WILLEMSTAD - E kaso di desaparishon di e dama ulandes Marlies van der Kouwe i e nesesidat pa Ulanda pa manda eksperto pa yuda den su búskeda, ta un ehèmpel klásiko pakiko ta asina importante pa kuerponan polisial di paisnan den Reino traha huntu.
Esei ta konklushon di sekretario di Estado ulandes pa Relashon den Reino Ank Bijleveld. Bijleveld a bisa esaki den un entrevista ku koresponsal di Radio Nederland Wereldomroep. Bijleveld, manera ta konosí a papia ku outoridatnan hudisial di e isla, responsabel pa e investigashon.
El a papia ku loke el a yama e “driehoek” ku ta kondusiendo e investigashon, ku ta gezaghèber di Boneiru Herbert Domacasse, fiskal David van Delft i hefe di Kuerpo Polisial di Boneiru John Schagen.
Bijleveld a probechá di e okashon pa ekspresá su kombibensia pa e situashon eksistente rondó di desaparishon di Marlies van der Kouwe. E situashon ta ferfelu i mi ta kontentu ku Ulanda ta yudando, asina Bijleveld a agregá.
E sekretario di Estado ta kontentu I satisfecho ku e forma ku e investigashon ta kanando, asina el a duna di konosé. Tur kos ta mustra ku e investigashon ta bayendo bon, Bijleveld no kier a bai den detaye di e kontenido di e investigashon mes, algu ku e no a konsiderá étiko pa hasi.
Tampoko el a komentá riba e krítika ku tabatin den e dianan ku a pasa, den sentido ku polis lo a tarda pa bati alarma grandi ora e kaso a bira konosí i ku esei a pone ku un dia i mei balioso a bai pèrdí.
Manera ta konosí, Partij voor de Vrijheid, ke pa Ank Bijleveld splika Tweede Kamer por eskrito, kon bin ku ta despues di un dia i mei numa ku e damita a disparsé, a bati alarma grandi, poniendo asina ku un dia i mei balioso a bai pèrdí. Den e mesun karta ei, Bijleveld mester splika tambe kon e investigashon ta kanando, si e ta kanando bon. Bijleveld a atmití ku e parti aki no tabata den su programa, pero ku el a konsider’é tòg basta importante pa duna atenshon na dje.

WILLEMSTAD – “Diputado Miek Willem no tin nada di bai hasi na Washington. Ta minister di Finansa ta esun ku por representá pais Antia”, asina lider di partido MAN Charles Cooper a deklará.
Na kuminsamentu di e luna aki tin e tradishonal konferensha mundial di Fondo Monetario Internashonal (IMF) na Washington. Ta trata di e reunion anual di IMF i Banko Mundial ku ta programá pa tuma lugá entre 11 pa 14 di òktober benidero. Minister di Finansa drs. Ersilia de Lannooy i diputado di Finansa Mike Willem ta esnan ku a keda apuntá pa asistí na e konferensha aki.
Segun De Lannooy, e ta probechá di su presensia na e enkuentro aki pa interkambiá pensamentu ku outoridatnan finansiero riba e trayekto ku ta tumando lugá awor aki pa yega na un servisio di impuesto nobo. De Lannooy ademas lo topa ku minister di Finansa si Ulanda Wouter Bos. Pa lider di M AN Charles Cooper sinembargo, e asuntu aki no ta korekto.
“Mi ta kere ku nos por papia fásilmente di un ‘snoepreisje’ pa diputado Mike WIlem aki. Realmente mi no ta weta niun balor agregá den su biahamentu pa Washington pa partisipá,” asina Cooper a bisa.
E lider di MAN a mustra ku ta paisnan ta partisipando na e konferensha. Esei ta nifiká den nos kaso ku ta pais Antia ta esun indiká pa asistí.
“Mi no ta mira kiko diputado Willem ta bai hasi”, Cooper a insistí. Cooper ta haña ku su punto di bista ta ser fortifiká pa e hecho ku diputado di Finansa di otro islanan di Antia no ta partisipando na e konferensha aki.

