WILLEMSTAD – Un grupo di habitante di Bándabou sumamente desgustá a denunsiá awe kon a sera e Playa di Daaibooi pa un fiesta privá. E habitantenan a reklamá ku e playa ta será pa un fiesta privá di un grupo di merikano mionario.
Dòlfi Debrot di Carmabi a splika ku ta trata di un playa públiko ku konstantemente mester ta habrí i ku pasashi liber pa tur hende por drenta. “E playa enbèrdat ta kai bou di Carmabi, pero ta hür nos ta hür’é ku un persona ku ta paga un montante tur luna i e ta atendé ku e playa. Mi mes no ta na altura di niun seramentu di e playa i kasi mi no por kere esaki tampoko.” Un investigashon chikitu a trese na kla ku e persona ku ta eksplotá e playa yama Kees van Dongen. Den un kòmbersashon ku van Dongen, el a bisa mes ora ku ta trata di un ‘misunderstanding’ i ku tur hende por bishitá e playa awe. “Nos tabatin e intenshon pa e sera e playa awe kompletamente pa públiko, pero esei a resultá di ta un eror. Entretantu nos a habrié bèk i tur hende por bin awe sin problema. Sinembargo ta un parti di e playa so públiko lo por usa, pasó a reservá un otro parti pa un fiesta privá.”
Loke a iritá e bishitantenan awe ta ku ora nan a yega na e kaminda ku ta kondusí pa e playa, nan a topa ku bewakernan di un kompania di seguridat, di kua LA PRENSA tin e nòmber. “Bou di niun sirkunstansia e bewakernan no kier a laga niun hende pasa”, un di e bishitantenan a deklará. “Ora ku nos a puntra e bewakernan si nan tin pèrmit pa sera e kaminda, nan a bisa si. Nos a haña e situashon masha remarkabel pasó ta un kaminda públiko i ta polis so por sera un kaminda públiko.”

WILLEMSTAD – E kompania di seguridat Securitas Antias i Grupo Impacto a krusa kaya pa drenta un ofisina nobo den e edifisio monumental renová na Scharlooweg 19. Ku un duelo di dos trompetista, un riba e bòrdèshi di e ofisina anterior na Scharlooweg 104 i un riba esun di e ofisina nobo na Scharlooweg 19, a simbolisá e mudansa aki. Gezaghèber Lisa Dindial a duna señal na e sinku yunan di e rumannan Guido i Jeroen Kibbelaar pa hisa un kòrtina, di moda ku e porta a habrí pa e ofisina nobo bira bisto pa un i tur. Na 1981 defuntu èks gezaghèber Anno Kibbelaar a lanta Securitas i na 1987 Uitzendbureau Impacto.

WILLEMSTAD - Fundashon Sedreko ya pa algun aña ta organisando den fakansi di luna di òktober un “work-shop” pa tur kolaboradó/boluntario ku mester sirbi pa yuda lanta nivel.
E aña aki esei ta e kaso atrobe.
E “workshop” di e aña aki lo ta na enkargo di sr. Wendell Prince i sr. Robert Coffie, dos dirigente di nos ku no tin mester di muchu introdukshon.
E “work-shop” ta start djaluna 6 di òktober 14.30 pm den sala di NAVU na Brievengat. Tur kolaboradó/boluntario di Fundashon Sedreko ta invitá pa partisipá na e “work-shop” aki:
E programa ta lo siguiente:
Djaluna 6 òktober:
14.30-17.00:
Sr. Wendell Prince:
Tema: “Coaching” i su Filosofia.
-Kon pa prepará e deportista físikamente.
Djamars 7 di òktober:
14.30-16.00:
Sr. Robert Coffie: Konsepto di ta eksitoso den bida.
16.00-17.00:
Sr. Wendell Prince: Kon pa yuda e deportista kore mihó.
Djarason 8 di òktober:
14.30-17.00:
Robert Coffie:
Tema: Komunikashon/Balornan.
Djaweps 9 di òktober:
14.30-17.00:
Tema: Kualidatnan di un bon lider.
Djabièrnè 10 òktober:
14.30-17.00:
Tema: Kon aktitut por afektá un lider i esnan ku e ta guia.
Motivashon.

