WILLEMSTAD - Dosente i eks dekano Carl Camelia, lo asumí e posishon di dekano di Fakultat Soshal-ekonómiko solamente bou di kondishonnan. Un di nan ta, ku e rector magnificus aktual mester hala un banda, ya ku e problema no ta e dekano sino e maneho general na Universidat di Antia. Asina Camelia a bisa despues di a tuma nota den medionan di komunikashon ku Hunta di Supervishon den persona di sr. Herman Behr a anunsiá e proposishon pa apuntá Camelia temporalmente pa asumí responsabilidat di e fakultat komo dekano p’asina trese trankilidat den e impase ku a surgi na universidat. Por sierto ku e situashon a empeorá despues ku studiantenan a bai e reunion tantu solisitá serka minister Leeflang i a bin topa e rector magnificus, ku ta sentro di e problemanan segun nan, sintá den e reunion. Esaki despues a ninga algun mayor pa drenta ku e studiantenan. Bosero di e studiantenan Anita a bisa klaramente, ku esaki ta inaseptabel i kontra palabrashon i konsekuentemente a bandoná e reunion. Riba e pregunta dikon minister a aktua di tal manera, e studiante a bisa ku el a informá nan ku esaki ta e ‘setting’ legal den kua e reunion mester tuma lugá. Studiantenan ta sigui den nan akshon pues.
Camelia ku den pasado tabata dekano pa SEF a bisa repetidamente, ku trahamentu di roster no ta ningun problema pe, ya ku el a hasi esaki pa añanan, pero esaki mester tuma lugá den koperashon ku un tim. Naturalmente no tabata nada elegante pa presidente di Hunta komuniká su proposishon den medionan di komunikashon sin a papia ku Camelia. Camelia a bisa mas aleu, ku un otro kondishon pa e aseptá e responsabilidat ta di hala aden (eliminá) diferente kartanan di menasa ku diferente di su kolega dosentenan a haña resientemente di gerensia di UNA. Den esakinan tabatin kolega ku a haña tres karta atvertensha riba un dia. Naturalmente tur esakinan ta bai den file di un persona, siendo ku no tabata hustifiká. Den tal kartanan ta bisa, ku e dosentenan mester tene nan mes na dunamentu di lès eksklusivamente. Segun gerensia diferente dosente ta vosiferá nan propio interesnan i ta instigando studiantenan kontra gerensia di UNA.

NAGUA, Repúblika Dominikano – Ambiorix Burgos a ser mandá prizon preventino djarason anochi pa tres luna pa un aksidente den kua dos muhé a muri.
“Esaki ta e komienso di e kaso, awor nos ta bai start e investigashon pa despues determiná si nos por lanta mas akusashonnan”, e fiskal Raul Quiroz a bisa.
E wes muhé Nicolasa Sabala a ordená pa Burgos pasa e próksimo tres luna den e prizòn di Nagua, promé ku kuminsá ku e kaso di fondo. No a fiha fecha pa e huisio.
Pa awor aki e picher ta akusá di a violá lei di tráfiko di repúblika Dominikana ora el a start un huida despues di e aksidente siman pasá.
“Pa awor aki nos ta prosesando Burgos solamente pa e violashon di lei di tráfiko i despues nos lo mira kiko ta bai pasa”, Quiroz a agregá.
Si e resultá kulpabel, Burgos ta enfrentá un kastigu di seis pa dos aña di prizòn. Si presentá kasonan pa asesinato e kastigu lo por bira di 20 pa 30 aña.
“Mi yu ta inosente. Loke ta pasa ta ku aki na Nagua tin hopi hende ku ke hasié daño”, e tata di Ambiorix, Pablo Burgos a bisa.
Bistí ku un pèchi kòrá di Chicago White Sox, ku un kamisa pretu i karson jean pia drikuart, Burgos a keda ta hunga ku su telefòn selular durante mayor parti di e sinku ora ku e proseso di presentashon di kargonan kontra dje a dura.
“E desishon ku a tuma awe ta mas pa mi seguridat ku pa otro kos. Mi ta mantené mi inosensia. Dia dje aksidente mi tabata sintá patras den outo, mi primu tabata stür i inkluso mi tabata kompañá di mi novia”, Burgos a bisa AP.