WILLEMSTAD – “Mi partisipashon na e konferensha di Fondo Monetario Internashonal debidamente tin su balor. Nos ta antisipando riba e momentu ora Kòrsou bira pais Outónomo den Reino”, asina Mike Willem, diputado di Finansa di Kòrsou a deklará.
Di e forma aki tambe el a refutá e akusashon di lider di partido MAN Charles Cooper, den sentido ku Willem, pa di dos aña konsekutivo ta partisipando na loke por denominá komo un “snoepreisje” pa Washington. Willem a bisa ku esei ta interpretashon di Cooper, pero ku e, ta duna e biahe aki un otro balor. Nos tur sa ku islanan di Antia ta den proseso di desmantelashon. Na momentu ku esaki kristalisá, lo tin vários entidat nobo, entre otro kaminda Kòrsou lo bira pais Outónomo den Reino.
Esei naturalmente ta kambia e situashon kompletamente. Awor aki t’asina ku Kòrsou no por presentá komo un pais, pasobra e ta forma parti di Antia i ta Antia ta e pais ku mundu ta dil kuné. Pero nos ke antisipá riba kos: nos ke kana dilanti, kaminda Kòrsou un dia lo mester haña su status di pais outónomo. Anto e ora ei nos ta prepará kaba pa partisipá na e enkuentronan di IMF, Willem a bisa.
Segun Mike Willem, ta bin aserka ku un enkuentro asin’aki ta un lugá por ekselensia pa topa ku mandatarionan finansiero di otro pais, ku normalmente bo no ta haña chèns di interkambiá pensamentu ku nan. Willem a bisa ku un otro bentaha ta, ku aparte di e konferensha mes di IMF, tin posibilidat pa partisipá na diferente seminario ku den hopi kaso ta masha útil pa kualke pais.

WILLEMSTAD - Polis a kore ku un grupo grandi di antiano trafikante di droga ku durante basta luna tabata okashoná molèster na Stationsplein na Eindhoven.
Iluminashon skèrpi riba sitionan ku tabata hopi skur, instalashon di kámara di vigilansia i tambe kòntròl èkstra di patruyanan polisial a hasi nan trabou, asina Rob van Gijzel, alkalde di Eindhoven a bisa, kontestando preguntanan di miembronan di konseho municipal di e siudat.
Algun luna pasá, un grupo di antiano a yega Eindhoven prosedente di Rotterdam. E grupo aki, prinsipalmente den oranan di anochi i mardugá tabata okashoná hopi molèster, tabata kulpabel na aktonan kriminal i tabata krea un esfera di insiguridat den e área na Stationsplein. T’asina ku e plèki aki ya tabata konosí komo un lugá notorio, kaminda bo ta haña trafikante di droga, adiktonan, hendenan ku ta kana rònt sin pariba ni pabou i otro klase di delinkuente.
“Dado momentu, kos tabata parse manera kos tabata bai sali for di man”, asina Van Gijzel a bisa. E kos a bira asina alarmante, ku mester a laga funshonarionan ku ta atendé ku e lei di enseñansa obligatorio atendé ku vários hóben menor di edat ku tabata meskla den e grupo aki.
Por sierto ku a detené i sera tres trafikante di droga mayor di edat, pa un periodo mas largu. E grupo di mas o ménos 30 antiano a ser señalá un tempu kaba na Brabant. Ta parse awor ku e aktividatnan di trafikashon di droga a muda pa Helmond, asina Van Gijzel a indiká.

Luna di òktober luna di konsientisashon riba kanser na pechu

WILLEMSTAD - Awe 1 di òktober, rònt mundu organisashonnan, ku ta traha den kombatimentu di kanser na pechu ta uni forsa, pa durante henter luna di òktober dediká esaki na amplia nan informashon riba e kanser na pechu. Dje forma aki nan ke purba den un manera spesial, pa konsientisá tur hende muhé, pa hasi nan tèstnan rutinario i laga hasi un mamogram. Mas tempran detektá e malesa aki, mas lihé i mihó por trat’é. E aña aki ta di dos aña konsekutivo, ku Prinses Wilhelmina Fonds ta lansa un kampaña masivo di informashon i konsientisashon.
Komo parti di su kampaña Prinses Wilhelmina Fonds tin dos proyekto ku lo wòrdu ehekutá. Un di nan ta tokante “Informashon na Skolnan Sekundario” i e otro ta un mini simposio spesialmente pa pashèntnan ku ta den komienso di nan tratamentu. E tema lo ta “Un Estilo di Bida Saludabel pa Pashèntnan di Kanser na Pechu”. Pa kompletá e parti informativo den luna di òktober, lo bai tin vários charla na radio i televishon riba e tópiko aki dor di spesialistanan, miembronan di Fundashon Sinta Ros (ku lo konta nan eksperensia ku kanser na pechu i tambe dor di Prinses Wilhelmina Fonds mes.
Programa di Informashon pa Skolnan Sekundario
Via di e programa aki, Prinses Wilhelmina Fonds ke trata na informá i konsientisá nos hóbennan for di tempran tokante e malesa di kanser na pechu. A opta pa kuminsá ku skolnan sekundario i kada skol lo risibí un pakete di informashon, ku ta deskribí i trata e malesa kanser na pechu. E idea ta pa e maestronan diskutí i splika e informashonnan aki na nan alumno. Esaki por sosodé den forma klasikal ku guia di Prinses Wilhelmina Fonds. E skolnan lo mester trese e informashon risibí bèk den un forma di un obra di nan preferensha. Esaki lo wòrdu filmá i uzá komo material di informashon di hóben pa hóben. Prinses Wilhelmina Fonds i personal di “Fundashon Sinta Ros” lo duna e maestronan guia den esaki. Ya kaba e proseso di entrega di material ta tumando lugá i ta spera ku pa fin luna di òktober/novèmber nos hóbennan di skolnan sekundario a pasa den e proseso di informashon aki.