WILLEMSTAD – Gobièrnu lo bai sembra den un fondo pa krea mas atleta riba nivel haltu ku partisipashon na Mundial 2009 i Weganan Olímpiko na 2012.
For di e 300 mil florin ku Gobièrnu Sentral a pone disponibel pa Weganan Olímpiko a sobra i ku e satisfakshon grandi ta biba awe den e pueblo. Minister Omayra Leeflang den un entrevista ku LA PRENSA ta splika e dia ku tabatin firmamentu pa e fondo ku a keda destiná pa partisipashon na Weganan Olímpiko a tuma lugá den un sala bashí ku únikamente 1 periodista ku tabata presente. Awe un i tur por mira ku e vishon ta kompletá, ya ku a usa fe pa inbertí, ya ku fe ta nifiká kere den kosnan ku ainda no tei.
E frutanan awe ta bisto i ku lo sigui traha duru pa na Weganan Olímpiko na 2012 lo tin partisipashon di un hende muhé. Minister Leeflang ta hasi menshon di nòmbernan manera Bryan Mariano, Prince Kwidama i deportista Bell di St. Maarten mester ta figuranan ku lo sobresalí den e próksimo olimpiada. Promé ku esaki na 2009 lo inbertí pa mundial i ku sigur lo bolbe mira Churandy Martina den akshon huntu ku otronan ku lo bai forma parti di e kompetensianan aki.
E mandatario ta mustra ku e invershon den weganan olímpiko a kontribuí pa e komunidat komprondé ku olimpiada ta un deporte tòp i importansia di deporte olímpiko a keda aseptá pa e pueblo. E partisipashon di Churandy Martina a logra ku deporte olímpiko a lanta para i ta kontribuí ku tur loke tin abou tambe ta bin ariba, segun minister Leeflang ta deklará na LA PRENSA.

WILLEMSTAD – Ainda e partido National Aliance no a nombra nan kandidato pa okupá e puesto di sekretario di estado na lugá di Joan Smart-Berkel, kende a tuma su retiru entrante 1 òktober. Tur tarea ku e sekretario di estado tabata pendiente di dje, a pasa pa minister di salubridat Omayra Leeflang, kende tin e responsabilidat final pa atendé ku tareanan ku ta kai bou di e kartera aki.
Un di e investigashonnan ku ainda ta den proseso ta esun di Hunta di Supervishon di Brasami, ku eks sekretario di estado Smart-Berkel a duna enkargo pa hasi. E proseso aki ta tumando basta tempu i ku no ta konosí kon leu e Hunta di Supervishon ta ku e tarea aki. Echo ta ku e asuntu aki ta tumando su tempu, miéntras ku direktiva di Brasami no ta laga sa nada di nan parti riba e partikularidat aki. E silensio sigur ta hasi ku prensa no ta haña informashon, miéntras ku direktor Marcel Pinedo ta sigui na kas.
LA PRENSA a trata di kòmbersá ku Pinedo, kende a indiká ku e no sa di nada, ya ku no ta tendiendo nada di esnan ku ta atendé ku investigashon rònt di su persona. Miéntras tantu tur akusashon ta keda bibu i Brasami ta sigui den e situashon status quo. A akusá Pinedo di vários punto, ku e mes a rechasá den entrevistanan previo. E presidente di direktiva di Brasami, Noraida Klaber, ya no ta dunando komentario na prensa, pero ta preferá di purba pa tin tur kos bou di kòntròl.
Fuentenan yegá ta informá LA PRENSA ku mester bin ku un supervishon interno den Brasami, ya ku tin hopi kos for di òrdu tumando tuma lugá, ku internamente ta purba pa nan no mira lus di dia. Reglanan doméstiko ta algu ku ya niun di e klientenan no ta tene nan mes na dje, prinsipalmente esnan di departamentu di detoksifikashon. Tin indikashon ku for di momentu ku a pèrmití entrada di klientenan femenino tin kosnan ku no ta kana bon, prinsipalmente den oranan di anochi.