SAN FRANCISCO – Omar Vizquel, shortstòp premiá 11 biaha ku Wante di Oro, ke sigui aktivo den liga Grandi i ta rekuperando si un operashon pa korekshon óptiko ku laser na su wowo drechi.
“Tur kos a sali bon”, Vizquel a informá, segun un e-mail.
E venezolano di 41 aña a operá siman pasá, ora temporada regular a kaba i a warda vários dia miéntras e wowo ta kura pa regresá su kas na Seattle. Vizquel a hunga e kuater último temporadanan pa San Francisco, pero e gerente di Giants Brian Sabean a bisa despues di temporada ku tin “sero” posibilidat di tresé bèk.
Giants ke duna oportunidat na su prospektonan i purba ku e nobato Emanuel Burriss na e posishon durante e mayor parti di segundo mitar.
Vizquel a tuma e desishon trankil ora a hasié suplente, pero e ta sinti su mes kapas di hunga den otro klup.
“Mi no tin duda ku ainda mi por hunga”, el a deklará. “Mi ke hunga, i ta esei mi ta bai hasi”.
Vizquel apénas a mira akshon den 92 wega temporada pasá, su kantidat mas abou for di dia ku el a hunga 64 ku Indios di Cleveland na 2003. El a bati pa .222 ku 23 impulsá, 10 doblete i un tripel na 2008.
Su 2.654 weganan komo shortstop ta un rekòrt den liga grandi. El a superá e marka di su kompatriota Luis Aparicio di 2.583, na mei último.

CHICAGO – Chicago Cubs djarason a aktivá e klousula den e kontrakt di e picher Rich Harden pa un aña i 7 mion dollar.
Cubs a atkirí e derecho den un dil ku Oakland 8 di yüli. Harden tabata e picher pèrdèdó djasabra den e di tres wega di playoff di Liga nashonal den kua Chicago a keda eliminá pa Dodgers di Los Angeles.
Harden di 26 aña, tabatin marka di 10-2 ku efektividat di 2.07 den 25 salida ku Atleticos i Cachorros e temporada aki. E picher kende tabatin problema di leshon durante su karera, a traha un marka di 5-1 ku 1.77 di efektividat den diesdos salida ku Chicago.

SANTO DOMINGO - Tigres di Licey a indiká djaweps ku Tigres di Detroit ke pa e picher merikano Dontrelle Willis picha ku e ekipo ei den liga invernal dominikano.
“Detroit ke pa e hunga ku nos e invierno aki i asina nan a bisa nos”, e gerente general di Licey, Fernando Ravelo, a bisa APSegun Ravelo, e visepresidente di e ekipo di detroit, Al Avila, a mustra su interes pa Willis hunga ku e tim kampion di Seri di karibe.
Sin embargo, Willis te ainda no a aseptá pa hunga durante invierno.
“E hungadó te ainda no a disidí si e ke hunga o nò den invierno, pero nos ta habri pa tin’é den e ekipo si e disidí di picha na e pais”, Ravelo a agregá.
Willis, di 26 aña tabatin marka di 0-2 i 9.38 di efektividat den apénas ocho wega ku Detroit e temporada aki, despues di a yega huntu ku e venezolano Miguel Cabrera den un dil for di Marlins di Florida.

Eudosia Ruane, na man drechi, mama di Angely Fana, kende e pelotero Burgos a dal mata ku outo den un aksidente.

Omar Vizquel.

Richard Harden.