WILLEMSTAD - Resientemente diputado Anthony A. Godett a bai di akuerdo pa laga CBS (Centraal Bureau voor Stastistiek) hasi un konteo (telling) bou di piskadónan. Esaki a tuma lugá despues di a sinta repasá e preguntanan ku mester wòrdu hasí i tambe haña e garantia, ku lokual risibí for di e piskadónan komo informashon ku esakinan no ta wòrdu traspasá pa niun otro instansha. Tur esaki den kuadro di e Statistiekwet!
Ta bon pa informá ku na aña 2007 ya kaba Bestuurscollege a bai di akuerdo pa un konteo (telling) agrario pero a disidí pa hasi esaki tambe konhuntamente ku esun bou di e piskadónan e aña aki mes i no warda te na aña 2009. CBS lo enkuesta mas òf ménos 2000 persona / instansia ku ta registrá na servisio LVV.
Gastunan total di e konteo (telling) aki ta naf. 111.698,-. ( 2007 naf. 98.300,-. + 2008 naf. 13.398,-. gastu adishonal) i ku esaki mester wòrdu pagá na CBS ku ta hasi uso tambe di kolaboradónan freelance pa e tarea aki.
For di aña 1980 un ehérsito asin’aki a wòrdu hasi bou di kunukeronan. Servisio LVV insidentalmente a hasi konteo (telling) pero mayoria biaha ku un propósito spesífiko òf dirigí riba un grupo spesífiko.
Ku e konteo (telling) aki por hasi entre otro influensia riba e maneho agrario i kaminda ta nesesario aktualisé i duna guia. Tambe ku e informashon risibí, esaki mester yuda koperá pa risibí konosementu i informashon aktualisá for di e sektor i kontesta obligashonnan internashonal.

WILLEMSTAD - Segun sra. Geselle Rosaria – Coffi, Fundashon Nos Grandinan ta traha tur dia 24 ora pa dia mes i 7 dia pa siman na bienestar di nos grandinan. Tantu Kòrsou komo mundu kompletu ta embehesiendo. E grandinan di mañan ya kaba a nase. Kiko nos ta warda ariba pa kuminsá duna 100% atenshon na nos 60+? Falta hopi mas ainda. Nos grandinan ke sinti ku nan ta un parti klave den nos komunidat (e komunidat ku nan a yuda konstruí) i no riba un dia so pa aña. For di ocho aña pasá, a kuminsá un lucha fuerte pa pone nos grandinan den spotlight pa asina nan haña e atenshon i lokual nan tin derechi riba dje. A dura un poko pa nos grandinan sinti nan na kas, pero awendia, dor di lucha i motivashon konsistente di Fundashon Nos Grandinan, nos grandinan ta sinti nan mas apresiá—kon ku nos wak e, nan ta hala rosea, pues nan tin bida i nan ta konta debidamente meskos ku kualke otro merkado. “Nos mester ta konsiente tambe ku despues di Papa Dios, na mundu ta nos grandinan. Pues laga pa awe ta un dia pa esun di mas chikí te esun di mas grandi, gobernantenan i komèrsio kompleto, reflehá riba e proseso di embehesimentu, ku lo yega pa kada un di nos. Na nos grandinan, pasa un dushi dia i fin di luna nos tin kos grátis na kaminda planiá pa tur, pero tur hende riba 60 aña,” asina Geselle Rosaria–Coffi di Fundashon Nos Grandinan ta finalisá bisando.