Lorito ta yama tur hende un felis djabièrnè. Nos a pasa na yegada di Churandy i tabatin masha hende entusiasmá. Despues a bai konferensha di prensa kaminda tambe tabatin yen di hende ta warda, inkluyendo diferente hende for di Venezuela. Nan tur tabata ke saka pòtrèt ku nos Churandy. Esei ta un indikashon kon deporte ta uni pueblonan.
*********
Churandy, Lorito ke deseábu un felis estadia aki. Nos sa ku bo ta sinti bo hopi emoshoná i honrá pa e homenahe aki. Kere nos ku bo meresé! Nos lo bula wak i sigui tur aktividat di serka!
*********
Lorito tabatin e oportunidat tambe pa bai Staten di Antia ayera. Na yegada un dama a pretendé ku nos no por a drenta komo ku no tin lugá. Nos a bis’é bon kla ku ta un reunion di karakter públiko tin i no por stroba niun hende di drenta. Si Staten tin un seshon públiko i no tin lugá, ta Staten mester karga e konsekuensia aki i no a hende ku kier sigui e debatenan di serka. Nos ta kere ku mester atendé e kos aki purá.
*********
Staten a reuní na e edifisio kaminda ántes tabata Banko Sentral, pasobra na su edifisio mes tin yen di problema, entre otro ku zonidu. Di loke nos a sigui ayera por bisa ku e diskushonnan sigur tabata na nivel, ku eksepshon di algun parlamentario ku no por evitá di ta “chistoso”. Un di nan a puntra ki dia euro ta bira 10 florin! E kos a keda manera kos ku e no tin nada di hasi!
*********
Presidente di Banko Sentral a kontestá tur pregunta den e kaso aki. Un kos ku a resultá masha preokupante ta ku APNA a pèrdè den e último lunanan mas ku 160 mion florin riba su invershonnan. Awor aki e por kubri 98 porshento di penshun. Promé ku e krísis na Merka esei tabata 101 porshento. E situashon ta nifiká ku APNA mester trata di rekuperá e diferensha i den e kaso mas ekstremo lo mester subi prima. Ya bo sa ku e krísis na Merka no ta kos di hasi wega kuné.

WILLEMSTAD – Por lo pronto no por baha preis di awa, koriente i gasolin. Asina Curoil ta bisa den un análisis di kua LA PRENSA tin un kopia. Es mas, e kompania ta bisa, ku si preisnan keda manera nan ta awe (86 dollar pa barí) lo dura den e kaso mas optimista 5 aña promé ku rekuperá loke e kompania a supsidiá den último añanan i den e kaso ekstremo mas ku 13 aña promé ku kualke ahuste por tuma lugá. “Si e preisnan di 25 di sèptèmber último keda stabil, Curoil lo rekuperá 860 mil florin pa luna. Lo tuma 5 aña pa rekuperá 53.8 mion ku e kompania a prefinansiá den 2008 (un aña so) i 13 aña pa rekuperá e 136.3 mion florin ku ta data for di e periodo ku ta data for di 2008.
Si preisnan baha ku 10 dollar adishonal, e kompania lo rekuperá 2.4 mion florin pa luna loke lo nifiká ku e periodo pa e kompania rekuperá tur suma prefinansiá ta mas kòrtiku.
E kompania ta bisa, ku si preisnan sigui baha, esei por eliminá loke e kompania a prefinansiá riba tèrmino mas largu. Merkado sinembargo ta karakterisá pa moveshonnan ku no por pronostiká. Ounke ku e merkado aktual lo por a kondusí na redukshon di preis bou di sirkunstansianan normal, e redukshonnan aki no por tuma lugá pa motibu di polítika di gobièrnu den pasado. Ounke ku e kompania no ta bisa esei, e kompania ta referí opviamente na e proyekto di Fondo di Energia ku a resultá un maneho desastroso ku awe komunidat kompleto ta paga p’e. Pa yega na un konklushon satisfaktorio di e desaroyonan, esei ta rekerí akshonnan konkreto di gobièrnu i e kompromiso pa atendé e situashon. “Supsidionan kubrí (“ku maskarada”) lo no yuda”, asina e kompania ta bisa.