WASHINGTON – Un dokumento firmá djaweps pa e presidente Ggeorge W. Bush lo fasilitá su salida di Kas Blanku ora su mandato kaba i delantá e ta habri kaminda pa su susesor.
Durante shete aña i kasi nuebe luna, Bush a firma tur memorandem, òrdu i proyekto di lei ku por imaginá. Inkluso el a veta algun, pero e òrdu riba kua el a stèmpel su nòmber djaweps ta un di esnan ku poko hende ta papia. Básikamente e ta e òrdu ehekutivo ku ta entregá e yabinan di Kas Blanku na esun ku keda eligí presidente dia 4 di novèmber.
Un echo poko konosí ta ku Washington no por warda te na e inougurashon presidensia di 20 di yanüari pa traha e detayenan di e transishon pa e presidensia nobo. Tantu Barack Obama komo John McCain ya a nombra funshonarionan pa supervisá e transishon menshoná asina ku e resultado di elekshon bira konosí.
E ekipo di transishon di e kandidato ganador lo fiha e prsedementunan pa selekshoná e personal klave i tuma desishonnan polítiko den e diesun simannan promé ku e presidente nobo okupá e ofisina ehekutivo.
Kongreso a asigná 8 mion dòler pa finansiá e operashonnan di transishon.
Sekretaria di prensa di kas Blanku, Dana Perino, a bisa ku e Òrdu di Bush ta proponé pa yuda kordiná e esfuersonan ku ta andando kaba pa garantisá un transishon sin opstákulo. El a agregá ku Bush ke sigurá ku e ekipo di su susesor tin tur loke ta nesesario.”Esaki ta spesialmente importante na momentonan den kua nos pais ta libra un guera, lidia ku un krísis finansiero i traha pa protehá nos di futuro atakenan terorista”, Perino a bisa.

NEW YORK – OPEP lo tene un reunion ekstraordinario dia 18 di novèmber pa analisá kon e krísis finansiero global ta afektá e preisnan di petroli, asina e organisashon a informá djaweps.
E Organisashon di Paisnan Eksportadó di petroli a bisa den un komunikado ku e tema lo ta kon e krísis ta afektá e ekonomianan global i e merkadonan mundial di petroli.
E preisnan di krudo a kai ku un 40% for di dia ku nan a yega e rekòrt di 147,27 dòler pa barí dia 11 di yüli, meimei di un krísis finansiero ku a obligá persona- i empresanan pa redusí e uso di gasolin.
Diferente analista a pronostiká ku OPEP lo anunsiá un redukshon pa impedí ku e preisnan lo sigui kai.
E krudo lihé pa entregá na novèmber a kai 1.85 dollar na 87,10 dollar pa barí den Nymex.
Na Tripoli, e minister di petroli di Libia, djaweps a pidi pa e miembronan di e kartel redusí nan produkshon.
Inkluso e paisnan ku no ta pertenesé na OPEP “lo mester protehá nan interesnan mediante redukshon di nan produkshon di krudo pa para e pèrdida di entrada”, Shukri Ghanem a bisa, kende ta presidente di e Korporashon nashonal di petroli.
“Pero, e meta di OPEP ta di krea un merkado balansá, loke ta nifiká ku e no ta perhudiká ni e produktornan ni e importadónan, Ghanem a bisa AP.
Libia ta un dje 13 miembronan di e kartel. E desishon adoptá pa OPEP luna pasá di redusí su produkshon na 520.000 barí pa dia no a logra wanta e bahada di e preisnan.

WILLEMSTAD – Curaçao Masters Tournament Foundation ta bai organisá un torneo deportivo internashonal di “Masters”. Meta prinsipal di esaki ta pa stimulá popularidat di e deporte di basketbòl. Na 2007 e federashon di basketbòl internashonal “FIBA” ofisialmente a start ku e divishon di “Masters” ku ta pa hungadónan di 35 aña pa ariba.
“Nos ta sinti ku tin un ánimo pa sigui hunga basketbòl na edat di Masters. E meta di nos organisashon ta pa organisá e aña’ki e promé torneo internashonal di basketbòl di “Masters” entre e paisnan den Reino i Sürnam. Esaki nos ta mira komo un proyekto piloto pa yega despues na organisashon di Caribean Masters” ku paisnan den Karibe.”
1st Internacional Curaçao Masters Basketball Tournament
Di 18 te ku 24 di novèmber 2008 lo wòrdu organisá un torneo di basketbòl pa Masters. A invitá timnan di tur parti di Reino Ulandes i Sürnam.
A risibí inskripshon di ekiponan di Aruba, Boneiru, Kòrsou, St. Maarten, Ulanda i Sürnam. For di aprel 2008 a inisiá preparashon pa e 1e torneo di basketbòl pa Masters.
Ta trahando riba un programa pa un siman eksitante di basketbòl. E mester bira un siman pa no lubidá hamas. Un siman di basketbòl, di goso i di topa amigunan di ántes.
Lo tin un programa sosial rondó di e weganan. Diferente di e hungadónan ku lo bishitá ta personanan ku ta okupá posishonnan importante den nan pais.

