Esaki ta basa riba un prijs di fuel oil calcula na US $80 pa bari

ORANJESTAD- E publicacion cu prijs di bari di fuel oil ta bou di 100 dollar ta topico di dia. E fuel oil te ainda ta e fuente di energia principal pa e produccion di awa di bebe y electricidad pa nos Isla. Consecuentemente e prijs abou di menos cu 100 dollar pa bari lo tin su consecuencia riba tarifanan di awa y di coriente den e luna nos dilanti.
Si mira e desaroyo di e prijs di fuel oil den e lunanan nos tras, esta augustus y september, por mira cu tin un bahada di rond di $ 100.00 pa $ 90.00 average pa bari. Pues casi $10 dollar of 10% bahada den apenas 1 luna (Mira e grafico).
Esaki ta cambionan drastico den prijs cualnan ya a cuminsa bira custumber den mercado mundial di combustibelnan fossil.
Como empresa responsabel pa produccion di awa di bebe y generacion di electricidad riba nos pais, W.E.B. Aruba N.V. no tin otro opcion sino di adapta e tarifanan den un maneho financiero responsabel. Esaki naturalmente den cuadro di nos mision pa entrega suficiente awa di calidad halto y na e tarifa optimal.
Teniendo esakinan na bista ta determina tarifa di awa y electricidad pa nos pais. Aunke e prijs di fuel oil tabata rond di US$ 90.00 pa bari nos a uza e prijs di 80 dollar pa bari pa calcula e tarifanan pa october, 2008.
Esaki ta posibel danki na e inversionnan importante cu W.E.B. Aruba N.V. a logra den eficiencia cu tecnologia nobo y asina baha e consumo di fuel oil y baha gasto di produci awa y electricidad.
Entrante dia 1 di october 2008 e tarifanan di awa y electricidad ta conoce un bahada di ± 7.7 % of casi 8 %. Esaki ta basa riba un prijs di fuel oil calcula na US $ 80 pa bari.

 

ORANJESTAD- Edmond Eckmeyer ta un hoben hungador di futbol di e ekipo di SC Bubali, kende tin 23 aña di edad. Un tremendo hoben, hopi keto, disciplina y sumamente respetuoso, kende temporada pasa a milita den e ekipo di Deportivo Nacional den division di Honor, pero e temporada aki a dicidi di regresa pa su ex ekipo di SC Bubali, p ayuda e ekipo aki promove di Prome Division pa Division di Honor.
Diasabra ultimo el a hunga cu su ekipo di Bubalo contra di JTL y dialuna anochi a atende training manera di custumber, train duro y a participa cu diaranzon e lo no train pa motibo cu e tin cu traha e anochi ey.
Diamars anochi Edmond a sufri un desmayo na su cas caminda su mayornan a logra di traha cune y el a recupera y bai descansa, y su dia siguiente a lanta y bisa cu tur cos ta bon cune.
Ayera noche algo despues di 9’or, Edmond Eckmeyer ta sak den otro na su trabou na Radisson Hotel, perdiendo conocemento y caminda mesora a pidi presencia di ambulans pa hiba e hoben pa hospital.
Na yegada na hospital a ser informa cu e hoben Edmond a fayece, lagando tur su famia, amigo y coleganan di ekipo di Bubali, den un shock tremendo.
Fuera di ta hunga futbol pa e ekipo di Bubali, Edmond ta hunga biljart tambe pa e ekipo di Bad Dogs.

 