DEN HAAG/WILLEMSTAD – Na Ulanda a tuma lugá awe apertura di un eksposishon interesante ku a haña e nòmber “De reis door het onbewuste” di e artista Yu di Kòrsou, Ivar Pieternella.
E konosido artista Jose Capricorne a habri e eksposishon. Entre esnan presente tabatin minister Plenipotensiario Paul Comenencia. Ivar Pieternella ta yu di eks minister Plenipotensiario i Asuntonan Ekonómiko, Richard Pieternella ku tambe tabata presente na e apertura di awe. Ivar a nase na Kòrsou i ta biba na Ulanda for di 1988 kaminda el a hasi diferente estudio pa desaroyá su mes. For di 1993 e ta sufri un forma di schizofrenia. Arte ta su manera pa saka i apsorbá su sentimentunan. Por mira e eksposishon te dia 15 di desèmber awor. E pòtrètnan ta kortesia di Kas di Antia/Studio FVS.

WILLEMSTAD/ SCHIPHOL – Korte di Schiphol a kondená awe 3 miembro di Parbo Brassband pa transporte di droga for di Sürnam pa Ulanda. Ta trata di un lote di 3,5 kilo transportá dor di shete miembro di e banda. E kastigu di mas haltu tabata 22 luna.
Marechaussee a detené e sospechosonan dia 29 mart e aña akí. Tabata trata di shete miembro di e brassband ku tabatin bolita gulí. Fiskal a eksihí kastigunan ku a alkansá 40 luna. E kastigu di mas haltu tabata pa e sospechoso prinsipal Naomi D. di 28 aña di edat. E tabatin un ròl prinsipal den e transportashon segun fiskal. E otro dos sospechosonan Dorine E. (28) i Rachel D. (25) a haña un aña i mei di kastigu. E kastigunan tabata mas haltu ku normal ora ta trata gulidónan di bolita. Esaki tabata pa motibu ku Korte a tene e tres sospechosonan responsabel pa e totalidat ku nan a transportá partí bou di nan shete. Anteriormente e kuater otro miembronan di e brassband a haña un aña i mei di kastigu.

WILLEMSTAD/ DEN HAAG – Un reglamentu pa vestuario temporal (kledingvoorschrift) pa polis, ku minister pa Asuntunan Interior Guusje Ter Horst a traha, ta prohibí renchi, piercing, tatuahe, kabei largu i kabes mará. Akí na Kòrsou polisnan no ta ni bisti nan plachi di nòmber, manera nan ‘kledingvoorschrift’ ta stipulá.
E medida di Ter Horst ta pa yega na un kuerpo neutral i no partidario. Polisnan a reakshoná rabiá riba e idea di Ter Horst. Nan ta haña e plan ridíkulo. “Nada no tin mag mas. E minister a pèrdè kabes kompletamente”, segun un bosero di e bònt di polis ACP. “Ta mas importante ku un hende ta hasi su trabou bon i ku nos ta un refleho di komunidat. Aweró bo tin ku rekonstruí bo kara pa bo por traha komo polis.”

Kòrsou

Polisnan na Kòrsou por lo general no ta mantené nan mes na e reglamentu pa vestuario ku ta konta pa nan. Kasi niun polis no ta bisti su plachi di nòmber i diferente di nan ta bisti un T-shirt bou di nan kamisa, loke ta kontra di e reglamentu di vestuario. Meskos ta konta tambe pa e flùit ku ta forma parti di nan unifòrm. Bistimentu di pèchi tambe ta manera un problema den Kuerpo Polisial di Kòrsou. Polisnan ta kana riba kaya sin pèchi manera ta algu normal. No papia mes di tatuahe i renchi di orea. Diferente polis ta kana rònt ku tatuahe grandi riba nan brasa i mannan. Meskos ta konta tambe pa bistimentu di renchi na orea. Tin un gran kantidat di polis ta bisti renchi di orea bou di ora di trabou. Den nan tempu liber ta pió. Na e warda di polis na Molenplein tabatin un polis sintá tras di e bali na entrada, ku un renchi di oro na kada orea. E tabata e promé polis ku bo ta topa ora bo drenta e warda di polis.