 WILLEMSTAD – Manera LA PRENSA a publiká ayera, aktualmente tin dos pelotero yu di Kòrsou den Instructional League ku e ekipo di Liga Grandi, Cincinnati Reds. Ta trata aki di Juancarlos Sulbaran, pitcher i tambe Marieckson Gregorius, shortstop.
Manera LA PRENSA a indiká ayera, Marieckson Gregorius ta kompañero di kamber di JC Sulbaran. Esaki ta remarkabel, ya ku e dos peloteronan aki un dékada atras tambe tabata kompañero di ekipo tempu ku nan a partisipá den nan promé selekshon di Liga Vruminga na Puerto Rico.
Den e artíkulo di ayera, LA PRENSA ya a mustra ku e Scouting Director di Reds a keda impreshoná ku Juancarlos Sulbaran su prestashon den Instructional League te ainda.
Awe LA PRENSA kier a dediká atenshon na otro pelotero hóben yu di Kòrsou bon konosí ku tambe ta militá den e ekipo profeshonal, Cincinnati Reds. Ta trata aki di Mariekson Gregorius, kende ta firma komo shortstop. E ta yu di Didi Gregorius, picher estelar di Selekshon Antiano i ñetu di e legendario def. Chikitin Gregorius. E mes a nase si na Amsterdam.
Mariekson Gregorius a hunga un temporada kaba ku Rookie League di Reds i aktualmente ta den Instructional League huntu ku JC Sulbaran.
For tata di JC Sulbanran, Jorge Sulbaran, LA PRENSA a komprondé, ku Mariekson òf 'Didi' manera nan ta yam’é na Merka tambe, ta trahando riba su fortalesa di bate. Den temporada 2008, Mariekson Gregorius a poncha únikamente 10 biaha den 97 turno, loke ta indiká ku e ta hasi bon kontakto, sinembargo su average di bateo tabata únikamente .155.

PHILADELPHIA – Manny Ramirez a konektá otro par di hit i empuhá otro kareda mas pa Los Angeles Dodgers. Lástimamente e sobrá di e aliniashon di Los Angeles no por a respaldá e dinámiko batidó dominikano den e promé wega di play-off di Liga Nashonal.
Ramirez a konektá un doblete pa produsí un kareda den e promé ining, pero ku no tabata sufisiente, ya ku Phillies a sabi di gana e promé wega 3-2.
Manny ku su dreadlocknan resientemente kòrtá, a bai di 4-2 pa Dodgers i Andre Ethier tabata e úniko otro hungadó den e aliniashon di Dodgers pa konektá dos hit i tambe a bai di 4-2.
E maskota di Phillies, Phillie Phanatic ayera a hasi chiste ku e kòrtá di kabei di Manny Ramirez, tirando un kasko di Dodgers ku kabei manera esun di Ramirez pegá na dje, na laira pa e fanátikonan ‘boo’ esaki.
“Nos tin ku lubidá e wega aki. Si nos sigui hunga asina aki, algu bon lo sosodé,” asina Ramirez a bisa despues di wega. Awe su ekipo tin e oportunidat pa igualá e seri na unu.
Ramirez a bati di .396 ku 17 honron i 53 kareda empuhá fo’i dia ku el a bin Dodgers den un kambio fo’i Boston Red Sox.
Pa e ekipo di Philadelphia tabata Chase Utley i ku a konektá un honron di Pat Burell ku a konektá honron pa e ofensiva, miéntras ku e pichernan Cole Hamels i Brad Lidge a dominá mayoria di e aliniashon di Dodgers.
Awe e seri ta kontinuá na Philadelphia i despues lo tin un dia di deskanso i djasabra pa biaha pa West Coast pa e seri kontinuá djadumingu.