ORANJESTAD- Documentonan cu a cai den man di fraccion di RED ta mustra cu Gobierno di Aruba tin un debe gigantesco di 1,8 billon florin na e fondo di pensioen di APFA. Ta dos partido a goberna Aruba y ta responsabel pa e fiasco aki: AVP y MEP.
Ta costumber cu gobiernonan ta retene e premie cu ta coresponde na APFA pa financia nan mal maneho. Den pasado inclusive APFA mester a entrega den man di ex-minister di finanzas 15 miyon florin.
E politiconan irresponsabel di AVP y MEP a masacra e fondo di pensioen di funcionarionan publico, cu awor e debe a yega e suma astronomico di 1,8 billon florin.
No tin placa pa yega e politiconan irresponsabel di AVP y MEP. Nan ta tuma decision a base di con pa paga bek esnan cu a financia nan campaña anterior y con pa sigura mas voto den e proximo campaña.
Esei ta bai ta e destino tambe di e 300 miyon di Plant NV. E politiconan irresponsabel di AVP y MEP no ta worry cu interes y futuro di Aruba, nan ta preocupa cu interes y futuro di nan partido. En cambio RED ta propone vakministers, ministernan no politico, profesional y honesto, cu lo anda cu placa di pueblo na un manera responsabel.
Eleccion 2009 ta bai ta clave: pueblo tin cu scoge entre e partidonan tradicional cu lo sigi malgasta placa di pueblo of ta scoge pa RED pa stop e malgastamento di placa di pueblo.
EDAD DI PENSIOEN
Fraccion di RED ta contra pa aumenta edad di pensioen como solucion pa atende e problematica di e fondo di AOV. Ta fraccion di RED a bin cu e initiativa pa bin cu un mocion cu a keda aproba den parlamento danki na e sosten di sr. Glenroy Wilson y cu ta bisa cu no por touch e edad di pensioen di pueblo tanten cu e edad di pensioen di minister y parlamentarionan no keda hisa na 60 aña.

ORANJESTAD—Recientemente miembronan di directiva di Fundacion Autismo Aruba a haci un bishita na Minister pa Salud Publico. Meta di e bishita tabata pa haci entrega oficial di dos foyetonan informativo y e poster di e Fundacion, dirigi na amplia e conocemento riba e trastorno den desaroyo aki na Aruba. Obhetivo di Fundacion Autismo Aruba ta trece e topico di autismo mas den publicidad, pa asina busca solucion pa e cantidad di mucha y adultonan cu ta afecta.
Autismo ta un trastorno den desaroyo cu ta parse di ta mas prevalente. Aunke cu falta datonan local pa determina e cifra exacto, Fundacion Autismo Aruba a nota un aumento den necesidad pa informacion riba e topico, y tambe un aumento den necesidad pa cuido y guia relaciona cu autismo.
Na Merca ta papia cu un di 150 mucha cu nace, ta afecta pa autismo. No tin motibo pa pensa cu e cifra aki ta menos na Aruba.
E material informativo, cu ta inclui e dos foyetonan y e poster, lo ta distribui serca tur instancia gubernamental, oficina y instancianan medico, instancianan educativo y publico, pa asina por stimula reconocimento trempan di autismo.
Diagnostico trempan ta brinda e mucha un miho perspectiva, si esaki ta combina cu terapia y guia individual.
E foyetonan ta inclui algun sintoma of comportacion cu mayor of maestronan lo por reconoce den un mucha, ademas di conseho con pa anda cu sintomanan asina. Ta importante pa señala cu no pasobra un mucha tin un of mas di e sintomanan aki, automaticamente e ta autista. Locual e Fundacion kier logra ta, cu si encaso un mucha por ehempel no logra cierto desaroyo na edadnan spesifico, lo ta consehabel pa laga profesionalnan evalua e mucha y determina e miho pasonan pa yud’e den su desaroyo. Otro punto importante pa señala ta cu no tur caso di autismo ta mescos.

 

ORANJESTAD - E realidad ta cu Gabinete Eman a laga e aspecto fysico, mobilario, etc di particularmente scolnan na San Nicolas bay hopi atras. Ironicamente ta hustamente den distrito di San Nicolas cu AVP mayoria biaha ta saca mas voto. En todo caso e negligencia aki a haci cu e aspecto fysico di e scolnan a bay hopi atras haciendo gastonan di renobacion subi hopi.
Aunke e regalo di Gabinete Eman tabata hopi gasto den renobacion, asina mes Gabinete Oduber a logra haci trabaonan grandi di renobacion na scolnan di San Nicolas: esta renobacion di Graf von Zinzondorfschool, Commandeur Pieter Boer school, Maria Regina y Paulus School cu ta casi termina.
Na Graf von Zinzondorfschool e trabao di renobacion a costa Awg 552,000 y esaki tabata en particular e hala banda pasuid cual ta consisti di 4 klas lokaal, 1 bibliotheek, 1 handwerklokaal, 1 lerarenkamer y un kantine.
Na Commandeur Pieter Boer basisschool e trabao di renobacion a costa Awg 1,409,060 y esaki tabata consisti di a renoba 12 klaslokaal, 2 Prisma lokaal, 2 espacio pa oficina, 1 lerarenkamer, 1 directie kamer, 1 opbergruimte y un kantine.
E trabao aki lo tuma 12 luna pa finalisa. Na Maria Regina School e trabao di renobacion tabata general. y esaki a costa Awg 698,180.
Na Paulus school tambe a haci trabao di renobacion general cu a inclui entre otro benta nobo, drechamente di cura, dak nobo y e costonan di inversioin tabata AWG 2,968,530.
En total Gabinete Oduber IV a inverti casi 6 miyon di renobacion di scolnan na San Nicolas: Graf von Zinzondorfschool 552,000; Commandeur Pieter Boer basisschool 1,409,060; Maria Regina School 698,180; Paulusschool 2,968,530, pa un total: 5,627,770.