WILLEMSTAD – E siman aki presidente di komishon, ku ta investigá problemanan ku a surgi na apertura di aña akadémiko 2008-2009 na UNA, Ron Gomes Casseres, a duna un bista di e estado di e investigashon. Gomes Casseres a informá minister Leeflang ku a duna e enkargo ku e investigashon ta kla, pero ku mester duna tempu na tur esnan ku nan a entrevistá pa duna nan reakshon riba e resúmen ku a traha. Komo ku a entrevistá 36 persona lo mester duna kada un resúmen di nan propio deklarashon. Relashoná ku e prosedura aki ku ta unu nesesario, lo mester di algun tempu mas i p’esei lo entregá e rapòrt final 15 di òktober. Intenshon ta pa tene un konferensha di prensa den kua lo duna un informashon riba e kontenido, asina e minister a informá.

WILLEMSTAD – Ayera nochi e atleta Churandy Martina a regresá Kòrsou for di despues di su hazaña durante di Weganan Olímpiko na Beijing, China.
Despues di a keda deskualifiká riba 200m, kaminda el a sali na di dos lugá, Martina mester a regresá El Paso, Texas pa bai skol.
Ayera nochi el a regresá Kòrsou i a keda risibí pa un multitut basta grandi na aeropuerto.
E tabata den kompania di su mayornan, su namorada, huntu ku algun miembro di e Federashon di Atletismo, spesialmente sr. Anthony Stephens.
Despues di su yega el a bai un rueda di prensa ku a keda organisá pa NAOC, den sala Daniel na WTC.
Awe Churandy Martina tin un dia basta drùk.
Pa mainta 9’or e lo ta di bishita na UNA, huntu ku sr. Philip Elhage durante di un homenahe.
Despues banda di 09:45am te ku 10:45 mainta Martina lo ta serka sr. Gobernador.
Pa 7’or di anochi e lo bai ta den SDK pa e homenahe i despues lo e bai Big Shot Concert den Festival Center.
Mañan djasabra lo e tin un lunch ku UTS den Le Clochard i despues mèrdia 2’or lo e ta den un òptògt te ku 7’or i pa 8’or di anochi lo e tin un dinner ku spònsernan den O’ Mundo.
Djadumingu pa mitar di 3 lo e ta bèk rumbo pa Merka ku American Airlines.

PUERTO LA CRUZ – E selekshon di beisbòl di Antia Ulandes ku ta formá eksklusivamente pa hungadónan di Kòrsou ayera a logra un triunfo importante, logrando nan di kuater viktoria i ta na un pase pa hunga den e Mundial di Beisbòl di otro aña.
Kontra di tur espektativa, e selekshon di Antia ta dunando sorpresa tras di sorpresa den e torneo na Venezuela.
Despues di a logra tres triunfo den e weganan preliminar ayera nan a kuminsá hunga den e weganan di playoff.
Ayera den e promé partido den stadion Alfonso Carrasquel, Antia ta logra un triunfo di 2-1 riba Brazil.
Raymond “Links” Martis a tira shete ining i tene e selekshon di Brazil na un kareda.
Lorvin Louisa ta konektá honron solitario den di 8 ining pa manda Antia ariba 2-1 i Orsendo Clemencia a tira dos ining den relevo pa salba e partido.
Awe Antia ta enfrentá Aruba den e di dos partido den stadion Alfonso Carrasquel. E wega aki ta despues di e promé partido ku lo bai entre Nicaragua i Brazil.
E otro resultadonan di ayera ta:
Nicaragua a gana di Aruba 15-2.
Puerto Rico a logra triunfo di 9-4 riba Panamá
Mexico ta dal Venezuela 4-1.
Awe tin e siguiente partidonan:
Panamá-Mexico i Venezuela-Puerto Rico den stadion Enzo Hernandez.
Antia falta un viktoria mas pa klasifiká pa Mundial 2009.