WILLEMSTAD – Ayera nochi den Tio Daou Ballpark tabatin kontinuashon di kampionato regular di baseball lokal, wega programa pa e di kuater buèlta.
Tabata e ekipo bishitante, Blue Hawks Aqualectra ku a topa Sta. Rosa Indians Ennia i trata na paga nan lus di kas, pero esaki tabata enbano.
Sta. Rosa a sabi di anotá dos kareda den e promé dos iningnan di wega ku ya tabata mas ku sufisiente pa garantisá nan viktoria di 5-2.
Pa Sta. Rosa komo ekipo di kas, nan a anotá sinku kareda riba shete hit i kometé tres eror. Nan a laga ocho koredó na base. E picher ganadó tabata Jurandy Girigorie i e mihó batidó tabata Rafael Jozefa jr. di 4-3. Jurandy Girigorie tabata e picher habridó i a bai sinku ining permitiendo tres hit i un kareda. E no a duna base por bola i a poncha tres batidó. E relevistanan Ryan Ilario i Mitchell Kinburn a sabi di tene e batenan di Blue Hawks bou di kòntròl pa garantisá e viktoria di Sta. Rosa.
Pa Blue Hawks, e picher pèrdèdó tabata Jose Mejia ku a bai sinku ining permitiendo tur e karedanan di Sta. Rosa. Carrol de Palm a relevá i pèrmití un hit, pero ya tabata muchu lat kaba pa su ekipo. E mihó batidó pa Blue Hawks tabata Andrelton Simmons ku a bai di 4-2.
Awe e kampionato ta kontinuá ku e wega entre Groot Kwartier Stars Mangusa i Curaçao Yankees.

 WILLEMSTAD - Dia 27 i 28 di sèptèmber Buladó Swim Club a klousurá su selebrashon di su 35 aña di eksistensia na grandi ku un grandioso kompetensia di landamentu, e asina yamá BULADÓ MEET.
Mas ku 200 atleta di timnan di Aruba, Boneiru i Kòrsou a partisipá na e di sinku edishon di Buladó Meet. E timnan ku a partisipá ta Bonaire Barracudas, Piranha Swimming Club, Sithoc Swim Club, The Sharks Swimming Team, Typhoon Swim Club, Stingray Swimming i Buladó Swim Club.
E kompetensia a tuma lugá na Rust & Burgh kaminda ora di apertura a duna homenahe na algun persona ku a kontribuí den e 35 añanan na kresementu di e tim, esta: Omira Boutisma, Nazario Martijn, Chon Theodora, Zayra Lau-A-Kien, Randolf Monte.
E kompetensia a terminá ku premiashon den hòfi di Rust & Burgh. E ekipo Sithoc a bira e gran kampeon (702 punto) di e Bulado Meet e aña aki, sigui pa Bulado Swim Club (693 punto) i na terser lugá a keda e ekipo Stingray di Aruba (215 punto). E high point trophy nan a keda repartí di e siguiente manera:

WILLEMSTAD - E fin di siman aki lo bai tin algun wega di Klase A ku a keda reprogramá. E ekipo di Banda Abou City despues di a pèrdè dos wega pa default konforme reglamentu di órden, no por sigui partisipá den e kampeonato. Konsekuentemente e weganan di e otro ekiponan ku falta kontra di Banda Abou City, ta haña e wega gana. Pues e wega di Sta. Maria Pirates kontra di Banda Abou City i partido di Real Atletics kontra di Banda Abou City, ámbos e ekiponan di Sta. Maria i Real Atletics ta haña e weganan aki gana.
Djasabra lo tin dos wega, unu na Tio Daou Ballpark entre Wildcats-Fatum/Kambes i Sta. Maria Pirates Chippie i e otro na Bonam entre Manhattan Blue Jays i Real Atletics. Tur e dos weganan aki ta kuminsá pa 2:30 di atardi.
Djadumingu lo tin dos wega mas, tur dos na Bonam. Pa 10:30 di mainta Manhattan Blue Jays kontra di Wildcats i 2:00 di atardi entre Sta. Maria i Curacao Yankees.