WILLEMSTAD - Aspafico ta bolbe habri e posibilidat pa inskripshon pa e kompetensia Amistat, Chalan, Amazona i Damanan dianan 10 i 11 di òktober próksimo.
Djabièrnè awor den un ambiente ameno ku Happy Hour tin e posibilidat pa inskribí i alabes tuma tur informashon nesesario.
Esaki ta tuma lugá na Kriadero el Hijo de David na Seru Loraweg djabièrnè awor 3 di òktober pa mitar di 8 (7.30) di anochi.
E kompetensianan mes tambe lo ta na Kriadero El Hijo de David dianan 10 i 11 di òktober awor.
E kompetensia di amistat ta konta ku doñonan di kabai mes lo bai monta nan kabainan dia 10 di òktober i siguiente dia, 11 di òktober lo tin primeramente e Chalan i Amazonanan i despues ta sigui e kompetensia pa Damanan.
E deporte di kabai ta kresiendo i esaki ta danki na e interes di kabayistanan. I p’esei tin di sostené e deporte aki ku partisipashon i asistensia na e kompetensianan.
Un i tur ta invitá pa e kompetensia i pa e kabayistanan djabièrnè awor 3 di òktober pa e anochi di inskripshon i informashon.
Alabes riba e anochi aki tambe por inskribí pa bira miembro di Aspafico den su estilo nobo.

 

HAINAN, China, - E tormenta tropikal “Higos”, e di 17 di e aña aki, ta aserkando e provinsia meridional chines di Hainan, e stashon meteorológiko provinsial a informá awe.
Aktualmente e tormenta aki ta hañando fòrsa, i ta moviendo den direkshon nortwèst na un velosidat di 20 kilometer pa ora.
Despues di a afektá míles di persona na Filipinas, e fenómeno, segun e pronóstikonan di e stashon meteorológiko, lo asotá Laman Sùit di China ku bientunan fuerte i Hainan ku áwaserunan torensial.
A registrá “Higos” nèt despues di paso di tormentanan Jangmi i Hagupit, ku a kousa mas o ménos 20 morto na China.

ARIES: Ta tempu di kambio, bo mester tin hopi kuidou te na unda bo ta dirigí bo mes. Tur lokual ta relashoná ku amor ta eksaltá. 51,28,36.

TAURO: Bo ta dispuesto pa kambia i adaptábu na tur kos. Ofertanan di trabou ku ta yega na bo, ta hopi bon. Purba hasi kosnan pa promé bia. 15,39,01.

GEMINIS: Bo ta bai haña un kontesta sorpresivo di un hende ku no ke a koperá ku bo den pasado. Tur kos ta positivo. Ponebu pa hasi bo obligashonnan pa bo disponé di plaka.

KANSER: Bo ta bai sa di algu ku ta sorprendébu i ku ta yama bo atenshon. Pone tur bo empeño den tur negoshi. Ekselente dia pa ekspresá bo sentimentunan. 44,12,08.

LEO: Kompra i invitashonnan sosial ta mantenébu hopi okupá. Evitá di sali di presupuesto i sigui pasa dor di pruebanan difísil. 01,04,15.

VIRGO: Ta sperábu un dia di hopi aktividat i lo ta nesesario pa bo organisá i tambe delegá responsabilidatnan. No preokupá tantu pa kosnan chikitu. 28,14,05.

LIBRA: Bo aparensia personal ta tuma mayor interes pa bo, loke por lagabu kambia bo estilo i manera di bisti. Bo ta gusta di proyektá un imágen moderno i atraktivo. 18.