Skina di Sorti, awe djabièrnè 3 di òktober di 2008, ta kuminsá ku deseá tur hende un bon dia. Esnan ku ta dediká nan mes na skirbi historia di nos pais, lo ta kore e riesgo di wòrdu tilda di ta kometé plagiarismo ora nan ta kubri e parti di korupshon. Te hasta si nan titulá e kapítulo komo Sosio-I, Sosio-II, Sosio-III i Sosio-IV, e echo ku e práktika ta krea asosiashon ku The Godfather-I (II,II,IV) ta keda difísil pa ignorá. Tur hende sa ta kiko ta sosodé rondó di e figura prinsipal, pero tòg, te hasta esnan ku lo mester sa mihó ta kai den e ret.
****
Algun luna pasá, mi a hasi referensia na un trabou analítiko di e katedrátiko, Emilio Martínez Navarro di Universidad de Murcia riba e fenómeno di deterioro di un sosiedat den otro intento pa spièrta dirigentenan di buena fe for di soño pa nan tuma nota ku tin un krísis sosio kultural serio na Kòrsou. Den seno polítiko, e deterioro den e kuadro di motivashon ta spantoso. Hopi hende ku a krea e persepshon di ta bin hasi e diferensia, aparentemente a brasa e filosofia “if you can’t beat them, join them”.
****
E katedrátiko Emilio Martínez Navarro di Universidad de Murcia manera mi a skirbi kaba den e kolumna anterior ta bisa ku: ”Una crisis de civilización sería, hablando en sentido estricto, un momento histórico en el que un determinado esquema de instituciones socio-económicas, políticas y culturales da claras muestras de que ha ido empeorando en sus capacidades para dar respuesta a las necesidades y aspiraciones de su propia gente”.

WILLEMSTAD – Kòrsou un biaha mas a resaltá den prensa internashonal i e biaha aki den merkado di kas. T’asina ku e revista Robb Report den su último edishon a saka e mihó sinku suidatnan internashonal pa kompra di un di dos kas.
Den e último edishon di e revista aki di òktober/novèmber, e outor Samantha Brooks a bisa ku nan a hasi un inventerisashon profundo di mas ku 50 suidat rònt mundu, di playa te serunan, di suidat te desierto, promé ku nan a redusí e lista final na 10 destinashon.
Entre e sinku finalistanan internashonal tin tambe Abu Dabi, Belize, Kroatia i St. Kitts and Nevis. Pa loke ta e merkado merikano e sinku mihó suidatnan pa kompra di un di dos kas ta Aspen, Las Vegas, Maui, Miami i Coeur d’Alene.
E rekonosimentu aki ta nifiká algu bon pa e merkado di dos kas di Kòrsou. Makelarnan lokal sigur lo por bai probechá di e notoriedat internashonal aki. Segun ekspertonan e reportahe internashonal aki sigur lo por bai resultá den un oumento den benta di tipo di kasnan asina aki.
E motibu prinsipal ku Kòrsou a keda skohé entre e sinku mihó suidatnan, ta pasobra segun e revista pa próksimo aña, e promé kasnan di Santa Barbara Pantation lo ta kla. “Ta un área grandi spesialmente pa resòrt i kasnan residenshal. Esaki sigur lo ta un motor tras di un kresementu pa Kòrsou.” Tambe e revista ta menshoná, ku meskos ku otro destinashonnan den Karibe, Kòrsou ta ofresé tantu merikanonan komo europeonan un kambio di moneda hopi atraktivo.