WILLEMSTAD – “Si mi mester hasié di nobo, lo mi bolbe hasié. Lo mi hasié pa nos isla (pais)”. Na palabra gezaghèber di Kòrsou, Lisa Dindial ku a kumpli 8 aña na e funshon aki. Ta e mandatario femenino ku mas a keda konsekutivamente na un puesto ehekutivo den nos pais.
E mandatario ta mira bèk riba e último añanan ku masha satisfakshon, ounke e mes a remarká, ku den e 8 añanan el a eksperensiá 15 kambio den gobièrnu di Kòrsou. El a traha ku 6 diferente Gezaghèber interino i 4 Hefe di Polis diferente (siendo Hefe Lokal di Polis).
Dia Miguel Pourier komo minister presidente a aserká sra. Dindial 8 aña pasá pa e asumí e posishon, e no a basilá niun momentu. “Mi tabata kla pa un reto nobo”, asina e mandatario a bisa. E tempu ei el a kai den bista di esnan ku mester a tuma un desishon pa nombra un Gezaghèber nobo pa e forma efisiente i metódiko ku el a funshoná na Eilandsontvanger.
Riba e pregunta kiko e ta konsiderá éksito di su trabou, sra. Dindial a bisa, ku ta e étika haltu ku e ta traha kuné. “Mi no ta komprometé mi étika i ademas mi ta para pa regla. Serka mi no tin asuntu di hasi wega”, asina e mandatario a bisa. Un investigashon di integridat ku a hasi resientemente den Gobièrnu a mustra ku tin un konfiansa enorme den e integridat di e mandatario. 3 Di kada 5 persona entrevistá tin konfiansa den dje, un porsentahe masha haltu kompará ku tur otro hende den funshon serka Gobièrnu. “Esei ta un indikashon kla, ku hendenan ta pèrsibí mi trabou i mi ta satisfecho ku esei”, asina sra. Dindial a bisa.

WILLEMSTAD – Banko Sentral di Antia a manda un kuestionario na institushonnan finansiero di Antia relashoná e krísis finansiero aktual. LA PRENSA a optené un kopia di e diferente preguntanan ku e instituto ta hasi na tur banko i otro instituto den un karta ku a bai e siman aki ku e petishon pa kontestá e petishon urgentemente.
Mañan minister di Finansa, Ersilia De Lannooy lo tin un reunion ekstraordinario ku Staten di Antia relashoná ku e materia aki. Pa e reunion aki a invitá tambe minister di Asuntunan Ekonómiko, Banko Sentral di Antia, Fondo di Penshun di Antia i un eksperto di penshun di gobièrnu. Mas i mas ta drenta e realisashon ku e krísis finansiero tin su impakto na Antia tambe ku tin komersio importante ku Merka. Di parti di outoridatnan, nan ta rechasando e idea ku a balotá e impakto i no a aktua na tempu. Ademas nan ta rechasá tambe di a manda señal konfuso i konfliktivo riba e situashon. Por lo ménos un instituto finansiero lokal a informá trahadónan ku nan lo no haña nan benefishinan mas e aña aki komo konsekuensia di e situashon ku a surgi. LA PRENSA tin un relato riba e desishon aki den nos edishon di awe.
Entre e preguntanan ku Banko Sentral ta hasi ta, si e institutonan a sufri di e impakto i kon grandi e impakto ta. Banda di esei tin pregunta tambe spesífiko riba kon e institushonnan aki ta anda ku nan invershonnan den eksterior, ken ta manehá e invershonnan aki i kon kalifiká e ekspertonan aki ta pa nan maneho.

Lorito ta yama tur hende un felis djarason. Awe ta dia promé di òktober. Ta masha kos tin awe. Awe ta dia di Lisa, Maria i Dulce. Un pabien pa nan tur. Awe ta Dia di Hende Grandi i Lorito kier a manda un felisitashon pa tur Lora. Sigui papia bai!
****
Lorito a bai bula direkshon di hemisferio nort i diripiente nos a mira nubianan skur ta biniendo den nos direkshon. Promé nos a kere ku tabata un tormenta tropikal pero ora nos a wak bon, a resultá ta e krísis finansiero ta wayando den nos direkshon. Nos di: abrenusia. Ta di kon niun hende no a atvertí nos mas promé!
****
Lorito ta insistí ku nos ta balotando e krísis aki. Nunka nos no tabata masha bon komo kolektividat di antisipá desaroyonan na nivel internashonal. Nos a kere ku e biaha aki tabata diripiente pero ta resultá ku esei un biaha mas no ta e kaso. Ta kon bin nos no ta logra kada bes di nobo anto i ta warda te ora sla kue nos kurpa òf ora kosnan ta serka pa tuma medida?
****
Lorito a bula tambe banda di Marriott pa nos wak ki tin. Nos a mira un par di hende pará banda di mata i nos a kere ku ta benta di mata tin. Ora nos a bai wak bon ta algun pipita di hende tabata manifestando kontra Ank i nos mes hendenan. Honestamente bisá nos ta haña esei un poko lástima komo ku nos ta kere ku riba tereno estatal mester kai algun palabra mas duru. Muchu poko informashon i ketu bai Ulanda ku e “regie” di e proseso ku ta NOS proseso!
****
Parse ku ta masha bashamentu abou tabatin serka e komishon di UNA riba e situashon na SEF. Lorito a tende ku sekretario di e komishon Stella van Rijn tabatin man yen i a keda bati su kòmpiuter pa tuma tur informashon ku Dios di ta basta. Bo a tende tambe a hasi un fayo bisando na e stakeholdernan den un karta ku ta KPMG ta enkargá ku e sekretariado. Despues a resultá ku KPMG no tabata por i a pidi tur dokumentu bèk! Lebumai nos!