SKORPION: Bo eksperensianan di pasado no ta lagábu kometé e mesun erornan. Un tata o un persona ta aklarábu sierto dudanan di algu ku tabata preokupábu. 20.

SAGITARIO: Si bo a hasi lo korekto den bo bida, bo ta rekohé ekselente fruta. Si di lo kontrario bo no a okupábu di kria bo simia, lo bo no tin bon kosecha. 16,20,03.

WILLEMSTAD - E debe ku e kompania distribuidor di produktonan petrolero tin na e kompania petrolero estatal di Venezuela PDVSA ta asina haltu, ku e por nifiká un menasa pa siguridat nashonal di Kòrsou. Gerensia di Curoil a skibi esaki den un karta ku el a manda e siman aki pa Hunta di Komisario di e kompania.
PDVSA, asina e karta ta bisa, por tuma e desishon di tuma Curoil over, pa motibu di no kumplimentu di Kòrsou, asina e kompania lokal ta sigui bisa. Na momentu ku Venezuela haña un influensia mas grandi den distribushon di produktonan petrolero na Kòrsou, e por bai haña mas di bisa na Kòrsou, un situashon ku no ta deseabel, asina un artíkulo ku a sali den e edishon di awe di e korant ulandes De Telegraaf ta señalá.
Segun e mesun artíkulo, ta konosí ku presidente di Venezuela Hugo Chávez Frias no ta riba bon pia ku gobièrnu di presidente George Bush. Pa basta tempu kaba ta eksistí e temor ku Kòrsou lo bira e bala di pinpòn den e lucha entre e dos potensianan aki.
Eksistensia di e base militar merikano na Kòrsou tampoko ta kontribuí na un mihó relashon, pasobra Venezuela a insinuá na diferente okashon ku Merka ta usa e base aki pa realisá aktividatnan militar no deseá den espasio aéreo venezolano. Algun tempu pasá, tabatin un insidente kaminda supuestamente un avion di guera merikano, ku a sali for di Kòrsou a violá espasio aéreo venezolano, un insidente ku Venezuela a tuma ku masha indignashon. E asuntu a bai para te riba nivel diplomátiko entre Antia, Merka i Venezuela.

WILLEMSTAD - Konseho Insular ta reuní mañan un biaha mas, pa diskutí maneho di diputado di Struktura Estatal Zita Jesus- Leito. E tema sentral ta loke oposishon a kalifiká komo maneho intransparente i no konfiabel di e aktual mandatario. E reunion ta basa riba desaroyo di e trayekto Inisiativa Sosial Ekonómiko, SEI.
Motibu direkto pa e reunion ta ekspreshonnan di e diputado, den sentido ku ámtenarnan lo no tin sufisiente kapasidat pa skibi i ehekutá e trayekto aki, ekspreshonnan pa kua partidonan di oposishon a tuma e diputado masha na malu. Partidonan di oposishon ademas ta haña ku e trayekto no ta kanando manera mester ta. Apénas un siman pasá, Konseho Insular tabatin un reunion públiko, kaminda a trata e trayekto SEI ekstensamente, pero kaminda e énfasis tabata, a lo ménos, segun oposishon e mal intenshon di Bestuurscollege di Kòrsou pa duna un solo konsultent tur trabou di SEI, pa e montante di 1.5 mion florin.
Partidonan di oposishon a presentá un moshon di deskonfiansa kontra e diputado menshoná, pero koalishon a rechasá e moshon aki ku e mayoria mínimo di 11 voto kontra i 10 voto na fabor. E reunion di mañan atrobe ta pa trata SEI, pero mas tantu e maneho di e diputado ku partidonan opositor ta konsiderá intransparente. E reunion ta tuma lugá 9or di mainta.

