Leito, Chariselle Sambo, Quincy Sambo. Akto di entiero ta djaluna 15 sèptèmber for di El Señorial pa santana Sta. Maria. Bishita 1or. Promé ku entiero tin un respòns.

ADRIANA-PENSO
Theresita Luciana
Mihó konosí komo Sixta
A laga atras su ñetunan Valirie, Eduard i Normalijn Marchena. Rumannan Emilio Penso, Oritu Penso. Akto di entiero ta djasabra 13 di sèptèmber for di El Consolador pa santana Sta. Rosa. Bishita 12or. Promé ku entiero tin un respòns na El Consolador.

PAULINA-ROOSJE
Istella Domitila
Mihó konosí komo Stella
A laga atras su mama Catharina Roosje, yunan Reuchen Gums, Estrellita i Francy Daal, Ciroëlla Roosje i Sigmaro Colina, Robertico Roosje i Mercedes, German, Mylkène i Edyon Paulina, Roderick Paulina i Natania Molina. Akto di entiero ta djasabra 13 di sèptèmber for di El Consolador pa santana Parke El Consolador. Bishita 9or. Promé ku entiero tin un respòns 10.30or na El Consolador.

Prof. dr. Lorito ta yama tur hende un felis djabièrnè. Awe Lorito ta den un ambiente kultural. Nos ta biba nos kultura, pero kara habrí, nada di kara riba anto hasiendo mahos! Nos pik ta hari so!
*********
Realidat ta, ku Siman di Kultura a hasi impakto den e añanan ku nos ta selebr’é. E aña aki ta di 5 aña ku ta tene e aktividat aki i nos ta kontentu di mira ku e ta progresando mas i mas. Nos ta spera ku despues di e evaluashon di e promé lustro lo hinka den dje un komponente di mas profundidat i no selebrashon so. Nos tin sigur ku un hende manera René Rosalia lo kompartí nos opinion.
*********
Lorito a sigui e desaroyonan na UNA di serka i nos tin ku lamentá, ku e ambiente di armonia no t’ei mas. Nos ta spera ku e komishon spesial ku a lanta, lo pone e dedenan riba e herida(nan). Un rapòrt stret i duru tin mas efekto ku un rapòrt ku formulashon diplomátiko i multi-intepretabel. UNA ta demasiado importante pa sigui bai e direkshon ku e ta bayendo.
*********
Nos ta spera tambe, ku e studiantenan ta asumí nan responsabilidat i hasi UNA un lugá mas vibrante. Awor aki UNA parse un skol. Unda e diskushonnan intelektual i profundo a keda? Nos a topa un studiante di UNA e siman aki ku no por a formulá bon. Nos ta kere ku un di e garantianan pa éksito estudiantil ta bon formulashon den tur idioma relevante. Mester bai dediká atenshon na e aspekto aki pasobra, segun nos, hopi studiante ta faya pa e motibu aki.

 

WILLEMSTAD - E minister di Defensa di Venezuela, Gustavo Rángel Briceño a revelá ayera ku e konspirashon kontra di presidente di Venezuela Hugo Chávez di parti di ofisialnan haltu di forsanan armá di Venezuela, tabatin su rais na Boneiru. Den un konferensha di prensa ayera e general a bisa, ku miéntras e tabata papiando duna detaye di e konspirashon, tabata hasiendo trámitenan na Boneiru pa tumba Chávez. No tabatin komentario mesora na Boneiru riba e insinuashon aki. Outoridatnan militar a laga skucha un grabashon, den kua a kapta kòmbersashonnan di telefòn entre e general di divishon di ehérsito Wilfred Barroso, vise almirante Carlos Aloberto Millán i general di brigada di aviashon Eduardo Baez. Segun e grabashon, e funshonarionan militar haltu ta papia di kapturá Miraflores i pa hasi tur esfuerso pa kapturá “el señor”, un referensha ku segun e régimen venezolano ta referí na Hugo Chávez.
Chávez a anunsiá, ku e ta kibra relashon ku Merka, pasobra Merka ta tras di konspirashon aki. Ta di tantísimo bes ku Chávez ta bisa ku tin un konspirashon kontra dje. Nos tin mas detaye di e situashon na Venezuela den nos edishon internashonal di awe.

 

WILLEMSTAD – Entrante e aña aki dia 21 di òktober lo no ta liber mas. E konosido Dia di Antia ku a pèrdè tur atenshon den último añanan, mester sede pa un fecha nobo i konosí: 15 di desèmber. Entrante e aña aki lo ta liber na tur isla di Antia pa selebrashon di Dia di Reino. Remarkabel ta, ku riba e dia ei lo no ta liber na Ulanda (ainda) siendo ku Ulanda ta parti integral di Reino.
E desishon ta nifiká, ku esnan ku ta traha dia 15 di desèmber lo mester haña pago segun kriterionan ku ta válido pa un dia ofisial liber.
Dia 5 di yüli e aña aki Staten di Antia a disidí pa hasi dia 15 di desèmber Dia di Reino. 15 Di desèmber 2008 tabata e fecha nobo pa alkansá e kambionan estatal na Antia, pero awor aki ta papiando di promé di yanüari 2010. Loke si ta programá pa e dia ei ta un Konferensha di Mesa Rondó ku lo evaluá e proseso manera ta tumando lugá awor aki. No tabata masha kla si e konferensha aki lo sigui riba e dia programá.
Den pasado ya kaba dia 15 di desèmber tabata un dia liber relashoná ku firmamentu di Statüt dia 15 di desèmber 1954. Despues ku a bin un referèndem i pueblo a skohe pa restrukturá Antia, a disidí pa hasi e fecha di e referèndem aki (21 di òktober) un dia liber komo Dia di Antia. Sinembargo e proseso di restrukturashon di Antia a bira un frakaso kompleto. Den último añanan sinembargo no tabatin masha ánimo mas pa selebrá Dia di Antia, por sierto ni den seno di gobièrnu di Antia. P’esei no tin masha resistensia pa e kambionan ku a proponé pa entrante e aña aki dia 15 di desèmber ta un dia liber. Por sierto ku dia 15 di desèmber e aña aki ta riba un djaluna.