WEVER
Serapio Iacinto (80 aña)
A laga atras su kasá Estel Wever-da silva de Freitas, yunan Jopie Wever i Julie Alcazar, Laty i Vivian Wever-Lopez, Linda i Sjef Klijn, Oswaldo i Judith Wever-Donata, Sophie i Jossy Semeler, Joyce Wever, Diana i Donny Oduber, Ramon Wever, Shirley Wever i Edwin Sanders, Norma i Luis Koolman, Kenneth i Everlyne Wever-Croes. Akto di entiero ta djabièrnè 3 di òktober 4or for di misa San Francisco na Playa i despues pa santana katóliko den Caya Ernesto Petronia. Bishita 2or.

WILSON
Linda C. 53 aña)
A laga atras su tata Antonio i Winifred Wilson-Muller, yu Isaura Solange Wilson, rumannan Angelica i Reggie Braithwaith, Altagracia i Stephen Braithwaithe, Pedro i Cynthia-Wilson-Faria, Juliana Gumbs, Minerva i Roysel Martina-Blijden, irma i Troy Hurley-wilson, Alfonso i Fé Blijden-Nuñes, Samuel Murray. Akto di entiero ta djasabra 4 òktober 11or. Bishita 9or na misa Santa Teresita, San Nicolas Aruba i despues pa santana San Nicolas.

LOUISON-OSBORNE
Florence (73 aña)
A laga atras su yunan Ina, Stephen, Leroy, Ann Marie, Lucy Louison, Glenda Legito-Louison Williams. Akto di entiero ta djabièrnè 3 di òktober na santana Gr. Kwartier. Bishita 9or-11or na El Consolador.

ROMANO
Inocensio Theofilo
Mihó konosí komo Juchi
A laga atras su ruman Cecilio i Alician Romano-Ernestina, ruman di kriansa Sigfried Martijn, subrino(a)nan Mayra, Edsel, Rignald, Ivette Romano, Rogelia Magdalena, Sjanaida i Sony Rijnita-Romano, Henkie i Sharine Celestina. Akto di entiero ta djabièrnè 3 di òktober for di El Señorial pa santana Sta. Maria. Bishita 9or. Promé ku entiero tin un respòns 10.30or na El Señorial.

Apesar di indikashon ku krísis finansiero mundial lo no tin impakto riba Kòrsou: 


WILLEMSTAD – Kòrsou mester ta prepará pa e impakto di e krísis ekonómiko/finansiero mundial ku sigur lo tin un afekto riba e komunidat. No opstante di deklarashon di figuranan den mundu finansiero lokal ta indiká, ku nos lo bai sufri bou di esaki, ta notabel ku tin kompanianan grandi ku ya a kuminsá informá nan trahadónan riba kambionan ku lo bai tin. Kompanianan grandi ku ta empleá riba shen trahadó ya kaba a kuminsá manda mensahe pa nan empleadonan, mustrando ku mester tuma medida pa motibu di e krísis finansiero ku a surgi mundialmente.
LA PRENSA ta na altura di kompania ku tin alrededor di 150 empleado ku a informá nan empleadonan riba e konsekuensia di e krísis i ta spera nan ku mester hala aden sierto benefishinan pa garantisá ku e kompania lo por sigui pa algun luna. Den nan informe ta mustra e empleadonan, ku nan lo no bai tin nan oumento kustumbrá, meskos tambe e bónus i nan 13de maand. Esaki ta mustra, ku ya e kompania aki ta preokupá pa e situashon finansiero ku nan tambe lo sufri.
LA PRENSA for di fuentenan ta komprondé, ku lo bai tin muchu mas konsekuensia apesar ku ta purba di mantené e pueblo kalmu for di e informashon real ku tin rondó di e krísis finansiero mundial. Mas aleu a komprondé, ku un kompania ku tin su filialnan na paisnan grandi na Merka i ku ta mandando trahadónan lokal pa laborá a bin wanta un grupo di personal ku mester sali e siman aki pa trabou, debí ku nan no ta mira ku tin motibu pa realisá e biaha aki, debí ku e problemanan di Wallstraat na New York tin e efekto riba e kompania aki ku no tin invershonnan ta tumando lugá.