WILLEMSTAD - Relashoná ku e trabounan ku a kuminsá ayera pa drecha Kaminda pa Soto, tráfiko ta kambia i ta nesesario desviá tur vehíkulo pa asina e kontratista por traha ku mas efisiensia. Nos ta pidi tur hende pa tene kuenta ku esei, asina lider di e proyekto aki Jorge Middelhof, empleado di DOW a deklará ayera tardi. E proyekto a keda prepará pa servisio di Obranan Públiko (DOW) i lo ser ehekutá pa kontratista MNO-Vervat.
E trabounan lo ser ehekutá den tres fase i lo bin tèrminá na aña 2009 den luna di mei. E promé fase lo dura mas o ménos 5 pa 6 siman. Otro aña, esta despues di “bouwvakantie” pa meimei di yanüari lo start ku e di dos fase, ku lo yega te na altura di e krusada di Landhuis Pannekoek, ku lo bin tèrminá mas o ménos na final di febrüari 2009.
E di tres fase lo ta for di krusada di Landhuis Pannekoek te ku dokterskamer Soto, ku lo ta e parti final di e proyekto, ku lo ta na mei 2009.
“Mi kier a pidi tur usuarionan di e kaminda pa sigui e instrukshonnan di desviashon di e kaminda i respetá esakinan durante ehekushon di e proyekto. E tráfiko ku ta bini di Punda, lo mester desviá na e krusada di kaminda di Soto pariba di San Juan Center i bolbe alkansá e kaminda di Soto, via di e kaminda di tera ku ta kore paralelo ku e kaminda prinsipal di Soto.
E tráfiko ku ta bini for di Banda Bou, lo por sigui hasi uso normalmente, den un solo direkshon di e kaminda di Soto, siguiendo e señalnan di bòrchi,” asina Middelhof a deklará. E pida kaminda ku ta bai traha riba dje awor aki ta parsialmente será. Tráfiko ku ta bini di Bándabou direkshon Punda por pasa, pero esun di Bándariba pa bai Bándabou, mester pasa den un kaminda alternativo.

WILLEMSTAD - Ku un mashin grandi, diputado Anthony Godett a duna señal pa kuminsá ku e trabounan pa drecha Kaminda pa Soto. Esei a sosodé ayera tardi, na altura di San Juan Center. Servisio pa Obra Públiko (DOW) a kuminsá di e forma aki ku e trabounan pa drecha Weg naar Soto. Ta trata di e parti entre aki na San Juan Center i ofisina di dòkter na Soto. E proyekto aki ta karga e nòmber di “Rekonstrukshon Kaminda pa Soto fase III”.
E trabounan lo tin durashon di aproksimadamente 21 siman.
Manera ta konosí, anteriormente a drecha entrada di Weg naar Soto na altura di Krakeel ku tambe tabata den kondishon pésimo. Tur hende por a weta kon e entrada aki a keda, un kos bunita i e ta mas seif pa tráfiko, segun diputado Godett.
Awor ta bai drecha e parti aki entre San Juan Center i e ofisina di dòkter na Soto ku tin un largura di 3 kilometer. E intenshon ta – manera ya a bira kustumber ora DOW ta ehekutá e tipo di proyektonan asin’aki – pa konstruí un kaminda ku ta bai pa hopi aña. E intenshon ta pa, despues di saka e fundeshi bieu, pone un fundeshi nobo di 25 centimeter di pieda blanku (e asina yamá “kalksteen”). E promé kapa di asfalt (konosí komo “binder”) i e kapa final di asfalt lo ta huntu 9 centimeter, ku ta garantisá un durashon muchu mas largu.
“En prinsipio e trabounan lo tin un durashon manera m’a bisa kaba di mas o ménos 21 siman. E ta un periodo ku por parse largu, pero mi ta konvensí ku pronto boso lo disponé di un kaya nobo, bunita pa hasi uso di dje,”e mandatario a agregá.

WILLEMSTAD - Durante un happy hour kolaborador, amigu i relashonnan di Betonindustrie Brievengat a bebe nan serbes tradishonal pa selebrá e echo ku nan a yega e punta mas haltu di nan edifisio nobo. Den e edifisio nobo akí Betonindustrie Brievengat lo establesé un mashin nobo di blòki di betòn, marka Masa. Konsekuentemente denter di poko lo e por dòbel e produkshon di blòki, klenku i material ku ta usa pa traha kaya i asera.
Na opinion di direktor Roy Voogt: “Realidat tabata urgí pa konstruí un fábrika nobo di blòki. Prueba ta ku den kurso di 2006 i 2007 demanda di nos blòki i klenkunan i material ku ta usa pa traha kaya i asera kada bes a bira mas grandi. P’esei nos tabata kontentu dia na òktober 2007 nos Raad van Bestuur a duna pèrmit pa invertí Naf. 15 mion den un planta di blòki nobo. Na 2008 demanda a bolbe subi, anto konsiderablemente i apesar di un produkshon kasi kontinuo, 6 dia pa siman, 24 ora pa dia, ainda ta difísil pa satisfasé e demanda aktual”.
Segun ekspektativa di Betonindustrie Brievengat na fin di yanüari 2009 ya kaba promé produktonan di e mashin nobo, marka Masa, lo ta riba merkado. I direktor Roy Voogt a kontinuá: “Ku invershonnan manera esaki na Betonindustrie Brievengat nos ta keda hasi nos máksimo esfuerso pa den añanan benidero nos sigui sirbi nos klientenan óptimamente, entregando nan nos konosido produktonan di kalidat.”
Riba e pòtrètnan por mira e hal espasioso kaminda lo monta e mashin di blòki, marka Masa. Tambe por apresiá dos silo nobo di semènt, ku ta parti di e planta nobo di blòki, ku un kapasidat di 100 tòn di semènt pa pida.