ARIES: Pensa bon loke bo ta bai bisa, ya ku loke bo bisa, por afektá un hende personalmente. Pensa bon promé ku bo duna un hende un konseho. 26,15,02.

TAURO: Den asuntu di amor bo tin hopi suerte. Si bo ta soltero(a) sali sin miedu na konkista. Buska manera di envolvíbu den algun plan di ehersisio i alimentábu bon. 41.

GEMINIS: Riska na ariesgábu den e lokual ku bo ta teme, ya ku suerte ta na bo banda. Ser mas optimista bo ekspektativanan, ya ku tur kos lo sali manera bo ta deseá. 05.

KANSER: Konfia den bo talentonan, bon wisio, eksperensia i sabiduria. Bo ta logra kosnan bon, solamente si bo no purba kompliká mas e kosnan. 11,22,35.

LEO: Disfrutá kada dia, no importá loke pasa. Ku niun hende ta interponé den bo kaminda pa bo felisidat. Bo ta sinti falta di relahá i kompartí ku bo amigu(a)nan. 08,16.

VIRGO: Finalisá tur asuntu legal ku bo tin pendiente. E ayudo di un profeshonal ta nesesario awor i fuentenan nobo di informashon den lo relashoná ku invershon.

LIBRA: Relahá i dibertíbu huntu ku bo sernan kerí. Di ke yuda otronan por trese mas problema. Permití ku kada ken ta resolvé su problemanan. 13,40,23.

SKORPION: Un persona di bo pasado ta bin interferí den un relashon aktual. Ser sinsero pa ekspresá bo sentimentunan. 39,12,48.

SAGITARIO: Un persona mas mayor ku bo, ta trata di dominá bo bida. Kambionan ku den bo bida no ta di agrado di hopi, pero ta loke bo ta deseá. 17,32,46.

WILLEMSTAD – “A yega momentu pa reskatá e instituto ku yama Fundashon Kas Popular. Manera nos ta bayendo aki, nos ta teme lo peor. Anto nos no ke pa FKP bira un di dos DCA”, asina presidente dje sindikato ku ta representá e trahadónan di e fundashon SEBI, Richenel Ilario a anunsiá.
Pa basta dia kaba kos tabata kushi den seno di FKP. For di momentu ku a surgi un konfrontashon – basta serio por sierto – entre gerensia di FKP, konsistiendo di Arthur Con komo direktor general i Henry Jourdain komo direktor finansiero i diputado Anthony Godett den su kalidat di presidente di direktiva di FKP, e situashon a bira bastante eksplosivo. E punto esensial ta ku e fundashon no ta bayendo bon finansieramente.
No tin konstrukshon di kas i e trahadónan ta puntrando ta kiko ta pasando. Tin diferente proyekto ku tin hopi luna para ketu. Gerensia di FKP ta mustra ku tin un kantidat di faktor ku a influensha maneho di e fundashon negativamente. Pero e sla mortal a bin na momentu ku e “quickscan” ku diputado Godett a laga hasi, a keda kla. E konklushon di e rapòrt pa FKP ta devastador i básikamente ta proponé pa trese un kambio fundamental den maneho di e instituto.
Richinel Ilario a splika ku e sindikato no a sinta ketu. For di 18 di yüli di e aña aki, e sindikato a manda un karta pa trahadó i pa gerensia di FKP kaminda a mustra riba e nesesidat pa aktua.
SEBI no tin konfiansa mas den FKP anto nos a komprondé, ku direktiva di Fundashon Kas Popular tampoko tin konfiansa den e fundashon aki. E rapòrt ku a bin kla siman pasá a mustra klaramente i ta konfirmá loke hopi tabata sa kaba, esta ku kosnan no por sigui asin’aki, segun Ilario.