WASHINGTON, Merka, - E Kámara di Representante di Merka awe tin ku bolbe konsiderá aprobashon di e vershon revisá di e plan di reskate finansiero di 700.000 mion dollar, despues ku nan a rechasá e plan original djaluna último.
E rechaso a pone e merkadonan di balor na mundu kompletu tambaliá, pero Kámara di Representante a ekspresá optimismo di ku nan lo sigui e ehèmpel di Senado, ku a aprobá e proyekto di lei ku vários enmienda.
E lider di mayoria demókrata, Steny Hoyer, a bisa ku ta spera un mayoria bipartidista.
Sin embargo, durante e debate inisiá ayera nochi, vários kongresista demókrata a kuestioná e rekortenan di 150 mion dollar añadí n’e plan aprobá pa e senadornan.
Di otro banda, un grupo di representante republikano ke inkluí nan propio enmienda, ounke un alto pènel di Kámara Abou ya a sigurá ku lo no pèrmití variantenan.
Ounke a logra mas apoyo pa e plan, e presidente dama di Kámara di Representante, e demókrata Nancy Pelosi, a ekspresá ku lo no someté e plan na un votashon, si no tin e seguridat di keda aprobá.
E presidente merikano George W. Bush a urgí e legisladornan pa nan apoyá e plan revisá, dor di bisa ku e kréditonan ta di fris i e pakete ta representá e mihó oportunidat pa koregí e situashon.
“Esaki ta un proyekto di lei ku ta ofresé mihó oportunidat pa proveé likides, krédito, sèn pa negoshinan chikitu i mediano por funshoná”, Bush a afirmá despues di a reuní ku lidernan empresarial.

DAKE-KOKO
Catalina (80 aña)
Mihó konosí komo Catan
A laga atras su kasá Pedro Dake, yunan di kriansa Marlene i Hildo Martis-Martina, Wimbert i Edseline Dake-Albertus, ruman Petronilia Girigorie-Koko, ñetunan Dirishemar Martis i esposa, Dayanira Martis, Rovenska i Dayenne Dake. Akto di entiero ta djadumingu 5 di òktober for di El Señorial 4or pa santana San Willibrordus. Bishita 1or. Promé ku entiero tin un respòns na el Señorial 3.30or.

BERKEMEIJER
Herman J.
Mihó konosí komo Manchi di Langule
A laga atras su rumannan Theo i Lidia del Prado-Emanuels, Marie i Jules Hoefdraad-Berkemeijer, Edwina Dijkhuizen-Berkemeijer, Violeta Sussebeek-Berkemeijer, Ludwig i Gilda Berkemeijer-Lascarro, Erwin i Emi Berkemeijer-Boekhoudt, Herbert i Sonja Berkemeijer-Balentina, Harold i Lorna Berkemeijer-van Aanholt, Winston Berkemeijer, Edward i Victoria Berkemeijer-Marion, Anton i Inneke Berkemeijer-Wolsink. Akto di entiero ta djasabra 4 òktober for di El Señorial pa santana Roodeweg. Bishita 9or-11or.

WOODS-LAKE
Miriam Almira
A laga atras su yunan Christine Hodge, Franklin Reed i esposa, ñetunan Jacqueline Martis, Liane Martis i D’angelo Macaya, Lisandra Martis, Gendall, Shendall, Joshua, Javier Reed, Jandenella Reed i Johan Hooi. Akto di entiero ta djaluna 6 di òktober for di misa Gr. Kwartier pa santana Bethania. Bishita 9or-11or. Promé ku entiero tin un s.s. di misa 11or.

HAREL
Eldred Norman

Unidat di Bario Kòrsou a tene su segundo konferensha regional

WILLEMSTAD - Unidat di Bario Kòrsou a tene su segundo konferensha regional dianan 26 i 27 di sèptèmber último, e biaha aki ta trata di e Region Stat. Sede di e evenementu aki a keda efektuá den Sentro Parokial Sta. Famia.
Señor Rignaal (Jean) Francisca, un kofundador di Unidat di Bario Kòrsou , tabata e oradó di órden i a elaborá riba e 10 áreanan di desaroyo ku mas diskutí den e Region Stat i besindario.
Ta trata e siguiente áreanan di desaroyo: Desaroyo Ekonómiko, Sosial i Kultural, Seguridat, Medio Ambiente, Edukashon i Formashon, Infrastruktura Físiko, Salubridat, Agrikultura i Investigashon i Konosementu analisá i diskutí profundamente.
Sr. Orslie (Otty) Augusta djasabra 27 ,a elaborá riba tur e 10 puntonan, pa loko ta trata e parti di Punda den Region Stat, ku mas énfasis riba: Medio Ambiente ( Sushedat kompará ku 20 aña pasá a haña un kambio (Maneho di Medio Ambiente), Infrastruktura físiko (St.Jago, Monte Verde, Coronet i Nieuw Nederland, SOP den Skalo i Fleur di Mari i Pietermaai. Seguridat aki a referí na ilegalidat den barionan ku ta hasi e habitante bira insigur.
Seguidamente sr. Frank Palm na nòmber di Mundu Nobo a papia di e desaroyo ku lo bai tin den Mundu Nobo i áreanan ku mester traha ariba ku ta entre otro deporte i rekreo, karteranan den mal estado i falta di un maneho pa atendé ku bibienda dekaí den bario.