WILLEMSTAD - VKC ta bai atkerí hende pa amplia su kantidat di miembronan. Manera ta kustumber, un biaha den dos aña ta kuminsá un kampaña pa atkerí miembro nobo pa asina remplasá esnan ku pa un òf otro motibu no ta hopi aktivo mas.
E aña’ki VKC ta organisá un dia habri na kazèrne di marinir di Suffisant. Tur hende ku ta interesá pa inskribí por pasa e dia aki i lo por disfrutá di diferente show i alabes haña informashon tokante di VKC i kiko ta enserá bira miembro. Naturalmente, por trese bo famia tambe pa nan tambe wak mesora ki tipo di organisashon e futuro miembro ta drenta den dje.
E dia habri djadumingu awor 5 di òktober ta kuminsá 9:00 i porta di kazèrne lo ta habri for di 8:30 pa risibí hende. Lo tin un programa ekstenso, kaminda lo tin demonstrashon di diferente unidat di e kuerpo, lo tin video, informashon tokante miembresia i mas kos.
E dia lo habri ofisial ku e “vlaggeparade”, kual ta e apèl ku tur djadumingu e kuerpo ta kuminsá kuné. E biaha aki esaki lo ta den man di e “show peloton” di VKC. Akinan e komandante di VKC, Teniente-Kolonel Ronald Ferrero lo hiba palabra ofisial.
Pa mas informashon por yama 568-1877 durante oranan di ofisina òf por yama 560-4773 òf 525-0033 despues di oranan di ofisina.

WILLEMSTAD – Kada bia ku mester evakuá e edifisio di CEMS pa motibu di un anunsio di bòm na International School, CEMS ta sufri hopi inkombeniensia. Awe pa di kuater biaha e aña akí esei tabata e kaso. Direktor drs. Sharlon Melfor ta hopi desgustá.
Awe mainta den kareda di mitar di nuebe un biaha mas tabatin un anunsio di bòm na International School na Emmastad. E anunsio a drenta via di telefòn. Mes ora a evakuá e alumnonan i tambe personal di CEMS ku ta ubiká un edifisio djis banda di e skol. Melfor a bisa, ku kada bia ku e mester evakuá su personal, e empresa ta pèrdè plaka i ta sufri hopi inkombeniensia. “Nos mester sigui paga nos personal ku ta traha den atministrashon pa tur e oranan ku nan no ta produsiendo. Esaki ta plaka bentá afó. Di otro un banda nos tin ku bai ku tur nos material na un otro sitio. Aktualmente nos ta bayendo riba e vèlt di Rust & Burgh kaminda nos lo stashoná nos ambulansnan. Esaki ta trese kuné ku si algu serio pasa, nos no por bai bèk nos edifisio pa kue e sobrá materialnan ku nos a laga atras.”
Anteriormente tabatin kuater kaso di anunsio di bòm na e skol i tur a resultá di ta falsu. Den un di e kasonan reshèrshi a detené algun alumno i Ministerio Públiko tin e kasonan planiá pa atendé na desèmber. Den un otro kaso e direktor di e skol a nenga na entregá un keho, na momentu ku reshèrshi a konfront’é ku e number di telefòn ku a yama i hasi e anunsio di bòm. A resultá di tabata un ‘amigu’ ku kier a hasi un wega. Na e momentunan ei ya reshèrshi a hinka hopi ora kaba den e investigashon, trahando te lat den fin di siman pa por a logra lokalisá e number ku a hasi e yamada. Tur e trabou di reshèrshi a resultá pòrnada.