WILLEMSTAD - E kaso di desaparishon di Marlies van der Kouwe na Boneiru tin tur ingrediente pa bira un di dos kaso, ala Natalee Holloway. E kaso aki no ta parse di lo haña un solushon riba término kòrtiku. Otro siman lo bira e di kuater siman di desaparishon di e damita ulandes aki.
Entretantu, ayera wes komisario a prolongá detenshon di Ryan Pieters, te ainda e úniko sospechoso detené ku 8 dia mas.
Marlies van der Kouwe, un studiante ulandes ku tabata kore stazje na Boneiru komo asistente botikario, a disparsé e wikènt di tres siman pasá den un forma misterioso.
Deskonosínan lo a rank’é for di su baiskel despues ku el a sali Karel’s Bar i for di e momentu ei no a tende nada mas di dje.
Tabatin hopi krítika riba Kuerpo Polisial pa e forma ku a atendé e kaso aki.
Un di e krítikanan tabata, ku polis a desperdisiá un dia i mei, promé ku a bati alarma grandi despues di e desaparishon.
Un otro krítika ta, ku polis na Boneiru a neglishá e informashon ku a sali públikamente di un persona ku por tabata un testigu interesante den e kaso di sekuestro i desaparishon di Marlies van der Kouwe riba e isla. Esta, e informashon ku e sekuestradornan, reportadamente a yama e persona aki i eksigí un suma di reskate.
Manera LA PRENSA a informá anteriormente, korto tempu despues ku Marlies van der Kouwe di 24 aña di edat a disparsé, a drenta un eksigensha pa un suma di reskate di mei mion euro. E eksigensia aki sinembargo a bai den direkshon di Wouter van Kouwen, un figura ku nan a yega di huzga pa trafikashon di droga i kende alabes tabata un testigu importante di hustisia. El a bai biba despues ku su famia na Boneiru.

WILLEMSTAD - Minister di Enseñansa Omayra Leeflang no tin pensá di konfrontá parlamentu antiano riba e problemanan grave ku ta afektando e instituto máksimo di formashon na Antia, ku ta Universidat Nashonal di Antia, promé ku e risibí e informe di e komishon ku ela pidi pa investigá e situashon.
E situashon a eskalá djamars último ku un akshon grandi di studiantenan. E studiantenan no tin konfiansa mas ni den rector magnificus Jeanne de Bruijn ni tampoko den dekano di fakultat sosial ekonómiko (SEF) i ta eksigiendo pa tur dos baha den forma inmediato.
Leeflang a splika, ku no ta pòrnada el a laga hasi un análisis di e situashon na e instituto di formashon.
Ta importante pa nos pone tur kos riba un rei pa nos por determiná kiko ta e mihó kos pa hasi, segun e mandatario.
Entretantu minister Leeflang sinembargo a sinta na mesa ku e studiantenan, sperando ku por haña un solushon ku ta pone fin na e akshonnan ku tin algun dia kaba ta dura.
Manera ta konosí, tantu frakshon di Forsa Kòrsou komo frakshon di MAN entretantu a pidi un reunion públiko di parlamentu pa minister Leeflang bin duna kuenta i rason kiko ta pasando na UNA.
Reportadamente partido Nashonal di Pueblo tambe ta para tras di e petishon pa e reunion tuma lugá. A lo ménos, e presidente dje partido mr. Farou Metry a bisa esei ku mes tantu palabra ayera durante ku el a presentá na UNA pa papia ku e studiantenan.
Pero intentonan pa haña PAR asina leu pa e tambe uni den e petishon no a duna resultado. PAR a bisa ku e ta keda para tras su minister pa e posishon ku el a asumí.

WILLEMSTAD - Minister di Integrashon di Ulanda Ella Vogelaar pronto lo biaha pa Antia pa aki diskutí ku gobièrnu riba e banko di informashon pa registrá hóbennan antiano i arubiano problemátiko na Ulanda. Esei ta loke e ministerio di Vogelaar a anunsiá.
For di su palabranan por dedusí sinembargo ku e hecho ku e ta bin papia, no ta enserá ku e ta bai kambia di idea pa introdusí e medida.
E mandatario a enfatisá ku e kombersashon lo tuma lugá pa weta si por haña alternativa, pero ku e preparashonnan pa introdusí VIA ta sigui normalmente.
Na Antia a surgi sorpresa atrobe ayera, ora a resultá ku no opstante ku promé minister di Antia Emily de Jongh-Elhage ta bisa ku e tin un palabrashon ku minister Ella Vogelaar, su ministerio a anunsiá den un komunikado ofishal ku ta sigui ku preparashon pa introdusí e areglo di VIA, Verwijsindex Antillianen.
Promé minister antiano Emily De Jongh-Elhage a bisa den su promé reakshon ku esaki no por , pasobra ela kaba di traha un palabrashon ku Vogelaar ku lo sigui papia riba e asuntu aki.
E areglo di VIA, manera ta konosí, ta e areglo kaminda gobièrnu ulandes ta registrá hóbennan antiano i rubiano te ku 24 aña di edat ku ta kousa molèster den komunidat ulandes. Tambe ta registrá hóbennan ku a disidí ku nan no ta bai skol mas.
Gobièrnu ta mustra ku esaki ta e úniko manera pa e mantené un grep riba e hóbennan aki, ku generalmente ta hopi ambulante i ku outoridatnan no por gara ora nan kometé algu.