WILLEMSTAD - E situashon di e krísis mundial finansiero tin CTB tambe preokupá, ya ku a tuma nota kaba ku reservashon riba tèrmino largu no ta tumando lugá. For di basta tempu a bin nota kaba di e situashon aki ku tin efekto riba turismo di e dos merkadonan mas grandi ku Kòrsou ta dependé di dje. Den kòmbersashon ku direktor di CTB, Evita Nita, ta konfirmá na LA PRENSA ku no ta kuestion di awor, pero tin lunanan kaba ku ta vigilá e situashon aki djaserka, di manera ku por trese kambio riba e senario di merkadeo. Segun Nita ta amplia ku e preokupashon grandi ku nan tin a hasi ku a kuminsá vigilá e situashon aki for di momentu di e krísis di aviashon na Merka pa motibu di e subida di preis di fuel.
E influensia aki sin duda tin un impakto riba e dos merkadonan ku ta Merka i Oropa kaminda e krísis aki ta hunga un ròl. Aktualmente pa e krísis finansiero ta mas ku klaro ku mester pone mas atenshon ya ku lo bai bira ku e hende lo tuma desishon si e ta biaha. Den e asuntu di e krísis finansiero ya tin indikashon ku reservashonnan no ta tumando lugá riba tèrmino largu, pero tur hende ta skohe riba un tèrmino kòrtiku pa hasi nan reservashonnan.
Nita ta splika ku CTB ta vigilá e situashon aki mas skèrpi ainda, debí apesar ku e temporada aki por a nota un algu di subida, pero mester mira si e próksimo temporada ku tin hendenan ta biaha pa destinashonnan largu. Ainda CTB no a drenta den kontakto ku hotèlnan pa haña informashon di e último simannan, pero ta studia e diferente senario pa presentá ku mas fleksibilidat otro alternativanan den kaso ku esaki mester tuma lugá. CTB ta prepará senarionan komo kambio pa hisa invershon na Sur Amérika, ora ku nota ku e dos destinashonnan grandi no por risibí masha for di nan. E dos destinashon ku ta Merka i Oropa ta muchu mas dinámiko i ta fleksibel.

WILLEMSTAD – Ya ta un tradishon ku vários parti di Kòrsou a selebrá Dia Internashonal di Grandinan. Kasnan di Ansiano tabata kargá ku aktividat, miéntras ku Fundashon 60+ tambe a yena su kurá ku grandinan. Tabata un momentu den kua e grandinan a presentá pa un desayuno spesial, kompañá pa un apertura di orashon ku tabata na enkargo di Mark Seferina. Diputado Humphrey Davelaar tambe tabata presente pa kòmbersá ku e grandinan. Den su kòmbersashon diputado Davelaar a elogiá e forma ku grandinan a invertí den su bida pa loke e ta awe. E ta rekòrdá kon e forma di sigui guia i someté su mes na grandinan a hasi ku el a pèrkurá pa tene su mes riba e bon kaminda i ku awe e por sirbi su pais ku sabiduria i integridat.
Diputado Davelaar a trese dilanti den su kòmbersashon ku su mama a fayesé ora ku e tabatin 4 aña, pero tabata grandinan ku a yud’é krese i lanta i ku tur e kualidatnan bon ku un hende mester tin. Den mesun rosea diputado ta bisa ku mester rekonosé e trabou ku ta wòrdu hasí tambe bou di grandinan i na nòmber di Gobièrnu di Kòrsou a hasi entrega di un plaka di rekonosimentu na presidente di Fundashon 60+.

WILLEMSTAD – Otro hóben di 23 aña di edat su foto ta sirkulá riba Internèt komo invitashon pa relashon seksual pa tantu hòmber komo ku hende muhé. No ta un promé biaha ku e tipo di kasonan ta presentá, pero a bira konstante ku hóbennan ta keda presentá pa duna servisio seksual na tur klase di sekso. Den e kaso di e damita ku aktualmente ta riba Internèt ta un di 23 aña den un bario konosí, ya ku su adrès ta aparesé pa por drenta den kontakto ku su persona. LA PRENSA a tuma nota di e último dama aki ku ta presentá su mes den tur forma ku ta keda ekshibí durante akshonnan seksual.
Ora habri e invitashon ta presentá un nota ku e nòmber di e hóben ku su edat i tambe su direkshon pa por pasa buska pa duna servisionan seksual. Den e invitashon aki ta mustra, ku ta trata di un hóben ku ta gusta tene relashon ku ámbos sekso i ta pone klaramente ku bo mester tin plaka pa e por kumpli ku kualke servisio. Fotonan saká den sentro di siudat i tambe na sitionan deskonosí huntu ku fotonan den pleno akshon seksual.
No ta kustumber pa LA PRENSA presentá ku tipo di relato asina, pero mester alertá tantu mayornan i muy en partikular hóbennan ku por kai den trampa di individuonan ku ke sali probechá. Tin kasonan ku ta presentá, ku na momentu di kiebro ta purba eksponé e hóbennan ku foto, sea den kombinashon òf fotonan original ku a konfia e persona pa saka di e hóben. E tipo di kasonan aki mester por keda denunsiá na outoridatnan, pa evitá ku negoshi pornográfiko aki ta sigui haña su forsa.