WILLEMSTAD – Asosashon Tráfiko Sigur Kòrsou a presentá un lista ku e dies kareteranan riba kua mas tantu hende a muri dor di un aksidente di tráfiko. E lista ta kubri un periodo di ocho aña i ta menshoná un kantidat di 101 hende ku a muri a konsekuensia di un aksidente di tráfiko.
(1) E kaminda di Bándabou ta aparesé riba e promé lugá riba e lista, ku un total di 36 morto te ku aña pasá. (2) Riba F.D. Rooseveltweg 17 hende a muri dor di un aksidente. (3) Un kantidat di ocho hende a muri riba e kaminda di Nieuwe Haven. E mesun kantidat di hende a muri riba (4) Caracasbaaiweg komo riba (5) e kaminda ku den boka di pueblo yama EEG-weg. E kaminda di Soto tabata esenario pa seis aksidente ku morto meskos ku tabata e kaso ku (6) Sta. Rosaweg. Finalmente riba (7) Schottegatweg tabatin sinku aksidente ku morto meskos ku (8) Weg naar St. Joris.
E asosashon ta bisa ku relashoná ku adaptashon i mantenshon di e infrastruktura di nos kayanan, e ta haña ku ta na su lugá pa publiká e kayanan riba kua, durante último añanan, mas tantu hende a muri dor di un aksidente. Esaki ta pa ora e departamentunan konserní tuma e desishon pa hasi adaptashon na e kayanan, kòrda hasi un investigashon mas profundo di entre otro e motibunan dikon riba e kayanan akí tin relativamente mas aksidente ku morto komo konsekuensia, kompará ku otro kareteranan.

WILLEMSTAD – Kòrsou a avansá hopi leu den negosiashonnan pa un status Outónomo den Reino. “Es mas, Kòrsou lo haña un status outónomo kompleto, kontrali na loke opositornan ta bisando”, asina diputado enkargá ku Struktura Estatal Zita Jesus-Leito a bisa despues di e deliberashonnan ku a tuma lugá ayera. E deliberashonnan a kulminá den akuerdo riba diferente aspekto importante, manera e lei di polis ku tabata asina tantu den diskushon. Ta parse manera kos ku prinsipalmente Ulanda a haña e mensahe kla ku Kòrsou (i Sint Maarten) lo no aseptá un Kuerpo di Polis ku ta supordiná na Ulanda òf outoridatnan ulandes, manera e minister di Hustisia di Ulanda. Ayera Ulanda a bin ku un posishon mas fleksibel den e diskushonnan, loke a pone ku a yega na un akuerdo riba diferente punto, inkluyendo e struktura i responsabilidat pa Kuerpo di Polis den futuro.
Ku e deliberashon di ayera a konkluí, ku no tin nada mas pa stroba un Konferensha di Mesa Rondó dia 15 di desèmber awor, asina sekretario di Estado Bijleveld (Relashonnan di Reino) a bisa despues di e deliberashonnan ku mandatarionan di Antianan Ulandes, Kòrsou i Sint-Maarten durante un deliberashon polítiko na Willemstad (Kòrsou).
Den e kumbre polítiko a logra un akuerdo riba legislashon polisial pa e relashonnan estatal nobo. Punto di salida di e legislashon polisial nobo ta un organisashon polisial di kalidat sobresaliente i íntegro. Na momentu ku Kòrsou i Sint Maarten bira pais den Reino, nan ta haña kada unu su propio kuerpo polisial. Boneiru, Saba i Sint Eustatius, konhuntamente, ta haña un kuerpo polisial, na momentu ku e islanan aki bira un munisipio partikular (‘bijzondere gemeente’) di Ulanda.