WILLEMSTAD – Hunta di Komisario di Curoil a konfirmá awe, ku Curoil no por a entregá dokumentunan klave riba e investigashon di e kaso Toko den Toko na investigadónan. Esei a kousa un tardansa den e investigashon ku ta tumando lugá na e kompania, relashoná ku transakshonnan kuestionabel. No ta sali na kla si miéntras tantu e investigadónan a logra kapta e dokumentunan si òf no, òf si nan a sigui dal bai numa, hasiendo nan mes investigashon sin e dokumentunan.
Hunta di Komisario a informá awe mainta, ku pa otro siman por spera e promé konklushonnan den e kaso di Toko den Toko na Curoil. Den kuadro di e investigashon aki lo tende tambe direktor di e kompania Hensley Capella, asina un komunikado distribuí via di Curoil ta bisa. E komunikado no ta bisa kiko ta status di e direktor di e kompania Capella ku ta ku fakansi i segun prensa lo regresá trabou djaluna awor. Hunta di Komisario a konsiderá ku ta nesesario pa Capella bandoná su puesto temporalmente den kuadro di e investigashon.
Huntu di Komisario ta bisa, ku dia promé di ougùstùs 2008, a duna enkargo ku karakter di urgensia na Forensic Services Caribbean pa hasi un investigashon profundo i detayá pa determiná eksaktamente kiko a bai robes den Curoil NV pa loke ta trata e transakshonnan ku RCM Capital Holding. “Na inisio di e investigashon Forensic Services Caribbean a splika, ku ta difísil pa bisa den tipo di kasonan asina aki, bisa delantá kuantu tempu eksaktamente lo dura promé ku produsí un rapòrt final. A palabrá, ku lo duna e investigashon aki prioridat haltu. Durante di e investigashon a resultá, ku Curoil NV no por a entregá/presentá sierto dokumentonan klave pa e investigashon. Esaki a okashoná un tardansa ku no tabata premirá. Den kuadro di e investigashon aki, Forensic Services Caribbean lo tende tambe e direktor Gensley Capella”, asina e komunikado ta bisa. E manera ku e komunikado ta formulá ta indiká, ku ainda esei no a tuma lugá.

 

WILLEMSTAD – E polisnan ku ta hiba e maneho di 0-Toleransia a bai awe mainta na un kas den Tortolaweg. No ta konosí kiko eksaktamente tabata motibu di e mobilisashon. Ora nan a yega na e sitio, nan a listra den kas i tambe den dos kònteiner ku tabata den e kurá di kas. Informashonnan no konfirmá pa polis ta indiká ku a lokalisá algun bala pa arma di kandela. No ta konosí si tabatin detenshon den e kaso akí ni tampoko si tabatin hende na e kas. Durante e listramentu a hasi uso di e kachó di polis ku ta detektá droga. Polis tin tambe un kachó ku nan ta usa ora tin ku detektá presensia di arma di kandela. Ultimamente a hasi uso di e kachónan akí na vários okashon i ku éksito. Manera a kustumbrá kaba ora 0-Toleransia ta bou di guia di e polis Abrahamz, awe atrobe el a sera e sitio pa fotógrafonan prensa, riba un distansia hopi grandi.

WILLEMSTAD – Servisio di Registro Sivil i Elekshon, mihó konosí komo Kranshi ta partisipá ku aworakí e proseso di naturalisashon 2008 a drenta den su siguiente fase.
Manera ta konosí e periodo kaminda por a inskribí pa apliká pa e proseso di Naturalisashon i Eksamen 2008 parti 1, a terminá dia 29 di ougùstùs último.
Un total di aproksimadamente 1700 hende a inskribí pa bin na remarke pa haña e nashonalidat Ulandes.
Despues di un proseso di ‘screening’ intensivo (kaminda ta kontrolá e persona su petishon), aworakí Kranshi ta den e fase kaminda ta yamando e personanan ku a haña un konseho positivo i ku alabes ta bini na remarke pa pasa e promé parti di èksamen den kuadro di e proseso di naturalisashon.
Ta trata akinan di aproksimadamente 603 persona.
Pa loke ta trata e personanan ku no a bini na remarke, esta ku a haña un konseho negativo, Kranshi lo manda un karta pa nan na kas.
Den e karta akí e personanan lo haña un splikashon dikon nan a risibí un konseho negativo.
Loke por bisa ta, ku den mayoria di e kasonan akí e pèrmitnan di estadia no tabatin un base kontinuo i esaki tabata motibu pa duna un konseho negativo.
Ademas Servisio di Registro Sivil i Elekshon kier partisipá na e personanan ku a risibí un konseho negativo, ku nan no mester bai traha e promé parti di e èksamen ku lo tuma lugá den luna di novèmber próksimo.