 

WILLEMSTAD – Diputado Humphrey Davelaar na nòmber di Gobièrnu di Kòrsou a hasi entrega di un rekonosimentu na Fundashon 60+ pa nan trabou bou di grandinan. Awe riba Dia Internashonal di Grandinan, selebrashon rònt e isla a tuma lugá prinsipalmente na institutonan ku ta duna servisio na grandinan pa pèrmití grandinan selebrá. Eksperensia ta sinta serka nan grandi i ku orguyo semper grandinan lo ta di vital importansia pa e pais. Den su diskurso diputado Davelaar a splika ku grandinan tin un balor importante, ya ku ta serka grandinan el a lanta i ku awe e por ta un diputado pa sirbi su pais ku integridat. Riba e foto por mira diputado Humphrey Davelaar ta hasi entrega di e plaka di rekonosimentu na Fundashon 60+. (Foto: Norwin Josepa).

Skina di Sorti, awe djarason 1 di òktober di 2008, ta kuminsá ku deseá un i tur un bon dia. No tin ningun sistema ku ser humano ta aktor den dje ku ta perfekto. E ser humano pa definishon no ta perfekto. Bo tin di opta pa un sistema aseptando su riesgo i oportunidatnan. E sistema sosialista i e sistema kapitalista tin riesgo i oportunidat ku orígen den e kuadro di motivashon di e aktornan.
****
Kontrali na lokual hopi atversario di e filosofia di e instrumento “merkado liber”, pa yega na un alokashon mas efektivo di rekursonan, ta pretendé, e krísis den mundu finansiero no ta proba ku e sistema ta robes, pero ku defisiensia den e kuadro di motivashon ta resultá den sinbèrgwenseria (haragan i goloso pa kos). Sinbèrgwenseria ku a pone ku entre otro akountent no a kumpli ku e tarea importante ku nan tin, esta di sertifiká ku dirigentenan no ta aktua kontra di interes di tersera.
****
Si empresanan ku ta kotisá na bolsanan merikano, apesar di ta suheto na eskrutiño severo di un dje bolsanan ku reglanan mas severo den e sirkuito, por a “get away” ku nan engaño, ta pasobra ehekutivonan sinbèrgwensa a konspirá huntu ku akountent pa raportá ganashi fiktisio. Ganashi fiktisio ku benefisio e ehekutivo. Malabarismo ku kosto i balornan spekulando ku akshonnan den futuro lo a sirbi pa por tapa e engaño.
****
Ta masha hopi engaño tabatin kaba ku e fantasma di “new economy” ku a krea rondó di negoshinan di Internet, ku desafio di reglanan básiko di ekonomia. Den mundu finansiero e debakel ku kompanianan di Internèt a laga skernan ku awor ku e debakel ku hipotekanan ridíkulo (spekulando ku balor di kas lo keda subi) a baster por kompleto. E desaster su orígen ta den neglishá reglanan básiko di atministrashon responsabel.

WILLEMSTAD – Un kampaña di informashon ekstenso mester kita e pániko i mal informashon tokante abeha. Pueblo ta mal informá i ta kere ku abehanan ta peligroso. Esaki ta puntonan ku a diskutí ayera durante un reunion tokante e problema di abeha ku tin pa basta tempu kaba.
For di dos aña pasá Kòrsou ta den gara di abeha. Despues ku un dama di edat a muri dor di pikánan di abeha, un spantu enorme a drenta komunidat. Despues di e suseso lamentabel ku a tuma lugá den e santana di Barber, tabatin diferente otro insidente ku a hala masha hopi atenshon. Un koredó di katapila a kai for di su vehíkulo i heridá su mes mortalmente despues ku un plaga di abeha lo a atak’é. Abehanan a invadí diferente skol i kas di famia i kousa hopi spantu. Durante e último marcha di Seú tambe abehanan a baha den e bario Marchena i kousa pániko.
E reunion di ayera na L.V.V. tabata pa palabrá kiko ta bai hasi ku e miedu ku ta biba bou di komunidat. Apikultornan i ekspertonan di G.G.D. a konstatá en todo kaso ku pueblo ta mal informá i ku tin un pániko ku no ta nesesario. Te ainda tin hopi hende ku ta kere ku na Kòrsou tin e asina yamá ‘killer-bee’ ta bula rònt. E komishon di abeha a konkluí ku mester informá pueblo bon tokante di e problema di abeha, ya komo ku e pániko no ta na su lugá.
Banda di e informashon eróneo ku ta biba den komunidat, ku mester atendé kuné via di un kampaña di informashon, tin un aspekto finansiero ku no ta reglá ainda. Mester di sèn pa e kampaña i na e momentunan akí no tin indikashon for di unda e plaka mester bin. E komishon di abeha a diskutí ayera tokante e forma ku mester bai atendé ku e kampaña, pasó e pániko ku tin den pueblo no ta yuda ku nada. No opstante ku no tin sèn na e momentunan akí, e komishon a palabrá ku no por keda warda sin hasi algu. Na e momentunan akí atrobe tin abehanan ku ta agitá dor ku siudadanonan no sa kon pa atendé ku abeha.