WILLEMSTAD – Si Curoil disparsé, henter ekonomia di Kòrsou i Boneiru lo kore peliger. Asina direktor di e kompania Gensley Capella ta bisa den un karta ku a bai pa diputado di Aqualectra, Hunta di Komisario i miembronan di STIP ayera. E karta a yega medionan, inkluyendo medionan na Ulanda, promé ku el a yega serka esnan promé destiná. No ta masha kla kon esei por a tuma lugá.
Den su karta Capella ta bisa entre otro ku ta for di aprel último e kompania a tene un presentashon ku e título “Hoe lang nog?” den kua a anunsiá ku e situashon a bira hopi agudo i ku mester bai tuma pasonan den korte pa haña e ahustenan nesesario di parti di Gobièrnu di Kòrsou. Loke ta resaltá den e karta di kua LA PRENSA tin un kopia ta ku Curoil tin un debe astronómiko na PDVSA di den kareda di 150 mion florin. E karta por sierto ta poko inkonsistente den su sifranan, pasobra Kerensha ta bisa ku dia 31 di ougùstùs di e aña aki a debe na PDVSA tabata 271.5006, 577 florin di kua den sèptèmber e kompania a paga 86.489.454, 45 florin (271 kita 86 ta 185 mion florin!).
Loke si Kerensha ta atvertí p’e ta ku PDVSA por hinka 18 porshento di interes den e kuenta si dado momentu e kompania no haña su pago na tempu “Tur hende por imaginá nan mes ku 18 porshento di interes riba un suma di algun mion dollar tin un impakto enorme”, asina Capella ta bisa.
Capella ta bisa ku e situashon ta hopi penoso pa e kompania i mester bin ahuste masha purá. Konsiderando e pre-finasiamentu den e kaso aki, por konkluí ku mester hasi masha purá pa haña e suma aki bèk den 12 luna. Si esei no ta e kaso, e ora ei Curoil mester di un inyekshon di 100 mion florin pa kumpli ku su obligashonnan versus di PDVSA.

WILLEMSTAD – E presupuesto di Teritorio Insular di Kòrsou pa 2009 ta sera ku un défisit di 15 mion florin. Riba e parti di gastunan normal di gobièrnu tin un surplus di 700 mil florin, miéntras ku riba e parti di kapital tin un défisit di 15.7 mion florin. Ku e défisit aki ta kumpli ku e eksigensianan pa den 2009 tin un presupuesto balansá, manera a kumbiní den e Medida di Reino pa supervishon finansiero. Tambe ta kumpli ku e norma di interes manera palabra, asina diputado Mike Willem a bisa den un komunikado, por sierto na ulandes. Esei ta habri kaminda, manera palabrá ku Ulanda, pa kuminsá saneamentu di debe di Kòrsou.
Ku presentashon di e presupuesto pa 2009, Teritorio Insular di Kòrsou ta kumpli ku e eksigensia ku e presupuesto aki mester ta presentá pa mas tardá dia 1 di òktober na Konseho Insular. Proksimamente lo atendé e diferente aspektonan di e presupuesto den Komishon di preparashon pa despues atend’é den un reunion públiko.

Prof. dr. Lorito ta yama tur hende un felis djaweps. Ta masha kos ta pasando den e dianan aki. Lorito a bula masha hopi kilometer tras di otro pa sigui e kos aki, despues e otro kos aya i finalmente wak si por a haña un palu den mondi pa sosegá riba dje. Bida di loritonan no ta fásil!
*********
Awe mainta Lorito a topa Doña Zita tur na kòrá. Nos ta komprondé p’e, pasobra ora bo yega kas lat anochi ta masha difísil pa bo prepará loke bo ta bisti pa e siguiente dia. Ademas kòrá a ked’é masha bunita mes (mas mihó ku hel!). Doña Zita ta kontentu, pasobra kon ku bo bòltu i bir’é, e deliberashonnan di ayera a tapa boka di hopi hende!
*********
Kòrsou ta riba kaminda pa status outónomo, ounke Lorito mes ta antisipá masha problema ainda. Un di nan ta kon i unda ta bai posishoná empleadonan públiko di Land. Algun di nan a keda yama Lorito ku insistensia pa bisa, ku nan ta masha preokupá. Ke hinka nan den un situashon transitorio, pero nan no ke tende di nada transitorio si no tin garantia pretu riba blanku pa futuro. “Nos a siña nos lès ku e promesanan di gobièrnu”, asina un di nan a bisa. Nos ta kere ku nan ta hasi masha bon pa tin sierto koutela!
*********
Imaginábu nan mandabu di Ministerio di Enseñansa pa Servisio di Enseñansa anto nada no ta kla. Imaginábu ku no tin ni stul pa sinta. Ta kon ta hasi. Imaginábo nan mandabu di Ministerio di Asuntunan Ekonómiko pa DEZ. Anto ta ken ta bira e hefe anto? Tur ta puntonan ku mester atendé ainda i no ta masha kla! Personalmente Lorito ta tene su kurason pa kualke káos ku lo surgi!