WILLEMSTAD/ LUXEMBURG – Hof di Hustisia Oropeo a skual Ulanda pa motibu ku e number di alarma 112 no ta funshoná bon. Komishon Oropeo ke pa e sitio for di unda un persona ta yama pa asistensia ta visibel pa e instansia ku ta duna ayudo. Den mayoria pais Oropeo esaki ya ta posibel, pero Ulanda ta kana atras den e desaroyo akí.
Hof di Luxemburg a skual Ulanda pa e partikularidat akí e siman akí. Ulanda a defendé su mes dor di apelá riba problemanan tékniko i logístiko ora tabata adaptando e sistema di telefòn. tambe Ulanda a bisa di ke introdusí e teknologia mas moderno riba e tereno akí, pero esei no ta kla na tempu. Na Ulanda ta solamente yamadanan pa asistensia via telefòn di kas ta hasi posibilidat pa averiguá e sitio kaminda esun ku ta yama ta na e momentu ei. yamadanan di urgensia via telefòn selular no por indiká esaki. Sinembargo Hof di Hustisia Oropeo no a aseptá e argumentunan akí i a stipulá ku Ulanda no a kumpli ku e palabrashonnan ku a traha den e Union.
Na Kòrsou e sistema akí no ta konosí, pero polis tin maneranan sofistiká pa tòg haña sa for di kua área un persona a hasi un yamada. E sistema ta dje bon ei ku el a sòru ku polis por a detené malechornan ku a hasi yamadanan ku anunsio falsu di bòm.

WILLEMSTAD/ AMSTERDAM – Hopi hende no ta hasi denunsia di sierto delitonan pa miedu di represaya. E ministernan di Hustisia Ernst Hirsh Ballin i Guusje Ter Horst di asuntunan Interior ta haña esaki no deseabel i ta bai tuma medida pa kambia e situashon akí.
Mester usa e posibilidatnan eksistente pa protehá datonan personal promé i durante un kaso penal, mas mihó. E dos ministernan a skibi esaki na Tweede Kamer siman pasá. Nan a reakshoná riba e rekonosementu ‘Anonimidat den e proseso penal’. Tambe na a duna òrdu pa hasi un sondeo pasó tabatin señalnan ku víktimanan i testigunan no tabata hasi denunsia dor di miedu pa represaya ora nan identidat bira konosí serka e sospechoso.
For di e rapòrt ‘Anonimidat den e proseso penal’ ta sali na kla ku enbèrdat 13% di víktimanan i testigunan pa e motibu akí no ta hasi denunsia. E ministernan ta haña e situashon akí no deseabel. Pero na mes momentu no tin mag di ta asina ku ta basa sentensianan riba deklarashonnan ku no por kontrolá, ku tur e riesgonan ku esaki ta trese kuné. Komo punto di salida ta konta e ora ei ku denunsianan i deklarashonnan di testigu mas tantu posibel mester ta hasí riba nòmber. A base di e prinsipionan básiko di e proseso penal ulandes i e prinsipionan internashonal di “fair trial”, deklarashonnan anónimo di testigunan lo keda eksepshonal. Pero miéntras por prueba e konfiabilidat di deklarashonnan di denunsiantenan i testigunan di un manera òf otro, ta bon i importante pa tuma medidanan ora ta nesesario.