ARIES: Traha, duna lo máksimo den bo lucha pa bida. Dios ke bo saludabel, triunfante den bo bida ku bo pareha. Apliká bo filosofia pa konkistá kurason di otro. 19.

TAURO: Ta momentu di lanta for di soño i fantasia. Biba poétikamente, pero ku pianan firme pará. Lèsnan risibí ta fortalesébu. 38,29,43.

GEMINIS: Bo ta enfrentá famianan kompliká, difísil i neurótiko. Danki na bo eksperensianan di pasado, bo sa kon pa enfrentá situashonnan ku bo sernan kerí. 15.

KANSER: Ta presentá oportunidat pa bo logra loke bo ke, pero ta importante pa uni o kolaborá ku otronan. 49,05,26.

LEO: Bo ta sinti ku forsanan invisibel ta apoyábu. Alegrábu pa loke ku bo no ta realisá manera bo a spera. Tur konspirashon ta pa bo tin prosperidat, abundansia, salú i amor. 18.

VIRGO: Lei di karma semper ta kumpli. No gaña, ni saka mentira, ni hasi promesa. Kòrda ku e ambishonnan ta trampa ku ta destruí nos. 03,24,45.

LIBRA: Kontrolá bo temperamentu. No permití ku un kos di kèns ta lagabu eksplotá i pèrdè energia. Bo ta deskubrí sekretonan riba bida i morto. 11,25,16.

SKORPION: Bo ta konkistá i dibertí, pero kiko realmente ta bale la pena den bo bida. Bo ta sintíbu den libertat pa stima, duna, krea, yuda, sirbi komo nunka ántes. 09,10,04.

SAGITARIO: Bo suerte den amor ta mehorá dramátikamente. Un amor nobo, si bo ta soltero, ta drenta bo bida. Tur relashon ku kuminsá awor lo dura. 42,36,06.

ORANJESTAD- Ministerio di Enseñansa, Asunto Social y Infrastructura ta informa cu Minister drs. Marisol Lopez-Tromp a ricibi inivitacion di secretario di estado di Asunto Interior y Relacionnan di Reino di Hulanda Sra. Ank Bijleveld-Schouten y alcalde di Almere di Hulanda Sra. Annemarie Jorritsma-Lebbink pa un encuentro (netwerkbijeenkomst) riba Diaranson 8 Oktober 2008 den stadhuis di Almere.
E ultimo encuentro di muhernan fuerte di reino tabata 24 Januari 2008 na Curacao y esaki tabata riba iniciativa di Sra. Ank Bijleveld-Schouten kende durante Concierto di Reino riba 15 di december 2007 a bini cu e iniciativa pa lanta un red di cooperacion, cu yama “Sterke Vrouwen van het Koninkrijk”.
E pensamento tras di e iniciativa aki di muhernan fuerte di reino ta cu den sociedad Antiyano un mama ta hunga un rol crucial den nos famianan. Fortalecemento di nan posicion ta duna un contribucion importante na futuro di e hubentud.
Ta trata di un iniciativa pragmatico, no pa desaroya un maneho nobo pero pa mehora na un forma concreto y practico e oportunidadnan di e hoben Antiyano y Arubiano den Reino, unda e hendenan den e paisnan di Reino por siña di otro y por inspira otro.
E lema di e encuentro aki ta “Muhernan fuerte pa un generacion fuerte nobo” (Sterke vrouwen voor een nieuwe sterke generatie).
Bao e lema aki 14 gobernante y ex gobernante hende muher di henter reino ta pone nan mes disponibel pa un mihor futuro pa hende muher y hobennan. Mamanan Antiyano y Arubiano y nan yiunan, tanto na Hulanda como na Aruba ta para central den e iniciativa aki.