WILLEMSTAD - Resientemente kuater kolega na LPO a keda honrá debí ku nan a kumpli 25 aña di servisio. Ta trata aki di koleganan Ronald Gosepa, Marlon Sillé, Jeffrey Martina i Edward Margarita.
Ronald Gosepa ta traha komo Chef Kok na LPO i tin 25 aña den e trabou na kushina di LPO.
Marlon Sillé ta alto inspektor i ‘Chef Specialistische Opleidingen en Leiderschapstrajecten i tin 25 aña den Kuerpo Polisial di Antia Ulandes. Marlon Sillé a traha hopi aña na Kuerpo Polisial Isla riba. Jeffrey Martina tambe a kumpli 25 aña den servisio di KPNA, Jeffrey Martina ta dosente i alabes enkargá ku Relashon Públiko na LPO. Jeffrey a traha 20 aña na Kuerpo Polisial Kòrsou. Edward Margarita ta dosente di Opleidingnan Spesialisá na LPO. Margarita tin un aña na LPO despues di a traha 24 aña na Kuerpo Polisial Kòrsou, di kual 21 na Departamentu di Tráfiko.
Durante un seremonia den presensia di koleganan den formashon i demas koleganan, direktor di LPO na nòmber di Gobièrnu di Antia a entregá e dekretonan Gubernamental i di Rekonosimentu na koleganan ariba menshoná.
Direktor di LPO i a gradisí e hubilarionan pa nan añanan di servisio na Kuerpo Polisial (LPO) en partikular i pueblo di Kòrsou i Antia en general. Tambe direktor a repasá e karera di e dos koleganan aki.
E hubilarionan a dirigí palabra i gradisí Dios, famia i koleganan ku a kontribuí pa nan por a traha tantu aña asina na bienestar di komunidat. Nan a konta algun momentu di nan karera.

WILLEMSTAD /KRALENDIJK - E situashon misterioso di desaparishon di Marlies van der Kouwe, un studiante ku tabata kore stazje na Botica Bonaire komo botikario te ainda ta sin solushon, no opstante tur búskeda, no opstante e diferente pistanan ku a subi mesa. No tin nada konkreto te ainda i e wikènt aki ta hasi dos siman ku e damita a disparsé. Polis mes no ta dunando masha informashon último dianan aki riba e kaso, pendiente desaroyo di e kaso mes.
Polis ta buskando e tas di Marlies van der Kouwe ku e lo mester tabatin huntu kuné e anochi en kuestion. Ta trata di un tas di paña ku riba dje e palabranan “Bonaire Divers’ Paradise”. Ta pidiendo tur hende ku por sa algu di e tas,pa drenta den kontakto ku polis. E tas posiblemente por kondusí na mas klaridat.
Tin un batayon di polis, reshèrshi i otro funshonarionan hudisial riba e kaso awor aki, tantu di Boneiru mes komo di Kòrsou i di Ulanda. Anteriormente, sekretario di Estado pa Relashon den Reino Ank Bijleveld a bisa ku e kaso di desaparishon di e dama ulandes Marlies van der Kouwe i e nesesidat pa Ulanda pa manda eksperto pa yuda den su búskeda, ta un ehèmpel klásiko pakiko ta asina importante pa kuerponan polisial di paisnan den Reino traha huntu.
Bijleveld, manera ta konosí anteriormente e siman aki a papia ku outoridatnan hudisial di e isla, responsabel pa e investigashon. El a papia ku loke el a yama e “driehoek” ku ta kondusiendo e investigashon, ku ta gezaghèber di Boneiru Herbert Domacasse, fiskal David van Delft i hefe di kuerpo polisial di Boneiru John Schagen.